قصص و روايات - قصص رائعة :

رواية شهوات رجل ظالم للكاتبة زهراء أمجد الفصل الثالث عشر

رواية شهوات رجل ظالم للكاتبة زهراء أمجد الفصل الثالث عشر

رواية شهوات رجل ظالم للكاتبة زهراء أمجد الفصل الثالث عشر

اباوع الطلاب كبت هذا إلى يغلط وهذا إلى يكول جذابين وهذا يكول حراميه وين جنتو قبل ماحجيتو وهذا يكول ومصاريف النقل والقرطاسيه ومصاريفنه احنه كطلاب وعلكت بين الطلاب والهيئه التدريسيه كالو إلى ماعنده شي وماعنده استفسار يتفضل ياخذ راحته
طلعت من القاعه والدمعه بطارف عيني ليش دوم هيج الوكت عكسي اني ماصدكت ماما صارت زينه ويايه والله رزقني باثنين ورود ومابيها شي.

صحتي صح جاسم جانت اخلاقه زفت ويغلط ويرزل ويهين على اقل شي بس اتحمل ودومه جان يكولي مااخليج تكملين بس اشويه اشوف تقصير منج بس رغم هذا بقيت اني مسيطره عالبيت والدوام بس.

اوووف ياحظج يرفيف ليش دوم إلى تردي ميصير بقيت كاعده بالحديقه مال الكليه واشوف الطلاب إلى يتعارك والي يصيح والي يغلط ويسب جانت صدمه لكل الطلاب واكو طلاب متخرجين من السادس يعني حلمه دخول الكليه وراحت منه سنه تسالمنه بيناتنه احنه الطلاب وتوادعنه واتفقنا نبقى على تواصل عالنت لان جان اغلبيتنه عدنه فيس وايميل ونتراسل فاتفقنه نبقى على تواصل حتى نشوف الاخبار شنو
رجعت للبيت واني دمعتي بعيني تلكتني ماما.

رحاب: ها رفيف اشبيج كابله وجهج وكوه تسلمين موزينه بالامتحان احجي
رفيف: ها لا ماما مو هيج الحجي بس الكليه وكمت ابجي
رحاب: اشبيها احجي ام دميعه وكعتي كلبي اشبيها الكليه
رفيف: ماما كليتنه سدوها لان ماعدهم اعتراف وراح الاول والتالي
شنووووو ولج والفلوس والقسط يعني راحن المليون ونص ومصاريفج كلها ذبيتهن بالشط.

ماما اصبري خلي اجر نفس وافهمج الفلوس مال القسط كالو نرجعهن والطلاب كالو اذا مارجعن نخلي محامي عن الطلاب كلها وهو يرجعلنه حقه بس تبقى مصاريفي مال النقل والقرطاسيه والباقي هذني عوضي على الله وتعبي وسهري ودرجاتي العاليه إلى كوه حصلتهن راحن بالبلاش وهم راحت سنه عليا وعلى حظي الفكر
اوووف يالله هايهيه شتسوين قابل هو اني يامره مشيت وراح وماخسرت اجمعهن كوه وانتي اطيريهن يلا فدوه بس كون صدك نحصل القسط...

الله كريم يلا راح اخذ ولدي واروح للبيت تردين شي
شعندج رايحه ابقي هنا اتغدي وروحي شو جاسم وبالدوام من هسه تروحين تكعدين وحدج شعندج
رفيف: اريد اروح ضايجه حيل وحتى غده مااريد
رحاب: هسه انتي عندج شهاده اشبيج ذبحتي روحج على الدراسه وثاني شي كل واحد ونصيبه وكلشي بي صالح
رفيف: مروتج ماما لتجيبلي طاري صالح تره اذا لكفته اشتعل اهل اهله محد وكلني نعل غير صالح شحصلت من صالح غير المصايب افوت اولي لمهجومي احسن.

