رواية صراع الجبابرة للكاتبة روز الفياض الفصل الثالث والعشرون
احياناً تصبح ابسط امور حياتك حلماً
كالنوم مثلاً.
وها انا انام لاول مرة منذ مدة طويلة. دون تفكير او قلق. دون دموع.
الى حبيبي.
الى ذلك الرجل الشهم الذي احببته. تمنيتك ان تكون لي في يومٍ من الايام لكن الحياة لم ترغب بأن نكون معاً.
كيف سأحتمل حياتي من دونك.
كيف سأتقبل غيرك في حياتي.
اشتقت اليك. واحبك.
واتمنى لك نسياناً هانئاً.
شمه.
نمت بدون تفكير لاول مره من بعد طلعتنه من بغداد غمضت عيوني ورحت بسابع نومه وحلمت بنفسي امشي بغابة والغابة مابيها احد امشي وحدي بالظلمة لحدما شفت ايوب وصحت عليه بس جان ماادري شيدور.
رحتله اركض وراه بس طلعلي دب ومكدرت اوصل..
كعدت من نومي بعز الشتا عركانه.
اتعوذت من الشيطان ورجعت نمت.
وره كم يوم اندك بابنه بالليل تقريبا الساعة بثمانية.
صحت: منو؟
محد جاوب.
فتحت الباب لكيت ابن خالة امي دكتور حسام.
حسام: السلام عليكم
شمه: وعليكم السلام اهلاً وسهلاً
اتفضل. اتفضل.
دخلت اشرت لامي تلبس حجابها بسرعة.
دخل وسلم وكعد. رحت سويتله جاي كال: عاشت ايدج.
شرب شوية وكلي: شمه شمخلصة؟
شمه: شنو يعني شمخلصه؟
حسام: شهادتج شنو؟ بكلوريوس؟ دبلوم؟ لو شنو؟
شمه: هاا لا بكلوريوس محاسبة.
حسام: هاا محاسبة طلعتي. عاد شلون جنتي شاطره لو نص ونص.
امي: لا شاطرة تقديرها جيد جداً.
حسام: هاا والله طلعتي شاطره. لامبين عليج شاطرة. ليش متكملين دراسات؟
شمه: بعد. الظروف.
حسام: لا اني راح اساعدج ان شاءالله. حرامات تضيعين هيج فرصة بعدين تتندمين لانج ماكملتي.
شمه: الله كريم.
حسام: شمه امج كالت جنتي تشتغلين بشركة وبطلتي لان اجيتوا هنا يم اهلكم.
بقيت ساكته.
حسام: امج طلبت مني اشوفلج شغل بمكان زين ومحترم. بس اني راح اتوسطلج اشغلج يمي بالجامعة شتكولين؟
فرحت لان امي بدت تفك الحصار عني شوية شوية.
شمه: اوك اذا تكدر ليش لا.
حسام: تمام معناها باجر اروح اشوف الموضوع وارجعلج جواب. انطيني رقم تليفونج.
شمه: ماعندي تليفون.
حسام: معقولة؟ اكو بنية بهالوكت ماعدها تليفون؟ جا شلون جنتي ترحين للشغل بدون تليفون؟
امي: جان عدها بس من اجينه على اساس تغيره لان احنه هناك كله اسيا وانتو هنا كله اثير. بس لان متطلع ومتعرف تروح وتجي بقت بدون خط.
حسام: لا ليش كله اثير. هنا الناس اغلبها عدها اسيا وعدها اثير. ماكو مشكلة اذا عالخط سهلة باجر اجيبلج خط.
شمه: شكراً
امي: اشكرك ابو رقية.
حسام: على شنو ماسويت شي حتى بعدني ماجبت الخط هههه.
شرب الجاي وراح بعد ما انطيته رقم امي.
وره كم يوم اتصل كال: مبروك. اشتغلتي.
شمه: صدك؟ شبسرعة؟
حسام: اي والله بس بعقد يعني.
