رواية صبرا يا قلبي الجزء الأول للكاتبة روز الفياض الفصل الرابع والثلاثون
طلع وطلعوا كلهم وراه اني بقيت اباوعله من بعيد لان اذا اتقرب منه مااعوفه.
سلم عالكل وراح..
اني كعدت بالمطبخ كلبي خلص من البجي.
بقيت صافنه وحاطه ايدي على خدي. بعدين اتذكرت التليفون صعدت جبته وكعدت اضبطه اخاف يتصل بيه..
خلص هاليوم كوه كلهم يمي محد خلاني وحدي بس دموعي اعوذ بالله منها ماتبطل.
عمه حميده: ميصير يايمه هالبجي ميجوز ومو زين عليج وعلى ابنج هالطفل خطيه.
ظليت منتظرته يتصل مااعرف رقمه هناك.
سافر هو وعبد الله ابن عمه وبقى فراس ويانه بالبيت.
بالليل دك رقم دولي عرفته هو.
ذهب: الو.
ماجد: الو حبيبي شلونج؟
ذهب: هلو حبيبي الحمدلله. انت شلونك؟
ماجد: الحمدلله. شلونهم حبايبي؟
ذهب: زينين الحمدلله.
ماجد: فديتهم. اكلي زين لخاطري ونامي زين ولاتبجين كلها جم يوم وتخلص انشاءالله..
ذهب: ان شاءالله.
ماجد: باجر الصبح ان شاءالله نروح للمسشتفى حتى نسوي كل الفحوصات المطلوبه وعكبه ان شاءالله العمليه.
ذهب: ان شاءالله.
حجينه شويه وسولفلي شويه عالرحله بعدين كال: ذهب؟
ذهب: نعم؟
ماجد: تحبيني..؟
ذهب: انت شتشوف؟
ماجد: معناها اذا صارلي شي مااريدج تتزوجين بعدي.
ذهب: اسم الله عليك، من طلعت كتلك اني وياك اذا تروح لو ترجع فلا تعب نفسك وتوصيني على شي.
ماجد: هسه صحيح من كلتي اناني صح اناني مااريد احد يخلي ايده عليج غيري ادري حرام علي بس مو بيدي.
سكت وبعدين كال: استغفرالله، خلص انسي هالحجي.
حجينه شويه وسد التليفون يريد ينام بس ادري بي ماراح ينام مثل مااني مستحيل تغمض عيني.
خليت رنة لاسمه (انطيني وعد للموت).
نزلت نمت يم عمه حميده بغرفتها بس ماغمضت عيني للصبح.
الفجر صليت وخلصت فتحت الموبايل شفته عالواتساب.
ذهب: حبيبي صباح الخير. شعندك كاعد؟
ماجد: ماكو شي ماكدرت انام مثلج.
ذهب: لا نمت اني الحمدلله شبعت نوم بس وهسه كعدت صليت.
ماجد: صدكتج.
ابتسمت وكتبتله: اشتاقيتلك..
واحبك..
واليوم جان شطوله كوه خلص وشيطلع الصبح.
ماجد: بس مو اكثر مني، وهسه يطلع الصبح مبقى شي.
ذهب: شوكت انكطع كلبي.
ماجد: اسم الله على كلبج، شعندج مستعجله تردين الوقت يخلص.
انعصر كلبي من حجايته ودمعت عيوني..
ذهب: لا مااريده يخلص اريده يوكف مايتقدم بعد بس للصبح لان الليل وحشه بدونك.
حسيته سكت شويه اكيد يفكر مثلي ويمكن بجه..
ماجد: حبايبي شلونهم؟
ذهب: زينين الحمدلله عدهم درس رياضه هسه هههه.
ماجد: هههه حبايبي ربي يحفظهم والله يساعدج.
ثاني يوم مااتصل لان التهه يسوي فحصوات علمود العمليه واني ظليت افتر بالبيت كلبي ماكلني..
بالليل نفس الشي نزلت نمت يم عمه حميده حسيت تعبت مانايمه من البارحه بس مااكدر انام ولااغمض عيني فكره تاخذني وفكره تجيبني للصبح.
عمه حميده كل شويه تكعد تشوفني كاعده.
