رواية صبرا يا قلبي الجزء الأول للكاتبة روز الفياض الفصل الخامس والأربعون
ماجد: طايحة الحظ اني تسوين من وراي هيج؟ شلون اتجرأتي وطلعتي ورحتي ولاعبالك اني موجود؟
اني مدنكه اخاف اباوعله ومنتظره الضربه بس خايفه لايروح يضربني ويأذي رائد.
وبنفس الوقت مصدومة اذا اولها طايحة الحظ تاليها شلون؟
ماجد: مو احجي ويااج؟ احجي؟ لااليوم ادفنج بمكانج والله..
عمه حميده: على كيفك، على كيفك، اني كتلها امشي وياي.
ماجد: يمه انت حسابج بعدين نتفاهم عليه هسه اريد اعرف شلون راحت بدون علمي؟
ضرب الطاوله ضربه بالحياط كلبي حسيته وكف.
مااكدر اتنفس من الخوف هو واكف قريب بس يمد ايده يلزمني بس عمه حميده واكفه بيناتنه.
ماجد: احجييي؟ ادبسز اني تطلعين من وراي؟ الظهر كله اني بالبيت ليش محجيتي؟ ليش مكلتي؟ تعرفين مااقبل ومع ذلك طلعتي بكيفج ماعندج رجال، اني السيد إلى كلها تخاف مني وتحترمني وتحسبلي حساب تجين انت تردين تلعبين من وراي.
مد ايده بس مضربني كال: الله يحبج اني حالف مااضربج بعد وبيدج الولد والله لوما هيج روحج اطلعها بيدي.
عمه حميده: كافي اكعد مو زين عليك العصبيه وهي اصلا شسوت راحت وياي ورجعت وياي شنو متارسة عينك اني؟ شدعوه عليك هالعصبية كلها قابل وين طلعت هي؟ لاتكول عمتي ماخذتها لاتكول اسكت لخاطر عمتي شنو فلمك انت متارسين عينك؟
ماحاجاها ولاجاوبها بس يحوس بالغرفه مخله شي مكسره واني مغطيه وجه رائد لايروح يتأذه.
ماجد: شوفي انت هسه خربتي كل شي على نفسج خاف قبل جنت مااريدها ولا اشتهيها ولااطيقها هسه بالعناد الا اروح واخطبها وطكي راسج بالحايط.
انقهرت غثتني حجايته كتله: يعني انت مقهور عليها هسه لان انفضحت؟ مو علمود الطلعه؟ كول من الاول تريدها وهسه اجاك العذر.
ماجد: ايييي اريدها ايي، احبها، احسن منج عالاقل.
بيج خير وخير..
وسكت ماكمل جملته..
اني هنا حسيت كلبي وكف من الوجع..
راسأ اجه على بالي موضوع سراج مو هو هذا اللي ديعيرني بي ماعندي شي مو زين بحياتي يعيرني بي بس سالفة سراج.
اختنكت بلحظتها والله، حسيت واحد خانكني اريد اتنفس كوه ماكو هوه.
كتله: بيه وخير وخير شنو؟ تعيرني بشنو؟ لو بيه خير ماعافني ذاك الحقير؟ مو؟ هذا الجاي من تالي تعيرني بي؟
مجاوبني ولاحجة شي ظل داير وجه.
عمه حميده واكفه ساكته متدري شنو الموضوع.
ظليت الهث كوه احجي كلبي ظل يوجعني حيل..
ذهب: جزاك الله خير. وانعم الله عليك من سترت عليه واتزوجتني..
جان هسه اني بايره محد ياخذني، بس خوش ستر هسه جاي تعيرني بي.
مو اني اليعيرونها. مو اني الينكالها هالحجي مااااجددد..
مو اني التتعير..
شهكت شهكه حسيتها شكت صدري من كدما غصيت بعد مكدرت احجي شي كعدت وظليت ابجي بصوت عالي وعمه حميده تسكت بيه وتحجي وياه هو خله وطلع.
