رواية صراع الجبابرة للكاتبة روز الفياض الفصل الثاني والثلاثون

رواية صراع الجبابرة للكاتبة روز الفياض الفصل الثاني والثلاثون

عندما نحب نفقد الاهلية.
فلا نستطيع التصرف بحكمة وعقل ولانستطيع التفكير بالشكل الصحيح.
نفقد السيطرة على مشاعرنا. ونفقد السيطرة على انفسنا.
فنغدوا كالاطفال.
تبكينا كلمة وتدمينا كلمة.
ولكن سرعان مانتعافى بكلمة ايضاً.
لتبجين مااستاهل دموعج.
شمه: ليش؟
بقى ساكت كتله: بس فهمني ليش؟ ليش سويت بينه هيجي؟ ليش دمرتني؟
انت عبالك اشتري ادويه بس لامي؟
تره اني من رحت لليوم الف عله صارت بيه.

ايوب: احسن تبقين ويه واحد ممكن بس ياخذ جرعة كيمياوي يموت؟ احسن هيجي؟
شمه: هذا عذر؟
ايوب: تردين تترملين من جديد؟
شمه: مو بكيفك. مو بكيفك تنهي كل شي وتخليني مثل المخبلة، مااعرف شبيك ولااعرف ليش. عالاقل جان كتلي وخليتني اني اختار..
ايوب: شتختارين! بس الغبية تقبل بهيج وضع.
شمه: هو اني لومو غبية احبك واتورط وياك ومن الاول؟
كتله واني ابجي.
بقى ساكت بعدين كال: احسنلج هيج، صدكيني.

شمه: احسنلي؟ احسنلي لو احسنلك؟ اتندمت مو؟
ايوب: على شنو؟
شمه: على قرارك بذاك الوقت، من صارت صدك كلت مرتي وابني احسنلي، احسنلي من شمه الغبية.
ايوب: دائما مستعجلة بحكمج، منى طلكتها.
سكتت شويه تحت تأثير الخبر ومسحت دموعي..
ايوب: شلونج؟
رجعت بجيت وكتله بعصبية: شلوني؟ هسه جاي تسألني شلوني؟
اتحسر وبعدين كلي: اذا كتلج لحظة مغبتي عن بالي..
تصدكين؟
شمه: جذب، كل حجيك جذب..

عبرت علينه مره سكتنه شوية بعدين من راحت كلي: هو اني دوم جذاب، شعجب مكلتي مثل ابوي؟
شمه: لتحجي رجاءا لتتظلم، لان اذا اني بيوم ظلمتك فبسبب تصرفاتك يعني مو قصدي اظلمك بس انت ظلمتني بقصد.
ايوب: ياقصد؟ ياقصد؟ تفتهمين شنو سرطان؟ راح يصير سنه واني اتعالج وعندي كل شهر جرعة كيمياوي، شايفه شيصير بيه من اخذها؟ امي وهي امي مااخليها تقترب مني وتشوفني من اخذها..
شمه: يعني لو بيه سرطان تعوفني؟
ايوب: اسم عليج.

شمه: تعوفني؟
سكت بقى ساكت واني منتظرة منه جواب. بعدين كلي: مستحيل.
شمه: لان انت وفي بس اني مو وفيه مو صح؟ انت تقبل تبقى وياي بس اني لا؟
ايوب: لا. متأكد لو عرفتي بذاك الوقت جان بقيتي وياي.
شمه: بذاك الوقت؟
ايوب: بذاك الوقت.
شمه: استاهل، اني استاهل كل طيحان الحظ الشفته من وراك. مادام هيج المن اجوا خواتك؟
رفع جتفه وكلي: ماادري، اصلاً اني ماادري بيج راجعة لبغداد..