طلعت واني كلش ضايجه ودمعتي بعيوني ليش يالهي دوم الوكت معوكس ويايه هاي فوك يتمي فوك قهر كلبي ليش دومها مدتجي عدل شمسويه عندك ياربي امشي بالشارع ودموعي تنزل واسحل بولدي سحل وصلت لبيتي وفتحت الباب ودخلت اني والولد خليتهم يمي حمودي كاعد يلعب بالعابه وميمي كاعده بالعربانه مالته.

وهم صافن كلشي ميدري بالدنيا باوعته اوووف ياابني بس انت مرتاح متدري الدنيا طشت لو رشت ابقى صغير احسن لتكبر بس تكبر يكبر همك وياك بدلت وغسلت وبديت اسوي غده لجاسم اشتغل وبالي يم الدوام.

وحلمي إلى خرب جنت دوم من اني وطفله اتمنى ينكتب يم اسمي المهندسه بس مبين هذا الحلم حاله حال باقي احلامي الخربت وتحطمت كملت الغده ونظفت البيت وغديت الجهال وغسلتهم وبدلتلهم ونامو وبقيت كاعده انتظر جاسم اجه وصبيتله غده وكتله اني مااريد اكلت ويه الولد كمل غده شلت الاكل رجعته وغسلت المواعين واجيت يم جاسم حتى ازف اله البشاره الحلوه
رفيف: اكلك جاسم اليوم سدو الكليه مالتي.

جاسم: شنووو منو سدها شنو سدوها رفيف احجي
رفيف: ماكو اعتراف وماكو كليه وكلشي ماكو ونكعد ونسكت وننجب هم ارتاحيت كله من وراك بقيت تنك يالدوام ويالدوام وهاي النتيجه
جاسم: والفلوس مال القسط والمصاريف اشلون
رفيف: انت صدك جذب اكله حلمي اتحطم وطاح حظي وانت حايرلي بالفلوس يافلوس هاي وك كنوز الدنيا متعوض حلمي وشهادتي.

جاسم: اكلج بلا احلام ورديه من البدايه كتلج هذا شي فاشل وانتي عاندتي الا اداومين اشلون ماحصلت الهندسه وهاي تالي عنادج شفتي وين وصلنه من وراج
رفيف: وانت شهامك قابل درست تعبت سهرت صرفت شو انت كلشي عندك عالجاهز وفوكاها ماقابل
جاسم: هسه اشلون يعني نموت من وره دوامج حاجيني الاقساط اشلون بيهن راحن.

رفيف: هم رجع عالفلوس عمي اريح كلبك واكلك الفلوس مال الاقساط إلى يريد ياجل والسنه الجايه جاي الاعتراف وميدفع اقساط والي ميعجبه يسحب فلوسه والي يريد يسحب نص المبلغ كل واحد بكيفه
جاسم: وحظرتج شنو قررتي ست رفيف المهندسه ههه
رفيف: دومك اسلوبك استفزازي هاي بمكان متوكف ويايه جاي تتشمت بيا بس الله كريم متنسد باب الا تنفتح باب ابقى اسحب نص واعوف عدهم نص ومنا للسنه التجي هم ولدي كبرانين وهم الاعتراف جاي.

جاسم: شفتها صدك مقهوره وتحجي بحركه تقربت عليها كتلها ياعمري يافوفه اني مااريد ادوخج بالدراسه وهسه اصلا تعيينات ماكو اكعدي بالبيت وربي ولدج مو احسن ليش خطيه متبهذلين وشوفي خالاتج مو كلهن شهايد وكاعدات بالبيت وحتى امج هسه يالله طلع تعيينها كولي يالله وتحضري العصر نطلع افركم بالسياره ونجيب لفات للعشه ونرجع شكلتي
رفيف: صح مااقتنعت بكلامه بس شسوي صبرت امري لله وسكتت وكتله اوك هايهيه.

