رواية صراع الجبابرة للكاتبة روز الفياض الفصل التاسع والعشرون

رواية صراع الجبابرة للكاتبة روز الفياض الفصل التاسع والعشرون

عندما كنا صغارا كان لدي دفترا صغيرا كنت اسميه دفتر الذكريات.
ودائما ماكانت صديقتي تكتب لي ( احبك حبا يفوق حب البشر واتمنى ان لا يفرقنا الا القدر ).
كنت كلما قرأت ماتكتب لي اضحك بشده.
فما معنى ان احب احدا حبا يفوق حبي لبقية البشر؟!
ومااسخف تلك الامنية! فهل نحن اطفال لكي نخشى الفراق؟
واليوم مرت امامي تلك الجملة واستذكرتها..

وادركت اننا كنا اطفالا فعلا ولذلك لم اكن اخشى الفراق. ولكننا الان كبرنا. فعرفنا صدق تلك العبارة وحقيقة تلك الامنية.
فأنا اليوم احب ذلك الجبار حبا يفوق حبي لكل البشر واتمنى من كل قلبي بأن لايفرقني عنه الا القدر.
شمه..
تواصلي كان مع ايوب اكثر شي خلال الدوام حتى امي متحس وتزعل لكن طبعا ماانام الليل الا بعدما احجيله على احداث يومي.
واشواقي واشتياقي.
واتلذذ بسماع اجمل واعذب الكلمات من فارس احلامي.

ومرت الايام يوم بعد يوم واني انتظر قدوم الفارس لكن فارس احلامي فجأة وبدون اي مقدمات اتغير.!
مر اسبوعين من رجوع ايوب لبغداد وكلت عادي يمكن عنده شغل لكن استغربت اسلوبه وياي بآخر يومين:
حبيبي وينك مختفي؟
ايوب: مشغول
شمه: ادري مطلعت تره الصبح شغل الظهر شغل بالليل شغل؟
ايوب: قابل اجذب عليج يعني؟
رد علي بعصبيه. بصراحة استهضمت..
شمه: لا حشاك مو لازم تسأل عني خلص براحتك.

سكت مجاوبني لا اي ولا حتى لا ولا اي شي لدرجة هالمره صدك استرخصت نفسي وحسيت كلام منى صحيح اني مجلبه برجال متزوج واريد كوه اخطفه من بيته ومرته وعائلته. وبما انه اني هيجي ماعندي كرامة اذن استاهل طريقة تعامله هاي وياي واسلوبه الجاف.
لدقائق بقيت منتظرة منه كلمة رغم سكوتي طول لكن ابدا مااتغير شي. بقى ساكت.
اندهشت!
شنو الفلم؟
شنو القصة؟
شمه: مع السلامة.

هنا رد علي بصوت ناصي حيل عبالك واحد يريد بس يسد التليفون: باي
بقيت مقهورة طول النهار ومغثوثه وحتى من رجعت للبيت لفيت راسي ونمت بدون لاغدا ولا سوالف ويه امي.
كعدت العصر التليفون يم راسي سحبته ودزيتله مسج كتبتله: اليوم كله اتنكدت بسببك ليش هيج؟
دزيتله هالمسج كلت الطف الجو يمكن جان ضايج او فعلا عنده شغل ومضغوط او يمكن زوجته مسويه مشكلة علمود زواجنه..
يجوز تحاول تخليه يبطل او يغير رأيه.

اي مو بعيدة بالنهاية ماكو وحده تقبل زوجها يتزوج عليها الا اذا كانت متحبه ومتطيقه او مو مهم عدها وجوده وعدمه وتريد تعيش لنفسها.
الله يعينه عليها هاي النسره صدك لو كالت ماما لسان دلالة شلون اتحملها كل هالسنين؟
ظليت افكر واخذني التفكير ونسيت المسج إلى دزيته لايوب ودخلت لعالم ثاني كله منى ومشاكلي مع منى ومشاكلنه احنه التلاثه اني وهي وايوب مع بعض ومشاكلنه اني وايوب بسببها.