شمه: اي ميخالف ماكو مشكلة. شكراً.
حسام: العفو. من باجر لازم تداومين راح امر عليج الساعة سبعة وربع علمود الازدحام ولان الصبح عندي محاضرة مااكدر اتاخر.
شمه: ان شاءالله
حسام دكتور جامعي بجامعة البصرة يداوم. اكبر مني بعشرين سنة لكن شكلة ممبين عليه لان من النوع المهتم بنفسه وكشخة.
زوجته متوفية قبل سنة وحاول يخطب قبل فتره بس مصارت.
عنده اربع اولاد اثنين بنات واثنين ولد.
زوجته اتوفت بأنفجار. جانت رايحة لاهلها بمحافظة بغداد في مدينة الصدر ( الثورة سابقاً ).
ثاني يوم الصبح مر علي حتى نروح للدوام لبست بنطرون وعليه قميص طويل.
صعدت بالسيارة كتله: صباح الخير
حسام: صباح النور
مشت السيارة دار علي كلي: شلونج؟
هزيت راسي وكتله: الحمدلله
حسيته يباوعلي غلست.
وره شوية كلي: لبسج هذا ممنوع بالجامعة.
شمه: ليش؟ اني مو طالبة.
حسام: حتى لو مو طالبة ممنوع.
شمه: اوك.
حسام: يعني المطلوب لبس المحجبة العادي. تنورة وقميص
شمه: ان شاءالله
حسام: وشي ثاني بعد ممنوع تخلين مكياج
شمه: اني مااخلي
باوع لوجهي كلي: يعني وجهج هو هيج؟
شمه: شبي؟
حسام: حلو.
غلست على ثكل دمه. يحاول يستضرف جنابه.
وصلنه للجامعة ودخلنه وهو يمشي بصفي ويفتحلي الباب ويعرفني عالموظفات والموظفين والاساتذة.
تعبت من المشي والسلام والاهلاً وسهلاً وهو يمشي بأبتسامة عريضة عبالك مسوي استعراض بيه.
كل منعبر على مجموعة طلاب جنت احسه كأنما يتباهى انه يمشي وياي. ويه بنية شابة صغيرة.
رجعت للبيت بالباص الخاص بموظفين الجامعة.
لان هو دوامه يمتد للمسائي.
وصلت تعبااانه ونعسانه لكيت امي منتظرتني ارجع حتى احجيلها عن يومي شلون كان.
داومت يومين وبعدين خابرتني لمياء: حبي؟ شلونج؟
شمه: تحسسيني حاجيه ويه ولد
لمياء: ليش؟
شمه: حبي وحياتي ومنا اني ادري بيج عندج جفاف.
لمياء: ههههه اي والله جفاف مو طبيعي.
حجيتلها عن شغلي الجديد بالجامعة كالت: وهذا ابن خالة امج ثقة؟
شمه: شلون يعني ثقة؟ قابل مشتغله ويه تاجر مخدرات!
لمياء: اي هم صح، بس قصدي اهم شي ميخليج تنسين اوبي.
سكتت. بعدين اتنهت وجريت نفس حتى ماابجي وكتلها: اوبي ماضي حلو وراح.
لمياء: ياماضي وهو طاحن نفسه عليج.
شمه: لمياء انسي، خلص انتهينه شوفي اني وين هسه ووضعي شلون كل هذا بسببه او خل نكول بسبب معرفته صارتلي قصص هواي ابوه وبعدين هو وبعدين زوجته وبعدين امي واهلها وكرايبها كلهم ضدي وكلهم اذوني بدون ذنب، واصلا احنه عالاكثر بعد منرجع لبغداد خلص امي حتى الوظيفة حصلتها بعد متقبل ترجع.
لمياء: مو على اساس احنه بكيف امج.
شمه: اي اي بكيفها. اني مااوكف بوجه امي علمود واحد حبني وحبيته بيوم من الايام وانتهى هالحب. اصلا جان غلط اللي صار كله غلط.
