رواية شهوات رجل ظالم للكاتبة زهراء أمجد الفصل السابع والعشرون

رواية شهوات رجل ظالم للكاتبة زهراء أمجد الفصل السابع والعشرون

لكيت ماما والحجيه وخالتي زهره واكفين بالباب تلكونه باسوو الجهال وبوسوني دخلت الغراض ودخلت بس لحد الان الامور زينه ادري حتكب بعدين عاصفه بس ميخالف. تهدء بعدين ولو هسه بعض المتابعات يكلن ليش مابقيتي هناك اشلون اعيش ومنين اصرف واني بركبتي اطفال 2 وعدهم مدارس وماطول ماعندي شغل اول وتالي حرجع فاارجع بكرامتي احسن ماارجع مذلوله وكلها تلوم وتتشمت بيا سلمت عليهم وكعدت ردت اروح اشوف صابرين وطبعا جبت لبتها مناك ثوب مال بنوتات ابيض ووردي كلش حلو بس خالتي زهره كالت اكعدي لتروحين كتلها شكوو كالت بعدين اسولفلج اكعدي هسه.

كمت بدلت اني وجهالي وصعدت الجنط ليفوك طلعت تراكات للجهال وحظرت هديه بت صابرين صاحوني عالغده نزلت تغديت اني واهلي سالتهم
شكو ماكو
ماكو شي سلامتج
لعد اشبيكم وجوهكم ادكول اكو شي
ام رفيف: اسمعي رفيف لتروحين لبيت صابرين ومعليج بعد بيها لا هي ولا علا افتهمتي
رفيف: يا ليش ماما شصاير ورايه شكو
ام رفيف: ماكو شي اتغدي وعود وره الغده نحجي.

رفيف: سكتت وبقيت اكل بس اريد اخلص بسرعه حتى افتهم شكو اشبيهن علا وصابرين اني حتى من جنت هناك خابرت علا بس مره وصدك جان وجهه ثكيل وحاجتني من وره خشمها وصابرين اصلا اشكد اتصلت عليها. ردت اباركلها وماردت عليا نشوف وره الغده افتهم السالفه ولو اني شيصبرني بس حصبر هالمره
كملنه غده وصبينه جاي وكاعدين دنشرب كتلهم متحجون شكو اشبيكم بعدني ماخلصت كلامي دخلت خالتي تغريد كمت سلمت عليها بوستني وبوست الجهال.

كعدت وحاضنه حمودي وميمي سالتها كتلها
خاله شكو احجيلي انتي ادري بيج متضمين عليا حجابه اشبيهن علا وصابرين
تغريد: اوووف ياخاله شحجيلج كله من وره هذا رجل خالتج البومه
رفيف: يابومه منهم ههههههه هومه شو كلهم شيل وذب
تغريد: ولج حقيره مو اني كاعده كدامج اشلون تحجين على رجلي
رفيف: لالا خاله عمو وحد حباب اني مااعتبره من ضمن القائمه وحتى رجل خالتي نهى هم حباب بس اوووف عدنه واحد بس دومه مخالف.

تغريد: عفيه هو هذا الواحد خبص الدنيا وراج
ام رفيف: تغريد اسكتي بلا هالحجي اسمعيني زين رفيف معليج بعد بعلا وصابرين وخلص هسه انتي ليش ادققين
رفيف: اي غير اعرف شنو السبب ياماما انطيني مجال افتهم السالفه يجوز اكو سوء تفاهم بشر عفته كلشي مابي رجعت لكيته مطنكر غير اكو سبب.

تغريد: اسمعيني فوفه بنيتي انتي شعليج بيهن يابتي الكلام يجرح ويوكع الكلب وهذا رجل خالتج مخبل وبومه والله ذبه علينه بلاء بس شنكدر نحجي لا خلقه ولااخلاق وانوب فوك ماقبلنه بي فكر وصار براس امج هسه اتكبر.

رفيف: هو منو ماصار براس ماما صايره مثل العراق خيرها للغريب وشعبها جوعان الخير للعالم واني بتها كلشي مامحصله ومن احجي اي هو اول وتالي الج واشلون مااشوف مراح احصل لا من الاول ولا من التالي لان من هسه اكلج عمري كصير واموت وهي ظاله.

