رواية صبرا يا قلبي الجزء الأول للكاتبة روز الفياض الفصل الثاني والعشرون
اليوم خطبة رنا بت عم ماجد واخت طليقته. ولح عليه قبل ليسافر حتى اروح ويه امه وعمته لخاطر عمه.
كللش مو عاجبني اروح بس لخاطره سكتت وقبلت مااريدهم يحجون ويكولون كطعية وزحمه من عمه.
لبست فستان طويل ازرك جويتي وسشورت شعري ولبست الطقم اللي جابلياه وره الزواج واجه عبدالله ابن عمه اخذنه ورحنه لبيت عمه.
دخلنه سلمنه وكعدنه لكيت نسرين موجوده وكعدت يمها نسولف واهلهم وكرايبهم كل شويه وحده تسأل عني وتجي تسلم..
بس بيت عمه ابو علي بعدهم محد جاي من البنات.
نسرين: شكلج راح تنظربين عين كلهم يباوعولج لو يدري بيج ماجد طالعه هيج جان مخلاج تجين هههه.
ذهب: اصلا ماجنت اريد اجي بس لخاطره ولخاطر عمي اجيت.
نسرين: دكومي اوكفي هناك خل اصورج كم صوره ودزيها لماجد الله عليج.
رحت يم الباب وكفت وخليت ايدي عالحافه مال الباب ونسرين تصورني فجأه محسيت الا واحد دفعني ووكعت بكل قوتي على ركبي وايدي على حافة الباب لزمتها حيل حتى لا اوكع بس وكعت وانسد الباب على اصابعي حيل حسيت طلعت روحي من الوجع صرخت..
اجت عمه حميده تركض ونسرين اجو كوموني بس اني اتشنجت من الالم ركبي من وكعت صار جواهم غطا مال قوطية الببسي ولان وكعت بقوه حسيتها دخلت بركبتي احسها.
فتحت نسرين الباب وظلت تحجي وعمه حميده ظلت تصيح: منو هالخبيثه منو هالمتستحي اللي سوت هيج؟
محد حجه خالته وبناتها ولاجنهم ولاعبروني وحتى امه حسيتها ماكو اي رد فعل استغربت منها..
اصابعي عبالك دايستهم سياره كلهم دم ومااحس بيهم وركبتي مشكوكه من غطا البيبسي وحسيت دخت من شفت الدم.
عمته: يمه شبيج دختي؟ بس لا صار بيج شي تأذيتي اعرف بيج حسبي الله ونعم الوكيل باللي سوتها الله لايوفقها لادنيا ولا اخره.
نسرين: اسراء من جنت اصورج شفتها وراج بس متوقعت هيج راح تسوي والله حقيرة.
اني ظل جسمي يرجف لان انخفض ضغطي ومتت من المستحه والفشله والوجع.
لبستني عمه حميده عبايتي وخابرت على عبدالله يودينه للبيت..
اني بقيت مصدومه برد فعل امه ولاعبالك اني زوجة ابنها ولاعبالك حامل ولاعبالك هي نفسها حتى مقبلت ترجع ويانه للبيت واني موجوعه.
صعدنه بالسياره ظلت عمه حميده تحجي لعبدالله واني ابجي وبديت احس بالالم.
عبدالله: خويه اني اسف اعتذر وامسحيها بوجهي اني اخوج واني اخذلج حقج.
ايدي ورمت اصابعي زرك واللحم كل مشيول والدم لطخ ملابسي والفستان انشك من الركبه وحسيت بشي حار انعصر كلبي عرفته بدون مااشوفه دخلنه للبيت اني راسا دخلت للحمام حتى اتأكد وفعلا طلع ظني بمحله راسا صحت على عمه حميده هي كاعده تشتكي لعبدالله.
اجت ركض للحمام كالت: هاا شبيج لتكولين؟.
هزيت راسي اي وبجيت.
هي طلعت راحت لعبدالله حجت وياه ورجعت كلتلي: غسلي غيري ملابسج خل نروح للمستشفى.
صعدت مااكدر انزع ولا البس ايدي حالتها حاله صحت عليها صعدت خطيه تبجي هي نزعتني ولبستني وغسلتلي ولفت الحجاب على راسي ولفت ايدي بشاش لحد منوصل للمستشفى.
رحنه للمستشفى كالوا اول شي اشعه سوي اشعه طلع عندي كسر بواحد من الاصابع والثاني خيطوه ( ٣ ) خياطات وركبتي خياطين.
وراها رحنه سويت سونار وطلعت النتيجه مثل مااني حسيت خلص نزل الحمل.
انطوني علاج وضربوني ابره ورجعت للبيت نمت محسيت بشي بعد منا للليل يالله كعدت كعدتني عمه حميده خطيه مسويتلي عشا بس مكدرت اكل مااشتهي.
دك تليفوني ماجد ماجاوبت وكلت لعمه حميده: اذا دك عليج كوليله نايمه لتحجيله اي شي.
هو فعلا من شافني مارديت عليه اتصل بيها هي كلتله: اي رجعنه من الخطبة قبل شويه وذهب نامت.
