رواية شهوات رجل ظالم للكاتبة زهراء أمجد الفصل السابع
َصابرين: كاعده اباوع واتقس الوضع منا ومنا ولكفت ام جاسم ماادري شنو شايله بأيدها علامه وتوجهة لرفيف ماعرف شاانطت لرفيف رحتلها وحسبالي انطتها هديه كلت عرسها وجبت تفرحهم بهديه تالي متالي طلعت الداخليات مال جاسم كبر لفج اي والله جايبتهن وتنوكلين بيهن تاليها داخليات اخذتهن من رفيف ورحت خليتهن بالغرفه وطلعت
.
رفيف: خلصت الحفله وبدت العالم تروح واني راسي صار طبل منا مداانام زين لان مكاني متغير ومنا خطار وعالم تجي وتروح ومنا بعد يومين لامتحاني وهذا وحده هم كلش جبير راحو الغربه كلهم جان تصيحني صابرين للغرفه
كمت حتى اشوفها اشبيها وابدل
صابرين: رفيف الله عليج حموت من الفضول واعرف الملابس شنو فتحيهن حبابه
رفيف: ههههههه وليش مافتحتيهن انتي على شنو هيج دتلوجين لو فاتحتهن من البدايه وخلصانه.
صابرين: هسه تفتح الكنز وتفضها ولج ديله فضيها هاج افتحي الجريده...
رفيف: كعدت عالفراش وفتحت الجريده إلى مسويتها مبرومه جنها اسطوانه وياريتني مافاتحتها لكيت ملابس داخليه قديمه كلش بحيث الوانها رايحه ومزرفه من كثر الاستعمال باوعتهن اووووع
الله يسامحج عمه شنو هالمزابل وهاي صابرين ماتت ضحك وتريد تشوفهن لخالاتي وتضحك كتلها دكعدي يمعوده شتشوفيهن مزابل شلتهن من الفراش للسله.
وبدلت دراعه اوف وايت وطلعت لان خالاتي كلهن موجودات والبيت كله بشر وهو صغير فيختنك بسرعه
تعشينه كلنه والكعده جانت كلش حلوه وبقو كلهم سهرو يمنه وبعدين بدو يرحون ناس وره ناس
دخلت للحمام سبحت وطلعت لبست ملابس نوم...
وهم كالعاده جاسم من يريد يتقربلي اي رومانسيه ماكو تعلمت عليه ياخذ إلى يريده ويكوم راح سبح واني سبحت وراه وثاني يوم قررت افرغ نفسي للدراسه...
لان بعد مالحك بس المشكله الخطار دمروني خبلوني افواج افواج ناس تروح وناس تجي وقبل الامتحان بيوم اجتي عمتي ام جاسم
ام جاسم: هاي شنو رفيف شنو لابسه ملابس عاديه ومكياج خفيف وضايجه مو انتي بعدج عروس وشعدها امج يمج الله يساعد ابني اذا بعدج عروس وهيجي.
رفيف: خاله باجر عندي امتحان وخطار طابين وطالعين وليش اشبيهن ملابسي لابسه بنطرون كابوي ثلجي وبدي ابيض ربع ردن وبي ورده من الصدر ورافه شعري ذيل حصان ومخليه ايلاينر وحمره وردي طبعا كمت اقدملها شي ضيافه واشوفها تباوع وتعوج بحلكها ماعاجبها الوضع
ام جاسم: اكلج ام رفيف بتج شو لسه ماكو طفل وماحبلت خاف بتج عاكر خلي باجر ناخذها للدكتوره اني اريد اطفال لابني مو يبقى هيج مكابلها وكاعد.
ام رفيف: هههههه ام جاسم كولي يالله تره ماصارللهم اسبوع من اتزوجو قابل صارللها سنه حتى ادكولين هيج انتظري سنه سته شهور ادري وين اكو عروس تحبل بالسبعه مالتها
رفيف: اني بالمطبخ واسمع كلامهن وكلبي يفور ابدي اروح واشمر العصير بوجهه وافشخها بالثلج بالله هاي من كل وعقلها هيج تحجي شلت الصينيه واخذت نفس قوي ودخلت عليها للهول بكل قوتي.
