رواية صراع الجبابرة للكاتبة روز الفياض الفصل الحادي والثلاثون
كلي: اوكفي بس احجي وياج.
شمه: رجاءاً بمكانك لا تقترب.
ركضت للمكتب دخلت وهو واكف بره.
كلولي الموظفين: شكو؟ شبيج؟
شمه: هذا واحد صاح علي ماادري وين يعرف اسمي مااعرفه بس قبل كم يوم اجانه للمكتب يحجز.
طلعوله الموظفين شافوه بره شوية ورجعوا كلولي: شمه هذا يكول متعرفني بس اعرفها..
يكول كرايب ايوب.
---
لكل منا سر يحتفظ به داخل قلبه لايبوح به لاحد وانت ذلك السر الذي لااستطيع البحوح به حتى لنفسي.
اخاف عليك من عيون الناس حتى بعد رحيلك عني.
اخاف ان تصيبيني عين حاسد فأنساك.
تمسك. تمسك ارجوك..
تمسك بشراييني واردتي تغلغل في دمي اكثر فانا لااقوى على العيش من دون وجودك في حياتي.
حتى ولو كنت على هيئة مرض.
---
---
ظليت بوضع معرفته للحظات هو صدمة لو خوف؟
منو هذا؟
وشنو كرايب ايوب شيريد مني؟
ووين عرفني؟
وشعرفه بمكاني؟
بس لا سرمد كايل لايوب عني وعن مكاني؟
معقولة؟
اي حتى اثنينهم يلعبون عليج.
طلعتله لان ماردت احجي شي كدام الموظفين.
شمه: نعم اخي اتفضل؟ شرايد؟
كلي: اول شي السلام عليكم
شمه: وعليكم السلام
كلي: اسمحيلي بالاول اعرفج على نفسي حتى لتخافين مني، اني ايهاب زوج اخت ايوب..
اخته نور اذا تعرفيها او سامعة بيها؟
شمه: نعم شبيها؟ اكو شي مهم لو شنو؟
كلي بشقى: انتي بس اعصابج اهدي شوية حتى اعرف احجي هههه.
اتنهدت وبقيت ساكته.
ايهاب: طبعاً اني اعرف اللي بينج وبين ايوب من نور حاجيتلي واجيت قبل يومين احجز للبصرة وشفتج بس مااعرفج بس من خلال النقاش اللي صار بيني وبينج وبين الموظفين سمعت البنية الثانية كالت شمه فاتذكرت الاسم بس هم متوقعت انتي هي شمه رغم الاسم تقريباً نادر قليل ناس يمكن تسمي شمه بس من شفت الولد الزغير من طلعتي وراه كلت يمكن هي.
شمه: وبعدين؟
ايهاب: البارحة اتذكرت وحجيت لنور وكلتلي اسألج اذا انتي هي لو لا.
شمه: واذا طلعت هي؟ خير؟
ايهاب: لا اني هسه تأكدت انتي هي مادام رجعتي وقبلتي تحجين وياي من عرفتي اني من طرفه.
بقيت ساكتة.
بعدين كتله: المطلوب هسه شنو؟ شيريد ايوب واهله بعد مني؟
ايهاب: لا لا مو هيج التفاهم.
عموماً اني وكفتي وياج طولت وانتي جنت طالعة يمكن البيت يجوز عطلتج بس نور رادت رقمج حتى تحجي وياج.
شمه: ايبااه. وعلى اي اساس انطيك رقمي؟
ايهاب: يابه لتنطيني رقمج. اني انطيج رقمها واتصلي بيها.
بقيت واكفة متحنطة بعدين كتله: وليش اتصل بيها؟
ايهاب: اكو شي مهم هي رادت تكولج عليه.
شمه: انت كولي اذا لهدرجة مهم.
ايهاب: عادي اكدر اكولج بس انتو نسوان وتفتهمون بعض احسن.
يالله طلعي التليفون خل اردلج الرقم.
تأففت وطلعت التليفون ردلي الرقم.
ايهاب: بس اتصلي عفيه هاا..
هي منتظره رقمج بس هسه بعد انتي اتصلي بيها اني هسه راح اكوللها تجاوبج اذا اتصلتي.
بس اتصلي لان اذا متتصلين راح تجي هي بنفسها.
شمه: اففف. الله كريم.
ايهاب: ياخويه حقج تزعلين بس افتهمي الموضوع منها وبعدين اذا معجبج الحجي حظريها.
شمه: الله كريم
راح وعافني صفنه تاخذني وصفنه تجيبني.
