رواية صراع الجبابرة للكاتبة روز الفياض الفصل الثلاثون
مهما طالت بنا الحياة ومهما ابتعدنا لن نستطيع يوماً نسيان ذلك الحب الاول.
ذلك الحب القديم.
ذلك الحب الذي كان يملؤنا املاً وحياة.
ثم. اختفى..
---
شمه.
حتى زقزقة العصافير مختلفة في مدينتي. بغداد.
انها بغداد التي تغنى فيها الشعراء. وكتب عنها الكتاب.
انها بغدادي. بغداد والشعراء والصور.
كيف لمن غادرها ان يعيش بعيداً عنها.
وكيف لمن ولد فيها النزوح منها.
ليومين متتالين استيقظ منذ الصباح الباكر واجلس متأملةً في حديقة منزلنا الصغيرة.
استنشق عطر تلك الجهنمية الكبيرة الهرمه.
واتلمس اوراق ازهار الجوري.
وامتع نظري بحسنها.
الان فقط احسست اني على قد الحياة.
انظر الى ذلك الباب الموصد امامي واحاول ان اتذكر كم مره مررت من خلاله الى قلبي.
كنت تصطنع الحجج للمجيء لرؤيتي. وتمتلأ عيناك سعادة عند ملاقاتي.
فهل كان كل ذلك كذباً.
آه. ياويل قلبي من محبتك التي تلازمني. وصورتك التي لاتفارق مخيلتي.
ولا تستطيع اذني للان انكار الحنان في صوتك.
احاول ان اتذكر كم من مرةٍ وعدتني فيها بالبقاء. وكم مرة وعدتني فيها بالوفاء.
وكم مرة وعدتني فيها بأنك رجُلي وفارس احلامي.
وانك انت الملاذ الحقيقي والسند الذي لايميل ولايختلف.
فماذا جرى؟
ماذا جرى لتجازيني بهجرك وبُعدُك وخذلانك؟
يومية جانوا بنات ام ستار يجون وياي يساعدوني نرتب البيت ونرجع الاثاث بمكانه مقصروا ابد.
اسبوع استغرق من عدنه الترتيب والتعزيل.
بالليل جانوا الجوارين يجون يسلمون علينه ويتحمدولنه السلامة واني وبنات ام تيسير جنه نكعد نلعب اللعبات إلى جنه نلعبها بأيام زمان من جنه بالمدرسة ( ملك، وزير، جلاد، حرامي ) او نلعب لعبة الحروف ( حرف، اسم، نبات، حيوان، جماد، مدينة ) وجنه نشبع ضحك.
وامي وام تيسير يخلصوها جايات رايحة وجايات راجعة.
لكن حتى باقصى درجات الفرح والسعادة اللي حسيت بيها بقربي من ناسي ورجعتنه لبغداد جان موجود.
موجود بداخلي مااكدر انساه.
الچاي صار مفهوم يمثله.
اي كلمة حب او عاطفة او حنية تمثله.
اي كلمة او موقف شهامة وكرم يمثله مثلما صارت تمثله كل كلمة او موقف غدر ونذاله..
كلمة وظيفة تمثله.
كلمة مدير معناها هو.
كلمة حب كلمة حنان كلمة اشتياق..
وكل كلمات قاموس الحب صارت تمثله كلها تذكرني بي لدرجة حتى بغداد احسه هو.
كل مكان وكل شارع يذكرني بي.
اذا اطلع اكول يارب اشوفه.
واذا دك التليفون اكول يارب هو.
واذا نمت اكول ياربي احلم بي.
جنت احس الكل يعرف باللي صار والخجل ماكلني.
امي رجعتنه لبغداد لان شافتني تعبانه حيل حيل تعبانة مو مجرد تعب عادي.
ولازلت تعبانه بس مو كدامها.
جنت استرق لحظات اكعد بغرفتي او بالحديقة وابجي بحركت كلبي من اتذكره.
جانت جنان بت ام تيسير معلمة بمدرسة اهلية ومن جنه بالبصرة مخطوبة لولد معلم وياها.
وبعد تقريباً تلث اسابيع من رجوعنه جان زواجها.
عزمتنه بيوم الحنة مالتهم.
مجنت اريد اروح مالي خلك بس امي اصرت على اساس حتى اغير جو بدل حبسة البيت.
رحنه بس اول مفتت اختنكت.
