رواية صبرا يا قلبي الجزء الأول للكاتبة روز الفياض الفصل التاسع عشر
ماجد: اكو واحد يدك باب غرفته؟
ذهب: مو غرفته غرفتي.
ماجد: اي بالضبط غرفتج غرفة زوجتي يعني حلاله مرته ملكه.
ذهب: يالله هسه اطلع خليني البس.
ماجد: واذا مطلعت؟
ذهب: اهوو ماجد لتشلع كلبي.
اتدنه علي اني لزمت التيشيرت بكل قوتي عبالك روحي بي.
ماجد: هو منو شالع كلب منو؟
اني اتحنطت محجيت ولاكلمه.
ماجد: سكتي هسه خفتي؟ ههههه
زين احنه من زماان ممتقدمين خطوه جديده..
شرايج؟
يحجي بصوت هادئ صار كدامي اني مدنكه وخايفه بس مو منه خايفه من نفسي اخاف يسوي شي ويكون رد فعلي زفت واخرب كل شي.
احجي بكلبي اهدي. ابقي ساكته. اتحملي. لتسوين اي شي.
ماجد: حبيبي؟، ليش ساكته؟.
باوعيلي.
مااكدر اباوعله احس وجهي صار دم وصار حار اني واكفه وورايه الكنتور مفتوح مد ايده هو طبكه اني كمزت هو حضني.
ظليت اتنفس كوه وحسيت اصابعي اتشنجت من كدما لازمه التيشيرت بقوه..
غمضت حيل هو ضحك.
ماجد: هههه تغمضين تفتحين النتيجه وحده اليوم خطوه جديده
حسيت جسمي كله خدر حتى مااكدر اوكف عفت التيشيرت ولزمت بايده حتى لااوكع حتى ايدي احسها ترجف مااكدر اسيطر على نفسي كلي ارجف.
نزل على ركبتي اني شهكت ورجفت.
مااكدر احجي.
خلاني عالجربايه وحضني. جنت عبالك بغير عالم.
ماجد: حبيبي؟
دتسمعيني؟
اني فاتحه عيوني كوه اشوفه بس مااكدر احجي اتحنطت احس كوه اتنفس. حاولت بس اهز راسي وماادري هزيته لو لا.
ماجد: ذهب؟
حبيبي تسمعيني؟
حضني حيل وباس خدي وبده يتحسس وجهي بيده وايده دافيه حسيت بدفوا شويه غمضت.
ذهب: تيشيرتي؟
ماجد: متحتاجيه.
ذهبماجد.
ماجد: عيونه وكلبه.
ذهب: جسمي يرجف.
ماجد: اششش اني يمج لتخافين وانت بحضني.
حسيت شفايفي تأذيني بس مااكدر احجي او اعترض بس لبدت بحضنه لان مااكدر اسيطر عالرجفه إلى بجسمي حسيت بايده على وجهي وبده يوعيني.
ماجد: حبيبي؟ حياتي باوعيلي، حبيبي ذهب؟
باوعيلي. انتبهيلي فتحي عيونج.
فتحت عيوني هو وجهه بوجهي وانفاسه حاره بلعت ريكي اريد احجي.
ماجد: حبيبي بردانه؟
هزيت راسي لا
ماجد: زين احجي كولي اي شي؟
حاولت احجي بس مااكدر ظليت ساكته بعدين فجأه لا اراديا ولا بقصدي ولا على بالي كلت: اسراء..
هو استغرب. واني هم استغربت ماادري شجاب اسمها على لساني.
ماجد: شبيها شسوت؟
هزيت راسي ماكو شي. كعد هو وسحبني بحضنه باس راسي اني دفنت وجهي بحضنه ولميت ايديه على صدري.
هو دنك اخذ تيشيرتي ولبسنياه ورجع حضني.
ذهب: ماجد؟
هو انتبه باوعلي.
