قصص و روايات - قصص رومانسية :

رواية صراع الجبابرة للكاتبة روز الفياض الفصل الثامن والعشرون

رواية صراع الجبابرة للكاتبة روز الفياض الفصل الثامن والعشرون

رواية صراع الجبابرة للكاتبة روز الفياض الفصل الثامن والعشرون

انخلست..
خفت يروح يكوللها على لمياء العميل المزدوج.
بس كللها: مو صعبة خالة البصرة مو جبيرة تره عمامي جابولي العنوان ورقم التليفون.
امي: هاا. وشمه وين لكيتها وجبتها وياك؟
عد هنا اني حسيت انحصرت بطريق مسدود.
بس هم للمره الثانية انقذ ايوب الوضع: من الصبح رحت للجامعة ادور على خالها الاستاذ الجامعي حتى احجي وياه وافتهم منه بس شفتها هناك وجبتها واجيت حتى الحجي يكون كدامها وكدامج.
امي: وابو رقية؟

ايوب: منو هذا بعد ابو رقيه.
شمه: وشكو هو بعد فوك إلى سواه هم تسألين؟
ايوب: منو هو؟
شمه: نفسه هو عشتوا دكتور حسام.
ايوب: وهو شكو؟
دار علي كلي: انتي موافقة؟
هزيت راسي وكتله بسرعة: لا لا مموافقة. موافقت بلحظتها رفضت.
باوع لامي كال: خلص معناها ماله شي عدنه مادام هي مموافقه.

رجع دار علي كأنما يريد يحرج امي كلي: وانتي هم على شنو خايفة قابل خالتي راح تغصبج عليه. كلها كم يوم واجيب امي وخواتي ونجي ان شاءالله. انتهى الموضوع وباقي التفاصيل من نجي نحجي بيها المتقدم المتأخر هاي منختلف عليها إلى تكوله خالتي يجرالها.
امي بقت ساكته واني مسويه نفسي متفاجأة بكل إلى صار.
راد يشرب الجاي امي كلتلي: ادري مو سمعتيه كال ممتريك غير تسويله ريوك. اوكف ماما هسه اسويلك ريوك.

ايوب: لاخاله لا والله مستعجل حتى ارجع لبغداد عندي شغل وامي خطيه بحدها بالبيت.
امي: لاميصير تروح وانت مماكل شي.
راحت للمطبخ تسويله ريوك وصاحتلي وراها.
ابتسمت ابتسامة عريضة حسيت امي رضت على ايوب واقتنعت بي.
هو هم ابتسم وغمزلي كلي: هاا مو كتلج لتخافين. قنعتها لو لا؟
ضحكت. كال: دروحي سويلي ريوك لاتغير رأيها ههههه.
رحت ركض للمطبخ جهزنه الريوك بس مااكل فسويتله لفات اخذهن وياه.
ايوب: عاشت ايدج. تعبتج.

اجيت اكله تعبك راحة بس امي جانت مخنزره علينه فسكتت.
طلع للباب وكلي: هاا؟ اوصلج للجامعة بطريقي بدل متاخذين تكسي؟
امي رأسا جاوبته: لا لا انت اتسهل اني اوصلها.
ايوب: لا شيوديج خاله وادم هم يستبرد رايح راجع بالبرد وجنها راح تمطر غيمت.
شمه: لا خلص انت اتوكل على الله اني اروح بتكسي محتاج توصلني وتتعطل وراك طريق وخاف تمطر. وامي هم عليمن توصلني قابل وين رايحة.
سلم وركب سيارته وراح.

بقيت اباوع وره السيارة وامي دخلت جوه.
دخت اخذت جنطتي وكلت لامي لهي آدم عني حتى اطلع ارجع للدوام.
رادت امي تحجي بس ركضت طلعت قبل متبدي تستجوبني.
رحت اتمشى للشارع العام.
بدت الدنيا تنگط.
اسمع صوت هرن سيارة بس غلست وكملت طريقي وره شويه حسيت سيارة تمشي بصفي لزمت جنطتي عدل وبقيت مغلسه.
سمعت واحد كلي: شوشو. عيني شوشو.
حسيت بالخوف يمه منو هذا اليعرف اسمي؟
سمعت الصوت من جديد كلي: لج شوشو؟

