رواية صراع الجبابرة للكاتبة روز الفياض الفصل السادس والعشرون

رواية صراع الجبابرة للكاتبة روز الفياض الفصل السادس والعشرون

ايوب..
كدرت اوصل لناس يعرفون اهل ام شمه ووعدوني انه راح يتصلون بيهم ويجسون النبض حتى على ضوء النتيجة اتحرك اني.
طلبوا مني مهلة فد اسبوع لحد ميروحولهم او يتصلون بيهم ويفتحون وياهم الموضوع ويرجعولي الجواب.
جنت متوقع من ارجع الاكي مؤيد حاجي لبيت عمي بس لكيته محاجيلهم شي.
جنت مخلي ابالي بأي لحظة يتصلون بيه ويكولون ياالله تعال اخطب اهل البنية موافقين.

لهذا السبب جنت اركض منا ومنا حتى اخلص كل اشغالي الضرورية.
رجعت للبيت بالليل لكيت منى كاعدة تكرز حب كتلها: وينه اموري؟
منى: يم عمتي
كعدت عالجرباية باوعتلها بعالم ثاني كتلها: منو راح وياج لبيت شمه؟
باوعتلي بالبداية كأنها مستغربة. بس بعدين اتغير وجهها.
منى: شمه منو؟
ايوب: مو عليه هاي السوالف منى. تعرفيها ياشمه.
منى: مااعرفها، منو هاي النمونه حتى اعرفها؟
ايوب: جوابج هذا معناها عرفتي قصدي منو.
منو راحت وياج؟

منى: بعد الك عين وتسألني؟
ايوب: وليش مااسألج؟
منى: المفروض تنكسر عينك عالاقل
ايوب: مره الثانية اذا عدتيها متلومين الا نفسج افتهمتي. شنو مره اني حتى تنكسر عيني. طيح الله حظج
منى: لتغلط مااسمحلك.
ايوب: شوفي لج. قسماً بالله اذا متسكتين وتحترمين نفسج لاشوفج وجه مشايفته قبل. فوكما طالعة تفرفرين بالليل بالشوارع هم الج عين وتراددين.

رايحة للبنية لبيتهم ومتعاركة وياها ومسويتلها قصة وزين ماميته امها ومبتلين شنو هالطيحان الحظ هذا هاا؟
اشو بكيفج تتصرفين بكيفج تطلعين؟
منى: اي بكيفي شنو تريدني اشوفك تخوني وابقى حاطة ايدي على خدي؟
ايوب: اخونج هاا؟ من طيحان حظج اخونج، لو بيج خير ماخنتج ولا دورت على مره بره البيت.
منى: مره؟ وهي هاي هم محسوبه عالنسوان عشتوا مره. لو بيها خير جان اتزوجت مو باقيه تركض وره شكو واحد متزوج.

ايوب: اذا هي ممحسبوبة عالنسوان لعد منو المحسوبه انتي؟ ههه
منى: دروح روح جاي تقارني بهايه؟ وحده يمكن حتى عمي ماسلم منها من طيحان حظها.
ايوب: ادب سز.
جبتها براشدي لاول مره.
بس اجه باستحقاقها.
منى: اني تضربني ايوب؟ بسيطة اني الك.
ايوب: بسيطتين خاف ميعجبج زين واذا ميعجبج ضربي راسج بالحايط.
دخلت للحمام. سبحت وطلعت لكيتها تلم بملابسها بجنطة محاجيتها نزلت جوه اتعشه لكيت امي تسخنلي العشا وبيدها امير.

امي: هاا حبيبي الله يساعدك.
ايوب: هلا يمه الله يساعدج.
اخذت امير منها العب وياه كالت: صوتكم عالي انت ومرتك شبيكم؟
ايوب: طايحة حظ
امي: استغفر الله يعني احنه منرتاح من المشاكل كل يومين مشكلة جديدة.
ايوب: ماحامده الله على نعمتها.
امي: وينها هسه؟
ايوب: تلم ملابسها تريد تولي تروح لاهلها.
امي: ياا صدك جذب اهليش بهالليل شنو شصار بيناتكم؟

ايوب: يمه. هالمره اذا دافعتي عنها لو وكفتي بجانبها والله اعوف البيت واطلع وبعد متشوفين وجهي.
امي: ياا شبيك يمه صلي على محمد.
ايوب: هاي اني كتلج لو اني لو هي كافي ثمن سنين من عمري متحمل وساكت.
امي: صار. صار. بس على كيفك انت. اكعد اكعد ليروح يصير بيك شي منو يفيدني اني بعد منى لو ذيج الثانية.
كعدت واني استغفر ربي.
صبتلي امي العشا بس انسدت شهيتي.
بقيت كاعد العب ويه امير لحدما اندك الجرس.

