رواية شهوات رجل ظالم للكاتبة زهراء أمجد الفصل العاشر
بقيت لليل ابجي واشوف حمودي يباوعلي واحس عيونه تحجي كانهه يكولي كافي ماما اسكتي اووف ياروح امك ان شاء الله حظك حلو مو مثل حظ امك
اجه جاسم بالليل شافني عيوني حمره دم وكوه احجي سالته يريد عشه كال لا متعشي بره ويه جماعتي بكلبي كلت بعد احسن
جاسم: اشبيج فوفه شو اليوم باجيه منو وياج احجيلي شكو صايره اعصاب
رفيف: ماكو شي سلامتك ونزلت دموعي اشكد حاولت ماابجي بس ماقاومت.
جاسم: اباوع عليها من كلمه وحده كامت تبجي وتشهك مستهضمه تقربت عليها اخذت منها حمودي وضميت راسها لصدري كسرت كلبي اشبيج عيوني انتي بس دفهميني شكو مو كلبي صار نار منو وياج امج جانت هنا هزت راسها بمعنى اي كتلها واكيد حجت كلمه غثتج بيها هي دومها هيج احجي شكو
رفيف: جاسم طلكني
جاسم: بعدتها عن صدري وكتلها شنووو انتي تخبلتي ليش اطلكج وج شصار احجي.
رفيف: مثل ماسمعت طلكني احسن الك والي نطلك ونكون اصدقاء وعلاقتنه تبقى طيبه احسن من المشاكل
جاسم: بعصبيه ولج احجي شمسويه ومنو قره براسج شنو نطلك شنو اصدقاء اشبيج رفيف عفتج العصر مابيج شي طلعتي ورجعتي متخبله عليا شكو احجي.
رفيف: شكو بعد اسوء من إلى ديصير جاسم اليوم من رحت للدكتوره كالت بعد ميصير عندي اطفال جاسم تعرف شنو بعد ميصير اطفال واني مقشمره نفسي واخذ مانع واني اصلا من وره العمليه بعد كلشي ميصير عندي حالي حال اي مره عاقر تعرف شنو عاقر وانت بعدك ولد وصغير وعمرك 26 سنه يعني إلى بكدك بعدهم ولد مامتزوجين واكيد اهلك يردون احفاد واني هذا حالي فليش تبقى ويايه وتعيش على طفل واحد طلكني وروح اتزوج غيري تترس بيتك اطفال واني عوضي بالله وبحمودي إلى اتمنى متاخذه مني.
جاسم: اشوفها تحجي وتبجي منهاره حضنتها وكتلها هذا إلى سمعته مااريده ينعاد انتي مو عاقر مثل ماخلفتي حمودي حيصير عدنه غيره وهذا رزق الله ومحد يعلم الغيب وشنو الدكتوره قابل هي رب العالمين وتقسم الارزاق
وثاني شي نفرض ماصار انتي شنو ذنيج واعوفج هذا الشي مو بايديج ربج هيج كاتبلنه ومنو يكول اذا اتزوجت يصير عندي اطفال اسمعي رفيف هذا الموضىوع يبقى سر بيناتنه.
والي يسال لو يحجي مشيها جاسم ميريد هسه طفل يكول بعده ابنه صغير واحنه صغار ووضعنه مو تمام ممنوع اي احد يعرف انتي ميصير عندج طفل
وهذا رزق الله وكومي يلا بدلي خلي نطلع نفتر بالسياره وكافي كابه كاعده تنوح ومكابله هالطفل مو خطيه دكومي بسرعه حتى نتعشى بره كتلني الجوع.
رفيف: يحجي جاسم واني مامصدكه معقوله جوابه هيج ربي الحمد لله والشكر من اتفهم الموضوع ولو منو يكول متبدله امه عليا المهم هو ساكت كتله مااريد اطلع مالي واهس وهسه حكوم اسويلك عشه ماادري انت مامتعشي مو كلت اكلت ويه جماعتي
جاسم: شفتج تعبانه وحال الضيم حالج ردت افتهم شكو وبعدين اكل وثاني شي ادكومين غصبا ماعليج يلا فدوه بنيتي كومي فوفه لخاطر حمودي خطيه محبوس دكومي عيني.
