رواية شهوات رجل ظالم للكاتبة زهراء أمجد الفصل الحادي والعشرون
بقيت بالغرفه خابرت صديقتي وجان خالها اخو امها شيخ عشيرتنه قررت ادخل الشيخ يشوفلي صوره حل وين اولي بيت جدي اهل بابا منحجي وياهم وخالاتي ميكدر يدخلن وين انطي وجهي كلت ماكو غير الشيخ يحلها وحصلت رقمه وخابرته وكلي شوفي امج واهلج ولباجر اذا ماانحلت اني اجيج للشركه واخذج لبيت اهلج تاخذين ملابسج وغراضج واخليج يمي بحمايتي تشكرت منه بقيت انتظر ماما لان جان دوامها ظهري كل هاي الاحداث صارت بيوم عيد ميلادي اشكد حلو من تستقبل سنه جديده بعمرك بهيج مشاكل وطلاك وللمغرب يالله احجي ماما لان مدرستها جانت بعيده وماقبلت على خالتي زهره وكالت اذا رفيف طلعت من البيت اني هم اطلع وجدي عنده ماما لتصعد ولا تنزل سكت وماحجه رغم هو بالمشكله كام يصيح عليا وطردني بس اني سلمتهم بايد الله وربي مستحيل يقبل بالظلم بقيت مااحجي ويه زهره وجدي ولا يخصني بيهم ومر الاسبوع وصارت المرافعه مالتي وتنازلت عن كلشي حتى عن القرار مال النفقه إلى حكمته بي بقت بس نفقه الجهال وانفصلت عن جاسم بشكل نهائي وبقرار القاضي يوم 22/4/2015 ولهنا انتهت حياتي بجاسم بشكل نهائي انتهت.
بكل فرحها وكل حزنها انتهت واخذت وياها كومه ذكريات والم ووجع وعمليات صح جانت حياة صعبه حيل بس مهما يكن اكو بيت يحميني اني وولدي
مهما يكن عندي امل في يوم يعدل جاسم ويرجع لاولاده والي انتهت حياة صعبه وحتبدي حياه اصعب بس الحمد لله على كل حال عسى ان تكره شى وهو خير لكم.
استقريت بدوامي ومعليا باحد ارجع ابقى بغرفتي لحد ثاني يوم محبوسه بسجن يوسف مرات يجن خالاتي يمي فوك انزل اسوي اكل واصعد مااختلط باحد زهره بساميرها مستمره واني لابستها
جاسم قوه علاقته بجدي وخلاه بعد ميطيقني ولا يطيق جهالي ودوم جانت المسانده إلى بيبي إلى هي امي إلى ماجبتني امي إلى ربتني وتعبت عليا جانت واكفه بوجهه الكل.
ماما كالعاده متقبل ادكول رفيف اطلكت ومصره وعايشه بحلم اني زعلانه ويجي يوم وارجع ومرت الاشهر ودخلنه بشهر السادس واني بعدني بالعده بس اداوم
لان شغلي بشركه اهليه مااكدر اخذ اجازه بس التزمت بلبس مستور ومعليا باحد ومااكدر اعوف دوامي وباب رزقي اني ماصدكت داومت ولكيت مكان اكدر احصل منه عيشه إلى ولجهالي وبيتي إلى اخذته ماما مني اجرته وطبعا مااشوف شي من الايجار اشكد حاجوها اهلي وخالاتي بس جان كلامها واحد.
مو هي إلى رادت تطلك وكالت معليج بمصروفي هي تحير بروحها اني شنو اكعد اربي يتامه وعدهم ام واب اني جنت مااهتم لكلامها صار عادي اتوقع منها كلشي وبركه الله براتبي والنفقه وعايشه ملكه وين لاكيه بالشهر 450 شعندي قابل كمت اصرف نص واضم الباقي خاف اتمرض احتاج شي للجهال خاف يبطلوني من الشركه احسب للزمن لان هسه اني وحدي بنص غابه وماعندي معيل غير بس رب العالمين.