لمياء: انتهى؟ غلط؟ لعد منو الجانت تبجي عليه قبل كم يوم من اندعم؟ بيه ولابيك ومن هالحجي بعد شنو انتهى؟
شمه: انجبي
لمياء: لا ماانجب اني متحملة الحبيات مالتكم ومشاكلكم يعني مو بكيفكم تنهون اي شي بدون موافقتي.
رغم دمعت عيوني بس مسحتها وضحكت على لمياء: هههههههه.
لمياء: لتضحكين وخليني اكمل
شمه: كملي منو لازمج
لمياء: عكب باجر راح نجي للبصرة اني وامي واختي.
شمه: جذابة؟
لمياء: والله شبيج معزومين بعرس اقاربنه
شمه: والله؟ معناها لازم تجين اشوفج مشتاقتلج عوبه
لمياء: اي طبعا لعد المن جايه اني. جايه علمود اشوفج قابل جايه علمود العرس
شمه: نزلوا عدنه بالبيت تعالوا عفيه؟
لمياء: لا بعد ميصير غير معزومين اذا تردين تعالي انتي للعرس.
شمه: لا لا شيجيبني للعرس مااكدر واصلا عندي دوام وارجع تعبانه مو مال اروح لعرس.
لمياء: بكيفج بس لازم لازم لازم نلتقي تحت اي ظرف. مفهوم؟
شمه: اكيد طبعا مفهوم. مشتاقتلج متتصورين شكد.
لمياء: واني اكثر حبي
شمه: لتكولين حبي
لمياء: ليش؟ شنو بس اوبي حلال.
شمه: ههههههههههههه لا ياخبيثه ولامره گالها.
لمياء: اممم؟ علينه؟
شمه: لا يعني بس حياتي. بنيتي. حبيبتي. عمري، بس هاي.
لمياء: لاااا؟ بس هاي؟ لاياظالم ياايوب قصرت، هسه من اهفج بالجدر اكو احد يلومني. لعد شكول على حظي حتى محد يصيحلي باسمي كله لميوه.
شمه: هههههههه.
لمياء: زين الله عليج شنو اكثر كلمة تحبيها منه؟
شمه: انجبي استحي
لمياء: هو انتي شبقيتي بعد كملي جميلج واحجي وخليني اليوم انفجر واموت من الغيرة.
شمه: ههههه، هههههه
لمياء: اهووو خلصتها ضحك على اساس تستحي داحجي.
شمه: بنيتي، وعمري.
لمياء: اويلي. اويلي. اخوج ميتزوجني تره الشرع محلله اربعة
شمه: هههههههههههههههههههه
جنت متشوقة حيل حتى اشوف لمياء احسها من ريحة بغداد.
حجيت لامي وكتلها لمياء راح تجي وطلبت مني التقي بيها كالت: اي شكو بيها بس لازم نعزمهم هي وامها بعد خاطر ومن جماعتنه.
شمه
: ياريت بس اني توني مداومه صعبة ينطوني اجازة هسه.
امي: الله كريم خل يجون ونشوف.
---
---
ايوب.
وره يومين امي صاحتلي بغرفتها كلتلي: امل كلتلي على البنية الرايدها.
ايوب: امم.
امي: اني قبل دووم جنت افكر بمصلحتك بس من وجهة نظري. جنت اشوف بت عمك احسن من الغريبة، جنت اكول اول وتالي راح تتعود عليها وتحبها وهي هم اول وتالي تتعدل وتتغير، ادري اني ضغطت عليك هوايه بس من محبتي الك. انت وحيدي ماعندي غيرك واريد سعادتك حتى لو على حساب راحتي وتعبي. اني اتحملتها لخاطرك اكول مااريد بيتك ينخرب ومااريد المشاكل بينكم تزيد، كلت دوسي على نفسج وعلى صحتج لخاطر ابنج خليه يعيش مرتاح من المشاكل مال العمه والجنة. ردتلك الزين مردت اذيتك.
