رواية صبرا يا قلبي الجزء الأول للكاتبة روز الفياض الفصل الثالث والعشرون
وصلني ماجد للستيج وكعدني وكلي: اذا تعبتي لو حسيتي بشي اتصلي ولتطلعين ابقي بمكانج.
وراح وصى عليه فطوم والبنات ورئيس القسم ماخله احد فضحني.
وطبعا بيومها صرت حديث الساعه كل شويه احد يجي يسألني شنو صاير شبيج واكولهم: وكعت من الدرج.
الشله انصدموا بوضعي خطيه حجيتلهم اللي صار كتلهم: انتو خواتي لذلك حجيتلكم بس هالحجي بيني وبينكم لان ماعندي احد احجيله محجيت لماما وابويه علمود ليخافون ويكبر الموضوع وماجد ينحرج.
فاطمه: ميخالف حبيبي لتضوجين بعدكم زغار الله يرزقكم دزرن جهال ان شاءالله.
خلصت امتحانات وخلص الدوام وكعدت انتظر النتائج الوضع جان غريب بين ام ماجد وبيني ابد مرجعت لطبيعتها ويايه ومااعرف شبيها.
متحاول تتواصل وياي حتى من احاجيها مترد علي ولا تعبرني ومن تشوفني ادرس تهز ايدها واذا انطيها دوامها متقبل تاخذه واذا تأخر ماجد متقبل اني اوكلها.
الموضوع جان مضوجني بس ماادري شسوي ولا اعرف سبب تغيرها ولا اكدر احجي لماجد خاف يكول تشتكي من امي.
هي بدت جلسات علاج طبيعي بس مو منتظمه بسبب شغل ماجد فراح اشترالها الجهاز وكلي: انتي سويلها بالبيت اذا اني مموجود.
بس مرتين سويتلها بعدين ظلت متقبل. من اجه كتله: حبيبي تره خاله متقبل اسويلها اي شي لاتاخذ مني دوه ولاتاكل من ايدي ولا حتى العلاج الطبيعي تقبل بي.
استغرب هو كلي: ليش شبيها شصاير؟
ذهب: والله مااعرف من يوم خطبة رنا هاي حالتها هيج اتغيرت انت احجي وياها يجوز اني مضوجتها بدون ماانتبه لان بدون العلاج تره ميتحسن وضعها اني مردت احجي واضوجك بس الوضع بعد مو مال اسكت اكثر لان هي عدها علاج لازم تنتظم عليه.
ماجد: ان شاءالله.
نزل ماجد حجه وياها عالعلاج الطبيعي وصعد ضايج بس اني ماسألته ماردت احرجه.
ثاني يوم سويتلها جلسه واستمرينه على هالوضع تقريبا شهر الله هاديها وبدت تتحسن ايدها وحتى حجيها بده يتحسن حجيها صار واضح ومفهوم وماجد فرحان حيل واني فرحانه علموده.
بعدين فجأه قررت تروح لبيت اختها واتصلت عليهم اجوا اخذوها وماجد جان بالشغل همه اتصلوا بي وبلغوه رجع ماجد وجان مستغرب مثلي موضوع روحت امه لبيت خالته.
هالفتره اللي جانت بيها خالتي عد بيت اختها ماجد يوميه يتصل بيها بس ميقبل يروح يشوفها مايريد يشوف خالته وبناتها.
جنه طالعين اتوسلت بماجد نفتر شويه بالسياره وافق بس كلي: عالسريع منطول شويه ونرجع وبالسياره مننزل لان تعبان.
عالاتفاق بقينه بالسياره بعدين شغل الاغاني كلي: من زماان مهديتلج اغنيه هالمره راح اهديلج هالاغنيه (اول حب لحسام الرسام).
سمعنه الاغنيه وراها كال: ها نرجع للبيت؟
ذهب: لا نروح للمستشفى.
ماجد: ليش شكو؟
ذهب: ماكو بس ردت اسوي تحليل يعني في حال اكو شي.