كل ضحكه منها جنت اتذكر اذيته.
جنت كاعده على اعصابي لحدما دخل العريس يحني ايدها.
محسيت بالدمعة النزلت من عيني بس امي كلتلي: الله يعوضج بالاحسن منه.
ميستاهل اظفرج. مسحي خدج.
حسيت مااكدر اسيطر على دموعي اكثر واذا بقيت راح افضح نفسي: اني راجعة للبيت. انطيني المفتاح.
انطتني المفتاح ورجعت للبيت.
بجيت وبجيت وبجيت وارتاحيت بعدين دزيت مسج للمياء: هلو وينج رجعتي اختفتي؟
مجاوبتني الا وره نص ساعة: جنت نايمة.
شمه: نوميش هسه؟
لمياء: لج اكو فرق بالتوقيت بينه وبينكم
شمه: اي صح نسيت. يالله روحي نامي غير وكت نحجي.
لمياء: لا لا تعاي اريد احجي وياج.
شمه: شنو؟
لمياء: اول امج وين؟
شمه: طالعة بالحنة مال جيرانه.
لمياء: اهاا تمام. احجيلي شبيكم انتي واوبي؟ شصاير بينكم؟
شمه: مصاير شي
لمياء: اتصالحتوا؟
شمه: لا. شنتصالح من كل عقلج انتي؟ قابل احنه متعاركين؟ احنه منفصلين منتهين كلمن راح بطريقة.
لمياء: انجبي شنو منفصلين شنو منتهين فهميني شصار؟
حجيت للمياء كل اللي صار.
لمياء: مااصدك..
مااصدك ايوب يطلع واحد جذب. مستحيل.
شمه: بعد هذا الصار.
لمياء: لج مااصدك جان مستقتل عليج شتحجين انتي. مو اخذنه اني وامي علمودج من بغداد للبصرة؟! وين اكو هيج جذب وتمثيل؟
ماكو تره واحد يجذب ويوصل بالجذب لهالمرحلة..
لج حجه ويه امي وكللها احبها واريدها بالحلال وعلى هذا الاساس اجينه وياه اني وامي!
شمه: ورجع مره ثانية اجه من سمع بحسام وحجه ويه امي اتصوري وكللها مسألة ايام واجيب اهلي واجي اخطب، وتالي طلع جذب. حظرني.
لمياء: حظرج؟! لا مااكدر استوعب وانتي شلون سكتيله؟
شمه: شسوي مثلاً؟ اروحله لبغداد واتعارك وياه؟ لو اروح لاهله واشتكي عليه؟
اني شمه لمياء احبه صحيح ومشلوع كلبي عليه بدونه احسه روحي ميته بس ماانزل راسي اله اكثر، شكد دروتله اعذار ومبررات بس ماكو شي مقنع.
لمياء: والله مااكدر اصدك، لازم اكو سبب. دزيلي رقمه.
شمه: شتسوين بي؟
لمياء: هسه دزيلي رقمه ومعليج انتي اني اتصرف، اريد افتهم شبي وليش هيج اتغير بين يوم وليلة؟
شمه: مستحيل، لو اموت بعد مااريد اعرف عنه شي ولاعن اخباره. انتهى.
لمياء: لج لتصيرين عوبة وتخلين مشاعرج وعصبيتج تقودج دزيلي الرقم.
شمه: لعد هو شلعب بيه وبحظي غير مشيي وره مشاعري، ماكو شي كسرني ووكعني غير مشاعري.
غير حجيه الحلو وكلامه المعسول وتصرفاته المجنونة. كلها خلتني اصدك واغمض عيوني عن الغلط.
اني زواج جنت متزوجه وملحكت اتهنه بي وراح بغمضة عين تردين احب ويطلع صدك يحبني ويضحي علمودي بأهله وزوجته وابنه؟
ماكو هيجي شي. بس اني غبيه وجان عندي امل. او يمكن لان عشت مشاعر سامعة بيها بس ممجربتها من قبل.
لمياء: وتبقون هيجي؟
شمه: كل شي قسمة ونصيب..
لمياء: عمي دطيري، هاي لو اني واحد يكولي اريد اخطبج وبعدين يعوفني تهي بهي غير اسويها عشاير واتزوجه غصبن عليه انهه عليه مثل القصص وشحده يتزوج غيري دمه ودمها مهدور.
