رواية شهوات رجل ظالم للكاتبة زهراء أمجد الفصل الرابع عشر
سويت ريوك إلى ولجاسم واكلنه شي خفيف لان ورانه طريق وخاف نتخربط وكعدت الجهال غلسلتهم وبدلتلهم وطلعنه اخذنه ماما من بيت اهلي واتوكلنه للنجف.
والطريق كله ادعي وانخى اهل البيت يصير ابني زين ووصلنه للمستشفى والعالم عليه قتال ولكينه فعلا الولد منتظرنه وقاطعلنه رقم وبقينه اشويه كاعدين لحد مااجه سرانه دخلت اني وجاسم وميمي اباوع جاسم كالب وجهه وكوه جاي المهم جبته حتى تكلب وجهك اهم شي اجيت فحصه الدكتور وشوفته العلاجات إلى مستعملهن والوصفات مال الاطباء وشكالو.
الدكتور: كل هذا منطي لطفل عمره سنه وشهرين صدك جذب هذا كله تذبو ميحتاجه والولد كلشي بي غير جرثومه بعيونه من يحك عينه بايديه تنتقل من عين لعين حكتبتكم قطره ولو غاليه بس متفيده غيره واعلمج على استعمالها وهسه يتحسن
رفيف: دكتور ابيش ماجان اكتلها حتى لو بمليون اجيبها اهم شي مو عمليه وابني يطيب
الدكتور: لا سعرها 14 ألف وابنج يطيب وكلشي مابي.
رفيف: هو كال 14 ضحكت بكلبي 14 وادكولي غاليه هاي بيها حياة ابني اخذنه الوصفه وطلعنه اتشكرنه من الولد ورحنه زرنه الامام علي عليه السلام وعفت الولد يم جاسم بالصحن ورحت اني وماما لبابا وهناك طلعت حركتي كلها وبجيت وعاتبت وحجيت إلى بداخلي كله تمنيته موجود ويشوف الضيم إلى وحيدته بي إلى راح وعافها بنص هالغابه ليش بابا مافكرت بيا اخذني يمك وخلصني فراكك طال وصلري خلص والله بعد مااتحمل احجي واعاتب فقدت.
بحيث ماما سكتت وبقت تسكت بيا واني مااسكت تعال شوف حفيدك إلى نفس اسمك حروح من ايديا مريض وحالته حال ليش مو حفيدك هذا اندعيله مو يكلون الميت يشوف ويسمع ويدعي لاهله بالخير ليش اني متدعيلي مو اني احبك مو كل يوم اقرالك الفاتحه مو ماعندي غيرك ومااحلف غير بروحك ليش بابا هم عفتني وحدي وهم.
ابني مريض ومتندعيله فرغت كل إلى بكلبي بقيت اكثر من ساعه اني ابجي طلعت ضيم كلبي كله لحد ماتعبت من البجي قريتله الفاتحه اله ولجدو وقريتلهم سوره ياسين وهديتها الهم ورجعت لكيت جاسم كالب والوجي اني غلست مالي حيل اتنفس اخذت الجهال منه ورحنه للسياره حتى نرجع للبيت وصلنه للحله اشترينه العلاج مال ميمي واستعملته اله مثل ماعلمني الدكتور انطيته العلاج العصر.
ورجعت بالليل والصبح اول ماكعدت بيومها جان جمعه هم خليلته بس هالمره كعد عيونه مالازكه ايي رحمتك يا ربي بلكت هذا الدكتور وكع عالعله وابني حيطيب
للعصر اشوف عيون الطفل بدت تتحسن وخطيه كام من اريد اخليلي القطره وانظف عينه ينام يرتاح جان قبل عالعلاج القديم يبجي وميقبل كوه يالله اخليله القطره هسه لا مبين هذا العلاج مرتاح عليه ومرت الايام وبدت عيونه تتشافى ورجع طبيعي.