اتخيلت ايوب شلون يتعارك وياي علمودها.
شلون من كد المشاكل بعد منطيق بعض وشلون يتندم لان اتزوجني.
اتخيلته بعدين يرجع لزوجته وميجيني ولايسأل عني.
واتخيلته يكولي لازم ننفصل.
كل هذا بخيالي عشته بس مع ذلك نزلت دموعي.
مااريده يكرهني بيوم من الايام. اموت ولااحسه بيوم متندم.
لا لا اعوذ بالله شنو هالافكار.
لازم افكر هسه بزواجنه. بخطوبتنه.
افكر برجعتنه لبغداد ولحياتنه.

وره شويه كمت واتذكرت المسج رجعت كلت خل اشوفه شاف المسج لو لا؟
طلع شايفه بس مجاوبني.
بقيت لليل منتظرة منه يحجي وياي مثل كل يوم بس ماكو.
دزيتله مسج: تصبح على كل خير
بس منمت. بقيت كاعدة منتظره منه رد.
ما رد ولاجاوب رغم هم شاف المسج.
انعصر كلبي. ليش؟!
بشنو زعلته؟
شنو صاير وياه؟
ليش هيجي يتصرف وياي؟
الف قصة الفت بمخيلتي وبقيت خايفة خاف صارتله مشاكل بسببي؟

المشكلة لو مراجع من جديد لحياتي يجوز جان هسه نسيته او كدرت اتناساه، بس هسه صعب مااكدر اتخيل حياتي بدونه.
اووف ياحظج الفكر ياشمه.
لحدما نمت ماادري كم حبة بندول شربت.
راسي من التفكير موتني.
ولاعبالك نمت نص الليل اول مطلعت الشمس كعدت.
ومن الصبح كتبتله: اشتاقيتلك.
البس وعيني عالتليفون منتظره الرد.
بعدين كلت هو ميكعد مثلي من الصبح بعد وكت على رده.

رحت للدوام وتليفوني بيدي وطول الدوام كبالي كل شوية اسمع صوت تليفون افز يتصورلي تليفوني.
وهالمره هم قرا المسج ومجاوب!
عجيب!
معقولة مو تليفونه؟
معقولة انباك؟
معقولة التليفون عد زوجته؟
معقولة هي تقرا مسجاتي وتحذفها اول بأول؟
بس لا لو تليفونه انباك جان انقفل وجان حرك الشريحة.
ولو التليفون عد زوجته جان سوتلي قصة.
ولو هي تقرا مسجاتي وتحذفها قبل ميقراها معناها معقولة هو مشتاقلي ولاسأل عني صار يومين؟!

خاف امه بيها شي؟
عزاا بس لاماتت!
اي يمكن اويلي لهالسبب ميجاوب تعبان..
بس لو امه متوفيه جان احتاج يحجي وياي اني دوناً عن الناس كلها وجان اشتكى يمي وبجه..
خلص معناها مراح اراسله خليه يرتاح الله اعلم شصاير عدهم بالبيت.
ومر يوم ثالث ورابع وخامس واني مقاومه كوه بس مكدرت رجعت راسلته: ايوب حبيبي وين مختفي ظل بالي عليك صدك جذب؟
عالاقل طمني عليك؟
وهالمره جان متصل بس قرا المسج واختفى.

