رواية صراع الجبابرة للكاتبة روز الفياض الفصل الخامس والعشرون
كلما دارت عجلة الحياة اسفرت عن احداث جديدة.
احداث متباينةٍ في شدتها مابين حزن وفرح.
لكننا كبشر خُلِقنا عجولين.
قليلي الصبر كثيري الهم والشكوى.
نستعجل الحزن خوفاً من نتيجتهِ.
واي نتيجة ترجى من قلوب وجلة.
جان اكو مثل المسطبة بحديقتنه. كعد حسام وكلي: كعدي
شمه: لاشكرا مرتاحة هيج
حسام: يعني امج مكلتلج انج انخطبتي؟
كلي بأبتسامة.
هنا حسيت الدنيا مسايعتني من الفرحة بس حاولت ماابين هالشي كدام حسام بس حسيت مبين من عيوني حسيت وجهي بين عليه الفرح، واخيراً، واخيراً ياايوب اجيت وحجيت، اويلي شكد انتظرت هاللحظة.
شمه: لا مكالت.
حسام: شعجب؟
شمه: ماادري.
حسام: جا كعدي خل احجيلج.
شمه: لا احجي عادي.
حسام: بكيفج..
مد ايده بجيبه وكلي: اول شي هاج. هاي شريحة جديدة.
اخذتها كتله: شكراً.
حسام: شوفي يابت الناس. انتي تعرفيني مو صح؟ انه دكتور جامعي ومتخرجة من جوه ايدي اجيال. والحمدلله مااحتاج امدح نفسي بس انه انسان مثقف الحمدلله ومرتي جانت خوش مره تسمع الكلام ومطيعه بس اتوفت وعافتلي اربع اجهال خل نكول همه هسه مو جهال مراهقين صاروا.
صفنت شجاب مرته وجهاله بالنص وشجاب شهادته وثقافته بالموضوع؟
شمه: الله يرحمها ويعوضك بأولادك ان شاءالله.
ضحك كال: لا اولادي بيهم خير خليهم من يكبرون يبنون نفسهم، مااريدهم يعوضوني.
شمه: ههه ليش؟
حسام: لا خوما ترديني ابقى بدون زواج وانتظرهم يكبرون ويعوضوني؟ شحصل وشستفاد من عوضهم؟
استغربت رده بس كتله: الله كريم
حسام: انه كلت انتي ارملة وعدج ولد زغير وبعدج زغيرة وحلوة يعني صعب تعيشين بهالمجتمع بحدج. وانه هم ارمل وعندي جهال محتاجين ام فوك راسهم تراقبهم وتشوف طلباتي وطلباتهم وكلت ماالكه احسن منج.
يمه حسيت راح يغمى علي من الصدمة.
ايوب وين بالموضوع؟ ماكو ايوب؟ وهذا جاي يريد يخطبني لنفسه؟ والكارثة امي تعرف ومكلتلي اي شي.
حسام: بعد انتي فكري بالموضوع لان انه فكرت بي كلش زين قبل لا احاجي امج ومن شفت امج مرحبه بالموضوع كلت بعد لابد اجي واكلج..
شمه: بس امي محجتلي شي
حسام: ميخالف ماصار شي هاي انه اجيت بنفسي وحجيت وياج.
شمه: اي اوك بس اني مااريد اتزوج وهي تعرف بهالشي.
حسام: لاا؟ شو جنها فرحت من حجيت وياها؟
شمه: وعلى شنو تفرح، زوجي مصارلة هوايه من اتوفى لذلك شايلة فكرة الزواج من راسي حالياً.
حسام: بعد الزواج سنة الحياة هاي معروفة. قابل لشوكت راح تبقين بدون زواج؟ اول وتالي راح تتزوجين اصلا انتي ياهو الج لو ماتت امج؟
شمه: اسم الله شهالحجي
حسام: لا والله هذا الصدك بعد ليش نجذب كلها تموت الموت حق هاي ام رقية مو ازغر من امج بس ماتت.
شمه: ان شاءالله يومي قبل يومها.
حسام: لا يمعودة شنو كل مااتزوج وحده تموت هههه.
شمه: مو تكول الموت حق.