واني كملت الكورس الاول ونجحت وبدينه بالكورس الثاني وحياتي شبهه مستقره ماكو اي شي جديد عدى مشاكل جاسم عالدوام إلى بدت تزيد متنقص وميمي اتحسنت عيونه بس رحله سوده عليا مدتصير زينه وصفولنه دكتور بالحله مال مفاصل وهم شاف تحاليله والاشعه وطلب اشعه جديده بس هذا الوحيد إلى جان تشخيصه مضبوط ووكع عالعله مالته طلع بالطفل مرونه اربطه.
وهذا مرض وراثي منتقل مني ومن ابوه مرات يظهر بالايد ومرات بالرجل وبما انو هو طفل وجان سمين هواي فبين برجله انطاني بس تمارين حتى تقوه العضله مال الرجل وادهن رجله بزيت الزيتون ولازم حذاء طبي ويلبسه بالعكس يعني اليمنه يسره واليسره يمنه واستمريت على كلام الطبيب.
وصدك بده ابني يطيب طبعا ماانسى فضل مرتضى إلى رحت واتشكرت منه وتوسلت بي اعزمه ماقبل كال عزيمتج هديه لسلامت ميمي بس اني ماعبرتها وعزمته بالنادي صح الاكل مو كد المقام بس احسن من ماكو لان هو ماقبل ابد وكال اني ماسويت شي هذا ابن اختي وواجبي اوكف وياه.
وبدينه بامتحانات الكورس الثاني والحمد لله ماعندي اي مشكله بالدوام واولادي صحتهم زينه واني هم زينه حياتي استقرت ودوامي استقر والحمد لله اخذت السعيات مالتي جانن كلهن عاليات بس عندي ماده اسمها معماريه الحاسبه جانت صعبه ودرخيه فجان السعي بيها مالتي مو كلش قوي بس انجح وبدينه نتحظر للفاينل.
ورحت قبل الامتحانات بكم يوم جبت الجدول وشفت موعد الامتحان ورجعت بعدها خابرتني وحده من صديقاتي كالتلي وراج من طلعتي المسائي اعترضو عالوقت وكالو منكدر نحصل اجازه فتغير الامتحان للظهر اني اعتمد على كلامها وضبطت الماده وكعدت الصبح اراجع واستغل الوقت اعيد بي الماده وبدلت ورحت للامتحان بس هنا صارت نكسه بيا ثانيه وغير متوقعه وصلت للكليه نزلت من التكسي بيومها جان الجو تراب وجاسم ماقبل يجي عليا يوصلني للدوام كلي اخذي تكسي وعود اني ارجعج من الامتحان ورحت بتكسي ووصلت للكليه ودخلت تلكاني علي.
علي: هلو فوفه اشلونج اليوم
رفيف: هلو علاوي الحمد لله وانت اشلونك
علي: الحمد لله الاسئله سهله بس شو محد طالع لسه بس اني وانتي
رفيف: يااسئله علي هو الامتحان مو ساعه 12 وهسه بال11 بعد ساعه انت اشبيك شدتحجي
علي: رفيف ياساعه 12 انتي شنو بيج شي رفيف تره احنه امتحانه ساعه 10 والطلاب هاي بدت تطلع شنو انتي وين جنتي
رفيف: اني سمعت هيج فقدت كتله مستحيل مو كالو غيرو ركضت اني وعلي للقسم رحت للمقرر واني ابجي وافرفح.
المقرر: بابا غير تتاكدين غير يتصلون بيج جماعتج الامتحان بده والطلاب طلعو مااكدر بعد اسويلج شي غير الدور الثاني
رفيف: فدوه استاذ مروتك والله اموت والنبي هستوني اجيت وماشفت حتى الاسئله فدوه دخلوني لللامتحان بقى مصر على كلامه وماقبل خابرت لجاسم واني ابجي واصيح جاسم الحكلي فدوه الامتحان راح مني ولك امتحانهم ساعه 10
جاسم: جايج دقايق ويمج
رفيف: سديته واتصلت بماما واني ابجي منهاره.
ام رفيف: الو وج اشبيج تبجين خطفوج صار بيج
حادث وج فهميني اشبيج ولج هديتي حيلي
رفيف: الحكيلي ماما الامتحان راح مني وج ماما الوقت بالعشره واني بعد مااكدر امتحن الحكليلي.
