رواية صبرا يا قلبي الجزء الأول للكاتبة روز الفياض الفصل السابع والعشرون
ماجد: الله يموتني ان شاءالله مادام هيج.
ذهب: كافي ماجد لا تتعمد تشلع كلبي.
ماجد: حبيبي فديت كلبج اني خلص بعد مااحجي لاتضوجين بس انت لهسه متقبلين تعترفين شسويلج يعني؟
ذهب: الله يعيني عليك ويصبرني.
ماجد: يالله عاد مصختيها صار ساعه منتظر.
ذهب: المصيبه مااكدر اجذب واكول مااحبك ولهنا وكافي بعد مااحجي.
العصر شفت دم استغربت صار اسبوعين من خلصت يعني مو موعدها.
من نزلت لكيت عمه حميده تقرا قران كعدت يمها خلصت ودارت علي.
عمه حميده: ها حبيبتي شبيج وجهج اصفر بعدج تعبانه؟ خاف ميصير تصومين؟
ذهب: لا وين بعد فطرت.
عمه حميده: هاا يالله انت اصلا بعدج تعبانه استغلي هالفتره ياماما واتغذي زين.
ذهب: بس اني ماصارلي هواي من خلصت اسبوعين يعني موعدها بعده.
عمه حميده: لاحول ولاقوة الا بالله يايمه شجرالج متكليلي شنو انحسدتي الله يعوض عليج ان شاءالله لاتحجين شي لماجد ولا لاي احد.
ظليت صافنه مافهمت شي.
ذهب: هو اني شفتهمت حتى احجي لماجد.
عمه حميده: يمه هاي الظاهر جان توه مشكل عندج حمل بس ربج ماكتب زلكتي نزل.
حطيت راسي بحظنها فكرت يمكن الله ماكاتبلي انرزق باطفال مثلها.
ويمكن الله كاتب لماجد يرجع اسراء لذلك هالاشياء تصير الله لايكولها اتخبل غير.
ذهب: يمه هذا حلمي. مره من حلمت عندي قفص وكل شويه يحط بي طير افرح بيه ويختفي لحد ماصاروا ( 3 ).
عمه حميده: طلعي صدقه ودفعة بله حبيبتي وماجد هم خل يذبح ذبيحه لوجه الله حتى الله يدفع عنكم البلاء ويكفيكم شر العين والحسد.
ثاني يوم ماجد وعمه حميده راحوا لبيت عمه ابو اسراء حتى يشتكون منها علمود سالفة السحر وتأخروا تقريبا( 3 )ساعات يالله رجعوا ورجعوا مالهم خلك ويصيحون.
كعدت يم عمه حميده خليت راسي على صدرها: كتلها يمه تأخرتوا؟
عمه حميده: وهم ياريت فايد.
ذهب: كلبج يدك بسرعه.
عمه حميده: اي والله رفعت ضغطي هالطايحت الحظ عينها صلفه متستحي لاينفع حجي ولاضرب.
ذهب: عوفوها مااتوب هاي ميفيد وياها الحجي.
ماجد: الله يطيح حظها.
وره يومين ماجد رجع للشغل كالمعتاد واني طلع اسمي انقبلت بالوظيفه دوام حكومي من الساعه ( 8 ) للساعه ( 2 ) ونص.
ماجد جابلي موبايل جديد بدل اللي كسره.
بديت اداوم وبهالفتره ظلت تتردد علينه شيماء زوجة اخوه رائد الله يرحمه.
سمره بس ملامحها كلش حلوه وضخمه وطويله وخاله هوايه مكياج عبالك طالعه من صالون ولبسها لازك عالجسم مفصل جسمها تفصال شكلها مغري. مبينه حبابه واسلوبها حلو تشتغل بالمستشفى ام ماجد تطير من الفرح من تشوفها.
بس ماجد ميطيقها ومايقبل يكول ليش ولا حتى عمه حميده.
وره فتره اجت نجلاء اخت ماجد هي واولادها من السويد حبابه ودمها كولش خفيف بس تصنف وتضحك وتنكت حبيتها حيل واولادها مؤدبين وحلوين حبوني بسرعه ويفترون ويايه من ارجع للبيت وينامون يمي بالليل.
