رواية شهوات رجل ظالم للكاتبة زهراء أمجد الفصل الثاني عشر
جاسم: الو هلو يمه اشلونج
ام جاسم: لاهله ولامرحبه وكمت ابجي ليش هيج مرتك تفشلني وتطردني اني تالي شيباتي انطرد من بيت ابني
ولو هو منين اجه بيتك ومنين اجيت اني امك ربيت وتعبت وانطيت للغريب اكلها ابنج خطيه اشلون انطاج كلبج اطهري وشوفي ديبجي انتظري يكبر واسويله اني احلى حنه طهور.
ادكولي والله ابني واني حره بي وبراحتي واحنه ناس مندور حفلات وهيج سوالف احنه على كد حالنه هو ابنج خلك موظف وراتبه 350 والديانه تركض وراه.
منين نجيب ونسوي حفلات وطهور وولادتي وعيشتي خلف الله على اهلي قايمين بينه احنه ناس فقره إلى يريد يجينه على هذا وضعنه اهلا وسهلا والي ميريد براحته واني سلمت وطلعت وحتى بالجذب ماكالت ابقي ابنج الجبير وفرحت عمرج إلى تعبتي وكبرتي واخذته اني عالجاهز هو يوصل ابد ماحجت هيج.
جاسم: اني اسمع ودمي يفور بس اريد اوصل للبيت والزم رفيف اجنزها واسربتها لاهلها ولج انتي يطلع منج كل هالمصايب اووووف اخذت نفس قوي وكتلها كافي يمه لتبجين ويصير خير هسه راح للبين واريد اليوم ادفنها لرفيف واشوف ياك، يطلعلها سند يلا باي
ام جاسم: هلا يمه الله وياك ولو اني مااريدك تتعارك وتخرب علاقتكم على مودي ماكو داعي تحاجيها وتاذيها خطيه نفسيه والبنيه عينها على الله وعليك.
لا يمه لازم اربيها هاي شافت عين مني مع السلامه وسديته للخط
ام جاسم: مسحت دموعي وانطيت كروه للرجال اييي هسه ارتاح كلبي اني الج يبت الكليات اذا ماخليت جاسم يزوركج وينكلب الطهور فلا اتسمى سعديه
جاسم: رجعت للبيت عالسريع يامن ينطيني رفيف اريد اشوف اشلون هيج تحجي ويه امي طبيت لكيت محد موجود بالبيت شفتها كاعده تباوع على ابنها اشلون نايم شافتني جان ادكول.
رفيف: هلو جاسم همزين اجيت اكعد يم ميمي بس اروح اغسل واجيك
جاسم: انجبي واكعدي ولج عين تحجين ولج انتي اطردين امي من بيتي شنو شايفه نفسج جايبتلي اثنين اطمغيني بيهم طايحه الحظ ولج انتي منو وهيج تحجين ويه امي هاي تاج راسج حقيره انتي وولدج تروحون فدوه لقندره امي ادبسسيز زماله
يحجي ويصيح بصوت عالي هزيت البيت هز بحيث ميمي كعد مخترع ويبجي.
رفيف: اشبيك انت اكيد تخبلت ولك متشوف طفل نايم انت من يامله وثاني هو منو طرد امك منو وصل يمها
اجتي واهلي كلهم كاعدين وطلعت واهلي هم كاعدين واذا متصدك بيا خابر لماما وشوف شنو تحاجيك وثاني شي امك تاج راسك الك وانت إلى تروحلها فدوه واني وجهالي تاج راسكم افتهمت لو لا نسيت انت شنو جنت ووين صرت نسيت شنو وضعك جان.
نسيت البيت إلى كاعد بي صبه وجنه بيت عرب ولك طورتم وسويتك ادمي وصعدتك وتريد تصعد عليا وهاي ياام إلى تحجي عليها امك إلى شمرتك وانت بعدك لحمه حمره عمرك 40 يوم
ورجعتلها رجال مشورب وبالجامعه ولوما جامعه بابل هم جان مارجعت بس عتبي مو عليك عتبي على حظي وقسمتي السوده إلى وكعدتني بيكم انتو ناس همج انتو ناس مال وحده لتقره ولتكتب واذا سلمت عليها تملكها وادكول يموت عليا.