بجت امي وكالت: لو ادري اني بسوايتي هاي اذيتك جان مسويت هيجي عساني اني بشلعان الكلب ولاانت ايوب يمه.
دمعت عيوني كتلها: اسم الله عليج من شلعان الكلب.
ادري بيج ترديلي الزين ومحد يريد مصلحتي بكدج..
بس يمه اني تعبان وبس الله يعلم شكد..
بس هسه بعد ماعندي صبر من الاول ولاطاقة اتحملها واتحمل غرورها شايفة نفسها علي ماادري على شنو، وهاي البنية اني احبها فقيرة واهلها ناس من اهل الله. اصلا ماعدها احد هي بس امها وابنها. صغيرة مو جبيرة بس احسن واعقل من هاي الكاعدة وياي خطار.
امي: اني بعد مااحجي ولا اتدخل انت براحتك تريد تتزوج تريد تبقى انت إلى يريحك سويه لان اني اريد راحتك.
فرحت كتلها: يمه؟ هذا الحجي كلبج؟
امي: اي والله من كلبي شعندي غيرك اني جبت عمري متحمله ابوك ومكسراته علمودكم انت وخواتك.
ايوب: اهم شي انتي راضيه
امي: راضيه عليك من كل كلب ولسان شعندي غيرك انت وحبيب كلبي هذا الگمر.
وجان امير بحضنها نايم.
هسه حسيت ارتاحيت من امي غيرت موقفها، جنت متصور امل نست الموضوع بس طلعت محاجيه امي وقانعتها.
ايوب: زين يمه اريد اسألج فد شي؟
امي: اسأل
ايوب: بس بداعة ايوب تجاوبين بالصدك لتحاولين تدافعين عنها؟
امي: شنو؟
ايوب: جنتي تدرين بيها من راحت لشمه للبيت؟
امي: لا والله ماادري حشا. شلون اعرف بيها واخليها تروح.
ايوب: زين شوكت طلعت بس اريد اعرف شلون طلعت من وراي وعادتها هاي القصة؟ معقولة من راحت لاهلها؟ بعد المشكلة إلى صارت معقوله عادتها وطلعت وعمي قبل وسكت؟
امي: والله يمي ماادري بس هو عمك قابل طول الوقت بالبيت ويدرب بيها من تطلع..
ايوب: لان هي جان وياها وحده اريد بس اتأكد منها
امي: منو هي؟
ايوب: اني شاك بنوارس.
امي: يانوارس اختك؟
ايوب: اي، لان هن وحده متطيق الثانية اشو فجأة صارن صديقات وطبه وطلعه سوه وتليفونات اربعة وعشرين ساعة؟
امي: اي صحيح هن ميطيقن بعض ماادري شعجب متصافيات صار مده، اني هم اتذكر نفس التفكير فكرت بي. مره نزلت علي منى كالت نوارس راح تمر علي حتى نروح للسوك استغربت بوقتها بس كلت بنات عم هن فعادي.
ايوب: شوكت طلعن سوه للسوك؟
امي: من زماان
ايوب: يعني شوكت متتذكرين؟
امي: لا والله مااتذكر بس قبل اشهر يعني فد تلث شهور هيج مااتذكر.
ايوب: وليش مكلتيلي طلعت؟
امي: ماادري بيها مكايلتلك عبالي تدري. حتى اتذكر بيومها هم استغربت مره ثانية من رجعن مجانت منى مشتريه شي ولاحتى نوارس بس كلت يجوز بقت اغراضهن بالسيارة.
ايوب: ماشي، فد يومين واتأكد ان شاءالله
امي: شتسوي؟
ايوب: اروح للبصرة اشوف شمه واندل مكانها.
امي: شلون تندله؟ خو متروح تدور هناك بيت بيت.
ايوب: لا اني مرتب الوضع واعرف شلون الكاها.