كتلها اكلج عمه شنو انتي حبلتي بيوم السبعه مالتج لو عدكم العروس تحبل ثاني يوم هسه حتى لو نفرض حامل لازم انتظر 20 يوم واروح احلل وين اكو اسبوع ويطلع حمل هاي شلج بيها وشنو شفتي اهلي ماعدهم اطفال لو سمعتي عن اهل ابويه او اهل امي واحد بيهم عاكر اصلا احنه عشيره كلها تحبل بسرعه وثاني شي هذا رزق من الله اشوكت ميجي هلا بي اتفضلي الضيافه.
ام رفيف: اباوع رفيف اشلون تحجي والله وكبرتي وصرتي مره وكمتي تحجي صدك ضحكتني
ام جاسم: ردت اشويه احرك كلبها اكلتني وشربتني عزه عزه اشكد وكحه الله يطيح حظك يجاسم على هالمره
كعدت اشويه ونفضت عباتي وكمت حتى ماكالت ابقي بعد وكت شو هاي جنها كيفت.
رفيف: راحت عمتي ومر اليوم طبيعي واجه يوم امتحاني واني خايفه حيل كعدت الصبح اني وجاسم اتريكنه عالسريع وبدلت وهو هم بدل وطلعنه للجامعه والطريق كله هو يهدء بيا بس اني ارجف
وصلنه ودخلت للامتحان وجانت الاسئله كلش صعبه وكوه كدرت اجاوب طلعت ضايجه حيل وراح جاسم لرئيسه القسم حتى بلكت تساعدني بس كالت الشغله يم الاستاذ ورحنه عليه وابد ماانطاني اي امل.
ومشت ايامي عادي نفس الروتين تنظيف وطبخ وخطار بديت اتعود على البيت رغم ماجنت اكعد بالليل ابجي اريد اهلي اشتاقلهم حيل واشتاق للبيت احس بروحي بغير محافظه ولا كأنهه احنه بنفس الفرع وقرب موعد النتيجه وصار الغير متوقع جنت نايمه بالبيت وحدي وجاسم بالدوام مااشوف الا ماما اجتني للغرفه وتصيح وعصبيه.
ام رفيف: خابرني جاسم وكلي رفيف رسبت اني هنا شطت وصرت اعصاب واخذت مفاتيح بيتها ورحت عالسريع وصلت فتخت الباب لكيت الاضويه مطفيه والموبايل مالتها مشمور بالمطبخ ورفيف نايمه متدري الدنيا وين طشت لو وين رشت طبيت للغرفه بسرعه واني اصيح اكعدي ولج صخام الصخمج يثوله اشوفها كعدت كوه فتحت عينها
ها ماما صباح الخير شعجب جايه من الصبح.
دكولي صباح الاكشر صباح الفكر ولج انتي نايمه ومتدرين الدنيا وين وصلت ولج النوم لو يفيد جان فاد اهل الكبور
رفيف: كعدت وماما معصبه وتعد وترزل كلبي انخمط اريد افهم شكو شكو ماما اشبيج دحجي مو يبست بمكاني منو مات شنو الموضوع.
ام رفيف: صارت زحمه هواي تعبتي روحج ولج جاسم خابر وماخذ نتيجتج راسبه ولج تقين قيدج يمعزايه ولج راح تعب عمري راحت الفلوس إلى ذبيتهن عليج شكول وشحجي ولج يشماتت العالم بيا اني بتي ترسب ولج مو وصلت للكليه ودفعت عليج دم كلبي شجاج بالج وين بس حقج حايره بالمكسرات والملابس اني صوجي إلى انطيتج اكبر من حجمج.
رفيف: هي تعد واني بعدني بحلاة النومه بس انقهرت حيل حلم جديد من احلامي اتحطم اوووف يادنيا شضامتلي من قهر بعد ليش كلما اريد افرح بشي تجيني صدمه ترجعني الف خطوه ليوره ليش ياربي كمت ابجي وكمت من الفراش ماما طبعت بعد مازفتلي الخبر راحت لبيتها شكو بعد كعدت وبخبر زفت قلب حياتي راس على عقب كعدت ابجي.
واعاتب ربي ليش ياالهي اني شمسويه وهيج محد نصف حالي اوووف ياربي شااشوف بعد بهالدنيا هاي انحرمت من كلشي وحتى حلمي البسيط إلى هو شهاده اضمن بيها ولو جزء قليل من الحياه هم اناخذ مني رحت للمطبخ اتصلت بجاسم اريد اشوفه هذا ليش خابر ماما وماخابرتي...
جاسم: من سمعت الخبر ردت اتصل على رفيف كلت هاي نايمه خلي اخابر لامها وهي ادكوللها خابرتها وعفتهم عطاب واني شنو عسى نارهم تاكل حطبهم بقيت كاعد بالكهوه اشرب جاي اتصلت عليا رفيف.