حسام: هسه عالعموم انه حجيت كل العندي وانتي فكري بس تره انه انسب واحد الج ولوضعج وظروفج اثنينه نفس الوضع ومو غرب ليش بعدين تقبلين بواحد غريب ماتعرفين خيره من شره؟ مو صحيح؟
شمه: اي صحيح ظروفي ووضعي. سبحان الله كلها تفكر بظروفي ووضعي. لاغريب ولاقريب كتلك هالموضوع شايلته من راسي هسه.
حسام: انتي فكري عود وبعدين نحجي.
مجاوبته بعد اصلاً كرهته.
اسلوبه مستفز وعبالك فد نمونه لو فد عالم ذرة جنابه.
وشجابك على حظي بهالوقت هذا!
طلع قبل مينتظر امي تكمل صلاتها.
بعد احسن.
رجعت جوه للبيت لكيت العشا محترك والدخانه صايرة للظالين همزين ماصاير شي اكبر.
طفيت الطباخ وذبيت الاكل ورحت كعدت يم امي منتظرتها تكمل الصلاة حتى اسألها عن هالكارثة.
كارثة لان خايفة من رد امي عالموضوع والمخوفني اكثر ليش مكلتلي من اول محجه ويااها؟
خلصت امي صلاة ودارت علي كلتلي: منو دك الباب؟
شمه: ابن خالتج
امي: منو ابو رقية؟
هزيت راسي اي وكتلها: اي
امي: لعد وينه ليش مدخل يسلم علي؟
شمه: مجاي يسلم عليج هو..
امي: لعد؟
شمه: جاي يكولي عالموضوع الحاجي وياج بي.
غلست امي وكامت شالت مصلايتها ورجعت كالت: شكلج؟
شمه: كلي اريد مره تشوف طلباتي وطلبات جهالي.
امي: اي؟
شمه: اي، شنو تردين تعرفين اكثر من هيج واحد جاي من باب القرابة يريد يخطب بتج إلى هو بكد عمرها مرتين حتى تلبي طلباته واحتياجاته وتخدم اولاده.
امي: امم شكتيله؟
شمه: شكتله يعني؟ لا طبعاً كتله مااريد اتزوج غير زوجي مصارلة هواي من اتوفى شتكول علي الناس من تسمع.
امي: اي هو حاجاني من رحنه ذاك اليوم الهم بيوم الثواب إلى مسوية بالسنوية مالت زوجته وكتله الله كريم وين تلكه احسن منك.
شمه: لا بالله شنو على جماله على كماله ووين الكه احسن منه؟ اذا هو بيوم سنوية زوجته حاجاج بموضوع يريد يخطب لعد شكد عنده احساس هذا شكد وفي..
فريت ايدي وكتلها: والله يالله بلوه ماادري شبيها الناس متخبلة، اذا اريد اتزوج اتزوج واحد قريب لعمري وماعنده هلكد اطفال شجابرني
امي: عالاقل نعرفه
شمه: شنعرف منه تره خوالج توه عرفتيهم وعرفوج
امي: هسه طول هالمده معرفتيه؟
شمه: لا عرفته ولااريد اعرفه. اصلاً مااحب اسلوبه عبالك بس هو عنده شهاده وبس هو استاذ جامعي.
امي: من حقه يتباهى بنفسه
شمه: يتباهى بنفسه شي راجعة بس مال حاول يسوي نفسه متفضل علي متزوجني لاااء
امي: يمه منج. لو كرهتي احد صدك لو كالوا.
شمه: شكالوا؟
امي: لو حبتك عيني ماضامك الدهر.
شمه: ماما لتحاولين. مااحبه مو بيدي مااستلطفه مااتحمل الكلام وياه اكثر من عشر دقايق ينرفزني مو بعد اتزوجه واكابله ليل ونهار شلون اتحمله؟
امي: ميخالف فكري، مرات جبير وشايف نفسه بس معنده سوالف مكسرة احسن من زغير ويلعب بعقول البنات الشابات.
حسيتها تلمح لايوب.
كتلها: ومنو كلج لعب علي تره يتمنى بس اوافق ويجي يدك الباب ويخطب.