الموظفين الوياي جانوا واكفين بالمكتب يباوعون لان شافوني بالبداية خفت منه.
من راح كلولي: هاا؟
شمه: اقاربنه من بعيد.
سكتوا. رحت للبيت وطول الطريق افكر اخاف هذا فخ من سرمد؟
لازم ابقى حذره وماانطي الامان لاحد، .
محجيت شي لامي وبقيت اليوم كله محتارة اتصل لو لا.
بقيت لليل محتاره مااعرف شلون اتصرف.
اخر شي قررت مااتصل.
كافي الاهانات الاجتني منه ومن اهله.
مااريده يرجع لحياتي..
لاجذب.
اريده..
واريده.
واريده..
بس مااكدر انزل نفسي اله بعد كرامتي فوق كل اعتبار.
نمت وبكلبي الف امنية.
واجذب لو كلت مااتمنيت يعرف بيه موجوده ابغداد ويجي يشوفني.
اشتاقيتلك.
بس اتمنى تجي ندمان.
اريد شي يردلي اعتباري ويرمم كرامتي وكبريائي اللي جرحتهم ودمرتهم.
نسفت كل ذرة ثقة بداخلي.
اتمنى لو اكدر ادعي عليك بس مع الاسف مااكدر.
الله يسامحك.
ثاني يوم رحت للدوام وجنت مشغولة حيل وره شوية دخلوا بنات اثنين بس مباوعتلهم.
سمعت وحده منهم سألت الموظف الوياي: العفو وين شمه؟
تلقائياً رفعت راسي باوعتلها بهالاثناء اشرلهم الولد علي.
اجوا بأتجاهي وحده منهم شكلها مو غريب..
تشبه اللي اجت ويه منى زوجة ايوب.
ياستار يارب شوراهن من مصيبة؟
هاي الوياها منو؟
وصلوا يمي كلتلي وحده منهم: انتي شمه؟
شمه: اتفضلي؟
كالت: اني امل اخت ايوب وهاي اختي نور.
اتنهدت كتلها: اهلاً وسهلاً
امل: شلونج حبيبتي شخبارج؟
شمه: بخير
امل: ان شاءالله. ان شاءالله بخير.
شمه حبيبتي احنه جايين اليوم حتى نحجي وياج.
شمه: بخصوص؟
امل: هنا منكدر ناخذ راحتنه تكدرين اتطلعين نروح نكعد بفد مكان؟
شمه: عندي شغل والله.
امل: منطول والله هن حجايتين واحنه جاييلج مخصوص يصير ترجعينه وتفشلينه بدون متسمعين؟
شمه: حجايتين بخصوص شنو؟ اذا عن ايوب فسامحيني صفحة وطويتها.
امل: معذوره احنه مجايين نلومج لو نسويلج مشكلة بالعكس احنه جايين لان محتاجيج بخدمة.
بقيت ساكته محتارة مااعرف شجاوبها.
بعدين اتنهدت وكمت رحت لصاحب المكتب اترخصت منه وطلعت.
اقدم رجل وأخر رجل وهي واختها يمشون كدامي.
امل: نروح لمول، نكعد حتى نحجي براحتنه؟
شمه: اوك. يالله.
امل: طبعا احنه سامعين عنج ومشايفيج، ايوب من النوع الكتوم من جنه نسأله شلونها البنية اللي تحبها يكول حلوة.
اجابة من كلمة وحده. بس طلع مناصفج بيها..
شمه: اخوج ماانصفني بشي..
واذا هالجيه هاي بخصوصه فاني ارجع لشغلي احسن.
امل: هسه خل نكعد وراح تعرفين السبب مو هيج مو بهالطريقة تنحل الامور ولا هنا بالشارع.
بقينه نمشي لحدما وصلنه لمحل مرطبات جبير بعيد عن المول بس لان المول اصلا مابي مكان كعدة لان زغير ففضلنه نكعد هنا.
نور: من كلي ايهاب عليج كتله هسه تاخذني الها بس كلي مكاتب الطيران تعزل من وكت.
شمه: صحيح
نور: انتظرتج البارحة تتصلين بس متصلتي لذلك جبت امل واجينالج.
ولو اني جنت متوقعة متتصلين.
شمه: صعبة.
امل: حقج..
شوفي شمه.
احسبيني اختج الجبيرة مثلما اني اخت ايوب الجبيرة. اعرف انتي تأذيتي بعلاقتج بأيوب ومريت بظروف قاسية واتحملتي علموده..