شمه: هههههههههههه
لمياء: والله، جايتني سد التليفون بوجهي وحظرني هو بكيفه.
ظلت لمياء ترزل وتعيد وتزيد.
ومرت الايام بس بقت حاجتنه للراتب.
لازم ارجع اشتغل.
لاهبة لالمياء لا ايوب منو يشغلني بعد..
وين اروح وادك باب منو؟
منو يساعدني؟
حتى استاذ مؤيد مااكدر اروحله بعد ولايكدر يساعدني. اروحله بيا عين بعد؟
بعين اللي تحب زوج اخته..
لو بعين اللي مسويه علاقة مع ابن عمه وهي تشتغل بمكتبة..
انسيهم..
انسيهم..
الله موجود حاشاه يكطع بعبده.
تدبر.
حجيت ويه امي بموضوع الشغل كلتلي: اني راح اقبل لسببين بس.
الاول لان انتي نفسيتج تعبانه ووضعج وصحتج معاجبيني كله بالنازل وين العلاج اللي تاخذينه.
يمكن لو اشتغلتي تلتهين وترجعلج عافيتج.
والسبب الثاني هو حاجتنه للفلوس ولو اني لازم اراجع على معاملة الراتب التقاعدي مالت ابوج لان احنه محتاجين واني متعاجزة.
بس انتي شفتي شصار نتيجة نيتج الطيبة ويه الناس..
إلى صار مااريده يتكرر بأي شكل من الاشكال لان هالمره تموتيني شمه، مفهوم؟
هبه مقصرت بيج تتذكرين شيوت بيج؟ وهو هم مقصر، تأذيتي منهم اذية العالمين وجتى صحتج خسرتيها.
ومتأكده اني انتي لهسه متأذيه..
فهالمره روحي بطريقج ورجعي بطريقج.
واللي يريدج يجي يدك باب بيتج هو واهله.
كافي اللي صار..
احنه مو مثل هالناس وانتي مو مثلهم.
انتي بعدج بتفكيرج بتصرفاتج بنيتج الصافية ويه الناس طفلة..
زين؟
هزيت راسي واتنهدت بقهر.
المشكلة مااعرف احد ولاعندي رقم احد بس لمياء ولمياء بآخر الدنيا.
مالي غير سرمد..
اروحله واشوف اذا يكدر يساعدني.
وره يومين رحت لسرمد.
من دخلت وشافني ظل صافن بوجهي..
بعدين كلي: اكول اليوم الدنيا منوره هههه هاي منو اليوم عدنه؟
شمه!
شمه: السلام عليكم
سرمد: وعليكم السلاااام وين ماوين يمعودة وين رحتي وبعد مشفناج ولاسمعنه صوتج.
اتفضلي.
اتفضلي.
كعدت كلي: وينج؟ ترحين فجأة وترجعين فجأة شلونج شخبارج؟
شمه: الحمدلله، الحمدلله.
سرمد: زينه؟
شمه: الحمدلله بخير.
سرمد: اي تمام مادام بخير الحمدلله.
شمه: شلونك انت شلون زوجتك وبناتك؟
سرمد: الحمدلله زينين. بشريني عنج انتي وين صرتي اتزوجتي اشتغلتي؟
ابتسمت جذب كتله: لا بعد شتزوج..
كرهت الزواج والمتزوجين.
سرمد: حقج. حقج والله، ياالله بعد شتسوين.
شمه: ابو رتاج محتاجتك بشغلة.
سرمد: اي امريني. اتدللي.
شمه: اشكرك، بس اني محتاج وظيفة عالاقل لحد ميطلع راتب الوالد الله يرحمه التقاعدي.
سرمد: اجيتي بوقتج اليوم ولد بطل عدنه بالمكتب تعاي بمكانه.
شمه: لا لا ماريد هنا. اريد بغير مكان اذا تكدر. يعني مثلا مكتب ثاني او شركة ثانية بس عفيه كون ناس زينين وثقة.
سكت شويه بعدين كلي: اصبرلي هاليومين وان شاءالله احصلج شغل بمكان محترم. زين؟
شمه: ان شاءالله. يعني اعتمد؟
سرمد: اي طبعاً اعتمدي اذا ماكو شغل اسوي شركة جديدة علمودج هههه.
هم رجعت ابتسمت جذب هذا اليكولك اذا جانت حاجتك عند، كوله..
شمه: بس ابو رتاج الله عليك..
الله عليك..
