رواية صراع الجبابرة للكاتبة روز الفياض الفصل الثالث
جنت ارجع للبيت راسي صاير طبل من هوسة الموظفين وسوالفهم.
الطريق جان مو حيل طويل لكن اني جنت آخر وحده يوصلني قبلي ولد وبنيه الولد سلمان بيتهم قريب عالشركة فينزل اول واحد وبعد مسافة هم تنزل خوله يم بيتها.
ابقى وحدي بالسيارة.
من نبقى اني وخوله نبدي نسولف وتضحك مرات رغم هي خلال فترة الدوام ابد مو اجتماعية واسمع الموظفين والموظفات يحجون عليها خطية يكولون عنها معقدة وعبالك عجوز لان متحجي وياهم ولاتختلط بيهم.
اول اعداء خوله هي هبه وطبعا هي هم متحبها وكلما شافتني هبه احجي وياها جانت تكولي: ملكيتي غير هاي العجوز تحجين وياها
شمه: ليش؟ شبيها؟ حبابه البنيه مابيها شي.
هبه: تولي لج محد يحجي وياها ولايمشي وياها متشوفين حتى الولد مبتعدين عنها وحده معقدة ومريضة من ذني إلى كل شي عدهن عيب وحرام وهن من جوه لجوه.
صفنت معقوله خوله عدها سوالف من جوه لجوه على كولت هبه؟
لا صعبة مااكدر اصدك اشو حتى شكلها ميساعد عالاشتعال.
ومن جنه نرجع للبيت جانت خوله تحجي على هبه من تسمع اسمها: ماادري شلون متحملتها هاي صاحبتج.
شمه: ليش؟ شبيها؟
خوله: وحده شايفه نفسها على شنو ماادري وتكمز ( 24 ) من مكتب لمكتب ومسوية نفسها الكل بالكل.
شمه: هههه لا يمعودة ليغرج حجيها تره بوخه بس لسان بس هي طيبه وحبابه.
خوله: ديري بالج منها
شمه: شدعوه. تره البنيه اعرفها من ايام المدرسة بس لسان والله.
مراات من نحجي بالطريق جان وائل يشغل الراديو ويعليه حتى ناخذ راحتنه بالحجي اني وخوله بس من تنزل خوله جان ينصي الصوت ويبدي يفتح وياي مواضيع عاديه يعني ومرات اذا جان الحجي بالشغل او موضوع عام جان يسولف ويانه ويتناقش بس عموما اعتبره من النوع الهادئ.
وائل: شلونه آدم؟
شمه: نعم؟ ماسمعت. شنو كلت؟
وائل: سألتج عن آدم. شلونه؟
شمه: هاا ههه زين الحمدلله هسه الكاه ينتظرني عباله جايبتله حاجه وياي من الدوام هههه ويزعل يوميه من يشوفني مجايبتله شي..
وائل: حاجه شنو؟
شمه: حلويات ونساتل وهالاشياء.
وائل: وليش متجيبيله؟ تره الجهال كلهم هيج من جنه صغار اتذكر بس تدخل امي جايه من السوك نركض نفتش العلاليك يجوز بيها نستله او شي حلو.
شمه: منين اجيبله. مااكدر اطلع من الدوام هذا المدير يريدله حجه حتى يطردني احسه. كاعدلي ركبه ونص.
وائل: شبي وياج؟
شمه: والله مااعرف شبي. يتحجج عبالك عنده عداوه وياي يدور عالزله حتى يرزلني ويسمعني مغثه.
وائل: عوفيه لتردين عليه. اغلبهم هيج اصحاب الشركات اني شايفه بس مابيني وبينه اكثر من السلام. مبين خوش ولد بس الظاهر المظاهر خداعه. او يجوز يتصور بهالطريقة يبين مدير ويفرض شخصيته. يجوز يريد يبرز عضلاته شكلك ابن صاحب الملك.
شمه: الله اعلم.
وائل: ولايهمج. هسه انتي بعدج جديدة ميعرفج زين يجوز بمرور الوقت يشوفج خوش بنيه وشغلج ماعليه كلام ويغير اسلوبه وياج.
شمه: ان شاءالله.