قاطعت كلامها كتلها: بس بالنهاية شصار؟
نور: تركج.
امل: تره احنه نعرف بكل اللي صار ايوب حجالي كل شي ايوب اني ربيته لذلك يحجيلي واني اول وحده وكفت وياه من كال اريد اتزوج..
دمعت عيوني كتلها: بعد. إلى صار صار.
امل: احنه مندري بيج راجعة لبغداد عبالنه بعدكم بالبصرة والله حتى للبصرة جان عندي استعداد اروح وادور عليج واجيبج.
شمه: ليش؟
امل: والله لو تدرين شصاير بي بدونج. جان مكابرتي هلكد.
شمه: بدوني؟
اني العفته لو هو العافني؟
نور: هو. ندري بي هو وتصرفه غلط بس مجنه نعرف نوصلج حتى نعالج الموقف.
شمه: ماكو شي يتعالج.
امل: كل شي بهالحياة يعتمد على الانسان نفسه احنه إلى نخلق الظروف والازمات والمشاكل..
واحنه نكدر نلغي وجودها..
يعني لو ردنه ناخذ اكبر مشكلة بهدوء راح نلكاها الف حل وعلاج بس اذا احنه متعصبين وحاقدين ونريد نصعد الامور فراح تتأزم وتتصاعد وتصير مشاكل الها اول ماالها نهاية.
نور: تدرين شمه احنه خمس خوات وبس هالاخ.
متتصورين شكد نحبه.
لو بيدنه نشيل الوجع عنه ونتوجع بمكانه منقصر.
ايوب مو بس اخونه الوحيد. ايوب اصغر واحد بينه بس هو سد مكان ابونه..
ابونه انتي عرفتيه وعرفتي وضعه..
شمه: اعرف.
امل: احنه حبيناج على محبته، رغم تره زوجته بت عمنه بس احنه نريد سعادته وراحته وهو مجان مرتاح وياها ابد.
هي مو آدمية غير الصدك.
نور: شوفي شمه شكد تشوفين نفسج تحبيه هو يحبج اضعاف.
درت عليها كتلها: غلطانه. اني مااحبه بعد. نسيته وراح.
امل: حلفي. مبين من عيونج تحبيه.
دمعت عيوني كتلها: لا، قبل لو سألتني تحبه جان كتلج احبه واموت عليه بس هسه لا. حتى لو تزعلين مني بس الصدك هسه اكرهه.
نور: لااا، لتكولين هالحجي.
امل: كل واحد من يحس نفسه انخذل يكره اسباب الخذلان بس ميكره الشخص الجان يحبه. ابد، ابد.
شمه: هسه اني معرفت شنو الخدمة المحتاجيني بيها؟
امل: نريدج تحجين وياه.
باوعتلها ورفعت حواجبي كتلها: .
احجي وياه على شنو؟
نور: على كل شي. واي شي المهم احجي وياه.
شمه: مفهمت؟
امل: ايوب تعبان ومحتاجج وتركج بالوقت اللي جان جداً محتاجج بس حتى ميأذيج.
شمه: امم. صح.
كتلها باستهزاء كالت: حقج متصدكين. وكنالج تصرفه غلط من عافج بدون ميبرر بس لان يحبج والله.
شمه: واني هم جنت احبه.
امل: مو كل شويه نعيد الحجي مو كلنه اليحب ميكدر يكره.
شمه: لا يكدر ويكره ويكره حتى نفسه على كد ميصير كلبه اسود.
دارت امل على اختها كلتلها: اتصلتي؟
نور: لا هسه اتصل.
شمه: بيمن تتصل؟
امل: مو ايوب لتخافين. تتصل بالسايق يرجع علينه.
بقوا يسولفون عن امهم وعن ابوهم وعن تضحيات ايوب وعلاقتة بمنى.
ماادري هسه شنو فائدة هاللقاء وشنو فائدة هالحجي بس بقيت ساكته واسمع منتظرة يوصلون لمخلص الكلام.
امل: طبعاً احنه سعيدين جدا اتعرفنه عليج وشفناج من زمان متشوقين نتعرف عليج ونشوفج.
نور: اي فعلاً والله جنه نكعد من نروح لاهلي ونسولف بيكم انتي وايوب ونتخيل شكلج. بس نوارس الوحيدة بينه إلى شايفتج.
شمه: نوارس إلى هي زوجة استاذ مؤيد مو؟
نور: اي هي.
شمه: مااتذكر ملامحها اعتقد اجت مره وياه للشركة.