ام رفيف: انجبي لج بعدج مااجيتي وعينك عينك ادورين ورث هاي لو اموت قبل الجنازه تبدين تصفين اووف اويلي عليا ربيت وتعبت تاليها اول ماكبرت كامت ادور فلوس هو اني منيلي حظ هي هاي الخلفه لو مامخلفه هواي احسنلي تالي كل هذا التعب والصرف بكل وكاحه تريد ورث
تغريد: يلا ام. رفيف هسه هي شكالت عمرج طويل غير هي تحجي هيج من حركه كلبها حقها هم اعذريها طفله وكلشي ماحصلت من الدنيا.

رفيف: لا خاله لا طفله ولا شي بس دااشوف حقي وحق جهالي من بابا يتنعم بي غيري واني اوله بي صعد هذا رجل صابرين براسي اجانه حافي صانع يشتغل يم اخوه وبعدين حتى اخوه طرده وانطته فلوس وباعتله بيت وقطعه
وتاليها كلشي ماانطاها رجع جسومي كمل السبحه واكل الباقي واني بتها ردت بيت إلى ولجهالي كام ادور ويايه ايجار.

بحجه شنو بنيه واشلون تكعد وحدها والعالم تحجي وشيكلون علينه العالم ليش ماكو بكدي وكاعدات وحدهن شمعنه بس رفيف ها احجي
تغريد: خاله حبيبه هسه انتي هستوج اجيتي شلج بهالحجي إلى يوجع الكلب ومامنه فايده كومي ارتاحي تمددي حتى من تكعدين تسولفينه عن تركيا عيني يالتركي يحلو.

رفيف: امممم شجابني عالتركي والحلو منيلي حلاه هو إلى يعيش هنا يصير بي حلاه يطيح حظه وحظ الساعه إلى عاش بيها بس والله مو صوج علا وصابرين صوجي اني إلى اذكرتهن وكلت عيب اطب وايدي فارغه مهما يكن هذني حسبت خواتي بس هو اني متعلمه عالبشر عفتها وكمت صعدت لغرفتي مقهوره حيل ليش هيج خالاتي اني شمسويتلهن بقيت ابجي لحد ماغفيت حسيت قريب المغرب حمودي يهز بيا.

اكعدي ماما خالتي ام علاء اجتي دتريد تشوفج وماما ادكول صار الغروب كعد امك
اي حبيبي كعدت هسه امشط وانزل
كمت مشطت شعري وسويته ضفيره وتعطرت ونزلت اشوف مرت خالي سلمت عليها بوستني واستقبالها جان كلش حلو بقينه نسولف على تركيا واشلون حلوه واكلهم وطبيعتهم اذن الاذان كمنه صلينه وماما بلست بالعشى وخالتي ام علاء راحت صحت خالتي تغريد اريد افتهم شكو بقت حسره بكلبي.

تغريد: وج خاله عوفي هالسالفه والنبي توجع كلبج وتفرفحين على شنو طز بيهم كلهم
رفيف: خاله اموت اذا مااعرف بروح ابوج احجيلي شكو بيناتنه والله مااكول لاحد
تغريد: ماشي رح احجي بس تواعديني ممنوع تضوجين وتعصبين وممنوع ادكولين اني كتلج شيخلصني من امج اذا درت بيا حجيت وبعد امج وانتي اعرف بيها
رفيف: مااحجي وعد بس فضيها رحمه لله احجي.

تغريد: شوفي خاله بيوم إلى رحتي هذا الاغبر اول التهه بمرته والمستشفى وثاني يوم ماانتبهه ثالث صابرين كالت عيد والكل ملتمه خلي نسوي غده للسلامه وامج كلتلها صابرين انتي رجلج يشتغل عالطخات بلا عالغده واستري على نفسج بس تدرين صابرين عنوديه وعزمت الكل وطبعا هي عمليه ونايمه ووكع الطبخ براس امج وخالتج علا واحنه ساعدناهن فوكت الاكل سال رجل صابرين عليج كال شو رفيف وجهالها ماكو ماشفتهم ابد امج كلتله رفيف مسافره صارللها 3 ايام كلها ها وين شو مندري محد حجه كلتله اني حجزتلها ودزيتها لتركيا لان نفسيتهل ونفسيه جهالها تعبانه حيل منا مشكلتها ومنا مصيبه ابويه فبعدتها عن المشاكل وخلي اشويه ترتاح.