فجأه وكف السيارة يم محل ونزل. شويه ورجع.
صعد بالسيارة ودار وجهه علي شمر علي جيس.
كمزت.
شمه: شنو هذا؟
وائل: هاي حلويات لادومي.
شمه: لا ماله داعي. تره اكدر انزل اشتري بس مااريد اوكفك بالطريق واعطلك.
وائل: تره مجايبهم الج اني جبتهم لآدم، وبوسيلياه.
استحيت، سكتت ثواني لان حسيت بالاحراج بعدين كتله: شكرا بس والله مالها داعي هالزحمه هو هسه تلكيه الف مره مشتري خلال النهار وموكع رجلين ماما من الروحه والرجعه للمحل.
وائل: ماكو زحمه. شالقصة شغله بسيطة واني احب الجهال مالها داعي تستحين مني..
شكرته واني مستحيه ونزلت يم بيتنه وشفت امي واكفة بالباب تنتظرني استغربت وخفت خاف آدم بي شي.
شمه: ها ماما شبيج؟ ليش واكفه بالباب شكو؟
امي: اجيتي والله جابج. فوتي يم ابنج نايم واني هسه ارجع.
شمه: وين؟
امي: بيت ام تيسير اليوم ماادري شعدهم سمعت صياح ابيتهم وهوسه وامهم وابوهم مسافرين للعمره اريد اروح اطمئن عليهم اخاف هذا تيسير يضرب خواته لو يتعارك وياهن.
شمه: ماما اخاف هذا موجود بالبيت ويكون سكران ويضربج انتي همينه لو يتخبل ويظل يغلط؟ عوفيهم همه متعودين على خباله.
امي: لا شلون اعوفه شنو متعودين على خباله امهم وصتني عليهم قبل متروح. يالله فوتي فوتي خليني اروح لتعطليني.
شمه: ديري بالج.
امي: لج فوتي شجلبتي شنو رامبو هو كله تيسير جنه زرزو مهلس بس اصيح عليه يفش.
عافتني وراحت واني فتت للبيت بهدووء لان آدم نايم.
باوعتله شلون نايم روح امه. اليوم لان وائل جابله حلويات لكيته نايم يوميه لان مااجيبله شي الكاه منتظرني.
غسلت وبدلت ورحت اشوف امي شنو طابخه غدا. فتحت الجدر شفت الباميا اتذكرت ابوي الله يرحمه ومصطفى زوجي جانوا يموتون عليها.
كابلت الاكل وكعدت ابجي.
انسدت نفسي شلت الاكل ورحت تمددت لحدما غفيت ماكعدت الا على صوت التليفون باوعت شفت وائل يتصل مجاوبته.
رجعت نمت.
وره ثواني اتصلت هبه.
خليت التليفون صامت ورجعت كملت نومي.
كعدت المغرب اسمع امي يمي تكبر.
درت عليها شفتها تصلي وتأشر. كمت اشوف شكو لكيت آدم كاعد يلعب بالكهرباء كمزت. ركضت جريته وضربته: يمه. شتسوي. لتلعب بالكهرباء بعد افتهمت؟ اذبحك اذا لزمت الكهرباء مره ثانية..
رجعت ضربته من جديد بعدين كعدت بمكاني وظليت ابجي وهو هم ظل يبجي لان ضربته..
امي كطعت صلاتها واجت اخذته بحضنها: كافي ياروحي لتبجي. اذتك؟
وهو يهز راسه يكوللها اي يقصد اذيته من ضربته.
امي: شبيج اتخبلتي عالولد. على كيفج وياه زين هيجي من خوفتيه؟ شبيج اليوم؟ حتى غدا ممتغديه لكيت الاكل مثلما هو؟
مسحت دموعي وهزيت راسي ماكو شي.
اخذتلي صفنه ماادري شبيه مخنوكه بعدين رحت اتوضيت وكلت خل اصلي واتوجه لربي حتى يشرح صدري ويخلصني من التفكير.
من خلصت صلاة رحت اسوي عشا لان امي تنام على وكت بسبب ادويتها.
اتذكرت تليفوني صامت.
لكيت هبه متصله كذا مره اتصلت عليها: الو.
