رواية شهوات رجل ظالم للكاتبة زهراء أمجد الفصل السابع عشر
وضعنا بالعراق كلشي مخرب واهسنه
سمعت صوت دكت باب كامت ماما تفتحها سمعت صوت بيبي جايه هي والولد ودخلو
الحجيه: اشبيج يمه خبلتينه علينه مدكوليلي شكو من الهبطه زين ماصار بينه جلطه
رفيف: هي تحجي واني اكول بكلبي هنيال كلبج ياامي عندج رجال يباوع على حلكج لاخان ولا دور سوالف مكسره حقج نار كلبي متحسين بيها حسيت على كلام ماما.
ام رفيف: ماكو شي تدرين بخبالات رفيف من الحبايه تسويها كبايه اخترعت حسبالها احد بالبيت سمعت صوت وطلع الصوت من الجيران وهاي خابرتني متخبله
رفيف: خرب عرضج ماما رغم القهر والحزن إلى بيا بس ضحكت على فرت ماما والله اشكد اشوفها قويه ومحد يكدرلها بس مااتوقعت تفر الموضوع بهالسرعه شنو من قابليه تكدر تقنع المقابل بلحظه هاي لو اني جان انثولت وحجيتها مثل ماهي.
الحجيه: يمه على بختج شجاج مدكوليلي المنطقه امان والجيران كلهم اهلنه ونعرفهم من قبل لتجين للدنيا على شنو هيج خارعه امج لو صاير بيها شي جان ماتندمتي
رفيف: ايييي يايمه اتندم بس مثل ندمي بمصيبتي ماكو مثله ندم واهز براسي
الحجيه: شنو يمه شكلتي
رفيف: سلامتج يوم كلشي ماكو تعالو ماما ليش صافنين.
حمودي: ماما اني هواي خوفيت عليج كلت خاف بلبيص ( ابو بريص ) شفتي واخترعتي بس طلع صوت لو صايحتني وكايله تعال حمودي اني اطب مااهاف ( اخاف)
رفيف: فديت وليدي الحلو بس اشوكت تعدل كلامك وادكول ابو بريص واخاف ولك مو رحت ثاني وصرت رجال
ميمي: ماما هو يرعف ( يعرف) يكولها صح بس هو يكول هيج احلى.
رفيف: هنيالي انوب انت ابو يرعف اباوعهم سوده بوجهي ياوليداتي اني صوجي وذنبي خلفتكم وجبتكم للضيم والقهر تمنيت ماعندي اطفال اباوع عليهم شكول وشحجي وابوهم هيج خاين شكلوللهم باجر من يكبرون ويشوفون امهم وابوهم محد طايق الثاني وكل واحد ببيت نزلت دمعتي حسيت على ماما ادغ بيا اسكتي فضحتينه
مسحت دمعتي بسرعه وكمت
الحجيه: وين يمه رايحه تعال خلي انطيج مي وشكر حتى تروح الخرعه منج.
رفيف: يمه اريد اغسل وجهي تنهدت بحسره ياقهر كلبي هو يفيد بي مي وشكر كتلها اغسل واجيج كمت احس الكاع تفتر بيا مثل واحد طالع من بيته جنازه ليش ياجاسم ولك ليش مو شتلك من الحضيض من صرت هيج تسوي بيا.
علمتك على الرمي ومن شد عودك رميتني اني اول وحده صوجي اني إلى قدرتك وعلمتك عالفيس وعالنت مو كالتلي صابرين وج خاله لتنطي كل الثقه ولج لتسويله فيس انتي دتجيبين النار الج كتلها خطيه ليش يكلب بحسابي جاسم فقير بس اًوووووف شيفيد الندم بعد والحجي إلى صار كسر كلشي.
وبعد ميتصلح رحت للحمام غسل وجهي ونشفته وطلعت رحت للغرفه اباوع اوووف يهالغرفه بيج فقدت اعز شي ورخصته لشخص ميسوه بيج تحملت كومه اهانات ورزايل لو الحيطان تحجي جان بقت العمر كله تحجي إلى بداخلي ومتخلص طلعت ترتك من الكنتور وكتلهم اني حطب اسبح لترحون امي كالت يمه عفت البيت فارغ والباب مردوده خاف احد يجي سلمت وراحت بقت ماما والولد عفتهم ودخلت سبحت وطلعت جبت المشط وكعدت بالهول امشط شعري وماما تزن براسي.
ام رفيف: رفيف لتحجين اي شي ومشي الامور طبيعيه لحد متخلص الامتحانات ووعد مني اني اخليلج محامي واطلكج منه وكلشي منريد منه.