امي: دير بالك يمه الله يرضى عليك
ايوب: انتي بس ادعيلي ارتاح واني ارتاح
امي: الله يريح گلبك بالدنيا والآخره
ايوب: فدوه رحتلج.
اطمئنيت بذاك اليوم من امي وافقت ورضت امي اهم انسان بحياتي ورضاها عندي قبل كل شي.
ثاني يوم اتصلت بلمياء وامها سلمت عليهم وكتلها: خالة محتاج مساعدتج بمشكلة خاصة.
ام لمياء واهلها من النوع المتفتح شوية وعدهم حرية بس ناس محترمين وطيبين وخدومين.
ابو لمياء الله يرحمة جان يعرف عمي.
حجيت القصة كلها لام لمياء رغم انه لمياء هم حاجيه لامها.
كتلها: اني رايد البنية على سنة الله ورسوله بس ماعندي تواصل وياها وصارت مشاكل وخاف تعرف بيه جاي ومتقبل تحجي وياي فاريدكم وياي حتى تجي تشوف لمياء واحجي وياها.
ام لمياء ابتسمت كالت: الله يجعلها من قسمتك ان شاءالله والله من حجي لمياء عنها اني حبيتها حيل كوولش تمدح بيها وبأخلاقها.
ايوب: لمياء متتخير عنها لوما نفس الاخلاق مجان حبتها ومشت وياها.
لمياء: اي عفيه اوستاذ هيجي ارفع من معنوياتي كدامي امي لان الله وكيلك محد يصدكني من امدح نفسي لو اكول احد مدحني مدري ليش ههههه.
ايوب: لا وردة انتي
لمياء: تطور جبير هذا اول مره احد يكولي وردة ههههه.
ام لمياء: شلون الاتفاق هسه؟
ايوب: امر عليكم اخذكم ونطلع بس من الصبح حتى نوصل قبل الليل.
ام لمياء: ان شاءالله
ايوب: راح اتعبكم وياي بس مجبور لان الوالدة تعبانه متتحمل طريق وسيارة والبنات مااريد احجيلهم احدما اتأكد كل شي تمام يالله.
ام لمياء: كل تعب ماكو اصلا ملينه من كعدة البيت محتاجين طلعة ومغامره هيجي ههههه.
بالليل اتصلت بيه لمياء كالت: حجيت ويه شمه وگولتلها جايين لعرس اقاربنه بالبصرة ولازم اشوفها.
ايوب: خوش حجي
لمياء: كالت مداومة اليوم
ايوب: منو مداومه؟ شمه؟
لمياء: اي
ايوب: وين مداومة؟
لمياء: بجامعة البصرة اقارب امها متوسطلها.
ايوب: منو هذا؟
لمياء: ابن خالة امها استاذ جامعي وهو المتوسطلها ومشغليها.
ايوب: امم. متزوج؟
لمياء: ماادري يمكن كالت متزوج مااتذكر.
ايوب: اشمعنه هاي نسيتيها؟
لمياء: ههههه والله نسيت مااتذكر متزوج لو لا، يالله عي كلها يومين وتعرف كل شي وترتاح..
ايوب: شيصبرني.
لمياء: والله داتخيل اللقاء شلون راح يكون
ايوب: لمياء اذا كل شي صار مثلما اريد وشمه صارت إلى احدث ايفون اجيبلج
لمياء: عاااا، يارب تصير الك يارب نذر علي اذا اتزوجتوا امشي بشارعنه من الركن للركن حافية بعد بس اهم شي الآيفون ههههههه
ايوب: هههههههه ملكيتي غير هذا النذر
لمياء: هذا اسهل واحد ههههه خو متريدني انذر ذبيحه ماعندي فلوس هههههه. ،
ايوب: يابه اني اذبحلج بس دخل تصير هههه.
جهزت كل اموري ورتبت وضعي ومبقى كدامي الا السفر ولازم اخلي مؤيد يجي بمكاني من اسافر وهنا لازم اواجه مؤيد بالحقيقة لان اني ومؤيد اكثر من اولاد عم واكثر من الاصدقاء.