رفيف: كمت واني هموم الكون كله فوك راسي وكوه امشي صبرت امري لله غسلت وجهي ولبست عبايه اسلاميه فوك التراك وشمرت الشال وطلعت افترينه وجابلنه جاسم لفات واني ماردت بس بقى يتوسل بيا كوه اكلت نص صمونه.
تركت المانع ورجعت حياتي بس شغل البيت وحمودي وجاسم صار كلش زين ويايه ويضحك ويسولف وحتى مرات يرجع من الدوام بعد ميطلع من البيت ومشت الايام وصبرت امري لرب العالمين واجه عاشور وطلعت للمواكب ونذرت بلكت يصير عندي طفل جنت من اشوف موكب او تعزينه ابجي من حركتي وقهري وسوي مجلس عزاء اني متعلمه كل سنه اسوي ونظفت ورتبت كلشي وفرشت البيت وحدي.
وجان املي برب العالمين ميخيب ضني وان شاء احصل مرادي اشتغل وادعي ربي حققلي طلبي الهي مثل مارزقت مريم العذراء وهي طفله ارزقني بطفل ثاني الهي مثل مارزقت النبي زكريا بيحيى ارزقني بطفل ثاني ربي بجاه عبد الله الرضيع ادعي واشتغل.
ماخليت امام منخيته بجاهم عد رب العباد يرزقني بطفل وبديت القرايه مالتي جانت المغرب وخلصتها 3 أيام مثل كل سنه رغم ماجان جاسم يرفض تبقى 3 أيام بس اني بقيت مصره على كلامي وبعدها صار مجلس يم اهلي وهم رحت واشتغلت وشلنه التخم والزوالي احسر ظهري انكسر لان تخم اهلي اثكل من تخم بيتي وخلص عاشور وبده صفر وهوسه.
الاربعينيه واني متعلمه كل سنه اروح اخدم الزوار بموكب وبنهايه اليوم اجيب وجبه تبات يمنه بالبيت واقوم بواجبهم طبعا ارجع الكه ماما بالبيت عندي طابخه عشه للزوار وبعدها اني ابدي اسوي السلاطه واصب واغسل ملابسهم.
واكعد من الفجر اسويلهم ريوك ويطلعون وهم ارجع للموكب وجان إلى اول سنه نروح للزياره بيوم الاربعين جنه دوم نروح بالبدايه حتى نرجع نتفرغ للزوار وطلعنه بسيارته اني وماما وحمودي وخالتي زهره وبيبي وبت خالي واب خالي كلنه بسيارة جاسم وصايره السياره بيت لحم ناس فوك ناس وصلنه لسيطره ام هوا كالو بعد ممنوع تدخل السيارات اكو بعد السيطره سيارات تنقلكم امنه.
السياره يم موكب وانطناهم رقم تلفون جاسم وصدك عبرنه السيطره جان اكو هواي سياره وبقينه نصعد من سياره ننزل من سياره لحد مادخلته كربله وبقينه نمشي واني دموعي تجري اشوف احنه نمشي ومواكب وسيارات ونكول تعبنه الله يساعدج
ياسيدتي ومولاتي فوك مصيبتج وذبح اخوتج وسبيكم انوب اخذوكم سبايا للشام طبعا رغم ماجانت اجواء حزن ومواكب بس بداخلي كلبي منشرح من اشوف ذكر اهل البيت عليهم السلام.
يتجدد كل سنه وكل عام وصلنه للحرمين وجانت المواكب والعالم وهوسه وطبخ وصلنه لكينه موكب مال اهل الكاظميه بقينه بايتين عدهم للفجر واحنه كاعدين ناس تلطم وقرايات وناس تزور وناس تصلي.
وناس تطبخ اجواء خشوع قويه حيل صار الصبح وتريكنه من الموكب وبده القارئ يقره محاضره الاربعين واشلون اذوهم وشصار بيهم عفناهم ورجعنه لان ورانه طريق وخاف منلكه سيارات ورجعنه وماخليت وسيله نقل ماصعدت بيها حتى تكرمون عربانه صعدت وفتنه بطرق جانت كلها طسات والطريق معكر وكوه يالله وصلنه لسيارته.
