رواية صراع الجبابرة للكاتبة روز الفياض الفصل الثالث والثلاثون

رواية صراع الجبابرة للكاتبة روز الفياض الفصل الثالث والثلاثون

حبني.
حبني واغمرني بحنانك حتى لو بس بالجذب، ??
---
رجعنه للبيت وجنت تعبانه..
بس نفسيتي تعبانه اكثر..
امي سوتلي عشا بس مااكدر اكل.
بالي ويييين والاكل والدنيا وين..
امي صلت اربع ركعات حمد وشكر لسلامتي..
واني كاعده صافنه وايدي على خدي، سحبت ادم بحضني، كتله بكلبي اليوم جان بيني وبين الموت شعره، شلون بيك حبيبي بدوني.
خصلت امي صلاة كالت: اكلي العشا برد.
شمه: مااريد، مااشتهي.
امي: شبيج؟

تدري شبيه كلش زين بس تريدني اني احجي. واني مالي خلك الحجي.
بقيت ساكته كالت: روحي نامي وارتاحي.
رحت اتمددت بفراشي حتى اتذكره مو حتى ارتاح..
مو حتى انام.
دمعة رايحة دمعة جايه وعلى هالمنوال.
شلون بحظج شمه..
واحد مات وخلاج والثاني هم خاف يموت..
اموت غير، اموت.
بقيت كاعده وبس الحسرات سهررانه وياي.
امي اخذت ادم وراحوا ناموا.
ليش ايوب ليش؟
ليش حرمتني منك كل هالمده؟، ليش مرمرتني وعذبتني؟.
شلون اتحملت كل هذا وحدك؟

شلون كدرت تتحمل فراكي وبعدي عنك وانت بهالحالة؟
حظك لو حظي هذا؟
ثاني يوم الصبح رحت للدوام رغم امي مقبلت اروح واني هم نفسيتي مو مال دوام بس اريد اروح علموده يمكن اشوفه واكدر احجي وياه.
وصلت للمكتب كلها تسألني شبي وجهج؟
حجيتلهم عالانفجار.
للساعة عشرة كلت خل اتصل على نور اخته.
صحيح استحي بس بعد مجبوره.
دكيت عليها شويه وجاوبت: الو؟
شمه: الو السلام عليكم
نور: وعليكم السلام
شمه: نور؟
نور: اي نور، منو شمه؟

شمه: وين عرفتي؟
نور: متوقعين اتصالج..
ردنه احنه نتصل عليج بس ماعدنه رقمج لااني ولا البنات. الحمدلله على سلامتج حبيبتي.
شمه: الله يسلمج.
نور: ردنه نتطمن عليج ونتحمدلج السلامة.
شمه: الله يسلمج
نور: والله البارحة اشتعل كلبنه لان نعرف ايوب عنده مراجعة عن الدكتور ومن سمعنه الانفجار.
اني بيتي قريب. وين المكتب إلى تشتغلين بي وراه.
بس عرفت الانفجار قريب اتخبلت.
منعرف انتي وياه.

شمه: لاكيته بالصيدلية. جنت عند الدكتور احشي سني.
نور: اي هو كال من رجعوا بالليل كال لان بصراحة بصراحة استغربنه من كال ايهاب انتي وياه هههه بس فرحنه هههههه.
انحرجت كتلها: صدفة.
نور: رُبَ صدفة خير من الف ميعاد هههه، حجالنه عالسايق متأخر عليج.
شمه: صح.

نور: هاي الانفجارات الزينه هههه لاجذب حبي اتشاقه الحمدلله على سلامتكم اثنينكم والله متنه من الخوف والقلق انوب من اجه وكال انتي وجهج متأذي وايديج يمكن هم ضجنه والله.
شمه: الحمد لله هاي ولاغيرها.
نور: اي والله. المهم بشريني شحجيتوا؟ شكلج؟ شكلتيله؟
شمه: اخوج راح يموتني ناقصة عمر.
نور: لا اسم الله عليج بس شنو كلج؟
شمه: شنو كلي؟ ميكول شي خبلني..
ميريدني..
ميريدني..
بس شبعني رزاله وراح.