عمه حميده: نامي ياماما ارتاحي شويه مو زين عليج ولا على ابنج، شنو هذا الطفل لا راحة لا اكل لانوم؟
ذهب: مااكدر عمه كلبي يوجعني.
عمه حميده: اسم عليج حبيبتي كومي توضي وصلي وادعيله الله يكومه بالسلامه ويرجعه الكم سالم ان شاءالله.
ذهب: يارب..
اتوضيت وصليت صلاة الحاجه وكعدت انتظر الاذان احس الساعه سنه كوه تمشي الدقيقه.
كتبتله عالواتساب: (وعلى نياتكم ترزقون فتخيل حجم نقائي الذي جاء بك الي).
ماجاوب يمكن نايم حبيبي نوم العوافي..
صليت الفجر وطلعت بالحديقه كشفت راسي ودعيتله.
عمه حميده هي والعلويه كعدوا للصلاة وراها اتريكنه وكعدنه بالمطيخ ساكتين محد يحجي كل وحده تفكر بحدها بس اكيد بنفس الموضوع..
ام ماجد: عيونج منفوخه مانمتي صار ليلتين حرام عليج هالطفل.
عمه حميده: لحد ميرجع انت راح تعمين من البجي..
ام ماجد: كومي خالة كومي نامي وارتاحي ساعه ساعتين خليها على الله.
ذهب: ونعم بالله بس مااكدر انام والله.
مو بيدي النوم طاير من عيني.
عمه حميده: علي نذر ان شاءالله من يرجع سالم اذبح عجل لوجه الله ذكروني خاف انسى.
ذهب: هو هم سوده عليه جان ناذر من تطلع نتائج الطفل زينه هم يذبح عجل.
ام ماجد: اي وصى عمه يجيبه ويذبحه ان شاءالله.
ذهب: ان شاءالله.
عمه حميده: دروحي يايمه اتمددي شويه بالغرفه لاتنامين بس اتمددي خلي جسمج شويه يرتاح هذا السهر مو زين عليج.
ذهب: ان شاءالله.
رحت لغرفتها واتمددت وخليت التليفون يمي بلكي يتصل بس ماكو.
وره فتره سمعت صوت مسج فتحته لكيته دازلي: (انت بالنسبه إلى احلى نعمه واحلى رزق الله رزقنايه الله لايحرمني منج ومن دعائج ولامن رائد وفضل).
بجيت ومسحت دموعي خاف تشوفني عمه حميده وتعصب.
ظليت متمدده بالفراش بلكي يتصل كلهم كعدوا..
احس الوقت مايمشي واني منتظره بالغرفه ويمي التليفون اتصلت على بابا كتله خل يدعوله هو وماما.
واتذكرت فاطمه والشله صار اكثر من شهرين ونص محاجية وياهم ولااعرف اخبارهم ولا إلى خلك احجي ويه اي احد بس لازم اكللهم يدعوله دزيتلهم كلهم مسجات كتلهم: هلو بنات هذا رقمي الجديد ذهب اريد خدمه مستعجله منكم تدعون لماجد عنده عمليه خطره بالقلب اليوم الله يخليكم وبعدين نتواصل ونحجي).
البنات كلهم ماقصروا وماسألوني عن شي صارت الساعه ( 10 )وماكو شي.
متت من التفكير كمت طلعت من الغرفه ورحت بالمطبخ عبالهم جنت نايمه.
نجلاء: ها حبي كعدتي؟ صباح الخير.
ذهب: صباح النور..
عمه حميده: اشو جنج مانايمه.
ذهب: منين يجيني نوم..
عمه حميده: عفيه عليج.
طاحت دمعتي مسحتها ورحت يم عبودي كعدت العب وياه بلكي التهي مااريد ابجي وافاول عليه..
صارت ( ب12 ) دك التليفون، انطيني وعد للموت.
رحت اركض: حبيبي؟
ماجد: هلو حبيبي.
ذهب: وينك اليوم ماكو؟
ماجد: نمت والله جنت تعباان.
ذهب: نوم العوافي.
ماجد: الله يعافيج، وانت نمتي؟
ذهب: اي الحمدلله.
ماجد: شلونهم حبايبي؟
ذهب: زينين الحمدلله.