هبه: ووجع. وين جنتي من العصر لهسه ادك على جنابج وانتي متجاوبين؟
شمه: شعندج تره مالي خلك كولي شصاير؟
هبه: عشتوا مالها خلك. شبيج مالج خلك؟
شمه: هذا القزم. ادم لزمته يلعب بالكهرباء. كمزت بادت رجليه من شفته لازم الكهرباء ومن حركت كلبي كتلته كتله وظل يبجي.
بجيت من سولفتلها.
هبه: لج انتي صدوك مخبله. على شنو تبجين غير مابي شي؟
شمه: اي. مابي شي الحمدلله.
كتلها واني امسح دموعي.
هبه: هههههه صدوك مخبله، ههههه والله العظيم مو صاحيه.
شمه: انجبي غير انهبطت على كولت ماما اجت تصير بيه سكته قلبيه..
هبه: ههههههههه
شمه: ثول شكد فطيرة على شنو تضحكين؟
هبه: ههههههه اني الفطيرة بشرفج؟ اضحك عليج وعلى سوالفج بعد عليمن اضحك.
شمه: المهم شتردين متصله علي ( 70 ) مره؟
هبه: اي ذكرتيني، جنت محضره مقدمه ارزلج بيها بالاول.
شمه: مقدمتيش بعد؟ احجي شعندج؟
هبه: لا اوكفي خل اقسملج. كعدتتتتي؟ كعدت الاميرة النائمة؟ صلاوات. صلاوات. بعد وكت ياحلوه جان ظليتي لباجر فد مره كعدي.
شمه: وثول غير تعبانه.
هبه: نامت عليج طابوكه. اني مشلوع كلبي وانتي نايمه.
شمه: هسه غير تحجي بدون مقدمات.
هبه: اي حقج نايمه متدرين.
شمه: اي هسه مو جاي اسألج شكو؟ انتي المتقبلين تحجين بدون هاللغوه.
هبه: لج اليوم. اليوم. اليوم الحجي سألني عليج.
شمه: اي؟ هي هاي؟ وشنو يعني واذا سأل؟
هبه: لا. اصبري خل اكمل.
شمه: كملي عيني كملي.
هبه: اتصل عليه من جنه بالدوام وسأل عنج مداومه لو لا؟ كتله مداومه. بعدين رجع اتصل سألني عن اسمج الكامل ووين بيتكم وشكد عندج اخوان.
شمه: اي؟
هبه: اي. وسألني اذا ابنه موجود لو لا كتله موجود.
شمه: ليش شيريد؟
هبه: ماكال بس بعدين اجه بنهاية الدوام وره مطلعتوا بدقايق وسأل عنج كتله طلعت للبيت.
شمه: خير شيريد؟
هبه: مو كتلج اني هذا الشايب صاحب مزاج ويدور بنات حلوات والظاهر انعجب بيج.
شمه: شبي هذا مخبل رجال عجوز اكبر من ابويه الله يرحمه.
هبه: وهو المطلوب. ياغبية الموظفات هن يركضن وراه لان يعرفنه صاحب مزاج ويحب الصبايا ههههه.
شمه: خيولي. يحب الصبايا هذا العايز طاح حظه وحظهم اذا صدك. مريض هذا مو طبيعي.
هبه: شوف هاي انتي المريضه ياماما عبالج البنات تدور جمال واخلاق مثلج؟ هاي قبل هسه البنات تدور فلوس تدور اليكدر يصرف عليها ويدللها ويلبي طلباتها.
شمه: من الاخير. تعرفيني مو مال هيج دروب فاذا سألج عني مره ثانيه كوليله متفيدك. من يمج خليه يصرف نظر عني لاينعجب بيه ولاانعجب بي.
هبه: امداج. مو وجه خير ونعمه.
شمه: الخير اليجي من هالطريق مااريده.
هبه: مو اكولج غبيه.
سدت التليفون بوجهي.
فريت ايدي ورحت اكمل العشا قبل متنام امي.
خلصت العشا وكعدنه نتعشا وامي تباوعلي وكل شويه تسألني شبيج اليوم؟
شمه: مابيه شي شبيه يعني؟
ضحكت..
