رواية شهوات رجل ظالم للكاتبة زهراء أمجد الفصل الحادي عشر
جاسم: اهووو اشكد تلغين اكوم اخابرهم واولي احسن اتصلت على زهره جان ادكولي لتحجي كدام رفيف
امي وكعت هسه بالحمام وايديها اعتقد انكسرت تعال بسرعه حتى ناخذها للمستشفى هاي حامل بس تسمع تتخربط علينه والليله عيد
اي خاله هسه جاي وسديته منها
رفيف: ها جاسم شكو شو وجهك كام ينطي الوان
احجي اشبيهم اهلي
جاسم: ماكو على مود الكهرباء اني رايح ساعه وارجع لان احتمال امر مناك على جماعتي مو تبقين كل اشويه تخابريني.
رفيف: لعد اذا حتروح لجماعتك اخذني لاهلي وياك هم اشوفهم وهم ابقى يمهم ليش ابقى هنا وحدي اني وحمودي
جاسم: رفيف لتعرضيلي خلي ابنج واكعدي وين تروحين وانتي جنج بطيخه وهومه ماعدهم كهرباء وكاعدين بالظلمه ابنج يروح يخترع اكعدي واسكتي
رفيف: اهوووو بطلت مااروح عافني وطلع بس شو مستعجل خابرت على ماما اريد افتهم شكو.
ام رفيف: ههه ها لا ماكو شي بس نريده على مود الكهرباء ويلا روحي رجلج اجه سديته بوجهه بس اريد اروح لان دنطلع وهاي خابرتني واذا مارديت ادري بيها تلبس عبايتها وتجي تسويها مخبله بتي واعرفها ولو حسيت بيها مااقتنعت بس شسويلها اخذنه جاسم اني وامي وزهره للمستشفى وامي الطريق كله تون وتبجي وتحجي على زهره لان لزكت بامها الا تدخل تسبح وشلعو كلبنه بالمسشتفى لان ليله عيد وكلها مجازه وكوه بالف ياعلي كدرنه نحصل دكتور وميتحجه وبالي يم رفيف بس لاتروح للبيت.
كملنه ايد امي ورجعني ووصيت جاسم ميحجي اي شي كدام رفيف هو هم وصلنه وراح عالسريع للبيت
رفيف: شو وضع اهلي ماعاجبني اشبيهم هذوله اروحلهم للبيت اشوف شكو بس هذا حمودي نام ويو اعوفه وحده بقيت حايره شسوي ماادري ردت اخابر جاسم بس كلت هسه اني اشبيا الوج هسه يرجع وافتهم منه الموضوع بقيت انتظر ومااجه جاسم الا بطلعان الروح شلع كلبي تلكيته من الباب ها جاسم شكو اشبيهم اهلي.
جاسم: شكو اشبيج مابيهم شي مو كتلج الكهرباء مالتهم ماكو بالبيت وسويتها واجيت ابنج وينه شو ماله حس
رفيف: نام سبحته وبدلتله ولعب وتعب ونام وانت رحت وبعد مااجيت اتاخرت يلا تريد شي اني حروح انام
جاسم: هاي اشلون افهمها يالله باجر تعرف وترضى هسه اذا اكوللها تثبر الدنيا لان تحب بيبيتها خليني ساكت احسن وهي باجر تصفى
رفيف: رحت للغرفه داانام واني كلش ضايجه ومقهوره من جاسم وحاسه اكو شي بس ميقبل يكولي عفته ونمت.
كعدنه الصبح لكيت جاسم نايم عفته ورحت غسلت وسويت ريوك هو حس واجه صبح عليا وعايدني طبعا عيديه ماكو ومن الخطوبه ولحد الان الحمد لله والشكر فقره العيديه ناسيها بالبيت مالتنه عادي تعلمت لا عيديه ولا ملابس جديده وهمزين ماما طالعه مشتريه لحمودي ملابس.
واني كتلها مااريد لان حامل وخاف اولد فمااريد شي تريكنه وخلصنه وسبحت حودي لان كل جسمه اتريك وياه مو بس حلكه هههههه وبدلتله وبدل جاسم واني هم لبست صدريه مالتي وطلعنه رحنه لاهلي دخلت لكيت ماما بالمطبخ سلمت عليها وعايدتها.