ومرت الايام والشهور والتهيت بالبيت والاولاد بس جان ميمي ميبات عندي تاخذه ماما تحبه حيل ادكولي الج واحد والي واحد فجان يجي الصبح لليل يمي وتاخذه بالليل
وهو الحقير مكيف عليها رغم ماجان عمره اشهر بس هو يصير الليل يكوم يبجي الا نودي يالله يسكت واجه الاعتراف مال الكليه مالتنه بشهر الثامن اجتي ماما بشرتني انو اعترفو بيها وجايبه نسخه من الاعتراف.

اني هنا طرت من الفرح وراجعتهم واتاكدنه من الوزاره انو الكليه معترف بيها ورجعلي امل جديد بالدوام بس دوم تطلعلي سالفه تخرب كلشي هالمره جاسم ماقبل اداوم وعاند وكال لو اني لو الكليه واشكد حاولت وبقيت اتوسل بي وهو جان قافل على موضوع الدوام اخير شي ماما كدرت تقنعه بعد محاولات كومه يالله قبل وحمودي صار عمره 4 سنوات وميمي صار عمره 10 شهور.

وبده يمشي بالحجله مالته وشعره طويل وياهو يشوفه حسباله بنيه لان جنت البسه وردي واسويله ستوتات وهو شكله جنه شكل بنات وخدوده بلون الفراوله وتحظرت وجهزت تجهيز الكليه وطبعا ماما إلى تدفع جاسم شايل ايده من الموضوع.

ودومه كالب وجهه واني مغلسه اهم شي احقق طموحي بعدين يستسلم ويسكت وداومت وهالمره اعداد الطلبه زادو ولكيت نص من طلاب العام موجودين واكو منهم إلى انقل لغير كليه واكو إلى بطل وحمودي سوده عليا بده يروح ويرجع ويه ماما صار طالب وجنطته وملابسه وهو خشن مبين صدك اول ومكيف بالمدرسه وميمي بقى يم بيبي هي قايمه بي اثناء دوامي وهالسنه شديت حيلي اكثر من العام والحمد لله كملت الكورس الاول ودرجاتي احسن من درجات العام وبهاي السنه بيبي راحت للحج إلى هي سنه 2010 وميمي كبر وكام يمشي رغم جان عمره اقل من سنه بس دوم تطلعلي سالفه تخرب كلشي.

وجان زوج خالتي ويه بيبي بنفس الحمله استقبلناهم والمزيقا والهوسه صح جان الدنيا ليل بس صار نهار كل العالم فرحانه وتستقبل حجاجه وبقينه بيومها للصبح كاعدين نمنه الفجر بعد الصلاه وثاني يوم بدت العالم تجي تتحمد بالسلامه على رجوع بيبي وان شاء الله حج مبرور وخطار طابين طالعين واحنه بس قدمو صينيه ورجعو صينيه للمغرب والناس بعدهم اتصلت بجاسم اتفقت نروح اني وياه لبيت خالتي نأدي الواجب لان زوج خالتي هم حجي.

اجه عليا جاسم واخذت الولد ورحنه وره اذان المغرب واستقبلتنه خالتي وزوجها ورحبو بينه وبده زوجها يحجيلنه عالحجاج والحج اشلون الوضع هناك واجواء الحج إلى صح متعبه بس بيها فرحه وكاعدين وضحك وسوالف بس انتبهه على شغله دمرت حياتي وصدمتني حيل
الحجي: عمو رفيف اشبيها رجل ابنج شو عوجه
رفيف: ياابن منهم وينها عمو
الحجي: ابنج الصغير شوفيها من يمشي رجله اليمنه بيها تقوس باوعيلها.

باوعت على رجله اي صح بيها اشويه زين اني حتى حفاظه مالبسه غير بس من نطلع خلال الصيف وعود هسه لان برد الجو كمت احفظه وهم انطي ساعات استراحه كتله ها ليش هيج رجله عمو ابني اشبي
الحجي: والله عمو ماادري بس شعجب مامنتبهين عليه تره مبينه واضحه وهمزين هسه اني انتبهت عليه اخذو باجر للطبيب احسن.

