قصص و روايات - قصص رائعة :

رواية شهوات رجل ظالم للكاتبة زهراء أمجد الفصل الثاني

رواية شهوات رجل ظالم للكاتبة زهراء أمجد الفصل الثاني

رواية شهوات رجل ظالم للكاتبة زهراء أمجد الفصل الثاني

جمعنه الشوك، عفت محبوب، يمته يرد هل غالي
ترك صوره، ترك ضحكه، بحبه ذاب دلالي
بدمع انعه، واريد اسعه، لحد ماتنكطع انفاسي
وين الكه، بعد منه، لو ادور للتالي
علم لفه، تراب ضمه، انوح والطم لحالي
سهر باقي، عل مصابي، ضليت اني ووهامي
بسوالفنه، وبضحكتنه، ادعي يحفضه العالي
بطلعتنه، وبلمتنه، يفرح ابويه والباري
كلبي انفطر، ضلعي انكسر، بخبر موتت الغالي
هذه اخي، حزام ضهري، من انكطع انهدم حيلي
دعيت الله. بس ترجع ليه.

جاسم: امشي وهي تمشي سريع اريدها بس توكف شو هاي طايره وتحاجيني وعافتني ومشت بس اخذت كلبي وعجبتني حيل وبالذات شفتها مو سهله رغم رفضها هم مراح اتركها ارجعها باجر وبعدها لحد مااجيبها للطريق
رفيف: رجعت واني ضايجه حيل واحس جسمي كله نار واحس شرار يطلع من وجهي من وره هذا الطويل البطران
هدى: الو
رفيف: - الو هلو حبي هدو اشلونج.

هدى: عوفج مني شلوني مالوني تعالي احجي اشبيج حبي اليوم طايره شفناج وهذا منو الصاك إلى اجاج للقسم اكو حب جديد ومندري
دنجبي لج يانعل هو هذا مال حب دشوفي جنه برج ايفل شطوله وثاني شي مبين ملعب ويريد علاقات واني كلبي انقفل وراح لمحمد وبس...
هدى: ولج والله حلو اشبيج شاب واجه وحاجاج انطي فرصه ياعمري تبقين عايشه على ذكريات الى متى وانتي تدرين بمحمد ميفكر بيج.

: اخذت نفس طويل وتنهدت بحسره احسها طلعت من كلبي وقسمته نصين احبه هدو مو بأيدي شسوي إذا حضي منعوا سلفه سلفاه حظي هيج مااكدر اكمل طريقي ويه شخص وكلبي يم غيره وثاني شي. محلو ماعاجبني نطقته متعجرف...
هدى: الله كريم إلى بي خير يقدمه رب العباد من رخصتج حب باي
باي حبي.

سديت التلفون من هدى وبالي يم هذا الطويل اشلون اخلص منه اني ويني هالسوالف وين والله اذا تدري ماما الا تذبحني وتذبني بالشارع كمت رحت لغرفتي واني ببالي اشلون هذا ليروح يسويلي مصيبه واني يامستوره انستري قاطعني صوت ماما...
رحاب: رفيف اشبيج ماما شو صافنه بيج شي اكو احد مضايقج بالدوام احجيلي وضعج ماعاجبني
لا عمري ماما ماكو شي اطمني بتج بعشر رجال وبكلبي اكلها بتج رجل الدجاجه متحلها اجبن من إسماعيل ياسين...

رحاب: لعد اشبيج سارحه وضايجه ومدخنه من رجعتي لسه عيونج تحجي اكو شي كوليلي اني امج وصديقتج...
: انتي عمري وكل حياتي بس صدكني ياماماتي ماكو شي بس تعب الدوام ومحاضرات للساعه 3: 00 واني مامتعلمه والوضع بالدوام كله احزاب ويضوجون مني لان بلا حجاب...
رحاب: ممنوع تلبسين حجاب لان ادري بيج متحبي الا تقتنعين بي يالله افتهمتي ومعليج بأي حجي واذا احد اذاج كوليلي اطيح حظه شعندي غيرج يلا حبي كومي اقري.

باوعتها بصدمه وفتحت عيوني منين اجه هالحب والحنيه اول تالي تعلمت عليها تصيح ومتعصبه ومتتفاهم كتلها ماشي عمري عفتها ورحت لغرفتنه اني وياها حتى اكعد اقره
كعدت ثاني يوم ساعه سبعه ابين مااغسل وابدل لان الخط يجيني ساعه سبعه ونص
رحاب: رفيف بنتي تردين ريوك هذا الجاي صاير
لايووم مو تدرين بيا مااتريك الا عالعشره الصبح مااشتهي اني طالعه الخط بالباب باي ماماتي وشمرتلها بوسه بالهوا
رحاب: الله وياج حبيبتي.

