رواية صبرا يا قلبي الجزء الأول للكاتبة روز الفياض الفصل العشرون
ماجد: يالله كومي غسلي حتى هسه اخليلج ثلج عليها؟
رحت غسلت ورجعت هو من كل عقله راح جاب ثلج يريد يخلي على ايدي.
كعدت عالقنفه ولزمت كتابي الهي نفسي مااكدر اباوعله ادري بس احجي وياه لو اباوعله اضعف.
اجه هو كعد يمي يريد يخلي الثلج اني وخرت ايدي.
ماجد: ليش؟ خلص عاد مو كتلج اسف مو قصدي.
ذهب: اسف على شنو؟
ماجد: على إلى صار.
ذهب: شنو إلى صار بالله؟
ماجد: صيحت عليج وأذيت ايدج زين هيج؟
ذهب: لو عالصياح لو ايدي مو مشكله بس اسلوبك وكلامك.
ماجد: يعني لان كتلج ماعندج احساس؟
ذهب: وانت تشوفها كلمه عاديه لو اني اكولك هيج شتحس؟ تتقبلها عادي؟
هو سكت اتنهد بعدين كال: آسف مو قصدي.
اني منطيته ظهري وابجي.
ماجد: خلص عاد ليصير كلبج اسود.
اني التفتت عليه بسرعه كتله: بعد؟
هم ماعندي احساس وهم كلبي اسود؟
ضحك هو كال: هاي اجيت اكحلها عميتها هههه، لا والله آسف فعلا مو قصدي.
اني اكلب بالكتاب وامسح دموعي كال: آآخ.
درت عليه هو مغمض عيونه ومرجع راسه ليوره خليت ايدي على كلبه كتله: شربت الدوه؟
ماجد: لا.
ذهب: انت ليش هيج تسوي؟ ليش تشلع كلبي؟ ليش تغلس عالعلاج؟
هو خله ايده على ايدي كال: ليش هو منو شالع كلبي غيرج.
انطيته دواه وكعدت يمه اباوعله هو مغمض موجوع وكله بسببي..
اتدنيت يمه وخليت راسي على صدره وحضنته.
ماجد: يعني الا كلبي يوجعني لو اموت يالله تحنين علي؟
ذهب: اسم الله لتكول هيج وتخوفني.
ماجد: تخافين علي يعني؟ بس خلص منحجي بعد بهالموضوع كافي بجي اليوم بس خل نتمدد لان تعبااان.
اتمدد عالجربايه واني كعدت يمه خله ايدي على صدره.
ماجد: حبيبي؟
ذهب: امم؟
ماجد: محبيتيني؟
ضحكت وهزيت راسي لا ضحك هو كال: ولا شويه؟
ذهب: ماادري.
ماجد: زين تعالي يمي بحضني عذبتيني من شفتج لليوم.
اتمددت يمه وحضنته.
ماجد: ليش من سألتج شنو كلتلج اسراء شنو سوتلج كلتي ماكو شي؟
ذهب: لان مصار شي شكول يعني؟ اجذب؟
ماجد: والحجي الحجته مضايقج تصرفها هي وخالتي مضوجج يعني حتى موجبوج بهديه حتى لو لخاطري؟
ذهب: منو كلك؟
ماجد: مو مهم منو كلي المهم عرفت.
ذهب: هو اصلا محد جان موجود بس اني ونسرين وخالتي لو خالتي لو نسرين مو صح؟
ماجد: ضياء سولفلي، ليش سكتيلها على اسلوبها وكلامها؟
ذهب: لان مو مهم عندي كلامها واسلوبها لا تتوقع مني ارد على هيج حجي وهيج تصرفات اعتبرها مال اطفال ومو من مستوايه بعدين همه خطار شلون تريد اتصرف وياهم وهي جابت هديه بس نسيتها بقت جوه.
ماجد: كل يوم احبج اكثر وكل يوم اتأكد اختياري صحيح واني محظوظ. شنو بالله هديتها؟
ذهب: ماادري والله مفتحتها شمرت بحضني علاكه سوده خليتها عالطاوله.
ماجد: شمرتها؟
جيبيها بالله خل نشوفها.
ذهب: هسه؟
ماجد: اي خل نشوف هديتها.
نزلت جبتها وانطيتها اله هو فتحها وطلع دشداشه تلعب النفس من التنزيلات اني محجيت شي بس بداخلي انصدمت شنو هالوقاحه.
ماجد: منو انطاجياها اسراء لو خالتي؟
ذهب: مو مهم.
طبيعي حيتصرفون هيجي ويمكن اكثر يعني جان اسلوبهم واضح من الخطوبه.
ماجد: اسراء ممكن اعذرها لان اصلا هي ماعدها اسلوب بس خالتي عيب يعني اذا مو لخاطري لخاطر امي اختها.
ذهب: ميخالف الحياة دين صير انت احسن منهم.