ماجد: تره هاي مو حاله. ارجع من شغلي تعبان وذوله الشواذي نايمين يمج.
ذهب: ماااجد، ماجد. اششش صوتك خطيه نايمين لاتكعدهم.
ماجد: شنو نايمين. اني وين انام تره مصخوها؟
ذهب: حبيبي تره ذوله اطفال تحط عقلك ويه عقلهم.
ماجد: نجلاء، نجلاء، نجلااااء..
ذهب: ياا يااا. اطلع. اطلع. روح جوه وصيح صدك جذب اكولك نايمين تظل تصيح.
نجلاء: ها حبيبي شتريد؟
ماجد: حبتج الكراده. اريد مرتي.
نجلاء: ياا خويه مرتك بغرفتها مو بجيبي هههه.
ماجد: وجهالج الشواذي النايمين يمها؟
نجلاء: مرتك حلوه وحنونه وهمه مشايفين وحده حلوه بالعائله متعجبين بيها المفروض تفرح.
ماجد: تكومينهم لو اخذهم واشمرهم من السطح.
نجلاء: ياا لهدرجه وينها ذهب بالله خل تسمعك تقبلين بالله اخذهم ينامون جوه؟
هزيت راسي لا.
نجلاء: هااا اني ماحجيت شي هسه مرتك متقبل هي عدها احساس بالامومه بالفطره وذول الشواذي محرومين هههه.
ماجد: اي طبعا تكلج لا تستحي هاي تستحي من خيالها مو مثلج ولامثل رجلج.
نجلاء: هسه نام بالغرفه الثانيه شصار لو الا بحضنهااا؟
ماجد: اهاا؟ مرتي وبكيفي عيب عليكم تره ماخذين غرفتي وماخذين مرتي.
نجلاء: ابروح عزازج شسويتي لاخويه ويهيج يحبج؟
ذهب: والله ماسويتله شي هو هيج من اول يوم.
ماجد: يالله خلصيني اخذي جهالج اريد انام.
نجلاء: والله جذاب. اليريد ينام ينام باي مكان بس انت نيتك مو صافيه.
ماجد: باع هاي.
نجلاء: يالله ماما يالله كوموا خالكم بعد ماعنده صبر اي حقه اذا لابستله قميص نوم ابيض عبالك عروس مو مثلي والله خطيه فراس البسله دشداشة الغفير.
اخذت اولادها ونزلت لغرفتهم جوه.
ماجد: انت مكيفه وتكلج اخذهم تكليلها لا بسيطه حسابج عندي اذا شفتهم بعد نايمين يمج الا اشلع اذاناتهم واذانج وياهم.
ذهب: ههههههههه حلوين احبهم.
جنه متونسين بوجود نجلاء يوميه نسوي شغله مره رحنه للصالون اني وياها.
نجلاء: اريد مثل لون شعرج اريد اخبل فريس من ارجع واريد وصفه تضعفني كون مثلج اصير شيسويني صايره جني درام على كولت فراس يكلي من تمشين الكاع تهتز.
صبغت شعري اسود ونجلاء اشقر.
بالليل رجع ماجد اني بالغرفه يم نجلاء والجهال كاعدين نضحك تسولف على زوجها وعالمقالب اللي تسويها بي.
اندك الباب ماجد دخل ظل يباوع مستغرب اشكالنه.
نجلاء: شبيك صافن تره اني اختك وهاي مرتك باربي ولو اني هم باربي بس السايز دبل.
ماجد: كومي كومي بعد متكعدين يمها من اطلع انوب اقفل عليج باب الغرفه هاي مو صاحيه راح تخبلج لتكعدين يمها.
راح صعد ورحت صعدت وراها دكيت الباب فتحته لكيته واكف بالشورت.
ذهب: اطلعلك ملابس تسبح اول لو تتعشى.
هو يباوعلي ورافع حواجبه.
ذهب: شبيك؟ معجبك لون شعري لو الكصه؟ علمودك غيرته حتى لتمل.
ماجد
: يخبل الحلو كل شي يلوكله وانت حلو.
ذهب: كافي يالله غسل وانزل اتعشى.
ماجد: مااريد ميصير العشا يتأجل؟
ذهب: لا حبي ميصير مادام معجبك شكلي.
ماجد: لا بالعكس يخبل بس لازم اتعود عليه.