رفيف: - وصلت للكليه واحس بيها صارت كابوس من وره جاسم التحفه امشي واتلفت خاف يجي واحد يشوفني ويوصل خبر لماما عندي شي وتجيني تهمه بدون سبب وصلت للقسم والحمد لله ماموجود
هدى: صباحوو حبي اليوم وجهج مورد خاف وكعتي بالحب ومحد سمه عليج
رفيف: - لا ليش مامن السطح مو احسن قصدج وجهي مصخن من القهر جوزي عني ياحب هذا وهاي تاليها ويه ابو طويله هه
هدى: وج اشبي والله شكله زين ومبين مرتب انطي فرصه خطيه ولج.

رفيف: اكلج اذا هيج عاجبج اخذي الج بالعافيه
هدى: عابت موصوجج صوج إلى ديسوي براس حظ وينسيج محمد...
رفيف: تنهد وجريت حسره بقهر اوووف ياريت اكدر انسى ولو لحظه...
ومر شهر كامل وبدينه بامتحانات الكورس الثاني واشوف جاسم يجي بس يوكف يراقبني من بعيد لبعيد ويروح وكمت اتضايق منه حيل وقررت اروح احاجي واكله ابتعد عن طريقي...
ايمان صديقه جاسم: مرحبا رفيف ممكن احاجيج خمس دقايق على انفراد...

رفيف: جنت واكفه بالسنتر اني وهدى ونور واجتي بنيه مرحله رابعه مااعرفها سلمت ورادت تحاجيني وحدي ردت السلام وكتلها احجي محد غريب صديقاتي هذني...
ايمان: ميخالف حبي اريدج وحدج
: يلا مو مشكله مشيت وياها بعد مسافه عن البنات كتلها اتفضلي اكو شي
ايمان: شوفي عمري ادري بيج انتي خوش بنيه واخلاقج كلها تعرفها بس اكو ولد معجب بيج ويريد
قطعتها ممكن تسدين هذا الموضوع ومااريد ارتبط باحد واني جايه لغرض الدراسه وبس.

ايمان: ادري رفضتي بدون متعرفين هو منو
ميهمني منو ومااريد اعرفه اصلا من وخصتج عندي محاضرات
اوك براحتج
وكل يوم اداوم بي وجاسم اشوفه وين مااروح والي صار بعد اسوء كام يتصل عالموبايل مالتي وحظرته وكام يتصل من ارقام غريبه كومه واضطريت اغير رقمي واستمريت على هذا ومااعرف منين ديجيب رقمي واضطريت اغير 9 مرات الخط مالتي وبيوم 18/4
جاسم: رفيف بس اسمعني الله يخليج حجايه وحده وروحي.

رفيف: جنت طالعه من القسم وصار بوجهي جاسم وبقى يلح ويتوسل حتى اسمعه وكفت كتله احجي فضها اريد اطلع...
جاسم: اني احبج واول ماشفتج دخلتي كلبي ومزاجي ورايدج والله بحلال الله انطيني فرصه خلي ادز اهلي وشوفي واسالي والله احبج شكلتي هسه
شوف يبن الناس اني مو مال علاقات عندي بيت اهل وباب والي يريدني يدك بابي ولو اقبل او ارفض هذا حسب قراري وقرار اهلي واريد اروح باي
جاسم: ماشي اتفقنا باجر اهلي يمكم باي.

سمعت كلامه واني متاكده منه جذاب ومراح يدز احد بس ردت اخلص منه
وباليوم التالي العصر
ام جاسم: جاسم يلا فضنه حتى نروح نفض سالفه الخطوبه إلى طالع بيها والف مره كتلك اني هاي بت الكليه مااريدها اريد بت اختي بس انت اووف منك كاتل روحك عليها
جاسم: يمه رحمه لابوج كتلج بت خالتي مثل اختي مااحبها اريد رفيف والله يمه حلوه وتخبل.

سعديه: عوجت حلكي اممم ميحبها اشبيها اقلها اعرف اصلها فصلها مو هاي بت الكليات مدري منين مامنين تريد تلفيها عدنه واذا ماارخذت انت بت خالتك اختك مراح تتزوج ابن خالتك لان مااخذت اخته
جاسم: يمه الله يخليك والله مااحبها واذا هو يحب اختي فيتزوجها حتى لو اني مااخذت اخته
سعديه: يلا امشي صيح ام جبار جيرانه كتلها تجي ويانه هي وبتها.