طلعت شفت مؤيد: السلام عليكم
ايوب: وعليكم السلام
دخلت مؤيد للبيت كلي: شكو شصاير شبيكم؟
ايوب: ماكو شي
مؤيد: منى اتصلت بيه تبجي
ايوب: خليها هي تحجيلك
مؤيد: وينها هي؟
ايوب: فوك بغرفتها.
اتصل عليها مؤيد نزلت هي وجنطتها.
مؤيد: شكو؟ شبيج؟
منى: بعد ماابقى دقيقة وحده هنا اني مو ماعندي اهل حتى يضربني وابقى ساكتتله.
باوعلي مؤيد كلي: صاير شي؟
ايوب: اكو وحدة يعني تنضرب بدون سبب؟

منى: علمود هالكلبة صاحبته لان رحتلها لبيتها وطيحت حظها زعل عيني ميقبل واحد يحجي عليها.
مؤيد: ياصاحبة؟ عدك صاحبة انت عمي هههه؟
بقيت ساكت حسيت بالاحراج بس هي ردت عليه: السكرتيرة مالتك الطايحة حظ الاسمها شمه.
مؤيد انصدم.
ظل يباوعلي متفاجأ معرف شنو يحجي.
ايوب: لتظلين تخوطين بيها عوفي البنية بحالها واحترمي نفسج مادام النفسج عليج طيبه لهسه.

منى: لا مااعوفها. مااعوفها زين؟ مو بكيفك. تدافع عنها بعد فوكما دايح وياها هالدايحة البلا شرف.
اتدنيت اضربها بس مؤيد سبقني.
ضربها.
مؤيد: امشي يالله كدامي. هاي كدامي ولسانج شطوله بدون مستحى لعد وراي شتسوين وشتحجين؟ حقه عمي الرجال من يكول اريد اتزوج محد يلومه.
منى: والله على جثتي يجيب وحده على راسي.

مؤيد: شوفي ولج. بالقرآن بيدي اكص لسانج اذا متحترمين نفسج وتحجين عدل وتضبين لسانج اذا هو يستحي مني ومن ابوج يطيح يحظج فأني مااستحي اربيج من اول وجديد افتهمتي؟
ولي يالله كدامي للسيارة.
اتنهدت وبقيت ساكت. هي جرت جنطتها وطلعت.
امي: واموري؟ اشو راحت وعافته.
ايوب: هسه شدعوه هي تدري بي لو مهتمتله خلي يبقى هنا احسن.
مؤيد: لا خليه هنا عمه احسن خليها تتأدب مو هي العافت ابنها خليها ينشلع كلبها عليه.

ضحكت على كيف كتله: شينشلع كلبها عليه هي اصلاً تدري بي شياكل شيشرب شنو مسبحته ملبسته. ملتهيه بالطلعات والمشتره وامي العجوز المكسورة خادمتها وخادمة ابنها.
مؤيد: طايحة حظ حشاكم بعد شنكول.
اخذها مؤيد لبيت عمي وراح.
حسيته هم وانزاح عن كلبي.
هيجي جنت احسها. هم شي خانكني.
امي بقت ساكته متعرف شتحجي.
ايوب: يمه شيلي العشا مااريده.

