رواية صراع الجبابرة للكاتبة روز الفياض الفصل الثاني والعشرون

رواية صراع الجبابرة للكاتبة روز الفياض الفصل الثاني والعشرون

اتذكر من اجن خواتي صعدت نوارس تصيح لمنى.
نزلن اثنينهن يسولفن ويضحكن عالدرج.
منى: هاا الحمدلله عالسلامة. صدك اندعمت سيارتك؟
مؤيد: لا موصدك. مسوين بيج مقلب.
ضحكن البنات كال: والله. ادري متشوفيه مكسر؟
منى: شفته بس شمدريني بي مدعوم
مؤيد: حقج لان انتي ساكنة فوك شمدريج باللي يصير جوه عسى ما يموت واحد انتي متدرين.
منى: قابل اشم گفه ايدي.
مؤيد: دگومي كومي روحي ويه البنات سوولنه عشا.

كامت امي كللها: عمه كعدي انتي. هن يسون العشا شبيهن.
امي: عمه اشوفهن شيحتاجن. وهم اشوف وليدي نايم فدوه لعينه.
ايوب: اموري نايم؟
امي: اي عشيته ونام.
بقيت يومين بالبيت علمود ايدي صعبة شوية اسوق السيارة.
لاحظت بهاليومين منى ونوارس اربعة وعشرين ساعة يحجن سوه بالتليفون.
ونوارس بس تجي تكعد هي ومنى بحدهن.
معقولة نوارس جانت ويه منى من راحت لشمه؟

وره هاليومين جنت گاعد ويمي اموري العب وياه وشفت تليفوني شاشته اشتعلت ضوه عبالي مسج عفته.
وره شوية نفس الشي مديت ايدي عالطاولة شفت رقم غريب يتصل.
جاوبت: الوو؟
الوو؟
الووو؟
محد جاوب سديته.
رجع نفس الرقم اتصل.
الووو؟
الوو؟
الوو؟
هم محد جاوب..
بقيت فاتح الخط بس ماكو صوت اجيت اسده بس سمعت صوت طفل كال: ماما.
وانگطع الخط.
ثاني يوم رجعت للشغل بس مااسوق سيارة سلمان يمر علي ياخذني من البيت ومرات مؤيد.
---
شمه.

حجيت اللمياء القصة كلها وحلفتها متحجي.
ثاني يوم خابرتني گلتلي: امج يمج؟
شمه: اي
لمياء: زين راح اكولج شي بس حاولي لتنفعلين ولتبينين سمعتي شي اوك؟
شمه: اوك
لمياء: البارحة وره محجينه اني وياج.
شمه: اي؟
لمياء: اتصل بيه اوبي.
شمه: منو؟
لمياء: اوستاذ ايوب شبيج؟
حسيت كلبي ظل يدك لمجرد سمعت اسمه.
شمه: ليش اتصلت بيج؟
لمياء: منو؟
شمه: هي
لمياء: منو هي؟
شمه: ربي. الصبر. هي ليش اتصلت بيج؟
لمياء: هااااا قصدج اوبي؟
شمه: اي.

لمياء: تسألني عنج
شعور عجيب بالحماس والفرح رغم اني إلى عفته اول معرفت متزوج بس مو بيدي اكو شي اكبر مني يجبرني ابقى احبه وافكر بي واتمناه.
شمه: كولي والله؟
لمياء: ليش مستغربة اريد افتهم عبالج يعني بس انتي مظلومه بالموضوع؟ هو هم يحبج تره وكل ميشوفني يسألني عليج اذا اعرف اخبارج.
شمه: وانتي شگلتيلها؟ خومحجيتيلها شي؟
لمياء: لا لا افه عليج شلون احجي غير مأمنتني انتي بعد ميصير احجي وخصوصاااً اله هو بالذات.