فهو ماقبل وكام يحجي اشلون ادزين طفله وحدها هناك شيكلون علينه العالم كواويد ميصير يام رفيف بنيه وحدها تصادق تغلط وهي بتج منفصله يعني براحتها شتريد تسوي تسوي
رفيف: شنووو وهو شعليه يانعم رجل خالتي لانعل ابو يابو الجابه علينه انوب عليا احمد المجدي الاغبر ابن عمي ابن خالي ويحكمني وماما اشلون سكتت احجي.

تغريد: بس انطيني مجال خلي اكملج منو كلج امج سكتت امج رزلته وكلتله واذا انفصلت قابل هي اول وحده اخر وحده ياما الله كتب على بنات الحلال اشكال ومندري الله على ساعه شيسوي بينه وبتي ترباتي واني اعرف بيها متسوي شي غلط وثاني شي هي ماطالعه وحدها وياها ولدها وانت لاعمها ولا خالها حتى تدخل بحياة بتي احنه مدخلين بحياة بناتك لو لان شفتها ماعدها ابوه يردكم.

بس اني موجوده ومااقبل اي تجاوز على رفيف وعافت بيت صابرين وطلعت وصابرين بقت تتوسل بامج وامج كالت بعد لااطب ولاالي دخل بيج ماطول رجلج طلعنه كواويد وامج عافتهم وطلعت زعلانه وانكلب الاكل علينه سم واحمد كال لصابرين بعد ممنوع تحجين ويه رفيف وامها وصابرين كامت تبجي.

رفيف: تغريد تحجي واني صافنه مقهوره على الوكت إلى خله هالسلاب هذا يتجاوز عليا وماعندي رجال يرده وفرحانه لموقف ماما إلى وكفت احمد عد حده بس بعديش من صرت مدوسه للراح والجاي نعلت الشيطان واستغفرت ربي
تغريد: خاله لتهتمين اهم شي طلعتي واتونستي معليج بي هذا خبل.

رفيف: خاله اني مامقهوره على شي بس كلها تدري بيا اني مسافره واني مو صغيرع وماغلطانه بشي لا تواعدت ولاصادقت ومشيت بغير درب حتى واني واكعه بمصيبه يحجون عليا لو عندي اب او اخ جبير يكدر هذا او غيره يدخل اشو هو ببنات اخوانه وخواته ميدخل ليش يدخل بحياتي وهو منو همزين ماما إلى سويته ادامي
تغريد: كافي تحركين بروحج كومي شوفيني الصور يلا بلا نكد.

طلعت الفون مالتي وكعدت اشوفها الصور واشرحلها الاماكن ووين اخذتهن والجو اشلونه والطبيعه اشلونها كعدت ماما وزهره هم شوفتهن الصور
ومرت الايام ورجعت لدوامي وماما ذبت فلوس السفره الباقيه كلهن براسي كالت ماادفعهن اني والمشكله اني راتبي من نفس الشركه فهومه يقطعون من راتبي وهمزين عندي نفقه اكدر ارتب بيها وضعي
اما جاسم فطلع من السجن وره العيد ماما راحت
سددت فلوس للولد وتنازل عن القضيه وطلع من.

السجن وخطب وبعد فتره فسخ الخطوبه وماما كل املها ارجع لجاسم وجانت ادزلي شكو واحد اعرفه حتى يقنعوني بس اني بقيت مصره على قراري ومرت الايام ومشت وكملت تسديد الشركه بعد معاناه وطلعان الروح واشكد توسلت بماما تساعدني بس ماقبلت وخلصت سنه 2015 ودخلنه بسنه 2016 وحمودي صار بصف رابع وميمي صار صف ثاني حبيبي بس شالع كلبي بالدراسه واستمرت حياتي بين دوامي ودوام جهالي ودراستهم تقريبا اموري بالبيت استقرت بس عيوني تعبت حيل لان شغلي جان كله عالحاسبه.

بحيث صار عندي خمول بعيني اليمنه حتى بالنظارات بعد مااشوف رحت اكثر من دكتور كالو الا عمليه قررت ماما تاخذني لايران لان خافت من العمليه هنا بالعراق وصارت عطله نهايه السنه
واخذتني ماما اني والجهال لمشهد ورحت فحصت وكان نفس الجواب لازم عمليه لان اليمنه جانت كلش تعبانه واعتمادي كله عاليسره وحجزت واني جنت كلش خايفه لان ناس ادكول ماكو شي والعمليه سهله.