كتله بعصبية: ارجع واكول استاهل، جان المفروض اقبل بحسام بصخام بوائل بسرمد بأي واحد ولاباقية هيجي. على شنو حاركة كلبي اني، على شنو؟
عفته ومشيت صاح وراي: اوكفي. شمه.
وكفت كتله: لتجرب تصيحلي وتحجي وياي بعد، مفهوم؟ من هاللحظة لااعرفك ولاتعرفني.
ايوب: وين رايحة مو تكولين السايق يجي عليج؟ وينه؟
شمه: ميخصك، ميخصك.
بعدني مكملت جملتي اتصل السايق كلي: ام آدم انتي وين؟ خلصتي؟

اني يم المجمع الطبي. كدام شوية خصلت من مساع وانتظرك. تأخرت؟
رد علي السايق: ازدحامات مو طبيعية متندخل وهسه السيارة وكفت بنص الشارع لاكادر احركها من الازدحام ولااكدر اعوفها. شلون؟ تكدرين اليوم ترجعين بتكسي؟ لو تبقين تنتظريني اصلحها؟
ضجت بس كتله: اوك. انتظرك.
ايوب وصل يمي كلي: منو؟
شمه: ميخصك.
ايوب: السايق؟
شمه: لا صاحبي ارتاحيت.

ايوب: اكلي خ، زين؟ احجي عدل لتخليني افقد اعصابي واسوي شي ميعجبج هنا كدام الناس. افتهمتي؟ واوكفي هنا بمكانج لتتحركين لحد ميجي السايق.
ظليت مصدومة لان غلط علي. بس مجاوبته سكتت لان اني إلى استفزيته.
بقيت واكفة وساكته بس كل شوية امسح دمعة.
هو واكف كدامي وظهره إلى، حتى ميباوعلي، بعدين دار علي كلي: وينه هذا؟ وين صار؟
شمه: روح. ميجي هسه.
ايوب: لعد شوكت يجي بيش الساعة صارت؟

درت وجهي ورديت عليه على كيف كتله: سيارته طفت بالشارع.
ايوب: اي؟
شمه: اي.
ايوب: وتبقين تنتظريه لشوكت يعني؟ لحد متشتغل السياره؟ واذا مااشتغلت؟ تبقين واكفة بالشارع الرايح والجاي يباوع عليج؟
شمه: ممسويه شي حتى يباوعون علي.
مجاوبني بقى يباوعلي بعدين كلي: امشي.
باوعتله كتله: وين؟
ايوب: امشي اني اوصلج.
شمه: روح، اني اخذ تكسي.
ايوب: تره روحي بخشمي صايرة مو وكت عنادج شمه امشي كدامي واتعوذي من الشيطان.

شمه: روح. روح اني راجعة للعيادة لحد ميجي.
ايوب: راح اجيب السيارة واجي لتتحركين من مكانج.
راح واني بقيت واكفة.
معقولة اني خايفة منه ومن عصبيته؟
لو شنو؟
لا مخايفة. بس فكرة ارجع انجمع وياه بفد مكان مثل قبل بنجتني.
ادري اذا تحبيه ليش تكابرين؟
هو رجال طبيعي يكابر..
بس اني هم مااكدر افرض نفسي عليه..
ياويل كلبي..
تعبت..
شيريد يصير بيه اكثر من كل اللي صار؟
صافنة وشفت سيارته وكفت..

بقيت متردده هالخطوة اني عشتها وجربتها قبل وشفت نتيجتها..
بس كلام لمياء يخليني اضرب كل شي بعرض الحايط.
مشيت بخطى مثقلة لاجلس الى جوار ذلك الحنون الذي كان دائما قوياً في هدوئه.
محباً في غصبه.
غيوراً في حبه.
وعطوفاً في زعله.
كعدت بهدوء وحسيت بقشعريرة لان مشغل التكييف وساد الجام.
اتصلت امي: وينج ماما تأخرتي؟
شمه: هلو ماما جاية هسه يالله اجه السايق.
التفتت هو علي. غلست.
حجيت ويه امي وسديته اني ساكته وهو ساكت.

الهدوء جان جداً مزعج كرهت وضعنه عبالك اغراب.
بس البرود العنده وملامح وجهه البارده تخليني ابقى ساكته وكل شوية ادور وجهي بحجة اباوع من الجامة، امسح دموعي.
دك تليفونه وجاوب ماادري منو من اهله: الو؟ هلو، اي طلعت..
لابعدني. راح اتأخر شوية..
لا لا اتعشوا انتو. اني اوصل ولد صديقي وبعدين ارجع.
يالله باي.
رفعت حواجبي باوعتله، غلس.
ازدحام مزعج جان كال بصوت ناصي ويه نفسه: خل نروح عالكندي احسن.