رفيف: اي باجر اخذه بس هو يحجي واني نار شبت بكلبي ربي كلشي ولا وليداتي ماعندي غيرهم هذوله فرحه عمري ربي الضنا عزيز ولتختبر صبري بضناي ربي رحمتك جابت خالتي الضيافه واني الوج بس اريد اطلع اشرت لجاسم واترخصنه منهم مع العلم هومه توسلو ابقو بعد وكت واني كاعده على نار اريد بس اطلع حتى ابجي وافرغ إلى بكلبي طلعنه واول ماصعدت بالسياره دموعي انفجرن وحدهن ربي هذا من ريحه بابا هذا على اسمه رحمتك ربي مرضني اليا اني مو مشكله يطبني طوب بس هالطفل.

لا ربي فدوه لااعتراض على حكمك بس هالمره امتحانك كلش صعب بقيت الطريق كله ابجي وحاضنته وجاسم يصبر بيا وان شاء الله ماكو شي وان شاء الله بعده صغير وبلكت الله مجرد شي بسيط واني كلبي يفور لان ادري بحظي زفت مستحيل تعدي سلامات وصلت لبيت اهلي واني دموعي مانشفت تلكتني ماما بالمطبخ
ام رفيف: هاي اشبيج تبجين منو وياج احجي ويامن متعاركه الحجي طردكم شصار وج احجي اشبيهن عيونج وانتي بس تشهكين وتبجين.

رفيف: وج ماما ميمي
ام رفيف: رفيف احجي عدل اشبي الولد مو طلعتو وهو جنه ورده ولج شسويتله احجي
رفيف: مو اني إلى سويتله وكعدت بالكاع بالمطبخ واحجيلها الصار كله
ام رفيف: اي اني هم انتبهت قبل كم يوم على رجله وكلت هسه اكلج بس نسيت يلا هسه اشبيج خبصتي الدنيا باجر اخذو وهسه يطلع كلشي مابي اني كلبي بارد خرعتيني شجاج مسودنه وطبيتي من. الباب تنوحين.

رفيف: انتي صدك تحجين شنو شفتي هو نسيتي شنو مسودنه اكلها رجل ابني عوجه واحتمال يعرج من بمشي من يكبر ادكولي نسيت وكلبي بارد واني امشي على كلبج وهو كلبج يامره حمى حتى هسه يحمى ويفور حقج مو ابنج ابن رفيف يطبه مرض واذا ماصار اعرج
ام رفيف: انتي ليش متعرفين تحجين دنجبي مو ابني شنو ليش هو يم منو مو يمي الليل كله قابل انتي احن مني.

رفيف: لايابوي اني امه واني بس إلى حبلت وجبت اشوفج من كثر حبج شفتي رجلي ومااهتميتي اصلا ولا يمج ماما اسكتي لخاطر ربج إلى مطيح حظي اني حروح اولي لمهجومي والي يسال عليا كوليلهم رفيف بالكبور يلا حمودي كوم ماما
حمودي: ما اليد ابكه ( ما اريد ابقى)
رفيف: صخومي كوم ماناقصتك انت الثاني لااشعل اهل اهلك تره روحي طافره
حمودي: ????ما وركض للهول.

ام رفيف: ماما عيني دعوفي واني اجيبه الج بعدين هسه انتي هالعناد ليش دبقي انتي هم وخلي الجهال يلعبون والكل موجوده وباجر اخذي هسه اذا رحتي شراح يتغير اكو غير تبقين وحدج وتبجين وجاسم نزلج يمنه وراح
رفيف: شاابقى ماما اكعد كالبه وجهي إلى يشوفني شيكول وثاني شي مالي خلك احجي واجامل تعبانه والله مصيبه ميمي هدت حيلي
ام رفيف: كولي يالله وكومي جان تدخل زهره
زهره: اشبيج خاله ليش تبجين منو وياج.