امي: اي ظلي بهاي عقليتج منو يجي يضحك عليج وانتي صدكي لحد متفوتج كل الفرص الزينه وتبقين وبعدين تضطرين تقبلين بأي واحد يدك بابج حتى لو مو زين بس علمود تحصلين على الامان والسند.
شمه: هسه اني ماافتهم انتي بس وافقي واني اخليه يجي لهنا للبصرة وكولي بعدين يضحك علي.
امي: لا اوافق ولا شي ابقي هيجي حمضي يمي وتالي اتندمي وظلي عضي اصابعج.
اوافق. اوافق على شنو؟ على واحد زوجته ميكدر يعيش وياها ابليس؟ مو اجت وسوتلنه قصة وجان انفضحنه بالمنطقة من وراها؟ لو اوافق على واحد ابوه عينه نكسة وحاطها عينه عليج؟
تفتهمين انتي شدتحجين؟ شلون تقبلين بواحد هو وابوه ينظرلج نظره شهوانية.
شمه: ماما على كيفج، تره ايوب مو مثل ابوه، انتي شفتيه وشفتي اخلاقة مو مثل ابوه.
امي: مو اكولج متفتهمين وتصدكين بكل شي هسه دكوليله خل يجي ويتقدم اذا اجه اكص ايدي.
شمه: تتراهنين؟
امي: على ابو رقية اذا طلع هذا جذاب تقبلين بابو رقية وتخلصيني مااريد افكر واشيل همج شمه. فكري بعقل.
شمه: ميخالف بس اذا اجه توافقين متطلعين حجج ومصطفى والناس والجيران؟ كافي اريد اعيش.
امي: نشوف بالله. بس اذا طلع يلعب عليج ياشمه خاف ذيج المرة جبتج البصرة هالمرة امشيج عالصراط المستقيم. اتذكري كلامي زين قبل متوافقين.
شمه: واذا طلع كلامي اني الصح نرجع لبغداد. زين ماما؟ لان اموت اذا بقيت هنا. ترديني اموت؟
امي: دكومي كومي سويلنه شي ناكله شنو هالريحة هاي شحترك؟
شمه: كلبي، كلبي عطب من وراج.
ضحكت امي وكلتلي: دروحي الله ينطيج حركت العشا وكعدت تدور حبيات واحنه متنه من الجوع.
شمه: ماما فدوه الله يخليج لتعامليني مثل الاطفال تره اني جبيرة عوفي الاكل والعشا وسمعيني لو مره بحياتج.
امي: ميحتاج اسمعج اعرف كل الزين شنو تفكرين وشنو بكلبج وشنو تردين تكولين..
وتبقين بنظري طفله مهما كبرتي، وكل تصرفاتي المعاجابتج هي لمصلحتج ولان اخاف عليج.
قابل مااحبج لو اريد أءذيج؟
شمه: شسوي هسه يعني؟
امي: فكري بعقل خلي عقلج براسج لتمشين وره كلبج هذا متزوج مرته مراح تعوفج بحالج وراح تخلي يكره الساعة العرفج بيها..
بعدين انتي متستحين؟ مو داكولج ابوه حاط عينه عليج ووصلج لبيت دعارة شلون الج نفس بي بعد؟ شلون تأمنين على نفسج وياه؟
كلام امي عن ايوب بهالطريقة يأذيني لان اعرف ومتاكده انه ايوب مو مثل ابوه مختلف.
شمه: ياربي. ياربي. ماما انتي متعرفيه مثلي مو مثل ابوه والله مو مثل ابوه انتي شفتيه مرتين يمكن وكلتي خوش ولد بس اني اعرفه اكثر منج هو اللي نقلني من شركتهم حتى ابوه ميأذيني وجنت مااعرفه ولابيني وبينه شي وجنت اكرههه تعرفين يعني شنو اكرههه بس مع ذلك ساعدني ومكال الشغل عن طريقه، مراد يكطع رزقي.
امي: ومنو كلج مجان راسم عليج من الاول ونقلج حتى تبقين اله لوحده مو هو وابوه.
شمه: بالقران هاي كلها حجج. انتي تطلعين حجج حتى بس تخليني اقبل بابن خالتج.
واني مااريده لو شيصير. لو تنطبك السما عالارض مااريده.