جاسم: طلعت جبت تكسي لامي وجيرانه ورحت لبيت رفيف وكلي امل بموافقه وزواج وثاني شي رفيف فوك ماحلوه ونازكه امها عدها فلوس يعني اذا وافقو بيا اعيش بالجنه
واطلع من فكر اهلي وصلنه بيت اهلها ودخلن النسوان واني بقيت بره انتظر الرد
رحاب: جنت بالمطبخ اندكت الباب طلعت اشوف منو دخلن نسوان 3 مااعرفهن سلمن ورادني بس اني مااعرفهن بس توقعتهن خطابه دخلتهن ورحت صحت رفيف.

رفيف: رجعت من الدوام جنت دايخه وتعبانه وفرحانه هم لأن مشفت الغثيث جاسم وجه الفكر فرأسن بدلت ونمت حسيت ماما فوك راسي تكعد بيا.

رحاب: اكعدي رفيف اكعدي يمعوده اشكد تنامين ادري دجاجه وهلكد تنامين غير تكعد وتفضها اشوفها حست وفتحت اشويه عيونها ايي همزين كعدت ولج اكعدي اعتقد جايين خطابه عليج كومي غسلي وجهج عالسريع وتعدلي وجيبي الضيافه مو تتاخرين وبدلي شي حلو بس اكو وحده ويه النسوان تخوف جنها ميساء الساحره إلى بافلام كارتون رايحه معظمه ههه.

? ام جاسم: وره مادخلنه للصاله شفت بيتهم حلو ومرتب وجبير طابقين والتخم والستائر والعز كلت هاي تفيد لازم اخذها لابني حتى يعيش بدلال عفيه عليك يجاسم هسه انت ابني صحيح بس اريد اشوف ست الحسن عاد تسوه وتستاهل لو زركه وبختها كاعد لان ادري بابني اثول ومابي حظ كاعده وصافنه واباوع يمنه ويسره ودخلت امها
رحاب: اهلا وسهلا اتفضلو امر خدمه منو حظرتكم.

ام جبار: اهلا بيج خيه والله احنه جايكم وبشغله وان شاء الله مكضيه ههه
رحاب: خير تفضلي شنو هي الشغله قاطع كلامي دخول رفيف وهي تسلم.

رفيف: وره ماكعدتني ماما طبعا كمت كوه اجر بروحي نعسانه والنومه بعيوني غسلت وجهي عالسريع وفرشت اسناني ورجعت للغرفه فتحت الكنتور حتى اشوف شي البسه طلعت قميص شيفون وردي وبي زخرفه بيضه ووياه تنوره وردي ومشطت شعري وتعطرت ورحت للمطبخ حظرت الضيافه واخذتها ودخلت للصاله جانت ماما دتسولف وياهم سلمت وبديت اقدم للنسوان جانت اكو بنيه تضحك بس مبينه ضايجه وتباوعلي من فوك ليجوه والثانيه مره جبيره بس مبينه كلبها طيب وحبابه والثالثه معظمه وتخوف كلت بكلبي عزه بس لا هاي ام الولد وكوه كتمت الضحكه.

ام جاسم: ام جبار احجي انتي اني مااعرف احجي وابتسمت
ام جبار: عيني ام رفيف انتو خوش ناس وسمعتكم الكل يحمد بيها واليوم احنه جايين خطابه وطالبين ايد كريمتكم لابن ام جاسم جاسم هو خوش ولد وحباب وماعنده سوالف مكسره ويخاف من الله ومتخرج ومتعين.

رفيف: اني من كالت هيج بقيت مصدومه اووع هو اله اني مامتحملته انوب امه تخوف حتى نور محمد ماكو بوجهه وفوكاها جايه ويه جيرانهم لان اهلها بالنجف ومالحكت تتصل بخواتها حتى يجون وياها للخطوبه واني صافنه ومصدكه وكلبي يدك كل قوته فزيت على صوت ماما وكلامها إلى جان بالنسبه إلى مثل فريق انقاذ من موت محقق
رحاب: والله كلشي قسمه ونصيب بس البنيه بعدها صغيره وماانطاه هسه الا تكمل كليه.

ام جاسم: عادي ام رفيف تكمل عدنه البنيه هسه بس خلي نقره الفاتحه ويلبسون حلقات والباقي خلي حتى لو بعد سنه
رخاب: لا اعذرونه مااكدر انطي بتي وهي بهيج عمر بعدها صغيره
ام جاسم: والله احنه جايكم وكل املنه ناخذ موافقه والولد خطيه واكف بالباب منتظر ومكيف ومتحظر من الصبح.