دك التليفون وائل. غلست مجاوبته. استغربت شعنده اليوم يدك علي مابيني وبينه تليفونات ورسائل شنو الفلم؟
مراح اجاوبه حتى يحس. وميعيدها ويتصل علي مره ثانيه وياخذ راحته عباله عادي.
بعد العشا امي نامت.
بقينه اني وادم نباوع عالتلفزيون.
جنت شبعانه نوم مااكدر انام بعد.
اكلب بالقنوات ولكيت فلم عربي قدييم عبد الحليم حافظ وشادية.
كعدت اتابعه. احب الافلام العربية القديمة اغلبها قصص رومانسية بريئة وصادقة.
اندمجت ويه الفلم. جنت اتمنى اعيش قصة حب لكن ماحالفني الحظ. او الصدك لان اني من النوع الجبان اخاف من هاي السوالف.
اتزوجت زواج تقليدي وانكسر ظهري بطفل واترملت بعز شبابي.
ياالله عالاقل نشوف قصص الحب بالتلفزيون.
مالحكت عشت وشفت دنيا. ولالحكت عشت الزواج.
وشكلي ماراح اعيش ولا راح اشوف شي بحياتي.
يالله الحمدلله على كل حال.
يمكن احسن من غيري.
دك تليفوني مسج.
فتحته لكيت مسج من وائل بس فهيت من قريته: ( لاول مرة اكتشف انه يمكن للقمر ان يتجسد بهيئة بشر ).
ظليت متفاجأة.
اكره هالمرحلة. من توصل الامور لهيج مرحلة. من يبدي المقابل يبين مشاعره ويظهرها للعلن.
من ميكدر يسكت بعد ويبدي يغير اسلوبه من مجرد تلميحات ممكن التغافل والتجاوز عنها الى كلام مباشر ينتظر ويتوقع عليه رد.
اكره هاي المرحلة بالعلاقات مهما كان نوع هالعلاقات سواء زماله او صداقه او اي مسمى آخر. لان هنا راح يتغير كل شي وممكن حتى الصداقة تنتهي.
والمصيبة اذا كان المقابل اصلا لا عالبال ولا عالخاطر.
تأففت مالي خلك هالسوالف ومليت منها من جنت بالكلية.
وهسه وضعي معقد اكثر وصعب مو مال اتخبل واتصرف هيج تصرفات ولامال احب وارجع مراهقة ولو حتى من جنت مراهقة جنت عاقلة.
غلقت التليفون.
هذا احسن حل.
كافي صدمتين بيوم واحد.
مساع الحجي وهسه وائل.
صدك جذب شبيها الناس استخفت؟
الظاهر كلام هبه صحيح همه يدورون إلى مثلي ارمله او مطلقه.
ثاني يوم داومت وكانت نظرات وائل تلاحكني بالمراية.
حسيته اليوم متجرأ. مو مثل كل يوم.
شبي الولد هيجي اتغير؟
ظليت اتجنب نظراته واسوي نفسي مشغولة لو صافنه اباوع من الشباك.
دخلت الشركة بوجهي استاذ ايوب. سلمت وفتت كبل للمكتب.
دقايق وحسيت واحد واكف على راسي.
رفعت راسي شفت استاذ ايوب واكف على راسي ويخزرني.
ابتسمت جذب لان ادري بي غثه: نعم استاذ؟
ايوب: ليش متأخرة؟
باوعت عالساعة شفتها ب( 8 ) ضبط كتله: مو متأخره. الساعة ثمانية هسه ضبط يعني من دخلت اكيد جانت اقل من الثمانية.
باوع لساعته ورفعها بوجهي كلي: ب( 8 ) وعشر دقايق.
شمه: ساعتي ب (8 ) وساعتك ب( 8 ) وعشره منو الصح بيهم؟
رديت بأبتسامه. بس رد علي بنتر وصياح: مااشوف اكو شي يدعو للابتسام. هالمره سماح مره ثانية كل دقيقة تأخير ينكص من راتبج. مفهوم؟
ظليت بالبداية ساكته ماادري هذا يحجي صدك لو يتشاقه ولا ادري مخبل لو صاحي.