وطبيت تلكتني خالتي زهره هم عايدتها وبوسو حمودي إلى يمشي كدامي فدوه لعيونه صاير رجال شاب دخلت للهول دااسلم على بيبي الحجيه تفاجئت لكيتها نايمه وايديها مجبسيها خطيه تكسر الخاطر ركضت عليها وحضنتها وكمت ابجي كسرت كلبي واذتني حيل احبها لان هي الوحيده إلى متصيح بيا وتحبني وشريد تجيبلي ادكولي انتي من ريحه الغالي انتي بتي واني إلى ربيتج مو امج.
امج وره وفاه ابًوج راحت كملت معهد معلمات وعافتج يمي انتي روحي وحياتي اذكر كلامها واني حاضنتها وابجي وج يمه حبيبه بيا ولا بيج انتي امي وظهري وسندي لتعوفيني صح هي بيبي بس اني اصيحلها يمه بقيت ابجي وكلهم داير مدايري يتوسلون بيا حتى اكوم وموزين عليا لان حامل ويخافون عالطفل يروح يتعب كوموني من يمها كتلهم اشوكت وكعت وليش محد كلي احجو ليش ساكتين
جاسم: اتقربت عليها حتى اكومها جان تعيط بيا وتوخر مني.
رفيف: انت تدري وساكت اشوفك من البارحه رحت ورجعت واني اخر من يعلم ليش ماحجيت ليش محد خابرني اني مو بتكم ماكلتوً يروح يصير بيها شي واني ماادري بقيت احجي وابجي وهمه يحاولون يهدون بيا.
بس ماسكتت ولاخدأت بقيت افرفح لحد ماتعبت واحس عيوني تعبت من البجي وبطني كامت توجعني حيل كمت من يمها غسلت ورجعت كعدت بس اوجاع بدت تزيد عندي بس لا ولاده مو وكتها ربي الدكتوره مالتي ماموجوده رايحه لعيالها وين اروح اني بقيت اقره ايات وادعي بس خلي بعدي اليوم على خير اجو خالاتي كلهن وخوالي واشويه صرت احسن.
لان كلها كاعدين وضحك وسوالف وجمعه عيد صح جانو كلهم مقهورين على وضع بيبي بس الكل ضم قهره بكلبه اغدينه وكملنه غده والالم تزيد للعصر ماتحملت كتلهم بعد مااكدر عندي ولاده
خابرت للدكتوره كالت اني رجعت على مودج كلت خطيه خاف تتوازه تعاليلي للبيت ونشوف اخذني جاسم وماما ورحنه للبيت كالت بعدج احتمال تتاخرين لباجر الظهر حنطيج حبايه اخذي نصها.
اليوم واذا ماكو شي لباجر اخذي النص الثاني طلعنه لكيت جاسم هو وحمودي بالسياره منتظرين كتله خلي نروح نحجز بالمستشفى الاهلي خاف اتوازه بالليل ونشتري علاج ونرجع
جاسم: اي هو احنه شعرفناها ابقى يجاسم ودي وجيب وماكو ولاده تعلمت اني عليج اذا متشغليني سايق متجيبين وتاليها توازيني بنص الليل ويطيح حظي.
رفيف: اشبيك جاسم اني بايدي اني مااكيف اجيب واخلص مو روحي طلعت وحتى الشهر هم حيخلص واني ماكو شي درت وجهي للجامه بس صدك قهرني يعني فوك الوجع هذا حاير بالسياره اوووف يربي منين اتلكاها
وصلنه لبيت اهلي بعد ماحجزنه واخذنه العلاج والكل منتظر النتيجه كتلهم إلى صار جان تكول صابرين
والله شكلج ابد مو مال ولاده والطفل صاعد اصلا بعد العيد لو تجيبين لو لا.
لالا عفيه ابيش طالبتني اذا ماجبت لباجر اروح اسوي عمليه كافي مليت اريد اخلص انسكمت بهذا العيد لاطلعت ولاشفت شي بس صعد الطفل ونزل الطفل ادري قابل هو دولار
اني كلت هيج وهذني خربن ضحك عليا بس صابرين كالت لتلعبين بروحج ولتسووين عمليه تره ينشلع كلبج وتتاذين
الله كريم خلي نشوف لباجر.