كالمعتاد اني مامحصله بس الرزاله.
سكتت شويه بعدين كلتلي: اي الرزاله سهله بسيطة رزالة الحبيب مثل اكل الزبيب هههه لاحبي حشاج بس هو متغيره نفسيته وتعبان منا المرض ومنا هو اتخذ قرار متسرع ولغه كل شي بينج وبينه. صاير عصبي شويه وكل احنه نترزل منه مو بس انتي. صدكي. هاي واحنه اكبر منه بس قابلين والله بس يطيب ويرجع مثل الاول.

شمه: واني ماعندي مانع خلي يرزلني خلي يضربني بس يحجي وياي ويفهمني، اني شفت المر بغيابه اتحملت اشكال الضغوطات من امي واهلها علموده الف واحد خطبني ومااكدر اقبل لان احبه حتى لو عافني مو بيدي..
نور: اي حقج والله الله يساعدج. هو خلاج بوقتها بوضع محرج وكل احنه متوقعين اللي مريتي بي واكثر لان امج بس اجتكم منى اخذتج وسافرتوا مو بعد يجي ويتفق وياها على خطوبه ويختفي.

شمه: اكو وحده مثلي تسامحه بعد اللي سواه وتبقى تتوسل بي وقابله بكل شي..
بكل شي قابله بس هو يرجع؟ اكو مثلي انتي كوليلي؟
نور: لا والله حشا ماكو، هي مرته من وكع مجتي شافته ولاانكسرت عينها ولااستحت..
انتي اصيله واحنه نشهد.
شمه: شسوي اكثر فهميني؟ تعبت والله تعبت.
نور: ميخالف حبي طولي بالج عليه هو هسه ممصدك انتي رجعتي وشافج والتقى بيج وحجه وياج، تتوقعين يكدر يقاوم يتركج بعد؟
مستحيل..

انتي هسه بالنسبة اله هدية واجيتي من السما مستحيل يغلط نفس الغلط ويعوفج..
بس اصبري عليه بعد شويه هو بقت جرعة وحده اله وان شاءالله ياربي تكون الاخيرة والشافيه يارب.
ادعيله.
شمه: ياارب.
نور: انتي لتركيه لحي عليه راسليه احجي وياه هو هسه كبريائه يمنعه هو يبادر وحاس بتأنيب الضمير على إلى صارلج ومستحي منج ومن امج..
صحيح امج شنو كالت من شافته وياج؟

شمه: بعدها محجت شي، بس اكيد اليوم تسويلي تحقيق والله اعلم شنو راح تكون العقوبة هالمره.
نور: اوووف شجاها الدنيا عليكم.
شمه: وينه هو هسه؟
نور: والله اليوم خليناه نايم كلنه تعبان لاحك عالشغل. خلص حياته شغل بشغل ومشاف راحه.
شمه: الله كريم.
نور: شمه. امي تريد تحجي وياج؟
شمه: لاعفيه استحي فشله.
نور: ليش تستحين مره عجوز مثل امج وام العزيز هايه ههههه. يالله هاي وياج.
ام ايوب: ها يمه شمه شلونج؟

شمه: هلو خاله الحمدلله انتي شلونج؟ شخبارج؟
ام ايوب: حبيبتي والله من كال متأذيه ظل بالنه عليج بس البنات ميعرفن رقمج، وايوب ميقبل ينطينه الرقم.
والله شكد لحينه عليه من صارت شغلتكم لليوم مره يكول غيرت رقمها ومره يكول ماعدها تليفون ومره يكول حذفت رقمها ولعب علينه لعب.
شمه: هو هذا ايوب عنيد ورأيه واحد.
ام ايوب: اي والله..

والله ياخاله احنه مستحين منكم وخجلانين ومالنه عين نحجي وياج بس بعد شنسوي هو خلانه وخلاج بموقف مو حلو، مستحين من الوالده حيل والله مو شويه.
والله البارحة كله احنه نحجي بيج وبأخلاقج اني وخواتج البنات وكلنه نجيكم للبيت نتحمدلج السلامة وناخذ مابخاطر الوالده ونعتذر.
شمه: الله يسلمج خاله حبيبتي.

ام ايوب: بس انتي حبيبه طولي بالج عليه هو عصبي صاير شخاطة من كلمة يشتعل اتحمليه حبيبتي وادعيله يمه هو هسه بس هاي الجرعة عنده بعد وان شاءالله يطيب ويروح المرض.
شمه: ادعيله خاله. ادعي والله ومتحمله ومنجبه وساكته بس غير هو يرضى ويقتنع.
موتني بعناده اني حاطيت نفسي علموده بأكثر مو موقف ومشكله وصارت هواي مواقف بيني وبين امي علموده ومع ذلك كل هذا خليته وره ظهري وكلت مو مهم المهم هو.
بس يعاند.