ام رفيف: جنت بالسوك دااجيب خضروات ولحم واتصلت عليا رفيف بس تبجي وتصيح الحكيلي ماما اريد افتهم اشبيها وشصار كعدت بالكاع اريد احاجيها مااكدر تبجي وتصيح عفت المسواك يم الرجال واخذت تكسي وللكليه كبل وصلت لكيتها واكفه كاعده عالصيف وداير مدايرها الطلاب وتبجي ومتهستره ووضعها تعبان شافتني اجتي تركض وشبكتني وتبجي وويه جيتي وصل جاسم هم.
اخذناها اني وجاسم للعميد كال منكدر نتاخذ اي اجراء غير تقرير طبي اجازه عن امتحان اليوم حتى ليروح منها خمس درجات ومتعتبر مكمله بالوثيقه تعتبر مؤجله اشكد بقينه نحاول وياه بس مترهم لان الطلاب طلعو من القاعه لو بعدهم جان كدرو يدخلوها اخذناها ورجعنه للبيت وهي عباره عن جنازه كوه تحجي وتتنفس.
رفيف: اشكد حاولو اهلي ويه العميد والدكاتره بس مارهمت رجعت للبيت وصلنه ماما واخذني جاسم ورحنه للمستشفى ومناك لااستشاريه حتى اسوي اجازه طبيه تنرفق عدهم حتى اعتبر مؤجله ودخلت للدكتوره من شافت حالتي وجاسم حجالها الموقف تعاطفت ويايه وساعدتني وبسرعه وافقت عالاجازه وكملناها ورجعت لاهلي بس اني دربي مااشوفه من التعب وحركان الدم جان من الايام السود إلى بحياتي وكملت الامتحانات رغم ماجنت كلش زينه بس نفسيتي حيل تعبانه لان من اول يوم ادري بروحي عندي دور ثاني ومرت الايام واستلمت النتيجه وجنت كلش زينه بكل المواد بس للاسف عنديماده دور ثاني.
وبديت العطله كلها اتحظر للامتحان وجنت خايفه حيل خاف اتمرض ويصير بيا مثل مصار بجامعه بابل بس الحمد لله امتحنت وجاوبت وبعدها استلمت النتيجه ناحجه ودرجتي عاليه وصلت مرحله ثالثه وبقيت محافظه على مستوايه الدراسي عفت صديقاتي إلى طعنني بالامتحان وبعد مااحجي وياهن لان إلى خابرتني جانت بنفس قاعتي والثاني مكانها ورايه كاعده يعني اقلها المفروض ادكول هاي ليش ماجايه جان نبهت المراقب ويتصلون بيا بس كلمن يكول ياروحي.
بدينه بسنه دراسيه جديده وحمودي هم مستمر يروح ويرجع ويه ماما وميمي يبقى يم بيبي وجاسم اطور من المشاكل الى ياخذ محاضراتي بدون ماادري ويذبهن مااعرف وين بحيث جنت دوم اضبط وضعي قبل الامتحان وارقم الملازم لان ادري حلكه نقص واما الحك استنسخ او اخذهن من صديقتي سمر إلى تعرفت عليها عن طريق التانكو جانت تصور وادزلي واني اقره صح اتعب بس احسن من ماكو.
ومرت الايام وكملت الكورس الاول والثاني وسعياتي محافظه عليهم والحمد لله والشكر بس إلى متعبني جاسم إلى جان حتى رقمه غيره وبعد ميقبل ينطيناه واخلاقه بدت كلش تخرب بحيث حتى بعد ميقبل ينام يمنه بالغرفه بحجه انتي وجهالج متخلوني انام مرتاح.
وانتي تسهرين عالدراسه من غير دوم يبات يم اهله واكل مياكل عدنه اشكد جنت احاجي واشكد اتوسل بي بس مافاد وماعندي احد احجيله واشكيله غير صديقتي المقربه إلى صارت بالنسبه إلى مثل اختي وجانت دومها تصبر عليا وادكولي اتحملي لخاطر ولدج طبعا مسواك البيت ومصروفنه مازال من ماما.