رفيف: اتصلت عليه واني ابجي ومنهاره ليش هيج سويت بيا ليش ماعرفت تنتظر من ترجع الظهر وليش خابرت لاهلي وادكولهم اتصل ومترد انت متخاف من الله منين اتلكاها منك من الدنيا من الوكت شجاكم كلكم عليا الله اكبر على رووسكم ولكم مابيكن واحد شريف مابيكم واحد يخاف الله مدكول هاي نايمه ومريضه وتدري بيا صارلي كم يوم نحول وتعبانه وحتى اكل مدااكل دكول من ارجع ووره الغده اكعد واحاجيها بهدوء بس شحجي وشكول غير حسبي الله ونعم الوكيل روح جاسم ومشكور هالهبطه إلى هبطتني بيها من مصباح الله روح وسديته بوجهه.
: فتحت عليها خط وريتني مافتحت شو هاي انهدت بيا بس صدك قهرتني المفروض اني مااسوي هيج ياربي اني احبها واريدها بس ليش دااذيها مدااعرف ساعات احب انتقم منها وساعات اشوفها ملاك وطفله تكسر كلبي من تتصرف بعفويه بس لازم اسيطر على تصرفاتي واحقق هدفي إلى هو احصل منها فلوس واعيش بخير امها وطز بيها كملت جايي ورحت للدرام اشوف شكو ماكو وخلصت دوام ورجعت للبيت طبيت لكيت رفيف منظفه ومسويه غده وكاعده تبجي بالهول وحدها تقربت عليها سلمت ماحجت ولا كلمه كامت للمطبخ صبت غده وخلته عالميز وسوت السلاطه وطلعت الطرشي وعافته وراحت للغرفه بدلت وغسلت ورحت للمطبخ لكيت مغطيه التمن بخبزه ومسويه تبسي واووف ياتبسي.
رفيف حامض يخبل ومحضره كلشي حتى المي صحتها ماحجت ولا اجتي رحت دااصيحها لكيتها تمدده بفراشها واسمع بس الونه مال البجي مالتها تقربت عليها رفيف كافي بجي تره البجي مابي نتيجه انعلي الشيطان وكومي اكلي لكمه انتي مريضه ومالج خلك ليروح يصير بيج شي ياعيني كلشي واله حل وربج ميضيع تعبج ورحمته موجوده.
رفيف: يحجي واني مالي خلك حتى ارد جاوبته روح اكل ومعليك ولتصير براسي حوزه تره ماطايقه هسه نفسي ولتسوي روحك انت بحالي روح جاسم لااكفر بالدنيا كلها واحرك. روحي واخلص من هالحياه واخلصك انت هم مني منين تلكاها فهمني.
من امك إلى كل يوم مخابرتني ماحبلتي عاكر واني بعدني شهر من متزوجه لو اتلكاها منك إلى مصبحلي بخبر تتمنى لعدوك لو منين فهمني شستفاديت من سويت هيجي احجي ليش تسوي روحك تحبني وانت تكرص بيا ليش حسبي الله ونعم الوكيل ولكم يتيمه ارحموني انهاريت وكمت ابجي بصوت لحد مادخت وفقدت حسيت جاسم فوك راسي ويشممني عطر ومخلي راسي بحضنه صحيت تعبانه وكوه اتنفس.
جاسم اني ادمرت ليش هيج ديصير بيا والله مارايده من الدنيا شي غير اعيش مثل خلك الله
تعبت والله كل يوم مصيبه على راسي ليش اني هيج انحرمت من كلشي ومابقى عندي شي بالدنيا كلها بقبت بس انت حباب لتغدرني وخايفه منك وعليك خايفه الزمن ياخذك مني وخايفه منك لتروح تغدر بيا حباب ارحمني بس انت ولو كرهت حتى نفسي كرهت كلشي تعبت والله تعبت.
جاسم: تحجي واني اباوع عليه خطيه تكسر الخاطر تحجي وترجف كومتها وقنعتها تغسل وجهه وتجي تاكل لكمه بلكت ترتاح كامت غسلت ورجعت كعدت كدامي عالميز اكلت لكمه وحده وكامت تلوج سالتها
اشبيج رفيف شو مو على بعضج وضعج ماعاجبني وصحتج تعبانه فهميني ياعيني اشبيج ولج شو جنج حامل.
