قصص و روايات - قصص رائعة :

رواية شهوات رجل ظالم للكاتبة زهراء أمجد الفصل العشرون

رواية شهوات رجل ظالم للكاتبة زهراء أمجد الفصل العشرون

رواية شهوات رجل ظالم للكاتبة زهراء أمجد الفصل العشرون

رفيف: جنت نايمه وغاطه بالنومه لان اتاخرت بالليل يالله نمت بقيت احسب للوكت ووين حيذبني واشلون بجهالي واشلون حتصفى حسيت الصبح على صوت وصياح حسبالي حلمانه لان ادري بيت خالتي هدوء قابل رحاب هنا حتى تسوي تعداد عسكري من الصبح وتكعدنه بصياحها وصوتها العالي رجعت غمضت هم اجه الصوت ببالي ودااسمعه واضح لا هذا مو حلم هذا صوت رحاب اي صوت ماما هاي شعدها جايتني من مصباح الله هي مو طردتني جايه تطردني انوب من بيت خالتي كمت عدلت فراشي ولميت شعري وطلعت لكيتها هي وخالتي زهره كاعدات بالهول الفوك ويمهن بيبي دتعد وتصف عليهن شافني اثنينهن كامن اجن ديسلمن عليا. كتلهن ها شكو اكو بعد رزاله طرده شتردون مني لاحكني لبيت العالم.

ام رفيف: جايين حته ترجعين ويانه للبيت.

رفيف: شنو شنو شنو ارجع ليا بيت ارجع لبيتج مستحيل ارجع وياج وانسي عندج بنيه اسمها رفيف لهنا وكافي مليت منج ومن تحكمج مشيت وياج مثل الاعمى شدكولين اكلج بس حاضر. شنو تردي اسوي شخصيتي مسحتيها وماحجيت كلت ميخالف امي تعبت وربت ومااتزوجت لخاطري كبرتني واذا رزلتني تريدني اطلع مره صدك تعادل زلم زوجتيني ذكر مو رجال وهم ماحجيت حرمتيني من حب حياتي ونسيته وراح والله يوفقه ويهني بمرته وجهاله ومالي بعد نفس بي واطمني من اطلك ماازوج ومااريد بعد رجل كرهت الدنيا كلها بسببج شعندج جايتني من طلعت وكت غروب مافةرتي بتج وين حتنام لو وين حتروح واني كروه تكسي ماعندي صارلي شهور لاانتي تنطين ولاهذاك الناقص ينطي مافكرتي عندي 2 همج بس العالم والناس والبرستيج بس رفيف لا طز بيها مو مهمه اذا عاشت بقهراو مرتاحه اهم شي كدام العالم بتج عدها رجل حتى لو جان نعل ماما ارحمني كافي ظلم تره اني مالي ذنب بموتت رجلج.

روحي لحكي صدام المشعول وكوليله ليش كتلت رجلي ليش هيج سويت بحالنه اني معليا كافي مليت منج ومن التحكم مالتج اني كبرت وصرت ام لاطفال 2 كافي خلصت كليات 2 تره انتي بكدي محد يدوسلج على طرف ليش اني مخليتني ملطشه.

كافي وكومي روحي لبيتج ماارجع اني تحلمين ارجعلج بعد وبيتج عندج إلى انطتي هديه إلى بس كدام العالم هديه مع ايقاف التنفيذ مالي اي مونه بي ولااكدر اتحكم بي مفاتيحه عندج اخذ بس سلاباتي وملابس ولدي واخذي كلشي مارايده منج احاجيها واصيح وهي ناصه ماحجت ولا حرف بس كالت.

ها خلصتي حجي كتلها شخلص لو احجي العمر كله هم مااخلص حجي بجالج ياامي يانبع الحنان يالي الجنه المفروض تحت قدمج كامت زهره وكعدتني بصفها وبقت تبوس بيا وبراسي
واني بقيت بس ابجي اجتي هي يمي رادت تبوسني كتلها شتبوسين مني وانتي ترستيتي جروح خاف الله بيا تره حوبه اليتيم تطلع بقت زهره حاضنتني وتبجي وادكولي والله خاله.

هي امج تريد مصلحتج وتريدج تستقرين وتربين جهالج بحضن ابوهم واذا انتي مصره عالطلاك خابرنه البارحه المحامي وامج كلتله قدملها وحتى كالت اشكد تريد انطيك مقدمه بس تره كدامج هواي زعاوي احتمال بعد ست شهور ميوصلج السره.

