رواية شهوات رجل ظالم للكاتبة زهراء أمجد الفصل الرابع

رواية شهوات رجل ظالم للكاتبة زهراء أمجد الفصل الرابع

رفيف: ماما جاسم يريدج
رحاب: شسويتي للولد احجي شيريد مني ??هسه جايه وراج البس شالي وعباتي الاسلاميه واجي روحي كدامي واني جايه اريد اشوف شمصخمه ويه الولد.

رفيف: والله ماما ماسويت شي شو هو من وديتله الجاي اخذه وكلي صيحي خالتي اريدها عفتها ومشيت بس مقهوره حيل ليش هيج ماما دوم اطلع حركتها بيا اني شمسويه صح هي تصرف عليا وارقى ملابس تلبسني والبس ذهبها عادي وطبعا مخيلتي مثل المعرض كدام الناس حتى يكلون رفيف مدلله بس مالي حق اتصرف باي شي حتى الفلوس من تنطياهن تحاسبني عليهن وكله محسوب ومسجل مشيت كدامها للصاله لكيت جاسم مخلص الاستكان مال الجاي كتله اصبلك بعد.

جاسم: لاحبي مشكوره بس وين خالتي شو مااجتي
رفيف: هسه حتجي ورايه تلبس حجابها وعبايتها وتجي
جاسم: خوش حتى احاجيها واروح
رفيف: خوماكو شي؟
جاسم: لا ماكو شي بس هيج شغله اريد اتناقش بيها وياها
رحاب: دخلت للصاله واني الف تفكير ببالي شيريد مني جاسم بس لا رفيف جافصه جفصه كدام الولد ادري بيها تتصرف مرات بدون قصد دخلت شفت جاسم كاعد كتله ها ابني رفيف كالت تريدني.

جاسم: اي خاله اريدج بموضوع مهم على مود عقد السيد اريد اعقد حتى تصير زوجي شرعا وقانونا
رحاب: يمه اشبيك مستعجل تره اليوم عقدتو محكمه اصبر بعد الخطوبه طويله وعود روح اعقد سيد.

رفيف: همه حجون واني بس صافنه ومالي اي دور او وجود بالموضوع كانهه غريبه عنهم ولا إلى دخل بالموضوع شو اني محد اخذ رائي ولا قدرني هذا اشبي جاسم من هسه بدت حقارته ويايه بسيطه اني اعلمك احجي بس داخلي بركان واتظاهر بالهدوء بس اني افور فور بس اريد ماما تطلع حتى اتعارك وياه ووين متوصل خلي توصل.

جاسم: خاله انتو مو تردون حفله مهر ونيشان اشلون ادخل البسها الذهب واحنه ماعاقدين حرام عليا ميصير وعقد المحكمه بس حتى يضمن حقها والشرع ميعترف بعقد المحكمه واحنه ناس اهل امي نجف يعني نستحرم
رفيف: باوعته اييي يجاسم والله وفريتها واكيد ماما حتقتنع وتوافق واني مخليني هيج مثل الاطرش بالزفه
ام رفيف: اذا هيج لعد حقك ابني اشوكت تردون تعقدون وتسوون حفله
جاسم: باجر لان ماعنده شي.

رفيف: ماتحملت ابقى ساكته جاوبته كتله مااكدر باجر وكلشي مامحظره خليها غير يوم ورايه كومه تحضيرات بدله ومكياج وتحضير غراض الحفله والمعازيم قابل هو عيد ميلاد حتى باجر لو هو طلعه سوك وين الحك
ام رفيف: اي صدك منلحك خليها غير يوم
جاسم: بكيفكم خاله انتو قررو اشوكت
رفيف: خليها عالخميس حتى الجمعه عندي عطله
جاسم: بس بعيد للخميس تره اليوم اثنين
رفيف: اي مالحك شسويلك هو الخميس لو الحك لو ااجله للخميس إلى وراه.