رفيف: حاجيني انتبهت على روحي اني ناسيه الشهريه مالتي حسبت لكيتها فايتني اسبوع واني ولا منتبهه ها ماادري عود فد كم يوم اروح احلل ولو مااعتقد يدخل الفرح بحياتي يوم...
جاسم: دكولي يالله كملي اكلج وكلشي ينحل واذا عالكليه هسه يجي قرار برجعون المرقنه قيودهم مثل كل سنه احاجيها وهي اصلا مو يمي صافنه ماادري اشبيها.
مشيت الايام ورفيف حالتها تعبت اكثر وانوب اجه رمضان حتى صيام ماكدرت تصوم اشوفها ادكوم منا تنام هنا اروح للدوام اعوفها نايمه ارجع الكاها نايمه قلقني وضعها حيل ليروح يصير بيها شي وتوكع براسي خابرت لامها حجيتلها على وضعها كالت اخذها للتحليل بلكت حامل.
احاجيها متقبل تروح بقيت إلى عليها اخير شي اقتنعت اخذتها ورحنه للمختبر العصريه قبل الاذان ودخلنه للمختبر ومنتظرين النتيجه واشوفها تلوج وترجف لزمت ايديها اريدها بس اشويه تهدء وهي ترجف وصايره اعصاب صاحو اسمها كمزت قبلي كتلها وين اني رايحه انتي ابقي هنا كلها زلم ورحت جبت النتيجه إلى ابد ماجنت متوقعها من كلي المحلل بقيت مصدوم وصافن واخيرا طلعت حامل.
صدك ومستحيل بعد تكدر تعوفني لو تحجي اني متاكد لخاطر الطفل شسوي بيها حتبقى ساكته
رفيف: اجاني جاسم يضحك وفرحان مكيف كتله ها
بشر كلي شطلع
مبروك حبي حامل
اشكد ماجنت ضايجه واحس الدنيا ظلمتني هواي بس هالطفل زرع عندي امل بالحياة هالطفل حيكون انتقاله إلى بكل حياتي كتله جاسم صدك تحجي لو تشاقه كلي والله ماحسيت غير اني حاضنته وابجي والعالم ناس تضحك علينه وناس تباوع هو همس باذني
عيب ولج فضحتينه احنه بالمختبر.
انتبهت على روحي ابتعدت عنه وضحكت ورجعنه الطريق كله ايد بايد ونمشي ونضحك ونسولف شعور كلش حلو صح هو مو من الشخص إلى حبيته بس يكفي هو من دمي من روحي احلى شي من تحس انت حامل روح بداخلك وتتمنى تعرف شكله جنسه تتمنى تشوفه يمشي ويحجي ويصيح ماما اوووف اتلمس بطني واكله ياروح امك وسندها ربي لتخيب املي وانطيني ولد يشبهه بابا الله يرحمه بكلشي بس مو بحظه وعمره.
واخيرا حيكون حفيد لبابا ويشيل اسمه صح هو مو ابن ابنه بس اني متاكده حيكون يشبهه وكلها ادكول هذا الطفل شيصير من مهدي رجعنه كبل لبيت اهلي وجان وكت اذان والعالم كلها دترجع للبيوت لان وكت فطور وماما اتصل بيها جاسم واحنه بالطريق وكليلها اني حامل واسمع خالتي زهره تهلهل واول مادخلنه لبيت اهلي خالتي زهره كامت تهلهل وتبارك هي وماما وبيبي شعور جان كلش حلو رغم القهر والحزن إلى بداخلي بس هالطفل اجه بوكته شالني من جهنم ودخلني الجنه فديتك ياروح امك انت فطرنه وكملنه وطبعا اني كالعاده تلعب نفسي من كلشي وكوه اكلت لكمتين ماما كالت باجر اخذج للدكتوره ميصير تبقين هيجي.
جاسم خابر امه وبشرها بس ماباركتلي باركت بس لابنها عادي شسويلها طز بيها اهم شي اني فرحانه بابني واهلي باركولي وانتصرت عليها إلى ادكول عليا عاكر واني ماصارلي اسبوع متزوجه وطبعا خالتي زهره ماقصرت وره الفطور خابرت كل خالاتي وانتشر الخبر وبده الكل يبارك ويدعولي اكوم بالسلامه.