مااريد احد يعرف اجيت وحجيت وياك ولا اريد احد يعرف بموضوع الشغل نهائياً ولاعبالك شفتني اصلاً. انت تعرف منو اقصد.
سرمد: اعرف، اعرف..
وصار وتدللين محد يعرف.
بس كتبيلي رقمج حتى اذا حصلت شي ابلغج.
شمه: اوك.
اتشكرت منه وطلعت..
طول فترة كعدتي جنت خايفة لايجي ايوب ويشوفني.
بس الحمدلله عدت على خير.
وره اسبوع دزلي مسج كلي: هلو شمه شلونج شخبارج حصلتلج شغل بمكتب طيران ثاني بس شوية بعيد عليج يجوز بشارع فلسطين شتكولين؟
اذا موافقة حتى ادزلج العنوان وروحي وشوفي.
رديت عليه: هلو ابو رتاج. اي ميخالف عادي ماكو مشكلة.
دزلي العنوان وثاني يوم رحت.
الطريق مزعج بسبب الازدحامات بس يالله كلما كان بعيد احسن.
وصلت وقدمت نفسي وطلع سرمد كايللهم علي فقابلوني سألوني كم سؤال وكلولي من باجر تعاي داومي.
وفعلاً ثاني يوم داومت.
الشغل جان مو جديد نفس شغلي بشركة سرمد.
اتصل بيه سرمد يسألني عن الوضع: ها شمه بشري؟
شمه: تمام اليوم داومت
سرمد: اي خوش. خوش، جربي الشغل وياهم خوش ناس تره والله اني فهمتهم انتي تخصيني كرايبي يعني اذا سألوج كولي كرايبي. اوك؟
شمه: اوك.
سرمد: واي شي يصير اتصلي بيه فوراً. زين؟ لتترددين ابد شتحتاجين اني حاضر..
شمه: اشكرك ابو رتاج مقصرت. بس عفية مثل موصيتك مااريد احد يعرف برجعتي لبغداد ولاشغلي هنا.
سرمد: اي اي قصدج ايوب غير؟ لا خلص انتي وصيتيني شلون اكوله بعد.
ميعرف اي شي لتخافين. ميكدر يوصلج هناك.
وحتى لو شافج او عرف شلج علاقة بي انتو مو انفصلتوا بعد؟
شمه: بعد. هيجي احسن مااريد مشاكل، كافي مشاكل.
سرمد: اي، حقج، هسه المو كد الحب ليش يحب ويورط بنات الناس وياه.
بقيت ساكته..
سرمد: احسنلج هيج والله صدكيني، باجر يجيلج واحد كول وفعل. مو بس حجي.
كتمت حسرة جبيرة جانت بصدري وكتله: الله كريم.
الايام تمشي واني لانسيت ولا ارتاحيت.
سرمد جان مرات يمر للمكتب اللي اني اشتغل بي. بس جنت احاول اتجنبه لان اعرفه مو نظيف.
سرمد: عمي شصايرة؟ انتي منين الله خالقج من عسل مو من طين.
غلست وبقيت مدنكة اكمل شغلي.
سرمد: شمه اريد احجي وياج بموضوع.
شمه: احجي.
سرمد: لا مو وكته هسه انتي بالشغل مو مكان حجي وسوالف..
شمه: براحتك.
جانت لمياء الشخص الوحيد اللي يضحكني.
جنت احجيلها يوميا عالشغلات إلى تصير بحياتي وعلى وكاحة وسوالف ادم وهي كالمعتاد تصنف وتضحك.
احلى مابيها انه متزيدني فوك همي هموم بالعكس.
جنت انسى وياها كل هموم حياتي.
ومر شهرين على رجوعنه لبغداد وجان سرمد لازكلي لزكة بمسجاته الماصخة يوميه شلونج وشخبارج وشمسويه..
بس جنت ماارد عليه.
جنت اداوم شفت واحد بس بسبب الطريق والازدحامات.
جنت اطلع من المكتب الساعة بالثنتين ومااوصل للبيت الا بتلاثه ومرات بتلاثه ونص.
انام بس اوصل واكعد العصر اتغده.
طبيعي بعد من اكعد مااكدر ارجع انام بالليل فرجعت لهوايتي القديمة.
متابعة الافلام المصرية القديمة.
لكن هالمره اعيشها بكل تفاصيلها مو مثل قبل جنت اكول عالاقل اعيش الحب بالافلام.