لاجاسم لا انت غلطان اني بت عز ودلال ومااقبل احد يتجاوز عليا غير امي إلى ربتني افتهمت لو لا وقبل لتحكم وتجي من الباب عنتر زمانك افتهم السالفه من الطرفين كافي بعد مااسكت واحجي ومنا وجاي اذا وصلت امك لبيتي صدك اطردها.
اتحملتك وتحملت اهلك هواي اكلتوني وشربتوني لهنا وبس البيت بيتي ومن اهلي يعجبك تكعد باحترام اهلا وسهلا ميعجبك الباب توسع جمل فوك زيني اترزل ومن منو من امك ولك هي بحالك مو اتزوجت فلس واحد ماقدرتك بي
خيرها كله لذاك اخوك الاغبر إلى حتى ابتدائيه مامخلص ولا شغل ولا عمل وحايرلي بالمكياج والسوالف المكسره اسمعي زين توكف امك عد حدها لاقسم بمحمد اشوفك الوجي الثاني واطلع خبالاتي كلهن واحرك الاخضر واليابس.
اخذت ابني وطبيت للغرفه ابجي وهمزين حمودي جان ويه ماما كالت ارتاحي منه اشويه وهم اغيرله جو خطيه محبوس ويغار من اخوه اني حجيت هيج وهو ساكت اخذ سويج السياره وطلع وركع الباب حيل وراه دروح عساك تموت روحه بلا رجعه هم نزل وهم يدبج وذيح اني اعلمه انوب عليا ميساء الساحره بسيطه تتلاكه الوجوه
ومرت الايام وطلع اربعين ميمي اجتني ماما العصر دتشوفني.
ام رفيف: اكلج رفيف فتحو هندسه اهلي هنا قريب علينه ومعترف بيها ليش مداومين بيها انتي مو تردين هندسه من البدايه وهاي فرصه واجتج للحلك اشو تعينات وماكو اقلها كملي وبلكت الله تحصلين تعيين.
فكرت بكلام ماما شفته صحيح بس منين احيب اهلي يعني فلوس اقساط السنه ومن غير ملابسي والنقل والقرطاسيه كتلها ماما انتي ترديني اكمل وانتي تعرفين البير وغطاه وتعرفين وضع جاسم ميتحمل اشلون اكمل عاد اشوف بلكت اتعيين احسن من الكليه
ام رفيف: اذا على تكاليف الجامعه فكلشي اني اقوم بي وماريده منج بس تاخذين الشهاده وبتفوق وحاجي جاسم وشوفي تره هاي فرصه عمرج ووين التربيه ووين الهندسه.
رفيف: ماما تحجي واني افكر بكلامها ودااشوفه صح بس بقى جاسم اشلون وجهالي اشلون كتلها ماما بس جهالي بعدهم صغارخطيه شنو ذنبهم
ام رفيف: انتي مخبله ولج هو منو فاد اهله ولج اهم شي دوامج ومستقبلج ياجهال يادنيا باجر عكبه يكبرون ومحد بحالج ولايدورون
اوووف والله ماادري خلي يجي جاسم والله كريم.
رفيف مو وكت ماادري تره التقديم حدج بس يومين باجر الصبح روحي قدمي والفلوس موجوده افتهمتي واني حكوم اروح وباجر خابريني اجي يم الجهال من اطلعين
هههههه هسه هو وافق جاسم ياماما
يوافق ماطول مو من ظهره احجي وامشي لحد ماوصلتني رفيف للباب وطبت واني رجعت للبيت
رفيف: من طلعت ماما بحد مااجه جاسم اجيت يمه كعدت اكلك جاسم جاسم عندي موضوع وياك ومهم حيل حباب عوف التلفزيون وانتبهلي اشويه.
جاسم: واني اباوع واسمعها تحجي هاي ماطول اجتي وكعدت بصفي وراها مصيبه بدون مااباوع عليها كتلها احجي شتردين
رفيف: جاسم فدوه دعوف التلفزيون هسه مو كتلك شغله مهمه هسه اتفرغلي ربع ساعه شيصير عني
جاسم: اهوووو احجي يلا فضيها شتردين دااسمعج
رفيف: اوي هاي اشبيك غير اريد اخذ موافقتك بموضوع اكلك اريد اكمل هندسه قاطعني.