امي: ليش حبيبي اكلك لكمة بعد اللي صار صار وهي راحت وهاي مؤيد اخذلك حقك بس ليش تضوج اتعشه يمه اتعشه. شوف حتى الولد انخلس من صياحكم. شنو ذنبه.
ايوب: ذنبه عنده هيجي ام متستحي.
امي: متخبله فد مره حتى مكالت لخاطر عمتي اسكت.
ايوب: هو لخاطر اخوها مسكتت تسكت لخاطرج انتي إلى تدافعين عنها وضامنتج.
امي: عود جنت اكول احسبها مثل بناتي.
ايوب: بناتج. اووف يابناتج.
امي: شبيك وياهن شمسويات؟

ايوب: اذا مطلعت هاي نوارس إلى رايحة وياها فلا اني.
امي: غير اطيح حظها.
ايوب: نشوف، كل شي اله يوم وينعرف.
مر يومين واني متوقع عمي يتصل حتى يحجي وياي بموضوع منى وشمه بس مااتصل. لاهو ولامؤيد.
خلصت شغلي ورحت مريت على مؤيد كلي: شنو قصتك ويه شمه؟
ايوب: شنو كلتلك منى؟
مؤيد: عوف اللي كالته منى اني اريد اسمع منك.
ايوب: اني كتلك قبل فترة اريد اتزوج وانت معارضت بالعكس.

مؤيد: ولا زلت بس اريد افهم الموضوع يعني انت عندك شي ويه البنية؟ لان هاي تكول عدها صور لمحادثاتكم.
ايوب: يهمك يعني اذا بيني وبينها شي؟ يعني هل راح يتغير شي بالموضوع من اكولك اي بيني وبينها شي؟ مثلا راح تتغير منى؟ لو راح ارتاح اني؟

مؤيد: لا مو عن يتغير شي ولا هي تتغير هي لو تفتهم جان من عرفت اكو بينك وبين شمه شي جان اتغيرت اني اكولكياها اختي مستحقة ماادافع عنها اني بس من حقي افتهم. اني شمه جنت احترمها لان فقيرة وخوش بنيه بس هسه اتغيرت نظرتي الها مو لان عدها شي وياك بس لو هي انسانة زينه جان موصلتلك الحجي ومكلتلك تره مرتك اجت هي واختك وسووا كيت وكيت.
هنا انحل لغز الشخصية الثانية المشاركة بالجريمة.

ايوب: هاا يعني نوارس اللي رايحه وياها؟ انعم الله عليها. اولاً البنية مثلما كلت انت فقيرة ومؤدبة وعدها عزة نفس وهذا الشي إلى خلاني اختارها.
ثانياً مو هي اللي كلتلي بروحتهن الها الله يشهد اني عرفت من صديقتها جانت تشتغل عدنه وهي حاجيتلها.

ثالثاً اختك طلعت بدون علمي وللمرة الثانية وهم بالليل ومجذبة على امي وكايلتها رايحة للسوك شنو هالاحترام الزايد هذا؟ يعني احنه يومية نفس المشاكل جاي تنعاد وهي ولاهامها ولاعدها استعداد تتعدل.
مؤيد: وابشرك اني هم ماادري بأختك رايحة وياها هم طالعة من وراي.
ايوب: وصللها هالكلام نوارس كوللها ايوب يكول بعد ماعندي اخت اسمها نوارس.

مؤيد: لا اكوللها ولا شي يطبها وجع اني هم مااحجي وياها من عرفت بيها طالعة بدون علمي، وضاله صارلها كم يوم كل متجي تحاجيني ازفها. قبل جنت انت تدخل من تشتكيلك هسه متكدر تشتكيلك وضاله وجهه فاهي.
ايوب: طاح حظهن.
مؤيد: اشوفها شمه بطلت منا علمود لا اعرف بيكم.
ايوب: لا مو صحيح هي اصلا مجانت تعرف اني متزوج اصلاً وعرفت من راحن الها هن.
مؤيد: شعرفهن بعنوانها؟

ايوب: شمدريني المصيبه امها مجانت تعرف ومتقصدات حاجيات كدام امها والمره العجوز واكعة ومن شايفاتها واكعة منهزمات والجيران جايين ناقيلها للمستشفى.
مؤيد: اي طبعاً ينهزمن اذا هن رايحات بالبوكه من وره زلمهن. وهسه؟

ايوب: لا هسه خلص حدي ويه منى لهنا وانتهى ماظل صبر عندي بعد البنية وامها شالوا للبصرة من وراها ومن وره الفضيحة المسويتها الهم اليسمع يكولك خايفة على بيتها ينخرب خطيه. وهي من راحت لهسه حتى مشالت التليفون وسألت على ابنها.
بقى مؤيد ساكت ميعرف شيكول لا هو كادر ينطي بزوجته ولا كادر ينطي أكثر بأخته.