اذن المغرب وصلو كلهم وكل وحده اجه زوجها اخذها وطلعو يفترون اني اتفقت ويه جاسم نطلع وره المغرب نروح نفتر ونروح للسندباد حتى اشويه نغير جو وخطيه حمودي محبوس ماطلع سوده عليا ماما كالت حروح اشوي بالحديقه كباب وتكه عالسريع لان خاف تصير عندج ولاده وبقيت اني وحمودي بس الاوجاع بديت تزيد اخر شي كتلهم الحكولي بعد مااتحمل.
اتصلنه بخالتي تجي يم بيبي لان وضعها تعبان واجه جاسم اخذنه اني وماما وخالتي زهره وحمودي انخبصنه بوقتها لان اخذني الوجه بعد مااكدر اكوم وكوه وصلنه للمستشفى.
وبالطريق خابرنه الدكتوره كالت اني بالمتجع اطلعو كدامي اني جايه وصلنه للمستشفى والطرق ازدحام لان عيد واول يوم وكلها طالعه بالف ياعلي وصلنه للمستشفى دخلوني عالسريع مالكينه غير الحارس كال ماكو احد كلهم راحو طبعا ماما استلمتهم دك رزاله رجعنه خابرنه للدكتوره كالت اذا هيج اخذوها للحكومي واني مااكدر اقدملها اي شي بس اكو هناك ممرضات.
اني هنا متت بدمي منا الوجع منا اريد احد ينقذني وماكو مثل غركان ويقاوم بموج بحر وهو ميعرف يسبح بعد مااتحمل انهارت بس ابجي وادعي واشوف ماما مخبوصه وجاسم يفتر يريد يساعدني بس ميعرف شيسوي وخالتي تبجي وتدعي واني ادعي والوجع ذبحني صح هنه يجوز دقايق او ثواني بس تمر عليا كانهه سنين اصعب موقف عشته.
بحياتي ولو حياتي كلها مواقف سلبيه الحمد لله والشكر اخر شي فكرت ماما واتصلت بجيرانه تعرف ممرضه مضبوطه وحبابه واخذت رقمها عالسريع وخابرتها ماما واني اصيح من الوجع احس الطفل حيطلع بقيت اصيح ولكن رح اموت الحكولي الطفل حيطلع.
حصلتها ماما للممرضه والحمد لله جانت دتريد تطلع تعايد حماتها واطلعنه سوه الطريق جاسم دقايق بحيث حتى اشاره المرور ضربها ماوصلنه الا اني باخر نفس دخلتني نومتني بغرفتها عالجربايه مالتها خطيه بسرعه لبست الكفوف وجان وضعي كلش متازم بحيث مااتاخر يمها دقايق ونور حياتي وحبيبي مهدي الصغير إلى من اول ساعه شفته حسيت وجود بابا يمي الف الحمد لله والشكر عوض صبري بقمر ثاني.
حينور حياتي ويحميني من هالعالم الحمد لله ربي واخيرا صار عد حمودي اخ وسند فديت وليداتي صارو اثنين حبايب كلبي سالت الممرضه فدوه خاله شوفي كامل مابي شي
الممرضه شنو السالفه خاله هذا ابنج حلو ويخبل وجنه ورده حتى طلع يبجي ماكو داعي اضربه اشوفها شايلته من رجليه عالمكلوبي كتلها فدوه ليروح يوكع الله يخليج عدلي وهي تضحك.
ادكولي ها تحبي كلتها اموت عليه هذا وليدي نظفته واخذته منها فديت الكفشه شعره جان نازل على عيونه وكثيف حيل احنه عدنه وراثه الشعر الطويل وكثيف وسرح الحمد لله شعره مو على جاسم ابو كروعه هههه والخشم عنوني والحلك اصلا مختفي وعيونه كبار والرموش واصله للحاجب بقيت اباوع عليه واشم بيه طبعا بت الممرضه رادت تشوفه.
وجانت الولاده كلها هي حاضره يمي ولازمه ايدي اخذته وطلعت بي لجاسم حتى يشوفه اخذ شافه وانطاه لزوج الممرضه جان امام جامع كبر باذنه ودخلي حمودي يبجي مقهور عليا حسباله اني بيا شي بوسته وحضنته جانت اسعد لحظات رغم قبلها جنت بين الحياة والموت.
بس الحمد لله والشكر عدت سلامات بقيت اشويه ارتاحيت وخالتي خابرت الكل بشرتهم وبعدها رجعنه والطريق كله جاسم يدك هورنات فضحنه وجان يوم 22/9/2009 اول يوم عيد الفطرالمبارك واحلى عيديه من ربي هو ميمي حبيب امه.