جاسم: شنو انتي مخبله اكعدي وانجبي رفيف اني ماصدكت خلصتي هذيج انوب اجتني الهندسه هاي منو قره براسج من جماعتج بعد علينه الهندسه دكعدي كعدي حطي ولدج واركدي اشويه
رفيف: بسرعه نزلت دموعي اشبيك جاسم تره لا جماعتي ولا شي اجتي ماما اليوم وحجيتله الكلام كله
جاسم: هاا اذا هيج وعلى امج ميخالف اقبل بس بشرط البيت ممنوع تقصرين بي افتهمتي لو لا.
كمزت حضنته وشكرته وبوسته من خده وركضت خابرت ماما حتى باجر تجي الصبح ورحت للمطبخ جبت العشه لان اني مكملته قبل ليجي جاسم اعرف وقت رجعته تعشينه وخلصنه وغسلت المواعين وغسلت للولد وبدلتهم ورضعتهم ونامو اثنينهم كمت نظفت البيت ومسحته وخلصت كلشي حتى باحر من تجي ماما متعيب على شي باوعت الساعه صارت الوحده اخذت ملابسي.
ودخلت صبحت وطلعت نمت بسرعه من التعب كعدت ثاني يوم من الصبح تريكنه اني وجاسم وخابرت ماما حتى تجي واجتي ماما واني رحت بدلت لبست بلوزه بهاريه بنفسجي وتنوره سوده وحذاء وجنطه سود وشال مشجر بنفسجي طلعت لكيت جاسم واكف يم السياره اخذني ورحنه للكليه.
طبعا سحبت استماره وسجلت واطلبو معلومات مني كامله انطيتهه الهم وجاسم اشوفه معطب لان اتاخر على دوامه واني غلست كملت المستمسكات مالتي وسويت فايل كامل طلبو مني شهاده السادس مصدقه من التربيه اخذت كتاب منهم وطلعت اني وجاسم
جاسم: رفيف اني اتاخرت حيل حوصلج للتربيه وانتي كملي ورجعي للبيت وهو بيتنه قريب كلش خطوتين
رفيف: يااا جاسم فدوه والله اخاف وين تعوفني حباب خابرهم واخذ اجازه.
جاسم: رفيف يااجازه وشنو تخافين انتي زعطوطه اعتمدي على نفسح ميصير هيج
رفيف: ميخالف جاوبته بقهر وماشلت راسي ولا باوعت عليه ليش هيج جاسم مو بحالي وميخاف عليا وصلنه للتربيه نزلت بالباب وهو راح شخط السياره حيل
بحيث صارت وراه بس ترابه اشكد استحيت من العالم إلى بالشارع كلها كامت تصيح اشبيك يمعود طارت الدنيا اني غلست ودخلت وشلعو كلبي بالتصديق مال التربيه لان الموظفه ضايجه.
ومابيها حيل تشتغل وكوه سوتها إلى ادكولي انتو الطلاب متفض وياكم ابتلينه بيكم باوعتها هاي شحجي وياهاشنو جايه ببلاش عفتها تلغي وكملت المعامله ورجعت للبيت بعد مارجليا وكعت من الوكفه والانتظار طلعت روحي والله بعدني بالطريق
خابرتني ماما كالت جبت ولدج ورجعت للبيت تعالي النه اتغدي انتي وجاسم وروحو
كتلها جاسم راح من زمان وعافني بالتربيه وحدي كملت وهسه حجيكم واخابر جاسم عود
رحاب: براحتج يلا باي.
رفيف: وصلت لاهلي اجر النفس كوه دخلت كبل شفت الولد حمودي ديلعب وميمي ابو الوكاحه بحضن بيبي ديرضع بوستهم وخابرت جاسم كتله تعال اتغده يم اهلي كال ميخالف طبعا ماصدك اجه بسرعه ركض واتغدينه وكملنه اخذنه الجهال ورجعنه للبيت.
وبديت بعدها اجهز للكليه اشتريت ملابس وبلوزات وبناطير وتنورات واحذيه وشالات اشكال اخذتلي ماما صح جانت تشتريلي بس اقل حجايه ادكول اني موزينه الج انتي وخلفتج براسي عاله عليه مكيفه عدج رجل
طبعها اذا صرفت فلس لازم العالم كلها. تدري ولازم ابقى اشكرها واحجي واكول ماما هي إلى تصرف وماما هي إلى تنطي متحب تنطي شي بالسر تفضح الواحد فضيحه واذا انطت الف ادكول خمسه تحب تضخم الشغله بس اني تعلمت عليها.