امي: متعودة عالمشاكل والنكد متردين ترتاحين، تردين ضره يوميه تسويلج مشكلة وسحر. هذا عالاقل خالي مختلي ماعنده لازوجة ولاغيرها.
شمه: لااا؟ بس عنده اربع جهال يريدني اشوف طلباتهم.
امي: لتطويلها وهي كصيرة. روحي طلعينه اجبان وفطاير وخلينه نتعشا حتى انام.
شمه: استغفر الله ربي. استغفر الله..
كمت بتذمر وعصبية واني هالمرة متفائلة احس امي بدت تقتنع مادام قبلت تسمعني وتتناقش وياي معناها اكو امل.
يالله ياايوب وينك مو خلص صبري. دتعال خليها تصدك انت تحبني. خليها تسمعك وتقتنع بكلامك.
وين صرت؟
ياخوفي يطلع كلام امي صحيح..
لا مااصدك.
مااصدك.
اكيد تحبني. اكيد.
غير اموت اذا طلع هذا كله جذب وتمثيل.
ثاني يوم خابرتني لمياء وصدمتني.
لمياء: اريد اكولج شي.
شمه: گولي.
لمياء: راح نسافر
شمه: هاا؟ وين؟
لمياء: لعمان
شمه: بالعافية حبي سفرة سعيدة ان شاءالله
لمياء: لا ياسعيدة ياعافية.
شمه: ليش؟ شكو؟ رايحين للعلاج؟
لمياء: لاء، بس خالتي بأمريكا سوتلنه دعوه من زماان وهسه يالله كملت امورنه.
شمه: يعني شنو؟
لمياء: يعني راح نروح لعمان ومناك لامريكا.
شمه: يعني بعد مترجعون؟
لمياء: اي بعد وين نرجع نبقى هناك هو إلى يطلع بعد هم يشتهي يرجع.
انصدمت وانقهرت كتلها: لا لتكولين، منو يبقى وياي لعد؟ منو يدوخني وضحكني؟ مو بكيفج مترحين. لج ماعندي صديقات غيرج.
لمياء: ابجي. ابجي مااوصيج.
شمه: والله دمعت عيوني. ليش ترحين منو إلى اذا رحتي؟ منو ينقل اخباري لاوبي؟
لمياء: واخيراً اقتنعتي بأسم اوبي هههههه.
شمه: مو وكت ضحك هسه اني انقهرت وضجت. ابد مو وكت سفركم هسه.
لمياء: العفو عيني اسفين منعرف بيج متضايقه.
شمه: انجبي.
لمياء: خليني اروح اشوف الدنيا اشوف العالم اشوف الناس اشوف الشباب.
شمه: ههههههه انتي كولي علمود هاي الاخيرة رايحة
لمياء: اي شسوي ايست من العراقي هسه لازم ادور من دول الجوار واذا هم ماكو اندور بالخارج ههههههه بلكي واحد امه داعيه عليه ههههههه.
شمه: شفايتله اصلاً وحده مثلج وين يحصل.
لمياء: اووي فداوي اول مره احد يتغزل بيه.
شمه: لمياء؟
لمياء: هاا؟
شمه: صدك تحجين لو تردين بس تقهريني؟
لمياء: لا والنبي خلصنه كل امورنه وباجر موعد طيارتنه.
شمه: باجر؟!
لمياء: اي باجر
شمه: ياحقيرة يعني جنتي تدرين وراكم سفر ومكلتي حتى اهيئ نفسي واتعود على فراكج.
لمياء: خفت من الحسد هههههه
شمه: عوبه. ضوجتيني حيل، عود جنت اريد اكولج امي بدت تلين. المن اشتكي بعد اذا سافرتي؟
لمياء: بس نستقر هناك اخلي شريحة ونرجع نتواصل اصلا اني وين اكدر ما امارس مهمتي بالحياة.
شمه: يامهمة؟
لمياء: الاصلاح وحفظ الامن بين العشاق.
شمه: هههههههههه قوية مال الاصلاح ليش مو محاربة الفساد ههههه
لمياء: لا مو بصالحكم اذا محاربة الفساد فانتو اول اثنين احسابكم
شمه: لا يا ادب، مااريد اغلط عليج اكثر وراج سفر.