اتشكرنه من الموكب إلى بقينه يمهم السياره ورجعنه للبيت بس كلش تعبانين واجه يوم وفاه النبي صلى الله عليع وسلم وبيبي جانت ناذره اذا كمت بالسلامه من عمليه المراره تاخذ صينيه لقرايه بيت اختها وتاخذني نروح نحظر المجلس وتلبس الملايه مبلغ من المال.
وفعلا اجرت بيبي سياره واخذتنه اني وماما وحمودي حبيب امه ورحنه وجان بيتهم بالسده والطريق ماشاء الله كله طسات بحيث من وصلت استفرغت لان طبعي اذا طريق معكر وطويل ادوخ واستفرغ وخلصت القرايه ورجعنه للبيت بس كلما تمر الايام واني صحتي رجعت تتعب وتتاذه ونفسي تلعب.
وبديت اقطع الاكل جاسم انتبهه عليا بقى يتوسل بيا اروح اسوي تحليل خاف مريضه ماقبلت بعدين قنعني واخذني للطبيب بس تفاجئت من سؤال الطبيب انو اشوكت اخر شهريه اجيتج طبعا خلال 3 شهور هي ماكو واني ناسيتها لان ملتهيه عاشور وصفر وهوسه المواكب فنسيتها ومااجتي على بالي حولني اخذ تحليل حمل بس اني متاكده مو حامل كتله دكتور اني مريضه وميصير عندي اطفال كال الطب مو دائما صحيح وهذا الشي رزق الله اخذني جاسم بالقوه.
وحللت وطلعت مو حامل طبعا بيومها شبعت بجي ورجعت للبيت الدكتور ماقبل ينطيني اي شي غير اينو فوار للمعده ومشى الاسبوع واني حالتي نحو الاسوء ماما جبرتني اروح للدكتوره وهم من. رحت حولتني تحليل كالت مرات ميطلع من اول مره اخذي تحليل دم اضبط.
وهم طلعت مو حامل انطتني ابره اختبار وكالت اسبوعين اذا بقيتي نفس الحاله راجعيني كتبلتلي مراجعه اخذت الوصفه وطلعت اشتريت العلاج ورجعت للبيت واني حايره بزماني ياالهي شسويت وهيج دتعاقبني والله عمري مااذيت دوده صبرت امري واتوجهت لاهل البيت هومه ادري بحالتي وخلصت الاسبوعين والحال نفسه كلشي مااتغير ورجعت للدكتوره لان عندي مراجعه وجنت كلش تعبانه نفسيا وجسديا رحنه للعياده ومنتظره السره مالتي يجي.
ودخلت للدكتوره شافت بطني وارمه واعراضي مال حمل بس حمل ماكو هم طلبت مني تحليل دم وكالت اذا ماكو حمل سوي سونار بطريقج وتعالي ورحت وحللت دم وانتظار النتيجه جان يمر عليا كانهه سنين مو دقايق وطلعت النتيجه وخيبه امل ثانيه اني ادري بروحي ميصير عندي طفل.
بس اريد اعرف شنو الاعراض وشنو بيا طلعت من المختبر ودمعتي على خدي وماما بقت تقنع وتسكت بيا واني القهر ذابحني وصلنه للسونار وبقينه ننتظر الدور مالتي وصلي الدور ودخلت واني كوه امشي توكلت على رب العالمين وصعدت عالسديه والخوف جان ذابحني ونفسيتي تعبانه حيل جان كل إلى ببالي انو رحمي مريض بقيت اقره ايات وهي تشوف بالجهاز واني احس الوقت وكف بعد ميمشي اخير شي سالتها فدوه دكتوره شنو بيا جاوبتني بكل برود.
ماكو شي روحي للدكتوره وهي تفهمج
مسحت بطني من الجل وكمت هنا اسودت الدنيا بوجهي من كالت هيج عرفت بيا خبيث وبعد الوكت راح وميفيدني اي علاج بقيت ابجي واخذت التقرير منها وطلعت شافتني ماما اجتي تركض
هاا بشري اشبيج تبجين وج دحجي مو دمي نشف.