رفيف: خاله ميمي وكعدت احجيلها السالفه من جديد
زهره: كولي يالله وليش تتفاولين عالطفل من هسه بالشي الموزين كومي ياعيني وكلشي واله حل
رفيف: اي صح كلشي واله حل بس مصايب رفيف مالهن حل خاله هذا ابني واشوف بي بابا تعرفين اذا صار بي شي اكتل روحي
زهره ورحاب: دكومي هسه للهول وباجر اخذي والله كريم.

رفيف: كوموني كوه واني دموعي تجري عشره عشره اباوعله هو وشعره وسمين وابيض ويلعب ويضحك مكيف لان كلها موجوده اوووف يانار كلبي وينك ووين المرض من هسه الضيم اجاك ربي انقل مرضه بيا وشافي وليدي
وانتشر الخبر بالبيت كله وانكلبت فرحه الحج واجواء استقبال بيبي إلى حزن وكلها ادكول ان شاء الله ماكو شي.

واخذته ثاني يوم اني وماما وابوه للطبيب وبدت الفحوصات والتحاليل وكل طبيب يبدع بالتشخيص واحد يكول بي لين وواحد يكول بي زياده بمكونات العظم وكل واحد ينطي علاج اشكال وميفيد وحالته بقت مثل ماهي اخر شي ولد ويانه بالدوام صديقه يجيبون دكاتره من الهند وخوش دكاتره كتله
احجزلي كال مو سره والعالم حاجزين قبل كومه لعد انتي ماشفتي الاعلان كتله مالي علاقه تحجزلي ابني رجله حتخرب كال بسيطه.

والله للعصر خابرني كال باجر موعدكم الصبح كتله بسيطه الصبح اني يمهم اخذت العنوان وجاسم ماقبل يروح كال خلصتي العندي وماعندي على ابنج هو وحده يصير زين منين اجيبله فلوس مدكوليلي وماما اتكفلت بكل مصاريف علاج رغم جانت ظالمه وقاسيه بس ماخلتني بعوز رغم رزالتها المستمره.

وتدخلها بكل حياتي واذا حجيت وكالت مو اني اصرف عليكم مو اني إلى ملفيتكم ببيتي فجنت دوم اتلافاها ومالي اي مونه بالبيت ومنكدر كلشي نخلي الا بموافقتها وجاسم عادي ميهتم اشكد احجي وهو ماطول الشغله بيها فلوس فحتى الكرامه تنمسح
المهم اخذنه ميمي للدكتور اني وماما ولكينه الولد هناك ينتظرنه وعبرنه السره كله بحجه احنه حاجزين.

قبلهم ودخلنه للطبيب وفحصه وهم طلب تحاليل جديده واشعه ورحنه سويناهن واشوف ابني فحط من البجي من اخذو تحليل دم من ايديه عفته يم ماما وكعدت عالرصيف بالشارع ابجي وادعي تعدي على خير وماخلص تحاليل الا ابني ميت بجي.

ورجعنه للطبيب كال هذا عنده زياده بمكونات العظم والزياده مثل النقصان انطانه ابره يشربهن لان النقص صاير بالكالسيوم وباقي المكونات كلش نسبهن عاليه ولازم نلتزم بالابر كل اسبوع يشرب ابره بالاضافه للعلاج الطبيعي ورجعت للبيت اني ماما ومشت.

الايام ورجعت للدوام لان خلصت عطله نصف السنه وجانت اتعس عطله عندي ماشفت بيها بس المرض والعلاج والتفرفح واستمريت على علاج ميمي بانتظام وامتحنت كورس ثاني والحمد لله جانت درجاتي كلش عاليه وبدينه نستعد لامتحان الفاينل وهم جنت مسيطره رغم كلام جاسم إلى دومه يجرح
هو انتي تربيه مادبرتيها ادبرين هسه بس جنت اغلس واعتمدت على نفسي والحمد لله والشكر نجحت دور اول بدرجات عاليه جنت من ضمن العشره الاوائل.