بعدين بالليل كعدنه اني ونجلاء بغرفتها هي وجهالها حتى انومهم ميقبلون هي تنومهم وماجد ميقبل ينامون يمنه.
هالفتره جانت مستقره وهادئه ونجلاء خابصه البيت خبص وجانت من جانبي من شافت امها شلون متطيقني وعمه حميده حجتلها على كل اللي صار.
نجلاء: ياا سوده عليه كل هذا شفتي عدنه شكد عيب الله يساعدج علينه ههههه.
ذهب: اسم الله عليج.
نجلاء: زين هسه ماكو حمل محاولتوا بعد.
ذهب: من اخر مره صارت عندي خربطه صار شهرين ماكو منزلت رغم عندي الالام اخذتني ماما للدكتوره وكتبتلي لبر حتى تنزل. بس مانزلت.
نجلاء: اي طبعا تتخربط لعد الحاله النفسيه وين تروح. اكلج هذا فريس من اجينه لليوم دك علينه بس مرتين عبالك يريد يخلص من عدنه. بسيطه.
ذهب: اني اكو ارقام غريبه دتتصل بيه.
نجلاء: ديري بالج ماجد يعرف شيخلصج.
ذهب: الله لايكولها الا يعلكني بالبنكه اخوج ماعنده تفاهم من يعصب راسا تصير عيونه حمر وتصير ايده جاكوج.
نجلاء: صحيح اي والله هههههه، اتذكر من خطبني فراس واجانه مره وكعدنه اني وياه بالديوانيه والباب مسدود وهو اجه مااسولفلج شسوه بينه لهسه فراس يخاف منه وصلخني ذاك الكف المعدل عبالك مدري شمسوين مو كاعدين ونسولف.
ذهب: عفيه. عفيه. خوفيني بعد خاف اني مااخاف منه.
نجلاء: سبحان الله بعكس رائد الله يرحمه جان بااارد ولا عليه بأحد بس شيمائو العوبه جان متعجب بيها شتكول هو موافق جان خروف الله يرحمه.
ذهب: عزا صخام. اخوج متوفي كولي الله يرحمه.
نجلاء: كلت والله. كلت جان خروف الله يرحمه مسمعتيني؟
ذهب: ماجد طلع كلامه صحيح انتي تخبليني وياج.
عمه حميده: وينهم، وينهم..
نجلاء: هنا عمه هنا تعالي.
عمه حميده: عندي خبر لذهب يستاهل ذبيحه.
ذهب: يالله سترك شنو يوم كولي؟ ماجد طلع ميحبني؟
نجلاء: ياا شوف حظي. تكولج خبر يستاهل ذبيحه بعدين شدعوه ميحبج ماجد لوما يحبج جان مو يوميه مكسرج جان خلاج بكيفج مثل سحيله ام الخلاكين من جانت عنده قبل.
ذهب: مشكوره. مشكوره. على اساس حاطلي نوط شجاعه ماعبالك مكسرني.
نجلاء: هههههه اندري عنج انت كله تفكرين بماجد عبالك الخلقه ماخلق غيره هاي لو عنده شعر جان شسويتي؟
ذهب: لاااا والله العظيم ازعل منج. مااقبل تحجين عليه. فديت الكرعه اني احلى مابي كرعته اصلا. والله بس هو الكرعه حلوه عليه لان هو محليها فديت كلبه.
عمه حميده: اي عفيه يمه اي لتسكتيلها. هو منو مثله كافي هيبته. طوله. هدوءه. اخلاقه. منو مثله؟
دخل ماجد.
نجلاء: هلا. هلا. باخوي الهيبه. هلا بالضلع. تعال تعال. انقذني شنو هاي اكلوني بكشوري مرتك وعمتك.
ماجد: السلام عليكم.
كلنه ردينه السلام واني كمت.
نجلاء: وين رايحه اكعدي خل احجيله مو تردين تشردين تستحين اني مااستحي اليوم الا اكوله.
ماجد: شبيكم؟
ذهب: ماكو شي تعال حبيبي حتى اصبلك العشا نجلاء مصخنه ههههه.
عمه حميده: ههههه. لا مالج حق من حقه يعرف مو بس يمنه.