وناس ادكول احتمال تفشل وتصيرين عميه والنفسيه تعبت حيل ودخلت للعمليه واني ميته خوف صحهي بنج موضيعي مو عام لان لازم ابقى انتبهه للدكتور يكولي شوفي الضوه الاحمر وانتبهي على الضوه الاخضر اتاخرت العمليه لكل عين 20 دقيقه مرت عليا عشرين سنه لان بالي بقى يم الجهال.

عفناهم خطيه بالفندق عفتهم نايمين وعفت يمهم اكل بالغرفه واني مفهمه حمودي من الليل يدير باله على اخوه جنت بس اريد اخلص حتى ارجع لجهالي كملت العمليه والحمد لله انطوني علاج بحيث الوجع كان مو كلش قوي بقيت.

ساعه بالمستشفى ورجعت للفندق عيوني مسدوده بقيت لليل وخرت ماما الضماد وطبعا قطرات كل اربع ساعات وقبل ليصير موعد القطره تبدي الالام والاوجاع احس ملح وتيزاب بعيوني بس يوم عن يوم الوجع بده يقل راجت الدكتور وره اربع ايام كال العمليه نظيفه بس ممنوع تشوفين اي ضوه لازم تبقين بالظلمه وممنوع تسبحين او تغسلين وجهج الا بعد اسبوع جانت ماما تنظف وجهي بالكلينكس الرطب.

خلال هالفتره ماما جانت كلش زينه ويايه واداريني ومتقبل الجهال يحجون او يصيحون رغم جان رمضان وخطيه هي صايمه وقايمه بواجبي اني وجهالي واشوفها تركض منا ومنا بس إلى لفت نظري تطلع تخابر بره الغرفه ومن احاجيها ادكىلي ها مو انتي نايمه وماكو شي ولتخافين لان الدكتور جان محذرها ممنوع اعصب او انقهر او اضوج بس اني جنت حاسه اكو شي لحد مافد يوم اني بقيت بالغرفه وهي نست الجهاز عالشحن وطلعت للحرم هي والجهال اتصلت خالتي زهره دتسال علينه وتسلم سالتها شكو ماكو كالت الحمد لله خالتج طلعت من المستشفى وماكو شي.

رفيف: شنو ياخاله؟ منو بالمستشفى احجي خاله
زهره: ها لا ماكو شي بس تغريد اشويه مريضه امج ماكلتلج؟
رفيف: احجي خاله اشبيها خالتي تغريد بروح ابوج احجي
زهره: هسه اني شحجاني لتخافين رفيف بس خالتج تغريد بيها خبيث بصدرها وسوولها عمليه بيوم عمليتج وامج كالت مااكدر احجي شي كدام رفيف اخاف تفشل عمليتها وخاف تبجي.

رفيف: اني بقيت متبنجه لاانطي ولااخذ اوووف ياربي شنو هالمصايب إلى وكعت على روسنه اخذت نفس عميق وحاولت قدر الامكان ماابجي لان عمليتي تخرب بقيت الوج شحجي وشكول سلمت على زهره وسديت الخط شسوي ياربي وشحجي لااكدر ابجي اخاف على عيوني ولااكدر اخابر مااشوف اني فتحت خط كوه تلمست الجهاز وفتحت خط اجتي ماما والجهال بهاي اللحظه طبت ماما اسمع صوتها مبحوح مبينه باجيه طبيت سلمت
رفيف: اكلج ماما ليش جنتي تبجين.

ام رفيف: لا ماما مابجيت ليش ابجي قابل عمليتج وناجحه وكلها كم يوم ونرجع بس دوخوني جهالج هذا ميمي ولا ينجرع شلعو كلبي هو واخوه
رفيف: ماما خالتي تغريد اشبيها
ام رفيف: ها! تغريد مابيها شي ليش
رفيف: احجي ماما ليش ماكتيلي خالتي بيها خبيث ليش اني اخر من يعلم اني مو بتكم ليش هيج تسوين.

