رواية شهوات رجل ظالم للكاتبة زهراء أمجد الفصل الثامن عشر
علاوي كلامك صح واني ساكته لخاطر بس احصل الشهاده
علي: لتهتمين كلشي ربج يسوي بي صالح وصلنه للمطعم ونزلت اجيب البيتزا والمقبلات وكلبي يم رفيف خطيه اشوفها اشوف خواتي البنيه اني اعرفها من قبل الكليه ماطلعت منها العيبه ولا جانت الها قصد بشي دومها تساعد الكل وتشوفنه مثل اخوانها ورغم كل همها وحزنها وهي ضحكتها متفارك وجهه.
وادري وره هالضحكه اكو هموم وحزن بس متظهر هالشي اشوف بيها الجبل إلى ميهتز بس هالصدمه مالتها مااعتقد بعد تقاوم او تكدر جبت البيتزا والمقبلات والببسي وببالي الف حسبه اشلون بيها هاي خطيه كاعده بالسياره شارده كاعده بس جسد صافنه على زمانها إلى متدري شنو ضاملها والمشكله ماعدها لاسند ولاظهر حسبي الله عليك ياجاسم يانذل.
رفيف: اجه علي جاب الاكل وكلي امشي افرج اشويه واكلي ماطول البيتزا حاره وبقى يسولف ويجاملني ومشغل اغاني بس يريد اشويه يغير من نفسيتي بس اني بالي مو يمه ومااشتهي العسل كتله مااري مااشتهي بقى يلح ويتوسل وازعل وبداعت الخوه كوه اكلت قطعه احسها طبت سم بمعدتي فتحلي الببسي والمقبلات خطيه يسوق وعين عالطريق وعين يمي كتله حباب رجعني تعبانه وراسي ديوجعني.
علي: ارجعج بشرط احلفج بروح ابوج تاكلين ولتهتمين رفيف تره ميستاهلج والله فكري بولدج وراح منو الهم فدوه تره بس انتي من ريحه ابوج لتمحين ذكره مااكلج غير هذا الشي وانتي بكيفج بعد
رفيف: صار هو منا وهيج اعيش لنفسي ولجهالي وبس وطز بجاسم وعشيرته وانتظرك الامتحان الجاي تمر عليا حباب ولو حزحمك.
علي: رفيف انجبي وانزلي واخذي اكلج وياج خلصتي مصروفي وهسه ادكوليلي ازحمك صارلها ساعه تعلف ماكالت هذا خطيه شنو ذنبه ههههههههه احجي واضحك اريد اشاقيها واغير جو بس هي قافله
رفيف: عابتلك اي والله اكول ليش بطني كامت توجعني ولك نفسك بالاكل حظر روحك الامتحان الجاي ريوك وغده عليك ومطعم هم مو تقشمرني بالسفري مالتك
علي: صار خادم صغير وتدللين بس فدوه لتقهرين بروحج.
فتحت باب السياره داانزل كتله يلا اتفضل اشويه مااكلك ابقى هواي لان اشويه وروح على كد الجاي واحمي الك مال البارحه
علي: كومي انزلي ومااريد منج شي اشطحي هم جاي وهم تحمي مال البارحه عمي اشرب من الشارع بفلوسي وبكرامتي احسن.
رفيف: نزلت واخذت غراضي ووعدت علي ودخلت للبيت خليت الغراض بالطرمه عالكاع وطلعت المفاتيح من الجنطه داافتح باب المطبخ وانعاد الموقف كله كدامي كلبي احسه يريد يطلع من مكانه اشكد حاولت اتمالك نفسي وبقيت ارددلا رفيف لتضعفين انسي وعيشي ايامج وتعلمي حياتج بدونه اعتبري كابوس وكعدتي منه رفيف لتبجين وتضعفين بقيت احاول بس ماقاومت ولا كدرت كعدت عالدرجه مال الطرمه بباب المطبخ وبقيت ابجي وايديا على وجهي بجيت بحركه وبقهر ردت بس ارتاح بس اشكد ماابجي وافرفح متبرد نار كلبي وجعي ميهدء بدموع ولا بصياح وجعي جبير وميحس بي غير إلى ذايكه وجعي غدر خيانه خداع غش ليش اليتيم محد بحاله ليش دوم اليتيم إلى رب العباد وصه بي يدوسه ومحد يفكر حتى بكلام الله ليش هيج لو بابا الله يرحمه موجود جان ماسوه هيج جاسم جان ماكدر يتنفس ويايه ولا نفس قاطع افكاري صوت الفون مالتي طلعته من الجنطه شفته رقم ماما.