صح عانيت وتعبت حيل بس ماضاع تعبي وقررت ماما تاخذنه ونروح لسوريا نكضي هناك العطله
ونخلص من الحر وهم نعالج ميمي إلى بعده رجله مو زينه واسنانه بدت تتسوس وتنخر وحدها واحد وره واحد حتى شكله بدع يتغير لان ماعنده اسنان وكلما اشوفه حيلي ينهد وماعندي غير الصبر والدعاء واهل البيت.

بحيث حتى بنجاحي مافرحت لان حايره بوضع ابني وفيزنه وسافرنه لسوريا وهناك ماما خلت لجنه طبيه كامله متكونه من 3 دكاتره هومه إلى يشرفون على علاجه وجاسم شايل ايديه من الموضوع كله
وحتى ماقبل يروح كال ماعندي منين اجيب بس ماما كلتله عليك مصاريفك بس ورفيف والجهال عليا كلشي منريد منك وفعلا ابد مادفع ولا فلس واني اشوف احمص بروحي حمص.

احاجي ماما اكلها مااريده هذا فكر خلي انفصل ادكولي خلي منظر كدام العالم اذا انفصلتي العالم تحجي عليج اشكال كمت بعد مااعتبر وجوده من اريد شي اطلبه من ماما وكملت فحوصات ميمي وكالو سبب اسنانه هو الابر الزياده إلى ماخذهن المفروض ياخذ بس 2 او اذا حالته كلش تعبانه.

ياخذ 3 اشلون تنطي سبعه كتلهم اني شمعرفني غير هو الدكتور هيج كال انطوني حذاء طبي خاص وعلاج طبيعي فقط بقينه شهر هناك والمشاكل ويه جاسم مستمره حتى بعد مياكل ويانه وميقبل يطلع ويانه حتى لو على حسابه شلع كلبي شلع خلصت السفره بس كلها مشاكل ورجعنه بسيطرة الوليد كل المنشأت توصل بالليل ونبقى بالسيطره إلى يعجبهم يطلعونه واذا ماعجبهم نبقى للفجر انطيت ميمي لجاسم وكتله بس اريد انوم حمودي خطيه تعب كال عوفي يمي وروحي.

جاسم: اخذت ميمي افتر بي اريد يخلص الوقت وبلكت الله يختمون جوازاتنه على نطلع شافني صديقي من جنت يم بيت جدي عايش صارلي اكثر من خمس سنوات ماشايفه سلمت عليه وبوسته وبوس ابني كلي هذا ابو عيون بس لا ابنك كتله اي ليش كلي ولك انت عيونك دكم ومحلو عندك هيج خلفه ولك دشوف البياض شوف الوجي شوف العيون عيونه موطبيعيات يخبلن وانوب لونهن غريب ولك منين جبته.

ضحكت وكتله يشبهه خواله لان عيب اكله يشبهه امه ولك عندك هيج نسايب ولك انت جاسم صدك اذا كالو محضوض
يمعود دصلي على محمد تره ابني مريض وجبناه علاج
اي صح اطرد عيون دشوفه هذا مال مريض بس اكلك ابنك اذا تمرض اني حسدته
عفته ورجعت دااشوف رفيف وخالتي وينهن لكيتهن كاعدات بصف المنشاه فارشات جرجف وحمودي نايم بحضن امه بقينه كاعدين لحد الفجر ختمو الجوازات والدخوليه مالتنه وصعدنه بالسياره حتى نرجع.