ماكالت شي بس كالت الدكتوره تفهمج واكيد متريد ادكولي بيج خبيث خاف اكوم ابجي والعالم تلتم فتريد الدكتوره هي تبشرني ادري بروحي مريضه بس ليش ياالهي شمسويه عندك وهيج تعاقبني ليش خلفتيني ماما ليش المن جبتيني للعذاب وطيحان الحظ ليش كله من وراج امشي وافرفح وصلت للدكتوره بسرعه دخلتني السكرتيره شافتني هيج وضعي
اشبيج ماما وين التحليل ليش هيج منهاره.
ياتحليل مو كتلج مو حامل مو ادري بروحي ميصير عندي طفل ادري بروحي عاقر ورحت وطلعت مو حامل ورحت للسونار وماقبلت ادكول اشبيا ادكولي روحي للدكتوره تفهمج فدوه دكتوره لدكوليلي خبيث والله مالي حيل الشوغات والنبي مابقى عندي طاقه تعبت والله منين اتلكاها فدوه دكتوره شوفي التقرير
اخذت التقرير منها وادعي ربي كون مابيها شي هالبنيه كسرت كلبي وفتحت التقرير وقريته وانصدمت من المكتوب لا مستحيل.
رفيف: اباوع للدكتوره تقره وصافنه اني هنا كلت لعد هايهيه يعني خبيث محقق كتلها فدوه احجي الله يخليج والله ماظل عندي صبر ارحموني ياعالم
ههههههه وج ياخبيث انتي حامل 3 شهور وضع الطفل طبيعي بس اشويه تعبانه لان البيضه صغيره وكلشي مابيج وهذا الحقير جان يلعب علينه بالتحليل مبروك الف مبروك.
رفيف: دكتوره شنو حامل شنو 3 شهور اني مو ميصير عندي اطفال شنو الموضوع تركت الحب بنفس الشهر اصير حامل مو كتيلي انتي بعد ميصير عندج مااكدر هسه اسوي طفل ابني بعده صغير خطيه دكتوره مااريد هذا الطفل فدوه سقطي
مااريده وين اكدر ابني ماصار عمره سنتين شنو ذنب هالطفل إلى يجي فدوه اروحلج سقطي واشكد تردين انطيج.
الدكتوره: شسقط منه بتي مو زين عليج الطفل جبير وحتخلصين شهر الثالث انتي ترديني ادخل جهنم طفل بي روح وبي نبض شنو تذبي مو جنتي تردين طفل وهذا ربج رزقج ورحم حالج هسه اكتبلج فيتامينات ومقويات وكل شهر تجيني مره لان انتي كل يوم واحد بالشهر ادخلين بشهرج
رفيف: يعني اني حامل من يوم 1/ 1 /2009.
واني ماادري صح هو رزق بس ابني صغير. بعده خطيه اشلون حدربها وياهم 2 وبيتي وحدي انطتني الوصفه وطلعت كوه اجر النفس تعبانه من البجي والنوح والتفرفح اجتي ماما تركض
ها بشري ولج شكالت الدكتوره كلبي حيوكف من دخلتي لسه ماخليت ايه ماقريتها احجي اشبيج صافنه.
ماما تحجي واني بالي مو يمها ابد صافنه مدري اضحك وافرح على رزقي وربي مافشلني مدري ابجي لان ابني صغير ماشبع مني ولا شبعت منه كضيتها بس مرض بمرض كتلها بصوت ناصي ماما اني حامل
رحاب: هي كالت حامل اني بهتت اريد استوعب الموقف ماكو كتلها شنووو عيدي مافهمت منو حامل.
رفيف: شنو منو حامل اكلج اني حامل قابل منو يحبل جاسم مثلا صح مابين بالتحليل بس بين بالسونار وليش مابين مااعرف اله بيها حكمه حامل بالشهر الثالث حخلصه وهاي الفتره كلها عندي تنساه واني ماادري واشتغل شلت غراض واشكد اشتغلت واني ماادري بروحي.