الو هلو ماما جاوبتها بصوت مبحوح وكوه احجي
هلو فوفه اشبيج ماما موزينه بالامتحان وين انتي هسه؟
رفيف: لا زينه الحمد لله هستوني وصلت للبيت جابني علي وراح حباب ماما دزيلي الولد مالي خلك اجي اخذهم
ام رفيف: تعالي اخذهم واخذي اكل الج والهم مااكدر انطيهم الگدور اخاف عليهم ميدبروها لو تجين اتغدي يمنه وابقي لليل وروحي
رفيف: مااريد غده جابلي علاوي بيتزا ومقبلات وببسي بس دزيلي الجهال.
اوك لعد هايهيه هسه ادزهم وانتي اوكفيلهم بالباب باي.
الله وياج باي سديت الفون وكمت فتحت الباب دخلت الغراض للمطبخ ورجعت وكفت بالباب منتظره الولد اشويه وطلعو من بيت اهلي احنه بيتي عن بيت اهلي بيناتنه بس خمس بيوت بنفس الفرع وبنفس الجهه وماما واكفتلهم بباب واني هم فالطريق عدل ميتيهون وهومه هم كبرو ويفتهمون اجوي ودخلنه ورحت بدلت وغسلت وحطيتلهم الغده وكعدنه ناكل اني بس اوكلهم وكلبي يفور كل يوم يمر ووجعي يزيد والهم يزيد وقهري يزيد وناري تزيد ربي صبرك تعبت من القهر والهم افرجها ياالهي امتحانك هالمره كلش صعب وصبري خلص اني بشر مو عبادك لانبي ولا ملاك مااكدر بعد اتحمل كملو الولد غداهم كمت غسلتلهم ولميت الغده وغسلت المواعين وبديت انظف وحمودي بده يحس بفقدان ابوه ودومه يسالني واكله مسافر لو عنده شغل يكولي ليش بعد ميخابرنه ليش ابد منشوفه بدو يتنحسون على ابوهم واني مااعرف اشلون افهمهم والمشكله اهله شالو كعدو يمنه بالمنطقه وبعد مترهم اجذب عليهم لان يشوفون ابوهم مرات بالشارع لو سيارته طالع بيها ويرجعون يبجون لان ميجي ابوهم للبيت واطورت اسالتهم ليش بس احنه بابا مو يمنه وعايفنه ومااعرف شنو ارد عليهم ومااريد اصدمهم لان مهما يكن حتى لو كبرو يبقى ابوهم ويحبوه ومشت الايام وكملت الامتحانات ورغم وجعي والمي بس جنت اتحدى كلشي واقره حتى انجح واطلع درجات عاليه وبلكت الكه شغل او تعيين حتى اكدر اعيش اني وجهالي لان تعبت من كلمه انتي عاله عليا واني إلى معيشيتج انتي وجهالج وجاسم ماله وبقيت انتظر النتائج على احر من الجمر وبيوم كاعده وحدي بالهول مثل كل يوم وجهالي ديلعبون دك عليا علي.
هلووو فوفه اشلونج
هلو علاوي اشلونك شخبارك
اني الحمد لله انتي اشلونج بالي كله يمج شصار مصار؟
والله لاشي جديد منتظره النتيجه حتى ابلش بشغلتي هسه مااكدر اتحرك باي شي
فوفه مالج نيه ترجعون وعفى الله عما سلف ورجال وغلط والمسامح كريم.
اكلك هذني حافظهن لو كاتبهن علي اكله خاني تعرف شنو خاني يامسامح ياكريم يافازلين لو روحي بايده هم هيج روح مااريدها اني نار كلبي كل يوم تكبر وتزيد وانت ادكولي هيج مروتك علي خليني ساكته تره جروحي بعدها مانامت ولا هدئت ولا راح تهدء الا اشوف بي يوم بذاك الوكت اكووول ربي انطيتني حقي بس هسه لا مستحيل اهدء
المهم عوفي كلشي وعندي خبر الج يخبل احزري.
