قصص و روايات - قصص رومانسية :

رواية صبرا يا قلبي الجزء الأول للكاتبة روز الفياض الفصل الثلاثون

رواية صبرا يا قلبي الجزء الأول للكاتبة روز الفياض الفصل الثلاثون

رواية صبرا يا قلبي الجزء الأول للكاتبة روز الفياض الفصل الثلاثون

كعدت وماما كعدت يمي وحاضنتني وتسولف ويه عمه حميده وكل شويه تبوسني.
ماما: طاك كلبي عليها والله صار شهر ماشايفتها بس عبالك سنه الله لايحرمني من هذا الوجه الحلو.
عمه حميده: خلوا البجي هسه على صفحة خل نفرحج ويانه تره مو مريضه اسم الله عليها بس هي الحمل متعبها.
ماما ظلت تبجي وتبوس بيه فرحانه.
ماما: مبروك ياماما. مبروك ياعمري. ليش ماكلتيلي جان سويتلج الاكلات اللي تحبيها.

عمه حميده: لا ازعل تره. لعد اني شسوي هنا اذا مااداريها واراعيها اداري منو هاي بنيتي الله شاهد معزتها من معزة ماجد واكثر والله.
نجلاء: لاتخافين خاله اني كاعدتلها بالمرصاد تاكل كل شي غصباً عليها مو بكيفها انت بس عوفيها علي وشوفي اذا ماسويتها دب هي وابنها بعد هو ولد فديته.
ماما: ماشاءالله تبارك الله اللهم صل على محمد وال محمد ان شاءالله الابن البار ياماما مثل ابوه.
عمه حميده: آمين.

ماما: اشو ساكته؟ متحجين شو احجيلي سفرتكم شلون جانت ظل بالي والله لان متتصلون وماجد ميتصل جان كلبي مقبوض كال ابوج خل اخذج للزياره نزور ونرتاح.
عمه حميده: متكدر تحجي سوده عليه بلاعيمها التهاب حاد منعها الدكتور من الحجي تدرين لبنان بارده وهم رايحين ملابسهم خفيفه وهناك بعد عرفوا حامل والله مصدكنة شوكت ترجع للبيت ونشوفها بيناتنه ونداريها.

ماما: متقصرون علويه اوالنعم منكم هي بتكم بعد واحنه مأمنين بيكم وبالسيد.
كل شويه تبوسني: ماعليج شر حبيبتي لازم تهتمين بنفسج هسه لان مو زين عالطفل تتمرضين هذا هسه امانه عندج انت مسؤوله عنه.
اتوقعت عمه حميده تلكالها عذر حتى تسد الموضوع واني عكب كل هالخدمه وهالمداراه اللي مداريتنياها هي ونجلاء مااكدر احجي.
فتح ماجد الباب وطلع يمنه.
ماجد: ها خاله استلمتيها بحضنج وظل عمي جوه ينتظر تجون تره هو هم مشتاقلها.

ماما: ههههه اي والله حقه بس شسوي كلبي جان مقبوض عليها توها ردت بيه الروح وارتاح كلبي.
كومتني ماما ودخلتني للديوانيه بابا بس شافني اجه حضني وظل يبجي.
عمه حميده: شبيكم صلوا على محمد مابيها شي تره هاي كدامكم شحلاتها وراح تجيبلكم حفيد ان شاءالله.
بابا: اي بابا حبيبتي لاتبجين كلي السيد توه والله كولش فرحت الله يسهلج ويتربى بعزكم ان شاءالله.

شويه وكاموا يردون يطلعون اني لزمت ايد بابا اتمنيت يكولي امشي ويانه حضني: جان اخذناج ويانه بابا بس ميجوز ترحين وتعوفيهم البيت يفرغ عليهم وماجد منو يبقى يمه هههه.
طلعوا للحديقه ماقبلت نجلاء نطلع وراهم طلع وياهم ماجد وامي حميده واني ظليت يم نجلاء وعيني وراهم.
نجلاء: ميخالف حبيبتي اصبري اتحملي هانت ياعمري لتتضوجين مو زين عليج وعالطفل.
دخلوا اولاد نجلاء من الحديقه يلعبون يمي اشتاقيتلهم.