مؤيد اخوي.
رحتله للمكتب وكتله اريد اسافر واريده يمر عالشغل ويشوفه.
مؤيد: وين مسافر؟
ايوب: عندي شغل بالميناء اريد اخلصه بسرعة وارجع.
مؤيد: ماكو مشكلة روح.
سكتنه شوية بعدين كتله: اذا اتزوجت على منى هم تزعل مني؟
جان يكتب بالنقال، باوعلي باستغراب كلي: تتزوج على منى اختي؟
ايوب: اي اختك
مؤيد: اتزوج منو لازمك بس شوفلي وحده وياك ههههه
ابتسمت لان الظاهر عباله اتشاقه كتله: تره داحجي صدك.
شافني جاد بكلامي هو هم اتغيرت ملامحة ونبرة صوته من المزح للجدية.
ايوب: اني ممرتاح ولاحاس نفسي متزوج وتعرف انت الوضع ميحتاج احجيلك.
مؤيد: ادري
ايوب: والنتيجة؟
مؤيد: لا النتيجة يمك لتنتظر مني مثلا اشجعك حتى لو ادري كلامك صحيح بس بالنهاية هي اختي، مااقبل تنقهر بس هذا الشي من حقك ومو من حقي امنعك صح هي اختي بس هي زوجتك وانت اعرف بعلاقتكم ولو احنه كل احنه نعرف، فانت حر.
ايوب: اني مااريد اي شي يأثر على علاقتي بيك.
مؤيد: لا ماكو شي ان شاءالله ليش علاقتنه تتأثر اختي مو آدميه شسويلها وانت اتحملتها هواي فمن حقك تشوف حياتك. هم اني لو نوارس مقصره وياي جان اتزوجت هذا من حقي.
ايوب: ماشي، خير ان شاءالله
مؤيد: بس يعني مااكدر اروح وياك لا اخطبه ولاغيرها مهما كان هاي اختي مااريد اكسر كلبها.
ايوب: اكيد، اكيد، يالله اني اروح بعد مااوصيك.
مؤيد: لا اعتمد خلص.
سلمت على مؤيد وطلعت.
واجه يوم السفر وطلعنه الفجر الساعة بالخمسة اني وام لمياء ولمياء واختها الزغيرة.
الطريق طويل ومزعج للبصرة ست ساعات تقريباً بس الحمدلله خلص بدون منحس بي والبركة بلمياء وامها مبطلوا حجي وسوالف وضحك طول الطريق.
جنت متأكد مؤيد راح يحجي لبيت عمي على موضوع زواجي ومتأكد ارجع الاكي مشاكل الدنيا كبالي بس مو مهم خلص اني نشيت بطريق مابي اي رجعه.
واليوم اول خطوة وخلي اليزعل يزعل.
انا ومن بعدي الطوفان.
جنت حاجز بفندق غرفة إلى وسويت للمياء واهلها.
وصلنه تعبانين حيل لذلك نمنه. بالليل اجتمعنه عالعشا وكعدنه نحجي ونسولف واخذتهم جوله بشوارع البصرة وجنت كلما اعبر على بيت اكول يمكن شمه هنا هسه كاعده..
وكلما تمر بنية اكول يمكن هي..
شينومني اليوم؟
اليوم عيوني متغفى ومتغمض.
لو بيدي هسه افتر عالبيوت بيت بيت اسألهم عنها.
معقولة هسه اني وياج بنفس المكان؟
لهدرجة قريبين؟
بس بنفس الوقت بعيدين..
وفعلا مكدرت انام منتظر باجر.
فكرت اروحلها للجامعة بس كلت خاف اسببلها احراج لو مشكلة.
لو اصلا يمكن مااكدر اوصللها خليني ابقى انتظر عالموعد اليوم العصر.
---
---
شمه..
لمياء وامها مقبلوا يجون يتغدون عدنه كالوا مستعجلين لازم ثاني يوم يرجعون للبصرة وبعد اقاربهم هواي منهم مشايفيهم.