هسه لا. بعد عشته وشفته.
بيوم جنت وحدي بالمكتب البنية والولد الوياي طلعوا لمول زغير قريب علينه مسوي تنزيلات.
اجه سرمد: السلام عليكم
شمه: وعليكم السلام
سرمد: شلونج شمه شخبارج؟
شمه: الحمدلله
سرمد: شنو اشوفج بحدج وين البقية؟
شمه: هسه يجون راحوا للمول.
سرمد: شعدهم؟
شمه: ماادري يكولون تنزيلات مااعرف شنو وراحوا يشوفون ويشترون.
سرمد: وانتي ليش مرحتي وياهم؟
شمه: شسوي رايحة. ومنو يبقى بالمكتب اذا كل احنه رحنه.
سرمد: هم صدك. بس اخاف مشايله وياج فلوس؟ كولي لتستحين شكد تحتاجين كولي. اتدللي.
شمه: شكرا بس الحمدلله عندي خير من الله ممحتاجة.
سرمد: ان شاءالله دوم متحتاجين.
بقيت ساكته وهو هم ساكت بعدين كال: شلونهم هنا وياج؟
شمه: الحمدلله. زينين
سرمد: هي المشكلة انتي حلوه.
باوعتله كلي: والله العظيم شبيج لتباوعيلي هيج. انتي حلوه ويطمعون بيج الميخافون الله.
شمه: الله الحافظ.
سرمد: ونعم بالله بس لشوكت تبقين هيج لازم يكون عندج سند وظهر. زلمة بظهرج. رجال يوكفلج حتى محد يتعرضلج. ميصير تبقين هيج انتي شابة.
شمه: لا بعد مااريد ماعندي ثقه برجال..
سرمد: لاااا، لتخلين تجربة فاشلة تدمرلج حياتج. الحياة كدامج والف واحد يتمناج انتي لو تأشرين هسه يوكفون طابور..
شمه: شدعوه. مو لهدرجة.
سرمد: جربي وشوفي.
بعدين اذا واحد خاين مو معناها البقية كلهم خونه..
اني كدامج اكولها بصراحة جنت حاسده عليج..
ومن كلي تركتها كتله احسن لان هي تستاهل زلمه.
بقيت ساكته مااريد احجي بهذا الموضوع ولاافتحه.
سرمد: عمي انتي بس انطينه مجال وشوفي الزلم شتسوي.
حركاته صرت اعرفها سرمد وكلامه مو جديد وفعلا جان حاسد ايوب علي.
غلست مجاوبته ظل يحجي شكددد واني ساكته منتظرة شوكت يروح او يجون بقية الموظفين.
لحدما راح داخ راسي من سوالفه.
ظل يومية جاي وعايد هالموشح على راسي لحدما فد يوم كلي: اذا اخطبج تقبلين؟
ظليت مفهييه، هذا شيحجي شلون يخطبني وصديقة؟
شمه: لا
سرمد: ليش؟ علموده؟
شمه: لا. بس صرفت نظر عن الزواج وبعدين انت رجال متزوج وعندك بنات ليش تريد تتزوج وتخرب حياتك؟
سرمد: اني مو مثل ايوب لاعندي زوجة متعبتني ولا شي بس الصدك اني مكادر اطلعج من راسي واشيلج من تفكيري.
يعني تفكيري صاير كله بيج شمه. شمه. شمه. شسوي مو بيدي انتي حلوه وتنحبين.
شمه: اتمنى تنسى هالموضوع هذا وتفكر تسوي تغيير بحياتك انت وام رتاج حتى تنسى هالافكار لان الزواج مو دائما حل. ولا عذرك مال زواج.
سرمد: فكري انتي والله اني مو مثل ايوب صدكي. احطج بعيوني.
شقه ابحدج وسيارة تحت امرج ومصرف وسفر وشتردين حاضر.
شمه: فلنفرض وافقت على كلامك، وزوجتك وبناتك؟
اتدنى شوية وكلي بصووت ناصي: وهي شعرفها..
محد راح يعرف بيناتنه بس..
مو اله كلها الناس تدري اكو امور من نسويها بالسر احسن. تدووم.
ظليت تحت تأثير الصدمة لثواني..
هذا المخبل ديعرض علي يتزوجني بالسر لو اني غلطانه؟
شمه: انت الظاهر مو طبيعي اليوم.