درت اريد اشوفه منو وعلي يصيح لو على غيري.
شمه: يمه وكعت كلبي.
ضحك.
شمه: ليش هيجي ايوب؟
ايوب: ههههه كلت خل اخوفها هههه.
شمه: عبالي حرامي يريد يبوك جتطني.
ايوب: ههههه لا اني ماابوك جنط. ابوكج انتي وانهزم بيج شرايج هههه.
شمه: اي عيني كاظم الساهر هههه. شعندك باقي لهسه مو كلت مستعجل؟
ايوب: لاخل اوصلج واطلع مناك.
باوعت منا منا ماكو احد بالشارع صعدت كتله: كلما اصعد وياك بالسيارة ينقبض كلبي واضوج.
ايوب: ليش؟

شمه: ضميري يظل يأنبني.
دار علي كلي: ضميرج يأنبج لو تخافين مني؟
شمه: هو صعدتي وياك غلط احس استرخص نفسي من اصعد وياك بالسيارة.
جنه واكفين بالترفك لايت دار كلي: يعني لان صعدتي وياي تحسين نفسج رخيصة؟ وتخافين وضميرج يأنبج!
. والله ماادري شكول.
شمه: شتكول.
ايوب: حسيتي اني بيوم باوعتلج بنظرة مو حلوة؟
شمه: لا
ايوب: اتصرفت وياج تصرف بي قلة ادب؟
شمه: حشاك
ايوب: حاولت اخذ شي منج؟
شمه: شي مثل شنو؟

ايوب: اله احجي يعني؟ بستج مثلاً او حاولت ابوسج؟
فزيت من كلمته هم خجلت هم انحرجت كتله: لا طبعاً..
اصلاً شحدك.
ضحك بعدين سكت وبين على وجهه ضايج لان كتله استرخص نفسي لان كلي: معناها ليش تسترخصين نفسج وتخافين من تصعدين وياي؟
المفروض اني اكثر واحد تأمنين بي..
اني عندي خوات شمه وعندي زوجه. وانتي هم حالج من حالهم انتي هم عرضي..

حسيت بتأنيب الضمير لان حجيت رغم ماشفت كلامي بي غلط بس كلامه ورد فعله وضوجته قهرتني.
شمه: انت ليش حساس لهدرجة؟ تره شعوري طبيعي ممتعودة اصعد ويه رجال غريب. واخاف احد يشوفني ويعرفني.
ايوب: شفتي؟ هم رجعتي كلتي رجال غريب اني معتبرج مو بس حبيبتي انت إلى.
إلى متصيرين لغيري شمه.
انت مرتي هسه لو بعدين قبلوا لو مقبلوا انت مرتي. إلى. اكو واحد يقبل يجيب الحجي لمرته؟!
انخلست وبلع ريكي وبقيت ساكته.

ايوب: احجي شبيج انخلستي؟
شمه: شح. شحجي بعد انت كبل زوجتنه و، يعني وسويتها هوسه.
ايوب: انتي ظلي كلما احجيلي كلمة تنخلسين ويظل وجهج ينطي الوان هههههه. والله بلوه.
شمه: يصير ازعل هسه لان كلت عني بلوه لو لا؟
ايوب: لا
شمه: اوك
ههههههههه. ضحك حيل كال: انتي شبيج مساع كسرتي درزنين استكاين هههههه؟
شمه: اسكت ايدية ظلت ترجف كلما اسمع امي تكول كلمة بيها معارضة وعصبيه اتخربط ههههه.

ايوب: يالله الحمدلله عدت على خير وكل شي صار مثل متريدين مو صح؟
شمه: لا.
ايوب: ليش شكو بعد؟
شمه: اريد نرجع ليش محجيت بموضوع رجعتنه لبغداد؟
ايوب: هسه بالاول خل ننخطب رسمي وطبيعي ارجعكم وياي خوما اخليج هنا وارجع لعد شلون نتزوج ب دي أچ أل ههههه.
شمه: ايوب؟
ايوب: همم؟
شمه: عادي اسألك شنو صار وياك من رجعت المره الفاتت؟
ابتسم كال: لا مو عادي ههه. عادي سألي شنو ابالج سألي؟