اني بهاللحظة كلت لازم اتصل واللي يريد يصير خل يصير.
اتصلت.
دك هواي يالله جاوب وياريته ممجاوب.
رد علي بطريقة باردة وغريبه: الو
شمه: اكو احد يمك؟
ايوب: هلو شمه. لا
شمه: وينك؟
ايوب: موجود
شمه: ادري موجود وتقرا مسجاتي بس متجاوبني ادري كول ارد عليها كول اطمنها هاي الثولة المحترك دمها علي واني ولا على بالي ولاهامني وضعها.
بقى ساكت كتله: الوو؟ احجي شبيك؟
ايوب: مشغول. تعبان
شمه: من شوكت الشغل يأخرك عني؟

ايوب: منا وهيج
شمه: لا بالله؟
ايوب: يالله شمه اخابرج بعدين هسه عندي شغل.
اتفاجات بردوده وبروده وحسيتها كأنما طرده.
شمه: اوك..
مع السلامة.
ايوب: مع السلامة
وهم بقيت انتظر اتصاله، يوم يومين وتلاثه وماكو لااتصال لامسج.
وامي بدت تسألني: هذا وينه مو على اساس راح يجيب اهله ويجي؟
شمه: اي مو كال كدامج
امي: لعد وين راح؟ وين اختفى مو ذبحنه بعمامه عمامي وعمامي اشو لا هو ولاعمامه.

شمه: مااعرف ماما قابل شمدريني قابل اتصل بي اكوله وينك تأخرت مااجيت تخطبني؟
امي: وهي يحتاجلها هاي تكوليله؟ غير اجه وحجه وسوه نفسه عاشگ.
شمه: الله يعلم ماما الغايب عذره وياه.
امي: الله يستر.
شمه: شبيج ماما غير اجه وحجه كدامج قابل يمثل عليج جاي من بغداد للبصرة؟
امي: والله ماادري.
ثاني يوم اجاني حسام بالدوام كلي: هاا شمه شلونج؟
شمه: هلو ابو رقية شلونك؟

حسام: شفتج مااجيتي ولاكلتي كلت امر اشوفج واسأل يجوز تستحين.
شمه: استحي من شنو؟
حسام: اريد اسمع جوابج على الموضوع إلى جيت وياج بي جا غيرطولتيها.
شمه: ماكو نصيب ابو رقية. كتلك اني ماافكر بالزواج هسه وحتى لو فكرت بيوم من الايام فبعد منرجع لبغداد اتزوج ابغداد مال اتزوج واعيش هنا جذب مااكدر.
حسام: انتو غير استقريتوا هنا بعد يابغداد؟
شمه: لا ان شاءالله نرجع لابد بيوم نرجع.

حسام: يعني متفكرين بالزواج كله لو اكو احد ابالج؟
شمه: احد ابالي منو؟ اني مااريد اتزوج ملكيت شخص يقنعني لو لكيت الله كريم.
حسام: وهذا إلى ذاك اليوم جان وياج بالجامعة وشايل ابنج؟
انصدمت. مباشرة عرفته يقصد ايوب. يعني شاف ايوب ذيج المره من اجه..
بلعت ريكي محتاره شجاوبه بس بعدين كلت خل اصير اني الطرف الاقوى بالموضوع مو هو: هذا الولد اخو صديقتي وجان جاي للكلية يدور عليك وشافني.
حسام: يدور علي انه؟

شمه: اي انت..
حسام: خير شعنده؟
شمه: والله استغربت واتعجبت من كلي حاجين وياك اهله حتى يتقدملي بس انت كايللهم مخطوبة؟
حسام: منوه هذا؟
شمه: اسمه مو مهم المهم انت كايللهم مخطوبة؟
حسام: لا بس كتلهم حاجين عليها ناس.
شمه: اي ناس؟
حسام: اني
شمه: بالله هذا حجي؟ يعني مو المفروض تكول تره اكو ناس اتصلوا بيه وهيجي كالوا؟ حتى منتفاجأ ولايجي الولد لهنا ويحرجني كدام الناس.