رفيف: الطريق كله مانمت خليت حمودي بصف ماما وفرشت لميمي بمكاني ومكانه حتى ينام مرتاح واني كعدت بالكاع لحد ماصار الصبح اخاف انام وابني يوكع لو يكعد لو يصير شي ماما نايمه وجاسم هم كاعد بالكرسي الكدامي هم نايم ديشخرصار الصبح وكعدو كلهم ووصلنه لكربله لان سيارات ماكو للحله بس جمسي واحنه نرجع منشاه فننزل بكربله وناجر مناك تكسي للحله نزلنه غسلت للجهال بالكراج واخذنه غراضنه وبدلتهم حفاظاتهم حمودي صح عمره اربع سنوات بس هذا طريق وين اودي فلبسته حفاظه اباوع لميمي على جفن عينه حبايه.

حاجيت ماما تعالي شوفي ماما عين ميمي ماادري اشبيها هاي شنو الحبايه
خاف مكروص البارحه من الحدود بدون مندري خلي نوصل ويجيبله ابوه دوه من الصيدليه وصلنه لبيت اهلي تعبانين متكسرين دخلت سبحت اني والجهال واشوف عين ابني حمره والحبايه دتكبر ويحك بيها سبحتهم وسبحت وطلعنه تغدينه وكملنه نمنه كلنه من التعب وجاسم راح للبيت كال اسبح وانام.

والعصر اجيبلج علاج لابنج والله للعصر اجه وجايب وياه قطرات ودهن وبديت استعمل العلاج لميمي بس حالته بدت تسوء الحبايه صارت 2 وبدن ينتشرن وعيونه كام من يكعد الصبح مسدوده وانتشرن الحبوب داير مداير عيونه ماخليت طبيب بالحله اذا مااخذته اله عفت رجليه وحرت بعيونه صرت ليل ونهار بس ابجي وهو خطيه حالته تكسر الخاطر بعد ميشوف لان الحب هواي فوك وجوه عيونه بحيث ورمت وبعد مينفتحن وبدينه بالدوام وصرت مرحله ثانيه وكوه اداوم كمت يوم اروح ويوم لا من وره ميمي اخير شي جنت بيومها بالدوام وكاعده ابجي بنهايه القاعه بالرست مالتنه اجه ولد طالب ويانه.

مرتضى: اشبيج رفيف ليش هالسنه دوامج ووضعج مو شي ماعاجبتني هالايام منو وياج جاسم لو اهلج
رفيف: شلت راسه عليه كتله ياريت لو جاسم ياريت لو اهلي ياريت لو مريضه واموت واخلص بس علتي اكبر.

مرتضى: جريت كرسي وكعدت يمها اريد افتهم رفيف اشبيها هاي رفيف إلى تضحك الهوا رغم الهم إلى عدها اول مره اشوفها استسلمت وضعفت ليش ماادري احجي ياعيني اني مو اخوج وادكوليلي انت خويه وعزيز عليا روحي انطيها الج بس لتبجين كافي مو كلبي مردتي.

رفيف: خويه مرتضى ابني حيروح من بين ايديا رضيت بمرضي رضيت بفقر حالي وتعامل جاسم الزفت ويايه رضيت بيتمي وعملياتي بكلشي كلت الحمد لله والشكر انحرمت من اب واخ واخت وكلت ربي يعوضني برحل بي حظ اجاني الرجل بعد اتعس وكلت عوضني ربي بولدي وحزام ظهري بس مال ياخذ ابني اموت والله تعبت مرتضى والنبي حملي زاد وهمي بعد مااكدر اتحمله إلى بكدي بعدها مرتاحه ببيت اهلها ومدلله وعايشه حياتها واني المسؤوليه كسرت ظهري ورضيت وماحجيت بس ابني مريض ومديطيب.

مرتضى: اباوعها تحجي وتفرفح وروحي لايبه اريد افتهم اشبي ابنها كتلها ياعيني دحجي اشبي بلكت اكدر اساعدج بشي اخذه وياج لاي مكان ولاي دكتور والتكاليف كلهن عليا لو اعرف ابيع هدومي بس مااخليج هيج حايره
رفيف: تسلم متقصر هي مو عالتكاليف ماما مامقصره وكالت وين متردين اودي بس هو مديتحسن عيونه وحرت وياه مخليت طبيب بالحله ماوديته ومااعرف طبيب بي حظ بيغداد اخذه اله.

