رواية شهوات رجل ظالم للكاتبة زهراء أمجد الفصل السادس والعشرون
دخلت للغرفه وراحو الجهال يسبحون واني حايره ماادري سلمت امري لله وقررت اذا لكيت شغل ابقى واذا مالكيت اضطر ارجع لان بس يخلصن فلوسي لازم ارجع والمشكله اني مو وحدي شنو ذنب هالاطفال إلى متعلمه تعيش بترف تنذل ولدي مو حمل ذله اذكرت اطفال الشوارع اشلون حالهم بقت افكار اكشن كومه تفتر براسي حسيت احد يهز بيا درت وجهي وجان يجيتون عليا اثنينهم
الولد: ماما هاي اشبيج صارلنه ساعه نسولف وياج احنه نحبج.
رفيف: واني اموت عليكم يابعد روحي يلا تعالو انشف شعركم حتى ننام ورانه طلعه
ميمي: حبابه فوفه مااريد ارجع للعراق مااحب ابقى هناك
حمودي: ميمي اسكت لازم نرجع ماما متكدر تبقينه هنا ماعدها شغل
ميمي: اهووو هم حجه هذا انت اسكت.
رفيف: وبدت رحمه الله بيناتهم واحد يرفع وواحد يكبس صح همه اطفال بس احس داخلهم اكبر من عمرهم بسبب الوضع إلى احنه بي احلامهم دوم هي نكبر ونسوي بيت جبير وتصير عدنه سياره وانتي تكعدين وترتاحين صحت بيهم واتظاهرت اني زعلانه وكمت ابجي بالجذب بسرعه سكتوا واجوني يبوسون بيا كمت نشفت شعرهم وحظرت ملابسنه مال باجر ووقت المنبه ونمنه.
كعدت الصبح واليوم هو خامس يوم يعني مابقى غير يومين ولازم ارتب وضعي طفيت المنبه وكمت سبحت عالسريع وفرشت وكعدت الولد وبدلنه وصعدنه نتريك وكالعاده ام زهراء بعد كلش ابتعدت عني وماطايقتني بالله هاي شحجي وياها اني شمسويه الها.
يعني تريد تكضي السفره براسي اشلون بشر مدري البشر استغلالي مدري اني حظي معثر يشمر شكو زباله بوجهي اني هم عاملتها على كد عقلها اتريكت اني وجهالي ونزلنه واخذونه لمنطقه اسمها اياصوفيا جانت منطقه اثريه كلش حلوه ومرتبه وبيها شغلات تراثيه قديمه اخذت للجهال شغلات عجبتهم.
وافترينه واخذنه صور وانعجبت مره جبيره اوروبيه بميمي وحمودي واخذت وياهم صور وبقت تضحك وياهم وتاشرللهم وهمه هم اندمجو وياها واخذونه مناك لمطعم
اتغدينه وهم سالت المترجم كتله ماكو احد اجاه يريد وحده تشتغل كال لا والله مخليج على بالي رغم كل هذا بس مااستلمت بقيت احاول وعندي امل لاخر ساعه قبل السفر اكول رحمه الله على ساعه تجي للبشر وماطول ربي خلقني مستحيل ينساني.
رغم قسوه الزمن بس. ايماني بربي جبير وماتضيق الا تفرج اخذونه مناك للمول وطبعا مولات تركيا فد شي يخبل اخذت صور كومه وجهالي بقو يرحون منا ويجون منا واني مدري اباوع عالجمال الموجود هناك مدري عيني على عليهم خبلوني ساعه ازهك وساعه اكول خطيه خلي يطلعون.
الكبت والقهر إلى داخلهم وكمل يومي ورجعت للفندق وهم سالت الموظف وكان جوابه مثل كل مره ماكو محد طلب موظفه صعدنه سبحنه بالسره اني والجهال وفتحت نت اذكرت اليوم ماحاجيه ويه اهلي عزه والنبي هسه ماما تعزيني وتصخمني ادري شجاج ام لو زلزال اووف يابيبي مدكوليلي بشنو متنسيه بيها ماادري فتحت نت لكيت بس اتصال مرتين من ماما وخالاتي هم متصلات عليا.
اتصلت بخالتي علا سلمت عليها وسولفت اشويه وسديته اتصلت بماما دك كم مره يالله ردت
رفيف: الو هلو ماما
رحاب: هلا رفيف اشلونهم الجهال
رفيف: الحمد لله بخير انتو اشلونكم
احنه زينين خابرتج بس ماحصلتج
اي جنه طالعين وماعندي نت وهستونه رجعنه وحتى الجهال ديسبحون بعدهم بالحمام
هااا طالعين لو جنتي ادورين شغل حتى بعد مترجعين
لا والله ماما جنت ويه الكروب وهسه يطلعون الجهال ويحجولج اذا متصدكين.