مر على زواجنه شهرين وبدت الامتحانات وماجد عنده سفره للصين وبابا راح يوديني ويجيبني هالاسبوع حتى ماجد ليظل يفكر ويبقى بقلق بس ماكو فايده لان عمته رايحه للعمره وهو جان يريدها تكون موجوده ويانه بغيابه والمشكله سفرته مستعجله ومفاجأه.
ذهب: خلص لتفكر هو اسبوع وترجع ان شاءالله.
ماجد: اي بالضبط اسبوع يعني ( 7 ) ايام (و6 ) ليالي ومدري كم ساعه شيخلصهم.
ذهب: ههههه صلي على محمد لتعقد الامور هاي بابا راح يوديني ويجيبني واي شي نحتاجه ابو جبار موجود وبابا هم ميقصر وماما حتمر علينه بعد شنو؟
ماجد: هم اظل قلق.
ذهب: انت قبل شلون من جنت تسافر؟
ماجد: عادي امي حميده تبقى يم امي وعمامي موجودين والولد اي شي يحتاجوه يتصلون بيهم.
ذهب: زين هسه نفس الشي ماكو شي اختلف بس امي حميده مسافره اني بمكانها.
ماجد: الحجي سهل.
ذهب: لهدرجه اني مو ماليه عينك؟
ماجد: مو شغلة مو ماليه عيني بس اني قلق عليج اكثر من امي.
ذهب: ليش بابا راح يوديني ويجيبني يعني قبل مااتزوجك منو كان قائم بيه.
ماجد: اعرف بس من جنت اسافر مااخاف على عمتي ولا امي من الوضع بس انتي غير انت زغيره وحلوه همه عجايز.
ذهب: ههههههه تحجي صدك لو تتشاقه؟
ماجد: انت عندج كل شي سهل وعادي بس الرجال غير يفكر بكل شي وبكل الاحتمالات.
ذهب: استغفر ربك ولتفكر بهيج اشياء تفائلوا بالخير تجدوه بعدين الدنيا بخير تره ولو احتاجينه اي شي تليفون ونتصل بأهلي او بيت عمك وابو جبار موجود وكاميرات ليش الخوف بعد؟
ماجد: ياريت لو بيدي جان مسافرت لو جان اخذتكم ويايه.
ذهب: تريد ابقى بالبيت ويه خاله حتى ترتاح؟
ماجد: ياريت تكدرين تأجلين الامتحانات؟
ذهب: لا اصلا الاسبوع الجاي الامتحانات هالاسبوع لازم ادرس.
ماجد
: خلص ابقي ادرسي بالبيت وارتاحي.
ذهب: اوك.
ماجد: من هسه راح اشتاقلج اكيد مراح تشتاقيلي مو؟
ذهب: هههه لا طبعا مراح اشتاقلك.
ماجد: والله؟ ليش هيجي؟
ذهب: هههه اكيد راح اشتاقلك مو زوجي.
ماجد: بس لهذا السبب.
ذهب: ليش اكو شي ثاني؟
ماجد: يعني مثلا لانك حبيبي وحياتي وابو جهالي ابو بيتي.
ذهب: هههههه هاي شبسرعه صرت ابو جهالي؟
ماجد: ليش كولي ان شاءالله.
ذهب: الله كريم.
ماجد: اااخ منج شكد احبج وشكد متعبتني تعالي خلي انام.
سافر ماجد وظلينه وحدنه اني وامه والخدامات وابو جبار وماما وابويه يوميه يتصلون خاف نحتاج شي ويجون بين يوم ويوم حتى يطمئنون علينه.
مرت يومين البيت وحشه هو يتصل عالواتساب بس الصوت يكطع واني احس مضيعه روحي افتر بالبيت جان يوميه يخبصني بالمسجات والاتصالات ويرجع للبيت ملهوف حتى نكعد سوه ونحجي هاليومين عبالك سنتين شيخلص الاسبوع.
بهالاثناء اتصل هو: الو حبيبي.
ذهب: الو هلو.
ماجد: شلونج شلونها امي؟
ذهب: الحمدلله بخير انت شلونك؟
ماجد: تعبان.
ذهب: اسم الله عليك لتعب نفسك الشغل ميخلص المهم صحتك دتشرب دواك؟
ماجد: اشربه بس تعبان مو من الشغل.
ذهب: لعد شنو؟ شبيك؟
ماجد: تعباان كلبي من وراج.
ذهب: اسم الله عليك لتكول هيج ينقبض كلبي وضميري يأنبني.
ماجد: شيصير لو اتعذبتي فد ليلة لان تفكرين بيه لو مشتاقتلي لو ميصير؟
ذهب: حرام عليك اصلا البيت وحشه بدونك وماله طعم.
ماجد: مااصدك اذني..
معقوله انت اللي تحجين ذهب مرتي؟ لو ادري من زماان مسافر.
ذهب: كافي استحي.