وصلنه باركولي اهلي كلهم ولكيت خالاتي رجعن على مودي وكلها ملتمه بعدها صارت ساعه 11 بدت القوافل كلها تروح وكلما تروح خاله يدخل زوجها يسلم عليه ويتحمدلي بالسلامه وياخذ زوجته واطفاله ويروح اخير شي بقت وحده من خالاتي هي عدها بس 3 بنوتات دخل زوجها سلم جان يكول اي هاي الجيبه إلى تستاهل واحد يكوللها مبروك رفعتي راسنه بهالولد مو تجيب بنيه وحاسبه روحها مخلفه اني صفنت على كلامي هسه هذا شحجي وياه صدك جذب فوك قهر الوكت هو اني شحصلت غير القهر والضيم.
رفيف: الله يبارك بيك عمو يوم الك شكرا
ودعونه وطلعو اني كمتني خالتي زهره لان مااعرف الا اسبح بعد الولاده ودخلتني للحمام سبحت وبدلت يالله ارتاحيت اشويه
بيومها مانمت للصبح فرحانه بحبيبي ميمي بقينه كاعدات اني وماما نباوع عليه اشلون نايم جنه ورده فدوه لعيونه الكحيله للفجر يالله نمت حسيت الصبح عالتسعه ونص ابلوع ابني ماهو بالكريكوت مالته.
بسرعه كمت كوه اجر بروحي لكيت ماما مخليته بالهول ودتغسله ومدفيه الهول لان الجو بده يكسر وهو طفل ومخليع الطشت وهو ساكت سوده عليا لا حس ولانفس ابلوع على شعره اشلون ينزل علو ركبته من ادير عليه المي احنه بينه طبيعه نغسل للطفل اول يوم من يجي
بس ماغسلنه لميمي لان اجه بالليل هي تغسله واني تمددت كدامها عالتخم كمل سباحه حبيبي النظيف اخذته رضعته وخلصت رحت.
ساعدتني خالتي زهره للحمام غسلت وجهي وفرشت وبدلت ملابسي طبعا بمساعده خالتي لان مااكدر وجان العيد بالنسبه إلى عيدين عيد الفطر وعيد ولادتي باجمل نجم من السما الف حمد وشكر الك ياربي والعالم تجي تعايدنه وتباركلي عالولاده
ومشت الايام وميمي صار عمره 12 يوم طهرناه لان اني مااحب اطهر الطفل لمن يكبر خطيه واتحمال تصير عنده هبطه يصير عنده حول او سكر وعمتي ام جاسم كالعاده ماتابت من سمومها.
ام جاسم: انتي متجوزين اطهرين وهو صغير خلي لمن يكبر ويفتهم ويلزم دشداشته ويصير طهوره فرحه متخافين يموت ماتبتي من ابنج الجبير.
رفيف: عمه اشبي ابني الجبير هو مجرد انطيته نص فاليوم بقى نايم واحنه حسبالنه بي شي واخذته للدكتور وانطاني مغذي اشربه وشربته وبنفس اليوم صار مثل الورد وهذا كدامج ميدري شنو السالفه وثاني شي هو الطهور منين اجه فرحه هو عمليه افرح ابني حيكصون جزء من جسمه وحمودي ماقصرت وياه بعيد ميلاده سويتله دشداشه ولبسته على راسه عرقجين وكله مطرز وصار صدك فرحه هم حفله طهور وهم عيد ميلاد وهذا هم اذا الله خلاه طيب بعيد ميلاد اسويله مثل اخو حنه ودشداشه وعيدميلاد بس ثاني يوم ماكو طهور وبعدين ليش تتفاولين للطفل بالموت.
من حاجيتها هيج سكتت بس اكلتني اكل بعيونها
ام جاسم: كبر اشلون صلافه الله يطيح حظك يجاسم على هالقسمه الغبره هاي كعدت اشويه ونفضت عباتي وكمت
وين عمه بعد وكت ابقى عالعشه وجاسم يرجعج
لالا اريد اروح اتاخرت مع السلامه طلعت اخذت تكسي وخابرت على جاسم
جاسم: الو هلو يمه اشلونج
ام جاسم: لاهله ولامرحبه وكمت ابجي ليش هيج مرتك تفشلني وتطردني اني تالي شيباتي انطرد من بيت ابني.