جاسم مات؟
لا
سمر تخبلت وكامت تمشي بالشارع وتشكك بهدومها.
لاههههههه ولج بطلي تحشيش
لعد شنو ولك خاف طلعت النتائج بس بعد وكت كالو اسبوع الجاي
وانتي شتعرفين عن علي ياخذهن ويه باقي الطلاب عيوني نجحتي ودرجاتج تخبل
اني سمعت الخبر كمت ابجي واصيح واكمز ومااعرف شسوي اشكد جنت مقهوره ومهمومه بس هسه كله راح اكثر شي فرحني وشالتي من حزني اصيح علاوي عليك الله صدك تحجي فدوه لدكولي حلم علاوي صدك نجحت فدوه لكلبك علاوي.
اسمعها تصيح وتبجي وتضحك وتهوس اريد افتهم منها كلمه وحده مافهمت وج اشبيج خبله اريد افتهم شنو دتحجين ههههههههه وج فوفه اشبيج احجي
كتله علاوي حلمي وحلم بابا الله يرحمه تحقق واخيرا هسه اكدر اكول اني بت المهندس المعماري مهدي واخيرا حينكتب قبل اسمي مهندسه علي اول مرح احقق شي حلمت بي صح تعبت هواي وتحملت هواي بس الحمد لله حققت حلمي وهسه كولي اشوكت تطلع النتائج حتى اكدر اكمل المسيره.
اصبري فوفه الاسبوع الجاي تطلع النتائج وتحركني اني هسه اروح ونتلاكه بيوم النتائج بيباي.
بيباي وسديته منه وبقيت ابجي لان ادري بالجاي اصعب من الراح وادري طريقي طويل وكله مصاعب بس ربي المعين وخابرت لماما ولخالاتي وبشرتهم على نجاحي وجانت سنه 2014 تخرجي اني وبنات خالاتي 2 يعني 3 احنه خلصنه جامعه والحمد لله وخلص الاسبوع ورحت للكليه وكالعاده علي يجيبني ويرجعني وبيومها ماشفت سمر طلعت من الكليه اني وعلي والي صدمني وماصدكت اشوفه ولا توقعت حيصير ابد شفت جاسم كبالي منتجي عالسياره مالته اني شفته نار وانصب على راسي اشكد ماكمت اتنفس بس هوا ماكو كلبي يريد يطلع من كثر ميدك سريع علي انتبهه كلي فوفه صيري قويه واحنه بالشارع روحي شوفي اشبي.
مااروح علي امشي وصلني لان اذا رحت يمه احركه
لا رفيف ميصير اخذج ورجلج موجود مهما يكن يكدر حتى يسويها عشاير اتغدي بي قبل ليتعشه بيج
شفت كلام علي صحيح ومااريد اتصرف بتهور واخربط كلشي تمشيت اني وعلي سلم على علي ورد السلام طبيعي ومبتسم ورجع كلي اشلونج فوفه ليش ماحجيتي من الصبح اليوم النتيجه مالتج اشلون تجين وحدج.
باوعته بنظره احتقار وكتله مشكور وماقصرت اخويه موجود إلى عدها اخو متنذل لواحد ليش كلفت نفسك واجيت لو باقي بشغلك اني علاوي يجيبني ويرجعني
لا اشلون اعوفج بهيج يوم شو شهادتج اشوفها
بالبيت عود شوفها وشكرا لان اجيت يلا علاوي نتخابر عود وسلمنه عالاهل بيباي
سلم علي وراح واني صعدت وياه بالسياره ودرت وجهي للجامه بقينه ساكتين
جاسم: اشلون اطلعين بدون علمي.
رفيف: ههههههههههه هههههههههه ضحكتني وانت منو حتى تحجي والك عين تحجي ابو الكح، ولك سويتك وعليتك وتاليها تخوني بس ناقص وعار ومترهملك جاره
جاسم: انجبي رفيف وبدون تجاوز وانتي سبب الخيانه فااسكتي احسن وخلي نحل الموضوع بيناتنه ونرجع المياه لمجاريها وها تره اني قررت هذا الشي لخاطر الجهال مو لخاطرج.