اني بساعتها لو عايفني علمودها اهون علي من هالحجايه اللي كالها مااتخيلت فد يوم ممكن يفكر بيها مجرد تفكير هو اخر واحد ممكن يفكر هيج..
هو الوحيد اللي يعرف اللي صار واني مضربته على ايده ومجنت قابله بي لان ممسوية شي حتى اقبل بي غصب بس العتب مو عليه العتب على ابوي اللي ماخلالي قيمه وقدر..
عمه حميده: شبيج يايمه سكتي شويه فهميني شصاير؟ ستريش غير اعرف؟
مكدرت احجي شي لزمني كلبي مااكدر اتنفس بعد كمت ردت اوكف شويه لو اتحرك بلكي اتنفس بس مكدرت اوكف عبالك واحد وحاط سجينه بكلبي ويحركها لااكدر اتنفس ولااكدر اتحرك متت من الوجع بس أشرتلها كلبي هي كامت ركض وخرت رائد ومددتني وظلت تدلك كلبي..
ظلت عيني على رائد وفضل كلت خلص راح اموت، الهث ماكو هوه.
هي اتصلت بماجد بس ميرد رجعت اتصلت بعد ماكو.
راحت جابت عبايتي لبستني ولبست عبايتها وكومتني هي والبنات للسياره بس عيني على جهالي ظلوا يبجون، حسيت متت بلحظتها بعد ردت اكوللها خليني هنا اموت يمهم اشوفهم قبل لااموت بس الوجع ذبحني ماااكدر احجي شي.
اخذتني للمستشفى كبل للطوارئ اجو شالوني وخلولي اوكسجين واجه الدكتور كلتله: فجأه كلبها ظل يوجعها واختنكت ماادري شبيها.
سوولي فحوصات وتخطيط قلب اني احس نفسي ميته منا اولادي افكر بيهم ومنا حجايته ذبحتني ذبح اخر شي انطوني ابره مهدئ نمت.
ظليت طول الليل نايمه موعيت الا الفجر سمعت صوت الاذان بتليفونه عبالي اني بالبيت فتحت عيوني اني وين ماادري خاليلي اوكسجين وهذا الجهاز مال تخطيط القلب ومغذي بأيدي وصوت الاجهزه يخوف رفعت راسي شفته كام يريد يروح يتوضا اكيد.
شافني اتحركت اجه يمي محاجاني..
اتذكرت اللي صار عبالك حلم من اتذكرت حجايته درت وجهي مااريد اشرفه.
خله ايده على راسي وخرت ايده ردت ادور على الجهه الثانيه لزمني كلبي لان تحركت بسرعه ظليت الهث رأسا صفر الجهاز هو سحبني لمكاني كلي: لاتتحركين نامي..
يانوم بعد شكد جنت مااريد اموت علمود اولادي بس بلحظتها اتمنيت اموت حتى اقهره مثل ماقهرني.
ظليت ابجي بصوت والبجي يأذي كلبي يأذيني والجهاز كل شويه يصفر لو يطلع صوت خربطه بالنبضات.
طلع هو صاح الدكتور رجعوا انطوني ابره بالمغذي نمت مره ثانية مكعدت الا الظهر كعدني الدكتور يسألني: شنو حاسه؟ وشبيه؟ وشلون صار هيج؟
اني كوه احجي بس الدكتور دار على ماجد: هاي الحاله غريبه شلون هيج صار؟ بعدها شابه وين اكو بهيج عمر ذبحه؟ بس المدمنين بهيج عمر ممكن تصير عدهم.
اني انصدمت من سمعت ذبحة دار علي الدكتور كلي: من شوكت عندج الالام؟
باوعت على ماجد وكتله: من اتزوجته بدت..
الدكتور سكت بعدين كال: هي مرات تصير نتيجة تراكمات وضغط نفسي بس متطلع بهيج عمر شنو هالضغط اللي يسوي ذبحه بهالعمر.
ماجد ساكت ماكو اي رد فعل.
طلع الدكتور وطلع وياه مااسمع حجيهم.