اكلج خاله انتي شفتيني طفله وماافتهم كافي تبردين باعصابي وتموتين الشغله كتلكم رجعه ماارجع لو تنكلب الدنيا ماشي لو يصبو لجاسم ذهب هم ماارجع لو يسجل العراق طابو باسمي هم ماارجع لو تموت امه وسحورتها هم ماارجع افتهمتو لو بعد.

اعيد وخلي يطمن كلشي مااريد منه بس وليداتي وخلي ياخذ شكو شي جابه ولو هو كلشي ماجاب بس ميخالف شيعجبه خلي ياخذه ماشي ولحد يدخل بحياتي لان محد ضايك المر والتعب غيري كلها كاعدع ومرتاحه ومستقره واذا ادكولين امج تريدلج الخير فهي بس تريد السمعه كدام العالم خاف يحجون ويكلون رفيف اطلكت تره حجايه الناس نعال مالبسه ماشي لان محد طيح حظي ووصلني لهذا الشي غير الناس...

طلعت ماما وخالتي صاحتنه ميار عالريوك كعدنه نتريك كلنه وحاولن بنات خالتي اشويه يغيرون جو وكملنه ريوك اني لميت المواعين وبديت انظف المطبخ وبنات خالتي كل وحده اخذتلها شغله صح هنه ماقبلن اسوي شي بس اني قنعتهن اريد الهي روحي.

لان اضوج فعافوني على راحتي كعدو الجهال سويتلهم ريوك وكملو غسلت المواعين واجتي عمة خالتي ام زوجها حتى تشوف اولاد ابنها وترد وحشه امهم وابوهم وطبعا الحجيه جانت حبابه حيل ومن النوع الفقيره بقت كاعده هي وامي واني ميار بلشنه بالطبخ اني سويت الدجاج سلكته وشويته وميار سوت التمن وسوينه سلاطه وطرشي وخضروات ودزينه ابن خالتي راح جاب خبز حار وكعدنه نتغده جانت الكعده حلوه.

بقيت يومين ببيت خالتي بس مهما يكن عظم بني ادم ثكيل وفشله من زوج خالتي من يخابر ويسمع اني يمهم مااريده يعرف اني مطروده وبقت ماما كل يوم تخابر وتتوسل لميت ملابسي ورجعت بتكسي جابني ابن خالتي لبيت اهلي دخلت بس معليا بيهم ومشت الايام ورجعت خالتي من الحج واني وضعي نفس الشي جاسم لاحس ولاخبر وطبعا هالفتره اني ادور على شغل لان حالتي الماديه كلش تعبت وماخليت مكان ماوحتله وماحصلت شي.

وماما حاربتني بعد اكثر والبيت تريده رغم بيبي وجدو كلولها ننطيج ايجار بس عوفي البيت البنيه بيتها تريده يس دكت رجل الا افرغ البيت لو ارجع لجاسم واضطريت اشيل واكتلفت بيبي وخالاتي بفلوس العمال والسياره إلى شالت الغراض وفرغت البيت لماما لان تريد اتاجره بس اصعب لحظات من فرغ البيت اشوف نص الغراض موجوده ونصهن ماخذهن جاسم وفرغ البيت واباوع عليه هذا البيت إلى اني جنت واكفه عالعمال من ديبنو هذا البيت إلى حافظته طابوكه طابوكه هذا البيت إلى جنت احلم اكون بي اسره وعائله رغم المشاكل إلى عشتها بي بس يبقى بيتي بي ذكريات حلوه بي كعده بي ضحكه بيت دخلت بي عروسه واحلامها باسره.

وعائله دخلت بزفه وهلاهل وطلعت مكسوره جناح وبركبتي اطفال اثنين مااعرف شنو مصيرهم بقيت كاعده عالدرج وحدي ابجي ظليت افتر بالبيت اني وجهالي وكل ركن إلى بي ذكرى تمنيت اني بحلم وهذا إلى دااعيشه كابوس واكعد منه حمدت ربي رغم كل الالم وشكرته لان كلشي يسوي هو اعرف واصلح وايماني بربي جبير ويجي بوم ويعوض صبري خير.

خابرتني خالتي تغريد كالت اشوكت تجين يلا حيصير المغرب وشعندج بعد بالبيت كافي ياخاله كاعده عالذكريات والله مردتي كلبي كتلها هسه اشويه واجي مسحت دموعي وغسلت وجهي ولبست عباتي وودعت كل ذكرياتي ببيتي ودعت احلى واسوء ايام ودعتها بالمها بفرحها لهنا وانتهت حياتي ببيت وحدي وباستقرار ورجعت لنقطه الصفر رجعت لتسلط ام حيزيد ميقل ادري بروحي الجاي اصعب من الراح لان كبرت المسؤوليه هذا شي.