جاسم: هايهيه يلا اني اترخص وكمت بس احس روحي ضجت حيل لان جابت كلامها راس وامها ساكته ماحجت وهي مبتسمه وتباوعلي
رفيف: ابتسمت بوجهه لان فرضت رائي غصب عنه واول مره اشوف ماما متحجي وساكته وبس تباوع وجنت خايفه لتروح توافقه واني انلبس بس الحمد لله صار العكس وراح جاسم بس ضايج
ام رفيف: اكلج اليوم اطلعي للسوك حتى اتاجرين بدله اخذي خالتج علا وروحي واني حروح اتسوك حتى باجر ابلش اعزم الكرايب يادوب انلحك.

رفيف: خابرت خالتي واتفقت تمر عليا بعد اشويه لان بعد منلحك وطلعنه واجرت بدله وردي ب? وكلها من فوك كيبور وكيمونه واشويه دلعه من يم الصدر ومن جوه تول واجرت وياها تاج ناعم كله فصوص فضي وبدينه نحظر للحفله واني روحي تلوب على محمد اشتاقتله احس روحي خنته بهاي الخطوبه بس ارجع واكول اني ماقصرت وياه هو إلى عافني وحدي واعتبرني اخته وماحبنه كحبيبه.

ومرت الايام واجه يوم سجني واعدامي من جاسم جان يوم خميس كعدتني ماما من الصبح كعدت لكيت الكل موجودين والبيت صاير ملحمه مالج محط رجل ناس تحف وناس تسبح وناس تسوي شعرها والدي جي مشغله صبحت عليهم وبوستهم ورحت اتريكت وكملت ورحت اشتغل ويه ماما خابرت لجاسم يروح يجيبلي البدله وجاسم بالبدايه ماقبل بس كتله اذا مارحت ابطل واخرب كلشي استسلم وراح جابها انطانياها من الباب وراح كال مستعجل.

كملنه غده عالسريع وبلشت خالتي صابرين بيا طبعا صالون ماكو كالو ميحتاج هو عقد بيناتنه سويتلي شعري برم ومن كدام رفعته اشويه ومكياج كتلها اريده خفيف حتى ابين بعدني بنيه كملت وشفت.

روحي مو اني انقهرت من اذكرت هذا كله وتاليها مو لمحمد نزلت دمعتي بس مسحتها بسرعه قبل ليشوفها احد وطلعت من الغرفه للهول والكل يهلهل جنت لابسه فستان ابيض كلت اعقد بي لان لازم اعقد بابيض وبعدها ابدل والبس البدله الوردي بدينه بمراسيم العقد واني صافنه ولا يمهم وبده الشيخ يحجي واني بس ساكته اخير شي كال فان رضيتي قولي نعم وانت وكيلي اني بقيت ساكته عادها بتي رفيف دتسمعيني قولي نعم وانت وكيلي ماحجيت الكلمه متقبل تطلع من حلكي عادها ثالث مره والنسوان كلها تباوع وادكولي احجي اشبيج يلا الشيخ منتضرج كلتها بصوت ناصي وبقهر نعم وانت وكيلي.

والكل كامو يهلهلون واني هلاهلهم مثل الزلزال إلى يهزني اخذتني خالتي للغفه بدلت عالسريع لبست البدله وطلعت وهم وجعو هلاهل وهوسه وصور وكالو حيطب العريس يلبسها النيشان هنا كامت الدنيا تفتر بيا انتهت حياتي اختنكت حيل رغم ماجانت الدنيا شته وشهر ال12 وبارده وكلها لابسه بلوزات ومثلجه بس اني بركان ويطلع من جسمي دخل وشفته لابس قاط جو ي فاتح وقميص بيجي بدون رباط وفرحان ومكيف اجه وكعد بصفي.

جاسم: دخلت واشوفها جنها ورده مفتحه ولابسه الوردي والجسم مبين اووف يربي لو بايدي اكلها هسه صح هي تعجبني واحبها بس غرورها لازم اكسره اني اعلمها كعدت بصفها وهمست يم اذنها مبروك حبيبتي
رفيف: كلي مبروك واني افور من القهر ردت ابجي وكوه كاتمه بالدمعه كتله الله يبارك بيك بابتسامه خفيفه.