وبيوم راجعه من الدوام دااتغده سمعت صوت جدي بالغرفه يصيح بس ونه مو كلام مفهوم صحت لماما كتلهه ابوج ديصيحج كامت بس دخلت كامت تصيح ولج زهره وج يمه ابويه متخربط الحكولي رغم ماهو جان كلشي مابي اتغده وكمل ونام نومه الظهر هو متعلم ينام الظهر ساعه يريح جسمه بيها.
زهره: جنت بالحمام اسبح وسكعت صوت ام رفيف تصيح طلعت ركضت لبست دشداشتي الوصخه وطلعت اركض طبيت لغرفه ابويه اشوف ابويه نايم بفراشه وبس يشخر ويون ويطلع ماده بيضه من حلكه اني هنا تخبلت وكمت الطم لكيت امي واكفه تبجي ورحاب تهز بي وتبجي
رفيف: اسمع صوتهم بالغرفه واشوفهم بس بقيت على نفس كعدتي كملت اكل وغسلت مواعيني واخذت الجهال سبحتهم وصعدتهم فوك كتلهم ليروح يموت ممنوع تنزلون ونزلت لكيت الحجي زوج خالتي موجود.
ورجال وهو متخربط وديذب من راسه باوعته ربي لاشماته بس هذا البشر بيوم وليله يصير هيج بعد لايد ولا رجل بقيت اباوع عليه كمل غسلوله وبدلتله
ماما والحجي وخالتي يحاجو ميرد بس يون لسانه صار كلش ثكيل وياشر بعد ميشوف اني عرفت صارت بي جلطه
رادو يكومو ميكدر يكوم طلعت بيبي لجيرانه صاحت ابوهم دخل هو وزوج خالتي واخذو اني واكفه بالباب اباوع عليه وصل للباب يمي باوعته بنظره حسسته هاي الدنيا وين راحت قوتك وصياحك عليا.
باوعلي هو وحس بنظرتي شفته اشلون يسحلون بي كوه رجليه متوكف إلى يجوز إلى مامر بهيج موقف يكول اني حقوده او اتشمتي بمريض بس اني مو حقوده ولا عمري حقدت على بشر بس هومه اذوني وطردوني طبك ويه عدوي ضدي جان يطب ويطلع يصيح ابتليت بيها متشوفلها بيت يلفيها هي وولدها ماتركتبداخلي طيب ماكال هاي مكسوره وهي مثل بتي.
اخذو وراحو وراحت وياه ماما وخالتي وبيبي وبقيت اني وجهالي بالبيت خابرت لخالاتي وكلهن اجن وصار البيت هوسه ىخبصه وناس تروح للمستشفى وناس يمنه وانخبصنه خبص اني عفتهم وصعدت اكل لجهالي عشيتهم وكملت نزلتهم وبقينه جوه ننتظر الاخبار لل12.
اجو ازواج خالاتي وماما وبيبي كالو بعده بالانعاش ووضعه كلش تعبان ضاربته جلطتين وحده وره الثانيه وبلكت لباجر يصحى حتى يحولو بالردهه وعلك البجي والطم وبقن يمنه للوحده واني ميته نعس بس وين انام غرفتي حاره مابيها سبلت السبلت مالتي اخذو للصاله مال اهلي وعافوني متهجوله بالصاله انام طلعو فرشت إلى ولجهالي ونمت وكعدت الصبح سبحت وبدلت لان صيف حاره ورحت للدوام خابرت لماما ساعه 12 اريد اشوف جدي اتوكل لو بعده كلت بلكت الحك عليه حتى اروحله للمستشفى زياره المريض بيها حسنات ومهما يكن من جنت طفله لحد ماكبرت ربيت بالبيت مالته.
ام رفيف: ها رفيف اشبيج ابويه مات احجي
رفيف: ماما انتي بيج شي هو منو يمه بالمستشفى اني لو انتي غير هو انتي بالمستشفى واني مخابره دااسال اشلون صار كبيتي عليا اشبيج مدكوليلي
ام رفيف: ها اي والله والنبي يابتي دايخه والله كاعده بالممر واخذتني غفوه ونسيت اني يمه حسبالي انتي يمه هسه دروحي وخلي اكوم اشوفه بلكت تحسن الدكتور كال انتظروُ للضهر يتحسن.