لمياء: عوفج هسه مني ومن السفر شبيها امج مساع كلتي ماانتبهت.
شمه: كتلج امي بدت تلين علمود موضوعنه اني وايوب.
لمياء: يالله، خوش خبر هذا
شمه: بس هو وينه؟ هو مختفي.
لمياء: اي غير الحية ام راسين هسه كالبة الدنيا عليه شعبالج خوما ثاني يوم ي رجع اكيد صارتله مشاكل ويجوز استاذ مؤيد رجع بكلامه هو وامه شمدرينه شنو ظروفه.
شمه: صحيح اني وياج بس غير يتصل يبرر او يطمني عالاقل بدل مباقيه اخذ وانطي وحدي وراح اتخبل من الحجي ويه روحي.
لمياء: لاء حبيبتي، انتي اصلاً مخبلة فلتخافين يعني..
شمه: شوف العاقلة التحجي..
لمياء: اليوم اتصل بي واشوف شنو فلمه شعنده هيجي مختفي واودعه فد مره، راح اشتاقلكم احل مشاكل منو هناك اذا سافرت؟
شمه: اي عفيه اتصلي عليه شوفيه بس على اساس انتي من نفسج سألتي عليه مو اني طلبت منج. زين؟
لمياء: اي لا اكيد هالشي
شمه: مادام كلتي اكيد معناها راح تتصلين وتحجين كل شي اعرفج.
لمياء: ليش تظلميني؟ ليش؟ لان فقيرة واكسر الخاطر؟
شمه: ههههههه لا بس لان على كولت اوبي عميل مزدوج.
لمياء: عليج الله هو كال هيج؟
شمه: اي والله هههههه
لمياء: هههههههههههههههههههههههههههههههههههه صدوك تره اني مثل العميل المزدوج ماادري اشتغل لصالح منو، وهسه هم اروح انقل اخباركم لاوستاذ مؤيد هههههههههههههههه.
شمه: اكول؟
لمياء: شكو؟ كولي
شمه: انخطبت.
لمياء: هاااا؟ بس لا اوبي اجه خطبج من ورايه؟ تسووها انتي وياها حتى لا اطالبكم بالايفون.
شمه: ياادي الايفون، لج ياايفون يااوبي. اوبي يخطبني واظل كاعده صار ساعة احجي وياج شبيه مخبله.
لمياء: ياااا لعد وين تولين؟
شمه: مااولي بس ابقى احجي وياه ليل ونهار
لمياء: ممم ناس مشايفة ماعليكم عتب، بس هو مو صوجكم صوج حبيبي زوجي المستقبلي الطايح الحظ إلى مكابل امه لهسه وميريد يدور علي ويلكاني..
شمه: هههههههه ميريد يتورط.
لمياء: عوفج منه اني اعلمه من اعرفه ويخطبني، بس كوليلي منو هذا تعيس الحظ الخطبج؟ لاء لاء لتكولين إلى ابالي؟
شمه: اي هو.
لمياء: تاجر المخدرات؟ عزا هذا شلزك مو توه زوجته متوفيه صارلها سنه مو؟
شمه: اي. هذا يعتبر وفي وبقمة الوفاء لان صبر لحد سنة الاغلبيه حدهم للاربعين. ولو هو هم مو خير حاول يخطب قبل بس ماادري ليش البنية رافضته.
لمياء: رفضوا لجوئه للجنه كولي آمين، يعني نخلص من الحجي يطلع وائل نخلص من وائل يطلع هذا غراب الخرايب.
شمه: بس اني حجيت ويه امي وكتلها مااريده اريد اوبي..
لمياء: وشكالت؟
شمه: كالت اوبي يلعب علي ميريد يخطبني..
لمياء: عندي حل لازمة امج.
شمه: شنو كولي شمنتظرة؟
لمياء: امج الظاهر عدها تصحر اكثر مني زوجيها.
شمه: لا ياسخيفة هههههههههههههههههههههههههههههههههههههه.
لمياء: كيفج ابقي ضحكي.
شمه: عابتلج.