شويه ودخلت عمه حميده اجت بوستني وكعدت يم راسي محجت شي بس تبجي بسكتة وتمسح دموعها..
اني وخرت الاوكسجين كتلها: وين الاولاد؟ ليش مجبتيهم اشوفهم؟
دخل ماجد كعد هي كالت: ردت اجيبهم بس ماجد مقبل يخاف عليهم من المستشفى نومتهم واجيت.
اني طاحت دموعي اتنفست شويه حتى اهدأ كتلها: بالله متت بدون مااشوفهم؟
بجت هي خطيه كامت باستني كلتلي: اسم الله عليج لاتكولين هالحجي ازعل منج والله. ازمه وتعدي ان شاءالله بس انت صيري قويه ولاتفكرين بشي فكري بصحتج بس حتى ترجعين لاولادج خطيه اليوم رائد يكول اما.
اني بجيت حيل واختنكت صفر الجهاز كام هو بسرعه رجع الاوكسجين وبقى لازمه حتى لا اوخره اني غمضت عيوني ماريد اشوفه كل المواقف والمشاكل اللي صارت بيني وبينه محسيت كرهته لهدرجه هالمره غير هالمره حسيته طاح من عيني.
دك تليفونه طلع بره يحجي طول وره شويه اندك الباب دخلوا امي وابوي
ماما بس شافتني ظلت تبجي بابا ميريد يبجي كدامي بس كل شويه يدور وجهه يمسح دموعه.
كعدوا يمي عمه حميده كعدت كبالي هي وماجد..
ماما: شلونج ياعمري اليوم؟
هزيت راسي زينه كامت هي باست راسي مبطلت بجي بابا كللها: كافي بجي مابيها شي ان شاءالله لاتبجين وتخليها تضوج وتبجي.
ماما: هو بكيفي هي بس هالبنيه عندي وتريدني ماابجي.
اني انقهرت عليها متت مديت ايدي لزمت ايدها كتلها: اني زينه لاتبجين بس اريد رائد وفضولي..
وسكتت مااريد ابجي ظليت اتنفس حيل ردت اهدأ حتى ميصفر الجهاز بس يصفر يجون ينطوني ابره وانام مااريد انام قبل لا اوصيهم على رائد وفضل خفت اموت واني نايمة بدون مااشوفهم عالاقل اوصيهم عليهم.
ماما: ارتاحي حبيبتي ارتاحي لاتحجين هسه.
جريت نفس حيل كتلها: اريد اشوفهم.
بابا بجه وطلع بره وطلع وراه ماجد.
ماما: ان شاءالله ماما. ان شاءالله. بس شويه صيري زينه ارتاحي واني اجيبهم.
ذهب: لا اليوم جيبيهم خاف ماالحك.
ظلت تبجي حيل كامت عمه حميده يمي كلتلي: هاي اني كتلج ازعل عليج من تحجين هيج مالي خاطر عندج مو مهم زعلي؟
بجيت كتلها: يمه انت تربيهم بأمانتج.
ماما عصبت ظلت تصيح: سكتي لاتحجين هيج تردين تموتيني تردين تجلطيني.
دخل ماجد ودخل بابا على صوتها.
عمه حميده: كافي يمه كافي ارتاحي هسه اللي تردي يصير بس ارتاحي.
شويه وراحت عمه حميده علمود الاولاد بحدهم.
بابا وماجد راحوا رجعوا وره ساعه تقريبا جايبن ملابس وشغلات.
ماما حاولت توكلني جابولي شوربه بس مالي خلك اكل ولااشتهي بقوا ماجد وبابا بره وماما بقت يمي بعدين اجه الدكتور كالمعتاد انطوني علاجي وابره ونمت.
كعدت بالليل ماما وماجد كاعدين ويحجون مسمعت شي بس ماما تكله: بنتي واعرفها كل الحجي اللي كلته واللي صار بجهه وهالكلمه بجهه اذا اني هيج فهمتها هي شمتوقع شتفهمها؟.