عبودي: خاله ذهب ميخالف اخلي ايدي على بطنج اشوف البيبي.
ضحكت هزيت راسي اي.
نجلاء: شتشوف ولك قابل هو سونار. لو بنيه جا خطبناها الك.
دخل ماجد باوعلنه اني لازمه ايد عبودي ومخليتها على بطني وهو يضحك من يحس بحركه.
نجلاء: حتى لو بنيه خالك مينطيها النه يكول شواذي.
ضحكت بوست عبودي.
ماجد: لاننطيكم ولاناخذ منكم بتي الحلوه انطيها لابنج هذا الشاذي.

نجلاء: ياا. شبي؟ يخبل امه حلوه وابو حلو بس اذكرك من تطلع بتك مو حلوه وتظل تركض وره ابني.
ماجد: شيل ايدك لك شنو صدكت؟ اذا تطلع بنيه ازوجها سفير وزير مو ابنج بتي تطلع تخبل امها حلوه وابوها حلو ليش شناقصها وازوجها هالشاذي ههههه.
نجلاء: تعال ماما تعال لتخلي ايدك على خالتك بعد تره يحطك عالقبله ويذبحك.
بس ميخالف اصبر باجر من تطلع بتهم موحلوه شلون يجون يتوسلون بيك بس كون ترضى بيها لان محد مكلبها. بس اذا.

طلعت على امها اغسل ايدك لو تموت ميطوكياها.
ضحكت من كل كلبي على نجلاء.
نجلاء: اي رجلج يستهزأ بينه وانت تضحكين بس هي كلمه وحده على الاقل ابني يطلع عنده شعر على ابوه.
ركضت لان ماجد كام وكف يريد يطلع عبالها يركض وراها اني خربت من الضحك.
ماجد: خبله هاي صدك هذا فراس شلون متحملج ولو هو هم نفس الشي نص عقل.
طلع ماجد واني ردت اكوم اصعد بس نجلاء كالت نطلع بالحديقه شويه وره الصلاه هزيت راسي لا.

نجلاء: ليش ملينه من الحبسه.
اشرتلها ماجد ميقبل ومالي خلك مشكلة جديدة.
نجلاء: والله خوافه انت، بابا انت هسه مريضه وحامل ميحجي وياج ولايتجرأ يزعلج اصلا انت بس طلبي وشوفي شلون كل طلباتج مجابه والله لو اني بمكانج آآخ جان لعبت لعب بالدلع.
عمه حميده دخلت باوعنه اني ونجلاء وحده للثانيه وين جانت؟
نجلاء: حميده وين جنتي من مساع لهسه؟

عمه حميده: جنت اسولف ويه ابو جبار يسألني على ذهب شبيها كتله وكعت من الدرج وتأذت مو تكولين لاي احد حامل خليها شوكت ما كبرت بطنها الناس راح تعرف ومانعرف ولد لو بنيه ماجد ميقبل نعرف. زين؟
نجلاء: صار بعد اي اوامر ثانيه ست حميده؟ ابنج توه طلع وره ماجرح مشاعري ومشاعر ابني.
عمه حميده: عوفي الولد بحاله البي مكفيه سوده علي النهار كل لازم كلبه يوجعه سوده عليه.

اتنهدت اني انقبض كلبي كمت اتوضا حتى اصلي حسيت صار الجو كئيب عكب حجي عمه حميده.
اتوضيت وصليت ودعيت ياربي شافيه ويعافيه مااريد تشلع كلبي بي اكثر مااتحمل يصير بي شي لو تموتني لو تخليه وتهديه ياربي احبه اهديه إلى ياربي تعبت كلبي ميتحمل بعد اي تصرف منه اموت ربي انطيه الصحه والعافيه وخليه إلى ماعندي لااخ ولاخت.
نجلاء كاعده تباوعلي كالت: بروح عزازج شجنتي تدعين صارلج ساعه؟
ضحكت.
نجلاء: جنتي تدعيله؟ لماجد؟

