رواية شهوات رجل ظالم للكاتبة زهراء أمجد الفصل الخامس والعشرون
بدلت اني والولد ونمنه وكعدنه الصبح قبل ال8 لان هذا برنامج وموعد ريوك وورانه طلعه سبحت وبدلت وكعدت الولد وكالعاده ادفع بيهم ادفع بالذات ميمي هذا كوه ينام وكوه يكعد هالطفل تركيبته غير شكل شالع كلبي بس رغم هذا اموت عليه وعلى سوالفه صبحو عليا وبوسوني وره ماصحصحو وكامو غسلو وبدلتلهم وصعدنه نتريك لكيت ام زهراء هي وبتها دخلت ويايه كعدنه اتريكنه سوه وطلعنه ويه الكروب.
ام زهراء: خاله رفيف البارحه اعتذر خطيه هاي تمرضت وماكدرت اخذج والله انقهرت عليج حيل كلت هالبنيه ولاعدها حظ وين متخليها سوده مصخمه
رفيف: الحمد لله والشكر خاله كلشي بي صالح هاي طلعت هاي الشغله يجوز نروح ونتعب ومنلكه احد لو منحصل شي كلشي يصير رب العالمين اعرف واصلح بي
ام زهراء: الله يفتحها بوجهج ويسعد ايامج.
افترينه ويه الكروب وصار الظهر واخذونه للمطعم واني بالي كله اشوكت ارجع حتى نروح للكنيسه كملنه غده واخذونه للمول اشتريت شغلات اليا وللولد وجنت حزينه على جدو لان ماصارله كم شهر وماما ماقبلت انزعه ويه الاحفاد وره الاربعين كالت انتي جبيره وتبقين بي للسنه اجواء العيد بتركيا جانت كلش حلوه وسفرتنه صارت اول يوم العيد وجاسم كضه العيد كله بالسجن لان حتى لو تنازل فمترهم الا يخلص العيد كملنه من المول رجعنه للفندق كالت ام زهراء.
فوفه بس اذب غراضي واشرب مي وانزلج حتى نروح
ماشي خاله اني هم حصعد اغسل وادخل الجهال للتواليت وانزلج.
صعدت ذبيت الغراض وكملت شغلاتي وطلعت اني وولدي لكيت ام زهراء جوه منتظرتني ودتكلب بالفون مالتها اخذتها وطلعنه سوه حتى نروح للكنيسه اخذنه عنوان الكنيسه من الموظف إلى بالفندق وطلعنه جانت قريبه علينه رحنالها مشي دخلنه جانت الكنيسه كلش حلوه وجبيره ولكيت الراهبات لابسات اسود ومحتشم ولبسهن كلش حلو وتعاملهن بعد احلى بالذات من عرفن بينه احنه اسلام اكو بيهن يعرفن عربي اشويه وافتهم مني اريد البابا الجبير مالتهم راحت وره اشويه اجه واحد متوسط بالعمر وهم يعرف عربي مكسر سالنه شنو اريد جاوبته ابتسم وكال بسيطه بس لازم ناخذ منج معلومات كامله وتقدمين لجوء واحنه من يطلع الجوء ننطيج خبر.
كتله يعني لازم ابقى هنا
اي لازم تبقين لحد ميطلع اللجوء
زين اشكد الفتره ويطلع
مو معلوم احتمال ست شهور واحتمال ست سنوات حسب القنصل إلى تكون معاملتج يمه
زين يعني بيها امل تكمل خلال شهر شهرين
لا متخلص بالسهوله واحتمال ضعيف اي لان انتي منفصله ووضع بلدكم مو تمام واطفالج بحاجه الى تعليم ومعيل ماعندج هذني كلهن نقاط تتسجل لصالحج
اوك يعني هسه اكدر اسجل
اي تكدرين عادي.
اخذو مني معلومات كامله وصور للجوازات مالتنه وسوولي فايل ورجعت اني وام زهراء حايره اشلون خاف ابقى وميطلع اسمي سالت ام زهراء
اكلج خاله بت اختج صارللهااشكد هنا واشكد من قدمت لجوء
صارللها اربع سنوات وهي اول مااجتي قدمت لجوء بنفس الاسبوع ولسه ماطلع هاي مرتين يطلع وتقابل القنصل وتنرفض
يااا ليش تنرفض خاله على بختج خوفتيني
لعد شحسبالج الشغله سهله تره تحتاج صبر وفلوس.