طلعت من مؤيد اتصل بيه ابوي: هاا ولك كلب، مسوي روحك شريف هاا؟ صاير زلمه عود وتريد تتزوج على بت عمك لاياحقير بس هو صوجي اني السكتت ومفضحتك من ذيج المره. لا ياسرس، ي
ايوب: والله لو فاضحني احسن جان سويت بيه فضل واتزوجت من ذاك اليوم.
ابوي: كلب ابن الكلب اني اعلمك.
ايوب: على راحتك شتريد تسوي سوي. اصلاً متكدر تسوي شي.
ابوي: ناقص غيرة مو بيدك ولك ملكيت غير هاي؟

ايوب: لتكول مو زينه؟ تره اني لزمتك وانت تريد تقشمرها بفلوسك وهي متقبل هم گول جذب هههه.
ابوي: كلب مو بيدك تربية امك طايح الحظ.
ايوب: اشكرك ومقبولة منك. بعد اكو شي تريد تضيفه لو خلصت؟
سد التليفون بوجهي بس خلالني اغلي من العصبية، بعد فوكما هو اللي جان يريد يجر رجلها لطريق السوء هم اله عين ويحجي ويغلط ويتهم. بس هاي اكيد منى متصله بي ومشتكيتله.
بقينه اسبوع تقريباً جرجره بسبب منى وابوي.

ابوي اتعارك ويه امي وصارت هوسه جبيرة واخر شي امي اختارت: روح بعد لترجع. بيتي يتعذرك. هذا البيت بعد لتدوسه بيت هذا البيت نظيف بس انت واحد نكس، وجماله مسوي روحك حجي.
ابوي: شو شطيح حظ ابنج غير تربيتج هاي يريد يتزوج وحده طايحة حظ مثله بلا شرف وحده ساق، ة
امي: هسه صارت بلا شرف من عصت عليك مو؟ ادري بيها البنية انهزمت من وراك ومن وره عمايلك فاضحنه الله ياخذك. فاضحنه..

الله ياخذك ويخلصنه منك. ابنك هذا ابنك شوف الناس تحلف بأخلاقه وشوف انت محد يريدك محد يسأل عنك من وصاختك حتى اخوك ميريدك لان تجيبله الحجي الموزين كدام الناس مخجله وكاص وجهه.
ابوي: گبر حتى گبر الج ولابنج العار.
امي: لا والله الگبر الك كون ونخلص من شرك ومن سمعتك الوصخه وابني زلمه يرفع الراس مو مثلك العار انت تعرفه منو؟
راد يكوم يضربها بس اني لزمته: ايدك متمدها على امي.
ابوي: لا يا نا، ص ياعار.

ايوب: لهنا وكافي. يالله يمه انتي روحي لغرفتج كافي لتصيرين عصبيه اكثر مو زين عليج.
امي: خليني اريح كلبي خليني اطلع قهري مال سنين واني متحملته ومتحمله مكسراته. جان استحيت على شيباتك مو البكدك صاورا جوه التراب. خاف ربك عندك بنات.
ابوي: امشي ولي منا لانعل ابوج لابو الخلفج. لابو بناتج. طاح حطج وحظ بناتج.
ايوب: يمه كافي. كافي لخاطري عوفيه هو يروح.

امي: ابد والله لهنا وكافي اريد اموت واني كلبي بارد مااريد اموت واني شايله الهم من وره ابوك، بيتي بعد ميطبه للموت وهذا الحجي توصله لعمك.
ايوب: صار انت بس اهدي وارتاحي.
طلع ابوي من البيت وهو يحجي ويغلط ويدردم..
اخذت امي لغرفتها حسيتها تعبت.
رحت عصرتلها ليمون علمود ضغطها ميرتفع واتصلت بأمل وسهاد يجون يمها.