شمه: اي عفيه تره مالي خلك بعد للدوخة.
لمياء: قصدج للمشاكل؟
شمه: اي بالضبط. بعد انتي حاولي تفهمين لان صعب الشرح اوك؟
لمياء: فاهمه ادري هاي رموز وشفرات.
شمه: اي كملي احجيلي شنو كالت بعد؟
لمياء: مگال شي
شمه: يعني هي هاي كلمتين بس؟
لمياء: مو ملحك يحجي اكثر.
شمه: ليش؟
لمياء: موووو.
شمه: مو؟
لمياء: اندعم.
شمه: مو شنو؟
لمياء: مو داكولج انددعععمممم هاي اتهجيتها الج.
شمه: شنوو؟ منو اندعم؟
لمياء: اوبي. اندعم.

ظليت صافنه احتاريت شسوي لااكدر احجي امي كاعدة ولااكدر ابجي ولا اكدر اسوي اي شي.
دمعت عيوني وخنكتني العبرة بس حتى دموعي مااكدر اخليها تنزل.
دنكت ودرت وجهي ومسحت دموعي بسكوت. كتلها: شلون اندعمت؟
لمياء: مااعرف جان يحجي ويايه وسمعت صوت ضربه وهوسه وسيارات.
انعصر كلبي كتلها: وهي شلونها؟ خو مبيها شي؟ تأذت؟
لمياء: اتصل عليه ميجاوب يمكن متاذي.
شمه: لا لمياء لتكولين؟

لمياء: لتخافين شبيج شتعرفين صديقتج كعدتله ركبة ونص لحد مجاوبني.
شمه: اييي؟
لمياء: ماادري يكول زين ممتأذي هواي بس سيارته متضررة.
شمه: الحمدلله
لمياء: الحمدلله بس تره صوته جان تعبان
شمه: لتخبليني متأذيه لو لا؟ احجي الصدك لمياء لتجذبين.
لمياء: الصدوك الصدوك. كال بسيطة شنو هي مااعرف.
شمه: لا لمياء غير تعرفين شبيها؟ الله عليج خومبيها شي متجذبين علي؟

لمياء: وروح ابوي عدل وكلي بسيطة بس السيارة اتأذت وهو مضروب براسة وايدة.
شمه: يمه.
لمياء: خطيه والله. ليش متحجين وياه؟
شمه: واني؟ مو خطيه؟
لمياء: ادري حبي بس هسه الوضع غير هسه مسألة حياة او موت.
التفتت شفت امي كامت راحت تنام رحت سديت عليها هي وآدم باب الغرفة ورجعت اكمل حجيي ويه لمياء: يعني حالته خطره؟

لمياء: لااا لااا شبيج خفتي بس داگولج يعني اتعرض لحادث والحمدلله الله لطف بيج وبيه وطلع سالم اقلها اتصلي اتحمديله عالسلامة وسمعي صوته يمكن تطمئنين.
هسه اكدر اخلي دموعي تنزل: بهالبساطة؟ لج اخاف اسمع صوته وانهار مو اطمئن وارتاح. لا مااكدر اتصل واحجي وياه مستحيل.
لمياء: ليش؟
شمه: لا لمياء صعب. صعب حيل بعد كل إلى صار ارجع احجي وياه، لعد المن اني اتعذبت واتغربت واتمرمرت؟ المن متحملة كل هالعذاب والضيم؟

لمياء: حتى لو كتلج تعبان ومريض ومتاذي؟
شمه: والله خبلتيني اكولج بي شي تكولين لا بسيطة اكولج مااتصل تكولين متأذي. لمياء كلبي خلصان والله العظيم والله العظيم كلبي ميتحمل ضغط اكثر لتلعبين بأعصابي كولي الصدك شبيه؟ شكد متأذي؟
لمياء: اهووو. الا تحصرني بالزاويه يالله ترتاح. ماادري شكد متأذي هو كلي بسيطة بس إلى اعرفه راسه مضروب وايده يمكن مكسورة.
شمه: ويلي. كون بيه اني ولا بيه.