اني رجعت نمت كعدت الصبح متأخر حتى مرحت للكليه من الليل كلت لبابا تعبانه مااروح ماحجيت لاهلي شي.
الصبح كعدت لكيت ماجد متصل ( 3 ) مرات عباله بالدوام نزلت جوه لكيت عمه حميده تحجي وياه.
اشرتلها اني بالدوام خاف يسأل عني وناسيه تليفوني بالبيت.
وره ساعتين تقريبا رجع دك على تليفوني استغربت مو عمه كلتله بالدوام وناسيه تليفونها وبعد وكت على موعد رجوعي للبيت اذا مداومه.
دك على عمته شالته اني نايمه على جربايتها جوه واحس جسمي كله نحلان من الدوه ركبتي تأذيني واصابعي وبطني مغص قوي.
اسمعها تكوله: مابيها شي والله لتخاف مابيها شي منو كلك انت منو كلك؟
معناها عرف باللي صار لذلك اتصل اكيد عبدالله خابره وحجاله عباله يدري.
انطتني التليفون اني مكدرت احجي اختنكت بدموعي حجت هي وياه وسدته ورجعت خليت راسي بحضنها وظلت تقره علي لحدما نمت.
المغرب اني نايمه سمعت صوت بالهول اني بغرفة عمه حميده نايمه كعدت ردت اكوم افتح الباب سمعت صوت عبدالله ومرته رجعت لان ملابسه حجاب.
همه هم مطولوا عمه حميده كلتلهم نايمه كعدوا شويه وبعدين راحوا.
وره شويه سمعت صوت عمه تصيح الظاهر على العلويه ام ماجد يمكن اجت جابوها وياهم من اجوا.
عمه حميده: بنات اختج متنطين بيهم لو شيسوون بس حرام عليج انت مره مريضه وهاي البنيه امانه ومرت ابنج تره كافي قهرة ابنج من يجي هسه ويسمع باللي صار بمرته ويعرف ابنه راح من وراهم.
وره شويه سمعت صوت بس مكمت بقيت نايمه بس جنه صوت ماجد معقوله رجع؟
نعسااانه مابيه حيل اكوم واشوف منو ظليت متلفلفه ونايمه.
انفتح الباب باوعت ماجد!
كعدت وردت اكوم بس هو راسا اجه حضني اني جنت مااريد ابجي كدامه حتى لينقهر ويضوج بس من شفته مكدرت اسيطر على نفسي بجيت وهو حاضني
كلي: لتبجين اني اعلمهم.
طلع كمت وراه اصيح ملحكت عليه رجلي تأذيني عمه حميده راحت وراه ورجعت كالت: طلع اكيد راحلهم لبيت عمه؟
اتصلت عليه ميرد اتصلت عمه حميده عليه هم ميرد وره تقريبا ساعه رجع امه تعشت ونامت ولاعبالك اكو شي وضعها مخبلني بس مااكدر احجي ومالي خلك.
رجع عيونه براسه وظل يصيح ويغلط لحدما تعب حسيته.
ذهب: وين دواك؟
ماجاوبني، رحت اني دورت بسترته وطلعته انطيته الدوه شربه.
اني ساكته وكل جسمي يوجعني راسي من البجي وركبي وايدي حتى كلبي يوجعني على كدما مقهورة.
باوعلي هو كلي: اني لحيت عليج ترحين.
ذهب: الحمدلله على كل حال.
ماجد: لو مرايحه جان مصار هيجي.
ذهب: كافي عفيه كلبي يوجعني مااكدر اتحمل هالحجي.
كام هو كعد يمي باس ايدي اني بجيت وعمته بجت.
بعدين كالت: كافي بجي مو زين بعدكم زغار كدامكم عمر، روحوا صعدوا ارتاحوا والبنات هسه يجيبولكم العشا للغرفه.
صعدنه اتمددت عالجربايه كعد يمي باوع لايدي وباسها.
ماجد: وين بعد انجرحتي برجلج وين؟
رفعت البيجامه هو راسا باس رجلي بمكان الجرح اني بجيت ودفعته.
ذهب: لخاطر الله لتسوي هيج ماجد فدوه شلعت كلبي.
بعدين خله ايده على بطني دنك باس بطني اني حضنته كتله: اذا تحبني صدك كافي لان والله اموت مااتحمل كلبي يوجعني لتسوي هيج وتأذيني مااتحمل اشوفك هيج..
مرت يومين الجو كئيب.
اجوا بيت عمه ابو علي كلهم سامعين باللي صار. السبت مارحت لاهلي هم اجوا وشافوني اتفاجأوا وماما ظلت تبجي كل شوية وكللت: عين ماصلت على النبي. انحسدتي.
ماردت احرج ماجد كدامهم كتلهم وكعت من الدرج.
السبت العصر اجو عبدالله وزوجته زينب.