وفعلا آخر الليل امي اتخربط وضعها الصحي واخذناها للمستشفى وبقينه اني وامل وياها للصبح لحدما تأكدنه وضعها اتحسن وصارت زينه يالله طلعناها للبيت.
للظهر اجه عمي وحجه بموضوع منى وموضوعي اني وشمه: يعني هسه انت تريد تتزوج؟
ايوب: هي جنت على نفسها
عمي: وتريد تطلكها؟
ايوب: لا ليش اطلكها قابل اول واحد اني اتزوج اثنين؟
عمي: عمي هاي السالفة بيها اذيه ودوخة الك مو الهن. النسوان يحبن المشاكل.

ايوب: ماكو مشاكل ان شاءالله عمي، كل وحده راح تكون بحدها ابيت ومراح اقصر ان شاءالله ويه اي وحده بيهن.
عمي: اي بس هاي متقبل. منى متقبل.
ايوب: عمي انت مو مثل ابوي انت رجال صايم مصلي مسمي، رجال حقاني. مسوي شي اني حرام؟
عمي: لاحشاك
ايوب: زين هذا حقي لو مو حقي؟
عمي: حقك. نعرف حقك. بس المشاكل شلون بيها هاي شلون تقتنع؟

ايوب: اعذرني عمي بس اقتنعت او مقتنعت مراح فرق عندي بعد ثمن سنوات اني ساكت ومتحمل لخاطرك ولخاطر مؤيد وعمتي بس اني هم رجال محتاج مره تهتم بيه من حقي ارجع للبيت تعبان من الشغل الاكي مره منتظرتني مجهزه ملابس مجهزه عشاي. تدري بيه شنو محتاج ممحتاج. اريدلي مره من اگول هاي الشغله لاء خلص بعد متسويها ومتعيدها. مره كون تسمع كلمتي متستغل طيبتي واحترامي الها وسكوتي عن اغلاطها.

اتنهد عمي وجنه ضاج ويمكن زعل بس مكال شي اكثر من: بكيفك عمي بكيفك.
وبقوا بعدين هو وامي يتناقشون بخصوص ابوي والمشكلة الصارت بينه وبين امي وامي اشترطت على عمي ابوي ميجي للبيت بعد وطبعا احنه نعرف هذا الشي معناته ابوي هسه يروح يتزوج إلى تعجبه براحته.
رغم كل هالمشاكل جنت فرحان.
جنت اتمنى اكدر احجي وياها واحجيلها كل هالاخبار وكل هالاحداث اللي صارت.
لشوكت ابقى انتظر.

شوكت تصيرين مرتي وام بيتي. واخلص من هالدوخة بعد لا امج ولاامي ولاابوي ولامنى.
كل شي يصير گدام الناس. حلالي.
وارجع واكول اصبر.
اصبر هي كم يوم.
انت اتحملت كل هالسنين بقت على هالكم يوم متكدر تتحملها وتصبر.
مرات الاشياء النتمناها تتأخر. تتأخر حيل لدرجة نكول يمكن بعد متتحقق ويجوز نكول منريدها بعد.
بس الحقيقية احنه نبقى ننتظرها بفارغ الصبر.
لان كلما طالت مدة الانتظار زادت حلاوتها وقيمتها.
---
---.

كل صباح استفيق لانتظرك ولكن لاانت جئت ولا بشراك قد حلت..
---
---
شمه.
كل يوم اكول اليوم يجي ايوب لو يجي منه خبر بس ماكو شي.
لمياء سافرت لعمان وبقيت وحدي.
مثل الاعمى لااشوف ولااعرف شسوي وشتصرف.
حسام جان ساكت ومنتظرني افكر وانطيه خبر.
جنت يومية من اروح الدوام اتجنبه واتجنب شوفته.
بيوم من الايام جنت بالدوام وجانوا وياي بنات بنفس الغرفة نكعد.
وكت الغدا سألتني وحده منهم: شيعودلج دكتور حسام؟

شمه: اقاربنه ابن خالة امي.
كالت: اممم، بس مو جنه جبير عليج؟
مافهمت شقصدها كتلها: مافهمت قصدج؟ شنو يعني جبير علي؟
كالت: لا لا لاتفهمين قصدي غلط بس قصدي فرق العمر بينكم مو شويه.
يعني شعجب قبلتي بي؟
شمه: قبلت بشنو؟ شنو يعني قبلت بي.
كالت: تره كل احنه ندري بيكم مخطوبين كولي لتستحين هههه.
شمه: منو كلج هالحجي؟ منو كال مخطوبين؟
كالت: كل الجامعة تدري بدكتور حسام خطب..
شمه: مو صحيح هالكلام.