لمياء: لاحبي اسم الله عليج وعليه.
شمه: لا والله كون اني ولاهو.
لمياء: ادري انتي مو زعلانه منه!
شمه: احبه. مو بيدي.
طاحت دموعي كتلها: لو شيسوي راح ابقى احبه. مو بيدي واله مواقف وياي لو شيسوي تبقى تكبره بعيني.
لمياء: اوبي؟
شمه: عابتلج.
لمياء: زين مادام الموضوع بي حب وكذائيات ميهديج الله وتتصلين بي؟
شمه: اخاف..
لمياء: منين؟ من امج؟ منو يكوللها؟

شمه: لا مو من امي، اخاف منه هو. اخاف يسحرني بكلامه ويخليني احن وارجع.
لمياء: اخخخ شهيتوني احب واتعذب بس احب منو؟
شمه: هههه عابتلج. حبي خال امي ههههه
لمياء: وويعع مااريد خال امج المعقد، زين راسليه من تليفون امج لتكوليله هاي انتي
شمه: لاحليتيها ام العريف. اراسله شكوله خوما تأذيت مراح يسألني منو؟ وبعدين راح يتصل على تليفون امي وتعاند نفس القصة ونفس المشكلة.

لمياء: كيفج لعد يالله اني اروح بس للعلم خاف ناسيه رقمه تره رقمه، 077..
شمه: مخبلة مو بيدج هههههه
سديت التليفون وكعدت افكر ياترى صدك متأذي لو مابي شي؟
صدك مدعوم ومتأذيه سيارته؟ اخاف هو المتأذي مو سيارته؟
شلونج بيج ياشمه وشلون بكلبج الميقبل يرسي على بر..
تمنيت بلحظتها لو عندي طاقية الاختفاء.
اروح اشوفة واطمئن عليه وارجع بدون ميشوفني وبدون محد يعرف..

شفايدة العلم والتطوراذا لهسه مكدر يسوي شي للي يحبون. للمشتاقين المثلي ومثل حالتي. اللي يتمنون نظره حتى لو وحدة تطفي نار اشواقهم.
شفايدة الطب اذا ميكدر يعالج كلوب المحبين؟
شفايدة العين اذا متشوف احبابها؟
ماكو فايدة..
ياربي سلمه وخليه يجوز اني عندي ذنوب ومالي خاطر عندك وتستجيب دعائي بس لخاطر ابنه خليه واحفظه يارب.
نار الشوق تحرقنا وتحرق كل مافينا.
فلا هي اماتتنا ولاهي التي تحيينا.

يرق القلب للمحبوب وتحملنا امانينا.
تطير الروح تسبقنا ترفف في سماء العشق وتمضي في دروب الحب تضيء كل ظلام في ليالينا.
ايوب.
اتصلت بيه لمياء وجان يمي الولد إلى دعمت سيارته.
جنت عازمة بره بالمطعم. خوش ولد حبيت اشكره واتعرف عليه.
كطعت الاتصال ودزيتلها مسج: هلو لمياء شلونج؟
حالياً اني مشغول بس يصير عندي مجال اني اتصل بيج.
رجعت البيت ونسيت اتصل بيها.
جانت عدنه امل اختي.

امل جانت هي وسهاد اقرب خواتي إلى رغم اكبر مني وبيناتنته اكو بقية خواتي.
من يوم معرفت بالي سوته منى واني ابد ميجي لساني على لسانها.
امل اختي انتبهت.
بعد الاكل طلعت ادخن جكارة بالحديقة. طلعت وراي كلتلي: ايوب.
ايوب: هاا
امل: شبيك حبيبي؟
ايوب: شبيه؟
امل: مو على بعضك. ولاتحجي ويه منى شنو اتعاركتوا بالجديد؟
ايوب: لا تعاركنه ولاشي احنه من زمان منحجي واحد ويه اللاخ.
امل: هي رعنه. اخذها على كد عقلها.

جريت حسره كتلها: لا مو رعنه. انانية وخبيثه.
امل: الله يعينك، اعتبرها مموجوده
ايوب: هي اصلا مموجوده بالنسبة إلى.
امل: هذا حظك بعد شتسوي.
ذبيت الجكاره ودست عليها كتلها: شقصتجن؟ شنو اتحمل واخذها على كد عقلها؟ واعتبرها مموجوده؟
شنو هي الرجال واني المره؟ متارس عيونجن لو شنو؟
صرت عصبي لان بالي مشغول بالف شغلة.
ابوي جان مختفي والشغل كله براسي وشمه موضوعها موضوع ومنا منى والي سوته.