شمه: يعني انت حجيت لاهلك علينه احنه يعني..؟
ايوب: علينه احنه يعني اني احبج واريدج وانتي هم تحبيني وترديني لو لا؟ هيجي السؤال يصير مو توصلين للنص وبلعتي باقي الحجي.
شمه: اهوو الا يفشلني هسه غلس يعني مادام تعرف جاوب بدون متحرجني ميصير؟
ايوب: لاء ميصير.
سكت شويه بعدين كال: اي حجيتلهم وكتلهم احبها واريد اتزوجها.
شمه: وشنو كالوا؟

حرك جتفه بلا مبالاه وكلي: عادي شيردون يكولون همه يعرفون اني مو سعيد بحياتي الزوجيه او خل اكولها بصريح العبارة زواجي فاشل. هاي هي. من حقي ادور على راحتي مع انسانة ثانية مادام هي ماعدها استعداد تتغير.
شمه: وهي عرفت؟
ايوب: طبعاً عرفت وعرفت اني رايدج انتي مو اي وحدة ثانية.
شمه: شكالت؟
ايوب: مو مهم شنو كالت المهم اني كتلها وعرفت وخلص.
شمه: زين يعني مو خاف تصيرلك مشاكل؟

ايوب: لا ليش تصيرلي مشاكل اني مغلطان بحق احد ولاظالمها ولامسوي شي عيب لو حرام.
شمه: بس اني مستحيه من استاذ مؤيد؟ شيكول عني هسه خطافة رگاله ههه؟
ايوب: هههههه لا لتخافين كتله اني الخاطفها مو هي.
شمه: يعني كال؟
ايوب: لا لا بالعكس كال احترمها وخوش بنيه.
شمه: احلف؟
ايوب: وحياة الزحلف هههه
شمه: زحلف شنو؟
ايوب: ههههه شمدريني ترديني على كل جملة احلف هاي حلفتلج.

اخذنه الطريق للجامعة سوالف مره عركة مره عتب مره ضحك لحدما وصلنه.
كلي: هاا تنزلين لو ارجعج وياي لبغداد؟
شمه: ماينطيني كلبي انزل واخليك تروح.
ايوب: مو اذا اني انزل معناها لهذا صخام مدري حسام الااطيح صبغه.
شمه: هههه خلي يولي. بس لتروح.
دمعت عيوني.
ابتسم لزم ايدي كلي: شلون بيج؟ كلما اجي واريد ارجع تبقين تبجين؟
شمه: اخاف من تروح واشتاقلك.
ايوب: اني هم اشتاقلج واشتاق لخبالج.

منين تخافين هاي امج وخليتها قبلت واقتنعت خلص ماكو شي تخافين منه المفروض تفرحين وتكوليلي روح حتى المره الجايه اجي وارجعج وياي.
شمه: اووف شيصبرني.
ايوب: اي شيصبرج، لعد ايوب شيكول؟
شمه: عاد انت اسم على مسمى ههه.
ايوب: شسوي بعد. الحمدلله على كل حال. وجودج بحياتي مهون علي كل المشاكل والصعوبات.
شمه: بس وجودك جابلي كل المشاكل ههههههههه
ايوب: شكد خبيثه
شمه: صدك والله خبيثه؟
ايوب: لوما خبيثه جان مشلعتي كلبي.

شمه: على اساس انت فقير، اني جنت اكرهك شورطني وياك.
ايوب: ههههه والله جنت احب اضوجج
شمه: هاا؟ منو الخبيث هسه؟
ايوب: اشتاقيتلج.
شمه: شوكت؟
ايوب: هسه قبل مترحين. من هسه اشتاقيتلج.
شمه: اهوو ايوب اني كوه لازمة نفسي حتى ماابجي.
ايوب: زين. احبج.
شمه: واني هم.
ايوب: ديري بالج على نفسج. زين؟
هزيت راسي اي.
شمه: وانت هم. ودير بالك بالطريق مو تغفى.

ايوب: وهذا حسام خ، ه لتحجين وياه حتى لو اجه يحجي وياج واذا سألج بعد عن رأيج كوليله مخطوبة. زين؟
ضحكت كتله: زين. يالله مطرت الدنيا خل انزل كبل ميقوه المطر وانت هم تتعطل.
ردت انزل كلي: ممحتاجه شي؟
شمه: محتاجتك انت.
ايوب: اوووفف. زيدي علي بعد زيدي.
شمه: سلامتك
ايوب: الله يسلمج.
راح واني فتت للجامعة.
وصلت كلولي: اكو بنية اجت سألت عليج قبل شويه.
شمه: منو؟
كالوا: طالبة.
شمه: ياطالبه مااعرف احد اني هنا.