ماجد: يعني مشتاقتلي؟
ذهب: وبعدين بهالحجي؟
ماجد: زين نغير صيغة السؤال. اشتاقيتولي؟
ذهب: منو؟
ماجد: انت وامي هههه.
ذهب: هاا ههههه اي اشتاقينالك اكيد.
ماجد: الله عليكم؟
زين تحبوني؟
ذهب: منو؟
ماجد: انت وامي غير.
ذهب: اي حبيناك.
ماجد: الله الله الله اليوم احلى يوم واخير نطقتيها.
ذهب: منو؟
ماجد: اقصد نطقتوها انت وامي ههههه.
اليوم شينومني باجر اذا خلصت شغل راح احجز وارجع باقرب رحله.
ذهب: لتستعجل خلص شغلك براحتك.
ماجد: توج تكولين الشغل ميخلص وصحتك اهم.
ذهب: مو قصدي هيج ههههه.
مكدر يرجع قبل الموعد اني طول هالايام انام جوه يم العلويه امه اخاف وحدي فوك واحس وحشه.
اليوم يجي ماجد سشورت شعري ولبست فستان بنفسجي طوخ بسيط نص ردن ومن الخصر يبدي كلوش وطوله للركبه وبي ورد ابيض ونزلت يم امه انتظره.
سمعت صوت السياره وانفتح الباب طفرت من مكاني واحتاريت شنو اسوي رجعت كعدت يم امه هي تباوعلي لزمتني من ايدي بعدين ظلت تمسح على ظهري واني عبالك منتظره نتيجة امتحان سمعت باب المطبخ انفتح وسمعت صوته سلم عالبنات وهم يسلمون عليه اني كلبي ظل يدك وبطني توجعني كمت سويت نفسي الم بكتبي وارتبهم سمعت صوته دخل للغرفه اتحنطت.
ماجد: السلام عليكم.
ذهب: وعليكم السلام.
راح باس امه وحضنها وسألها شلونها شخبارها وبعدين التفت علي باوعلي اني استحيت وحسيت وجهي اشتعل نار دنك باس راسي.
ذهب: الحمدلله عالسلامه.
ماجد: الله يسلمج.
كعد شويه سولف ويه امه وبعدين كال: جوعان وتعبان.
ذهب: اوكي روح غسل وبدل وهسه اجهز العشا حتى تتعشى وتنام.
باوعلي وغمز ابتسمت.
ماجد: مااريد انام بعد وكت.
صعد هو للغرفه اني رحت للبنات كتلهم بلشوا سووا العشا.
صعدت دكيت باب الغرفه ماكو فتحت الباب هو بالحمام شغلت التلفزيون وسويت نفسي اكلب بالقنوات طلع من الحمام واجه حضني و
حسيت اختنكت اريد اتنفس هو حس وخر بس ظل حاضني.
ماجد: اشتاقيتلج.
محجيت بس حضنته.
ماجد: زين انتو مو كلتوا مشتاقيلي؟
ضحكت هزيت راسي اي. كال: زين اني احبكم وانتو؟
ضحكت كتله: هههههه واحنه هم حبيناك.
ضحك كال: بس علمودي هذا اللبس وهذا اللون مو ملبستيه كدام احد ثاني؟
ضحكت كتله: بس الك لتخاف.
ماجد: كل عام وانت بخير هاي اول سنه تدور واحنه سوه واني مجنت موجود.
ذهب: عادي مو مشكله عالجايات براس السنة التجي نحتفل سوه.
خلصنه عشا ورحنه كعدنه بالهول هو كعد يم امه ولازم ايدها واني اجيت اشرلي اكعد بصفه كعدت خله ايده على جتفي دنك يم اذني كال: شرايج اسأل امي شكد اشتاقتلي شكد حبتني؟
ذهب: ليش؟
ماجد: مو انتو تكولون حبيتوني واشتاقيتولي انت وامي فاريد اتأكد.
ضحكت ولزمته من ايده كتله: اسكت لتفضحنه.
ماجد: كيفج انت قرري اسألها لو تحجين؟
ذهب: ههههه شحجي؟
ماجد: منو يحبني اكثروشكد يحبني منو اشتاقلي؟
ذهب: هههه كافي عفيه خالتي كاعده الله يخليك استحي.
ماجد: كيفج انت قرري بسرعه قبل مااتسرع واسألها.
ذهب: خلص راح اكول بس عفيه كافي فضحتنه.
ماجد: يالله بالله كولي.
ذهب: والله راح اموت من الضحك اسكت عفيه.
ماجد: تره اني مااحب الانتظار 1، 2..
ذهب: خلص ههههه خلص شنو تريد اكول.
ماجد: ماادري انت شنو تحسين مشاعرج يعني؟ لو تره اسأل امي.
ذهب: راح احجي راح اكول والله.
دنه اذنه يمي واني اضحك وبنفس الوقت ميته من الخجل شيطلعها الكلمه.
ذهب: اشتاقيتلك.
ماجد: تمام، شكد؟
ذهب: هوايه.