اتنهدت. كال: عندج اعتراض؟
شمه: على شنو؟
ايوب: عالطريق؟
شمه: شبي؟
ايوب: مابي شي. بس اشوفج تتنهدين كلت يجوز معاجبج نطلع عالكندي.
شمه: ابطل يعني مااتنفس؟
ايوب: لا العفو، اتنفسي براحتج منو مانعج؟
شمه: استغفر الله العظيم.
ايوب: استغفر الله
شمه: وعلى شنو تستغفر؟ تره انت لزكت الا توصلني.
ايوب: واني هسه حجيت شي! منستغفر؟
شمه: استغفر الله.
ضحك على كيف كال: استلم. هسه لو كلت استغفر الله ابتلي.

سكتت بس حصرتني الضحكة. وره شوية كلي: شلونه آدم؟ شلونها الوالده؟
شمه: الحمدلله.
سكت بعدين كلي: شخباره حسام؟
باوعتله كتله: ياحسام؟
ايوب: الدكتور كرايبكم.
شمه: شمدريني.
ايوب: ووائل؟
شمه: واني شكو تسألني عن وائل وغيره؟
ايوب: سألتج لان انتي ذكرتيهم قبل شوية، زين سرمد؟
مجاوبته. كال: هاا ساكته؟
شمه: مااريد احجي.
ايوب: ليش؟
شمه: اذا يهمك تعرف اخبارهم روحلهم واسألهم عن اخبارهم بس اذا قصدك شي ثاني فمراح اجاوب.

ايوب: ليش؟
شمه: لان ميخصك، حياتي وعلاقاتي بالناس شي ميخصك بعد.
ايوب: هيجي يعني؟
شمه: والله بعد انت إلى اختاريت.
ايوب: شختاريت؟ هسه تكول منى.
شمه: اختاريت تكون غريب.
ايوب: اففف، شوف الازدحام.
شمه: اوكف هنا خليني انزل لتتعطل.
مجاوبني استمر يمشي على كيف بسبب الازدحام وره شوية كلي: مو زحمة ارجع البيت شكول لامي نزلت صاحبي بالطريق.
التفتت عليه رغم حاصرتني الضحكة بس كتله: انت مالك صاحب.
هز راسه كلي: صحيح والله..

بعدين كلي: انزلج بس بشرط؟
شمه: خير؟
ايوب: تكولين شكايلج سرمد؟
ظل كلبي يدك اتذكرت جفصتي مساع على سرمد.
شمه: شكايلي؟
ايوب: اسمع منج
شمه: ماكو شي تسمعه
ايوب: لا شلون، حجيج مساع مو مال ماكو.
يحجي بكل هدوء بس اني اخاف من الهدوء بهيجي امور.
بقيت ساكته شجاوبه.
ايوب: جاوبي؟
شمه: ماكو شي
ايوب: يعني تكوليلي اعرف بطريقتك؟
التفتت علي يسألني.
اعرف اذا راد يعرف شي راح يعرفه بطريقته على كولته..
بقيت على صمتي.

خوفي منه وخوفي من المشاكل يمنعني احجي.
ايوب: كيفج. بس اتصلي على امج كوليلها مراح ارجع للبيت هسه راح اتأخر.
شمه: ليش؟
ايوب: كيفي، سيارتي وبكيفي مراح اوكف اليوم لحد ميخلص البانزين.
شمه: اهوو ايوب..
ايوب: جاوبي واخذج للبيت صاروخ.
شمه: شجاوب؟ والله بلوه
ايوب: شوكت حجه وياج سرمد؟ وشكلج؟
شمه: مكلي شي الرجال انعم الله عليه شافلي هالوظيفة.
دار علي وهو رافع حواجبه كلي: لا والله؟ وانتي فرحانه؟

شمه: وليش ماافرح غير باب رزقي ورزق ابني.
ايوب: يعني سرمد يدري بيج راجعة لبغداد؟
شمه: اني كتله محجيلك.
ايوب: وبعدين؟
شمه: بس
ايوب: لا قبل البس، اكو جزء من النص مفقود.
شمه: يانص؟ ماكو شي مفقود.
ايوب: شوكت حجه وياج بالزواج؟
شمه: منو؟
ايوب: سرمد
شمه: يازواج؟
ايوب: كيفج. ظلي نكري لحد ميخلص البانزين.
شمه: اهووو
بهالاثناء وصلنه للتقاطع مال الكندي ومحسينه الا بصوت مرعب وضوه قوي والجام مالت السيارة اتكسر علينه..