ام رفيف: وج والله اخاف على عيونج وج ماما اذا فرفحتي عيونج بعد تعمى فكري بجهالج شنو ذنبهم فكري بشبابج بعدج بعز شبابج تعمين ليش يابتي فهميني ليش واذا عرفتي قابل شراح تسويلها مدكوليلي اكو غير بس تبقين تبجين يلا ماما يلا عيني خلي اخليلج قطرع ونامي وارتاحي وخالتج تحسنت وطلعت من المستشفى وماكوشي بعد.

رفيف: شفت كلام ماما صح منو يفيدني اني غير صحتي صح هاي خالتي واحبها وربتني بس شكدر اسويلها اني غير ادعيلها الله يكومها من هالشده هم خطيه ماحصلت من الدنيا غير المصايب خلتلي ماما قطرات لعيوني ودهن وكامت لفراشها اجاني حمودي تمدد بصفي بس احس بي حذر يخاف يتقرب خاف يلجم عيوني بقى يبوس بايديا ويلعب بشعري اني هم كمت ابوس بايديناته واشم بيهن
حمودي: ماما اني اموت عليج لتعوفنه حبابه.

رفيف: ياروح امك واني هم اموت عليك انت واخوك وين اعوفكم ماما اني مااعوفكم غير من اموت شعندي غيركم
حمودي: ماما اكلح شي ومتحجين لاحد ولدكولين حمودي كلي تره ماما الجبيره تبسطني
رفيف: كول حبيبي شكو وعد صدكني مااكول
حمودي: ماما بابا اتزوج بس عفيه لتحجين كدام احد والله يبسطوني
رفيف: تقربت عليه وحظنته وبوسته كتله ياروحي وعد محد يدري بس انت شمدريك.

حمودي: من رحنه اني وميمي هذيج المره لكينه بنيه عدهم وتمشي كدام بابا بدون حجاب ومن سالت منو هاي كلي هاي عمتك اختي هبه بعد متروح لبيت جدي جبناها هنا يم امي حتى اداريها واني اعرف عمتي هبه وهاي مو عمتي وليش كدام عمو تلبس ربطه وكدام بابا متلبس وحتى تنام ويه بابا بنفس الغرفه واحنه من دنرجع كلتله جاسم وديني لاهلي وبالليل مر عليا واخذناها وصلناها ونزل بابا سلم على رجال جبير لكاه بباب بيتهم وصعد للسياره وجابنه ومن سالته كال رايحه يم صديقتها زين عمتي هبه هي مو عايشه يم بيت جدها بالنجف منين عدها صديقه هنا وليش كالت بيت اهلي مو بيت صديقتي.

رفيف: حمودي يحجي واني صافنه عليه اشلون كاعد يفكر ويحلل يمه وليدي كبر وصار رجال وكام يعرف ويفتهم اروخ فدوه لطوله كتله حبيبي هاي مره بابا ابوك اتزوج بس احنه معلينه ماشي ماما انت لتفكر بشي وتضوج ماطول اني يمكم ماشي ياروح امك
حمودي: ماشي فوفه حبي اني حجيت لماما الجبيره وهم كالت هاي مرته ولتحجي كدام امك رفيف تروح تنقهر بس اني ماكدرت اسكت اخاف تعوفينه حبابه ابقي يمنه.

رفيف: والله مااعوفكم ولك اني شعندي غيركم ضحيت بكلشي حتى بس تبقون يمي انتو النفس إلى يصعد وينزل انتو روحي يلا عمري خلي ننام ولتفكر اعوفك ماشي يبعد طولي تصبح على خير حبيبي
حمودي: اي ماما ماشي وانتي من اهل الخير وبوستها من ايديها اخاف ابوس وجهه.

تغطيت اني وحماده ونمنه وميمي جان ينام يم ماما لان نومه كلش عبث واخاف تجيني كفخه واني نايمه على عيني ههههههه فينام يم ماما وحماده يمي من عرفت بجاسم اتزوج فرحت حيل حسيت هم وانزاح من كلبي بعد محد يكول خلي ترجع ولخاطر جهاله بعد هو ارتبط وشاف حياته خلي يلتهي بلكت الله وحتى ماما تكطع الامل مالت ارجع لجاسم حمدت ربي وشكرته ونمت واني مرتاحه خلصت من جاسم بعد مستحيل احد يفتح موضوعه.