هسه بالله الصبر مو مشكله بس فلوس اشلون اني كل إلى عندي يكفوني شهر شهرين مااكدر اكثر وشغل ماكو اشلون بيا خاله شسوي
والله يابتي ماادري شكلج خاف اكلج ابقي وابهذلج انتي وجهالج وخاف اكلج ارجعي وامج متخرم وتسويلج عزيه ماادري شحجي وشكول
زين خاله اني باجر حدور شغل اسال المترجم واسال الموظفين مال الفندق واشتغل اي شي حتى لو عامله بالمطبخ مال الغندق او اي مطعم مو مشكله اهم شي اكدر اعيش واوفر اكل وسكن لجهالي.
الله يسهلج عمري وتكدرين تواجهين هاي الدنيا وصلنه للفندق كتلها اني حطلع كبل للمطعم اعشي الجهال مابقى شي للعشه بين منكعد ونطلب ونسولف صاير وكت العشه تروحين ويايه
ام زهراء: يلا امشي عالواهس ولو هاي بتي من تشوف مطعم تبدي تتشرط يكلك جايبه ويايه دفتر هنه كوه جمعتهن كم ورقه جبتهن واجيت صدك فوفه عشينه اليوم على حسابج.
باوعتها هاي شحجي وياها هي مدرسه قديمه وراتبها فوق المليون وزوجها موظف قديم بالكهرباءياخذ مليون ونص وتريد مني اعشيها
كتلها خاله تره اني كوه يادوب اجيبها منا وارجعها لهنا اني حايره بزماني المفروض انتي خالتي الجبيره انتي تعشيني
ام زهراء: ها لعد روحو انتو اني وبتي نبقى جوعانين ماعندي اعشيها.
رفيف: بقيت متعجبه عليها وبتها تبجي وتجر بيها تريد اكل وهاي متقبل ادري ماصارلنه يومين من اجينه خلصتي فلوس مدكوليلي شنو صرفتي شو انتي الريوك تاخذين منه هواي حتى للعشه والغده مره عالشركه ومره اشتريتي سندويج شاورما ادري هم لو جايبه ورقه بعدها ماخلصت كتلها براحتكم يلا ماما امشو.
اخذت ولدي وعفتها بباب الفندق هي وبتها تتمالخ يبووو هاي كل الامهات هيج ولكم هذا الضنا شمعزه اني روحي وحياتي وهاي بتها جوعانه ومتقبل
تشتريلها شو حتى علاج البارحه اني دفعت فلوسه ادري اني شعندي هنه كم ورقه دااصرف منهن وحايره اشلون حبقى وصلنه للمطعم تعشينه اني الولد رادو بيتزا وببسي ومقبلات واشوف حمودي خطيه ياكل ويكول ليش جبتي هالكد ماما انتي ماعندج فلوس اشلون اذا خلصن فلوسج.
كتله ماما ربك كريم مينسى عبده عندي خير من الله شتريد اطلب واني اجيبلك
ميمي: اسمعي مامااني باجر اخابر لماما الجبيره واكلها حولينه فلوس احنه خلصنه ونقشمرها وتحولنه واحنه نبقى ونصرف
رفيف: ههههههههه ولك ميمي منين تجيب عالتفكير هذا
حمودي: باعي هذا شديحجي هو احنه جنه هناك محد ينطينه وتحجي على ماما تريدمن سافرنه ماما هذا ابنج اشبي مطفي
ميمي: اني مو مطفي انت مطفي
وبده واحد يحجي عالثاني.
صحت بيهم كافي دخت ولكم اشبيكم خوان يوسف انتو اسكتو للتعاركون تره هسه اعوفكم واهج
لالا ماما سكتنه والله بعد منحجي
اشوفهم واحد ياشر للثاني ودفرات من جوه الكرسي غلست عنهم مااريد اضغط عليهم زايد
كملنه اكل ودفعت الحساب وطلعنه رجعت للفندق وحايره بزماني اخذت المفتاح وصعدت للغرفه دخلت اني والجهال ودخلو هومه يسبحون واني فتحت نت لكيت مسجات من ماما وكالعاده كلام يسم البدن ومتصله عليا كومه اتصلت عليها ردت.
ام رفيف: الو هلو رفيف اشلونج
هلو ماما اني زينه بخير
الجهال اشلونهم كلنه بخير ومرتاحين وخلصانين
احجي عدل رفيف لااجي افرك حلكج مو كبرتي عليا تره اني محد يكبر عليا وتدرين اكبر راس ادوسه بالقندره.