وخالاتي يعرفها ينطنها على كد عقلها واجه وكت الدوام ودامت وباول اسبوع صار إلى لاعالبال ولا عالخاطر جنت راجعه من الدوام دخلت لبيت اهلي حتى اخذ ولدي واروح لبيتي لكيت ماما تضحك وفرحانه اول ماسلمت عليها وهاي جان ادكولي
رحاب: سمعتي الخبر الجديد
رفيف: ياخبر ??؟ خير ان شاء الله سمعيني
رحاب: مو طلع اسمي بالتعيين عالتربيه هاي الوجبه
رفيف: شنووووو اسم منو ماما ياوجبه ياتعيين احجي فهميني.
رحاب: تذكرين من قدمت قبل 3 سنوات وانطونه وصل اليوم خابروني وكالو اسمج طالع تعالي باجر بلشي بالمعامله اني صح فرحانه بس جهالج اشلون بيهم وين حتوديهم
الحجيه: يبقون يمي اني اربيهم وانتي يمه رفيف روحي لدوامج ومعليج بشي ولتشيلين هم إلى ماله اب اله رب ( طبعا هاي مقوله بيبي الشهيره على كلشي ادكولها حتى لو مو يم السالفه).
رفيف: صفنت بالله صدك جذب هيح اني حظي زفت يربي ليش فهمني اني شمسويه وليش دتسد كلشي بوجهي كتلها ها بكيفج ماما ومبروك عالتعيين اخذت وليداتي وعفتهم وطلعت رحت لبيتي واني حايره بزماني اشلون حتصفى ماادري وبيبي مره جبيره...
ومتتحمل 2 جهال حضرت الغده وانتظرت جاسم بين مااجه عفت يمه الجهال ورحت سبحت عالسريع وطلعت صبيت اكل وجاسم هم بدل وغسل واجه كعدنه ناكل جان كلته
اكلك جاسم
ها كولي خير.
ياخير هذا بكلبي ماكو ماما إلى هي عمتك
اي اشبيها؟ احجي
طلع اليوم تعيينها شفت حظي
جان قطعت كلام رفيف وكتلها شنو ولج ياتعيين هي امج وين مقدمه احجي
ماما قدمت قبل لنتزوج من جنه مخطوبين اجتي تعينات وقدمت وماطلع اسمها وهسه على حظي الفكر طلع اسمها واني حايره بجهال اشلون جاسم فدوه وين انطي وجهي فهمني.
اوووف بطلي عوفي الكليه يادوام وعندج 2 اني من البدايه كلت هذا الدوام ميفيدج بس إلى ذبحتي روحج الا هندسه هسه تربيه هندسه شنو الفرق شو انتي مكابلتني وكاعده لا شغل ولاعمل
شنو مكابلتك جاسم قابل اني بكيفي وانت ليش تريد تحطم احلامي هاي بمكان مدكولي هسه اشوفلج حل اخذهم يم اهلي امي طلعت تقاعد وماعدها شي هسه هومه بس ولدي شو بس اني حايره بيهم.
جاسم: رفيف لخاطر ربج طلعي امي من الموضوع مره جبيره ومابيها حيل خليهم يم بيبتج هي تحبهم ومتعلمه عليهم
رفيف: يعني بيبي مو جبيره امك جبيره وثاني شي هومه مو احفادها شصار اذا تحملتهم بس وكت الحجي ابني مخلف وهذوله ولدنه ومنو كلك من الاساس اني اامن اعوفهم يم امك وهي وين تعرف تربي حتى تربيهم بس هو اني صوجي إلى كاعده احجيلك عفت الاكل وكمت وهو هم ماكمل اكله وكام وبقينه اثنينه واحد مطنكر عالثاني.
شلت الاكل من عالميز ورجعته وغسلت المواعين ونظفت البيت وكعدت اقره ماطول الولدنايمين لان اذا كعدو بعد ماكو دراسه كعدو نهايه العصر غسلتلهم وبدلتهم حمودي كالعادع يغلر كلش من اخوه ودوم يكول مااريده رجعو لبيت المره يقصد بيت الممرضه حسباله جبناه من عدها وميمي فقير بس يضحك هو وكفشته والستوتات مالته كاعدين اندكت الباب شلت ميمي وطلعت افتحها لان اذا عفته يم حمودي الكاه مسوي بي مكسوره فتحتها دخلت ماما.