رفيف: شاامشي ماما ونار كلبي وكسرتي وحركتي اشلون اباوع بوجهه بالدوام شكول كدام البنات خانتني ويه رجلي ماما شااذكر وشنسى كعداتنه بالمطعم من نروح وهو يجي واني حسبالي صدك مشتاقلي من يمر يجيبلي ريوك ويكولي عيب صديقتج هم جيبتلها وياج من يوصلها اكله خطيه تخابر ابوها خلي نوصلها وناخذ فره شاانسى ماما سنين علاقه وياها واني نايمه ورجليا بالشمس شاانسى لوعاتي من راح وكال اني بالحشد وهو ماادري بي مسافر لو لا.
ام رفيف: وين جواز جاسم ومستمسكاته؟
موجودات جوه ليش ماما شكو؟
وج انتي صدك ثوله كومي جيبيهن كلهن وتعالي بسرعه
ماما شكو غير افتهم
ولج كومي لتشلعين كلبي جيبيهن واني افهمج شكو
كامت رفيف وجابت جنطه المستمسكات كلهن واجتي
هاج ماما
فتحت الجنطه ودورت جواز جاسم وطلعته وبديت اتصفح بي وادور عالخروجيه والدخوليه للعراق اخر وحده بيا تاريخ كتلها ولج لكيتها وهي كمزت بصفي
شنو ماما احجي.
ولج هاي فيزا لايران وهاي الخروجيه بنفس الفتره إلى راح بيها رجلج بس مااتاخر غير 5 أيام وهو بقى اسبوع يالله اجه
رفيف: بجيت بقهر وبحركه يعني كل هالفتره عايشه بغش وخداع كل هالفتره واني على نيتي وياه وودعته وبقيت ابجي عالرصيف وجانت ساعه 3 ونص واخذ جنطته وطلع وبقى يومين جهازه مغلق وبدها اتصل بس كال ماكو شي يمنه وراح هذا كله وهو ديتونس بايران.
وهانت عليه قهري وقهر ميمي وحمودي إلى اسبوع هومه كوه ياكلون وليل ونهار يبجون ويكلون بابا ميموت ولك ليش هالحقاره ليش احجي وابجي والطم على خدودي ملخت روحي فقدت وماما عافت كلشي واجتي لزمتني وادكولي
فدوه كافي لخاطر ولدج وج يمه محد يفيدج غير صحتج ولج دشوفي هذوله مو خطيه ديتصارخون شنو ذنبهم كافي الله يخليج.
شكافي ماما سنين عايشه بغش وخداع ليش مافكر بهذوله اباوع عليهم خطيه كامو يبجون واجوني يركضون ماما لتبجين احنه اذا طب الحرامي نكتله
اييي ياوليداتي لو عالحرامي سهله يبوك غراض ويروح نجيب غيرهن بس إلى يبوك رجال وابو بيت شنجيب بمكانه.
ام رفيف: ماانكر قهري على بتي وكسرتها بس مااريد بيتها ينهجم خطيه وليداتها منو الهم عشت اربي بيتيمه وكلت كبرت وخلصت من مسؤوليتها وارجع من جديد اربي ايتامه ادري ببتي مو مال هاي الدنيا فقيره وعلى نياتهه بقيت كاعده يمها واصبر بيها وهي بركان يفور وميهدء شكول عليك يجاسم على يهديك ويعقلك هي هاي دكه
رفيف: بقت يمي ماما اشويه وكالت كومي ويايه لهناك اتغدي وارتاحي اشويه غيري جو والمغرب عود تعالي.
كتلها مالي خلك احجي ويه بشر ولا إلى واهس اكل يااكل هذا ماما انتي صدك تحجين هي إلى عدها
مثل مصيبتي تكعد تاكل
ام رفيف: ياستار مصيبتيش شو انتي هواي مكبره الموضوع هسه هو كاعد ياكل ومامهتم وانتي ابقي حركي بروحج ولج محد يفيدج متفيدج غير صحتج ولج محد بحال واحد كلها تصيح ياروحي.
رفيف: هي تحجي بس مدتحس بنار كلبي إلى بيا كسر كلشي حلو بداخلي كسر رفيف اووف ياكسرت كلبي ليش يالهي شنو إلى سويته وهيج دتعاقبني ليش ربي مو كضيت عمري كله دوده اذا شفتها بالكاع مااكتلها اكول خطيه اطلعها بره البيت ومااكون اني سبب موتها ليش حرمتني من حنان اب واخ واخت واسره وكلت ميخالف عوضتني بام وطلعت شايله ضلم العالم كله رغم ماجنت وياها نسمه وهي جانت ويايه اعصار وكلت الحمد لله والشكر انطيتني رجال لااوبالي بكلشي وكلت ميخالف.