ماجد: اممم؟
ذهب: خالتي؟
ماجد: خالتج نامت وراحت قبل لااصعد وياسمين وساره هم ناموا وخلونه بدون عشا بس اني اخذت حصتي وغمزلي.
ذهب: بس اني جوعانه.
ماجد: بسيطه.
ذهب: لتباوعلي هيج اقصد جوعانه صدك مو اللي ابالك.
ماجد: ههههه اوكي يالله كافي خل اكوم ابدل ونتعشى.
ذهب: اوك.
ماجد: مينطيني كلبي اكوم وانت بحضني وهيج مستسلمة ولو القميص يمكن اتشكك ههههه لتخافين تره مااطير بس عوفيه ههههه.
انتبهت اني مجلبه بقميصه حيل راسا عفته كام هو نزع القميص اني درت وجهي كال: هههه هاي الخطوه الجايه لازم نعالج هذا الموضوع؟
اخذ المنشفه وراح للحمام اني كمت رحت للمطبخ سويت عشا عالسريع اجبان وهالسوالف وخليت جاي عالنار.
كعدنه نتعشا اني بس خليت بحلكي الاكل تأذيت كمت رحت للحمام باوعت بالمرايه شفتي مجروحه شوية غسلت ورجعت بس ما اكلت.
ماجد: ليش متاكلين؟ مو كلتي جوعانه تردين اطلبلج شي؟
ذهب: لا مااريد مااشتهي.
ماجدقبل شويه كلتي جوعانه؟
ذهب: شفتي تأذيني.
باوعلي هو وابتسم اني غلست.
ماجد: اي بس خوما حتبقين يوميه بدون اكل؟
استحيت اشرلي اتدني اتدنيت يمه باوع على حلكي اني حسيت صوفرت وحومرت وكل الالوان صارت بوجهي.
ماجد: اكلي حتى انطيج دوه.
ذهب: ان شاءالله.
بديت اكل هو خلص وراح يغسل كمت اني صبيتله جاي اجه هو اخذه وكعد بصفي يشرب جاي ويباوعلي.
ماجد: شبيها اسراء وياج؟
اني غصيت ظليت اكح. صبلي مي وانطاني شربت شويه بعدين ارتاحيت.
ذهب: شبيها؟ ماكو شي؟
ماجد: ماكو شي شلون وانت بس سألتج غصيتي؟
ذهب: لان استغربت سؤالك.
ماجد: ومساع؟
ذهب: شنو مساع؟
ماجد: قبل شويه من جنه بالغرفه..
ذهب: شنو؟
ماجد: ليش ذكرتي اسمها؟
ذهب: مااتذكر.
ماجد: اكيد؟
ذهب: اكيد.
ماجد: يعني محجت شي من اجت مسوت شي؟
ذهب: لا شتسوي يعني؟
ثاني يوم من دوامت خلصت محاضراتي رحنه اني والشله للكافتيريا اللي نكعد بيها كل يوم ننتظر السيارات وره شويه اجوا علاء الولد اللي بشعبتنه هو وخطيبته كعدوا يمنه وراها اجه ماجد نزل سلم عليهم كلهم وكمت اني من صعدت بالسياره سويتلهم كلهم بأيدي باي.
رحنه طول الطريق ماجد ساكت ولاكلمه ولاحرف يوميه جان يسألني شلون الدوام شلون محاضراتج شنو الاخبار.
ذهب: اليوم ساكت؟
مجاوبني ولاعبرني اصلا.
ذهب: شبيك؟
ماكو جواب بس حسيته يريد ينفجر.
سكتت ملحيت عليه وصلنه للبيت دخل السياره اريد انزل لزمني من ايدي.
ماجد: سدي الباب.
سديت باب السيارة بدون كلام والتفتت عليه.
ماجد: اذا شفتج مره ثانيه مديتي ايدج وسلمتي على احد اكسرها.
اني صفنت عبالي مسمعته عدل ردت استوعب شنو كال.