امل: نوارس إلى اجتلكم للبيت ويه منى زوجة ايوب..
اتذكرتها، بس حسيت بالصدمة!
اذا اخوها ممرتاح بزواجه وكلها جانت مأيدته من حجيهم بقراره مال الزواج الثاني اشمعنه هي لا؟
بس هي مبينه عقلها زغير من لحت ويه استاذ مؤيد حتى يبطلني.
اتنهدت كتلها: عرفتها. عرفتها.
امل: هسه منريد نحجي بكل المواضيع مره وحده هسه بس ردنه نبين بعض الامور ووجهات النظر وبعدين بمرور الايام كل شي راح تعرفين.
كل هذا واني محصلت اجابة شافية، ليش جايين؟ شيردون مني؟
وره اكثر من نص ساعة واثناء اندماجنه بالحديث.
شفت سيارة وكفت..
تشبه سيارة ايوب.
معقولة هو.
دك تليفون نور.
كامت من مكانها ترد عالاتصال وبقينه اني وامل نحجي بس عيني عالسيارة.
رجعت نور وكلت لامل: ياالله.
امل: هاا اجه؟
نور: اي وصل.
شفت واحد نزل من السيارة بس بعيد مااشوف وجهه.
يمكن زوج نور لان لابس كاسكيته بس يتخيلي من شفته جان اضخم من هيج؟
وشنو قصة الكاسكيته الظاهر اصلع.
درت وجهي على امل شلت جنطتي وكمت كتلها: فرصة سعيدة. يجوز لو متعرفين على بعض بغير ظروف جان صرنه صديقات.
امل: لا خلص احنه هسه صديقاتج وخواتج مو بكيفج هههه.
نور: اوكفي اوكفي وين رايحة. احنه نوصلج بطريقنه ليش ترجعين مشي.
شمه: لا ميحتاج اتمشى عادي انتوا روحوا ليش تتعطلون.
دخل زوج نور واجه باتجاهنه.
بس من اقترب حسيته مو هو لان هذا ضعيف وزوج نور شوية سمين وضخم، واستحي اباوع عليه.
وصل يمنه بس مااقترب. بقى واكف على بعد مسافة واني احجي ويه نور اكوللها تأخرت وهي تكولي شوية بس كعدي واحنه نوصلج.
التفتت عليه امل كلتله: هاا، تعال شبيك.
استحيت من وجودي ويه رجال غريب حتى لو كان زوج وحده منهم بس المهم مااعرفه.
كللها: ليش؟ شسويتوا؟
امل: هسه عوف الليش والشلون وتعال.
بقيت مغلسه ومسويه نفسي على اساس الموضوع مو يمي بس امل كلتلي: شمه. تعرفيه هذا منو؟
شمه: منو؟
اشرتلي براسها عليه.
باوعتله واني مستحية كل ظني زوج نور.
بقيت اباوعله للحظات ويمكن ثواني معرفته منو. بس فجأة عرفته هو، هو لو مو هو؟
بقيت صافنة اباوعله معقولة هذا ايوب؟
لامستحيل.
بقيت مخلوسة لاكدرت اسأل هذا منو ولا كادره اصدك هذا ايوب.
لابس ملابس رياضية وكاسكيته.
بس عبالك مو هو.
هو جان واكف على جهة مره يباوعلي مره يدور وجهه.
بس اني اتحنطت.
اويلي، شرجعك لحياتي؟ شجابك؟
منين طلعتلي؟
امل: يالله اني ونور راح نروح شوية ونرجع عدنه شغلة هنا قريبة.
دمعت عيوني وبديت احس العبرة لزمتني كتلها: اني هم رايحة. تاخرت.
مع السلامة.
لزمتني نور كالت: شمه بداعة كل عزيز عندج تبقين وتحجين وياه.
احلفج بأبنج.
طاحت دموعي كتلها: لتحلفيني الله يخليج وعوفي ابني على بحاله.
امل: شمه اذا تردين نتوسل بيج نتوسل تره ماعدنه مانع..
ربع ساعة بس عشر دقايق هم ميخالف بس احلفج بابنج تكعدين وياه وتحجين..
شمه: مااكدر، مااكدر..
نور: زين ميخالف احنه راح نكعد على صفحة منروح لمكان حتى لتحسبيها كاعده وياه بحدكم. زين؟
كللها هو: عوفيها نور. عوفيها تروح. على شنو تتوسلين؟
مباوعتله بس مجرد سماع صوته كفيل يخليني مثل الريشة بمهب الريح، كل احوالي تتخربط.