واخلاقه صارت لاتطاق يرزل ويهين ومو بحاله جنت من يبقى يم اهله ابقى للصبح كاعده اخاف انام بالبيت وحدي وبالذات هالفتره جيرانه فلشو بيتهم للكاع وحتى سياجهن إلى علينه فلشو.
وسوو بس الاساس وخلصت فلوسهم مدري صارت عدهم مشاكل وجانت هالفتره عندي كلش صعبه اجي لاهلي احجي لماما ادكولي هو جاسم وين اكو منه انتي متنجرعين اكلها ماما حتى رقمه ماعندي ومن اريد شي اخابر لاخوه لو لامه وهومه يكلوله ادكولي لا كلامج مو صحيح ومو منطقي بقيت على هاي المعاناه وماعندي احد يصبرني غير صديقتي إلى جانت لو تجي يمي لو اروح يمها من الدوام ماارجع للبيت وابقى اقره وياها وبعدين ابوها يرحعني ومرات جاسم.
صبرت امري لله وبقيت مصره على هدفي انو انجح واكمل واحقق حلمي إلى حلمت بي من الطفله وصارت حياتي عباره عن دوامي واطفالي صارت علاقتي بجاسم شبه رسميه وكملت ثالث والحمد لله نجحت من الدور الاول وبدرجات عاليه.
وبديت بالعطله واتفرغت بس للبيت وللولد وحمودي صار لازم يروح صف اول ابتدائي وبديت احظره للمدرسه وادرسه حتى من يروح ميواجهه صعوبه واخذناه اني وماما وجهزناه تجهيز مدرسه كامل وجاسم مو يمه السالفه وبيوم بشهر التاسع سنه 2013
ماما جانت محتاجه ملابس من الجمعيه وطبعا جاسم اذا ماما رادت شي ميرفض وياخذنه عادي حتى يظهر هو زين بس يمي العكس حتى من احجي كلها ادكولي اكو مثل جاسم خادم النه اشوكت منريده يجي.
واتحظرت اني والجهال واتصلت بماما كالت مكمله بس جنه منتظرين اذان المغرب حتى نصلي ونطلع واذن وصلينه وكملنه اجاني جاسم اخذني اني والجهال وطلعنه ناخذ ماما وجنت لابسته مانتو جويتي وبنطرون جوزي لان هو بي تطريز من فوك جوزي وشال جوزي والجنطه والحذاء جوزي وماما لابسته جبه نيلي وشال مشجر نيلي وبيجي طلعنه وبالطريق اتصلو على جاسم
الو ها يمه اشلونج
الحك يمه جاسم ابوك تخربط وهسه احنه بمستشفى مرجان ودخلو للانعاش.
يمه ليش تخربط شجاه
ماادري وكع فجاه واخذته اني واخوك تعال بسرعه
اي يمه جاي وسديته من امي التفت على خالتي
خاله اني راح انزلكم بالجمعيه واني طالع للمستشفى وانتو خلصو وارجعو بتكسي
ام رفيف ورفيف: ليش شكو منو خابرك ووين دتروح
جاسم: ابويه متخربط وماخذي للمستشفى هسه بالانعاش
رفيف: جاسم اطلع بينه للمستشفى
ام رفيف: ابني مو وكت ملابس اطلع كبل للمستشفى عود نطلع غير وكت
جاسم: خاله انتو روحو واني يمه بالمستشفى.
رفيف: لاجاسم مو وكت ملابس خلي بالبدايه نطمن على عمو وبعدين نطلع على راحتنه هسه هي مال مولات وطلعه
جاسم: ماشي حطلع كبل للمستشفى.
وصلنه للمستشفى واني خايف على ابويه حيل لان ابويه رجال فقير كلش وحباب وكلبه طيب دخلنه اني ورفيف والجهال وخالتي ولكيت امي واخويه واكفين بباب الانعاش سلمت عليهم ورحت للدكتور حتى باكت يقبل ادخل اريد اشوف ابويه بس اشكد حاولت وتوسلت ومافاد رجعت الدمعه بعيني اباوع رفيف مقهوره ولازمه الولد وواكفه يم اني هي وخالتي
رفيف: دخلنه سلمت على عمتي وعلى اخو جاسم سالتها اشلون هيج تخربط كالت.