ماجد: ديري بالج عليهم.
ذهب: انت بس تعال ومالك علاقه.
ماجد: امي شلونها؟
ذهب: الحمدلله زينه. تريدها؟
ماجد: اي والله انطينياها احجي وياها.
حجه ويه امه وبعدين ويه نجلاء وفراس ووصاهم علي. انعصر كلبي حسيت هاي اخر مره راح اسمع صوته بعدين حجه ويه عمه حميده.
عمه حميده: لاتوصيني على بنيتي انت لاتشيل هم شي. انت ارتاح ولاتفكر هي ابطن عيني هي وابنك ان شاءالله.
بجيت مااكدر اتحمل هالموقف، حسيته جاي يودعنه..
عمه حميده: وصيها هي من سافرت لليوم ماغمضت عينها لابليل ولابنهار.
كتله بكلبي حبيبي توصيهم علي واني روحي وياك مايحتاج توصي احد اني بدونك اموت.
عمه حميده: لا والله مانامت وين نامت هاي متريد تضوجك.
انطتني التليفون احجي وياه.
ذهب: الو.
ماجد: ها شنو هالشكاوي عليج هاي بعدني توني سافرت ظليتي متسمعين الكلام ومتاخذين الحجي؟
ذهب: حبيبي ( 5 ) دقايق وارجع اتصل بيه ميخالف؟
ماجد: ان شاءالله.
راسأ نزلت برنامج تسجيل المكالمات اريد اسجل هالمكالمه خاف تكون الاخيره اخاف مااسمع صوته بعد.
هم يباوعولي ميدرون شنو الموضوع.
اتصل رديت بسرعه.
ذهب: حبيبي؟
ماجد: ها حبيبي شلونج؟
ذهب: زينه مادام انت زين اني زينه.
ماجد: اني زين..
ذهب: خلص معناها مااريد شي اكثر.
ماجد: ذهوبتي؟
خنكتني العبره..
ذهب: امم؟
دموعي متخليني احجي براحتي اختنكت.
ماجد: احبج.
ذهب: يابعد عمري انت واني احبك واموت عليك عساني اني ولاانت.
كلهم كاعدين ويسمعوني بس ماهتميت نسيت نفسي نسيت الناس نسيت خجلي سمعته يتحسر وسكت شوية بعدين كلي
سمعي الكلام حبيبي ولاتعبين نفسج وتعبيني وياج اكلي زين ونامي..
ذهب: ان شاءالله..
ماجد: ومااريد بجي.
بجيت وسمعني..
ماجد: دموعج توجع كلبي.
بجيت حيل وبجوا ويايه رغم ميسمعون شيكول.
ذهب: اسم على كلبك ياريت اني ولا انت.
ماجد: لتكولين هيج.
ذهب: حبيبي مو تتأخر، انتظرك.
شهكت حيل هو سكت حسيته بجه.
ماجد: ان شاءالله مااتأخر..
ذهب: ترجع مو؟ ترجع؟
ماجد: ان شاءالله بس لاتبجين.
ذهب: ان شاءالله خلص ماراح ابجي. ماابجي.
ماجد: يالله حبيبي ديري بالج على نفسج وعلى حبايبي وسلمي عالجميع.
ذهب: ان شاءالله، لااله الا الله.
ماجد: محمد رسول الله.
ذهب: مع السلامه. الله وياك. امانة الله ومحمد وعلي.
ماجد: مع السلامه.
سد التليفون واني بجيت لحد ما دخت وحسيت دموعي نشفت بعد.
ظليت مثل اللي عدها ولاده اروح وارجع وره تقريبا ساعتين دك تليفوني (انطيني وعد للموت..
رديت ركض: الو الو الو.؟
ماكو جواب سديته وخليته عالشحن وكعدت انتظر.
فراس اتصل على عبدالله سأله عبد الله كال دخلوه للعمليات قبل ساعه بس العمليه تطول تقريبا ( ٤ ) ساعات.
وره ساعه دك تليفوني هو (انطيتي وعد للموت.
رديت: الو حبيبي الو ماجد؟
ماكو جواب.
فراس: يمكن تليفونه عد عبد الله ومن يكعد لو يضغط عليه بدون ميدري يدك عليج لان هو بالعمليات هسه.