جاسم: همه دخلو وبقو جوه واني الوج بس اريد افتهم ليش هلكد بقن بس اكيد اهلها وافقو واكو خيط امل انو هالبنيه إلى اعتبرها كنز سليمان بالنسبه إلى حتصير زوجتي وام اولادي إلى حيربون بعز ودلال وواكف وكتلني الحر سمعت صوت نسوان كلت يالله بلكت خير
ام جاسم وام جبار: احنه نترخص وكلشي قسمه ونصيب ونتشرف بيكم وطلعنه منهم وصلنه للباب وطلعنه.

ام جاسم: طلعت واني فرحانه لان ماقبلو وراح اخطبله بت اختي اقلها اضمن ابن اختي ياخذ بتي ومقهوره لان هاي فرصه وكنز تنقذ ابني من الفقر واخلص منه ومن عرسه واذب كلشي براسهم باوعت جاسم اجانه فرحان ويضحك تقرب علينه
جاسم: واني اضحك وفرحان اباوع وجي امي ميبشر بخير تقربت عليها ها يمه بشري.

ام جاسم: ماقبلت امها معانده ادكول بعدها صغيره هسه انت شكاتل نفسك عليها شو شايفه روحها شوفه ومتتحجه بس سلمت وكعدت لاحجت ولا شي وحتى محلوه بت خالتك احلى
ام جبار: لا خيه البنيه تخبل ومبينه فقيره وحتى مالها حس طبينه وطلعنه بس سلمت وكاعده ناصه حتى ماشالت راسها بس مبين امها صعبه والحل والربط كله بايد امها
جاسم: تنهدت وكلت الله كريم اجيبها للطريق واخذها حتى لو بالغصب مااتنازل عنها لو اموت.

ام جاسم: طول الطريق وجاسم بس ساكت ويدخن جكاير وحده فوك الثانيه وعصبي كتله يمه كول يالله قحط بنات إلى خلقها ماخلق غيرها
جاسم: يمه اسكتي لخاطر ربج
رفيف: طلعو واني فرحانه خلصت من هذا البومه جاسم رحت شلت الضيافه ورجعت كلشي لمكانه ورحت لماما بوستها وشكرتها لان رفضتهم واول مره احس ماما صدك تحبني وتريد سعادتي بس دوم الراحه والسعاده مدوملي ليش ماادري
اتصلت على هدى
الو هلو حبي هداوي.

هدى: هلو عمري اشوفج فرحانه احجي بسرعه وفرحيني وياج
رفيف: مو جاسم التحفه اليوم دز اهله وتوقعي شصار
هدى بتفاجأ شنوووو عيدي ماسمعت
: وجع كلام الملًوك لا يعاد مثل ماسمعتي ابو طويله اجه اليوم ههههه
هدى: شوفي مو كتلج انطي فرصه الولد يحبج ودز اهله شتردين بعد واكيد اكو موافقه ولهذا فرحانه.

: هههههه والعكس صحيح ماما رفضتهم واني فرحت حيل وج امه تخوف جنها وحده جايه من مجاعه افريقيا هم لو تشرب بس مي تسمن العبايه لابستها كانهه تمشي العبايه بدون بشر ههههههههه
هدى: خرب عرضج وكت تحشيش بس ليش رفضتو خطيه الولد جايج من الباب
: اكلج تره هذا رصيد مو مال شهيد ولاارضي حتى كاعده تلغين وماخذه راحتج يلا ولي باي ههههه
هدى: عابت دومج تقصفيني يلا باي.

: رجعت لغرفتنه طايره من الفرح هم وانزاح من كلبي كعدت قريت وتعشيت ونمت وكعدت ثاني يوم هم الروتين مال الدوام وجاسم ماشفته فرحت حيل.

وخلصت السنه الدراسيه وبدينه بالامتحانات مال الفاينل وجاسم من يوم الخطوبه اختفى وحتى اتصال ماكو امتحنت وكملت واني خلال هالفتره كرست بالي وطاقتي كله للدراسه اريد انجح لان عندي ماده السعي مالتي بيها ضعيف الاستاذه جانت دوم تنتقدني لان بلا حجاب واني مغلسه ومامعتبرتها فطلعت قهرها بالسعي وكملت الامتحانات واني متاكده روحي حطلعني هاي الغضب اكمال واجه يوم النتيجه ورحت استلمها.