ام جاسم: مابي شي جان شو وحده وره ماخلص صلاه كال راسي يمكن الضغط صاعد اخذ علاج ومافاد شو بعدين وكع ماحس بشي جبناه واجينه
رفيف: الله يعديها على خير ويكومه بالسلامه ميستاهل عمي حنين وفقير وكلبه وطيب
ام رفيف: عفت رفيف دتسولف ويه ام جاسم ورحت بدون محد ينتبهه للدكتور المقيم إلى بالانعاش سالته عن حاله ابو جاسم.
الدكتور: وضعه جدا صعب صايره بي جلطه والقلب مالته تعبان حيل وهاي وكعته ميكوم منها والله اعلم انتو ادعو وبعد الاعمار بايد الله بس مااعتقد يكدر يتجاوز هذا الوضع إلى بي
ام رفيف: كول غيرها دكتور بعده حتى ماطلع تقاعد مواليد 1952 بس غير المرض والقهر كبرنه حتى اكبر حفيد عنده لسه مامتسجل بالمدرسه عود هسه حروح للاول
الدكتور: مابينه شي كلمن وحد يومه والمرض والموت مابي صغير وجبير انتو اندعو والباقي يم الله.
ام رفيف: اباوع لابو جاسم من بعيد وضعه كلش تعبان وكله اجهزه وبلا ملابس ومغطي بجرجف ربي كومه بالسلامه بعد مافرح بزواج ابنه الثاني ماشبع باحفاده عفته وطلعت لكيت الكل يبجي بقينه واكفين بباب الانعاش ماكو لاكرسي ولا مصطبه رجلينه وكعت من الوكفه والجهال تعبو جاسم بقى يتوسل بالاطباء كوه قبلو يدخل يشوفه لبسو ملابس خاصه فوك ملابسه ودخل.
جاسم: دخلت بعد ماتوسلت بيهم وبالف ياعلي قبلو بس اريد اشوفه ليروح يموت واني ماشايفه دخلت يمه واشوفه كله صوندات واجهزه ومصلخ بجيت على حاله لتموت وتروح وتعوفني بويه والله مااكدر بدونك بعدنه ماشبعنه منك كوم فدوه اروحلك بقيت اعاتبه واتمنى يحس ويرد عليا وهو لاايد ولارجل خمس دقايق وطلعوني ماقبلو ابقى اكثر نزلت ملابسهم وطلعت طمنت امي واخويه ورفيف وامها وكلت لامي تجي ويايه اوصلها وخلي اخويه يمه لان ممنوع نبقى يم الانعاش واصلا وجودنه ماله داعي وكتله ابقى هنا بين مااوصلهم واجيك.
امي ماقبلت تروح بس قنعتها واخذتها طلعت واني كلبي وروحي يم ابويه وصلت امي ورجعت للبيت.
رفيف: وصلنه عمتي وبعدين وصلنه ماما ورجعنه للبيت بس جاسم كلش تعبان كوه يحجي كتله تريد عشه كال مااشتهي كتله لعد مراح اسوي غير بس للجهال لان اني هم مااريد عشيت الجهال ولملمت البيت ونظفته وعزلت كلشي خاف باجر يصير شي كملت نومت الجهال ولكيت جاسم صافن بس يشرب جكاير وعيونه تكت كعدت يمه كتله سمي باسم الله وانعل الشيطان وكوم اندعيله الله يكومه بالسلامه بينه روح وبي روح والاعمار بايد الله ليش كاعد تبجي هسه باجر الصبح يطلعو ويرجع للبيت لتخاف كوم نام حتى باجر تروحله من وكت.
احاجي وهو ساكت بس يدخن لاحس ولا نفس كملت كلامي وجريته كومته ودخلته للغرفه نام بدون ميحجي اني هم رحت لمكاني نمت
كعدت ثاني يوم من السبعه الصبح لكيت جاسم كاعد سويتله ريوك اكل عالسريع وطلع اتصلت بي عن طريق اخوه لان ماعندي رقمه كال صار زين ومنتظرين الدكتور حتى يطلعو للردهه مال الرجال كتله اي صلوات.