مهما يكن طيش شباب وباجر عكبه يكبر ويحس تاليها انخان ليش ياالهي رضيت بكلشي وكلت ميخالف بس كسرتي هالمره هواي جبيره رفعت راسي ليفوك كتله ربي صبرك ماما بقت تلح كتلها مااتحرك شبر عن بيتي عوفيني وحدي بحالي عافتني وطلعت
ام رفيف: رجعت للبيت بعد ماتوسلت برفيف تجي ويايه ماقبلت طلعت كدور صغار خليتلها غده وخليت خبز وطماطه وخيار وخضروات ورجعتلها.
رفيف: وصلت ماما للباب ورجعت حطيت ولدي وكعدت صافنه وين حيذبني زماني تمنيت بابا موجود او عندي اخ جان عرفو اشلون يربو لجاسم ويوكفوً عد حده اندكت الباب واني مالي حيل افتحها لو اسلم على احد بقت تندك حيل راح حمودي للمطبخ
كلي ماما اجتي ماما الجبيره ( يصيح لماما ماما الجبيره) كتله افتحلها الباب دخلها حمودي لان سياج ماكو إلى يجي يطب بسرعه للطرمه.
ام رفيف: كسرت الباب كوه فتحوها طببت الاكل ولكيتها على نفس كعدتها بالهول وصافنه كتلها هذا غده جبت الج وللجهال ميصير تبقين بلا اكل وثاني شي اكلي من لخاطرج لخاطر وليداتج اذا شافوج هيج هم مراح ياكلون خطيه لتقهريهم يلا اني اروح لان اجه ابويه ويريد غده.
رفيف: ماشي ماما الله وياج وصلتها للباب ورجعت حايره بزماني وبامري واشلون حخلص الامتحانات واني على ذمته الصبر منك ياالهي دخلت فرغت الاكل بالمواعين وسويت سلاطه وخليته عالميز وصحت الولد حتى نتغده.
بقيت اوكلهم وماخليت لكمه بحلكي كملو اكل رجعت الاكل للثلاجه وغسلت المواعين وبديت انظف بالبيت نظفت الغرفه وعقمتها فرغت حركتي كلها بالتنظيف اني من اقهر لو اضوج اكلب البيت اطيحله جلف مااخلي شي ماانظفه حتى لو جان نظيف.
اعيده طلعت فرشه جديده وعقمت كلشي ورتبت الغرفه وعطرتها صارت غرفه عروس رجعت عالهول هم نظفته وجريت التخم ونظفت الجواه والصاله هم نظفتها والمطبخ وغسلت الطباخ بالعملاق فتحت حتى الفرن مالته واخر شي طلعت غسلت الطرمه والباب وطبيت صاح الله اكبر وكفت بالطرمه ورفعت ايدي وكلت ربي حسبي الله ونعم الوكيل اريد حوبتي تطلع واريد فضيحته وسيرته على كل لسان.
نزلت دموعي دخلت للهول بقيت انتظر خلص الاذان اخذت ملابسي وملابس جهالي وسبحتهم وسبحت اني وراهم طلعت بلشت بالعشا حمودي سوده عليت انتبه اني بلا اكل جبرني بالعشه اكل اكلت كبايه مال تمن وحده وعشيتهم وكملت
لميت الاكل والمواعين غسلتهم وكعدت طلعت ملازمي اريد اقره شي مابقى لامتحاني بعد وقت بس منين اجيب البال بقيت اكلب خابرتني ماما تطمن عليا كتلها لتخافين مااموت وعرج ميطبني.
اشكد مااتكفخ مابيا شي اطمني ماعجبه كلامي سدته وراحت باوعت صارت العشره الولد نعسو كمت قفلت البيبان واخذت للغرفه نومتهم ونمت لان جنت كلش تعبانه بس قررت من هاي الساعه انسى شي اسمه جاسم واعيش لروحي واواجهه كلشي واوكف ضد كلشي كافي ضعف.
من هاي اللحظه خلقت رفيف ثانيه صلفه صلبه متخاف متعتبر اي بشر متخلي خاطر لاحد متهتم لاحد لهنل وكافي كسران وخذلان نمت واني مقرره اكعد شخص ثاني كعدت ثاني اليوم على صوت ميمي يهز بيا يريد مميه بوسته وكتله ولك كافي مو صرت رجال شتحب من هالمميه اسويلك حليب بالكلاص
ميمي: ما اريد مميه اني احبها حبابه كومي سويلي
رفيف: زين شنو رايك اسويلك بيضه ام الشمس ( هو يسميها ام الشمس بس احنه نسميها بيضه عين ).