رفيف: بالله هذا شحجي وياه كتله اول شي اني مامقصره وياك حتى اني سبب الخيانه ومن اخذتني لحد هاي اللحظه عين غطه وعين فراش واذا شفتني صعدت وياك فحسبالك اني كاتله روحي عليك وبس اريد ارجع فانت غلطان اسمعني زين مو رفيف إلى ترجع وتتحمل اهانه لا عيني لا انت غلطان تره رجعت لان مااريد فضيحه كدام العالم ومااريد تروح لاهلي وادكلهم صعدت ويه الغريب وعافتني هاي تربابتكم وتذب الصوج بيا وباهلي لا جاسم لا انت غلطان رفيف الفقيره والغشيمه والي تنخدع ماتت وانخلقت بدالها شخص ثاني شخص انت علمته وقوته بخيانك وسوالفك المكسره لهنا وكافي جاسم صار 8 سنوات ونص متحمله خداعك كافي طاقتي خلصت وياك مااطبقك بعد يااخي اموت منك حس بيا مديت ايدي شوف حتى حلقتك نزعتها ومالبسها بعد ولو اموت مااخلي قيدك بايدي طلكني جاسم علاقته لهنا وانتهت طلكني احسن الك واليا لان اذا بقيت وياك انت تخون من جهه واني هم اخون من جهه فخلي نحفظ كرامتنه وشرفنه طلكني.
جاسم: صار غالي والطلب رخيص اطلكج بعيوني بس تتنازلين عن كلشي افتهمتي لو لا
رفيف: طز بيك وبكلشي راجع الك ولك هو اني شنو شفت منك شو اجيتني حافي واني سويت براسك حظ وخير طلكني ومااريد اشوف وجهك بعد كمت اصيح واضرب على جتفه.
جاسم: شفتها وصلت حدها وهاي راكبه راسها ومتريد لاحاضر ولاغايب طز بيها اسربتها لاهلها واني هم طلعت منهم بسياره ومولده الشارع امها مسويه ورقه البيع باسمي يعني طلعت من هالزواج بربح وذهبها النيشان بعته طز بيها اخلص منها ومن جهالها فريت السياره وعدل للمحكمه اني شايل مستمسكاتنه كلهن لان جنت اتوقع منها هذا الشي فمحظر كلشي رحت للبيت وهي بالكليه اخذتهن وذبيت حلقتي عالميز وطلعتلها للكليه.
رفيف: توجهنه للمحكمه وجانت مغيرين مكانها وانعاد كلشي ببالي اشلون دخلت للمحكمه اول مره ويه ماما صح جنت ضايجه ومهمومه بس مو مثل هسه اشلون دخلتلها رافعه راسي بعقد زواج وكلها تبارك والجكليت والكل فرحانه وهسه حدخللها واني مكسوره بركبتي اطفال وحمل يهد جبال حاولت اكتم دموعي وحزني واتظاهر بالقوه كدام جاسم بس بركان بكلبي يسعر ونار واوووف يانار الكلب اباوع عليه وهو ولامهتم كتله اشلون نروح بدون مستمسكات والعقد ارجع نجيبهن من البيت ونجي.
جاوبتها بدون مااشوفها كتلها جبتهن هذني بالجكمجه لان ادري براسج يابس والي ببالج تسوي
ههههههه ههههههه ههههه ضحكتني من كل كلبي عاشت ايديك كل إلى سويته وادكولي راسج يابس يااخي شنو من صلافه شايل وهمزين جبت كلشي وسهلتلي المهمه بس العقد يم ماما اشلون حصلته منها
بسيطه مريت كتلها خاله محتاج العقد على مود الراتب مالتي بالدائره اريده هسه وانطيتي واحد مستنسخ وجبت المستمسكات الباقيه من البيت واجيتج.