اييي ادري تعلميني بيج عاد انتي والنعم منج متقصرين بس تره مدوم غير لله وحده وكافي جبروت انكسري اشويه تره اني بتج مو عدوتج باجر عكبه منو يوكفلج من تكبرين تره كلها تعوفج شكو واحد يتلولكلج هسه باجر ميدورج لان انتي ماخليتي طيب بكلب واحد صدكيني
اسكتي واحجي عدل اشوكت ترجعون.
ماارجع واعتقد كتلج ماارجع ولو تنكلب الدنيا ماارجع تعبتيني هلكتيني عفتلج العراق كله وهجيت انتي ام بالله متخافين الله مدكولين خطيه بتي اني والوكت عليها ليش فهميني اني بشنو اذيتج شو دومي شتردين اكلج صار وانفذ بدون مااناقش.
اخذتي بيتي وطرديتني منه اني وجهالي وماحجيت كلتي كدام الكل هذا هديه عرسها وبقيتي باسمج وتحت تصرفج ومن كتلج اريده بيتي ماقبلتي وحجيتي عليا ودوم اسمع منج عاله اني مو عاله وانتي امي وغصبا ماعليج تصرفين عليا واذا انتي مو كدها اكعدي كدام الكل واحجي وخلي الكل يشوفولي حل واخذ جهالي واروح لبيت جدي واني بت ابنهم وغصبا عنهم يتحملوني.
ام رفيف: ولج هاي اشبيج انجلبتي ولج غير اني دااسوي كله الج ولولدج ولمصلحتج شعندي غيرج بس انتي ثوله ومتفتهمين
اسكتي ولتغلطين مااسمحلج اني مو زعطوطه اني مره وجبيره ومااقبل لاانتي ولا غيرج يتجاوز عليا ورجعه ماارجع انتبهت على صوت ميمي ديبجي وحمودي يمه يسكت بي كتله ماما روحي اريد اشوف هذا اشبي يبجي
ام رفيف: ولج منو هذا اليبجي احجي لتسدي هذا حمودي لو ميمي
لا ماما ميمي اشبيك حبيبي ليش تبجي.
اريد ماما الجبيره احجي وياها مشتاقلها
اي وعلى شنو هالبجي اخذ الفون وحاجيها شكو كاعد تنوح
الو هلو ماما
هلو حبيبي ميمي اشبيك تبجي بعد عمري احجي منو وياك رفيف هسه اطيحلك حظها
لا بس فلوس ماعنده ماما كالت خلصت واحنه اشلون بعد ناكل ونشرب منين نجيب حبابه دزينه فلوس
يابعد كلبي تريد فلوس كافي ولك تبجي عيونك راحن موزين عليك تبجي وتفرفح الله لايوفقج رفيف.
اخذت الفون من ميمي دعوتج واصله عيني رحوبه ماكو داعي هو الله مطيح حظي من زمان لتدعين عيوني انتي وهاج صخيمي شمرته الفون على ميمي وعفتهم وطبيت للحمام بقيت ابجي اشويه وسمعت حمودي يدك بالباب غسلت وجهي وطلعتله
ها حبيبي شكو
هاج ماما كملنه خابرناها بس لتبجين حبابه
لايروحي مداابجي غسلت واجيت.
لاماما عيونج حمره تره اني كوبريت ( كبرت ) وصيريت ( صرت) افتهم واعرف كلشي لتضوجين ماما اني هسه اكبر واشتغل واجيبلج كومه فلوس
اجه ميمي يركض عليا وهو سمين وشعره ثخين وطويل ماما باجر كالت ادزلكم فلوس ماما لتضوجين احنه نبقى هنا والفلوس تجي انتي لتشتغلين انتي خطيه احنه هسه نصير كبيرونين وتشتغل اني واخويه مو صح حمودي
اي صح اخويه يلا ماما كافي تبجين حبابه والله احنه نحبج ومنريد بعد اي شي لان انتي ماعندج.
لا يروحي منو كلكم ماعندي حضنتهم وبقيت ابوس بيهم احس روحي ملكت الكون بحضنهم
ام رفيف: سديت الفون من رفيف كسرو كلبي جهالها وبال ات ميمي اني مربيته الله لا ينطيج يارفيف شكول وشحجي عليج قاطعت افكاري زهره
زهره: ها جنتي تخابرين رفيف مو كتلج لدزيها ركبتي راسج الا ادزيها حتى تشتغلين براحتج هنا مو كتلج بتج مو سهله عانديتني وهاي النتيجه راحت وبعد مترجع.