كالت البنيه الوياي بالغرفة: هاي زينب ام عيون الزرك.
شمه: مااعرفها.
وره شوية كاعدة اسمع سوالف الموظفين والموظفات ودخلت بنية عيونها زرك عرفتها زينب اللي كالوا سألت علي الصبح.
زينب: السلام عليكم هاا مااجت شمه؟
جاوبتها: نعم اتفضلي؟
زينب: مرحبا؟
شمه: اهلاً وسهلاً اتفضلي
باوعتلي بعدين كلتلي: ردت احجي وياج شويه عفيه.
شمه: وياي؟ بخصوص شنو؟
زينب: مااكدر احجي هنا بره نحجي.
شمه: اوك.

التفتت لكيت الكل صافن علي استغرب شبيهم هيجي يباوعون؟
طلعت هي واني طلعت وراها.
اباوعلها راحت للحديقة وكفت جوه المظله من المطر كلت هاي شنو فلمها؟
وصلت يمها كتلها: نعم حبيبتي كولي بشنو رايدتني؟
زينب: كلتلي صدك انتي خطيبة حسام؟
كلت بكلبي اهوو هاي جايه تريد واسطة يمكن.
بس استغربت من كلمة حسام حاف بدون استاذ او دكتور.
شمه: ليش السؤال؟
زينب: انه حبيبة حسام السابقة. او الاخيرة.

صدمني جوابها اتفاجأت هاي بعدها طالبة وهو بكد ابوها يمكن معقولة هاي تحجي صدك؟
شمه: انتي قصدج اي حسام؟
زينب: قصدي دكتور حسام مو هو خطيبج؟
شمه: خطيبي او لا شتردين يعني؟
زينب: اريد احذرج مااريد شي لان انتي اكيد ماتعرفين بحقيقته تره خطيبج مثل العصفور من غصن لغصن جان يومية ويه وحدة شكل واخر وحده انه بس انه العفته مو هو العافني لان واحد جذاب وكشفته ردت اخدمج وانصحج مو اكثر حتى لا تتورطين.

اخذتني الصدمه بعدين ضحكت وكتلها: اوك حبيبتي شكراً جزيلاً عالنصيحة بس اني مو خطيبته مو صحيح هالكلام الگلج اني خطيبته جذاب، تجمعنه القرابة بس مو اكثر، اصلاً اني مخطوبة لشخص ثاني.
حست البنية بالاحراج وظلت تتأسف وراحت واني بقيت متحنطة بمكاني.
رجعت واني متعجبه هذا هم عاجبنه نفسه ويضحك على البنات الصغار طاح حظه شكد كرهته.

دخلت للغرفة كلها صافنه علي. اكيد يعرفون سوالفه ويعرفون بي مقشمر كومه بنات طالبات ساذجات وضاحك على عقولهم ومنهم زينب.
اكيد يعرفون ليش اجت واضح الموضوع.
بس خليتها حسره بكلبهم ومحجيت شي بالعكس اتصرفت جداً طبيعي وسولفت وضحكت عادي.
بس بقى كلبي ماكلني على ايوب شلون اعرف بي وصل.
لظهر مكدرت اقاوم دكيت رقمه واتصلت اول مسمعته دك كطعته ماادري ليش خفت.
وره تقريباً دقيقتين رجع هو اتصل ظل كلبي يدك.
اجاوبه لو لا؟

لا مراح اجاوبه اذا جاوبته يعرف هذا رقمي ويظل يتصل على طول.
بس المشكلة اكو شي بداخلي يريدني ارد.
انكطع الاتصال وره شويه هم رجع اتصل جاوبته واني مستحيه عبالك اول مره احجيه وياه بالتليفون: الوو
ايوب: ههههه عرفته رقمج كلت مينطيها كلبها متتصل.
شمه: ههههه لهدرجة متأكد من حبي الك؟
ايوب: اصلاً تأخرتي توقعت من مساع تتصلين.
شمه: ايباه شهالثقة؟
ايوب: لعد شعبالج
شمه: شلون الطريق؟