ام رفيف: هههههه الف مبروك بنتي يتربى بعزكم وان شاء الله ادكومين بالف سلامه شفتي ياامي ربج مينسى عبده ماصارلنه اربع شهور من طلعنه منا وانتي تبجين هسه طلعتي تضحكين يلا خلي نشتري الوصفه واجيب منا حلال المشاكل وباجر نسوي غده لوجهه الله وخابري جاسم بشري
رفيف: اتصلت على جاسم رد بسرعه
ها وين انتي بشري شصار مصار.
اشبيك جاسم وحده وحده ماكو شي صار بس حللت وطلعت مو حامل وحولتني سونار وطلعت حامل اسمعه يكول شنووو عيدي منو حامل
كتله امي حامل باخو لحمودي اشبيك غير اني حامل بشهر الثالث
اشلون يعني حامل
يعني اكو بشر طفل عنوني ببطني غير اشبيك جاسم
انتو هسه وين رفيف احجي اني جايج
احنه بباب العماره مال الاطباء هسه حناخذ تكسي ونجي
لالا لتتحركين اني اجي اخذكم ابقو ثواني واجيج.
وصدك مااتاخر بين مااخذت العلاج وماما راحت جابت حلال المشاكل واجتي اجه جاسم كال اتقدمو ليكدام لان الطريق سادي
صعدت بالسياره واشوف جاسم طاير من الفرح اتصل على امه ديبشرها وكان جوابها كالعاده يشك الكلب
ام جاسم: مبروك بس بعده ابنك صغير وضعكم الماديه مو زين اشلون تكدر على مصرفهم ومرتك حظرتها كله تنطي ممه متكلف روحها وترضع طبيعي تخاف على جسمها يخرب ومتخاف على جيبك وفلوسك واكيد حتجيب بنيه مثل امها.
جاسم: يمه اشبيج اول شي مصرف حمودي كله على خالتي ام رفيف واني مادافع ولا فلس وثاني شي شيجي من الله هلا يلا مع السلامه
اي ميعجبك كلام امك بعد. روح لهاي بت الكليه ام البناطير شسوي بعد بيا اني اربي واتعب وانطي للغير هو انت صرت ابنهم مو ابني بعد وسديت الخط.
رفيف: صوت الفون مال جاسم عالي بحيث سمعت الكلام كله بوضوح بالله هاي شحجي وياها كبر حتى كبر وشنو كبرت وربت اشو هو جاسم من عمره 40 يوم اخذوه بيت جده ولحد ماصار صف ثاني كليه وين لكيتي وربيتي اوووي يطبها عرج وكون يجي ولد واكسر عينها واسمي على اسم بابا فدوه اروحلك يابابا حيجيك حفيد ثاني.
وطبعا هذا كله ومن سمعت ام جاسم كلبت وجهه وكالت جذب بس اني غلست عنها يبطها مرض اهم شي جاسم جان كلش زين ويايه وصار يصرف عالبيت بعد ماجان كلشي مينطي ولا فلس كل مصرفنه من ماما ومن احاجي يكولي ماعندي مطلوب الراتب كله للديانه يادوب اطلع فلوس البانزين مال السياره وبدينه نتحظر لقدوم حبيبي ونور عيوني ابني الثاني.
مرت الايام ودخلت بشهر الرابع وماما عافتني وراحت للعمره وهاي اول مره افاركها هالاكد رغم قساوتها بس روحي معلكه بيها مااكدر بدونها كلها تدري بيا اموت من دونها وصدفه صارت خربطه بالطيران واتاخرو هناك وصارت عمرتهم 19 يوم واني بهذني الايام شفت المر ليل ونهار ابجي ورجعت ماما متحمله النه اشكال وجهزت الطفل الجديد كله مناك حتى الكريكوت جابته وجايبه سياره لحمودي ومامخليه شي ماجايبته وجابلتي زنجيل ومداليه ذهب اشويه هالفتره ماما اتحسنت ويايه وصار تعاملها احسن من قبل وبدت بطني تكبر وحبيب امه بده يتحرك وكل حركه ادعي ربي يكومني اني والطفل بالسلامه واهم شي تمام الخلقه وكونه ميطلع يشبه جاسم او اهله.