جابو الذهب والكل فرحان وبده يلبسني الذهب واني ارجف من القهر والحركه وهو يضحك مكيف واخذنه صور كومه وراح طلع بقن بس النسوان وحفله وركص وهوسه اني بس اريد اخلص ضجت حيل بس كاعده وكل اشويه اكوم اريد اروح للغرفه ضجت ويرجعوني ويكلولي عيب ميصير صار المغرب واذن وطفو الدي جي وبعدها اجه جاسم حتى ياخذ النسوان دخلته ماما بالغرفه وصاحتني اني كيفت ماادري بي هو موجود رحت مكيفه ركض للغرفه شفت كاعد كتله جاسم.

ام رفيف: تعالي اكعدي يم خطيبج ميصير يبقى وحده وعفتهم وحدهم بالغرفه وطلعت سديت الباب ورايه
رفيف: طلعت ماما واني بقيت ويه جاسم بس حيل مخنوكه وضايجه هسه هذا شعنده جاي مو يدري النسوان تبقى عالعشه تعال من يخلصون شنو ذنبي انحبس يمه
جاسم: اباوعها منزله راسها وتفرك بايديها ادري بيها مستحيه ىخدودها طماطه صايره تقريت يمها وهي طفرت اشبيج يمعوده تره اني زوجج وحبيبج اشبيج طفرتي مراح اكلج.

رفيف: اكلك جاسم عفيه خلينه هيج عيب لحد يجي ميصير
جاسم: حبي رفيف بس اني زوجج والشرع حلل كلشي بيناتنه واطمني ماطول الباب مسدوده محد يوصل يمنه
رفيف: اتقرب عليا وبده يوصل لركبتي ويشم بيها ولازم اجتافي ماتحملت وخرت بسرعه منه وكتله رجاءا وخرً.

جاسم: بدني هستوني تقربت يم ركبتها بس وصلت يمها هستوني باول بوسه وهاي طفرت مدري اشبيها وصوتها عالي وج اشبيج رفيف والله مااتحمل بعد هي بوسه لتخافين مااسويلج شي بس بوسات وحضن
رفيف: جاسم كتلك رجاءا وخر البيت كله بشر وثاني شي شوف وجهك كله يلمع هسه شيكلون وكمت اضحك لان وجهه انترس لمع وهو كلشي مامسوي.

جان تندك الباب كمت فتحتها دخلت صابرين تريد الجنطه مالتها باوعت على جاسم طلعتله كلينكس رطب وكلتله امسح وجهك وضحكت وطلعت هو صار وجهه ينطي الوان اخذه منها ونزل راسه
رفيف: اني متت ضحك عليه كتله كوم شوف روحك كدام المرايه وامسح الترتر إلى منشور عليك.

جاسم: حرجتني خالتها وانوب هاي الفطيره بس تضحك كمت واشوف وجهي كله يلمع خرب بحظك يجاسم هي بوسه وشمه وحده وهيج كمت المع هاي اذا اسويلها شي شيصير بحالي كمت امسح وجهي
وهذا لازك ميروح وهاي واكفه تباوعلي وتضحك وهم اندكت الباب
ام رفيف: اخذت العشه للغرفه لرفيف وجاسم فتحت رفيف الباب وهي بس تضحك كتلها اخذي الصينيه
اباوع جاسم واكف كدام المرايه وضايج وهاي خربانه ضحك عرفت مسويه بي مصيبه.

صبيت عشه للمعازيم كلهم فرشنه السفره بالهول والصاله وهم ماكفه المكان وناس بقت تاكل بالمطبخ والبيت كله بشر وبنص العشه ومنسمع الا صوت هز البيت هز كلها طفرت من العشه وكلها تركض للطرمه وناس تركض للشارع وتحولت الحفله الى عزه وصياح
رفيف: احنه بالغرفه دنتعشه ومنسمع الا صوت كلش قوي وبعدها سيارات اسعاف واطفاء كمزنه اني وجاسم نريد نعرف شكو.