كعدت الصبح غسلت وفرشت وشربت بس جاي ورحت داابدل لان اليوم النتائج وادري بروحي وحاسه اكمال لان هاي مراح تجوز عني رحت للغرفه لبست قميص سمائي وبي ضربات بيضه مديله ضيق وللخصر ولبست وياه تنوره بيضه بنصل وبيها جاكه من وره وحذاء وجنطه سمائي ومشطت شعري ورحت للجامعه وصلت وسلمت على صديقاتي ودخلت للقسم حتى اسلم النتيجه وفعلا طلعت اكمال انقهرت حيل وطلعت ابجي ورجعت للبيت واني مدمره والطريق كله دموعي ماوكفت وواعدت نفسي انو اتحداها وانجح بالدور الثاني. وصلت للبيت.

رحاب: ها اشبيج ماما ليش تبجين راسبه احجي ولج وكعتي كلبي اشبيج
: ابجي واحجي ويه ماما لا ماما اكمال من وره هاي الاستاذه مو كتلج مراح تجوز مني الا اتحجب وشوفي النتيجه
رحاب: مو مشكله عندج دور ثاني وكلشي يتعوض الحمد لله بس درس سهله.

اي مو دادرس طبيه هم تربيه وهم اكمال ربي فرجك ودموعي تنزل واشهك وابجي دخلت بسرعه للغرفه وقفلت الباب مااريد اشوف احد وقررت من باجر ابدي اقره واعيد الماده حتى انجح بعنادها ومرت عليا العطله جحيم ونفسيتي تعبت حيل والي صار ماما تمرضت صار عدها حصوه بالمراره والتهاب بالكبد وتحتاج عمليه وبقيت شهر كامل احنه نعالج ماما صح عمليتها نجحت بس جانت صعبه حيل بقت بصاله العمليات اربع ساعات واني انهاريت ابجي وادعي ربي يرجعلي ماما لان ماعندي غيرها بالدنيا رغم قسوتها وظلمها بس ميخالف تبقى امي عزيزه كلبي وكانت عمليتها فوق الكبرى والحمد لله نجحت العمليه وبدت تتحسن ماما ورجعت ادرس وقبل الامتحان بيوم جنت تعبانه ومرهقه من الدراسه والقلق كلت انام ساعه واكعد اقره.

َرحاب: اكلج زهره اشو شفت حلم مزعج هسه واني نايمع الظهر
زهره: ياستار احجي يمعوده شنو شفتي
رحاب: اشوفج انتي بالحلم لازمه بطنج وتلوجين واجيتج اني كلتج اشبيج تلوجين كتلتلي بطني حموت ولازمتها من الجهه اليمنه كتلج شو خلي اشوفج خاف زائده دوديه ونومتج عالجربايه وخليت ايدي عالوجع ورفعتها بسرعه وانتي صحتي من الوحع كتلج هاي زايده ولازم عمليه وفزيت من الحلم.

زهره: ياستار مروتج رحاب اني بيا ربو مو مال عمليات وبنج عفتي الامه كلها حلمتي بيا
رحاب: اي هو حلم شمدريني اني افوت اكعد رفيف خطيه باجر امتحانها كالت ساعه وكعديني كمت للغرفه فتحت الباب حتى اكعد رفيف وجان اشوفها
رفيف: دخلت ماما واني كاعده الوج ماكدرت انام غير ربع ساعه بطني احسها دتموتني الم مغص مااعرف شنو السبب دخلت للغرفه واني افتر ولازمه بطني.

رحا: - دخلت وشفتها نفس ماشفت زهره بالحلم عصرني كلبي ربي رحمتك وكلشي ولا بتي صح اني اعصب عليها وساعات اكول لو ماجايه هي وابوها باقي بس مو معناها يصير بيها شي هاي إلى طلعت منها بالدنيا كلها حاجيتها اشبيج رفيف شو تلوجين شكو ماما احجي تقربت عليها واني داخلي يرجف بس لا إلى ببالي صحيح.

ماما فدوه كعدت من النوم وبطني مغص قوي ذبحني اريد شي يوخر الوجع باجر امتحاني مو وكتها اتمرض هسه وكمت ابجي بس خلي امتحن وعسى مااموت مايخالف
رحاب: - تقربت عليها مسحت دموعها لا ماما اسم الله عليج لدكولين هيج طز بالدوام والامتحان ولج بس لازائده ولازم عمليه زهره يمه تعالو هاي رفيف متخربطه الحكي
دخلت زهره وامها: هاا شكو احجي رحاب رفيف اشبيها.

رفيف: بطني دتوجعني وباجر امتحاني فدوه اريد اي مهدء حموت من الوجع وافتر بالغرفه احس احشائي تتكطع منحنيه ماكدر ارفع روحي
الحجيه: هسه وكت امتحان منو مات واخذ شهاده وياه دكومي اخذج للطبيب حتى نشوف شنو العله.