شمه: اي طبعاً اروح، عبالك يمكن مااصدك اشوفك مو؟
كتله بعصبية.
دار علي كلي هم بعصبية: متروحين منو لازمج؟
امل: ياا شبيكم صدك جذب، عيب الناس منا. كعدوا واحجوا.
شمه: ماعندي حجي ومااريد احجي ويه احد.
نور: اششش لتحجين ولاكلمة. ولاتبجين.
لزمتني نور من ايدي بس فلتت ايدي ومشيت.
طلعت.
صاحت وراي امل وطلعت وراي نور تركض بس مرديت عليهم ولا جاوبتهم.
مسحت دموعي واني امشي استحي من الناس ابجي.
بس ترجع دموعي تنزل غصباً عني.
وره شوية حسيت احد يمشي وراي التفتت شفته. وكفت. كتله: شتريد لاحكني بعد؟
شتريد جاي وراي؟
وكف على بعد مسافة بس مباوعلي بقى داير وجهه.
محجه شي.
شمه: ارجع. روح. لتجي وراي مااريد اشوفك.
التفت علي كلي: ادري.
ظليت واكفة اباوعله شصاير بي!
ليش هيجي صاير؟
ليش وجهه مابي لون؟ وين حواجبه؟ وين رموشه؟
شبي؟
ليش ميباوعلي؟!
عفته ورجعت كملت طريقي واحس بي يمشي وراي.
دموعي مبطلت واني احلفها، احلفها متنزل بس نزلت وبينت ضعفي كدامه.
وصلت للمكتب لكيت الكل طالعين مباقي شي على نهاية الدوام.
المن اني راجعة بعد.
رحت وكفت عالشارع انتظر تكسي.
بقيت مغلسه ومتجاهله وجوده.
ادري بي موجود.
وكفت تكسي وصعدت بس اول مصعدت التفتت اشوفه..
شفته هسه يالله اتحرك وراح.
رجعت البيت ماادري احجي لامي لو ابقى ساكتة..
بعدين كلت ابقى ساكته احسن. هو اصلاً بعد اللي صار اليوم ميجي ولايحاول يتواصل وياي.
بس بقيت اليوم كله كلما اتذكر ابجي.
اني مصدكت بديت انشغل وانساك.
ليش رجعت؟
الايام اللي بعدها بقيت اداوم بس خايفة لا يجيني للمكتب او خواته يرجعون يجون.
زوجته تجي تسويلي فضيحة هنا كدام الناس.؟
بس لاهو اجه ولاخواته ولا اي احد من طرفه..
ومر شهر والثاني ومشفت احد منهم بعد.
حجيت للمياء بوقتها كالت: انتي متعرفين تتصرفين
شمه: شلون اتصرف بالله؟
لمياء: المفروض تكوعدين وياه وتفتهمين ليش هيجي سوه.
شمه: واقبلها على كرامتي يرجع يلعب بعقلي من جديد؟
لمياء: تره انتي مخسارنه شي اذا مقنعج عذره ممجبوره ترجعيله بس اذا عنده عذر مقنع مثل اللي ابالي فغصبن ماعليج ترجعيله.
شمه: شنو العذر إلى ابالج بالله؟
لمياء: تعرفيه كووولش زين بس ميهون عليج تصدكيه.
شمه: العذر هو جذاب
لمياء: لا شمه لا يجوز مو جذاب مثل ممتوقعين كتلج الف مره انطيني رقمه خل افتهم منه مقبلتي..
شمه: شتفتهمين منه؟ شتفتهمين مثلا راح يكولج الصدك؟
لمياء: مالج علاقة انتي دزيلي الرقم واني احجي وياه، هسه يجوز بعدين يطلع الغلط منج مو منه.
شمه: ماعندي كل غلط وياه
لمياء: اذاً دزيلي الرقم، بروح ابوج دزيلي الرقم.
شمه: اهووو.
لمياء: حلفتج بعد
شمه: بس الله عليج مااريده يعرف اني وياج نحجي ونتخابر لو اني ادري بيج راح تحجين وياه. والله ازعل منج.
لمياء: اوك.
دزيت الرقم للمياء وبقيت عبالك كاعده على نار.
ادري اني مو اكول كرهته؟
شبيه منتظره خبر من لمياء شسوي باخباره بعد.
وره ايام حاجتني لمياء كالت: كالت حاولت اعرف منه شي مكدرت بس كلي احسن. اي فهمني ليش احسن يكولي احسنلها.