ماجد: يعني قصدج تحليل حمل؟
استحيت هزيت راسي اي كال: كولي والله؟
ذهب: شنو كولي والله؟ اني شمدريني اكو لو لا اني اريد اتأكد لان تأخرت.
رحنه للمستشفى وسوينه تحليل دم وكعدنه ننتظر وطلعت النتيجه حامل.
ماجد: هالمره ابد مااريدج تتحركين ولاتنزلين جوه اذا اني مموجود لاطبخ ولاغيره حتى سباحه ماكو الا من ارجع. زين؟
ذهب: ههههه يعني ابقى وحدي مثل الطنطل فوك وجماله ابقى بدون سباحه ليش شدخل السباحه؟
ماجد: خاف تدوخين وانت وحدج خاف تزلكين خاف يصير اي شي مااريد حركة ابد.
ذهب: ههههه شرايك تربطني عالجربايه حتى مااتحرك.
ماجد: ياريت اكدر بس شسوي كلبي مينطيني.
ذهب: هههههه. لهدرجه هالموضوع مهم بالنسبه الك؟
ماجد: اكيد هاي سنة الحياة بعدين بيتنه يحتاج شويه ازعاج ههه.
ذهب: الله كريم..
زين حبيبي وخالتي مو لازم تروح تجيبها تره صار شهر وانت ولامره رحتلها ميجوز تره هاذي امك مو اني اعلمك ماجد انت جنت متاكل اذا متوكلها قبلك عالاقل فرحها بخبر الحمل هي امك اكيد تفرحلك.
ماجد: زين شسوي اذا هي متقبل ترجع واني مااريد اروح واشوف اختها وبنات اختها هناك.
ذهب: ميخالف حبيبي اتحمل شويه اضغط على نفسك اني مااريدك باجر اذا الله اخذ امانته منها بعد عمر طويل ان شاءالله تكون انت نادم على شي او قصور تجاهها تره انت باجر حتكون اب واني ام اذا الله كاتبلنه تقبل هيج نطلع واولادنه ميتعبون نفسهم علمودنه بعدين اعتبر نفسك رايح لبيت عمك مو خالتك.
اتنهد هو وسكت وبعدين كال: كلامج صحيح.
الله كريم نشوف يعني قابل اني مااريدها لو اريد اخلص منها بس هي الله يسلمها ماادري شبيها قالبه حتى علي يعني اني ملاحظها وياج لتظنين مامنتبه بس مااعرف شنو تريد شنو السبب وشنو الحل.
ذهب: ميخالف حبيبي اصبر عليها الدنيا دين وهي دنيتك واخرتك الله ميوفقك بحياتك اذا هي مراضيه عليك انت سوي العليك.
ماجد: الله كريم.
وصلنه للبيت شفنه سيارة عبدالله بالكراج دخلنه لكينه عم ماجد ابو عبدالله وعبدالله وزوجته وجايبين العلويه امه وياهم.
سلمنه ودخلنه العلويه ماردت اني رحت سلمت على زينب بوستها لان كاعده بالبدايه ورحت اريد ابوس امه بس دنكت ابوسها دفعتني دفعه بكل قوتها وكعتني عالطاوله حسيت ظهري انكسر بالحافه مال الطاوله حسيتها زرفت ظهري.
كلهم كاموا وصاحوا: الله، الله، ليش هيجي.؟
حسيتهم انصدموا مثلي!
وظلوا يحجون اني كمت كومتني زينب وماجد خطيه اتحنط بمكانه خاف ظل واكف حتى وره ماكعدت يم زينب بقى واكف ويباوعلي بس محجه شي.
بعدين كعد وظل مدنك بس عمه ظل يحجي: ليش هيجي علويه منقبل تره البنيه بتنه منقبل هيج شغلات تصير ببيوتنه انت علويه وحجيه حاجه بيت الله ميجوز هيج تتصرفين اي اشكال بينكم نحله بهدوء احنه المن جايين لعد.
ماجد: شنو الاشكال ماكو اشكال؟ صاير شي واني مااعرف؟
عبدالله: لا ماصاير شي ان شاءالله بس العلويه زعلانه شويه.