حسام: لا مادام احرجج اكدر ابلغ الامن مال الجامعة بعد مايخلونه يفوت.
شمه: والي سويته؟ شنو معناه؟
حسام: انه ماجذبت انه حاجي عليج قبلهم مايصير. الغاية تبرر الوسيلة هههه.
شمه: هسه بما انه اني ماافكر بالزواج اتمنى متحجي هيج بعد كدام احد وتكول مخطوبة وخطيبتي تره اني ممخطوبة لاحد ولاخطيبة احد.
حسام: براحتج. بكيفج. بس هذا اعتبره اخر كلام؟
شمه: طبعاً.
حسام: اوك.
عافني وراح وله شكد كريه.

طلعت اتمشيت شويه بالجامعة اباوع عالطلاب والطالبات بعدهم حلوين وكلهم أمل وتفائل.
ردت انسى شويه اشغل تفكيري عن ايوب والتفكير بأيوب.
بس مكدرت اتصلت بي كتله: الو
ايوب: الو
شمه: هلو؟
ايوب: هلو. هلو بيج
شمه: اشتاقيتلك.
كتله هالكلمة ودمعت.
مجاوبني.
شمه: الو؟
ايوب: الو
شمه: شبيك اكولك اشتاقيتلك
ايوب: واني هم اشتاقيتلج
بجيت. وهو سكت بعدين كلي: الوو؟
شمه: الو. موجوده.
ايوب: شبيج؟
شمه: شبيه؟ صدك تسألني شبيه؟
ايوب: اي شبيج؟

بقيت ساكته شويه مااعرف شحجي بعدين كتله: مابيه سلامتك، ردت اسأل عنك واسلم عليك بس.
ايوب: الله يسلمج.
شمه: ايوب انت شبيك؟
ايوب: مابيه
شمه: اشو ماادري شلونك لا تسأل لاتتصل لا اي شي.
بقى ساكت بعدين كلي: شمه.
شمه: نعم؟
ايوب: اذا كرايبج هذا الاستاذ خوش رجال وافقي عليه.
احسنلج..
اني ماافيدج.
عبالك سمعت غلط او يمكن مسمعته اصلاً.
شمه: منو؟
ايوب: هذا حسام ماادري شسمه مو يمكن اسمه حسام؟
شمه: شبي؟
سكت كتله بعصبيه: شبييي؟

تأفف وكلي: اذا خوش رجال لتضيعيه من ايدج.
شمه: يعني شنو؟
ايوب: يعني قبلي بي، اني ماافيدج
شمه: ماتفيدني؟ من شوكت؟ تتشاقه لو شنو؟
بقى ساكت كتله بصياح: احجييي، من شوكت؟
ايوب: خلص شمه لتكبرين الموضوع.
شمه: لااكبر الموضوع؟ شنو اتخبلت انت؟ لو يمكن تريد تخبلني؟
ايوب: لا عقلت. صرفت نظر عن موضوع الزواج.

شمه: يعني عقلت على حسابي؟ صرفت نظر عن الزواج بعدما حجيت ويه امي وخليتني بوجه المدفع؟ ايوب تحجي صدك تره مااتحمل هيج شقى.
ايوب: يالله شمه، عندي شغل، عود من يصير عندي مجال اتصال اسألج عليج وسلميلي عالوالده واعتذريلي منها. يالله. مع السلامة.
بقيت ساكته. مجاوبته..
وسد التليفون بوجهي.!
كوه بقيت محافظة على قوتي كدام الناس والطلاب وكوة سيطرت على دموعي..
اخذت جنطتي وطلعت للبيت حتى بدون اجازة.

امي من شافتني رجعت وابجي ظلت تلح تريد تعرف شكو وليش ابجي.
لحت هواي اخر شي استسلمت وحجيتلها: ايوب..
امي: شبي؟
شمه: اتصل بيه.
امي: منين جاب رقمج؟
شمه: ماادري
امي: متدرين لو انتي انطتيهياه؟ وشيكول وينه؟
شمه: يكول مااجي..
امي: ميجي شلون؟ ليش ميجي؟
شمه: يكول بطلت، مااريد اتزوج.
امي اتخبلت: طاح حظج وحظه، هذا الحذرتج منه مصدكتيني كم مره نصحتج مسمعتي النصيحة..
جذاب.