بس تبقى غصات بالكلب إلى هو بابا ماموجود وتمنيت ابشره اول واحد ودوامي إلى ماادري وين حيصفى بي الوكت ومشت الايام وكل اسبوع جاسم يخابرلي القسم على مود دوامي اني هاي الفتره جنت اتوحم وتعبانه حيل لان تنساتي كلش صعبع حتى المي تلعب نفسي منه وحتى بيتي اكلهم بي ريحه مطيبه وكل كم يوم ياخذوني للمستشفى يخلولي مغذي وارجع وبيوم من الايام جنت نايمه اسمع صوت الفون مالتي يدك شلت الفون باوعت جاسم.
رفيف: الو هلو جاسم خو ماكو شي
جاسم: هلو حب لا ماكو شي بس عندي الج خبر يفرحج
رفيف: مستحيل اني دوم الاخبار الغبره بس توصلني واذا فرحت بشي فبعدها انصدم بمصيبه شكبرها تشيل الفرح من الاساس المهم احجي شنو الخبر شوقتني
جاسم: خابرت للكليه مالتج قاطعته
رفيف: اي احجي بسرعه وشكالو شنو الاخبار
جاسم: انطيني صبر ولج اشبيج عجوله
رفيف: اهووو هسه غير يطلعها للدره مو شكيت كلبي شك دحجي يجاسم والله ضجت وحتى الفرحه ماتت.
جاسم: هههههه يالله رح احجي اجه قرار الترقين والج حق ترجعين بس تبقين ثالث متصعدين رابع ويه جماعتج بس معليج بمواد الثالث إلى مطلعه بيهن جيد تدرسين فقط إلى عندج بيهن مقبول والباقي مستوفيه يعني يجوز تروحين بالاسبوع يوم او يومين. وانتي ماعندج غير بس ماده وحده مقبول فيا حبي باجر عندج دوام.
رفيف: يحجي واني دكات كلبي عبرت الميه و فرحانه لان حرجع للدوام ومقهوره لان نجحت ومااكدر اعبر ويه جماعتي بس يلا الحمد لله والشكر اهم شي حرجع.
ورجعت ودوامت والحمد لله جانت اموري ماشيه وخلص الكورس الاول والحمد لله ماعندي بي اي مشكله لان هي بس ماده وبدينه بالكورس الثاني طبعا بطني بدت تكبر وجاسم حلم حلم انو اكو بغرفتنه قرايين 2 مغلفات بغلاف واحد ونفس الشكل واكو جواهن هم اثنين بس غير شكل وغير غلاف وعندي خالتي علا تفتهم بتفسير الاحلام فكالت.
حتجيبين ولد وبعدها هم حيجيج ولدثاني بس تكمله الحلم الله اعلم مااكدر افسره هي تعرف تفسيره بس ماحجتلي شنو التفسير وبعدين حتعرفون السبب...
كبرت بطني ودخلت بشهر الخامس حخلصه وادخل بالسادس قررت اروح اخذ سونار واني مااريد اروح لان اخاف وام جاسم دومها جانت ادكولي انتي مثل امج هسه تخلفين بس بنات.
ومرات اصدها واكلها اهم شي تمام الخلقه واني ماعندي خوات هلا بالبنيه تصير بتي واختي ومرات لا اغلس واسوي روحي مااسمعها وصلنه جاسم اني وماما للسونار وكال من تخلصون ارجعو بتكسي.
ماعندي وقت انتظر واضوج دخلت للسونار وبقيت انتظر الدور مالتي حتى ادخل واني ماخليت امام مانخيته صح هو اهم شي الطفل كامل وصحته زينه والله يكومني اني وياه بالسلامه بس مااريد عمتي تبقى تحجي وتنك فوك راسي رغم ماجاسم جان ميقبل على كلام امه ويصدها بس هي تحب تنكد عليا.
دخلت للسونار وماما بقت بره بالانتظار لان ممنوع واني صعدت عالسديه والف تفكير ببالي وكون ربي يسهلها عليا الاهي مروتك ياربي فحصتني الدكتوره بالسونار كتلها بصوت متردد دكتوره شنو جنس الطفل
انتي هذا اول طفل
اي
مبروك ماما الطفل بصحه جيده ونبضه جيد ووضعه تمام وجنسه ولد
هنا احس ملكت الكون كله يعني حيجي الحفيد إلى يشبهه جده الف حمد وشكر الك ياربي كتلها دشوفي زين فدوه دكتوره
والله اشبيج هذا ولد ومبين وااضح.