نجلاء: اي يمكن اتصل بي وكله. تره وكف كلبنه البنيه راح تجيب من وراه كل شويه يدك عليها.
اتصل فراس بعبدالله وكله. عبدالله اتعجب كال تليفونه بقى بالفندق بالسيفتي ويه الجوازات والفلوس ومقفوله.
اني هنا باد حيلي متت من الرعب كلت مات ماكو تفسير ثاني ويريدني احس بي.
نزلت كعدت بالكاع خفت ادوخ واوكع حيل من مكاني
رجع التليفون دك هو رقمه بجيت حيل وظليت اصرخ: ياربي شلعت كلبي ياربي متت مااكدر اتحمل بعد.
ابجي وهم يبجون ويايه يسكتون بيه.
جابتلي نجلاء عصير شربت شويه وماكدرت اكمله.
بعدين حطت راسي بحضنها وسوتلي كمادات دافيه شويه خلتهم على عيوني بلكي انام.
عمه حميده وامه كاعدين يقرون قران ويدعون.
صارت الساعه (ب4ونص) تقريبا اتصل عبد الله على فراس وفراس راح طلع بره مارد عليه كدامنه.
اني من شفته طلع بره انشليت كلت مات وميريد يحجي كدامي ردت اطلع وراه ماكدرت اكوم رجليه ظلت ترجف وباد حيلي ظليت ازحف على ركبي ونجلاء تصيح وراي وعمه حميده ركضت وراي سحبتني وكعدتني بمكاني وظلت تبجي.
دخل فراس كال: الحمدلله..
العمليه نجحت وكل شي تمام وتوهم مطلعينه من العمليات للعنايه.
عمه حميده ظلت تهلهل وامه تبجي ونجلاء تهلهل وتكمز هي وجهالها.
اني حسيت بعد مااكدر من التعب والرعب والخوف دخت وجسمي يرجف ومااكدر احجي خليت راسي عالكاع وغمضت.
نجلاء: يمه وكعت.
عمه حميده: ياا. ياا. كوميها ويايه كوميها.
كوموني كوه مااحس بجسمي عبالك ميته حسيت روحي ثكيله مااكدر اتحرك.
خلوني عالجربايه وركضت نجلاء للمطبخ جابتلي مي شربتني وغسلت وجهي وعمه حميده فتحت القران بوجهي.
ام ماجد: جيبولها شي تاكل اي شي ضغطها انخفض يمكن لاتاكل لاتنام طبعا توكع.
ماقبلت نجلاء كلتلها: خاف يطلع مرتفع من الحمل.
اتصلوا بت جيرانهم دكتورة اجت قاست ضغطي كالت هبوط حاد هسه تنطوها شي مالح وواحد يروح يجيبلها مغذي واركبه الها.
راح فراس خطيه جاب المغذي وشدولياه ونجلاء يمي تشربني لبن شويه شويه.
وراها مدريت بالدنيا.
نمت بعمق عبالك صار شهر مانايمه ماوعيت الا الساعه( 10 ) بالليل نجلاء كعدتني.
فزيت مرعوبه كل فكري هو بي شي.
نجلاء: اسم الله حبيبتي اسم الله ماكو شي بس اريدج تاكلين حاجه نمتي هوايه كافي.
باوعتلها وبلعت ريكي ورجعت خليت راسي عالمخده.
ذهب: ماجد شلونه؟
نجلاء: زين الحمدلله بعده بالعنايه يبقى ( 3ايام ) وبعدين ينقلوه لغرفه عاديه ان شاءالله للصبح يكون عده مرحلة الخطر.
ذهب: اريد اصلي.
نجلاء: اتعشي اول وبعدين صلي حتى لاتدوخين تره بس يتصل اشتكيله منج خبلتينه شكد تبجين، صدك جذب.
ذهب: بس خل يتصل وسوي اللي تردينه ماعندي مانع.
نجلاء: هلكد تحبيه ذهب؟ الله لايحرمكم من بعض.
ذهب: يارب..
كعدت غسلت وكمت اتعشيت وياهم خطيه منتظريني وراها اتوضيت وصليت ركعتين حمد وشكر.