والله محترك كلبي عليه والليل ماانامه وكتله ابقى وياك شميكون وضعك قابله يكولي لاا.
زين شسوي تعبت انتي فهميني شسوي؟
ام ايوب: حقج. حقج. بس كتلج عنده بس هالجرعة بعد اسبوعين ياخذها وراها يروح يسوي فحص وان شاءالله خير..
شمه: يارب.
حجيت وياها وبعدين رجعت انطت التليفون لنور كلتلي: هو نايم بس خل اشوفه كعد لو لا واحجي وياه مراح اكوله هاي انتي خليه يتفاجأ.
شمه: اوك.
بقيت منتظرة عالخط بس ماكو صوت. طول الهدوء..

شمه: الو؟
الوو؟
الووو؟
نور؟
الو نور تسمعيني؟
ايوب؟
الو؟
فجاة كلي: الو؟
من صوته مبين نايم. كتله: الو
ايوب: منو؟
شمه: انت منو؟
كلت خل اسوي نفسي معرفته ولامتصله علموده.
ايوب: انتي متصله مو اني.
شمه: متصله على نور هذا مو رقم نور؟
ايوب: منو انتي؟ شمه؟
شمه: صح النوم، شدعوه حتى صوتي ناسيه؟
سكت بعدين كلي: شكو؟
شمه: شنو شكو؟ متريدني اتصل؟
ايوب: ليش؟ شكو؟ صاير شي؟
انقهرت من رده كتله: تره اني اتصلت على نور مو عليك..

نور دزتلي رقمها ورادتني اتصل عليها..
واذا اتصالي سببلك ازعاج، فاني اسفه..
بعد ميتكرر. مع السلامة.
سديت التليفون وكعدت على مكتبي ومحروك كلبي..
وره تقريباً ساعة دزتلي نور مسج: بشريني شنو صار؟
شمه: ماصار، كلي ليش متصله شكو؟
نور: يااا؟ بس هاي؟
شمه: اي بس هاي.
نور: يالله حبي ميخالف شويه شويه هسه هو يبدي يتصل ويراسل صدكيني هم الرياجيل هيجي يبيعون ثكل علينه.
شمه: الله كريم
نور: اكدر اتصل عليج؟

شمه: هو اني بالنهاية راح انطرد من وره اخوج هههه لو طالعة لو احجي بالتليفون.
اتصلت كلتلي: هو جابلي التليفون وراح للحمام.
مكلي شي عبالي حاجين شي كايلين شي.
اختنكت وبجيت كتلها: من عرفته هو هذا طبعه يخليني اخر شي كل متصير مشكلة يروح يدور على الشغلات الثانوية يحلها ويخليني اخر شي، يخليني ينشلع كلبي واتحمل اللوم والحجي والاهانه علموده وهو ولا على باله..
ماادري اني شنو جاي اسوي؟

ليش احب اءذي نفسي بي؟ ليش احبه هلكد واني اعرفه، اعرفه يخليني اخر اهتماماته مثل كل مره.
غير اتوب منه، احبه ليش؟
ليش؟
يعني اني لهسه محاجيه امي وياي لان البارحة بعدها خايفه علي بس اليوم اكيد متسكت مستحيل تسكت..
راح بدون تبرير وبدون ميفكر باللي صارلي.
مكال هالحيوانه هاي شنو صار بيها وراي؟ شنو اهلها سوولها؟
مكال يمكن من حجه بالخطبة امي يمكن حجت لاهلها وكرايبها وكلتلهم واحد جاي على بتها؟

زين من اختفى مكال شنو موقفي كدام امي كدام اهلها لو يدرون؟
لا، ميكول، هو عنده كل تصرفاته صح فليش يبرر ليش يسأل ويتعب نفسه؟
المهم هو مقتنع باللي سواه اني مو ووضعي واللي يصيرلي مو مهم..
مجاوبتني، بقت ساكته.
فجاة سمعته كلي: تشتكين مني يعني؟
انخلست. بقيت ساكته فاجأني.
ايوب: سكتي؟
كملي حجي؟
طلعت هسه مخليج اخر اهتماماتي ومااهتم باللي يصير وياج مو؟
شمه: اذا غلطانه كول؟
ايوب: لا مغلطانه..
انتي متغلطين حشاج..