بعدين بلعت ريكي وكتله: وعلى شنو السماح. خل نتأكد منو الساعته مضبوطه بالاول واذا اني متأخره مثل متكول معناها اخصم.
خزرني ورد علي باستهزاء حسيته: مبين ممحتاجه للراتب؟
شمه: الله الغني. اذا بيها منيه وفضل وحجه على اقل شي.
ايوب: يعني اني داتحجج؟ ادور حجه عليج يعني؟ ليش مثلا؟ شنو بيني وبينج؟ متفهميني بالله؟
صرت عصبيه من شفت بروده حسيت روحي راح ابجي بس حاولت ماابجي على كد مااكدر وكتله: ماادري والله. اني المفروض اسأل؟
ايوب: اذا معاجبتج قوانين الشغل هنا بكيفج تره براحتج الف غيرج يتمنون يجون بمكانج.
شمه: ادري، انسام مثلا. عدتها علي الف مره كل يوم تعيد علي هالحجي من داومت لليوم بسبب وبدون سبب.
بعدين هو بس اني متأخرة يعني؟ والبقية اللي جانوا وياي بالسيارة؟ لو بس اني اتحاسب؟
سكت ظل صافن بوجهي راد يرد بس بهالاثناء دخل الحجي ابو ايوب وسلم: السلام عليكم.
التفتتنه اثنينه عليه
هو رد على ابوه بس اني جنت احاول اقاوم دموعي.
ابو ايوب: هاا. شعدكم؟
بقيت اني ساكته. هو باوعلي بعدين جاوب ابوه: سلامتك. ماكو شي. بس جانت متأخره وجنت انبهها.
ابو ايوب: هاا. سهلة. سهلة. مو مشكلة براحتها هو اصلا الصبح ازدحامات. ماكو مشكلة شوكت توصل خل توصل.
باوعت للحجي متفاجأة بس فرحت بكلامه حسيت بالنصر. حسيته برد كلبي وفشل ابنه. افيييش.
بس هالابن طبعا معجبه الكلام معلق بأي شي على كلام ابوه خله وطلع.
ابو ايوب: شلونج شمه؟ شخبارج؟
شمه: الحمدلله استاذ بخير.
ابو ايوب: شلون الوالده؟ وابنج؟
شمه: الحمدلله زينين.
ابو ايوب: اي الحمد لله. مبين عليج تعبانه من الشغل؟ اذا ضايجه وتعبانه فآني فد شويه وطالع اريد اروح اتريك اذا تحبين تعالي اتريكي وياي. وعلى حسابي لتخافين مااخسرج هههههه.
حسيت بالاحراج. الظاهر هالاسبوع كلها ناويه تلعب عالمكشوف.
من وائل البارحه. لايوب وخباثته قبل شويه ولهسه ابو ايوب.
احتاريت شلون ارد عليه بس اتشجعت وكتله: الف شكر. متريكه ممتعودة اطلع من البيت بدون ريوك ادوخ.
هز راسه كال: . امشي تونسي عالاقل مو الا تاكلين. غيري جو مبينه تعبانه وجهج اصفر.
شمه: لا هو وجهي شاحب لان مااخلي مكياج مااحبه ومااكدر اطلع عندي هوايه شغل وامي مراح متقبل اذا تعرف طالعة من الدوام.
ابو ايوب: اي. اي. بكيفج. اني علمودج ردت اونسج واخليج تغيرين جو.
عموما اذا ردتي شي او احتاجيتي شي لتترددين ابد. تعالي كبل لتخافين. شتحتاجين اني بالخدمة وسداد. وحتى راتبج اذا ميكفيج هسه احاجي ابو احمد المحاسب يزيدلج الراتب. شتردين بعد؟
شمه: مشكور استاذ. شكرا. متقصر.
ابو ايوب: ادللي. كم شمه عدنه احنه. هي بس وحده ههههه. يالله اعوفج تكملين شغلج.
مشى وصل للباب ودار علي كال: شمه؟
شمه: نعم استاذ؟
ابو ايوب: مالج شغل بأيوب وحجي ايوب. هو عصبي ويه الكل. اذا ضايقج تعاي كوليلي واني احجي وياه. زين؟
هزيت راسي اي. واني ماعندي كل جواب. هو اني اتجرأ اروح اشتكي منه. هو بدون شي واكفلي مثل العظم بالبلعوم مو انوب اشتكي منه حتى يتخبل علي اكثر مما هو متخبل.