ماجد: زعلانه من منو وعلى شنو غير نعرف؟
ابو عبدالله: الام ماتزعل على اولادها بس يعني مرات تتضايق ذهب بتنه ويجوز مضوجتها بدون متقصد وتنتبه.
اني ساكته متفاجأه اسمي دخل بالموضوع الله يستر ومقهوره ميته من القهر على تصرفها وياي فشلتني ودفعتني وكسرت ظهري.
زينب خطيه تشوف دموعي كل شويه تبوسني اني لازمه ظهري تأذيت حيل.
ماجد: يالله بالله اني رجال اغلب وقتي بالدوام اذا صاير شي واني ماادري كولي خل اعرف حتى احاسبها انت امي اني مااقبل احد يضوجج او يتصرف وياج تصرف مو لائق.
هي ساكته متحجي بس مدنكه وهمه يكلولها احجي مادام ابنج موجود والبنيه كاعده حتى اذا غلطانه احنه هم مانرضى.
ماجد: احجي واذا ذهب غلطانه وياج بحرف متلوم الا نفسها هسه كدامج تتحاسب.
حجت بس مسمعتها شنو كالت.
ابو عبدالله: اي شنو الاسباب مترديها؟
ماجد: مترديها ليش؟
متوكلج اذا اني مشغول؟
متنطيج دواج؟
متقرالج قران؟
متسويلج علاج طبيعي؟
متكعد يمج تسولف وياج وتونسج بدل مكاعده وحدج؟
شنو الشي اللي يخليج مترديها؟
مطوله لسانها عليج؟
اكصه.
سمعتها كلتلهم مااحبها.
اتعجبت شبيها هاي المره انكلبت واتغيرت هيج اكيد هاي من اختها وبنات اختها بس مامعقوله حتى ويه ابنها.
ماجد: هسه متحبيها مو جنتي تجلبين بيها تكعد يمج لو تنام يمج؟ مو جنتي تكولين بنيه مؤدبه ومتربيه.
ابو عبدالله: يالله عمي ميخالف امك.
ماجد: مكايل شي ياعمي امي على عيني وعلى راسي انتو شفتوا فديوم اي قصور مني تجاهها؟
يعني هسه اجت تسلم عليها ودفعتها ووكعتها وهي حامل تونه اجينه من المستشفى الله يقبل؟
اكو داعي لهيج تصرف؟
يعني لو هسه يصير شي هي ترتاح من انقهر اني؟
هذا ثاني حمل واذا صار شي هي المسؤوله يعني المره الفاتت هي كالت لاهلها وكعت من الدرج حتى لتحرجنه هالمره شنو اكللهم؟
حجوا عليها ومقبلوا كلهم اني ساكته ماحجيت ولا كلمه اخر شي عمه ابوعبدالله كال: عمي انت بتنه الله شاهد نحبج ونعزج ونحترمج انت مربايه ومؤدبه ماتطلع منج العيبه خادمتها وحاشمتها وحاشمتنه احنه هم برغم كل شي صار لخاطر زوجج احنه منجازيج الله يجازيج بنيتي ويوفقج احسبيها علينه واعتبريها امج.
اني ظليت ساكته بس حسيت بمغص خفيف خفت بعدين راح ارتاحيت.
ماجد: مو لان زوجتي والله بس توه واحنه بالطريق تكولي روح جيبها ميصير دنيتك واخرتك الله مايوفقك اذا مترضه عليك واتخيل نفسك بمكانها.
هي ماعجبها الحجي وانحرجت لان كلهم وكفوا ضدها اشرت لساره توديها لغرفتها وراحت همه اترخصوا وكلوا لماجد طول بالك وياها وسلموا علينه وراحوا.
طلع ماجد وياهم للباب اني صعدت فوك للغرفه ودخلت للحمام حتى اشوف اخاف اكو شي بس ماكو ارتاحيت وكلت خل اتمدد بلكي ميصير شي مو زين من اللي ابالي.
ماجد اتأخر جوه اكيد مر على امه حجه وياها اني دموعي مابطلت ليش ياربي هيج يسوون وياي شسويتلهم.