انفجار.
من هول الصدمة والرعب حضني.
لدقائق ظليت مخلوسة ومتحنطة انفاسي مااكدر اسيطر عليها.
الخوف شل رجليه.
ماادري تأذينه لو لا لان مااحس بأي شي غير الخوف.
سألني هو بقلق: تأذيتي؟ بيج شي؟
مااكدر احجي بس هزيت راسي لا.
لزم وجهي كلي: هذا الدم منين؟
مديت ايدي على خدي شفت دم.
ايوب: خدج مجروح من شضايا الجام.
باوعت لايده هم مجروحه وكلها شضايا جام زغار.
دقائق والتمت الناس من بعيد والشرطة كطعوا الشارع والاسعافات.

هنا كأنما رجعلي وعيي عبالك جنت بحلم.
فتح باب السيارة ونزل كلي: نزلي، خل اخذج للمستشفى.
نزلت بدون كلام.
رحت لزمت ايده مثل الجهال واباوع عالسيارات المحتركة والناس إلى تركض عالمصابين.
تركت ايده ولاشعورياً رحت بأتجاه السيارات المحتركة وظليت ابجي حيل.
ركض وراي لزمني كلي: وين رايحة؟ تعاي. يمكن يرجعون يفجرون المكان مره ثانية.
شمه: عوفني خل اروح.
ايوب: ادري وين رايحة؟ متشوفين النار والدنيا مكلوبه.

شمه: عوفني اروحلهم. احتركوا كلهم وماتوا ايوب، ماتوا.
ظليت ابجي حيل وهو يجر بيه.
شمه: ماتوااا. ماتوا.
ظليت اصرخ بدون شعور.
دقايق وتليفونه بدا يدك كل شوية احد من اهله يتصل عليه يطمئن ويكوللهم: مابيه شي.
تليفوني يدك بس مااكدر ارد صدمة المشهد جمدتني.
ايوب: تليفونج يدك. جاوبي خاف امج تريد تطمئن عليج.
بقيت صافنه ليوره على منظر النار ودموعي تصب.
طلع هو تليفوني من جنطتي وجاوب.
المتصل ريحة الجنة.
امي.

ايوب: الو هلو خاله. اي هو هذا رقم شمه بس هي متكدر تجاوبج هسه..
لا لا لا ماكو شي مابيها شي والله بس هو احنه لان جنه قريبين وصار الانفجار فخافت..
لا، لا، دسمعيني حجيه، حجيه؟ خاله والله مابيها شي هاي يمي بس مصدومه البنية متكدر تحجي وياج هسه.
لا لا. والله العظيم مابيها شي لتعبين وتجين..
الشوارع كلها مكطوعه مراح تكدرين توصلين لهنا شيجيبج..
والله وعيونج مابيها شي، خاله..

هسه بس ينفتح الطريق اني اجيبها لتخافين..
اسمعه يحجي بس مااحس بشي بس بالنار عبالك اني المحتركة..
شبعت بجي..
كعدت بالشارع وظليت ادك على رجلي..
الموت يغزو مدينتي.
يتسلل كل يوم كاللصوص الى بغدادي..
يسرق احلام الشبان ويحرق قلوب الامهات.
ويرمل الفتيات وييتم الصغار.
ويسرق منا الابتسامات.
ويهدينا وجعاً لاينتهي.
كعد كبالي عالكاع كلي: شمه، شمه، حبيبتي اهدي، هذا يومهم كولي الله يرحمهم..

بدون شعور ذبيت نفسي بحضنه وبجيت بكل قوتي عليهم..
وهو هم بجه.
الناس التمت تباوع من بعيد..
اجوا التموا علينه عبالهم متأذين..
اتصل السايق علي خطيه وهم ايوب جاوبه وطمنه..
شويه ودك تليفونه: هلو هلو مؤيد..
لا مابينه شي كدامك احنه بس تعال شويه كدام تشوفنه.
شمه وياي..
لا بس مصدومة وبس تبجي وشويه وجها متجرح..
شويه طلع استاذ مؤيد كدامنه.
مؤيد: السلام عليكم، الحمدلله عالسلامة.
رد عليه ايوب وكله الله يسلمك.

