رواية شهوات رجل ظالم للكاتبة زهراء أمجد الفصل الثاني والعشرون
بس إلى صدمني موقف ماما قبل السفر بيومين وضعها تخربط ورجعت عصبيه ومتتحجه ويايه واني ماعندي.
واشلون اسوي هيج شي ورفيف لتصرفين هواي واشوفها كامت تاخذ الفون مالتها واطب لغرفتها تخابر كومه اوكف يم الباب اريد اسمع كلمه ماكو ياربي اموت واعرف المن دتخابر مرات ادخل للغرفه بحجه اخذ مشط او شي هي تشوفني تسكت لو تسد الخط تكررت هاي الحاله كدامي بقت افكار كومه تفتر ببالي معقوله ماما صادقت لالا ثول رفيف اشبيج تخبلتي زين معقوله ماما حتتزوج هم مااعتقد تسويها صارت تكعد ويه خالتي زهره وتبسبس ومن يشوفني لو يسكتن لو يغيرن الموضوع اني تركت كلشي والتهيت بسفري.
نرجع لجاسم
طبعا انفصلت عن رفيف واتخلصت منها وطلعت بخوش فلوس مولده شارع وسياره اوبتيما 2012 وحاضر وغايب ماكو واهلها ضدها وضعي اني مرتب وماعندي شي
رجعت للبيت فرحان حيل اهلي باركولي لان خلصت منها ومن جهالها خابرت لسمر اتصل ومترد بقيت يوم كامل اتصل وادز مسجات بس مترد قلقت عليها حيل هاي وين راحت ووين اختفت شنو الموضوع هي مو تدري بيا اني حطلك حتى امشي عليها واتزوج.
بقيت يومين اتصل وماكو اخر شي قررت اروح لبيتهم واني ادري الصبح محد بالبيت بس هي صار الصبح تريكت وصعدت بسيارتي واتوجهت لبيتهم اريد افتهم شنو السالفه وصلت للبيت باوعت سياره ابوها ماكو يعني هي وحدها دكيت الباب اكثر من مره سمعت صوت باب المطبخ انفتح واجتي تمشي صاحت منو كتلها اني جاسم افتحي الباب.
سمر: كلشي اتوقعت بس جاسم يجي للبيت هذا الشي جان كلش بعيد جاوبته جاسم روح منا المنطقه ليروح احد يكول لابويه والله يذبحوني
جاسم: - مااتحرك منا الا اطلعين واحجي وياج لو تفتحين خط من اتصل عليج اني مو لعبه عندج وعند الخلفوج افتهمتي لو لا
سمر: فدوه جاسم صوتك الجيران منا عيب روح واني اخابرك
جاسم: مااتحرك كتلج الا احجي وياج هاي كاعد بلباب البيت شعندي اليوم حتى للدوام مااروح.
سمر: روح الله يخليك والله احاجيك اشبيك بس روح واذا ماخابرتك تعال احجي كدام ابويه...
جاسم: ماشي سمر رايح بس والله اذا مااتصلتي اهجم المنطقه على راسج صعدت بالسياره بس اني اعصاب اني تضحك عليا مره ولج ليش مو حبيتج واريدج وفضلتج عالكل حركت سيارتب وسقت بكل سرعتي بحيث حركت الشارع حرك.
سمر: سمعت صوته يلعلع بالشارع وصعدت وركع باب السياره حيل والتراب وصل لراس الشارع فتحت مديت راسي الشارع كله مثعول من التراب خبال اي والله هذا اشبي مسودن طبيت وطبكت الباب سويت جاي بس ايديا ترجف من اشتعلو عشيرتك جاسم جايني من مصباح الله ماخله نفس بيا كعدت بالمطبخ صفنت شسوي هذا اذا مااخابره يبقى يلح واني مااريد احجي وياه بعد رجعت لابن خالتي شسوي بهذا ورفيف تجيني هي وامها وتصير فضيحتي على كل لسان قررت اتصل برفيف وهي تجر رجلها.
اخذت الفون مالتي وطلعت رقمها اتصل ومترد اتصلت اكثر من مره وماكو حقها ماالومها شتسوي حقها اني خنتها وخنت الزاد والملح وخنت كلشي بس بعد الفات مات وكلشي ميصلح موقف دخلت للغرفه لكيت اختي بعدها نايمه اخذت الفون مالتها وطلعت كتبت رقمها واتصلت بيها دك مرتين رفعت خط
رفيف: الو
سمر: هلو رفيف اشلونج
رفيف: اجاني صوت سامعته قبل يارب هذا صوت منو الصوت مو غريب بس الرقم غريب كلت اهلا منو ويايه اتفضلي.
سمر: قبل لااحجي اي شي بروح ابوج لتسدي بس اسمعيني هالمره وروحي
رفيف: من كالت هيج عرفتها سمر وهي قبل اشويه متصله ردت اسده بس حلفتني بالغالي اخذت نفس قوي كتلها الغي دااسمع شتردين فضيها ام الولد
سمر: شتحجين حقج وماالومج بس والله غلطه وصا( قاطعتني).