والشي الثاني وقوفي بوجهه ماما إلى جانت مثل النار محد يكدر يقترب منها لان تحركه ودعت البيت إلى جان رغم المشاكل بس اشوف بي استقلالي وراحتي ومملكتي جنت احلم يكبرون الولد بي ويبقى النه بس مع الاسف كلشي بلحظه راح وصار مجرد ماضي
اخذت جهالي ولبست عباتي وطلعت قفلت الابواب وطلعت بس تركت روحي معلكه هناك تركت فرحه تركت ضحكه تركت عشره تركت احلام جنت اتمنى احققها ورجعت لاهلي مكسوره...

ومتحطمه دخلت واشوف نص غراضي بره بالطرمه وناس فوك ناس امشي واشوف غراضي إلى مشمور والي مكسور ليش هيج موحرامات لان شفتوني ماموجوده وعود اعتمدت على خالتي تغريد وزهره بس محد لكيته مهتم صعدت ليفوك اباوع الفراش عالملابس عالغراض على لعاب الاطفال صايره هوسه بالبلكونه الزوالي ملاتي عالتراب ليش هيج صحت لخالتي تغريد كتلها ليش هيج هي هاي الامانه مو كتلج عينج عالعمال وخلي كلشي يخلو بمكانه واني مفرغه الهن مكان ليش هيج شمر واني كله دازته مصفط ومرتب مو الغراض نصها اتكسرت.

تغريد: والله اني هلكت ومتت تعب افتر وراهم وانتي كاعده هناك انتي حقج ماشفتي الهوسه والخبصه روسنه من العبايه كامت توجعنه وانتي هسه جايه تحجين وبعدين صفطيهن انتي واصلا شكو جايبتهن اشو هو بيتج وراح المن جايبتهن اشوفلي فقير وانطيهن اله لو مني ومنج جايبه هالكراكيب شكو.

رفيف: باوعتها صدك حركت دمي كتلها اول شي غراضي كله حديث وماصارلي مثلج قرن من اتزوجت حتى عندي كراكيب واذا تحجين فانتبهي انتي من شلتي سله الزباله جبتيها وماانطيتها وهاي الجنط مالتج تشهد قاط رجلج مال عرسه ضامته جايتني على ملابسي وغراضي دروحي خاله لاافرغ غضب الله براسج اني صوجي اعتمدت عليج لو شايفه الجيران احسن بس حسبي الله ونعم الوكيل
ماعجبها كلامي عوجت حلكها ونزلت ادردم.

اجوي بيت خالتي الحجيه شاف الغراض الحجي زوج خالتي ماقبل وكام يحجي على ماما وكلها اذا عالايجار لو كايله اني انطيج بابا البنيه
بعدها ما مطلكه وانتي ركضتي عالبيت شجاج ياام رفيف وهي ظلت اتمتمت وتجيبها منا وتردها لهنا بديت اصفط بالغراض وطببت إلى جانن بالطرمه ليجوه خابرت ابن خالي علاء يجي يساعدني والولد ماقصر خالتي الحجيه بقت هي والحجي اتوسلو بيا.

اروح وياهم وجلبو كتلهم عندي شغل ومهوسه كالو بس اليوم وباجر ارجعي وجبروني اروح وجابو عشه مشاوي من بره وبقينه سهرانين لل3 كعدت ثاني يوم ساعه تسعه الكل نايمه نزلت لكيت بس خالتي كاعده والحجي طالع صبحت عليها وتريكت وصعدت كعدت جهالي وريكتهم وتحظرنه حتو ارجع لان كلبي يم الهوسه إلى هناك شراح يرتبها إلى واعرف ماما.

متكعد راحه خاف اذز على جاسم ادكله تعال اخذ الغراض حتى لو هي جايبتهن بس حتى تحرك كلبي توسلت بيا خالتي ابقى يمهم عالغده بس فهمتها السبب وخابرت رجلها اجه رجعني لبيت اهلي ودخلت والكل متوقع ابقى اليوم هم اتفاجو بيا لان نفس إلى توقعته صار ماما مخابره لجاسم وجاي ماخذ الكاونتر وزوالي 2 والستائر والتبريدات 2
وتعاركت وحجيت بس جان جوابها انتي شنو الغراض اني اشتريتهن واني المن ميعجبني انطيهن.