حجوا شوية وبعدين استاذ مؤيد كلي: شمه، كافي بجي الحمدلله طلعتوا منها سلامات ينرادلكم ذبيحه..
كتله: ماابجي على روحي، ابجي عليهم. ابجي عليهم احتركوا. اكلتهم النار.
مؤيد: يجوز محد احترك شمدريج. واذا ماتوا بحرك لو من شضايا بعد الله يرحمهم، الحمدلله على كل حال هذا صار حال بغداد يومية انفجار لو اثنين..

دار على ايوب كله: يالله يالله انتو روحوا للمستشفى هاي ايدك مجروحه وشمه هم وجها واني هسه اتصل على ايهاب يجي ناخذ السيارة ونجي وراكم.
ايوب: ماشي احنه رايحين للمستشفى..
.
رحنه كبل اخذني للطوارئ مالت المستشفى.
استقبلونه بالطوارئ وعزلونه كلمن بمكان.
صاحوا عالدكتور بقيت كاعدة انتظر بديت احس بالالم بوجهي.

شويه ودخل ايوب جايب ممرضة باوعت لوجهي وكلتلي: الحمدلله على سلامتكم. لتبجين بعد الله نجاكم. ووجهج هاي الجروح زغار بس واحد شوية يمكن يحتاج يتخيط.
ايوب: تبجي عالضحايا.
دارت عليه كلتله: انت هم روح خل يداوون ايدك. هم بسيطه ايدك متحتاج خياط بس للتعقيم احسن.
ايوب: اني مو مشكلة، خليها هي تخلص بالاول.
كتله واني اشهلك: رو، ووح، روو. ووح.

ضحكت الممرضة وجانت مره جبيرة بالعمر كلتله: روح خل يعقمون ايدك لتشلع كلبها..
ابتسم كلي: هسه.
خواته كل شويه وحده تتصل.
ويطمنهم.
شوية ودخل ايهاب زوج نور.
اتحمدلنه السلامة وتأكد مابينه شي ورجع لمؤيد.
رجعت امي اتصلت هالمره جاوبتها وطمنتها كتلها: مابيه شي، هسه ارجع..
والله مابيه شي لتخافين بس وجهي بي خدوش بس لازم تتعقم..

هسه احنه بالمستشفى، بالكندي، لا لا ماما ليش اجيتي رجعوا. رجعوا والله مابيه شي، اوك، بالطوارئ احنه، اوك، ايوب..
الحوار جان واضح بالنسبة اله وحسيته صار بموقف محرج.
امي جايه بالطريق هي وبيت ابو تيسير، شلون راح يواجهها..
وموقفي اتعس من موقفه، شلون انقنع امي هسه شفته صدفه، وشصعدني وياه بالسيارة؟
بقيت ساكته وهمه يخيطون بخدي..
حسيت بالالم من الابرة وجرت الخيط..
لزم ايدي حيل كلي: خلصوا خياطين بس.

وفعلا بس خياطين الحمدلله، الله كتبلنه عمر بذاك اليوم المرعب..
من خلصنه كلي: الحمدلله عالسلامة.
شمه: الله يسلمك. الحمدلله على سلامتك.
ايوب: من ياهو منهم؟ من الموت لو من المرض؟
شمه: مني ومن كل شي مو زين..
ماانطاني كلبي اكله من الموت والمرض، صعبه الكلمة الله لايكولها..
ايوب: وانتي شي موزين؟
هزيت راسي اي وهالمره نزلت دموعي علينه..
احنه الميتين بالحياة.
مدفونين واحنه عايشين.