انقهرتي عليه؟ اعرفج البزون يحب خناكه.
حطيت راسي بحظنها. اتذكرت هاي جانت حجايته.
نجلاء: آآآه الحب عذاب ومعذب الشباب.
اني من كالت هيج فطست ضحك يمكن بحياتي مضاحكه هيج.
طلعنه بالحديقه كعدنه اتمددت عالمرجوحه وخليت راسي على رجل نجلاء.
وظلينه نسولف..
شويه وعافتني وراحت تشوف بتها نايمه جوه.
كعدت اني ويمي عبودي يلعب.

دخل ماجد بالسياره اني خفت هسه احصل رزاله ردت اكوم هو صاح على عبودي راحله عبودي يركض جايبلهم العاب. هو حنون بس العصبيه المو طبيعيه والضرب.
دخل عبودي هو والعابه واني كمت اريد ادخل بعد المن كاعده ومااريده يجي يسمعني كم حجايه ويغثني كله من نجلاء كتلها ميقبل.
ماجد: ذهب؟
مشيت ما باوعتله بس هو جاي باتجاهي
لزمني من ايدي خفت رفعت ايدي عبالي راح يضربني.
ماجد: تخافين مني؟.
اففف. اريد احجي وياج شوية.

خل نكعد شويه بالمرجوحه اكو فد شغله لازم نحجي بيها.
ظليت واكفه وماعندي رد فعل ورافعه ايدي نزل ايدي وسحبني كلي: امشي. مو جنتي كاعده؟ ليش هسه ماتردين تكعدين؟ لو لان اني كتلج؟
كعدنه عالمرجوحه درت وجهي عالجهه الثانيه مااريد اباوعله
هو ساكت يباوعلي دك تليفونه كطعه وحرك ايده يريد يخلي التليفون بجيبه اني كمزت.
ماجد: على كيفج. ما اضربج شبيج؟

اريد اكوم ادخل للبيت مااريد ابقى كاعده وياه بس اخاف. مااريد يقشمر علي بحجايتين ادري بروحي اضعف ومااتحمل اذا بجه لو كال آخ، ظليت كاعده وعيني عالبيت بلكي نجلاء لو عمه حميده يطلعون.
ماجد: ادري ماتردين تحجين وياي ولا تكعدين يمي ومااريد اضغط عليج بس ردت اكولج شغله بس باوعيلي عالاقل..
ظليت مثل مااني ماتحركت.

اتنهد حيل بعدين كال: انت هسه ان شاءالله عديتي المرحله الصعبه من الحمل الحمدلله، بس اكو شغله لازم نتأكد منها مادام بعدنه بالبدايه.
انقبض كلبي راسا اجت ابالي فكره اعوذ بالله منها.
فكرت يمكن يريد يتأكد ابنه لو لا معقوله يعني تفكيره يوصل لهدرجه؟ انتحر احسنلي اذا هذا تفكيره.
ماجد: يعني ان شاءالله خير بس نتأكد من البدايه افضل حتى اذا لاسامح الله طلعت النتيجه مو زينه نتصرف.
حسيت لعبت نفسي من هالفكره.

ماجد: بس لاتخافين يعني بس حتى نتأكد ماكو شي ان شاءالله اني اكول نسافر لتركيا حتى نسوي فحوصات للبيبي.
لعبت نفسي. هو نفسه ماجد اللي اتزوجته لو واحد ثاني؟
ماجد: شبيج خفتي وانخطف لونج؟ ماكو شي ان شاءالله. بس فحوصات حتى نتأكد كل شي اوكي والبيبي ماعنده فتحه بالقلب وراثي يعني.