الحجيه: جنت بالمطبخ داشرب جكاره وسمعت زهره ورحاب ديحجن على رفيف رحت بدون ميحسن وبقيت اسمع صخام بس لا رفيف صدك بعد مترجع الله لا يرضى عليج يارحاب شردتي الطفله.
ربي رجعها هاي طفله وين تروح طبيت للغرفه ولج رحاب ارتاحيتي هسه من شردت البنيه شنكول وشنحجي كتلج موهيج تعاملها البنيه تحبج وماعدها غيرج كافي إلى دتسوي بيها لاانتي وهذاك الكواد وانتي ولايفيد بيج الحجي هيج احسن يبومه دكليها وابقي ندبي حظج وكولي ماعرفت اربي ولح بتج بالف رجال بس انتي عفتها البشر وانطيتها بايد حيوان ولج ليش هيج مو يتيمه ماخفتي الله خابريلياها هسه اني احاجيها بقينه نتصل على رفيف كومه ومترد لان مافاتحه هذا المدري شيسمونه كتبت امها الها ماادري شنو وكالت هي من تشوفه تخابرنه.
رفيف: بقيت الوج الليل كله اذا بقيت هنا منين اعيش لازم باجر ادور شغل واني بركبتي 2 مو وحدي ماطلعت اللجوء بعد سنه هذوله شنو اوكلهم واذا رجعت بعد كم شهر مااضمن جاسم ماطالع من السجن ويشتكي عليا ويتهمني بخطف الجهال ربي ساعدني الكه شغل حتى ابقى مااريد ارجع.
بقيت اتكلب يمنه ويسره كوه كدرت انام كعدت الصبح على صوت المنبه وكالعاده مثل كل يوم لازم احنه بالثمانيه بالمطعم نتريك حتى تسعه او تسعه ونص طالعين ماادري شنو سالفه هالكروب المغبش شجاهم ماادري ياخذونه ركض ويرجعونه ركض اشبيهم مااعرف كملت تبديل اني وجهالي وتريكنه ونزلت للرسبشن سالت الموظف اكو عمل عدهم او يعرف احد يحتاج موظفه حتى لو غساله ملابس اي شي بس اهم شي اكدر اعيش اني وجهالي كال بسيطه اشوفلج جماعتي وارجعلج خبر تشكرت منه وطلعت ويه الكروب سالت المترجم إلى بالكروب.
المترجم: اختي الشغل هنا صعب يتحصل وساعات العمل طويله وبالذات احنه العرب يشغلونه شغل متعب حيل وبراتب قليل وانتي وياج اطفال 2 ماانصحج تبقين.
رفيف: مشكور خويه رحمه الله والديك عفته ومشيت اووف ياربي اشلون بيا الاهي مروتك طلعني من هالمحنه انوب هاي ام زهراء اليوم كابله وجهه عليا وكوه تسلم مدري اشبيها وعافتني اني وجهالي بالشلالات ورحنه مناك لحديقه الحيوانات وهي تمشي وين بتها بس سلمت وفاتت عادي تعلمت عالبشر كلها مصالح بقت على هاي الغريبه عود كيفت وكلت لكيت احد يوكف ويايه كملنه الشلالات وصار غدانه بالشلالات وطبعا كعدت وحدي اني وجهالي معليا باحد صارو هومه اولادي واصدقائي واهلي وناسي صح ربي حرمني من كلشي بس عوضني باثنين ورود كملنه حديقه الحيوانات وجانت محلوه والجهال تعبو ا حيل وضاجو رجعت للفندق اخذت المفتاح مال غرفتي وسالت الموظف بلكت لكالي شغل.
الموظف: ست لحد الان مالكيت اي شغله احتمال متحصلين شغل بسهوله
رفيف: يعني اشكد انتظر حسب معرفتك
الموظف: احتمال يوم واحتمال سنه هذا رزق مامعلوم واحتمال الشغل إلى تلكي ماتبقين بي فتره طويله يعني الاعمال بصوره عامه مو ثابته.
رفيف: اها اوك شكرا اخذت المفتاح وصعدت ومالي خلك كلشي اسوي حرت وحيرني زماني باقيه بين نارين مدري ابقى بس اذا خلصت فلوسي وهذوله اثنينهم دوام منين اجيبلهم مصاريف لمدارسهم واذا رجعت يتلاكني اعصار وسيول.