ايوب: انتي وامير احلى شي صار بكل حياتي..
عضيت شفتي حتى لاابجي حيل..
ايوب: شفتي الموت شكد صعب؟ مكدرتي تتحملين تشوفين ناس غريبه كدامج تموت..
شلون تتحملين وضعي؟
شمه: كافي، والله متت ايوب والله، مااكدر مااكدر اعيش بدونك والله..
ايوب: ولا اني. بس هذا الشي بعد ميرهم. احنه بعد منرهم نرجع من جديد.
شمه: ليش؟ ليش؟ احجيلي الصدك حتى اقتنع وارتاح. بعد متحبني؟ تحب وحده ثانية كول؟ تريد زوجتك هم كول حتى افتهم ليش؟

ايوب: ماكو غيرج واحبج اكثر من الاول، بس مااريد أءذيج، مااريد اظلمج وياي، مااريد اعذبج اكثر..
شمه: قابلة، اذا بس هذا العذر قابله والله العظيم قابلة، اخدمك بعيوني ايوب، اذا صدك بعدك تحبني وبس هذا هو السبب..
ايوب: اششش كافي، كافي بجي، بعدين نحجي ارتاحي هسه.
شمه: ولك اني متعلعله صارلي سنة من وراك وبسببك، ارتاح شلون؟ فهمني؟ متحبني او متندم او اي شي ثاني غير المرض كول واني انجب واروح اولي منا للابد..

ايوب: وين ترحين؟
شمه: اي مكان عسى ما ارجع للبصرة بس كول، والله مااحجي بس كول الصدك راح اتخبل؟
ايوب: اوووف ياشمه. لو تدرين بس شكد احبج، بس الله يدري، بيش تردين احلفلج حتى تصدكيني احبج واريدج اكثر من قبل، بس مااريد اورطج وياي.
سكتت تعبت من النقاش وياه..
عفته ورحت كعدت..
بقى واكف بعدين صاحوله يعقمون ايده..
بقيت كاعدة بمكاني شوية ودخلت امي وام تيسير وابو تيسير شافوني كاعدة اجت امي خطيه حضنتني وظلت تبجي.

كللولي يالله خل نرجع للبيت كتلهم: لا. انتظر ايوب.
ام تيسير: ياهو ايوب السايق؟
غلست مجاوبتها. ثواني وطلع ايوب.
حسيت امي اتغيرت ملامح وجها..
اتدنه هو كللهم: السلام عليكم
ردوا كلهم السلام..
دار على امي كللها: خالة شلونج؟ الحمدلله على سلامة شمه.
ردت عليه من وره خشمها كلتله: الله يسلمك.
ام تيسير: الحمدلله على سلامتك انت هم خالة. سيارتك خوما بيها شي.
ايوب: لا بسيطة، فدوة.

ام تيسير: لا ياا خطية سوده علي بس لاتفلشت.
ابو تيسير: هسه المهم هو طلع مابي شي السيارة شنو تلكيها سايبة.
ام تيسير: ادري سايبة بس غير هو رجال على باب الله..
اباوعله مبتسم ومغلس من خزرة امي الخرافية..
شوية وكال: عدكم سيارة لو اجيبلكم تكسي؟
ابو تيسير: لاعمي عدنه، تيسر انت.
ام تيسير: لا وين يروح هو بعد سيارته وراحت. اوكف خاله نوصلك بطريقنه.
ايوب: لاخالتي. اشكركم. منا اخذ تكسي قريب.

ابو تيسير: لا ميصير بعد لازم نوصلك.
ايوب: اشكرك عمي رحم الله والديك بس والله متسوه اعطلكم انتو روحوا واني اخذ تكسي..
مقبل يبقى ويانه سلم وراح: يالله الحمدلله على سلامة شمه، مع السلامة.
سلم علي بعيونه وطلع..
رجعنه للبيت وام تيسير جنها لمياء متسكت كل شوية تعيد نفس الحجي شلون خافت وشلون اجوا وشلون ازدحام وشلون وشلون وامي ساكتة بس كل شوية تكول: الحمدلله.
حطيت راسي على جتفها وغمضت..

بديت استرجع حجينه اني وياه..
دموعي بللت جتف امي كالت بخوف: هاي شنو المي على جتفي، دم من وجهج لو دتبجين؟
رفعت راسي وهزيته لا وكتلها: لا مو دم.
باوعت لوجهي خاف بي دم بعدين كلتلي: الحمد لله. نحمده ونشكر فضله، مابيج شي وين انطي وجهي لو صايرلج شي..
الحمدلله والشكر..
اعطني فرصة..
فرصةً واحده، لاكونَ الى جانبكَ حتى نهاية عمري.
فأنا سوفَ اموت قبلكَ ان رحلتَ عني مرةً اخرى.
فقلبي لنْ يحتملَ فراقكَ هذه المره، ??.