جاسم: فوفه الحمد لله زين ابويه وصحه وكام يحجي بس ربع ساعه ويجي الدكتور ونطلعه والظهر اجي اتغده وارجع للمستشفى
رفيف: ايي الحمد لله على سلامه مو كتلك ماكو شي ياعيني على شنو هالبجي جلطه وعدت سلامات يلا باي.
جاسم: الحمد لله يلا باي وسديته بقينه اشويه وكملنه اوراق ابويه وحولناه والحمدلله زين ويحجي بس اكل ممنوع يبقى عالمغذي لباجر وهم نعمه اهم شي عدى مرحله الخطر رجعت الظهر اتغديت وكملت ولكيت رفيف مسويه اكل لاخويه ومحضره ترمز الجاي ومحظره مي وعصير وكلشي مسويه اخذتهن منها.
وانطيتها رقمي وطلعت للمستشفى لكيت امي جايه كتلها لتبقين هنا ردهه مال زلم وميصير اشويه وروحي هي هم ماحجت شي للعصر خابرتني رفيف كالت اني جايه ويه خالتي وبيبي وعفت الجهال يم ماما من ارجع هي تجيكم دليتها عالمكان وامي هم جانت بعدها مارايحه كعدو اشويه وكتلهم روحو وصلتهم للباب مال المستشفى.
وامي هم راحت وبعدها اشويه اجتي خالتي هم اشويه وراحت اشويه حالته بدت تستقر الدكتور كال باجرالصبح يطلع من المستشفى بس يبقى عالسوائل ممنوع اي اكل دسم بقى اخويه بايت يمه واني اخذت خالتي ورجعنه لكيت رفيف مسويه عشه ومنتظرني تعشينه واني مطمن ابويه تحسن عفت رفيف تنظفت وتغسل المواعين واني رحت نمت لان تعبان مانمت البارحه زين.
رفيف: كملت تنظيف وغسل المواعين ونومت الجهال ونمت لان تعبانه مانمنه البارحه بقينه قلقين للصبح بس اليوم لا ماكو شي فنمت مرتاحه كعدت ثاني يوم هم بالسبعه كعدت جاسم ورحت سويت ريوك اكلت اني وياه وهو راح للمستشفى وانطيته ريوك لاخوه اخذه وراح
خابرني وره ساعه كال ابويه طلعناه وصار زين تحمدلته بالسلامه وكتله حتبقى يمهم عالغده كال لا اتغده بالبيت وسديت منه الفون.
كمت نظفت وسويت غده وكعدو الولد ريكتهم واكلت وياهم وغسلتلهم وعفتهم يلعبون واني دااكمل شغلي صار الضهر اجه جاسم طبيعي وفرحان سالته كال
? طلعته وهسه بالبيت ومابي شي ويمشي بس وصيت امشي تسويله شوربه دجاج وممنوع تنطي شي بي دهن لو ملح لان يروح يتخربط
? الحمد لله عدت على خير اكلك اشوكت تاخذنه حتى نشوفه
? اليوم المغرب وره الصلاه ونتعشى ونروح حظري روحج ماشي.
? ماشي بس اكلك جاسم ماما واهلي هم يردون يجون ويانه عادي اكوللهم
? اي ميخالف هلا بيهم اني حنام ساعه وكعديني عندي شغل بالمولده حتى اسويها قبل الغروب العالم هم خطيه تريدهوا
? اوك نام واني اكعدك.
?
عفت جاسم نايم بالغرفه وكعدت اني والولد بالهول هومه يلعبون واني اتصفح بالفون مالتي بقيت اشوف الكروبات واعلق واقره التعليقات اريد الوكت يخلص ماعندي شي اسوي ساعه وكمت كعدت جاسم سبح وطلع.
كمت اني وراه هم سبحت اني والولد وبديت احظر العشه حتى قبل المغرب وخابرت ماما واتفقت وياهاحتى نروح بدون منتاخر دخلت للغرفه احظر ملابس للولد والي
جان يدخل جاسم يصيح ويركع بالبيبان اني كمزت اريد افتهم شكو اشبي كتله اشبيك بس تصيح باسمي شكو شصار من الباب تصيح وتعيط باسمي فهمني اشبيك.