ذهب: شنو؟!
ماجد: سمعتيني؟
ذهب: شلون؟ ماافهمت؟ شنو؟
ماجد: اللي سمعتيه وهالكلام مراح اعيده مره ثانيه.
يحجي بعصبيه ولازم ايدي بكل قوته حسيت عظامي اتكسرت جوه ايده.
ذهب: شنو الغلط اللي سويته مافهمت على منو مديت ايدي وسلمت اني مااسلم على احد بالايد؟
ماجد: وهاي الباي من كمنه قبل شويه شنو؟
ضحكت عبالي يتشاقه كتله: صدك تحجي؟ عالباي شنو بيها وعلى منو سلمت كلهم صديقاتي.
ماجد: وعلاء؟
ذهب: علاء شنو؟
علاء زميلي واخويه وخطيبته صديقتي وجانت كاعدنه ويانه وانت شفتها وبغض النظر عن هالتفاصيل شنو بيها اذا سويت بأيدي باي!
ضغط على ايدي اكثر.
ماجد: انت صدك ماعندج احساس.
اني انصدمت عبالك ضاربني كف.
ذهب: مشكور انعم الله عليك.
حسيت غصيت وبس ارمش تطيح دموعي جريت ايدي منه بالكوه ونزلت صعدت فوك كبل لغرفتي وقفلت الباب ذبيت الكتب ونزعت الحجاب اختنكت متت مااحس اكو هوا اتذكرت الباب الثاني ركضت قفلته وذبيت نفسي عالجربايه ظليت يمكن ساعه كامله متمدده فاتحه السبلت ومااحس اكو هوا.
اختنكت عبالك واحد لازمني من بلعومي ويعصره بكل قوته ودموعي مبطلت لحدما حسيت خلص دموعي نشفت مااكدر ابجي بعد هو مسمعته دك الباب او حاول يفتحه.
وراها نزلت اشوف العلويه خطيه مالها ذنب لكيتها تباوع عالتلفزيون شافتني اشرتلي تعالي.
رحت يمها كتبت: (ماجد ليش راح مبقى عالغدا).
اني ارتاحيت من عرفته رايح كتلها: عنده شغل بس اني وياج والبنات اليوم نتغدا.
صبوا الغدا اني جنت صارلي كم يوم ماما تطبخ وتدزه إلى لان ماالحك اطبخ.
كعدنه اني وياها والخدامات عالسفره وكلتها وشربتها جاي وانطيتها دواها ورحت جبت كتبي كعدت يمها ادرس الى ان نامت.
ياسمين وساره كالوا: احنه يريد يسوي كيك بس مايعرف.
اني عندي دراسه بس كلت اكوم اسويلهم بكل الحالات جذب اليوم اكدر ادرس كلبي مشتعل نار من ماجد وايدي لحد الان تأذيني واثر اصابعه بعد طابع على ايدي عبالك مجويني مو لازمني بيده.
كمت سويت كيك وخليته بالفرن وكعدت اتذكرت حجي ماجد كلما اتذكره تدمع عيوني بعدين كمت غسلت خفت يجي ويشوفني ابجي مااريد ابين ضعيفه كدامه.
وغضبا علي انقهر لان مااشوف اكو سبب حقيقي يستحق هالعصبية وهالحجي والتهديد.
نعست باوعت للساعه ( ب5 ) كمت رحت نمت يم العلويه اخاف انام فوك وحدي.
حلمت امشي بشارع محد بي بس اني وداير مدايري بزازين شكدددد واكو وحده بنية لابده وراي محتميه بيه من البزازين واني امشي وبيدي علم اخضر والبزازين تريد تهجم عليها بس خايفين مني وفزيت اصرخ مرعوبة.
العلويه كمزت خلت ايدها على راسي وظلت تقره آيات اني ظليت مخلوسه بس فاتحه عيوني واباوع اخاف ارجع انام واخاف اكوم واخاف اصعد لغرفتي.