ميمي: تسويها ام الشمس وعسليه مثل عيونج ماما
رفيف: بوسته ياروح ماما تدلل واحلى بيضه لعيونك شال راسه حمودي وباوعلي نظره عتب لعد اني مو هم وليدج ماما متسويلي مثله وتبوسيني
كتله اوووف اشلون ماابوسك وانت اول فرحتي بهالدنيا ولك هو منو مصبرني عالوكت وضيمه غيرك انت واخوك تعال ياروح روحي ياامي وابويه انت.
كمز من جربايته واجه فرحان ويضحك صار واحد نايم على ايدي اليمنه والثاني عاليسره حضنتهم اووووف ياريحتكم جنها ريحه الجنه اووف ياطيبه كلبكم ربي لتخلي بختهم مثل بخت امهم ربي اكسرني بس وليداتي لا مروتك ياالهي بوستهم وكمنه من الفراش غسلنه وهومه كعدو عالميز منتظرين الريوك سويتلهم ريوك وكعدت اوكلهم ويضحكون ويلعبون ويسولفون اضحك وياهم بس داخلي انجوه ويه كل ضحكه غصات الكلب كثرن وماطل حيل يتحمل طاقتي وصلت مرحله النفاذ صبري مابقاله شي ويخلص.
بدت ايامي تخلص وتقرب ايام الامتحانات وصارت ايامي عباره عن اطفالي ودراستي بس رغم هذا كله بداخلي بركان ماطفت ناره رغم التظاهر بالهدوء بس ابقى افور بداخلي واتمنى اصيح بصوت اهز الكون وهم ماارتاح جبل كاعد على كلبي.
ليل ونهار وبدت امتحاناتي وجت شايله هم اشلون اشوف سمر منين اجيب القوه واتواجهه وياها خابرت لعلي حتى ياخذني وياه وديت الصبح الجهال لاهلي وطلعت ويه علاوي للكليه وصلت كتله انت ادخل واني حبقى يم التفتيش مال البنات كاعده اراجع ومن يدخلون بس رمش عليا.
كال براحتج جسمي اريد بس اسيطر عليه من الرجيف مااكدر اعصابي نار احس الماده طارت من راسي بقيت اقرع ايات واصلي عالنبي لحد ماهدئت اشويه راجعت واتصل علي كال بسرعه بدينه ندخل عفت غراضي يم ام التفتيش ورحت بسرعه همزين هي بقاعه واني بقاعه يعني مراح نلتقي.
دخلت سلمت على صديقاتي وبوستهن وكعدت بمكاني وزعولنه الدفاتر والكلب يقره دكته 1000 توتر مو طبيعي بقيت اقره شكو ايه حافظتها ختمت القران وزعولنه الاسئله الحمد لله كدرت اجاوب واسيطر عالامتحان
كملت وراجعت خاف ناسيه شي بس الحمد لله ماكو اي شي سلمت الدفتر وطلعت باوعت اجاني علاوي يركض
علي: ها فوفه كبد اشلونج بالامتحان مبينه زينه عمي انتي سجاجه منو يلحكج.
رفيف: ولك عابت اشبيك حتنك عليا قل اعوذ برب الفلق الحمد لله زينه هو إلى تصبح بوجهك اشلون متجاوب
علي: طبعا وجهي خير بس اني مااحب احجي واضهر محاسني ورفعت الياخه مال القميص
رفيف: اهوووو ماصدك مدحناه يلا عيني استاذ اريد ارجع ورايه كومه شغل
علي: وج بعد وكت دخلينه اشويه نتونس نسولف
رفيف: علاوي مالي خلك تريد ابقى انت اني حرجع بتكسي عادي لتشيل هم.
علي: افا عليج اخوج وسيارته جوه نعالج فوفه اني موجودوترجعين بتكسي ولج غير ابويه يطردني اليوم اذا سمع عايفج وحدج امشي اوصلج وارجع اني ومناك اخذلج بيتزا من بركر كنك ادري بيج تحبيها حتى تحجيلي اشبيج ولدكوليلي ماكو شي تره اعرفج من عيونج فوفه
رفيف: باوعته بعيوني الف حسره كتله علاوي مخنوكه والوكت والدنيا جارت عليا ومنين مااجيبها متجي عدل شسوي تعبت والله.