خاله انت هم ابنه بس بنتي ماتلكه مثلها تره ماكو وحده تمر بكل هالظروف وتبقى متحمله خصوصا بعدها زغيره بس لان تعرف ابوها ميقبل تزعل ومتريد تخسرك وتخسر بيتها، بس هم للصبر حدود وللتحمل حدود اكبر منها وميتحملن الشافته وياك. اني قبل جنت مااعرف شي لان لاهي تشتكي ولا ابوها يحجي بس من عرفت لا مااقبل بعد ولو ادري بيها شافت كل هذا وياك والله ساعة ماابقيها عندك شنو ماخذ فصليه؟ لو لان نستحي ونخلي خاطر للعلويه وللسادة عبالك مستغنين عنها لو مستثكلين لكمتها؟ تره بس هي عدنه لاولد ولا بنية بعد ممستغنين عنها. ومادام طلعت مابيها خير معناها ترجع لبيت ابوها معززه مكرمة ومثلما دخلنه بالمعروف نطلع بالمعروف.
هو محجة شي ظل ساكت بس اسمعه يتحسر.
دك تليفونه طلع بره يجاوب..
بقيت بالمستشفى ( 3 )ايام بالعنايه بعدين كتبلي الدكتور خروج بشرط الراحه التامه مدة اسبوع بعد بالفراش وراحه نفسيه وماكو سهر والعلاج اكمله وارجع.
بابا كل لماجد ابقى عدهم لحدما ارتاح وبعدين الله كري مااعترض ميكدر بعد يعترض.
رحت لاهلي ويه امي وابوي وهو راح للبيت.
العصر اجت عمه حميده هو جابها هي والاولاد اني بغرفتي نايمه سمعت صوت بابا يضحك ويلعب وياهم كعدت مااكدر اكوم وحدي اخاف واصلا ممنوع اشيلهم هالفتره بقيت كاعده بفراشي منتظره يجيبوهم إلى حسيت كلبي راح يطك عليهم بعد عمري مشتاقتلهم شويه ودخلت ماما تشوفني اذا كاعده.
ماما: حبيبتي كعدي هاي عمتج جابتلج رائد وفضولي تشوفيهم.
راحت واجت هي وعمه حميده ووياهم الاولاد بس شفتهم مديت اديه خلوهم بحضني شبعت بجي ظلت عمه حميده تحجي: بعد مااجيبهم والله اذا هيج شنو هالبجي هذا كله؟ شقصتج؟ مشايفة بحياتي وحده تبجي بكدج.
ذهب: ابجي من قهري عمه. ابجي على حظي المحسوده عليه..
بقوا عندي لليل بالليل رجع ماجد اخذ الاولاد وعمه حميده لاشافني ولاشفته، مقبلوا يخلون الاولاد يمي لان يحتاجون ناس وياهم تداريهم وماما وبابا ملتهين وياي بس اني من اخذوهم عبالك ماخذين روحي ظليت الليل كل كاعده وافكر بيهم.
ماما تنام يمي بالغرفه خاف احتاج شي الصبح اجت خاله يمنه خاف ماما تتعب بحدها وخطار ليل ونهار ومالي خلك مره بيت عمي مره خوالي مره بيت ابوعلي عم ماجد مره عبدالله وزينب ومصطفى ومحمد بيت ابو عبد الله مره الجيران.
اجتني فطوم وحجيتلها الصار اتخبلت.
فاطمه: لا مااصدك ماجد تطلع منه هالكلمه مو معقوله شلون هو اللي صار كل شي كدامه وعلى عينه معقوله؟!
ذهب: بعد هذا اللي صار.
فاطمه: كتلج هاي تطلع وره الموضوع متصدكين من نحجي عبالج الناس مثلج.
ذهب: تعبت فطوم. تعبت. مااكدر اتحمل بعد، هاي مو عيشة.
فاطمه: الله يساعدج حبي مو شويه اللي تحملتيه متستاهلين والله هو الفقير هيج يصير بي.