رفيف: اها عنده العافيه اني من ارجع الظهر من الدوام اجي للمستشفى
ام رفيف: وين تجين وجهالج اكعدي واسكتي منو يجيبج اني عود خابريني واكلج شكو ماكو
رفيف: ماما اشلون يصير هسه كلها ادكول صغيره ماراحت شافته هاي فوك ماكاعده ببيته اني إلى خلك الطلايب هسه دروحي ومن ارجع عود اخابرج حتى امر عليكم للمستشفى واذا عالجهال اعوفهم يم الجيران هي ساعه وارجع صدك ماما جهالي منو بقى يمهم بالبيت.
ام رفيف: امي رجعت للبيت يالله اني وخالتج رحنه والظهر اني من تجيب الغده انتي موجوده يلا روحي باي وسديته.
سدته ماما مني واني مدري اندعيله يكوم بالسلامه مدري بالموت حتى تضوك زهره إلى ضكته من تعيرني بموتت بابا الله يرحمه بابا إلى تمنيته هسه يمي وبكل مصيبه اطيح اتمنى يسندني البنيه بدون ابو مثل طير بلا جنحان بس محد يحس بنار كلبي غير الفاكد ابوه ربي لتحرم عبدك من اب تره فراك الاب كلش صعب فزيت من كلامي إلى بداخلي على صوت موظف ويانه رجال جبير
اشبيج عمي رفيف شو اليوم صافنه ووضعج تعبان.
اوووف ياعمي شكول وشحجي جدي وضعه كلش صعب بالمستشفى وخاف يموت ومندري شنسوي
هو وين بيا مستشفى؟ اني ولدي 2 متعينين عالصحه بلكت بمرجان يمهم حتى اوصيهم هسه عليه
اي عمو هو بمرجان واني اموت من مرجان دوم إلى يروحلها يرجع بتابوت
كولي يالله بويه شلج بهذا الحجي هسه حخابر اخيج واشوفه واخاي يوصي عليه وان شاء الله يكوم بالسلامه.
ماشي عمو وخابر الرجال ابنه وطلع مو بالمستشفى واجبه يبدي وره الظهر وكله اني الظهر من استلم الشفت مالتي اروحله واخذ اسمه الكامل بقينه بالدوام لحد ساعه 2 نخلص دوام
طلعت اني والموظفه إلى ويايه وكالت تعالي نمر للاسواق محتاجه شغلات كتلها اني هم اريد شامبو وصابون دخلنه واشترينه بس اني كلبي يلوج بس اريد ارجع خايفه ليروح الرجال يموت ويجي دعائي بالمكان اشلون ياربي مروتك كومه بالسلامه.
حتى لو يبقى مشلول بس ليموت هسه هي حجايه حجيتها بساعه عصبيه مستحيل تصير صدك شو ربي يعلم شنو بكلبي صعدنه بالكيا اني وصديقتي ونزلنه براس الشارع هي راحت لبيتها واني طلعت كبل حتى اروح للبيت بقيت امشي والف حسبه ببالي بس اذا ميت اكيد يخابروني قابل يعوفوني هيج زين اذا مات وجابو للبيت اشلون.
وماما تحبه ومتكدر بدونه اشلون بيها هاي تموت وره ابوها بقت افكار كومه تجي ببالي لحد ماوصلت للفرع مالته دخلت بي وصلت لنص الفرع وجان اشوف الشي إلى ابد ماتوقعته اسمع صوت صياح ويبووو واشوف لمه مال نسوان وشباب والمنطقه.
مكلوبه بباب بيتنه اني هنا اتبنجت بعد اريد اوكف على رجليا مااكدر دخت ووكعت بالشارع ماحسيت الا جيرانه مكعدتني بحضنها بالشارع وتضرب خفيف على وجهي وجابولي الجهال إلى بالشارع مي اسمع حجي هواي داير مدايري.
بس مالي حيل احجي اختنكت حيل ومااعرف شنو ديصير بيا شعور مينوصف صح اني ماجنت تحجي وياه بس العشره متهون الا على ابن الحرام مهما يكن هو هم رباني ببيته وجنت اصيحله بويه بس غير جاسم الحقير غير افكاره وجان دوم يحجي براسه وهو رجال جبير يتقشمر بسرعه بقيت كاعده بالشارع بالتراب وابجي والطم على خدودي اذكر اخر لحظه شفته بيها وهاي النظره تبقى ملازمتني طول عمري كومتني جيرانه وشالت جنطتي والعلاكه مالتي وبقت ساندتني لان مااكدر امشي كمت اسحل برجليا سحل.