جذاب الف مره كتلج يضحك على عقلج وانت ابد شلون تاخذين حجاية امج؟ شلون؟
عايشه بعالم القصص والافلام..
عبالج منو يكولج احبج معناها كلامه صحيح ويحبج..
ثوله.
سواج مضحكه وتالي عافج مثل الكل. ة.
اتعافيتي على حسام اتعافيتي..
احتاريتي شلون تطلعين بي عيوب علمود هذا الطايح الحظ.
ارتاحيتي؟
ارتاحيتي؟
آخخخ منج ومن عنادج، آخخ منج.
وبقت امي يمكن ساعتين مستمره تحجي وتلوم واني ساكته وبس دموعي تنزل..
كرهت ايوب بذاك اليوم.

وهالمره تأكدت اني فعلاً غبيه. فعلاً مثلما جانت تكول عني هبه ثولة.
ماافتهم ولااعرف اميز الناس ولااعرف اتصرف ولااعرف ادبر اموري.
حقها امي من تكول عني طفلة.
مااكدر الوم اي احد بعد لو حجه علي.
لان كل الكلام طلع صح.
بقيت بكلبي اكول يمكن هسه يتصل ويكول جذب لو يكول جنت عصبي او يكول مضغوط من الشغل او ابوي او امي او اي احد اعترض على زواجنه بس اني بعدني اريدج.
ثاني يوم داومت كوه بس حتى اشرد من نظرات امي ولومها.

كل من يشوفني يسألني شبيج ليش عيونج هيجي مورمه وحمر واكوللهم حساسية ومره افلاونزا.
وهم بقيت انتظر اتصاله.
وماكو.
واليوم اللي بعده.
وماكو.
الى ان كعدت بيوم وجان يوم جمعة اول شي سويته فتحت التليفون اشوفه يمكن حن علي بمسج.
لكيته حاظرني!
فقدت اعصابي.
بجيت وصرخت ودكيت مو صحيح إلى يصير هذا مو صحيح.
كلامي امي صحيح..
اني انطيته مجال يلعب علي ويضحك علي.
اني..

كعدت امي على صوت البجي حسيتها انقهرت علي كلتلي بحزن: مسحي دموعج وغسلي وجهج انسيه يولي ميستاهل دموعج..
راح تموتين نفسج علمود واحد ميستاهل.
نذل مثل ابوه شمتوقعه..
بقيت ابجي وهي واكفة يمي تباوعلي بعدين خلت ايدها وره ظهري حتى اكوم اغسل بس حضنتها وظليت ابجي حيل.
وهي تبجي وياي..

بقيت اسبوعين كاعده بالبيت حتى حسام اتصل بأمي سألها عني ليش منقطعة عن دوامي وبدون اجازة؟ لان كل غياب لمدة عشر تيام فما فوق بدون اجازة يفصل الموظف هذا قانون ثابت بالدستور العراقي.
كلتله: مريضة والله افلاونزا قوية وهي ماعدها مناعة الفلاونزا من تصير عدها تهد حيلها.
حسام: سلامتها، خاف تردون اجيبلها علاج او اخذها للطبيب؟
امي: لا مشكور متقصر ابو رقية نريدك سالم.

حسام: وبالنسبة للدوام اني راح اخذلها اجازة واحل الموضوع.
امي: مشكور انعم الله عليك.
اكلي قل. اصلا قطعت الاكل.
وزني قل..
نسبة دمي نزلت..
هالات سوده تحت عيوني.
وجهي صار اصفر.
شعري ظل يوكع بصورة مو طبيعية.
ومن اشوف نفسي هيج كآبتي تزيد..
وكلما اتذكره ارجع ابجي وابجي لحدما اتعب وتورم عيوني وانام.

