رواية صبرا يا قلبي الجزء الأول للكاتبة روز الفياض الفصل الثامن والثلاثون
ذهب: نجلاء الموت عندي ارحم واهون من اللي سمعته تعرفين شنو؟.
نجلاء: اسم الله عليج حبيبتي ان شاءالله هي الحقيره هسه عرفتي ليش منحبها ليش دايما اكولج حقيره مو مثل متشوفيها الكلام اللي راح اكوله الج اول مره تسمعيه ومحد بالعائله يعرفه بس اني وماجد وعمتي حميده وابوي الله يرحمه.
باوعتلها اتنهدت.
نجلاء: تدرين ليش منحبها بس امي تحبها؟ لان متعرف شي من مصايبها محجينالها شي بوقتها لان تتخبل وتكبر السالفه. لان اذا عرفت بوقتها مستحيل تسكت ومردنه رائد يعرف وتصير فضحيه. ظلينه مثل بلاع الموس لانكدر نحجي ولانكدر نسكت.
رجعت ليوره انتجيت لان كلبي يوجعني..
نجلاء: جانت متزوجه رائد وعينها على ماجد..
اني انصعقت كعدت عدل فتحت حلكي وعيوني من إلى سمعته.
ذهب: هاااا؟، شنو؟
نجلاء: اي والله شبيج جانت ميته على ماجد طايحت الحظ اني جنت توني متزوجه واجي عدهم خطار وجان ماجد ميكعد بالبيت بس يجي يسبح ويبدل ويطلع وبالليل يرجع ينام اني استغبرت ماجد جان توه يشتغل ويه الحجي الله يرحمه بس شغل خفيف لان يدرس فوين يروح من الصبح لليل.
ذهب: اوكفي، اوكفي، كوميني اروح للحمام مااكدر بعد وانتظري تكمليلي مو ترحين.
نجلاء: يالله كومي انتظرج لاتخافين.
دخلت للحمام وغسلت وطلعت رجعت اتمددت عالجربايه.
ذهب: اي؟ طلع ديواعدها؟
نجلاء: لج لاااااا ههههه نزول عليج شنو يواعدها لايصير كلبج اسود تجاهه انت تعرفيه مو مال هيج سوالف ويه الغريبات واولهم انت شلون وهاي الحقيره جانت زوجة اخوه عرضه يعني.
ذهب: لعد شنو وين جان يروح؟ ويغط ويامن؟ عدمن؟.
نجلاء: على كيفج اصبري اكملج وحده وحده.
ذهب: اي مو كطعتي كلبي مااتحمل بعد..
نجلاء: جان يبقى يم ضياء لو يروح عد بيت عمي ابو علي يم عمتي حميده ويرجع بالليل.
وبيوم من الايام بالليل اني بايته عدهم بغرفتي ابيتنه ذاك القديم غرفتي يم غرفة ماجد طلعت اريد اروح للحمام شفتها فتحت باب غرفة ماجد على كيف ودخلت وسدت الباب وراها بس مطبكته.
ذهب: يمه نجلاء شنو شفتي شصار؟ كلبي حيوكف من الخوف.
نجلاء: شنو فلم رعب هو؟
ذهب: اندري عنج تحجين عبالك قصه مرعبه واذا مرعبه مااريد اعرفها.
نجلاء: لا اني رحت على كيف ووكفت يم الباب اباوع ماجد نايم وهالولد من يومه ينام بدون قميص وهي واكفه فوك راسه تباوعله اني انصدمت راسأ فتحت الباب ودخلت هي خافت وارتبكت وطلعت من الغرفه اني دخلت كعدت ماجد هو اتفاجأ كلي شكو؟ شبيج؟ شلون دخلتي اني مو قافل الباب؟
ذهب: اي خوش قافل الباب.
نجلاء: هههه اصبري شويه، كتله لا مو مقفول الباب جان مفتوح كال يجوز نسيت اقفله كتله ليش تقفله هو من عدنه بالبيت حتى تقفله هو بس احنه وشيماء مرت اخوك باوعلي وسكت كتله متريد تكلي شي اني اختك الوحيده؟ اني ملاحظتك مو على بعضك اكو شي صاير شي؟
هو اتنهد واتحسر وميعرف شلون يبدي يحجي رحت اني قفلت الباب كتله شبيها شيماء وياك؟ هو اتفاجأ كلي شبيها شسوت؟ كتله انت كولي شديصير؟ كال اللي ديصير مينحجي. كتله شلون؟ كال مااكدر ارجع للبيت ارتاح من وراها كل شويه وناطتلي بالغرفه لاتكول مصلخ لا نايم لا عيب لا مدري شنو واخوج مطفي ينام ميدري بمرته الليل كل تفتر يم باب غرفتي ظليت اقفل باب الغرفه هاي مو صاحيه متستحي تروح تسويلي مصيبه اني واخوي واني لابيها ولاعليها..