طلع وخلاني اصفن.
هذا منين طلعلي. من يابخت؟
شلون اتعامل وياه؟ شلون اتكفى شره هو وابنه؟
تعاي اتريكي وياي. وين كاعدين. من كل عقله هذا؟
هذا بهالعمر وهيج حجيه وتصرفاته لعد بشبابه شنو جان مسوي؟
الله يعين زوجته عليه.
ايوب.
ضجت منها اكثر من شفت ابوي شلون مهتم بيها. اهتمامه واضح بيها اصلا..
لا والادهى والامر تجادل ولسانها شطوله. فوكما متأخره بعد تلاسن. بسيطة. سهلة على كولت الحجي اني اعلمها.
طلعت من الشركة رحت للمشروع.
بالطريق دك التليفون ( منى ).
ايوب: الوو
منى: الو. الو. هلو
ايوب: هلو منى. شنو؟ شعجب اليوم كاعدة من وكت؟
منى: مو متواعده ويه البنات نطلع للسوك اليوم.
ايوب: هاا. مو اكول لازم عندج شي ومتصله.
منى: هههه شدعوه عليك. المهم اريد فلوس.
ايوب: وين تودين الفلوس متفهميني؟ الجمعة مو انطيتج شهريتج؟ معقولة خلصتيها؟
منى: اهوو ايوب لاتدوخني بهالاستجواب مااريد اتأخر. هسه تنطيني فلوس لو اروح اخذ من عمي؟
ايوب: عمج؟!، اي مو اني طرطور وانتي تاخذين من عمج مصرف لو يمكن عطال بطال. طالب بعدني واهلي يصرفون علي وعليج..
منى: اهووو هسه شسويتها قصه. تره مقصدي هالحجي ومالها داعي هالعصبية.
ايوب: المصيبه تحجين وتجفصين بدون تفكير ومن واحد ينبهج تكولين مو قصدي، يعني لا اتوبين ولاتعتذرين.
منى: هسه شلون تنطيني لو لا؟
ايوب: لاحول الله. يالله. يالله. اخذي من يمج وفكيني. شوف اني وين احجي وانتي وين.
سدت التليفون قبل ماالحك اسألها شلون تروح للسوك وهي حامل وكوه تتحرك. والله بلوه. ساعة السودة التزوجت بيها.
رجعت اتصلت بيها مترد. خرب يومج منى.
حتى يكلك اتزوج بت عمك احسنلك تهتم بيك وتخاف عليك وتدللك اشو مشفنه لادلال ولاحتى احد خاف علينه.
اففف.
منين الكاها من منى لو من الحجي.
انوب ماكفته الفضايح والزواجات إلى اتزوجها قبل بالسر وبالعلن ولا العلاقاات والنسوان إلى ذاب كل تعبي عليها.
هسه انوب اجته صيده جديدة.
وشلون صيده عالمزاج.
تحجي بزدو بت الذين. طبعا اذا هو منطيها مجال وميقبل نحاسبها.
لا هاي لازم اخلص منها. لازم اشوفلي طريقة واخلص منها قبل ميروح يكبر راسها ويظل رايح جاي وياها كدام الناس ويفضحنه.
لو يجوز يروح يتزوجها بالسر. ماعنده مانع.
بس شلون اخلص منها؟
اخ ياحجي. صدك جذب اصغر من بناتك.
احنه مصدكنه خلصنه من ذيج إلى قبلها انوب طلعتنه هاي. شمه.
ماادري شعجبه بيها. عاد هي مو ستايله ههههه.
والله بلوه.
يمكن ذوقه اتطور ظل يدور عالموديل رشيقات وناعمات.
وصلت للموقع نزلت وحاولت اطرد عالافكار كلها من راسي لان لو ابقى افكر بالحجي وسوالفه اتخبل.
اتمنى اطلع غلطان وتطلع نظراته وكلامه وياها كله عادي اتمنى..