طلعنه ونسمع كلها ادكول انفجار نطلعه للطرمه ونشوف الدخان والعالم صوتهم بالشارع وسيارات الشرطه والدنيا انكلبت كلاب رغم ماجان مغرب على بدايه ليل يعني وكت رجوع العالم من شغلها والي طالع ديتونس ويه اهله والي طالع ديتعشه بره اووووف ياعراق اشوكت تصفى ونرتاح والله تعبنه نطب بحرب نطلع من حرب الى متى كالو الانفجار قريب بشارع 40 وطبعا هذا شارع تجاري وخالتتي والكرايب كلها تبجي وتخابر على ازواجهن والي تخابر على ابنها وكلها خايفه بس الحمد لله والشكر محد صار بي شي من العرف كلهم دخلنه بسرعه اني ركضت للغرفه بدلت لبست كوستم شتوي وردي عالسريع وطلعت لكيت جاسم مخابر للسايق حتى يجي ياخذهم خاف تروح اطك مفخخه ثانيه لان جان الوضع بسنه 2005 كلش تعبان والي يطلع لو يرجع عايش لو ميت انت وحظك بعد راحو اهله وهوه والمعازيم بدت تروح ناس وره ناس بقينه بس احنه.

كعدنه ثاني يوم وتنظيف البيت من فوك ليجوه لان البارحه عفنه كلشي وجنه تعبانين حيل ومشت الايام واني كاضيتها دوام وارجع انام لو يخابرني جاسم حجايتين واسده بحجه تعبانه مالي خلك عندي دراسه وصارت اغنيه كاظم الساهر انتهى المشوار ليل ونهار اسمع بيها وكلما اسمعها مثل الجمر إلى يجوي كلبي.

وبيوم اني نايمه بالغرفه يم ماما وموقته الفون مالتي دك موبايلي بنص الليل باوعت رقم محمد فركت عيوني كلت اكيد اني نعسانه ومدااشوف زين باوعته ايي هذا اسمه وهذا رقمه رفضته حست ماما اندارت عليا
رحاب: رفيف منو اتصل بهالليل عليج
رفيف: هااا هااا اي كمت امتمت كتلها رقم غريب ورفضته
رحاب: بالله صدك ناس متستحي اكو واحد يتصل هسه وجان يرجع يدك جاوبي منو اتصل.

رفيف: شلت الفون وايدي وكلبي وكلي ارجف كتله رقم غريب كالت ردي كتلها لا عوفي رقم غريب رفضته
ورجع اتصل غلقته بس اني الوج اريد اعرف اشبي محمد وليش اتصل هيج وكت هو مويدري اني انام بصف ماما ومااكدر احجي بالليل وره اشويهاتاكدت ماما نامت رجعت شغلت الفون واول مااشتغل رجع دك بسرعه انطيته صامت واخذته وكمت للحمام اريد اشوف هذا اشبي.

محمد: اليوم سمعت رفيف صدك انخطبت وعقدت واني انهاريت يعني حب حياتي ضاع من ايدي يعني صدك من خابرتني وكالت خطبوني ماجانت تريد تشوف احبها لو لا والمن لجاسم الحافي ليش خاله رحاب ليش مو اني إلى ربيت وياها مو اني إلى جنت الها ظهر وسند كتلج مستعد اصوغها من راسها لرجليها ذهب والي اطلبي اسوي بس اقبلي بيتها وحدها وانتي وياها تاليها تفضلين هذا الاجرب عليا والله مااخلي ياخذها لو على جثتي طلعت بالسياره اسوق حيل وماادري وين اروح حاير بزماني وبتفاحتي إلى عقدت وراحت من ايدي واني السبب تهاونت وبردت وجنت اكول متتزوج الا تكمل كليه وحتى من كلتلي كلت تريد تجس نبضي كله من ورايه احجيواضرب بالاستيرن مال السياره رحت على صاحبي كتله اليوم اريد اشرب.

حسنين: اجاني محمد صاير نار اول مره اشوفه هيج عيونه حمر مبين باجي واعصابي ويريد يشرب اول تالي محمد صح يصادق بنات ويدخن بس ميشرب كتله محمد اشبيك كلي اريد مشروب هسه كتله بسيطه بس خلي ابدل واجي وياك بدلت عالسريع واخذت منه السويج وكتله انت ارتاح اني اسوق بس فهمني شكو.