اخذتني امي الدكتور كال حالة نفسية او متعرضة لصدمة بس محتاجه تغذيه جيدة وتغيير جو وكتبلي كومه علاج فيتامينات مقويات وحبوب مااعرف مال شنو من اخذها اروح لغير عالم.
يمكن مال اكتئاب.
امي من شافتني هيج خافت اخذت الحبوب مني ومقبلت اشربها بعد.
اضطريت ارجع للدوام استحيت من حسام كل يوم يخابر ويسأل امي شوكت اداوم.
بالدوام كلهم حسوا اكو شي كلها تسألني: شصاير بيج؟
كل هاي افلاونزا؟

الصبح جنت التهي بالدوام بس انغلقت على نفسي اكثر من قبل.
مشكلتي من ارجع البيت كلما اشوف امي اتذكر اللي صار وانقهر على روحي وعلى امي..
جذبت عليها وغشيتها علموده والنتيجة شنو؟
هو جذب علي وغشني..
كلما اصلي ارفع ايدي اريد ادعي عليه بس مااكدر.
احبه..
كلبي مينطيني ادعي عليه وبدل ماادعي عليه اظل اكول ياربي اهديه.
ياربي رجعه إلى.
اظل الليل كله اباوع لرقمه واقرا حجينه..

وارجع انقهر واتذكر يمكن هسه عايش ويه منى حياة سعيدة ومرتاح واني كلبي مشلوع.
الله يحرك كلبك ياايوب. مثل كلبي المحترك كون كلبك.
واتعب من التفكير والبجي واضطر ابوك الحبوب من امي واخذلي حباية حتى اكدر انام.
انام وماافكر بعد.
مر شهر.
عبالك اليوم حظرني وعافني.
اريد اصير قوية وانساه بس شلون؟ مو بيدي.
بيوم من الايام جنت بالدوام ولاكيت الطالبة إلى اسمها زينب. حبيبة حسام السابقة على كولتها.

سلمت علي وبعدين كلتلي: طلعتي صدك مو خطيبة حسام لان رجعلي وكلي جنت اريد احرك كلبج مو اكثر.
ابتسمت كتلها: بالعافيه.
زينب: الله يعافيج يگلبي، ان شاءالله راح يخطبني عن قريب.
شمه: ان شاءالله.
راحت واني صفنت مااعرف اضحك مااعرف ابجي حتى حسام وزينب احسن مني ومنك ايوب..
لايجوز احسن مني اني بس مو منك.
انت مثل حسام هم رجعت لحبيبتك القديمة، لمنى..
ومر شهر ثاني بنفس البطىء اذا مو اكثر.

ودخلنه بالشهر الثالث ولا ايوب بين ولامنه خبر.
ولا اني النسيت.
كاعدة امشط شعري واشوفه شكد يوكع منه هالمره..
امي كاعده يمي تباوع عالتلفزيون وتسولفلي على سلام اخوي من متصل شحاجي وياها وشكايللها..
اني صافنه مو وياها ولامنتبهه شتكول لحدما كالت: كتله راح نرجع لبغداد.
باوعتلها كتلها: شبيها منو رايح لبغداد؟
امي: محد رايح. اني اكول نرجع لبغداد وحجيت ويه سلام وكلي بكيفكم اللي يريحكم.

ذبيت المشط كتلها: ياريت ماما. علواه نرجع. احس نفس هنا بغربة. مخنوكه.
امي: اي ان شاءالله اتصل على بيت ابو تيسير واخليهم يتفاهمون ويه المؤجر حتى على راس الشهر يطلع من البيت.
كمت بستها كتله: اي عفيه ماما فدوه خل نرجع متت، خل نرجع لبيتنه.
وفعلاً امي اتصلت على بيت ابو تيسير وكالوا بعد اسبوعين تعالوا على ميطلع المؤجر وانظفلكم البيت.
الفرحة الحسيت بيها جبيرة، بس جانت ناقصة..