امل: لا حبيبي حشاك شلون تكول هيج؟ انت تعرف رأيي ورأي سهاد وبقية خواتك بالموضوع بس خو منبقى طول الوقت نحجي عليها ونحرضك عليها..
ايوب: تعبت منها تعبت كل الحجي وكل النصح وكل الزعل ميجيب نتيجة وياها.
امل: اي صحيح محد يكدر ينكر. وحقك من تكول تعبت.
ايوب: اريد اتزوج.

امل: اتزوج. اتزوج هذا حقك. المره إلى متقدر النعمة ومتقدر زوجها تستاهل يتزوج عليها. انت مو كلت ذيج المره هم اريد اتزوج؟ لعد وينك كل هالمدة جان دورنالك بنية بت ناس.
ايوب: اكو بنية
امل: منو؟
ايوب: متعرفيها، جانت تشتغل عدنه بالشركة.
امل: لعد شمنتظر ياحظي؟
ايوب: منتظر رحمة الله
امل: ونعم بالله. بس اتحرك تره العمر يمشي ومحد خسران غيرك.
ايوب: غير اندل وينها ووين اختفت..
امل: منو؟ البنيه؟

مجاوبتها كالت: ايوب، انت تحبها؟
ايوب: احبها لو مااحبها ميفيد الحجي هسه.
امل: زين ادري سؤالي محرج خل اغيره هههه اشمعنه هاي البنية يعني؟
ايوب: حبيتها.
امل: روح هههه هاي جاوبت على سؤالي هههه.

ابتسمت. كالت: شوف ايوب اني وياك بالي تريد تسويه لان من حقك تعيش ولان الشرع محللك ولان مرتك رافسه نعمتها فلتتراجع عن موقفك ومالك علاقة بحجي امي. امي فقيرة تره وتفكر بأموري بس اني اكولك اخطي هالخطوه حتى لو كلها وكفت ضدك انت مو اول ولااخر واحد ماكو بينه وبين مرته تفاهم فيضطر يدور على بديل او يتزوج حتى يرتاح ويعيش الحياة الطبيعيه إلى عايشيها المتزوجين، واني وسهاد ونور وياك بقرارك واذا تريد نروح نخطبلكياها بس أشر وكول وينجن ياخواتي واحنه نروح وياك وتدلل لتفكر وتضوج حبيبي انت قابل كم اخو عدنه احنه ونفرح لفرحه.

باست خدي واني دنكت بست راسها كتلها: مو هسه. خل الكاها بالاول وبعدين سهله.
امل: تلكه منو؟ مو تكول اكو بنيه تعرفها لو شنو؟
ايوب: اي بس سافروا.
امل: وين؟
ايوب: شالوا للبصرة
امل: ياحسرتي شوداها للبصرة؟
ايوب: كله من بت عمج إلى ترديني اخذها على كد عقلها.
امل: منى؟ شنو عرفت بيها؟
هزيت راسي اي وكعدت حجيت القصة كلها لامل حتى إلى سواه الحجي وياها.

امل ظلت صافنه بوجهي وساكته بعدين كالت: صدك إلى سماك ايوب. شنو هذا الصبر العندك يمه كل هذا شايله بكلبك وساكت واحنه مندري؟ سوده علي، بس لو اني بمكانك جان خلصت عليها هاي منيوه شلون ساكت وصابر ومتحمل.
ايوب: منو كلج اني متحملها؟ بس اني جانت نيتي اروح بالاول للبصرة واشوف شمه واحجي وياها واعرف ظروفها وبعدين اتصرف وافاجائها.
امل: وعليمن اني هسه اروح ارعبها واشوفها شتكول بالله.