رفيف: اكلج غلطه ملطه اني شنو بيج وبي يطبكم مرض اثنينكم وحسج اشوف رقمج كدامي وروح ذاك الغالي اجي للمنطقه واسويلج زفه افتهمتي لو لا.
سمر: بروح ابوج بس اسمعي رفيف والله انتي صديقتي واحبج والي صار ماادري اشلون صار الله يخليج والله اني بعد ماخابرته ولااتصلت بي وهو لازك بيا وهسه اجانه للبيت وحجيتله السالفه كلها وهي بس صوت النفس اسمعه وتستغفر ربها
رفيف: اسمعيني زين سمر اني جاسم بالنسبه إلى مات وانتي هم وياه اثنينكم ذبيتكم بنفس سله الزباله ودرت عليكم نفط وبانزين وحركتكم وعسى ناركم تاكل حطبكم اني شنو بي طلكته وشمرته عليج.
انتي مبين تحبين الفضايل اخذي فضالتي وشبعي بي بس ها يجي يوم وتتندمين عالساعه او بالاحرى عالثانيه إلى عرفتي بيها لان هو يدور فلوس وبس وبعد اذا اتصلتي عليا قسم بمحمد اروح لابوج لدوامه وهناك افضحج حمدي ربج لسه ماسويتلج شي تره مانسيت سوالفج ويلا ولي منا ساقطه ام الولد وسديته بوجهه
بس داخلي يفور حسبي الله ونعم الوكيل عليج ياسمر انتي وهذاك الناقص.
سمر: صدمتني سمر من كالت اطلكت من جاسم اكول ليش جاي عليا قطع تفكيري صوت الفون باوعت جاسم يتصل اووف هسه ارد لو لا بقى يدك لحد ماسكت رجع دزلي مسج رد لااجي تره بعدني بمنطقتكم اني شفتها كمت اطكطك اتصل جاوبته
سمر: الوو
جاسم: هلا يحلو وينج مختفيه ولج مدكولين عندي حبيب ومااكدر بدونه ولاهو يكدر بدوني ابشرج رفيف طلعت من حياتي وهسه اني باقي بس الج كلها بس هالشهر واجي امشي عليج ونتزوج وتصيرين حلالي.
سمر: جاسم انساني مااكدر اكمل وياك انت عفت ام جهالك والي عشت عمر وياها تريد تقنعني مراح تعوفني روح شوفلك وحده متعرف تاريخك واتزوجها ويالله مع السلامه عندي شغل سديته منه وحظرته.
جاسم: اتفاجئت بكلام سمر وين الحب وين العلاقه رجعت للبيت مصدوم بقيت يوم كامل بس جكاير حاولو امي واخويه ويايه بس بقيت بالغرفه مالتي ومااحجي ويه احد بقيت يوم وره يوم وضعي يسوء يعني معقوله سمر ضحكت عليا وبيوم الصبح الجهال يمي ديودعوني لان رفيف حتاخذهم وتروح لتركيا واه ياايام رفيف ودلالها اندكت الباب طلعت اريد اشوف منو لكيت رجال متوسط بالعمر وبايده اوراق سلم وكلي انت جاسم...
اي نعم اتفضل منو حظرتك طبعا اني عرفته مبلغ من المحكمه وكل توقعي رفيف مشتكيه تريد تزيد النفقه او شو شنو بس طلع شي ابد مامتوقع
اخي اني مبلغ من المحكمه عندك باجر جلسه ساعه تسعه الصبح مقدمين عليك دعوه الشخص فلان يطلبك فلوس وانت مامسددهن وباجر لازم تحظر هاك البلاغ ووقع هنا.
جاسم: اخذت البلاغ ووقعت بدون مااحجي شي منين طلعتلي هاي المصيبه الجديده بعدني باول اسبوع عفت رفيف هيج حالي دخلت سالوني الجهال كتلهم هيج ماكو شي بس حمودي عرف كال بابا اني سمعت كلشي يعني انت باجر تاخذك الشرطه طمنته ماكو شي ورجع يلعب وبقيت حاير حسبه تجيبني وحسبه توديني منين اجيب الفلوس اني صح اخذتهن من الولد وعلى اساس نتشارك بمولده بس خلصن عالقمار ومن سافرت هم خلصت منهن والباقي انطيتهن طلب لفاتحه ابويه.
بقيت الوج كلت خلي اكول لامي بلكت تشوفلي حل رحت للمطبخ لكيتها كاعده تباوع عالم الحيوان طبعا امي ليل ونهار تحب عالم الحيوان كعدن يمها وبديت احجي وياها
ام جاسم: ياا ومنين اجيبلك اني انت تدري كلشي ماعدنه ومرتك ماخلت على حالنه حال اكلت الاول والتالي
جاسم: يمه يامره هاي مدكوليلي هو اني اكلت العدهم كله هو انتو بشنو ساعدتو حتى اكلت مرتي حالنه كله.