بس رجعتي لبغداد رحتي لسرمد يشوفلج شغل ويساعدج، ودك الناقصه وكلج اريد اخطبج مو؟
وبقيتي تشتغلين بنفس المكان..
لج انتي شنو؟ متفهميني معندج عقل؟
متفتهمين؟
باقيه هناك على اي اساس وليش؟
ظل يصيح علي، قهرني عبالك مسويه جريمه. اني هم فقدت اعصابي ونسيت الموظفين اليمي كتله: شمه: اني وحده مااستحي وماعندي كرامه ولا حتى احساس فعادي ابقى ليش ابطل يعني؟
ليش؟

غير لان بطرانه وعاجبني سرمد وغيره يتحرشون بيه ويتغزلون بيه كلما شافوني..
مااستحي شسوي يعني؟
متعافية على حياتي وعيشتي المثلي تكعد بالبيت وتخلي رجل على رجل مدلله شعدها طالعة من البيت وكاعده بين الرياجيل؟
هااا؟
انت كولي ليش؟
بقى ساكت. كتله: الايده بالمي مو مثل الايده بالنار..
وهذا اكبر مثال هسه انت عفت المواضيع المهم جلبت بخ، ه سرمد وليش اني اشتغل هنا..
على اساس الوظايف منتظرتني..

خلص مو مشكلة ابطل مثل كل مره علمود واحد مثل سرمد وغيره واروح اكعد بالبيت انتظر الناس تنطيني صدقات اعيش بيها ابني وامي..
ايوب: لتحاولين تغيرين الموضوع.
شمه: مغيرت اي موضوع، وخلص اني هم صوجي اني حماره عاجبني اذل نفسي اكثر.
استاهل إلى صار واللي راح يصير.
اني لو عندي كرامة جان مذليت نفسي علمودك اكثر.
يالله مع السلامة.
واطلع صدك مابيه خير اذا ماقبلت بسرمد لو اتصلت وحجيت وياك مره ثانية..

قبل ميجاوب سديت التليفون..
بقيت الوب وكللش ضاك خلكي وانقهرت، احتاريت شلون اتعامل وياه وشسوي لاكادره اعوفه واسكت وابتعد ولا كادره اتحمل لامبالاته وتصرفاته المتعمده والاستفزازية وياي.
كلما اتذكر اسلوبه وياي اموت من القهر.
تعبت من المكابره تعبت وذليت نفسي الك هواي كافي.
حس بيه..
اتنازل لخاطري شويه مطالبه منك شي بس تحجي وياي عدل بس ترجع ايوب القديم..

رجعت للبيت اول مدخلت حسيت امي محظرتلي موشح من نظرات عيونها وخزراتها..
خاف اني اليوم ناقصه قهر وخنكة.
اكلت لكمتين منتظرة الرزاله ومخيبت ظني كلتلي: البارحة جنتي طالعة وياه؟
شمه: منو؟
امي: اكو غيره هالبلوه المدري منين طلعنه؟
شمه: لا لاكيته بالصيدليه.
امي: لاكيتيه؟
شمه: اي جان عند الدكتور.
امي: واني صدكتج، شوداج انتي وياه لهناك لمكان الانفجار؟ مو اتصلت عليج وكتلي السايق هسه اجه؟

شمه: مااجه. اتصل كال السيارة طفت بالشارع وازدحام لااكدر اطلعها ولاقابله تشتغل..
لو تاخذين تكسي لو تنتظريني على مااصلحها.
امي: اي؟
شمه: اي، اني جنت بالصيدليه رايحة اجيب علاجج ولاكيته وسمعني احجي ويه السايق مقبل اصعد تكسي ولا ابقى انتظر لحد ميصلح السيارة.
امي: لا كسر خاطري والله، ظلمته..
لج انتي شنو معندج كرامه؟
متستحين؟
واحد عاااافج، عااافج وانهزم شلون تحجين وياه بعد وتنطيه وجه؟
كرامه ماكو؟

شحجيت شوصيت شكلت؟
شمه: ماما ايوب مريض معافني بدون سبب..
عافني لان مراد يورطني وياه وهو يتعالج.
دياخذ كيمياوي عنده سرطان، تفهمتين يعني شنو مراد يورطني وياه..
مراد يبهذلني مو ميحبني لو جذب علي..
سكتت شويه ومثل عادتها من تحس نفسها غلطان تنهزم من المواجهه راحت للمطبخ ماادري شتسوي..
وره شويه اتذكرت شي ثاني رجعت وكفت على راسي كلتلي: هاي بلعناها بحجة مريض..