اشرتلي العلويه تسال شبيه.
حجيتلها الحلم كتبتلي: ( لتخافين خوش حلم رايتج خضره بختج جبير وسمعتج حلوه والبزازين مو زينه بس مكدرت تأذيج ولا يأذن اللي وياج خافت من الرايه البيدج لتخافين حلمج حلو).
اني بقيت مرعوبه بعدين كعدت يمها اقره هي لازمه سبحتها وتسبح.
خلصت باوعت للساعه ( ب9 ) ماجد ماكو كمت صبيتلها عشا وعشيتها هي متسهر لان دواها ينوم خلصت انطيتها دواها وكعدت يمها لحدما نامت وماجد ماكو.
اتمددت عالقنفه اللي بغرفتها وحجيت ويه البنات عالواتساب شوية.
نعست ونمت ماادري بيش الساعه حسيت شي على وجهي كمزت طلع ماجد باوعتله و رجعت بمكاني وغمضت.
دنك يم اذني كال: لتنامين عالقنفه تره تأذيج وتطلع صوت مزعج.
كمت اني رحت نمت عالجربايه يم امه وانطيته ظهري رجع دنك يم اذني.
ماجد: تره امي تتكلب هوايه متخليج تنامين وراح تضايقيها متاخذ راحتها.
ضجت حيل ومااريد ادخل وياه بنقاش او احجي وياه اخذت كتبي وصعدت لغرفتي خليت كتبي عالميز وطفيت الاضويه ونمت عالجربايه واتغطيت وغطيت حتى راسي.
سمعته فتح الباب اسمعه يتحرك كال: جوعاان..
سويت نفسي نايمه مرديت ولااتحركت.
ماجد: جوعاان ممتغدي ولامتعشي ياناس محد بكلبه رحمه.
انقهرت عليه بس مااريد اشوفه ولااريد احجي وياه.
راح للحمام اني طلعت الاكل خليته بالمايكرو وصعدته عالطاوله ورجعت بفراشي هو اسمعه يصلي بغرفته وين جان لهسه ممصلي.
خلص حسيته واكف يمي فوك راسي غلست.
ماجد: يعني الله يقبل على الريوك الساعه( 7 ) الصبح ولهسه ( ب12 ) بالليل مماكل شي محد بكلبه رحمه محد يغص باللكمه علمودي. امري لله اروح اكل تفاحه خبزه اي شي.
طلع من الغرفه سمعت صوت الكرسي سحبه اكيد شاف العشا وكعد يتعشا.
غمضت عيوني كلت خل انام قبل ميجي ويارب كون يروح ينام بغرفته احسن بس مانمت.
وره شويه اجه اتمدد اني منطيته ظهري ومغمضه عيوني حسيته صار قريب اني يبست بمكاني دنك باس ايدي مكان الاثر مال ايده متحركت رجع باسه هم متحركت بس دمعت عيوني كال: انكسرت ايده ان شاءالله السواها.
اني اختنكت بدموعي ظلن مثل النهر ينزلن من كال هيج هو اتنهد حيل كال: مااريد ابرر ومااريد ادافع عن نفسي لان مراح تصدكيني بس والله احبج مثل محبتي لامي ماعندي بالدنيا بس هي وانت.
ظليت ابجي هو حضني.
ماجد: مااتحمل احد يباوعلج حتى لو ابوج الا اكول هيج مااتحمل.
اني محجيت بس ابجي هو يتلمس ايدي مكان الاثر من يخلي ايده حاره وخرت ايده رجع خلاها وباس المكان.
ماجد: تأذيج؟
سحبني بحضنه اني زدت بجي هو خله راسي بحضنه ويمسح على شعري.
ماجد: كافي مو قصدي والله ماانتبهت من العصبيه.
اني ابجي مو بسبب ايدي حجايته اذتني اكثر ليش ماعندي احساس.
ماجد: زين بس كافي بجي شكد تبجين.