سرمد: هاا ليش؟
شمه: يعني جاي تعرض علي اتزوجك بالسر؟ وتسألني ليش؟
سرمد: اي شكو بيها؟ يعني واحد الا يحجي ويكول، ليش نجيب لنفسنه المشاكل خو بالسر ومحد يدري ومحد يدوخنه احسن وراسنه بارد..
شمه: غلطان بالعنوان ابو رتاج، اني مو من هالبنات. مستحيل اسويها. مستحيل، مع الاسف عليك.
سرمد: شدعوه عليج عبالك سبيتج، قابل كايلج صاحبيني.
شمه: لا بس اتزوجيني بالسر..
ظل ساعة يبرر ويتأسف ويحاول يقنعني بأنه هو مو مثل ايوب وانه هو خوش انسان ونظيف وميريد مشاكل ومن هالحجي اللي كله جذب بجذب..
بيومها ضجت صحيح اني رديت عليه ورزلته بس خفت منه.
خاف يسويلي قصة مثل الحجي ابو ايوب.
اختفى بعد هالحادثة سرمد..
يمكن شهرين او وتلاثة مشفته بعد ارتاحيت منه.
وحتى من شفته بعد سلم سلام عادي وفات.
الحمدلله من فكني.
بعد ست شهور من رجوعنه لبغداد بيوم جنت جايبة وياي آدم حتى اطلع من الشغل اشتريله ملابس للعيد.
الساعة بهدعش تقريباً اترخصت وطلعت للمول القريب يمنه.
مول زغير مو جبير.
دخلت ووياي آدم وظليت امشي واباوع عالمحلات.
محلات قليلة بي.
جان اكو محل مخلي استاند عليه ملابس مال بنات بره وشفت سعرهم مناسب فبديت اكلب بيهم.
التهيت اباوع عالملابس وادور شي قياسي، شويه والتفتت اشوف آدم وين راح ماله صوت.
شفته جاي وبيده نفاخة.
كتله: منيلك هاي النفاخة؟ منو انطاكياها؟
كلي: عمو..
باوعت مشفت احد.
اخذت ادم وطلعت رجعت للمكتب.
واني كاعده بالمكتب وآدم خال كرسي بره وكاعد اجه واحد باوع للمكتب وفات.
جنت احجز لشخص تذكرة لمصر وعيني على آدم.
خلصت الحجز إلى بأيدي سمعت واحد كلي: اكو طيران داخلي؟
حسيت رجفت مثل الكهرباء صارت بجسمي من سمعت صوته.
عبالك صوت ايوب.
باوعتله جان لابس كاسكيته بيضا ونظارات شمسة.
جاوبته: اي نعم اكو.
كلي: اكو طيران للبصرة؟
بهاللحظة شفت آدم نزل من الكرسي ركض وره نفاخته طارت.
رأسأً كمت عفت المكتب والرجال وطلعت اركض وراه.
رحت جبت آدم ودخلته للمكتب كتله: بعد ممنوع تطلع؟ مفهوم؟
متخاف من السيارات انت تركض وره النفاخة؟ بالله احد اخذك وراح خطفك؟
سمعت صوت الرجال كلي: طفل على كيفج وياه ميفهم.
شمه: لازم يتعلم من الطفولة ميثق بالناس لان مالهم أمان.
كال: مو كل الناس مو زينه مرات الحياة تجبر الانسان على اختياراته.
شمه: ومرات يكون الاختيار نتيجة ضعف بشخصية الانسان.
الموظفين الوياي بالمكتب هم كل واحد منهم بدا ينطي رأي وصارت عبالك قضية رأي عام.
رفعت راسي شفته هذا صافن علي.
استحيت.
غلست ودرت وجهي..
بالنهاية ماحجز لاللبصرة ولا لاي مكان، راح..
ونسيت الموضوع.
بس وره يومين رجع..
جنت طالعة للبيت وسمعت واحد صاح علي على كيف: شمه؟
التفتت شفته هو كتله: نعم تحاجيني؟
كلي: اي
شمه: خير؟ نعم؟ وين تعرفني وتعرف اسمي؟
خفت بديت امشي بعكس طريقي.
رجعت.
اريد اوصل للمكتب لان خفت.
كلي: اوكفي. اريد احجي وياج.
شمه: منو حضرتك؟ اعرفك تعرفني تحجي وياي.