كتله توها جانت يمك بالغرفه ومن شافتني راحت ولت لغرفتها انت ليش محجيت للحجي خلي يشوفلها حل بهالمصيبه؟ كلي شحجيي وشكول شلون احجي هيج كتله خلص اني احلها.
وفعلا حجينه لعمتي حميده وهي حجت ويه الحجي الله يرحمه واتخبل بوقتها كال متبقى ابيتي بعد راسأ اجرلهم بيت يم اهلها وكللهم انتقلوا هناك احسنلكم.
وراها بفتره صار الحادث واتوفى رائد الله يرحمه وبعد طلعت من حياتنه ومن اتزوجتوا رجعت واكيد مرجعت بدون سبب لان اشمعنه هسه وين جانت قبل.
ذهب: كولي والله هالحجي صدك؟
نجلاء: افه عليج اتجذبيني؟
ذهب: لا بس ماادري شصدك بعد كل قصه ابله من إلى قبلها عقلي ميستوعب بعد.
نجلاء: حقج بس والله العظيم مجذبت بحرف وهذا الموضوع تره محد يعرف بي حتى فراس ميعرف لخاطر رائد الله يرحمه مهما كان جانت زوجته بيوم من الايام وشايله اسمه.
ذهب: آآآخ ياكلبي مااتحمل بعد صدمات فدوه اذا اكو بعد شي كولي تره حرام عليكم اللي ابطني شبعوا قهر من قهري.
بجيت هي حضنتني..
نجلاء: اي ليش تبجين هاي انت ظلمتيه هالمره شلون تشكين بي هو يبوس التراب اللي تمشين عليه؟
ذهب: بعد. بعد. اكو شي غريب وناقص ماادري شنو.
صعدت ياسمين كالت بابا اجه ويريد يصعد يشوفني كتلها خلي يصعد نجلاء راحت للغرفه الثانيه واني كعدت عدل ورتبت نفسي دخل بابا هو وماجد وصله ونزل اني بس شفت بابا بجيت.
حضني وباسني وبقى كاعد يمي وحاضني.
بابا: اشش كافي بابا لتبجين ميجوز البجي وانت حامل تتأذين وتأذين هالاطفال مالهم ذنب تره السالفه متسوه.
شهكت حيل بالبجي كتله: كلبي بابا كلبي احسه حيوكف احس انمرد كلبي من سمعته يحجي وياها.
بابا: هههه حبيبتي يابعد كلبي كلبج لاتبجين هيج اسم الله على كلبج السالفه كلها تمثيل بتمثيل واني اقترحتها من حجالي السيد من جنتي بالمستشفى.
باوعتله استغربت يعني جان يعرف باللي صار ومااجه اخذني ولا شافني.
بابا: اعرف بكل شي اني كل شي حاجيلي ماجد اتصل بيه من جنتي بالمستشفى واجيت وحجالي كل اللي صار بالتفصيل بس مكدرت ادخل اشوفج لان لو داخل وشايفج مراح اخليج كلبي اكيد مينطيني اعوفج واني من حجالي ماجد صحيح انقهرت وعاتبته وصرت عصبي عليه وكتله مو بنتي اللي تشك بيها بنتي انت خطبتها لان مسمعت عنها الا كل خير هو الولد اعتذر وجان متندم حيل ومقهور ومتأذي ويبجي مردت ازيد عليه وانطيته العذر يمكن لو واحد بمكانه كان راح يسوي هيج واكثر بعد بس جان لازم يسألج يستفهم مو كبل هيجي يسوي. وعمته هم العلوية اتدخلت واتعذرت واتوسلت حتى ابقيج يمهم وبعدين يصير خير.
استحيت من المره تتوسل بيه. ادري بيها تحبج ومداريتج مكدرت اكول لا.