علي: كولي يالله هاي انتي القويه هيج تحجي لا عتب على الباقين ولج رفيف انتي الجبل هيج ضعفتي ودموعج راح تنزل احنه بالكليه يمعوده كولي يالله كلشي ينحل امشي يلا للسياره وبالطريق نسولف واذا تردين هسه اخذج لبغداد افرج واونسج وبالليل نرجع واهلج اني اخابر امج ومدكول اذا ويايه.
رفيف: مااريد شكرا علاوي بس اريد ارجع طلعنه من الكليه تلكونه طلاب ويانه جان يصيحون هااا ولكم خيانه وين رايحين جاوبهم علي اوصل الحب وارجع كتله خاب دنجب يانعل هذا
ايي شفايتلج واكبل وياج غير اني اخبل وماكو مثلي احلى حتى من جاسم
اوووع عفت الدنيا كلها تشبهه روحك بجاسم رحمه لمحمد علي لتجيبلي طاريه تره هسه اعوفك وانزل
هااا اكول اشبيج ثاري الحب متعارك وياج.
اكلك انت ليش متاكل تبن اكله نعل يكولي حب بالله رحمه لجدك ماشافته عيني هو اني اشوكت حبيت جاسم احجي احاجي وكوه مصبره عيوني مااريد ابجي كدام علي وابين ضعفي صح هو اقرب من اخويه إلى والولد مامقصر بشي بس مهما يكن مااريد اضعف حاولت اضحك واغير الموضوع بس ماكدرت من كال
اكلت فوفه اليوم شفتي سمر؟
اول ماسمعت اسمعها نار وشبت بكلبي بجيت ودموعي بعد مالحك عليهن اريد اسيطر بعد مااكدر.
رفيف اشبيج منو وياج احجي اني اخوج علاوي
من سمعته هيج كال كمت ابجي بحركه وبصوت فقدت ماتحملت انعاد الموقف كدام عيني كتلع ولك لتجيب طاريهم مااريد اذكرهم ولك علي سمر طلعت قاطعني وكلي مصادقه جاسم مووو
كتله شنو تدري وضام عليا احجي ولك ليش مو اني اختك انوب حتى انت تطعني علاوي ليش كمت اصيح عليا وهو يحاول يهدي بيا.
والله اني جنت حاس وحذرتج كلش هواي اني مالازم اي اثبات وصدكي لو جان عندي اثبات جان كتلج ولج اني عيوني انطيهن الج فوفه بس جنت اشوفها من يجي عليج مرات ترتبك ومن نجيب طاريه تحاول تمدحه واطلع العيب بيج نبهتج وماكدرت اكولها الج مباشر لان هو جان شك وخفت تفهميني غلط وانوب تصير مشكله وحتى مره حجيت لابويه وكلي حاول تنبهه مو تحجي دايركت لان تروح تعصب وتنهار وانوب يرجع الموضوع عليك وانت ماعندك اي مستمسك يصبت كلامه وصدكي اشكد كاعد احاول احصلج شي بس ماحصلت.
شسوي مدري حظج المعثر مدري حظه الكاعد ولج هو إلى عنده مثلج يفكر يشيل عينه على بنيه ولج والنبي قبل شهر خطبوج وسالوني عليج كتلهم البنيه متزوجه وعدها اطفال 2 والي رادج كامل مكمل بس شنكول ونحجي الله ينطي الجوز للماعنده سنون
فهميني شنو شفتي ووين واشوكت احجي فرغي حملج ولج اني اخوج إلى عمره مراح ينطي بيج احجي ولتبقين شي بكلبج اخاف على صحتج.
باوعت عليه كتله علاوي ياصحه واني بيتي انهجم تعرف شنو يعني انهجم يعني اسره كامله تفلشت والسبب سمر
وكعدت احجيله كلشي وهو خطيه يدخن جكاير قبل ليطفيها يورث الثانيه اني احجي وابجي وهو ساكت وصافن وشوف وجهه صار احمر وكام يضرب بالستيرن وج اووف لو الزمه لجاسم والحسين اكل من لحمه.
ولج تحملتي منه كلشي تاليها هيج يجازيج اسمعيني زين اني وياج مو عليج سمر اتركيها وكملي امتحاناتج واني بايدي اخذج للمحكمه واخلي ابويع يخابر للعرف مالته واخويه محامي واني اخذلج كل حقوقج من عيونه غير هذا الشي مااكدر اسوي لان مهما يكن اعتبر غريب رفيف ولتزعلين من كلامي اذا رحت هسه وسحلته وضربته ميكولي انت بصفتك شنو انوب يفرها عليج واطلع اني الكبل مالتج وانتي الخاينه بس كلشي ينحل بهدوء.
علاوي كلامك صح واني ساكته لخاطر بس احصل الشهاده.