محمد: شفهمك ولك حلم عمري ضيعته من ايدي ولك اني غبي راحت مني حسنين رادت احجي ابجي انهاريت فقدت اعصابي اني رجال ومتهزني اي شي بس رفيف يمها طفل صغير مثل طفل متعلق بامه هي امي وهي ابويه وهي اختي وكل حياتي هي النفس هي الروح حارت مني واني السبب ولك رفيف انخطبت وعقدت اليوم يعني بعد راحت بس والله مااخلي يلمسها واخذها منه لو اعرف اروح واكله اني حبيبه وعندي علاقه بيها.

حسنين: من سمعت الخبر بسرعه ضربت بريك وهمزين جان الشارع فارغ جان صار بينه حادث كتله عيد شنو يارفيف محمد انت شدتحجي
محمد: ولك حسنين رفيف راحت والمشكله اني السبب وكعدت احجيله كلشي
حسنين: البنيه ماقصرت وياك وتحبك بس انت اشلون ادكوللها هيج ومن رفضتك امها ليش مادخلت اهلك محمد اذا احاجيك هسه تروح تزعل بس تره انت الغلطان.

محمد: اوووف يانار كلبي اكله راحت ادري اني الغلطان اريد مشروب بسرعه لو اسوي هسه كارثه والله اروحلهم للبيت واخذها هسه بالغصب.

حسنين: شفت محمد منتهي اخذته اشترى مشروب بعدها رحنه لبيتنه لان الوضع تعبان وهمزين اهلي نايمين لو ابويه كاعد جان طردني اني وياه عفته يشرب ويدخن ويحجي اريده بس يهدء لحد ماهدء حيل ورحت وصلته لبيتهم ورجعت اني مشي خابرت لعلي اخوه حتى يتلكانه وعفتهم ورجعت همزين بيتنه قريب لان رجعت مشي والدنيا ليل وبارده تكص كص.

محمد: صعدت لغرفتي واني نار بيا بي اريد رفيف طلعت رقمها وكمت اتصل ادري امها يمها بس اريد اريد اسمع صوتها اتصلت اكثر من مره ومحد يرد انرفض كلما اتصل وبعدين انغلق بقيت احاول اخر شي فتحت خط سمعت صوتها اووف ياصوتج عصفورتي هزمي هز بقيت ابجي بصوت
رفيف: فتحت خط واسمع صوته وهو يبجي كتله اشبيك محمد يمعود ليش تبجي منو وياك شصاير بيكم شي بس فهمني مو حركت كلبي حرك عمو وخاله بيهم شي.

محمد: وج ياريت الدنيا كلها بيها شي ولا انتي ولج ليش مو حبيتج حب محد حبه ليش عفتيني ليش رفيف مو اني حمودي حبيبج
رفيف: سمعت كلامه إلى جنت اتمنى اسمعه قبل الخطوبه كتله انت السبب كله من وراك اجيك وكتلك ادكولي تردين اسالج عليه طول عمري احبك وانت تعاملني مثل اختك شفت روحي اني ذابه نفسي عليك ذب كلشي صار من وراك وبعد لتتصل بيها واريد انام عندي باجر دوام باي وسديت الخط بوجهه ودموعي على وجهي تنزل مثل الجمر.

محمد: حقها مالومها على كلشي تسوي لان اني السبب بس هم ابقى ادك اليوم للصبح والله مااخليج تنامين بقيت اتصل وهي ترفض وللصبح
رفيف: بيومها مانمت من وره محمد مخليته للجهاز هزاز وبايدي رحت ثاني يوم للدوام عيوني وارمه من البجي ومن عدم النوم كملت اول محاضره وطبعا الكل باركولي عالخطوبه طلعت وره المحاضره شفت محمد هو وصديقه واكفين منتظريني سلمت وباوعته بعيوني وكلهن عتاب كتله محمد.