واقترحت عليه اذا شاك باحد يحاول يعرف ليش هيج سوه وبالبدايه كال شاك بذاك الحيوان اللي خطبج قبله بس بعدين طلع الولد مسافر من يومه وماراجع وبعدين اكتشفنه هاي البنيه وره الموضوع ولحد الان ممتاكدين لان ماعترفت بس كل الشكوك تكول هي لان دتلح عليه طلكها وشعندك مجلب بيها وعوفها ومن هالحجي وهو ديماشيها يريد تطلع منها اي حجايه تدينها، زين باباتي؟
ماكو شي من اللي ابالج زوجج خوش ولد متلكين مثله لو ادري بي مو زين والله لو مو حامل ولو مو تحبينه مااخليج عنده بس ولد مؤدب وخلوق ومتدين ويحبج شنو نريد اكثر من هيج غلط بحقج واعتذر وهو حقه انت هسه بس سمعتي زعلتي واتمرضتي واتخبلتي مو؟
من البارحه لليوم لااكل لاشرب شلون هو يتحمل رجال غريب يكوله روح شوف مرتك ويامن تحجي بنص الليل ومنو يدزلها مسجات وحبيات؟
وامج تره متعرف بشي اني محجيتلها اي شي لا عن اللي صار قبل ولا هسه ادري بيها متتحمل كلب ام حتى اذا انت غلطانه مينطيها كلبها ولو هي جانت حاسه اكو شي كلبها مقبوض وضايجه ويوميه وكلتلي اخذني اشوفها لذلك كتلها سافروا واخذتها للزياره حتى تلتهي وترتاح.
حجه بابا هوايه شغلات اني محجيت شي بس ابجي بعدين بوسني ووصاني على صحتي وعلى احفاده على كولته وعلى ماجد وصاح على ماجد اجه..
بابا: سيد بعد مااوصيك على ذهوبه ولومتحتاج انت وصيه.
ماجد: بعيوني عمي لاتوصي حريص.
بابا: واني هم حجيت وياها وفهمتها كل شي وهي افتهمت وقدرت الموقف وكل شي صار واضح وانتهى الموضوع ان شاءالله.
ماجد: تعبناك عمي اجيت مناك لهنا وانت عندك دوام.
بابا: لا بابا لاتعب ولا شي وهي جان لازم تعرف حتى ينتهي كل شي ومنظل بقلق اكثر من هيج.
ماجد: بقت شغله وحده بعد البجي متبطل بجي مدري شنو هالدموع لو تانكي هم خلص من زمان.
بابا: هههههه لا هاي مالها حل من هي طفله على كل شي تبجي متتحمل حساسه على البزونه مره ظلت تبجي اسبوع لان سدت الباب بدون متنتبه واتعورت رجل البزونه هههههههه.
ماجد: هاي قويه مسامع بيها.
اني استحيت وحقدت على بابا فضحني واتذكرت سالفة البزونه ضحكت.
ذهب: متضحك تره البزونه هي عدها روح واني أذيتها وظلت اسبوع تعرج من رجلها لان تأذيها بسببي شتردون اسوي مثلا اضحك؟
بابا: هاي شوف ههههه البجي ماله علاج عدها وانت تتحمل بعد نتيجة اختيارك.
ماجد: هي ورطه بعد ههههههه.
بابا دنك باسني وراح وماجد طلع وياه.
دخلت نجلاء من الغرفه الثانيه.
نجلاء: يا يابه جنت لازمه نفسي كوه حتى لا اضحك ويسمعني ابوج لج شنو هاي انت حتى البزونه مخلصانه منج؟
ذهب: متضحك لهدرجه..
دخل ماجد يضحك نجلاء طلعت راح سد الباب وكعد يمي حضني درت وجهي.
ماجد: ليش هيجي تشلعين كلبي وتعذبيني والله حرام عليج ظلمتيني وكلبي يوجعني بسببج من البارحه حتى نوم منمت ولا علاجي شربته.
انقهرت وضميري أنبني وخفت لان ماشارب علاجه.
ماجد: ولخاطر الله بدون بجي قابل اني بزونه.
ضحكت.
ماجد: تره اني هسه الزعلان مو انت.
استحيت من نفسي كتله: أسفه، بس مو بيدي حسيت لو ميته ولا اسمعك تحجي وياها هيج كلبي لهسه يوجعني والله. اموت اذا صدك تطلع تحبها ماجد.
ماجد: شنو اني خلصت من كلبي طلعتي انت شنو بيت ابو كلب، بعدين شحبها اصلا مااطيقها اني نجلاء محجتلج عنها؟ واللي عنده بزون بجاي شيسوي بغيره بعد ههههه.
ذهب: اذا يوم حسيت نفسك متحبني مثل الاول او تحب وحده ثانيه كولي من الاول عفيه مااريد احس نفسي غبيه.
ماجد: انت ست البنات وست العاقلات مو غبيه حشاج بالعكس بس انت شويه بريئه وحساسه هواي عندج ثقه زايده بالناس تتصورين الناس كلهم مثلج وتنظريلهم كأنهم ملائكه ميغلطون فتنصدمين من اقل شي.