قبل جنت اريد ارجع علموده، هسه المن راجعة؟
يالله عالاقل جيراني وناسي وصديقاتي.
هنا فلست حتى من الصديقات، ماعندي.
قبل منرجع لبغداد بيوم دك تليفون امي رقم غريب.
رقم دولي.
امي كالت: ردي اخاف اخوج.
جاوبت: الو
اجاني صوتها الفضحيه من على بعد اميال كالت: ووجع حتى وجع هي هيج الصداقة هو هيجي اليسويلكم معروف ويقدملكم خدمة؟ ايفوني وين؟

ضحكت على خبالها كتلها: الوجع الموجود الله لايراويجياه بس الايفون ماكو منين اجيبه الج هههههه
لمياء: لج اشتاقيتلج عوبه اشتاقيتلج موت مووووت.
شمه: خرب تره ابجي.
لمياء: ههههههههههه بعدج على سوالفج.
شمه: سوالفي لو سوالفج ههههه
لمياء: لج شمه شنو هاي الشباب هنا غير يكطعون عوفي اوبي وتعالي هنا اجيبج يمي هنا بس تشوفين الجمال تكولين ماهذا هههههه
امي كل شوية وكالت: منو هاي؟
شمه: لمياء ماما لمياء.
لمياء: يالمياء؟

شمة: لمياء ماما الاجت هي وامها من بغداد ومروا علينه. ام لسان ثكيل على كولتج.
امي: هاا؟ هاا؟
لمياء: منو ام لسان ثكيل؟ اني؟ امج تكول علي ام لسان ثكيل؟! عاااا ليش هيجي خالة ليش حتى انت ضدي!
شمه: ههههههههههههههه خرب يومج هاي من المحبة، شلونج مشتاقتلج شهر شهرين تلاثة شدعوه عليج متخسرين رصيد وتتصلين بينه؟

لمياء: لج انمسحت الارقام من تليفوني وظليت بدون ارقام بس هسه بدلت تليفوني اشو طلع عندي هذا الرقم شفته من العراق كبل دكيت كلت اي واحد يطلع مو مشكله انطيه عنوانج واكوله يوصلج رقمي.
شمه: ما الج جيه؟
لمياء: لا وين اجي اني مصدكت قبلوا يفوتوني انوب اطلع ههههههه لو يعدموني هناك مااطلع.
شلونه اوبي؟
امي كاعده مااكدر احجي بس كتلها: راحت ذيج الايام.

لمياء: يااااااا وين راحت؟ منو راحت؟ شصار؟ احجيلي شنو يعني راحت ذيج الايام؟ خوفتيني لعد المن انكطع كلبنه بالطريق من بغداد للبصرة؟
شمه: جذب.
لمياء: يوووومه! دتجذبين؟ معقولة؟
شمه: بعد.
لمياء: اكولج حبي امج كاعده يمج اكيد حطيلها منوم بالجاي حتى تنام ونحجي على راحتنه.
شمه: هههههههههههه انجبي
لمياء: ياا انجب انتي هسه سمطتي جد جدي بهالحجي وانوب امج كاعده متكدرين تحجين. كووله منج كتلج زوجيها مقبلتي.

شمه: هههههههههههههههههه هههههههههههههههههههه
لمياء: تضحك البطرانه اني اتوقعت اصلا الكاج انتي وامج متزوجات هههههههههه.
شمه: هههههههههههههههههههههههههههههه هههههههههه يمه منج ومن لسانج.
---
---
البعض يمضي عمره نادماً لانه لم يعشق ولم يحب.
ولم يجرب شعور الحب.
والبعض الاخر يعيش نادماً لانه احب وتعذب..
ايهما الصح؟
ايهما الاقل الماً؟
ربما لايوجد اقل فكل منهما له الم مختلف..