لا على شنو مااصدك اكلج رفيف دزيلنه صور الجهال والج ولج والله مشتاقتلكم يابتي عقلي وارجعي وهاي امي تريد تحجي وياج واني وراها اريدج
اي جيبها اني هم مشتاقه احجي وياها واسمع صوتها يهلهل ها يمه حبيبه اشلونج
الحجيه هلا يبعد امج ليش هيج ولج بذات ولج مو اني اكول فوفه الغاليه بت الغالي ليش هيج يمه تردين تحرميني منج ومن الجهال وج يمه اموت بلاكم انتي وياهم شعندي بعمري وراكم.
رفيف: اسمع حجيها قهرني وكسري كلبي تحجي وتبجي اني هم كمت ابجي لا يمه من عمري على عمرج شعندي غيرج عمرج طويل ماابقى ارجع واذا بقيت ادز عليج يمي.
الحجيه: لا يمه وين تبقين تردين العالم تحجي علينه انتي حقج محد رحم حالج بس يابتي إلى ماله اب اله رب واني امج مااعوفج شحده إلى يحجي وياج والله اطردهن كلهن من البيت انتي ام العقل وج انتي ترباتي بعد عمري عمرج اعقلي يابتي وتعالي ولج كلها من رحتي لسه ديحجون اشكال لتشمتين الكل بيك وهسه يكلون اطلكت وانهزمت ويه غيره يلا يايمه بعد ابويه ارجعي.
رفيف: الله كريم يومه الله كريم بسيطه تنحل يلا اني اروح وسلمينه عالكل ودعتها وسديت الخط وخليت الجهاز عالشحن طفيت الواي فاي طلعو الجهال من الحمام نشفت شعرهم ونومتهم واني وقتت المنبه ونمت.
كعدت الصبح على صوت المنبه ساعه سبعه ونفس الروتين مال كل يوم وبعدها من ام زهراء كالبه الوجي سلمت المفتاح وهم سالت عالشغل كال ماكو مابقى عندي اي امل غير الكنيسه كلت اليوم ارجع الهم بلكت احصل منهم خبر يفرحني جانت الجوله مجرد مولات اشترو الجهال ملابس هومه ماقبلو كالو منريد بس اني مااكدر اشوف وليداتي من دون الاطفال ميشترون كملنه وتغدينه بالمول وبقو يلعبون اكو العاب بالمول هومه يلعبون واني اصور بيهم سالت المترجم هم نفس الجواب ماكو شغل رحنه قبل المغرب صعدت للغرفه بسرعه ذبيت غراضي.
وصليت وارتاحيت اشويه وكمت سبحت اني والجهال واتجددت وانتظرت اذان المغرب صليت وخلصت واخذت الجهال وطلعت للكنيسه اشوف بلكت احصل شي هذا اخر خيط. بقالي.
كل خيوط الامل راحت وصلنه ودخلنه وسالتهم وكان جوابهم للاسف ماكو اي نتيجه غير الانتظار هنا احس اختنكت ورجعت لنقطه الصفر وكل احلامي راحت لان بعد لازم ارجع واتحمل مواجهه اي شي او اي مشكله تواجهني واسكت طلعت اني ووليداتي اسحل بيهم ودمعتي بعيني وهمه سوده عليا بس صافنين.
ويمشون والسكوت سيد الموقف كعدت بالشارع اباوع عالعالم وعالجو وعالشوارع وعالدنيا الغبره إلى ماادري شتسوي بيا بعد تمنيت ابجي بصوت تمنيت حضن اب او اخ او حتى ام واووف ياماما ليش هيج تسوين بيا ليش مو اني من ريحه حبيب كلبج عمري كله اني جنت مطيعه الج بكلشي وحتى زواج توسلت بيج تتزوجين وعوفيني يم بيت جدي وروحي عيشي حياتج ويجي يوم يقبل زوجج وجودي يمكم كلشي فضلت راحتها على راحتي بس هي مدااعرف اشبيها جبروتها حتى عليا بقيت كاعده وجهالي اول مره ساكتين واحد عاليمنه والثاني عاليسره انتبهت عليهم لكيتهم صافنين وساكتين حضنتهم وكلتهم اليوم البزونات الحلوات مالتي ساكتين.
حمودي: ماما اني مو بزونه اني بزون ما
ميمي: واني هم مو بزونتج ماما شنو بشونه احنه وليدات كبار
رفيف: يمه فدوه وفداوي للكبار انتو زلم مو بس كبار يلا كومو نتعشه اني متت جوع انتو ماجعتو
الولد: بكيفج ماما انتي وين متردين احنه وياج
رفيف: يلا يبعد روح الماما كومو واحلى عشه لاحلى وليدات بوستهم وكمنه نفضت ملابسي اني ووليداتي ولو رصيفهم مابي ولاذره تراب مثل ارصفتنه بالضبط.
اخذتهم ورحنه للمطعم تعشينه وكملنه طلعت افتر بالمحلات ضايجه حيل وكل احلامي خربت وتحطمت يعني باجر اني هيج وكت راجعه لنقطه الصفر ليش يالهي فرجك تعبت والله بعد مالي حيل اتحمل كل هالحمل عبدك الضعيف ميتحمل هيج مصايب صرفت ورقه من إلى ضامتهن واشتريت إلى وللجهال ملابس وقرطاسيه واحذيه جهزتهم تجهيز مدرسه واشوف فرحتهم ومكيفين بغراضهم ربي اكتبلهم السعاده وافتح طريقهم هذوله سندي وظهري وروحي وكل حساتي لتشوفني بيهم يوم محلو.