ام جاسم: هااا هاي لسه تفزع لبت الكليات عافتك واخذت كلشي وغلطت وسبت ولحد الان كاتل روحك عليها من هيج تريدها شكو عفتها روح رجعها ومن هاي الساعه لااني امك ولااعرفك
جاسم: يوم مو هيج الحجي بس صوتج نصي الجهال موجودين وديسمعون كلشي ميصير مهما يكن هي امهم بس الحق يقال رفيف مااخذت مني كلشي تنازلت عن كل حقوقها.
سعديه: نزلت روحها بالكبور جا المن مطلوب كل هالملايين ولك عشرين مليون وين وديتهن احجي جاسم غير الها وللطلعات والسواكه والسفرات
جاسم: يمه وروح ابويه فلس واحد مامنطيها خلصن اني دخلت بمشروع وفشل ارتاحتي هسه عندج تنطيني لو لا وكافي تحجين عالبنيه عافتنه وماخلصت منه
سعديه / ماعندي روح دير انت من امها من خالتها اني شعندي هو بطرك الراتب.
جاسم عفتها وكمت بس اعصابي تفور وينج يرفيف هسه حسيت بقيمتج من فقدتج بس بعد شيفيد الحجي باوعت حمودي كاعد ومنزل راسه والدمعه بعيونه وميمي ديلعب ميدري الدنيا وين وصلت كعدت يمه بوسته كام يبجي كال اريد اروح لماما كوم ودينه هسه
كتله ليش بابا ابقى يمي كال انتو متحبونه ومتحبون ماما وبيبي كلما نجي تحجي على ماما وهناك محد يحجي عليكم ولا يكرهونه مثلكم اريد اروح كوم وديني.
اخذتهم هو واخوه ووصلت للبيت انتظرتهم دخلو يالله دااروح سمعت صوت رفيف بالطرمه تبوس وتتلكاهم عفتها ورجعت للبيت حاير بروحي وصار ثاني يوم وتاجلت الجلسه ورجعت حاير بامري بقيت افكر ومالكيت غير حل واحد اهدد الولد عن طريق الموبايل بس لازم خط مو مالتي اذكرت عندي خط مال رفيف صح هو باسمي بس كلها تعرفه مالته دورته ويه غراضي ولكيته وراسلت الولد بمسجات تهديد.
رفيف: رجعت من الدوام مثل كل يوم لكيت ماما معطبه اشبيها ماادري سلمت كوه ردت السلام شو هاي داافوت كالت
رفيف اكعدي عندي حجي وياج
كعدت بس ببالي الف فكره شتريد مني ماما شكو شصاير كتلها احجي ماما شكو
ام رفيف: اليوم اجاج بلاغ من المحكمه ولازم تحظرين عكب باجر احجي شمسويه من مصيبه.
رفيف: ماما تحجي واني صافنه هاي من كل وعقلها وهاي منو إلى مشتكي عليا قريت الاسم مااعرفه كتلها خاف متوهمين ماما اصلا هذا الشخص مااعرفه ابد والله
ام رفيف: انجبي ام المصايب انوب كامت الشرطه ادك بابنه بجالج اريد اشوف النهايه شنو تعال مهدي شوف بتك نزلت راسك وج رح اموت وانجلط من وراج مصايبج طول العمر وراج كتلج انجبي وارضي بقسمتج ركبتي راسج لا الا اطلك وهاي النتيجه كامت الشرطه والمحاكم تجيني لليل.
رفيف: اشوف ماما انهدت عليا بدون متعرف شكو هاي اشبيها مثل واحد متحمل على واحد سمعت بيبي اجتي تركض تريد تفتهم السالفه شنو
الحجيه: اشبيج انهديتي بالبنيه بعدها ماطبت من انعل ابو جاسم لا ابو حتى الخلفه بس هو مو صوجج صوج الله إلى اخذ مهدي وعافج تكمزين على راس هالطفله مو كافي كسرتي ظهرها وطيحتي حظي كومي يمه كومي لتبجين هاي امج جاسم وامه خبلوها بسحورتهم.
رفيف: دموعي تنزل وحدها مصدومه من موقف ماما إلى حتى ماكلفت روحها تعرف شنو الموضوع او ادكولي اني اجي وياج او تاخذني بحضنها من هالدنيا الغبره والغابه إلى عايشه بيها قارنت بيها وبين بيبي إلى جان كلبها كلش طيب ومره فقيره ومن اهل الله ربي ليش ماخليت هاي امي استغفرت ربي وكمت.
صاحت بيبي ورايه بدلي وانزلي حتى تتغدين التفتت عليها كتلها مااريد سم اريد انام راسي ديوجعني شلت حذائي وصعدت لغرفتي إلى صارت إلى ملجا وسجن بوقت واحد صارت المكان الوحيد إلى اشكي بي همي كابلت صوره بابا ويقيت ابجي واشكيله وضعي وحالي وادعي ربي يقويني على هالمصيبه إلى جايتني ومر اليوم طبيعي اني بقيت بلا اكل كضيتها بس بجي وماما جوه بس تعد وتصف عليا بدون سبب.