لمياء: وهسه شراح تسوين؟
شمه: شسوي يعني كتله ماافكر بالزواج هسه يكولي اني احسن من الغريب واني ارمل وانتي ارمله ومن هالحجي إلى سامعته اكثر من اسمي منو يشوفني يعيد علي نفس الموشح ارملة وظروفج ووضعج.
لمياء: لا لازم اخذج وياي لامريكا انتي بدوني تضيعين وراح تلتف عليج الذئاب.
شمه: هههههه يالله اخذيني
لمياء: لا ضميري يمنعني اخاف على اوبي ينهار
شمه: ههههههههههههههههعههههه لج اني شلون بدونج سشوي اذا رحتي.
لمياء: خليني اروح اشوف مستقبلي يمعوده وادور هذا مشعول الصفحة وينه لهسه ممبين.
شمه: منو؟
لمياء: زوجي.
شمه: ههههههه الله يستر عالضحك الضحكته اليوم كافي لتضحكيني بعد.
لمياء: شنو لتضحكيني شايفة قرد كدامج؟
شمه: هههههههههههههههههههههه يمه بطني ظلت توجعني من الضحك.
---
---
الاصدقاء الطيبون رزقٌ يسوقه الله للانسان.
فتمسكوا بذلك الصديق الغريب الذي تحمله لكم الايام مهما حصل.
فالاصدقاء في هذا الزمن نادرون كالعملة الصعبة.
فليس كل صديق يستحق هذه التسمية وليس كل من اسدى لك جميلاً يعتبر صديق.
ميز بين الناس في حياتك.
---
ايوب..
رجعنه من البصرة.
وحجيت لامي على إلى صار كتلها شفت شمهوحجيت وياها وهسه لازم اشوف ناس من اهلنه يكدرون يتواصلون ويه امها واهلها.
امي: اي بس غير تحجي ويه مرتك ويه عمك؟
ايوب: اي طبعاً بس بالاول خلي اوصل لاهلها وكرايبها واخذ الاوكي وبعدين ابدي بالمشاكل.
امي: لا ان شاءالله ماكو مشاكل بس كول يارب.
ايوب: يارب
امي: عاد كون حلوه.
ضحكت كتلها: حلوه
امي: ماعندك صورتها؟
ايوب: لا عندي بتليفوني القديم صورتها بالسي ?ي بس مو واضحة.
امي: نريد نشوفها بعد غير راح تصير جنتنه ههههه.
ايوب: ههههه ان شاءالله تصير جنتج وتشبعين منها.
امي: شكد عمرها؟
ايوب: 27
امي: شوكت لحكت اتزوجت واترملت؟
ايوب: وره الزواج بمدة بسيطة انقتل زوجها.
امي: لا اله الا الله شلون انقتل؟
ايوب: سلبوا سيارته وقتلوه عالطريق السريع بين بغداد وكركوك.
امي: اوووي. الله ينتقم منهم كم ارمله بهالبلد صاروا وكم يتيم.
ايوب: شنسوي بعد هذا حال البلد.
امي: وابنها وين تخليه من تتزوجون؟
ايوب: وياها طبعا
امي: يعني تجيبه هنا؟
ايوب: طبعا تجيبه هنا ابنها طفل زغير خو متعوفه لااب ولاام.
امي: والله ماادري، اشوفها صعبة
ايوب: شنو الصعوبة البيها؟
امي: يعني تعوف ابنك وتربي ابن مرتك؟
ايوب: ابني يبقى ابني وامه مرتي قابل طلكتها، بعدين هذا طفل وهذا طفل بعدين هذا يتيم حتى مشايف ابوه.
امي: استغفر الله.
ايوب: لتفكرين يمه كله سهل ان شاءالله بس انتي ادعي الله يسهلها.
امي: والله ادعيلك الله يسهلك ويريح كلبك وبالك ادري بيك تريد البنيه. بعد شسوي. امرنا لله.
ايوب: ونعم بالله.
جنت كاعد واتذكرت اني شلون راح من بالي اشوف صورة نوارس لشمه حتى اتاكد هي اللي راحت ويه منى لو لا غيرها..
باجر لازم اروح اشوف منو يكدر يوصل لام شمه ويقنعها.
---
---
الحب والعذاب شيئان مترابطان معاً
فأن احببت فانتظر نصيبك من العذاب الحلو.