صبرت امري لله وكلت فدوه هو بيت وانهجم بقت عالغراض طز بيهن ياخذهن هو والله بعت طباخي وكم شغله حتى انطي فلوس العمال لبيبي ولخالتي رغم هنه ماقبلن بس اني ذبيت عليهن الفلوس ذب هذا كله وماما متحجي ويايه ودخلنه بشهر الثاني...

بسنه 2015 خابرتني صديقتي الصبح كالت لكيتلج شغل بشركه دوامج مسائي من 3 لل7 وراتبج 250 اني هنا كيفت مثل واحد وانفتحت عليه الجنه وكلوله ادخل رحمتك ياربي كتلها زين شنو المطلوب شهاده شي كالت بس يردون خريجه وتعرف عالحاسبه باجر الصبح تروحين انطتني العنوان وكلتلي السايق مالت ابوها ينتظرني هناك بباب الشركه حتى يدخلني ويكلهم اني من طرف ابوها وانطتني رقم السايق وفعلا رحت وانقبلت ورجعت انطيت خبر لاهلي عن طريق خالتي زهره لان ماما مااحجي وياها وبلشت بشغلي الجديد والحمد لله صح رجعتي بالليل وشته بالسبعه صعبه بس شسوي اريد اعيش تعبت ومليت من كلمه ماعندي والحمد لله والشكر الله سهل والموظفين إلى ويايه قنعو المدير وحولنه عالشفت الصباحي.

وشفتلي محامي رجال جبير صح جان فاهي ويدور فلوس بس ميخالف اهم شي جبير حتى لحد يكول رفيف عدها شي ويه المحامي وطلع يعرف بابا الله يرحمه واقتنع انطي الفلوس على شكل دفعات ورجعت وصلت خبر لماما عن طريق خالتي زهره انو اني حنفصل وجان ردها
يطبها مرض واني شنو بس من هسه كوليلها فلس متشوف مني ومتتزوج بعد هاي جربت العرس مره وفشلت تكعد وتنجب.

اني سمعت حجيها مارديت اهم شي احقق إلى اريده وانتصر عليها ولو لمره وحده وجاسم من دز عليه المحامي حتى يرفع قضيه ماقبل وكال خليها هيج واني اروح اتزوج واذا تريد ترجع خلي ترجع لبيتها ولجهالها اني طلاك مااطلك
اني هنا انتهت اسودت الدنيا بوجهي توسلت بخالتي زهره تحاجي وتخلي ماما هم تحاجي بس محد قبل يوكف ويايه بس رحمه الله فوك كل شي وربي جان ويايه وساندني لان ماعندي غير بس رحمته.

والمحامي كلي عوفي هذا اني اله رفعنه علينه دعوه نفقه وانحكم مال 8 شهور وكل شهر 450 صح هذا الشي جان بي زياده باتعاب المحامي بس ميخالف انطي بس اريد اخلص من جاسم.

لان حقر ويايه حيل وكال حرفع عليها بيت طاعه وبعدين انشزها ودخلني بكومه شغلات اضطرت اسوي هاي الطريقه واول ماحصلت القرار مال النفقه حاول يسقط القرار بس ماحصل شي طبعا وماما كامت تزيد عليا بالحجي والرزايل واني ولا يمها ارحع من دوامي اصعد لغرفتي حتى اكل وحدي اكل معليا بيهم ومن انام اقفل الباب لان اخاف تسويلي شي واني نايمه وجاسم بعد معاناه وماحصل شي اضطر يستسلم ويوافق.

ويرفع قضيه طلاك بس بشرط اتنازل عن الحاضر والغايب والنفقه مالتي تبقى بس نفقه الجهال مااكدر اتنازل عنها ووافقت اني رغم الكل كلولي هذا حقج بس اني ردت اخلص احسن ماابقى اصعد وانزل
محاكم وتاليها امل واذب كومه فلوس ومااحصل شي طفرت النهر ماطوله بالبدايه وجان يوم طلاكي من السيد نفس يوم عيد ميلادي 7/4/2015 وبهذا.

اليوم تحررت من قيود جاسم بصوره جزئيه ورجعت صح مقهوره بس فرحانه لان تخلصت من مرض جاسم بالنسبه اليا جان مثل المرض الخبيث تحملت منه كلشي بس ماشفت منه شي حلو تعبني حيل هو وامه يسمع كلام الكل واني مااهمه حتى بلحظه انفصالنه جان همه كله الفلوس الرجال مو بالشكل ولا بالطول والعرض الرجال بشخصيته بحنانه بحبه...