ذهب: يمه هاي انت على اساس وياي مو ويها؟
نجلاء: اكلتني بكشوري مرتك بس حجيت عالكرعه زعلت متقبل نحجي عليك. ازعل اذا تحجون على كرعة ماجد اصلا يخبل. تخبل عليه الكرعه هو محليها. كتلها على كيفج شدعوه تره هو اخوي بس مو حلو كوه خوما كوه.
نجلاء: اخ. ليش هيجي ليش. لان نحجي الصدك؟
باس راسي وكلي: ديري بالج تصيرين مثل هاي الخبله خليج مثل ماانت عاقله وتحبين رجلج.
عمه حميده: ههههه ربي يحفظكم ويهنيكم ان شاءالله ويخليكم لبعض ويكفيكم شر العين والحسد ويرزقكم بالذريه الصالحه ياربي.
ماجد: أللهم آمين.
نجلاء: بروح ابوج ممسويتله سحر؟
عمه حميده: يااا ههههه عابتلج هي سحرها لسانها ادبها مو مثلج لسانج شطوله الله يساعد ابن اخوي على عليج.
صعد ماجد وبقينه بس احنه.
ذهب: عمه شنو الخبر نجلاء مخلتنه نفهم شي.
نجلاء: يااا. اني شلي علاقه؟ مو انت ورجلج سويتولكم فلم عربي رومانسي قديم.
عمه حميده: اسراء انخطبت.
نجلاء: صحيح والله؟ يامكرود خطبها؟
ذهب: يارحمة الله الواسعه. يمه افيييش.
عمه حميده: الله يساعدج شكد كلبج متحمل عليها.
ذهب: مو حقي يمه الله عليج؟
عمه حميده: اي والله يمه الله يلوم اللي يلومج.
ذهب: بس خل تتزوج اوزع حلال المشاكل.
نجلاء: والله ماجد مسويلج غسيل دماغ طلعتي تحبي اكثر مايحبج.
رحت صعدت وره ماجد فرحانه بالخبر دكيت الباب وفتحته لكيته يباوع صور زواجنه.
ذهب: ها حبيبي متريد تتعشا؟
ماجد: اي جوعان وتعبان.
ذهب: اني هم احس اجوع هالايام بصوره مو طبيعيه واتعب بسرعه خصوصا من اصعد الدرج.
ماجد: محتاجين سفره نسافر نروح نغير جو شويه نرتاح شرايج نروح لتركيا؟
ذهب: ان شاءالله بس مو هسه من تسافر نجلاء عيب هسه هي بالسنوات يالله تجي ميصير نسافر ونعوفها.
دك تليفون ماجد كذا مره مارد عليه.
ذهب: تليفونك؟
ماجد: ادري عوفيه خل يولي مااريد ارد.
ذهب: ليش اخاف شغله ضروريه؟
ماجد: لا. شيماء.
ذهب: ياشيماء؟
ماجد: شيماء زوجة رائد.
ذهب: زين رد عليها يمكن محتاجه شي.
ماجد: تولي عوفيها ولتنطيها وجه.
ذهب: شبيك وياها تره البنيه فقيره.
ماجاوبني.
وره اسبوع تقريبا جان يوم خميس العصر ماجد طلع وكعدنه احنه بالديوانيه اني ونجلاء وعمه حميده نكرز حب والجهال راحوا لبيت جدهم ابو علي.
شويه وسمعنه صوت سيارة ماجد استغربنه ليش رجع بسرعه مصارله ساعه من طلع.
دخل علينه للديوانيه عيونه براسه.
عمه حميده: ها يمه رجعت خوماكو شي؟
راسأ دخل لزمني من شعري بدون حجي ولاتفاهم نجلاء ظلت تصرخ وعمه حميده يردون بس يفكون شعري من ايده ماكو.
اخذني من شعري من الديوانيه جوه لغرفتنه فوك واني اصرخ من الوجع وهو ولا عبالك.
دخلني للغرفه وقفل الباب ونجلاء وعمه حميده ورانه يدكون بالباب يصيحون يتوسلون ماكو فايده.
اني ماادري شنو الموضوع بس ابجي واصرخ موجوعه.
ذهب: شعري ماجد. شعرري ماااجد. شعريييي.
ماادري منين تجيني الضربه من كل مكان.