مرتضى: وليش بغداد اني اعرف دكتور بالنجف اسمه حسين الحمامي هذا ورده ماكو واحد راحله ورجع ندمان
رفيف: صدك تحجي اكو اطباء زينه بالنجف
مرتضى: وج النجف بيها عمالقه واصلا نص اطباء بغداد عافوها من وره الوضع التعبان والطائفيه اذا تردين احجزلج بس هذا حجزه يطول شهور
رفيف: فدوه مرتضى حاله ابني تعبانه حيل ويجوز يعمى مو مال شهور الله يخليك اشكد يردون انطي واخذه هالايام فدوه اروحلك.

مرتضى: صار والله صديقي السكرتير اليوم اخابره واشوفلج اقوب موعد ولتشيلين هم وكومي غسلي إلى يشوفج شيكول كاتلها رجلها
رفيف: على مود اكضي بي التوبه يكدر يمد ايديه هو صح يتجاوز هواي ومرات يدفعني بس ميكتلني غير ادزه ماما وماادراك ما ماما تعدمه وعلي
مرتضى: ديلا كومي قبل لتبدي المحاضره
رفيف: كمت وعندي امل ضعيف زرع بداخلي مرتضى وكملت المحاضرات ورجعت للبيت بلغت ماما كالت عادي ناخذه بس من عرف جاسم.

جاسم: انتي مخبله ولج هو بالحله محد عالجه تردين تروحين للنجف بس خساره فلوس وكلشي منحصل هاي صار شهور نعالج بي شنو إلى تحسن زاد ماقل كعدي رفيف واسكتي
رفيف: اسمعني زين جاسم اول شي لتعرضلنه وثاني شي مادافع شي من جيبك اروح يعني اروح تجي اهلا وسهلا متاخذنهناجر سياره ونروح وطز بالفلوس إلى متخدم اهلها
جاسم: ها صارت هيج خوش لعد روحو وحدكم
للعصر خابرني مرتضى
الو
رفيف: الو هلو مرتضى بشر.

مرتضى: حظج حلو خابرت الولد وصدفه جاي الدكتور اول البارحه من السفر وكال هو موجود بمستشفى الحكيم الصبح روحوله هناك لاحجز ولا تاخير وحتى فلوس كشفيه ماكو بلاش والولد تلكيه هناك هو يرتب الدخوليه مالتكم
رفيف: صدك والله باجر اروح للدكتور بهالسرعه رحمتك ياربي هسه اني مو عالفلوس بس متاكد نكدر ندخل
مرتضى: كولي يالله وتوكلي بالله وروحي واني باجر اخذلج اجازه عن الدوام.

رفيف: تسلم خويه رحمه الله والديك تعبتك ويايه وفضلك هذا ماانسى طول عمري
مرتضى: صدك جذب رفيف تره اني اخوج وعيب هالحجي واذا محتاجه فلوس هسه اني قريب على بيتكم وشايل ويايه اشكد تردين
رفيف: لاتسلم متقصر رحمه والديك باي وسديته
رجعت حجيت لجاسم وحاولت اقنعه بس هم مافاد اخر شي خابرت ماما تجي تتفاهم وياه بس هي تكدرله
وفعلا اجتي واقتنع ياخذنه وجهزت غراض جهالي من الليل ونمنه وكعدت بالسبعه الصبح سويت.

ريوك إلى ولجاسم واكلنه شي خفيف لان ورانه طريق وخاف نتخربط وكعدت الجهال غلسلتهم وبدلتلهم وطلعنه اخذنه ماما من بيت اهلي واتوكلنه للنجف.

الفصل التالي
جميع الفصول
روايات الكاتب
روايات مشابهة