رحاب: يمه هاي بيها زائده اني حلمت واخاف من احلامي والنتيجه تحقق الحلم هذا إلى جنت خايفه منه وتحقق ببتي وحيدتي الماعندي غيرها وكمت ابجي راحت امي ورفيف يبدلون حتى يرحون للطبيب واني بعدني مريضه وعندي فتره نقاهه وكلبي كله يم بتي ادك عليهم كالو حولونه سونار الدكتور شاك زائده ومرت عليا الساعات كانهه سنين بس اريد بتي ورجعت رفيف وامي واني واكفه بالطرمه بس اريد اعرف النتيجه.

رفيف: وره ماحولوني الدكتور عالسونار رحت اخذت سونار وكالت ام السونار انو الزائده متبين بالسونار وانما تبين بالفحص السريري هنا اسودت الدنيا بوجهي رجعت للدكتور بلكت يهدء الوجع بابره او مسكن بس لباجر امتحن وشيريد يصير خلي يصير ودخلت للدكتور واني يائسه.

الدكتور: والله مثل ماتوقعت بيها زائده ملتهبه ولازم عمليه فورا وعدها بعد كيس عالمبيض الايمن هم لازم ينشال حكتبلكم دخوليه مستشفى الفيحاء واني وره مااخلص عياده اروح للمستشفى لان وضعها حرج جدا
الحجيه: دكتور ماكو علاج شي الا عمليه؟
الدكتور: للاسف لا.

رفيف: - اني هنا انهاريت انتهيت اتحطمت يعني راحت مني سنه ثانيه وهم السبب المرض بس هالمره اني المريضه مو ماما رفعت راسي للسما كتله ليش ياالهي عطله كامله مامرضتني بيها الا اليوم وبهل الليله رحمتك ربي تعبت والله اخذنه تكسي ورجعت اني وبيبي والطريق كله دموعي مانشفت خايفه من العمليه من جهه ومن جهه ثانيه حلمي بالنجاح اتحطم وصلنه للبيت واني مانشفت دموعي ولا ثانيه تلكتني ماما كتلها حظري جنطتي مثل ماكلتي ولازم هسه عمليه.

هنا ماما اشوفها فقدت اول مره اشوف ماما هي تلطم وتبجي وتدعي ربي وتشكيله ماانكر موقف ماما اشلون اتهسترت بحيث خالاتي 2 وبيبي لازميها وهي تلطم على وجهه وتبجي وادكولي رضيت بكسرتي وعافني وعافها ابوها وكلت قدر ومكتوب ربيتها واني اشوفها كدام عيني تحلى وتكبر وكلت ربي عوضتني بيها وصارت بت مهدي إلى حتشيل اسم ابوها بس مال ترجع تاخذها مني وره ماصارت عروسه ربي كلشي ولا بتي اني اسمعها وابجي واكلب البيت كله بجي ونوح ولطم وخالاي كلهن اتجمعن خلال دقايق لان كلهن بيوتهن بنفس المنطقه وكلها التمت واني ابجي واكلهم راح الامتحان مالتي جانات ساعات صعبه حيل من تشوف احلامك واحد وره الثاني ينكسر ويخرب تتمنى الموت اجه زوج خالتي واخذني اني وبيبي والفحوصات مالتي لجماعته هم دكاتره وبدة ابداعاتهم كل واخد يحجي شكل رجعت ساعه 12 واني الوج من الالم وحتى الماده طارت من دماغي وقررت مااسوي عمليه.

رحاب: ماما عمري باجر هم احجزلج يم غير دكتور وبلكت الله ماكو شي دنامي مو شبعتي بجي وراج امتحان يابنتي وبوستها واني نايمه بصفها لان من راح ابوها وهي كامت تنام بمكاني واني انام بمكان ابوها.