بالكوه اقنعت امي تخليني اروح وياهم للمول نتمشى شوية ونرجع.
امي: شمه مااوصيج مو تتأخرين تره هنا الناس تحجي على كل شي.
شمه: اوك.
امي: وانتبهي على نفسج وديري بالج من الشباب
شمه: اوك
بعدها امي تعيد علي الوصايا العشر للمره الالف وسمعنه صوت السيارة..
اجت لمياء.
اندك الجرس ورحت فتحته الها يمكن ربع ساعة حضنتها وحضنتني.
كبل دموعي نزلت.
ام لمياء: دانطونه مجال نسلم نشوف ههههه
سلمت عليهم وسلموا على امي وطلعنه لان التكسي بقى واكف بره ينتظر.
طول الطريق للمول واني ممصدكة عيوني واخيرا شفت احد من اهلي من اهل بغداد.
لمياء تحجي وتضحك واني كلبي مقبوض كتلها: لمياء شلون هسه تخلص الساعة والساعتين وترحين وبعد مااشوفج؟
لمياء: لا عفيه لتكولين هيج تره ابجي تره اني هم حساسة مو بس انتي واوبي.
ضحكت كتلها: انتي مينحط بحلكج عظم هسه بكل سالفة اوبي.
لمياء: شعدنه غيره متكوليلي.
شمه: اتمنى انام واكعد الكي نفسي بشر جديد مو نفسي اني ولا نفس تفكيري ولاحياتي اتمنى يصيرلي حادث مثل الافلام الاجنية من يفقدون الذاكرة بس بصورة جزئية اريده انساه هو بس.
لمياء: اني متأكده حتى لو تمثلين فلم ويكلولج تمثلين مجرد تمثيل ناسيته متقبلين حتى المخرج يعتزل من وراج.
شمه: هههههه انجبي.
وصلنه للمول نمشي ونسولف ونضحك. اول مره ادخل للمول هنا بالبصرة بعدين كالت ام لمياء: خل نصعد نكعد بالفود كورت.
صعدنه كعدنه ولمياء تحشش وكل شوية تباوع عالساعة.
شمه: تباوعين للساعة اليوم مبين خلص موسم الجفاف ههههه
لمياء: لا وين ياحظي الفگر فگر عندي جفاف دائمي مو موسمي هههه.
دك تليفونها كالت: اي فوك بالطابق الاخير يم مطعم اسمه..
اوك يالله هلو هلو بيك.
گرصتها كتلها: منو هذا؟ منيوه مواعده احد انتي؟ معرفتج والله هاي وره مسافرت طلعتي فنونج.
لمياء: تردين عصير؟
شمه: اي غيري الموضوع غيريه. ومااريد عصير.
دارت لمياء على امها باوعتلها وكانما تگوللها اجه.
وفعلاً اجه.
احجي ويه لمياء وشفتها كامت وكفت هي وامها كلت شبيهم شصاير ويباوعون وراي التفتت اريد اشوف شكو؟ وشبيهم واكفين بس شفته بوجهي!
ظليت مفهييه واباوعله جاي باتجاهنه بس لهسه ممصدكة عيوني
كلما يقترب اكول جاي اتخيل هذا مجرد شخص يشبهه.
ايوب: السلام عليكم
ردوا السلام واني بقيت ساكته.
ايوب: شمه شلونج.
منين اجيب لسان وارد عليه.
بس هزيت راسي زينه.
ام لمياء: احنه راح نروح نجيب ايس كريم ونرجع منتأخر.
لمياء ردت على امها: هو بكيفج متتأخرين لعد المن جايين من بغداد للبصرة.
نزلوا وبقيت كاعدة بمكاني متحركت بعد.
كعد عالكرسي البصفي كلي: اشتاقيتلج.
درت وجهي عالجهة الثانية لان دموعي طاحت.
ايوب: شمتي؟