دخلت امل واني طلعلتي جكاره ثانية الهي نفسي بيها..
خلصت تدخلين ودخلت اشوف امل شسوت؟
لكيتها ممسوية شي كاعدة يم امي وسهاد بالغرفة ويسولفن.
اتذكرت لمياء. نسيت اتصل بيها.
دزيتلها مسج خاف نايمه لو طالعة او يمها احد ومتكدر تحجي.
رأسا دكت علي كلتلي: كول هذا شغل؟ شدعوة عيوني تره اني جايبتلك اخبار مهمه وانت حاكرني.
ايوب: هههه حقج بس نسيت والله هسه اتذكرت.
لمياء: يالله المسامح كريم.

ايوب: امم كولي اسمعج كلي اذان صاغية.
لمياء: شممممه
ايوب: شبيها؟
لمياء: غير خبلتلكياها
ايوب: لا. شلون؟
لمياء: سويتها ظلمة عليها كتلها اندعم ومتأذي وحالته حاله.
ايوب: ههههه جنزتيني؟
لمياء: خررب اكولك بجيتها
ايوب: لاا لمياء. ليش؟
لمياء: شنو ليش غير حتى تبين المشاعر وتطلع الاعترافات وتنكشف الاسرار.
ايوب: اهاا وشكتشفتي من اسرار بالله؟

لمياء: كون بيه اني ولابيه، كون اني اندعم ولاهو. هيجي جان جوابها هاي طبعا بعدما بجت..
ماادري فرحت من سمعت كلامها ماادري ضجت وانقهرت آخخخ ياشمه لشوكت نبقى هيج؟
بقيت ساكت وكل حسرة تطلع من صدري تخنكني متريحني.
لمياء: الوو؟ اوستاذ ايوب؟ الو؟ تسمعني؟
ايوب: وياج. وياج.
لمياء: اشو سكتت؟ لعد لو اكملك باقي الحجي شتسوي؟
ايوب: كملي كملي.

لمياء: حلفتني الف مره خاف متأذي واجذب عليها اكوللها ممتأذي، يابه انتي مو زعلانه وياه كالت احبه مو بيدي.
ضحكت لاارادياً كتلها: لمياء متجوزين.
لمياء: لا وربي جايزة وكاعده عاقلة بس غير اريد احسن الوضع واخلي الامن يستتب هههه.
ايوب: شكالت بعد؟
لمياء: شتريد بعد تحبك وتحب كلمن يحبك شنو طالبها بطلابه بعد؟
ايوب: ههههههه اوك.

لمياء: لا اوكف يااوكي خل اكملك الحجي. كالت لو شيصير راح ابقى احبه واله مواقف هواي وياي مااكدر انساها وكلما اتذكرها يكبر بعيني.
ولحيت عليها تتصل بيك بس رفضت كالت اخاف اسمع اسمع صوته واحن واضعف وارجع مثل الاول، بس اني ظليت إلى عليها حتى تتصل بيك فأنت اخاف تتصل بيك يعني لتحاول تتصل انت بيها حتى لتصير مشاكل جديدة وحتى لتعرف امها لان احتمال تخابر من رقم امها.
ايوب: ماشي، ماشي لمياء.

من ردت انام اتذكرت الرقم الغريب اللي اتصل بيه اكثر من مره ومحد يحجي..
معقولة شمه؟
اي هي عالاكثر، شمتي.
لان جان اكو صوت طفل كال ماما. وانكطع الخط.
كعدت باوعت للساعة لاهسه مينفع هسه الوقت متأخر على باجر احاول اتصل وبلكي تطلع هي..
---
---
---
شمه..
من كلتلي لمياء ايوب مندعم خفت وتمنيت اكد اشوفه لو دقيقة من عمري قابلة بس اشوفه ومن بعيد اطمئن عليه بس ماباليد حيلة.

مااكدر اتصل من تليفون امي لان اعرفه ومتأكده منه راح يرجع يتصل وهالمره امي يمكن بعد متقبل تحجي وياي للابد.
اووف ياايوب لا اني الناسيتك ولا اني الباقية وياك. هذا إلى يكولون عليه اسمه بالحصاد ومنجله مكسور.
بيت خالة امي جانوا مسوين ثواب لزوجة ابنهم الله يرحمها وعزمونه..
رحنه على عزيمتهم وبدها امي وخالتها راحوا للسوك.