بقينه نفتر ونشتري لحد ماكالو كافي ماما فدوه تعبنه نريد نرجع وبدت المحلات تعزل رجعنه اخذت المفتاح وهم سالتهركلت بلكت الله احصل خيط امل وكان نفس الجواب ماكو شغل صعدنه للغرفه رتبت غراضي ولميت كلشي وسبحت اني والجهال اتصل علينه مندوب الشركه كال ساعه 2 بالليل تنزلون من الغرف لان طيارتنه ساعه سته الصبح يعني غلست علينه الشركه يوم كامل همزين اني كلشي مكمله.
اخذت الجهال ونزلت ركض للمطعم إلى يمنه اخذت سندويجات شاورما و قواطي ببسي وابطاله مي عالسريع ورحت للاسواق جبت اجباس ونساتل ورجعت للفندق صارت ال12 ونص حظر ت جنطه الاكل ورتبت الغرفه واتاكدت ماناسيه شي وضبطت ملابس الولد كتلهم اتمددو عالفراش وننزل وره الوحده.
بقيت كاعده افكر اشلون بيا ارجع لو لا زين اذا بقيت اشلون بيا بقيت حسبه تجيبني وحسبه توديني فزيت على صوت التلفون عرفت اهل الشركه على مود ننزل باوعت ساعه وحده وربع ماجاوبت كعدت الجهال وطلعت الجنط والجهال وميمي نعسان.
ومطفي وحمودي يفرفح من وراه اتاكدت ماكو شي ناسيته بالغرفه وطلعت اني وجهالي اسحل بيهم سحل نزلت لكيت كلها موجوده والسياره واكفه كعدت الجهال يم الجنط سلمت المفتاح واخذت الجوازات مالتنه وبديت اصعد الجنط بالسياره وصعدت اخر شي جهالي وصعدت وودعت تركيا وكل لحظه حلوه عشتها بيها تمنيت ابقى بس لازم ارجع.
وصلنه للمطار وحمودي سوده عليا اتخربط وحرت بي وحدي مدري لحمودي مدري للجنط وميمي بقيت اركض منا ومنا لزمت سره عالبوردر حتى اسلم الجنط وحمودي اشوفه سوده عليا كوه يمشي غسلتله وجهه وصعدته فوك الجنط هو وميمي وكمت ادفع بالعربانه وصلت اخر وحده الكروب كله سلم وكمل الموظف من شافني ويايه اطفال 2 وابني متخربط انطاني مكان قريب جان مقاعدنه رقم 3 والكروب كله اخر شي بالطياره وكل إلى يفوت يكولي اشلون حصلتي هذا المكان.
كتلهم رب العالمين سهلها إلى انتو كلكم عفتوني وحدي وشوفو رب العباد اشلون خلاكم بالنهايه واني بالبدايه حتى ام زهراء اجتي سلمت وتعوج بحلكها ها ام البخت اشلون حصلتي هذا المكان كتلها ربج مينسى عبده عافتني وفاتت كالت اني مقعدي رقمه 31 وانتي 3 بخت.
كتلها شافني ابني متخربط وانتو ولا واحد بيكم كال خيطه ابنها ديتقيا كلكم تشوفون وتفوتون محد زحم نفسه بكلمه محتاجه شي بس ربج موجود عافتني وفاتت ماعجبها الحجي اوي هو بقت بس هاي ماعكرت مزاجي انطلقت بينه الطياره ودعت كل ذكره حلوه بتركيا.
ورجعت بقهر وحزن والم انطلقت الطياره ساعه سته الصبح وصلنه لمطار النجف ساعه 8 ونص طبعا ميمي وحمودي نامو بالطياره واني هم نمت وياهم كعدتنه المضيفه وقت الاكل اكلنه ونمنه ورجعت كعدتنه من وصلنه لان جنه تعبانين حيل وماانطيت خبر لاهلي اني راجعه كملت اجراءات الدخوليه مال المطار ورحت انتظرت الجنط استلمتهن واخذت جهالي واتوجهت ويه الكروب للمنشأة حتى نرجع للحله وصلنه للحله قريب الظهر فتحت جهازي وره نزلت اني وجهالي نزلت الجنط ووكفت الجهال يم الجنط واجرت تكسي دااصعد الجنط بالسياره وصعدت جهالي بالتكسي جان اتصلت ماما.
الو
ها رفيف وينج شو من البارحه لليوم انتي ماكو اشوكت ترجعون للعراق احجي اشبيج
هو شنو احجي اشبيج انتي مو مخابرتني عالخط اني بالعراق وهسه دااصعد الجنط روحي اشويه واجي
اوكفي رفيف ولج وين انتي اني اجيج هسه
ماما وين تجين بطيارتج اني بباب الشركه وصعدنه بالتكسي دروحي لازم انتظرج بالشارع وتجيني بتكسي على شنو اني اجي بتكسي وخلص يلا باي وسديته منها
وصلنه للبيت.