اجه ماجد حضني كلي: حبيبي تأذيتي مو؟ خوماصار شي؟
هزيت راسي لا باسني كلي: سامحيني احسبيها علي اني مره جبيره منكدر نسويلها شي.
ظلت دموعي تصب هو اتمدد يمي وحضني كلي: دموعج توجع كلبي وتره موزين البجي عالبيبي مااريد ابني يطلع مثلج بجاي ابو دميعه.
بس مااكدر اسكت ميته من القهر وحيل مغثوثه.
ماجد: خلص حبيبي لتبجين لخاطري مالي خاطر عندج؟ نامي وارتاحي بس خل اشوف ظهرج اول وين انضربتي.
اشرتله عالمكان هو رفع التيشيرت شاف المكان بس ماحجه شي بس خل ايده المكان وايده حاره فكتله: لتخلي ايدك تأذيني..
اتمنيت انام بس مغمضت عيني من التفكير والخوف وهو نفس الشي بس ماحجه شي بس يتكلب.
الفجر كمنه صلينه ونمنه هو الصبح كعد راح للشركه وماقبل انزل من الغرفه وكال ماراح يتأخر اني رجعت نمت ماحسيت الا من رجع كعدني.
ماجد: ها حبيبي شلونج اليوم؟
ذهب: الحمدلله.
ماجد: خو ماكو شي الالام او شي؟
ذهب: لا ماكو الحمدلله.
ماجد: الحمدلله..
يالله كومي صلي على مااغدي امي وارجع نتغده سوه لتنزلين اني اصعد هنا نتغدا.
ذهب: ان شاءالله.
اتغدينه وكمت اغسل اتذكرت ظهري يأذيني حيل رفعت ملابسي اشوفه بالمرايه صاير المكان كله ازرك من هيج ماحجه شي من شاف ظهري البارحه وسكت.
خلص هو اكل غسل وكال: راح انام شويه منمت البارحه.
ذهب: نام اني اريد احجي ويه البنات واسألهم عن النتائج.
كعدت حجيت ويه فطوم وسألتها عن النتائج بعدين سألتني عن الاخبار كتلها: مو زينه.
فاطمه: ليش شصار؟
ذهب: اني حامل.
فاطمه: عابت ليش مو زين شنو الموزين بالموضوع متردين طفل؟
ذهب: لا مو هيج قصدي البارحه وكعت وتأذه ظهري.
فاطمه: ايييي؟ وشصار لتكولين صار شي؟
ذهب: لا لحد الان الحمدلله ماكو شي بس عندي مغص خفيف يجي ويروح وخايفه.
فاطمه: لتخافين حبي ان شاءالله ماكو شي.
ذهب: اذا هالمره هالحمل ماتم ماجد حيضوج اكثر من الاول متتصورين شكد فرحان.
فاطمه: ان شاءالله ماكو شي لتفكرين بس شلون وكعتي غير تنتبهين.
حجيتها اللي صار اتخبلت فطوم اتعجبت.
فاطمه: ولج مادام الامور وصلت لهيج مرحله ديري بالج تره ذولي ماراح يخلوج ترتاحين كل مره حيسوولج سالفه انت اتحذري لان مادام امه وكفت وياهم راح يكدرون يأذوج ديري بالج ليقلبوه عليج يتبلون عليج كدامه.
ذهب: الله كريم شبيدي اسويه الله شاهد على اللي بكلبي تجاهم مفوضه امري بيهم لله سبحانه وتعالى.
فاطمه: ونعم بالله بس لاتظلين بهالفهاره.
ذهب: قابل شسوي انزل اكتل امه لو الزم التليفون واغلط على خالته.
حسيت بالالم بده يقوه سديت التليفون ويه فطوم ورحت اتمددت يم ماجد وحضنته بس ماحجيت شي ماردت اخوفه.
العصر كعد هو سبح ولبس وكال: اني رايح لبيت عمي ابو علي اشوف امي حميده واجيبها ويايه حتى عالاقل تونسج وتهتم بيج تسولف وياج.
ذهب: الله وياك. سلم عليهم.
ماجد: الله يسلمج.