رفيف: بوستني ماما وحضتني وهي هم احسها تريد تبجي بس تكابر كدامي حتى تنطيني القوه نمت بس شايله هم للامتحان باجر وكعدت ثاني يوم ورحت للامتحان واني بطني الم يذبح واكابر واجر النفس كوه واجتي الاسئله وهذا الشي إلى ماجنت حاسبته ابد اباوع عليها عباره عن 30 سؤال بس الجواب مالته استنتاجي بكلمه وحده او خطوه وحده وترك فقط نقاط 2 يعني لو اموت ماانجح صارت هوسه القاعه وحاولت اجاوب وادري بروحي حرسب لان البارحه جان عندي عزه بدون جنازه ولحد الان بطني توجعني كتبت اشلون مجان وطلعت رجعت واني دموعي مانشفت والكل جان يواسيني اهم شي صحتي وسلامتي كلشي يتعوض ووين متوصل خلي توصل حتى ماما صارت كلش حنينه عليا وماخلت دكتور مااخذتنه اله وكان جوابهم عمليه اخر شي سلمت امري لله ورحت سويت العمليه وبيومها كان اكو انفجار قبل عمليتي بيوم والمستشفى مكلوبه كلها جرحى وشهداء تخيلو النفسيه اشلون صارت واني اشوف عوائل مسبيه إلى يبجي على ابنه والي تبجي على ابنها والي تبجي على زوجها والي يبجي على ابوه او اخوه واني ابجي على حظي العاثر وتمنيت بابا الله يرحمه واكف يمي رغم وجود ازواج خالاتي وخالاتي وحتى صديقتي واخوها إلى جان مثل اخويه اعتبره هم اجوني واني اباوع بالوجوه واتمنى بابا وياهم توكلت بالله ودخلت سويت العمليه بس جنت خايفه حيل وجنت اتمنى بابا يمي.

رحاب: من صاحو اسم رفيف وكالو دخلوها للصاله روحي وكلبي اخذوه وياها اباوعها وهي رغم حزنها وقهرها ودموعها إلى حاصرتهن كوه مبتسمه وتعدل بظفيرتها وايديها الثنيه بجيب بجامتها وتمشي وادكولي لتبجين ماما اني اشويه واطلع اندعيلي اكوم بالسلامه اخذوها مني دخلت للصاله وذبت حذائها بباب الصاله وراحت بقيت اباوع خيالها من الجامه مال الصاله لحد مااختفى الخيال شلت حذائها وكعدت بالكاع ابجي اريد بتي إلى ربيتها وينك مهدي تعال شوف حال بتك مو هاي إلى جنت تبوس اول حذاء الها مو هاي إلى جنت تبوس وتشم رجليها وملابسها اوكفلها واندعيلها ادكوم بالسلامه ومر الوقت ورفيف جوه واحنه كلنه موجودين والجو متوتر حيل إلى كاعد يقره قران والي كاعد يدعي والي كاعد يبجي وكانو رفيف صارللها سنين بالعمليه واني كاعده بباب الصاله طلعت الممرضه.

الممرضه: منو اهل رفيف
كمزنه كلنه كالت
انطوني الجرجف مالتها كلمت وحنطلعها. هنا كمز اخو صديقتي اخذ الجرجف ودفع الممرضه وركض ليجوه.

همام: من كالو خلصت رفيف احس روحي رجعت لان جنت اشوف رفيف مثل اختي ربت ويانه جانت كل كم يوم هي يمنه من هي باول متوسط صديقه اختي ولحد ماصارت بالكليه حتى مرات تبات يمنه او اختي تبات يمها هي الصديقه الوحيده لاختي والي اعزها مثل اختي اخذت الجرجف ودخلت للصاله واسمع ورايه كلها ادكول اوكف ممنو واني مادريت بال الهم اريد بس اشوف فوفه ام ضحكه الحلوه اشلونها وشفتها عالسديه نايمه جنها ملاك وتون غطيتها بايدي ماردت يطلع من جسمها شي رغم انو هي لابسه بجامه ستن وكلها دباديب صغار باوعتها اووف يافوفه مكتوبلج بس القهر نزلت دمعتي على وجهه مسحتها واسمعهم يكلولي وخر عنها كتلهم اني ادفعها مثل مادخلتها بايدي للصاله اني اطلعها طلعتها تلكتني امها تبجي اخذناها للغرفه مالتها وهي حالتها تكسر الخاطر وماخليت اي ولد يتقرب عليها كتلهم اني والممرضات نشيلها ونخليها عالسرير مالتها وهي تون وتبجي كسرت كلبي وتمنيت بيا ولابيها هاي اختي الصغيره وغاليه عليا.

رفيف: حسيت اني بالغرفه بس يمي هوسه وكلشي بجسمي يون ويوجعني واريد احجي مااكدر كوه احجي ومااسيطر على كلامي بس بالي كله يم بابا واريده يمي اسمع حجيلهم وبجيهم وهوستهم بس عيوني ثكال مااكدر حتى افتحهن لو احرك اصبعي جسمي كله مكسر وخدران ونفسي تلعب وطعم البنج ببلعومي واريد ابلع ريكي مااكدر.