اوك همزين عرفت اشلون تخيط السالفه وصلنه للمحكمه ونزلنه إلى يشوفنه حسباله عرسان وجايين بعقدون إلى يكول زواج والي يكول محتاجين شهود والي يكول مبروك بس ميدرون احنه كل واحد بوادي ميدرون بقهر كلبي وحملي وهمي ميدرون بطريقي المجهول إلى عمري مافكرت بي وصلنه للمكاتب بداخل المحكمه يكتبون بيها طلب الزواج او الطلاق وبده السيد إلى يطلك يسال وجاسم يجاوبه اخر شي التفت عليا وكلي بابا انتو بيناتكم اطفال وعشره عمر وابغض الحلال عن الله هو الطلاق ليش متحلوها رفعت راسي وباوعت لجاسم بنظره عتب وانكسار بعد مااتحمل اتظاهر بالقوه لهنا اعلنت استسلامي لهنا بعد مااتحمل اتظاهر بقوه وجبروت وداخلي طفله مكسوره تركض ادور على حضن ابوها إلى مالحكت عليه ولاشبعت منه باوعته ودمعتي نزلت على خدي كتله الانفصال احسن حل للطرفين كمل المعامله ورفق وياها المستمسكات مالتنه وكال روحو دخلوها للقاضي وخلي تلزم سره حتى يتحدد موعد مرافعتكم.
انطاه جاسم فلوس الطلب والاستنساخ وسلم وطلع واني اسحل بروحي وراه صح مااحبه ومااريده بس صعب الانفصال مهما يكن شخص عشت وياه وعشره بيناتنه وطاعه وضحكه وبجيه ولكمه صعب تنتهي وكلشي يصير ماضي صعب نصك الثاني تشوفه يصير غريب عنك وهم ياريت لو شفت منه ذره تمسك اصلا جان جاي ومستعد ومتحظر ماغزرت بي الايام ماغزرت بي العشره إلى متهون غير على ابن الحرام وصلت للباب مال الدخول بعد هنا انهاريت ماتحملت كعدت عالرصيف اشهك وابجي بصوت فقدت ماتحملت ابقى ساكته.
جاسم: جنت امشي وهي ورايه ماانكر ضجت وانقهرت لان كلشي حينتهي ويصير ماضي وماانكر اني اذيت رفيف هواي بس المشكله اكو شي بداخلي يكولي عوفها خلي تولي وبنفس مقهور عليها صراع بداخلي حب وكراهيه وليش ماادري مع العلم هي ماقصرت بشي ابد بالعكس جانت دومها ويايه وتساندني بكلشي رغم كل اذيتي الها وهي كلبها ابيض وماشالت عليا ولاذره حقد لو كرهه حتى من خنتها ماحجت ولافضحتني ولا تنفست بقت ضامه بكلبها هنيال كلبج إلى يتحمل هيج قهر وضيم واني امشي واحجي بداخلي حسيت بصوت ورايه التفت شفت رفيف كاعده بالكاع عالرصيف وايديها على وجهه وتصرخ وتبجي بصوت وبحركه رجعت عليها تقربت يمها حقها كسرتها وقهرها جبير حاولت تكون اسره وعائله واني خربت كلشي تمنت تلكاني اب وزوج واني لكتني العكس.
رفيف: حسيته قريب مني وراد يلزمني بعدت ايديه مني ورفعت راسي وصارت عيني بعينه كتله ها مو هذا إلى متحظرله ليش رجعت وليش اجيت يمي مو هاي نتيجه افعالك وافعال امك مو متردوني مره وجنه الكم اني سهلت الكم كلشي وتنازلت عن كلشي مقابل اطفالي وحريتي ويلا كوم خلي نكمل قبل نهايه الدوام كمت من الرصيف ونفضت ملابسي وكتله يلا امشي اشبيك وكفت كال امشي نرجع ونجي غير مره الوقت اتاخر كتله لا امشي هسه جرني من ايدي وكال امشي نحجي بالبيت رجعنه للكراج واني دموعي مانشفت امشي وهنه شلال ويجري وصلت للسياره كعدت كال هسه اجي انتظري بقيت كاعده وابجي اجه جايب مي فتح البطل وكال هاج اشربي وغسلي وجهج لتروحين تتخربطين.
كتله وليش تخاف عليا مثلا اطمن ميصير بيا شي اقوى منها وكمت وماصار شي هذني الخفايف عافني ورجع صعد بمكانه والزم الفايل كله شككه
كتله هاي ليش اشلون بعد نكمل المعامله
يامعامله انتي مخبله اطلكج ولج رفيف والله احبج وساعه شيطان رفيف ساعات اموت عليج وساعات اموت منج احاجيها وابجي ياعالم والله وروح ابويه احبها بس ليش داخلي حقد وتمر ساعات اشوفها اقبح شي بالكون رغم نزاكتها وجمالها.