كمت من السديه كلي نشاط وامل وفرحانه حيل بعكس مااول مادخلت جنت خايفه وكوه اسحل بروحي سحل كتبتلي التقرير اخذته منها وطلعت تلكتني ماما بشرتها
وهي طارت من الفرح نزلنه من السونار اشترت ماما جكليت وحلال المشاكل حتى توزعه بهاي المناسبه اني خابرت على جاسم وبشرته ورحت للدكتوره مالتي انطتني مقويات وفيتامينات ورجعنه لبيت اهلي.
وجانن خالاتي موجودات والكل فرحان الحمد لله بدت الحياه تتحسن ويايه والنحس إلى بحظي بده يقل لحد مايوم جنت بالجامعه دزت عليا رئيسه القسم بلغتني بخبر كرهت بي حياتي...
انو اجه قرار اسمه مقاصه ولازم اتسوى ويه جماعتي إلى هسه صعدو للثالث بكل المواد إلى اخذوها وطلع عندي بعد فوك التحميل مواد 2 لازم ادرسهن صفنت بوجهه يربي ليش دوم المصايب فوك راسي...
استغفرت ربي وطلعت رجعت لشعبتي وكدرت ادبر محاضرات للمواد إلى مطلوبه مني وصلنه لنهايه السنه الدراسيه وطبعا دخلت بشهري وجنت اتمنى تصير ولادتي قبل الامتحانات بس الطفل لزك واكل الشهر كله مع العلم بديت امشي من شهر الثامن واشتغل مضاعف حتى تسهل ولادي وبدت.
الامتحانات واني بطني واصله لخشمي والحمد لله درجاتي مال السعيات جانت عاليه فماجنت اهتم للموضوع وضامنه نجاحي بس كالعاده صار الغير متوقع وبنص الامتحانات وكاعده العصر دااقره اجاني الم موطبيعي خابرت لماما كتلها ماما فدوه حموت وجع ببطني مدااتحمل
ام رفيف: ياصلوات على محمد عندج ولاده هسه جايه وخابري لجاسم بسرعه...
رفيف: خابرت جاسم واني ابجي من الالم فدوه جاسم الحكني حموت من الوجع تعالي بسرعه.؟
جاسم: جنت بالعمل وخابرتني رفيف تبجي وتصيح اريد افتهم شكو ماادري واني مسدود الطريق لان جان ضاربين موكب المحافظ والدنيا مثبوره اخذت تكسي عالسريع بالفروع وصلت لكيت اهلها يمها...
اخذناها وطلعنه لبيت الممرضه طبت واني بقيت بره ادعي الله يكومها بالسلامه وره اشويه طلعت.
رفيف: دخلت للممرضه كالت بعد اطولين مو اليوم باجر الصبح ياله كتلها زين بقيني يمج خاف اتوازه بالليل ماقبلت رجعنه ويه اذان المغرب وبقيت الوج والوضع جان كلش تعبان من وره اغتيال الرتل مال المحافظ
بقيت اني يم اهلي وجاسم كال اني حروح ابات بالبيت واذا صار شي خابريني عافني وراح بكل برود واني دااموت من الوجع.
صارت ساعه بالوحده ونص بالليل واني الوجع صار مضاعف بعد مااتحمل كمت اصيح حموت وماما ادكول لبيبي ننطيها فاليوم للصبح وناخذها...
وبيبي ادكلها ولج انتي مخبله تردين تموتين البنيه وين اكو هيج شي واني الوج بنصهم خابرت لجاسم يجي ياخذني.
جاسم: خابرت بنص الليل طلعت ادور على تكسي ماكو وجان حظر تجوال والوضع كلش تعبان تلكوني الشرطه كتلهم بان زوجتي عدها ولاده نادو عالاسعاف واجوني عالسريع اخذتهم ورحت لبيت اهل رفيف حتى ناخذها وجانت تعبانه حيل ومتكدر تمشي صعدتها هي وامها وبيبيتها وكتله لابو الاسعاف ياخذنه لبيت الممرضه بالبدايه رفض وكال هاي مسؤوليه ومترهم بس ام رفيف قنعته وانطته فلوس فقبل وصلنه لبيتها ودخلت رفيف واهلها واني بقيت بالحديقه واسمع صوتها وبجيها واني بقيت ابجي عليها خطيه اسمعها تتمنى الموت ولا هالوجع ربي سهلها يتيمه وماعدها احد وتكسر الخاطر وبقينه ننتظر لحد ماصارت الساعه بالسته الفجر يالله ولدت رفيف وطفل يخبل بيوم 9/6/2007 وجان هذا يوم مميز بحياتي.