باخلاصه بوفائه وياما زلم لاشكل ولا جسم بس نسوانهم تموت عليهم لان يقدرون المره ويعرفون اشلون يحافظون عليها ويحبوها يحسسوها هي وبس بالعالم ورجعت لاهلي سلمت على خالتي جانت كاعده بالهول وبقيت انتظرها حتى اكوللها جاسم طلكني جانت دتصلي واني كاعده كدامها عالتخم شو هاي خلصت صلاه سلمت عليها جابوتني.

انجبي كح، ام الولد طايحت الحظ مااستحيتي من دكيتي هيج دكه بس حقج مالكيتي ابو إلى يربيج نزلت عليا حجي ورزاله بس حان كلامها سجاجين وتجرح بكلبي وبظهري ليش اني شمسويتها وهي هيج تحجي
كتلها اشبيج اوكفي شكو جايه هداده عليا اول شي البيت إلى رباج رباني والاب إلى رباج رباني والام إلى ربتج هم ربتني وشنو شفتي عليا حتى تفشرين هيج وتغلطين استحي عيب انتي بعدج بين ايدين ربج لترمين المحصنات تره اكو رب فوك راسج.

ويشوف ويسمع كالت انجبي ادبسزز كسرتي عيونه ورحتي اطلكتي وحدج ولج هذا جاسم الدوه لكل جرح هيج تبهذلي بالمحاكم بس حقج ماعدج ابو إلى يربيج اني هنا احترك دمي فقدت لان مرتين تذكرني اني ماعندي اب رغم انو فقدان بابا الله يرحمه مو اني السبب بي هو رب العالمين راده واخذه يمه اني شنو اتعير بشي مالي ذنب بي فقدت عليها كمت عليها ولزمتها من شعرها هي اكصر مني وانعم واني لابسه ربطه ماكدرت تلوح شعري بقت ترفس بين ايديا كتلها اذا جسمي عاجبج اخذي شبعي بي ولو هو ميشبع تره بالشهر مره تحصلين منه النومه.

كاضيها ويه الكحاب واذا تجيبين طاري بابا على لسانج اكصه اني احجي وابجي ولافه شعرها على ايدي واكفخ بيها فرغت نار كلبي كله بيها وهي تبجي وتصير الحكولي هاي الكحبه ضربتني ولك بويه ولج يمه رادت تضربني بس ماكدرت لان ثولتها بشعرها بحيث نصه تكطع بايديا واظافيري طوال بقيت اخرمش بوجهه بعدين فكتنه بيبي طبعا ماما جانت بالدوام وجهالي واحد بالدوام والثاني ديتغده بالمطبخ ميدري شنو السالفه فكتنه بيبي.

جان ادكولي امشي اطلعي من بيت ابويه هذا مو بيت ابوج وباقيه بي اني هنا شطت لله لتفت عليها ودمعتي بعيني كتلها مااكلج غير الثوب إلى لبسته اني تلبسي واريده بابوج عزيز كلبج وصعدت ابجي خابرت لماما كالت ابقي بغرفتج لحد مااجي.

بقيت بالغرفه خابرت صديقتي وجان خالها اخو امها شيخ عشيرتنه قررت ادخل الشيخ يشوفلي صوره حل وين اولي بيت جدي اهل بابا منحجي وياهم وخالاتي ميكدر يدخلن وين انطي وجهي كلت ماكو غير الشيخ يحلها
وحصلت رقمه وخابرته وكلي شوفي امج واهلج ولباجر اذا ماانحلت اني اجيج للشركه واخذج لبيت اهلج تاخذين ملابسج وغراضج واخليج يمي بحمايتي تشكرت منه بقيت انتظر ماما لان جان دوامها ظهري كل هاي الاحداث صارت بيوم عيد ميلادي.

اشكد حلو من تستقبل سنه جديده بعمرك بهيج مشاكل وطلاك وللمغرب يالله احجي ماما لان مدرستها جانت بعيده وماقبلت على خالتي زهره وكالت اذا رفيف طلعت من البيت اني هم اطلع وجدي عنده ماما لتصعد ولا تنزل سكت وماحجه.

رغم هو بالمشكله كام يصيح عليا وطردني بس اني سلمتهم بايد الله وربي مستحيل يقبل بالظلم بقيت مااحجي ويه زهره وجدي ولا يخصني بيهم ومر الاسبوع وصارت المرافعه مالتي وتنازلت عن كلشي حتى عن القرار مال النفقه إلى حكمته بي بقت بس نفقه الجهال وانفصلت عن جاسم بشكل نهائي وبقرار القاضي يوم 22/4/2015 ولهنا انتهت حياتي بجاسم بشكل نهائي انتهت.

الفصل التالي
جميع الفصول
روايات الكاتب
روايات مشابهة