صديقه كال امشو بالنادي خلي نتفاهم
كتله شتفاهم وعلى شنو بعد اتفاهم ضربني محمد ضربت العمر وفوك كل هذا جاييني البارحه للصبح يتصل ويكولي احبج من فتحت عيني بالمتوسطه واني احبه وهو مامعبرني وانخطبت وكتله وهو هم ماعبرني مقصرت اني بشي احجي وابجي وهو واكف منزل راسه وبس يدخن...
فارس: حقج وماالومج على كلشي بس دشوفي حاله وج والله يكسر الكلب بدونج يبجي مثل البنات بس يريد يحجي وياج دشوفي ياعيني.

رفيف: اباوع محمد حب عمري إلى فتحت عيني عالدنيا بحبه إلى جان جبل ميهزه ريح وضحكته تارسه وجهه هسه صار ركام رماد ماله حيل يشيل هدومه اوووف ياحب عمري دمرتني بغرورك ودمرت روحك لو بس كايلي احبج والله انتظرك العمر كله مشيت ووكفت قريبه من محمد كتله اشلونك حمودي بصوت ناصي وكله عتب.

محمد: جريت حسره شكت صدري شك كتلها اشلونج تفاحتي حمودي مات ليش هيج رفيف مو اني حبيبك ليش اطنعيني فدوه اروحلج فركشي الموضوع واني وعد احرك الدنيا حتى تصيرين إلى الله يخليج.

رفيف: نزلت دموعي كتله اني الليش لو انت تريد بعد عقد سيد ومحكمه اخرب كلشي ومنو حيقبل وشكولهم وشنو السبب اني بدون اي شي والعين عليا تريد اخرب خطوبه ومعقوده ويجوزون مني ليش ماكتلي بالبدايه تحبني وجنت تدري احبك وجانت عيوني تركض وراك وجنت مهتمه بيك وجنه ندرس سوه ومااعرف اقره الا وياك وحتى اختك روح اسالها اكو ساعه او دقيقه تلاكينه بيها وماجنت انت موضوعنه بنيت بيك احلام وامال تاليها احاجيك ادكولي اني اذا تريدن اسالج عالولد انتي هم اختي شتريد اسوي واشوف حب عمري كدامي متواعد بالجامعه شتريد اسوي واشوف حبيبي إلى فتحت عيني عليه يخابر بنات ويتواعد واحاجي يكولي انتي اختي انت ذبحتني ودمرتني حكمت عليا بسجن مؤبد او بالاحرى مدى الحياة روح محمد اتمنالك الخير.

محمد: اباوعها تحجي ومنفعله وتعاتب بيا ومحروك كلبها وحقها شما تكول وشما تحجي ماالومها اني سبب ضياع حبنه وضياعها اني غبي ماعرفت اتصرف وماحسيت بقيمتها غير من فقدتها اباوع الحلقه بايديها جانت مثل طوق نار ملفوف على ركبتي اوووف ياحب العمر عصفورتي طرتي من عشي ودخلت لعش ثاني بس شحجي بعد واني سبب دمارها ودماري اروحلج فدوه كافي تبجين وتففحين والله كطعتي كلبي مروتج كافي تقربت عليه ولزمتها من اجتفاها وهي تحجي وتصيح اتهسترت اول مره اشوف رفيف إلى جانت نسمه تحولن الى اعصار هزيتها اريدها بس تصحى وهي مستمره واخاف لحد يجي وينتبهه علينه واسببها مشكله وكمت اصيح ولج كافي فدوه اصحي بمعوده احنه بالجامعه كان انتبهت عليا.

رفيف: حسيت محمد يهز بيا انتبهت عليه بس اني ددايخه حيل واحس الدنيا كامت تفتر بيا كتله وخر عني ومااريد اشوفك بعد كدامي هو هم خطيه راح واني كعدت عالمصطبه إلى جانت بصفي وطلعت الفون من الجنطه وايدي ترجف اريد اخابر هدى او اي وحده من البنات بس تجيني لان تعبت حيل وخاف اتخربطت
هدى: ادور على رفيف كلبت الجامعه وهي ماكو كلبي صار نار اتصل عليها مترد بقيت اتصل لحد ماهي اتصلت جاوبتها بسرعه انتي وين وليش متردين.

رفيف: اول مااتصلت بهدى بسرعه جاوبت كتلها الحكي اني وره النادي ودايخه حيل.