ايوب: عادي، اريد اوكف شويه حتى اكل لفاتج.
شمه: اوكف يم مطعم مو توكف بأي مكان الدنيا مو امان.
ايوب: مو لهدرجة.
شمه: لتشلع كلبي عفيه الله عليك بداعتي اذا تريد توكف اوكف يم مطعم وكون تشوفه اكو ناس هواية بره وسيارات عفيه.
ايوب: تخافين علي على اساس؟
شمه: طبعاً اخاف عليك.
ايوب: حلفي
شمه: وحياة الزحلف ههههههه
ايوب: يالله حياتي وصلت للسيطرة لازم اسد التليفون.
شمه: اوك يالله باي.
ايوب: باي.

بيومها رجعت للبيت وحجيت لامي على سوالف ابن خالتها المثقف.
امي: لا اخاف جذابه؟
شمه: ههههه ياجذابه انتي لو شايفتها وسامعة كلامها جان كلتي امداك.
امي: معقولة يعني واحد بسنه ومركزه يتصرف هيجي تصرفات؟
شمه: ليش ممعقولة هواي من اساتذة الجامعات هيجي اخلاقهم وهو طلع واحد منهم.
امي: عزا بعينه.
شمه: تكول انه على كولتها حبيبته الاخيرة ههههه مسويلة مجموعة الظاهر دكتور بالعلاقات ههههه.

امي: والله داحس عقلي افتر اليوم منا هذا اجه مديرج زوج هاي الدلالة ام لسان ومنا هسه انتي صدمتيني بأبو رقيه.
شمه: تره انتي حيل مكبره راسه ابو رقيه هذا عبالك بس انتي عندج ابن خاله دكتور وتالي هسه يطلع حتى شهادته مزوره لادكتور ولاشي ههههههه.
امي: لج لا دكتور دكتور اني واثقة من هالشي جنتوا بعدكم زغار وهو جان يدرس بجامعة بغداد وجان مرات يمر علينه بس انتي متتذكرين جنتي زغيرونه جان يشيلج وياخذج يشتريلج.

شمه: خررب حظي جان يشيلني وهسه جاي يريد يتزوجني صدك مخرف هذا!
امي: اي بعد الرجال مو مثل المره. اتذكر من خطب زوجته الله يرحمها جابها النه مره جانت جميلة حلوه حيل بس جانت ممكملة دراسة وظل يقلد عليها بوقتها وابوج الله يرحمه مقبل عليه وهو زعل واخذها وراح. بعد من عدها مجابها النه ولامره.
شمه: شكد طايح حظ اذا معاجبه مستواها الدراسي ليش اتزوجها؟

امي: ماادري والله بس اعتقد هي بعدين كملت دراسة لان هو من النوع يريد كل شي بحياته بيرفكت يدور برستيج.
شمه: بيرفكت ههه على كيفج حجيه.
اي يدور خدامة. اذا مطلعت مرته ماتت من سوالفه فلا اني.
امي: الله يرحمها بعد.
شمه: الله يرحمها. بس ماما ذمة بركبتج اذا اجه تكوليله لا مموافقين زين؟ عفيه ماما لتكسرين كلبي والله مااطيقه.
امي: افتهمنه. افتهمنه. كله علمود هذا نسيت اسمه.
شمه: هههه اوبي
امي: هوبي هذا شنو بعد؟

شمه: ههههههههههههههه ايوب ماما استاذ ايوب
امي: اي استاذ، خليتوا بيها استاذ انتو؟
شمه: ماما والله ممسوين شي شبيج هيجي ظنج سيء بينه.
امي: اكص ايدي اذا مطلعتي انتي متصله بي وكايلتله على حسام.
شمه: لا والله العظيم مو اني ولااعرف بي جاي ولاحاجيه وياه ولاعندي علم اصلاً اتفاجأت من شفته بالجامعة. بعدين هو مو كلج عمامه متصلين بحسام وحسام هيجي مجاوبهم همه عمامه مبلغيه وهو رأساً جاي للبصرة.
امي: اي خطيه، روميو.