كالت الثانية: اني بأذني سمعته يكل لزينب هاي ام عيون الزرك.
شمه: منو زينب؟ يازينب؟
كالت: طالبة.
شمه: ممعقوله يكول هالحجي. اكيد انتي فاهمه غلط.
سكتوا بعد محد منهم حجت او علقت.
بقيت مكتئبة طول اليوم معقولة هذا هيجي كايل؟
مو بعيده هو اصلا اخوه مو بعقله اكيد هو هم يطلع عقله شاخط.
بس رجعت للبيت حجيت لامي: هذا ابن خالتج المراهق وين ميكعد بالجامعة يكول خطيبتي.
امي: ياهو؟

شمه: الدكتور الفريد من نوعه والنادر الوجود.
امي: منو كلج هالحجي؟
شمه: اليوم بالدوام سمعت الكلام من اثنين. نفرين حتى مو واحد واكول جذاب..
امي: وشكو بيها خل يكول.
شمه: شبيج ماما. صدك جذب يعني فرضاً اكو واحد يريد يتقدملي بي حظ وعليه القيمه والعتب من يسمع هالتفاهات مو يصدك ويدور وجهه ويروح. زين اني ارمله انوب هم انحسب مخطوبه وفاسخة لو شنو شكول للناس؟
حاولت بكلامي هذا اخلي امي تضوج منه وتصرف نظر عنه.

بقت ساكته بعدين كالت: لا ميجوز يسوي هيج عيب، كلامج صحيح. جان كتيلهم مو صحيح هالكلام.
شمه: طبعا حجيت وكلت ميصير اسكت واخليه ينشر اشاعة عني هسه عبالهم بيني وبينه شي لان كلولي شعجب قبلتي بي وهو هلكد جبير..
امي: يااا شوف الحظ. اخاف لان يشوفوا مهتم بيج ومداريج عبالهم هيجي؟
شمه: لا ماما لا كالوا سامعينه سمع اذن وهو يكول خطيبتي.
امي: انتي بعدج مرجعتيله خبر بعد شوكت صرتي خطيبته شلون يسوي هيج شنو بكيفه؟

شمه: حتى تلوميني لان اضوج منه.
امي: اي انتي تردين حجه عالرجال ومصدكتي لكيتي. تره ممكن بأي لحظة يتصل لو يجي حتى يعرف جوابج. حسمي امرج لتفشلينه ويه الرجال.
شمه: ما ااا رررر يييي ددد ه. لو ابقى بدون زواج اهون وارحم. مااطيقه هي كوه.
امي: وتبقين منتظرة لشوكت؟
شمه: انتظر شكد ماانتظر شعندي قابل كاعده بالشارع لو ميته من الجوع لو داخله بالعمرين؟

امي: اووف ياربي. بس العناد شاطره بي. بس خل اذكرج اذا مخطبج المخفي زوج ام لسان تقبلين بابن خالتي. مال تبقين هيجي اني مااضمنج باجر هم تحبيبلي واحد وتجي مرته تلزملنه الباب وتفضحنه.
شمه: إلى يسمعج يكول جنت يومية ويه واحد من شباب المنطقة
امي: انجبي.
شمه: انتي امي يعني معقولة متعرفيني؟
امي: جنت اعرفج ومأمنه بيج وبي واكول بنتي عاقله متغلط بس طلعتي لاعقل ولافهم.
شمه: آخخ وين راحت لمياء جنت اشتكيلها منج.

امي: قليلة ادب.
شمه: ماما عفيه لتصيرين جدية مااتحمل اسلوبج هذا ممتعودة عليج هيجي.
---
---
ايوب.
اتصل بيه واحد من عمامنه بالبصرة كال حصلوا خال البنية وحجوا وياه.
طريق الحب طريقٌ غير معبد.
ماان تخرج من حفرة حتى تقع في مسلك مجهولٍ وغامض.
لاتعرف لذلك الطريق نهاية.
فكلما قلت ها هي ذا النهاية وجدت نفسك قد عدت لاول الطريق.