بقيت ساكته كالت: انتي عرفتي شبي بس تغشمين نفسج.
شمه: انجبي.
لمياء: والله، انتي تعاندين هالمره على غلط وبالوقت الغلط، نصيحة مني شوفيه واحجي وياه حتى لتتندمين بعدين..
من كلامج تره مبين من شكله.
شمه: انجبي
لمياء: لا هذا واقع حال. اتوقعي هيج خبر بأي لحظة.
صحت عليها بعصبية: انجبييي.
لمياء: اذا متتحملين عليه لهدرجة لعد ليش تعاندين؟ ليش مقبلتي تكعدين وتحجين وياه؟
شمه: مااتحمل..
لمياء: لعد هو شلون اتحمل؟
بجيت كالت: بدال هذا البجي اتصلي بي واحجي وياه.
شمه: مااكدر، اكلج مااكدر افتهمي.
لمياء: كيفج معناها لترجعين تبجين وتنوحين بعدين.
شمصعب ذيج الايام على كلبي..
عذاب.
مابين كبريائي وكرامتي ومابين تأنيب الضمير وخوفي عليه.
بهالفترة مددوا دوامي للساعة اربعة العصر. والشفت الثاني جانوا بس ولد يبقون للساعة عشرة بالليل.
وبيوم جانت حارة الدنيا شهر الثامن وجنت اريد اروح احشي سني لان يأذيني.
فكلت بدل مااطلع للبيت وبعدين ارجع ويروح الوقت بالطريق خليني اروح وحدي من اطلع من الدوام احسن.
وفعلاً خلصت شغل وطلعت رحت مشي، امشي واباوع وين اكو طبيب اسنان لحدما حصلت واحد ودخلت حجزت رقم وكعدت انتظر.
ازدحام وناس قبلي هواية ودكتور الاسنان مزعج الانتظار عنده لان لازم بالبداية يخدر وبعدين ترجع تفوتله حتى يحشي او يقلع.
وين على ما وصلني السره.
مخلصت الا الدنيا ظلمة وامي كل شوية تتصل تسألني مخلصتي.
جنت متفقة ويه السايق من اخلص هو يجي ياخذني للبيت لان مااكدر اركب تكسي بالليل وحدي.
طلعت من الدكتور واتذكرت علاج امي.
همزين اتذكرته.
رحت للصيدلية حتى اجيب العلاج وشفت ايوب بوجهي.
بيده علاكة دوه.
اني داخلة وهو طالع..
بقيت متحنطه اباوعله وهو هم مثلي.
بقيت واكفة بالباب فاتحة الباب وواكفة لااني داخلة ولاطالعة بس واكفة بنص الطريق.
فجأة مد ايده سحبني من ايدي.
اتعجبت..
كتله: شكو؟
ايوب: رجال وراج يريد يعبر منين يعبر وانتي واكفة بنص الطريق. اذا يعبر وانتي واكفة يعني يطخج..
سكتت ودنكت لان يباوعلي كلي: شعندج هنا بهالليل؟
شمه: جايه اتونس.
ايوب: شنو؟
شمه: جايه الدكتور بعد شعندي.
ايوب: اي دكتور؟
شمه: الاسنان.
ايوب: منو وياج؟
شمه: محد.
ايوب: شنو محد؟ شلون تجين وحدج وشلون ترجعين للبيت وحدج بالليل؟
كتله: السايق يجي علي.
ايوب: هم سايق.
شمه: اي هم سايق لعد شلون
ايوب: البنية احسنلها تتزوج وتكعد بالبيت
شمه: منو يكول؟
ايوب: اني
باوعتله..
عبالك مو هو انقهرت متت اتذكرت لمياء تكولي بعدين يجوز تتندمين، تعرفين بس تغشمين نفسج.
مااريد اعرف.
مااريد.
بس مو بيدي لازم اسألك واطمئن: شبيك؟
متغير وضعفان.
بقى يباوعلي شويه بعدين كلي: وشعري واكع ولا رموش ولاحواجب.
رأساً طاحت دموعي.
محاجاني اخذ من ايدي علبه الدوه الفارغة وجابلي وحده جديدة واني واكفه اباوعله كلي: هذا الدوه لامج مو؟
هزيت راسي اي كلي: خوفتيني عبالي الج.
لزم ايدي وسحبني بره الصيدلية.
ايده حارة، مدري كلبي الحار ظلت دموعي تصب وهو واكف وداير وجهه.
بعدين كلي: لتبجين كافي.
مااستاهل اني دموعج.