رحاب: ها شسويتي شكو ماكو
رفيف: هلو ماما دطبي اشبيج من الباب اخذت ميمي مني وبقت تبوس بي وطبينه
والله ماادري ياماما حايره وجاسم يكولي بطلي وانتي تكليلي كملي زين اذا كملت هذوله وين اوديهم امي مره جبيره مو مال تتحمل 2 وبعدهم طلباتهم هواي ولازم عينها عليهم واذا بطلت حرامات فلوس قسط الكورس الاول تروح وحلمي كله يخرب وحايره بزماني.
رحاب: اسمعي ابقي بالدوام واني حمودي اخذه ويايه وارجعه ويايه ويوم يبقو يمج ويوم يم ابوه ويوم يم امي وتخلص السنه وهذا الصغير يبقى يم امي حتى تلتهي بس بي
رفيف: ماما بس حمودي بعده ماصار 3 سنوات ماقبطهن مو خطيه يتبهذل بالدوام وجاي شته وبرد
رحاب: بالشتا خلي يم امي بالدوام الصبحي
وبالظهري خلي ويايه وانتي الخميس عندج اووف واني السبت والجمعه عطله هاي 3 أيام وبقت بس اربعه تدبر.
رفيف: اوووف حايره والله ياماما خايفه على حمودي يتاذه خطيه شنو ذنبه وقررنه يبقون 2 يم بيبي إلى اصيحلها امي وهي المره كالت اخليهم بعيوني وماقصرت واني كمت ازاغل بالدوام وجاسم هم يرجع من وكت ومشت الايام وخلصت الكورس الاول ونجحت بدرجات عاليه رغم جان عندي بيت واطفال 2بس جنت اقره اسهر واتعب حيل في سبيل مااقصر على بيتي واطفالي وخلص الكورس الاول وعده سلامات وبدينه بالكورس الثاني وجنت متفوقه واموري كلش زينه لان جايه عن رغبه وتحديت نفسي.
لازم اثبت وجودي كدام جاسم إلى دوم يكولي انتي تربيه مادبرتيها ادبرين هندسه وبدينه نمتحهن عملي كورس ثاني وبيوم جنه بمختبر الكهربائيه دنمتحن عملي اجه موظف الخدمه كال للمعيده العميد يكول كملو امتحان وتعالو نزلو انتي والطلاب اكو اجتماع بالقاعه منتظريكم طبعا احنه بدت افكار الاكشن وحده وره الثانيه وحتى كوه كدرنه نخلص امتحان ونجاوب لان واحدنه الف مغامره وفلم مر بباله اول تالي العميد يريده وخلصنه ونزلنه للقاعه لكينه العميد والمؤسسين كلها كاعده بس وجوهم متتفسر وتحس الجو مشحون وموطبيعي سلمنه وكعدنه وبده المؤسس الاول وبده يحجي بس كلامه ابد مااتوقعته والي صار ابد جان مو بالحسبان.
طلاب ابنائي احنه نعتذر منكم لان طول هاي الفتره احنه نشتغل بالاعتراف مال الكليه بس للاسف لحد الان ماحصلناه وانتو لازم تعرفون بهذا الشي ولازم نسد الكليه لان اذا بقتو اداومون دورتكم كلها مامعترف بيها وفلوسكم وتعبكم كله يروح ببلاش فارجو منكم تتفهمون للموضوع والي يريد ياجل للسنه الجايه ابين منحصل الاعتراف او تردون نرجعلكم فلوسكم كامله انتو براحتكم واحنه نتحمل الخساره مال رواتب الملاك كله لان انتو مالكم ذنب وانتو بعد براحتكم.
اباوع الطلاب كبت هذا إلى يغلط وهذا إلى يكول جذابين وهذا يكول حراميه وين جنتو قبل ماحجيتو وهذا يكول ومصاريف النقل والقرطاسيه ومصاريفنه احنه كطلاب وعلكت بين الطلاب والهيئه التدريسيه كالو إلى ماعنده شي وماعنده استفسار يتفضل ياخذ راحته.