انصدمت شي مخاطر على بالي. درت عليه بسرعة وحسيت دخت انخفض ضغطي لان المرجوحه تتحرك ردت ارجع ليوره حتى لا اوكع بس جسمي ظل يرجف هالمره هذا الحمل اذا طلع بي اي مشكله معناها اني انتهي مابيه حيل بعد تعب ومعاناة وصبر كلبي خلصان.
لزمت ايده حيل هو لزمني حس دخت ماظليت اركز بنظري اتدنه يمي ورجعني ليوره وخله ايده وره ظهري وحضني طاحت دموعي غمضت.

هالدموع الفاضحتني وذالتني ماعندي طاقه بعد لصدمه من هيح نوع هالمره الحمل عده الاشهر الصعبه وتؤام مو واحد وحسيت بيهم وبحركتهم معقوله ربي تصدمني هيج صدمه وتشلع كلبي؟.
هالمره اذا هالحمل ماكمل معناها من ينتهي تنتهي وياه حياتي ويه ماجد ماكو سبب نكمل سوه بعد.
باس راسي كلي: خلص بدون بجي..
ماكو شي ان شاءالله مجرد فحوصات حتى نرتاح لااكثر ولااقل مابي شي ان شاءالله ليش تبجين وتفاولين عليه.

خله ايده على بطني اتحركوا هو ضحك كال: حبيبي..
مد ايده مسح دموعي. استحيت ومااريد ياخذه الواهس وكلبي معصور من حجيه وحاسته عبالك غريب دفعته وكمت اريد ادخل صاح وراي: اوكفي، انتظري لاترحين توكعين، صبري بس اقفل السياره..
اني هم جنت خايفه اوكع لو ادوخ بس كملت مشي وحدي كعدت بالمطبخ يم البنات هو دخل وده نجلاء يمي اجت تركض.
نجلاء: يمه الحب يمه وين جنتي؟

غلست مالي خلك اضحك واتشاقه الضحك الضحكته مساع وياها احسه طلع من خشمي حتى من الله ينطيني فرحه ماتكمل مثل الناس.
نجلاء: شكلتوا؟ شحجيتوا؟ اعتذر؟ شنو كال؟ شنو سويتوا؟
اشرتلها راح اصعد انام تعبت ظهري يأذيني ومالي خلك.
نجلاء: شفتهمت بالله من برنامج من غير كلام وين ورقتج وقلمج؟
اتنهدت اشرتلها اريد انام وكمت صعدت هي تمشي وراي خاف اوكع.

نجلاء: اني كلت اكو شي صار بس محد صدكني لهذا السبب انت مسويه نفسج نعسانه وتردين تنامين حتى ماتجاوبين.
دخلت للغرفه اخذت القلم كتبتلها: (راح نسافر تركيا).
نجلاء: الله عليج؟ هنيالج، علواه فريس يوميه يكسر عظامي ووراها يسفرني.
طول هالفتره ماجد حيل مشغول يريد يخلص اكبر قدر من الشغل قبل السفر مااشوفه الا نادرا وهو طالع لو وهو داخل بس احس مرات يجي لغرفتي واني نايمه.

اليوم راح ورجع من وكت واسمعه جوه يصيح وعمه حميده تهدي بي..
خفت شصاير اخاف انزل ويذب حركته بيه واخاف ابقى بالغرفه ويطلع الموضوع عني ويجني للغرفه ويستفرد بيه يستلمني ضرب وهالمره اني حامل خل ابقى واقفل الباب احسن حل..
قفلت الباب وقفلت الباب الثاني اللي بين غرفتي وغرفته وكعدت عالجربايه.

انتظرت هجومه فتره طويله بس ماكو شي ومافتحت الباب وره فتره سمعت باب غرفته انفتح وانطبك حيل واسمعه يصيح يمكن يحجي ويه احد بالتليفون.
بقيت بغرفتي محد سأل عني الظاهر اكو شي وملتهين بي الله يستر.
الظهر دكت ياسمين الباب تصيحلي عالغدا.
نزلت اتغده بس ماجد ماكو وعمه حميده ضايجه ونجلاء هم ضايجه ويحجون عن واحد حسود وحقير بس مااعرف منو.

الفصل التالي
جميع الفصول
روايات الكاتب
روايات مشابهة