انتي شلون تقبلين تصعدين ويه رجال غريب وحدج بالسيارة؟ مخفتي على نفسج؟
مستحيتي؟
مكلتي اخاف احد يشوفني شيكول عني؟
لو صاير بيكم شي اثنينكم بالانفجار شكول للعالم والناس اني منو هذا اللي لكوج وياه بالسيارة؟
متخافين من حجي الناس انتي لو معندج عقل؟
وصلت لمرحلة مااكدر اضم دموعي بعد كافي إلى سمعته منه اليوم وهسه امي اجت تكمل اللوم علي كتلها: يعني لو ميته انتي همج حجي الناس؟

يعني هاي البنات تسوي بلاوي بس اني صعدت وياه بالسيارة طلعت مو زينه ومااستحي وماعندي كرامه؟
ارجع بحدي بتكسي عادي السايق مو رجال غريب بس ايوب غريب؟
عالاقل ايوب اعرفه واثق بي..
احسن ابقى انتظر السايق لنص الليل لحد ميصلحها؟
عادي ابقى واكفة بالشارع لحد ميصلحها ويجي؟
تعبتوني والله تعبتوني الله ياخذني ويخلصني، ساعة السوده الشتغلت بيها وطلعت وشفت ايوب وشفت الناس والدنيا، الله ياخذني ان شاءالله..

عرفت ماعندي كرامة ومااستحي والله عرفت ميحتاج كل شوية تعيدوها علي حفظتها.
شوكت الله يموتني ويخلصني.
شوكت.
بقت ساكته وحاطه ايدها على خدها.
---
---
ايوب..
بعدما اتفقت ويه ام شمه اجيب اهلي واجي اخطبها.
رجعت لبغداد وحجيت لامي واتفقنه عالاسبوع البعده اخذهم ونروح للبصرة نخطب، بس وره يومين حسيت اكو شي برگبتي مثل الغده مدوره.
بالبداية عادي بس من حجيت يم سلمان خوفني وكلي كرايبه نفس الشي وطالعة غده سامه.

رحت ثاني يوم للدكتور كلي: متبين سامة لو لا الا بعد منشيلها ونسويلها زرع وعلى اساس نتيجة الزرع يكون العلاج.
بس هي عالاكثر مو حميدة لان متتحرك من مكانها مثل الغدد الطبيعيه.
ايوب: زين اذا اريد اشيلها شوكت اكدر اشيلها؟
الدكتور: باي وقت اختار جراح زين واني راح ارشحلك الدكتور، هو يسويلك العملية بس تروحله وهو يحددلك اليوم ويكولك التكلفة.
اتشكرت من الدكتور وطلعت رحت للجراح واكدلي كلام الدكتور الاول..

جنت شبه مقتنع انه الغده سامة وسرطانيه لان الدكتورين شككوا بيها لذلك حاولت ابعد شمه شويه شوية. اكيد امها مراح تقبل تنطيها لواحد عنده سرطان.
وره يومين سويت العملية وبقى انتظر نتيجة الزرع.
نفسيتي جانت جداً تعبانه واتسرعت واتخذت قرار انه انهي كل شي وياها.
بعد اسبوعين طلعت نتيجة الزرع مثلما اتوقعنه.

مشكل الموضوع صدمه إلى لان جنت مهيأ نفسي لهيجي خبر بس اللي خنكني انه اني حظرتها قبل كم يوم ومااكدر اتراجع بعد لان هسه وضعي اختلف..
ماكو وحده اهلها يقبلون ينطوها لواحد بي سرطان حتى لو هي رايدته.
قراري صحيح لكن اتعذبت عذاب بكد عذاب الجرعات إلى اخذها.
كل شهر جرعة اوصل بيها للموت..
لكن اللي يصبرني ويخليني اتحمل امي واملي اطيب وارجعلها قبل مترتبط بغيري.