جاسم كافي اسكت ويلا وصلني للبيت الجهال خطيه يم اهلي طلعنه ورجعنه للبيت خابرت عالجهال اجوي خطيه مكيفين اول ماشافو ابوهم فرحو بي صبيت غده بيومها جاسم بقى اتغده ويانه رغم موبايله ماسكت كل اشويه وامه مخابرته ويكوللها عندي شغل اتغدو انتو كفرته اخر شي غلق جهازه.
اني التزمت الصمت ولابسه تراك مستور وحجاب كمت اتقيد منه ومااتقبله ابد بس ساكته لخاطر الاولاد وفرحتهم بقو يمه يلعبون وياه وابد ماعافو ظل للعصر حاول يكسر جو البرود إلى بيناتنه بس اني ماانطيته مجال كتله انت مجرد اب للولد وبس حياتي وياك انتهت للعصر سبح وبدل وطلع اني عادي كملت تنظيف وسبحت وبقيت افكر اريد حل لمصيبتي صار المغرب بين صلاه وعشى واني دااسوي العشه مااشوف الا باب المطبخ انفتحت درت وجهي انصدمت شفت جاسم ركضت لحجابي خليته على راسي وكتله جاسم ها شو اجيت شكو.
اشبيج دسلمي دكولي الله يساعدك شنو شو احيت غير بيتي ورجعت وين اولي يارفيف
اشبيك جاسم انت مريض شنو بيتك ليش هو انت صارلك سنين لامعترف ببيت ولا بجهال ولابمره شنو الموضوع تعال فهمني
عمي والله ماكو شي هسه دخذي المسواك مني وفرغي اشبيج مصدومه شايفه جني
هااا لا ها ماكو شي بس ليش رجعت جاسم كتلك إلى بيناتنه انتهى رجاءا مااريد مشاكل كدام الجهال ولتخربط حياتنه.
رفيف مروتج والله اني غلطان ومستعد رجليج ونعالج ابوسه واهلي على راسي فدوه بس سامحيني رفيف انتي حب حياتي
جاسم اشبيك شو امرك عجيب الصبح تريد اطلك وتسحول بيا بالمحاكم هسه جاي تبجي خبلتني
اشبيك شنو مكبسل شايف فلم هندي وجاي اطبقه براسي جاسم شكو امك طاردتك ومالكيت مكان يلفيك غير بيتي
رفيف والله ماكو شي بس والله متندم والله احبج وروح ابويه خلي نرجع لخاطر الجهال ابوس رجلج.
لتبوس رجلي ولاايدي جاسم اني وياك مستحيل نرجع ابقى لخاطر الرلد وبس انت ابوهم وبس غير هذا الشي لتفكر بي انسى عندك زوجه اسمها رفيف وروح اتزوج وطلعني من دماغك ومسواكك مااريده الثلاجه متروسه بجال اهلي وهاي صارلي 8 سنوات ماشفت منك علاكه هسه متذكر شيل مسواكك وغراضك واخذهن لاهلك احنه موعازه احد مشكور خويه
ولج خويه شنو اني رجلج لو نسيتي.
اي والله من ناحيه نسيت فنسيت قبل سنين من سنه 2012 اني ماعندي رجال وهسه احنه 2014 مو زين اعرف واتذكر شكلك جاسم ابعد عن طريقي وكافي إلى صار تره لحد الان ساكته ولازمه اعصابي بس وحق الحق وروح الغالي إلى نام جوه التراب وعافني بايد هالمزابل يجاسم لااطلعلك وجهي الثاني وانكلب عليك اعصار تسونامي فاحسن الك اطاع من حياتي اني وجهالي بهدوء.
رفيف حبي انعلي الشيطان وهاي جبتلج مليون اشتري بيهن ذهب اخذت سلفه وجنت ناوي اسويلها الج مفاجئه بس الوقت صار عكس وهم هديه نجاحج
ياصلوات عمري وحياتي وحتى نيشاني مصار بمليون اول تالي طلعن عندك فلوس شو كضيت عمرك تشكي وتبجي اخذ فلوسك ومو بحاجه مليونك كمل عشاك والعب ويه ولدك واذا تريد تبات فبات بالهول لان اني بالغرفه وتعلمت انام وحدي.