ومرت الاشهور ودخلت بشهر السابع وحجزنه للشمال رغم ماجنت حامل بس كدرت اقنع جاسم و قنعت ماما تجي ويانه ورحنه والعالم كلها حسبالهم سمينه وعندي كرش لان اني طبعي بطني مو جبيره من اصير حامل كانهه سمينه حتى بناطيري نفسهم ابقى بيهن بس باخر شهرين البس صدريه حمل تونست حيل بالشمال رغم حملي وساعات تصير عندي اوجاع اكول حجيب بس الونسه تنسي الوجع ههههه.
ورجعنه من الشمال وصار عندي الالم مو طبيعيه وكلها كالو حيل اكو وحده عاقله تسوي سوايتج وتروح للشمال وللسليمانيه وانتي حامل عادي تحملت كلام الكل ورحت للدكتوره وفحصت نبض الطفل كالت كلش تعبان وحولتني سونار ورحت واخذت سونار وصار الشي الغير متوقع
رفيف: دكتوره ممكن اعرف وضع الطفل وجنسه.
الدكتوره: الطفل نازل وتعبان حيل وجنسه ولد حاولي تنامين وترتاحين هاي الفتره لان انتي بنهايه بالسابع واذا صارت عندج ولاده مبكره مو زين عليج وعالطفل
رفيف: هي تحجي واني صافنه مدري اضحك مدري ابجي من الفرح شعور لا يوصف اول وحده بالعشيره تخلف ولد ثاني مباشره بعد الاول ماصدكت كتلها دكتوره دشوفي زين متاكده ولد
الدكتوره: هذا ولد وواضح وجبير وكلشي مابي بس اهتمي بنفسج هالايام ابين مدخلين بشهرج.
رفيف: كمت من السديه مال السونار واني طايره من الفرح دكات كلبي تقره الف اذا مو اكثر واخيرا حيجي الطفل إلى اسمي على اسم بابا الله يرحمه واخيرا حيرجع اسم بابا يتكرر وينذكر رحمتك ياربي اشكد ماجنت فرحانه بس كلش خايفه لان ادري بروحي الفرح ميدوملي ابد وراح تجيني كفخه من الوكت ادمر حياتي طلعت من غرفة السونار واني اضحك تلكتني ماما ها احجي شو تضحكين كتلها ماما ولد بيا ولد حيجي ولد ثاني ماما ربي عوض صبري خير رحمتك ياالهي واخيرا حيجي اخ لحمودي باركتلي ورحت للدكتوره وهم اتاكدت منها ولد وباركتلي والحمد لله اهتمت بنفسي.
واجه رمضان واني طبعا ماصمت لان حامل بنهايه الثامن ورتبت كلشي قبل ودلاتي وحتى حمودي فرحان رغم جان كلشي ميفتهم بس من يشوفني ارتب بملابس اخوه وشغلاته يبقى يلعب بيهن ويهوس ويضحك عشت احلى فتره بحياتي رغم ساعات اسمع من الكرايب الله يعرف المن ينطي ولد والي ادكول خوش والله اشكودتها وطبكتهم 2 بس اني هذا كله ومااهتم صح مرات انقهر اكول ليش هيج البشر اني عمري ماتمنيت شر لاحد ولاباوعت على لكمه غيري اشبيها العالم ويايه ودخلت بشهري والحمد لله وضعي ووضع الطفل زين وبليله العيد خابرتني خالتي زهره.
الوو هلو رفيف
هلو خاله اشبيج شو صوتج مدري اشبي خير خاله بيكم شي
ها لا بس ردت جاسم وينه
هذا موجود شكو خاله قلقتيني اشبيكم صاير بيكم شي
ها لارفيف اشبيج كلشي ماكو اريده يسويلنه الكهرباء كوليله خلي يجي بسرعه
اي اي هسه حكوله واخلي يخابرج باي
باي
رفيف: جاسم كوم زهره تريدك خابرها وهسه بيت اهلي يردوك تروحلهم
جاسم: اي هسه حخابرهم واشوف هسه اني شيطلعني بهالليل وباجر عيد.
رفيف: اشبيك ياجاسم هسه انت شعندك بالعيد شو كاعد وساكت طابخ منظف مسوي كليجه شو بس رحت حلقت واجيت
جاسم: اهووو اشكد تلغين اكوم اخابرهم واولي احسن اتصلت على زهره جان ادكولي لتحجي كدام رفيف.