منى من عرفت بمرضي لااجت ولااتنازلت وسألت هنا امي هي اللي اصرت اطلكها.
حاولت تلوي ذراعي بأمير بس اصلاً امي تعبت هواي بسبب مرضي تعبت وياي حيل يعني بعد متكدر تهتم بأمير.
خليتها تاخذ امير بس طلكتها.
عالاقل حتى لو الله مكاتبلي اعيش واتزوج الانسانه الحبيتها عالاقل اموت براحة بدون ميكون شي خانكني وشالع كلبي اكثر وغاثني.
وصلت للجرعة التاسعة وعلى الاساس الاخيرة اذا طلع الفحص بعدها نظيف..

اتفاجات بيوم الصبح جنت نايم واتصلت بيه نور اختي كلتلي محتاجيك تمر علينه اني وامل يم بيتنه بشارع فلسطين.
من رحت اتفاجأة شفت إلى باحلامي متتخيله.
شمه راجعة. وواكفة ويه خواتي كدامي.
بس مجنت اريدها تشوفني بحالتي هاي.
مجنت مستعد لهيج شي ولامتهيأ عالاقل نفسياً.
اجت بالوقت الغلط بالوقت اللي توني بديت اكدر اتكيف واتعود على حياتي بدونها.

احسها مثل المخدرات شكككد احتاجيت وقت حتى اتعود مااحجي وياها ولا اسمع صوتها ولااراسلها..
وهسه باول موقف جمعني بيها حسيت رجعت لادماني..
عالاقل لو باقيه مختفية لحد مااخذ الجرعة واشوف النتيجة.
حسيت نفسي ضايع مااعرف شلون اتصرف اتمنى احطها بنص كلبي واسده..
بس مااكدر اجازف..
صبرت كل هالاشهر المرت لازم اصبر بعد يمكن النتيجة بيها امل..
لازم مااعشمها بشي بعد لحد ميستقر وضعي.

اللي قهرني اكثر انه اكثر شخص اثق بي من اصدقائي خان الثقة.
سرمد يعرف برجعتها ومشغلها ومكلي شي ولا لمح للموضوع وعالاكثر ومن خلال كلامها هي هم متعرف وضعي لان مكاييللها شي.
وطبيعي ميكوللها شي وميكولي اذا هو نيته يطعني بظهري ويخطبها لنفسه..
كل هالعذاب بلحظة راح ونسيت من وصلتها بيوم الانفجار..
حسيت كل شي انتهى بالماضي ورجعنه اليوم بدينه صفحة جديدة وبداية جديدة واتمنيت الله يعوضني بيها.

لان فعلاً هي العوض الوحيد اللي اني رايده بحياتي عن الايام اللي شفتها والتعب اللي تعبته وعن السنين اللي اتبهذلت بيها بين منى وابوي.
المشكلة المرض مخليني عصبي والكلام عن سرمد خلاني متشنج كلما اتذكره انغث واموت واني اتخيل يوميه واحد خاطبها وممكن بأي لحظة توافق وتتزوج..
كلما احجي وياها احاول اكون على طبيعي بس مااكدر كبريائي يمنعني خصوصا بعد ماعرفت سرمد هو اللي مشغلها.
لجأت لسرمد الغريب واني لا..

رغم اعرف حقها ومن سابع المستحيلات تطلب مساعدتي بعدما نهيت كل شي وياها بدون مبرر بس مو بيدي.
كلما احجي وياها اءذيها بكلامي اكثر بس بدون قصد..
مابيدي شي اسويه لاكادر امنعها تشتغل ولاكادر ابطلها ولاكادر اخطبها وارتاح.
باقي منتظر وخايف من صدمة الخبر من يكولون انخطبت لفلان..
ضغطت عليها هواي. ضغطت عليها اكثر من اللازم..

وكلامها كان صحيح دائماً افكر احل الامور واتحقق واجيب المعلومات وهي اخليها اخر شي، يمكن لان ضامنها تحبي. بس مو قصدي الاذية..
ياخوفي تموتني صدك وتتزوج، ذيج الساعة الموت ارحم من حياة بالعذاب.
---
---
في صراعي مع الجبابرة للفوز بها فقدت السيطرة على نفسي لاكون اول الخاسرين..
فلا انا ربحتها ولا هزمت الباقين.