وصلت للبيت طبيت اشوف خالاتي وماما وبيبي كلها كاعدات بالمطبخ والجيران النسوان كلها طابه وطالعه وصياح ولطم وبجي وماما شاكه دشداشتها وجسمها ازرك مجرح من كثر اللطم بقيت ابجي وياهم والطم.
كتلهم ليش محد كلي ومحد خابرني اني مو بتكم ولكم الكرايب جايين واني ماادري طلع هو ميت من ساعه 12 ونص واني ساعه 2 ونص وصلت يالله عرفت يعني العالم كلها تدري واني لا ماما كالت ماردتج تعرفين هناك خاف تتخربطين ويحيرون بيج هناك كمت اصعد ابدل ملابسي كلهن تراب ذبيتهن ولبسنه اسود ونصبنه عزه بيوم 14/6/2015.
وجان بهاي الفتره زياره الشعبانيه والطرق ازدحام وكوه يالله كدرو يدفنو حتى ماخذو لكربلاء لان جانت الطرق مسدوده والعالم صايره ملحمه ونصبنه الفاتحه والجو جان كلش حار والعالم انكلبت علينا ومواجهات بحيث نبدي من ساعه 8 الصبح لل8
بالليل والعالم والملايات ناس اطب وناس تطلع.
تعبنه حيل اني خلال الفاتحه كلها واني الصخونه مافاركتني وحتى الاكل كطعته ونفسي تلعب وكل اشويه بالفاتحه تغيب روحي ويشيلوني للغرفه اصحى وارجع من جديد للفاتحه لحد ثالث يوم واني وضعي تعب حيل ماما حاجت ام علاء مرت خالي.
تاخذني هي وخالي الثاني للدكتور لان هي متكدر تروح واخذوني وطلع بيا تايفوئيد وفقر دم وانطاني علاج وابر ومغذي ورجعت بقيت اسبوعين اني نايمه بالفراش لاايد ولارجل ورجعو اخذو لغير دكتور وبدت ابداعات الاطباء كل واحد يحجي شكل.
اخير شي ام علاء كالت هاي مو مريضه هاي مخترعه من شافت الفاتحه اني هسه اروح اجيبلها من العطار بخور وهسه تصير زينه وفعلا راحت جابتلي مااعرف شنو تبخرني بي قبل اذان المغرب ولمده 3 ايام وصدك صرت زينه.
وبقى كل يوم ويه الغروب يقرون قران يم راسي وبدت العالم تفض رجلها عن بيتنه ورجعت للدوام اخذو من خاطري الموظفين ومرت ايامي نفس الروتين وبقت اني زهره منتحاجه بس الحقاره هالمره تجري بدمها هيجت عليا ماما وخالاتي ادكلهم ابويه مات من وره رفيف هي دعت عليه ومات.
وهذني جان ابوهن هستوه مات ورجعن عليا وكوه يالله فضت هاي السالفه بس بقينه منتحاجه اني وياها بس إلى اذاني ميمي نفسيته تعبت حيل لان جان يحب جدي هواي ويسمع من الاطفال اصدقائه الميت الدود تاكله ويصير بس عظام جان دومه مخلي صوره جدي ويبجي جانت هالفتره صعبه عالبيت كله كل واحد حاير بامره وبوضعه.
ام رفيف: شفت وضع الاولاد تعب حيل ومنا انفصال امهم وابوهم حاولت ابعد رفيف قدر الامكان عن البيت حتى اتفاهم ويه جاسم وارجع رفيف مااريدها تبقى على كلبي واحير بيها وبجهالها من جديد اقلها من جانت ويه جاسم هي شايله روحها
بس هسه كابلتني وكعدت انوب العالم هسه يحجون اشكال وهاي لكت دوام ومحد بعد يكدر يحجي وياها صارت تلاسن وترادد ومتهتم لبشر وتمشي برايها احسن شي ارجعها لرجلها واخلص منها ومن كلام العالم.