همام: اباوعها وجهه اصفر وتبجي وتون وتصيح اريد بابا جيبولي بابا فقدت ودموعي كامت تنزل اشكد حاولت اكتم دمعتي بس ماكدرت ياعالم والله احب هالبنيه اخاف عليها مثل مااخاف على سهى اختي اسمعها تريد ابوها وتبجي تقربت عليها كتلها رفيف عيوني انتي اني ابوج بنيتي هاي اني بابا اجيت حتى اشوفج واكلج الحمد لله ع سلامتج...

رفيف: جاني صوت يشبهه صوت همام لا اصلا هو همام لا انت همام انت مو بابا همام جيبلي بابا حباب اني مو مثل اختك اريد بابا جيبولي بابا وين راح وعافني.

رحاب: جان يوم صعب حيل حسيت انعاد يوم وفاة مهدي دعيت ربي يكوملي بنتي بالسلامه واني شوفها وحيدتي كدام عيني تلوج وتريد ابوها اول مره رفيف تحجي بداخلها بدون وعي مردت كلبي هالطفله هيج تحب ابوها بحيث الشخص الوحيد إلى رادت هو ابوها اباوعها اشلون تتالم وتشكيله وتريد تروح يمه سوده عليا يابنتي ماشفتي بعمرج بس الالم وراحت خواتي وازواجهن وراحت سهى واخوها بعد ماشبعت بجي هي وهمام إلى جان عريس ماصارله يومين من متزوج وعاف زوجته واجته للمستشفى بقيت بس اني واني الحجيه ماقبلت ترجع للبيت هي نامت بالكاع فرشت بطانيه واني بقيت كاعده عالكرسي كدام رفيف امسح وجهه وأريد شويه اصحيها حتى يطمن كلبي وللصبح وهي تلوج من الالم والحمد صحت بس ذبلانه وكوه تتحرك.

رفيف: حسيت الصبح لكيت ماما خطيه مليه ايديها عالمخده يم راسي منزله راسها فوك ايديها بس منايمه كتلها ماما ليش هيج كاعده مانمتي
صباح الخير يمه الحمد لله ع سلامتج يعمري اشلونج اليوم صرتي احسن خلصتي من العمليه ومن همها الحمد لله والشكر
الله يسلمج ماما بس جسمي يوجعني وراسي كلش يوجعني اشوكت ارجع للبيت ضجت اريد اسبح ريحه البنج تلعب الروح.

الحجيه: صلوات على محمد الحمد لله ع سلامتج يمه بعد ابويه وحيلي خلصتي واشويه ويجي ابو احمد زوج خالتج هو وخالتج ونرجع للبيت
ماما اريد اكوم اغسل وجهي كوميني ماما حبابه
ام رفيف: مو هسه بعد وكت اخاف عليج تروحين ادوخين وتوكعين وينفتح الخياط اصبري خلي تجي خالتج والممرضات واني وندخلج.
ماشي.

اجو الممرضات وحاولت اكوم بس مااكدر الم بجسمي كله وراسي كلش يوجعني بقيت نايمه واجتي خالتي وزوجها حتى يطلعوني كملو الخروجيه مالتي ورجعت للبيت بس تعبانه حيل بقينه كم يوم ناس اطب وتطلع وتتحمدلي بالسلامه بس بقت غصه بكلبي محمد ليش ماسال عني ولا خابر ولابين لاهو ولا اهله ومااكدر اسال ماما اخاف اني ماصدكت اشويه صارت زينه ويايه وحتى همام وسهى اجوني.

وهمام جاب وياه زوجته بس مبينه كوه جايه مجبوره بحيث كاعده على اعصابها اني باوعتها بالله هاي اشبيها اني لو اريد زوجها جان اخذته من زمان كبر حتى كبر ههه
ومرت الايام واني تحسنت وبس المشكله إلى طلعتلي والي جنت شادتها براسي هي دراستي إلى مع الاسف طلعت راسبه هنا اني انهاريت ورجعت نفسيتي تعبت حيل وقررت بعد مااداوم واترك الجامعه بس ادخولو اهلي واجه قرار تحميل اني ماجنت اريد احمل لان شنو يضمن حظي الفكر.

وانجح السنه الجايه بس كلت عناد بيها اداوم واصعد ثاني وبده الدوام والاستاذه إلى رسبتني راحت تكمل دكتوراه واجه استاذ جديد بس بعد احقر منها واسوء منها واستسلمت ولبست حجاب لان اريد اخلص من الحجي ومشت الايام وبيوم من الايام واحنه بشهر ال11
اتصل
رقم
غريب
على ماما.

الفصل التالي
جميع الفصول
روايات الكاتب
روايات مشابهة