امي تريد تتسوك ومتندل بالبصرة اي مكان عدا بيت خالها وبيت خالتها، راح وياهم ابنهم إلى زوجته نفسها المتوفية ومسوين ثواب على روحها..
راح يوصلهم ويرجع. بتهم إلى اجت هي وزوجها ويه امها لبيتنه من جنه بعدنه ابغداد خلصت اكل وراحت هي وزوجها بعدما جمعت شكو شي بقى من الاكل واخذته وياها لبيتهم هي وزوجها.
كلها طلعت كلمن لمكان بقيت بس اني وآدم وابنهم المريض بس جان نايم.

رحت للمطبخ اغسل المواعين بس شفت تليفون بالمطبخ عالكاونتر.
مو تليفون امي اكيد تليفون احد من اهل هالبيت..
رأساً اجت على بالي فكرة انه اتصل بأيوب واحجي وياه..
عبالك منومه مغناطيسياً بس فكرت نفذت..
جبت التليفون ودكيت الرقم ياربي كون يطلع صح لان مااتذكره مضبوط..
رأساً دك.
ودكت طبول كلبي وياه..
اول مجاوبني وكال: الوو؟
فقدت القدرة عالنطق.
فقدت القدرة عالحجي والشوف والتفكير كلها فقدت السيطره والقدرة عليها.

بقى بس السمع..
غمضت عيوني واني اسمع صوته.
شكد دافي.
قشعر جسمي بس من كلمة وحده. الو.
بقيت مغمضة حتى بعد مقطع الاتصال، اريد استمتع بنغمة صوته داخل عقلي..
رجعت اتصلت هالمره جنت ناويه احجي، لازم اححي بس مكدرت. وهم كال الوو كم مره وبعدين آدم خرب الخطه لوما رحمة الله. آدم ظل يلح علي ماما. ماما. فكطعت الخط وان شاءالله يكون مسمع شي.
ولاكشفني.
ظليت الوم بنفسي. ليش اتصلت؟ وليش مااتوب اني منه؟
اخاف يرجع يتصل؟

يالله مو مشكله حتى لو اتصل التليفون يعني اذا دك راح يكلوله رقم غلط وينتهي الموضوع.
آخخ ياصوتك شكد حنون..
رجعت التليفون بمكانه ورجعت كعدت انتظر امي ترجع من السوك.
اتذكرت قبل من جنه نتعارك اني وياه بسبب الحجي ابوه.
اتذكرت من غطتني هبه بسترته من شميت العطر إلى خاله ومعجبني ههههه.
اتذكر شلون جنه نلتقي بالبوكة بالمطعم المقابل لشركة استاذ مويد هههه.
هسه صارت كلها ذكريات مره اتذكرها واضحك ومره اتذكرها وابجي.

اراقب ضحكات الناس لانسى
فأجدني اتذكر ضحكاتك.
واحاول ان لاالفظ اسمك. فأجدني اردد كلماتك.
رجعت امي وخالتها من السوك مبتسمات ماادري شكو.
امي: هاا ماما خومضجتي وحدج؟
شمه: منو آني؟
امي: اي انتي
شمه: لا. جنت اتابع فلم.
امي: اي احسنلج. فلم عربي؟
شمه: اي عربي قديم
امي: منو بي؟
شمه: هاا يمكن رشدي اباضه وعبد الحليم حامض.
امي: يااا حامضيش هههههههههههههه.

ضحكت اتذكرت لمياء وسوالفها. الحمدلله الله عوضني عن هبه بالاحسن منها..
خالة امي: هاا شلونج يحلوة خوما ضجتي بحدج؟
شمه: لا التهيت غسلت المواعين ورتبت المطبخ ونظفته.
امي: عفيه عليج.
بذيج الليله يمكن اول ليلة من بعد إلى صار انام صدك.