اكلج فوفه حبيبتي ليش متاخذين الاولاد وتسافرون تغيرين جو انتي وياهم دتشوفين وضع البيت والحزن والكابه وهذوله ولدج خطيه طلعو سافرو واني عليا سفركم كله
رفيف: صفنت على كلامها شنو هالحنيه إلى نزلت كتلها ماما منين اجيب واسافر اني لسه المحامي يطلبني وثاني شي اشلون اسافر وحدي اني وهالجهال وين اسيطر واكدر ومنو يروح ويايه انتي شدتحجين اني متعلمه اسافر وياج مااعرف اروح وحدي.
شنو متعلمه شنو مااعرف اروح وحدي رفيف اشبيج صغيره انتي دشوفي حال ابنج خطيه انتي متفكرين غير بروحج دومج همج نفسج وبس.
رفيف: ماما انتي صدك تحجين اني هم بس روحي وبس كل هالقهر إلى تحملته تاليها اطلعيني هيج مااسافر اشو وبالعناد وماعندي فلوس ياعالم ياناس السفر ميحتاج فلوس منين اجيب ابوك فهميني دليني على واحد عنده اروح ابوك منه كافي تعبت انوب طلعتلي سالفه السفر ودوامي اشلون منو يقبل ينطيني اجازه واجازتي بدون راتب يعني خسارتي في 2.
ام رفيف: كل سفرتج انتي وولدج عليا والراتب إلى يقطعو اني انطيج فلوسه والاجازه اني ادبرها الج وثاني شي هي شركتكم دتسوي سفرات وروحي وياهم شوفي إلى يحجزون وكنكي وياهم شجاج فاهيه ابقى اعلم بيج
رفيف: الله كريم ماما خلي افكر واردلج خبر
انوب تفكر وج اني لوما جهالج اني اطلعج هاي فوك الطلعه والونسه انوب تريد تفكر ابقى انتي تحبين الفكريات هو انتي من يومج مو وجهه نعمه.
اشكرج ماما هاي بعدني هنا وبده العيار مالتج مااروح وشكرا عالعرض المغري اكوم اصعد لغرفتي وانجب احسن إلى اني صوجي نزلت مو بنيه مجبوبه بغرفتي شنزلني
عفتها وكمت بس بالي يم السفره ويم ميمي إلى ليل ونهار بس يبجي يعني اذا اخذته حينسى جده ويرتاح اشويه بقيت يوم كامل افكر ساعه اكول هناك وحدي اشلون ادبرها وساعه اكول هم اغير جو وسفره بلاش اجتني.
اخير قررت اروح ومناك اطفر وبعد مااجي وهاي فرصه واجتي للحلك بلغت ماما بقراري وهي فرحت حيل. وبديت اتحظر للسفره والحمد لله لكيت صديقه لماما كلش هم دتروح لتركيا وقررنه نروح سوه.
انطتني ماما المقدمه مال السفر واتفقت ويه الشركه تكون سفرتني بالاقساط كالت مااكدر انطيهن دفعه وحده وتحظرت وكملت كلشي واشوف الفرحه بعيون وليداتي واشلون مكيفين حيرحون بس إلى صدمني موقف ماما قبل السفر بيومين وضعها تخربط ورجعت عصبيه ومتتحجه ويايه واني ماعندي.
واشلون اسوي هيج شي ورفيف لتصرفين هواي واشوفها كامت تاخذ الفون مالتها واطب لغرفتها تخابر كومه اوكف يم الباب اريد اسمع كلمه ماكو ياربي اموت واعرف المن دتخابر مرات ادخل للغرفه بحجه اخذ مشط او شي هي تشوفني تسكت لو تسد الخط تكررت هاي الحاله كدامي بقت افكار كومه تفتر ببالي معقوله ماما صادقت لالا ثول رفيف اشبيج تخبلتي زين معقوله ماما حتتزوج هم مااعتقد تسويها صارت تكعد ويه خالتي زهره وتبسبس ومن يشوفني لو يسكتن لو يغيرن الموضوع اني تركت كلشي والتهيت بسفري.