ضحكت وغلست خفت ازيد بالحجي وياها تصير عصبيه وترجع تشد ويايه وويه اوبي.
بالليل ايوب دزلي مسج بس مابي اي شي غير علامة استفهام (؟ ).
مفهمت شنو معناها فكتبته واني مبتسمه ابتسامة عريضه مشتاقه لحجينه ومحادثاتنه سوه: شنو هاي؟
ايوب: اريد اتأكد التليفون يمج لو يم خالتي ههههه
شمه: خالتك نايمه وشبعانه نوم
ايوب: وبعدين وياج؟
شمه: شكو؟
ايوب: اريد انام بس تروحين من بالي.

شمه: هاا هيجي صارت؟ اوك يالله روح نام واني رايحة.
ايوب: شينومي. مادام رقمج عندي مااكدر انام بدون مااحجي وياج واعرف اخبارج شلون مر يومج بدوني؟
شمه: اخباري مثل اخبارك كل شوية ارجع اتخيلك موجود وممكن باي لحظة اشوفك. ويومي بدونك ماله طعم.
ايوب: ويكولك ليش تتزوج على مرتك؟ اذا كل هالحجي الحلو اسمعه.
شمه: امم. وانت؟
ايوب: شنو؟
شمه: شلون مر يومك بدوني؟
ايوب: ماكو يوم يمر بدونج، انتي وياي كل يوم صورة وصوت.

شمه: ويكولك ليش متقبل بحسام اذا كل هالحجي الحلو اسمعه هههه
ايوب: لتجيبن اسمه كدامي والله لو شايفه جان عرفت شلون اطيح حظة على تصرفه.
شمه: والله لو تدري شنو عرفت عنه بعدما وصلتني انت ورحت.
ايوب: شنو؟
شمه: اجت بنية طالبة تسأل عني...
وحجيت لايوب القصة اللي سمعتها من زينب وايوب يضحك.
---
---
جميل ذلك الاحساس بانك شخص مرغوب.
مرغوب ولكن من شخص واحد فقط انت تحبه فلا هو يستطيع نسيانك ولاانت تستطيع ان تنساه..

ان تكون صعباً على الجميع الا معه هو.
ذلك الذي ينبض القلب بأسمه.
لاتكن مسلوب الادارة لكن له كما هو لك.
---
---
منى.
رجعت لبيت اهلي وابويه ومؤيد اذوني يلومون بيه وابويه ظل يغلط علي ولهسه ميحجي وياي يكولي كوله منج انتي ضيعتيه من ايدج انتي الجبتي لنفسج الضره.
هاي الكلبة شلون رجعتله بعد إلى سويته بيها شلون هيجي بكل صلافه حجتله وكلتلها اني رحتلها؟
غلطت مفضحتها بالمنطقة غلطت.

وهسه مؤيد يكول ايوب يريد يتزوجها، مستحيل اقبل كتلهم لو يطلكني لو يتركها وينساها.
وامي ظلت تحجي علي لان عفت امير عد عمتي واجيت بدونه.
اني جان قصدي اخليهم يتبهذلون بس المشكلة هو ممتعود علي غلطت بهاي هم كان المفروض اجيبه وياي حتى عمتي تضغط على ايوب يرجعني ويوافق على شروطي.
هسه سمعت نوارس تكول رايح للبصرة!
شيسوي راح للبصرة؟
نوارس تاخذ الاخبار من عمتي واني اخذ الاخبار منها. مؤيد ميحجي شي ولاعبالك اني اخته.

من جانب ايوب علمود ست نوارس يخاف على مشاعرها. حظوظ لو حلوة جان شسوه.
كلمن كلبه على مرته بس حظي كلبه على هاي الساق، ة.
بسيطة ياايوب خليك هيج بس والله ماارجعلك اذا مااشوفك نجوم الظهر واخليك تتوسل.
باجر اخابر لعمتي واحجي وياها واخليها هي تضغط عليه.
بسيطة.
لوما مؤيد جان رحت جبت امير منهم وخليته يتخبل بس شلون بمؤيد؟
امداج يامنى شوفي نوارس وخواتها شلون كل وحدة زوجها يمشي بكلامها بس انتي حظح اعوج.

الحظ الاسود ذبني على ايوب.

الفصل التالي
جميع الفصول
روايات الكاتب
روايات مشابهة