كعدت يمي بالغرفه خطيه وانصدمت من شافتني كلتلي: متوقعت هيج كلي عبدالله اتفاجأت لان اني محضرت الحفله اني هم مثلج هم مقصرت ويايه اسراء وخواتها لدرجة وصل الموضوع مره للطلاق بسببهم بس برد كلبي ماجد من اجه وظل يصيح هن كوليتهن لبدن حتى خالتي والبارحه عبدالله لعب طيح حظهم بس هم صلفات عيني وميتركوج صدكي سأليني اني.
ذهب: اني اتحمل بس ماجد ميتحمل هو بدون شي كلبه تعبان شلون يسوون هيج مفكروا يتأذه مااستحوا منه من امه من اي واحد؟
زينب: انت حساسه عيني شنو يتأذه هي متستحي مو اكلج صلفه ليش هو ماجد ميعرفها بعدين ليش يتحسون من امه هي امه تكدر تفتح حلكها وياهن؟
ذهب: انت لو شايفه البارحه حالته جان مكلتي هيج اني الكلبي صاحي ظل يوجعني عليه مااتوقعته لهدرجة راح ينقهر. اني ماجنت اريد اكوله عاللي صار هيج الله يسامحه عبدالله.
زينب: لا مو عبدالله كله اني من سمعت صوته عدنه عبالي انت كايلتله.
ذهب: لاشلون اكوله وادري بي مراح يتحمل هيج خبر انت تدرين اني جنت حامل؟
زينب: لااا محد كلي لتكولين..
هزيت راسي اي.
زينب: حبيبتي الله يعوض عليكم ان شاءالله لتضوجين.
راحوا زينب وعبدالله حسيتهم محرجين رغم هم مالهم ذنب.
ماجد: حبيبي شلونج؟
ذهب: الحمدلله.
ماجد: عندج الم.
ذهب: شويه.
كعد يمي خله راسي بحضنه كلي: من كلي ضياء اتخبلت يمكن بساعتها لو هالحقيره يمي جان طلعت روحها..
هذا شي بسيط من تصرفاتهم وياي حتى تعرفين ليش انفصلنه.
ذهب: مردتك تعرف وانت هناك لان اعرف شكد جنت فرحان بالحمل وادري راح تضوج من تعرف باللي صار.
ماجد: حتى لو مو حامل راح اضوج مو بس لان حامل انت زوجتي مااقبل احد يتعمد يهينج او يأذيج والطفل جنت فرحان بي لان راح يقربنه اكثر ويصير اكو شي اكبر واقوى يربطنه سوه.
ذهب: وعسى ان تحبوا شيئا وهو شر لكم.
ماجد: ونعم بالله، الله يعوض علينه ان شاءالله اصلا انت طفلتي وبزونتي وحبيبتي ومرتي وكل شي.
طاحت دموعي هو ضاج.
ماجد: هذا اليضوجني اكثر البجي ادري بيج مقهوره بس انت بعدج زغيره راح تحملين مره ومرتين اني اصلا اريد( 6 ) اولاد و( ٤ ) بنات.
ضحكت كتله: شدعوه بزونه صدك طلعت.
ماجد: انت بزونتي الاليفه بس بزونه بجايه.
ذهب: بس اني مو عالحمل مقهوره اني مقهوره على نفسي حسيت نفسي هينه وعالفشله والاحراج كدام الناس الجانت موجوده كلها ضلت تباوع.
ماجد: انت مسويتي شي حتى تستحين لو تنقهرين همه اللي غلطوا وهمه اللي فشلوا نفسهم كدام الناس لان تره محد قابل عاللي صار وشلون هينه مو رحت طيحتلج حظها.
كعدت وبسته وحضنته.
ماجد: خلص انسي تره وحتى عبدالله ممقصر ضاربها وعمي خطيه خابرني يتعذر ويريد يجي يعتذر منج وعمي ابو علي تعرفينه وتعرفين لسانه ممقصر بيها..
يالله هسه خل انطيج دواج ونامي باجر عندج دوام ولازم ترتاحين.
ذهب: صرت انت تنطيني دواي مو اني انطيك ههه؟
ماجد: لا بعد انت هسه مريضه هسه دوري شويه ادلعج واهتم بيج واقشمرج.
ذهب: هههه ليش اني جنت اقشمرك؟
ماجد: انت جنت معذبتني وشالعه كلبي.
ذهب: هههههه اسم على كلبك.
ماجد: هاي شوفي شلون تعذبيني هههه.
ذهب: ماجد؟
ماجد: عيونه وكلبه.
ذهب: مو تعوفني بيوم من الايان تره اموت.
ضحك وحضني كال: لتخافين البزون يحب خناكه ههههه، اكو واحد يعوف روحه.
بس بعد بطلت مراح انطيج دواج مدام المرض يخليج هيج تحجين حجي ابقي بلا دوه احسن هههه.
ذهب: حرام عليك ليش هيج تدري ضميري يظل يأنبني هسه واظل افكر اني ظالمتك.
ضحك حيل كال: تدرين ليش احبج؟ لان بسرعه تخافين وبسرعة تتأثرين وبسرعه تتقشمرين ههههه.
ذهب: الله يسامحك.
ماجد: يسامحني لتخافين لان محد يحبج مثلي.
انطاني الدوه ونمت والصبح كعدني للدوام.