رواية شهوات رجل ظالم للكاتبة زهراء أمجد الفصل الثالث
ماما اريد اكوم اغسل وجهي كوميني ماما حبابه
ام رفيف: مو هسه بعد وكت اخاف عليج تروحين ادوخين وتوكعين وينفتح الخياط اصبري خلي تجي خالتج والممرضات واني وندخلج.
ماشي.
اجو الممرضات وحاولت اكوم بس مااكدر الم بجسمي كله وراسي كلش يوجعني بقيت نايمه واجتي خالتي وزوجها حتى يطلعوني كملو الخروجيه مالتي ورجعت للبيت بس تعبانه حيل بقينه كم يوم ناس اطب وتطلع وتتحمدلي بالسلامه بس بقت غصه بكلبي محمد ليش ماسال عني ولا خابر ولابين لاهو ولا اهله ومااكدر اسال ماما اخاف اني ماصدكت اشويه صارت زينه ويايه وحتى همام وسهى اجوني.
وهمام جاب وياه زوجته بس مبينه كوه جايه مجبوره بحيث كاعده على اعصابها اني باوعتها بالله هاي اشبيها اني لو اريد زوجها جان اخذته من زمان كبر حتى كبر ههه
ومرت الايام واني تحسنت وبس المشكله إلى طلعتلي والي جنت شادتها براسي هي دراستي إلى مع الاسف طلعت راسبه هنا اني انهاريت ورجعت نفسيتي تعبت حيل وقررت بعد مااداوم واترك الجامعه بس ادخولو اهلي واجه قرار تحميل اني ماجنت اريد احمل لان شنو يضمن حظي الفكر.
وانجح السنه الجايه بس كلت عناد بيها اداوم واصعد ثاني وبده الدوام والاستاذه إلى رسبتني راحت تكمل دكتوراه واجه استاذ جديد بس بعد احقر منها واسوء منها واستسلمت ولبست حجاب لان اريد اخلص من الحجي ومشت الايام وبيوم من الايام واحنه بشهر ال11
اتصل
رقم
غريب
على ماما
رحاب: الو
ام جاسم: مرحبا اشلونج عيني ام رفيف
رحاب: اهلا الحمد لله بخير منو ويايه.
ام جاسم: اني ام جاسم فدوه خيه عندي طلب ومحد يكدر عليه غيرج ابوس ايديج ابني حيروح من ايدي
اشبيج ام جاسم شنو الموضوع فهميني
ام جاسم: جاسم ابني من رفضتو لحد الان وهو تعبان وحتى صارله اسبوع قطع الاكل وهسه نايم مستشفى يكول لو رفيف لو اموت روحي
رحاب: ياستار شجاه كل واحد ونصيبه يموت نفسه شنو صدك جذب.
ام جاسم: بس خلي نجيكم ونتفاهم فدوه انطي امل بس خطوبه واذا مااقتنعتو بي نفصخ الخطوبه فدوه ابوس ايديج والله يصير خادم الج ولرفيف
رحاب: استغفر الله شنو تبوسين ايدي شنو خادم ام جاسم ترت الموضوع مو مثل ماانتي فاهمه والله كل يوم كومه يجون على رفيف حتى كرايبنه وصارت مشاكل من وره هالموضوع بس اني البنيه ماازوجها وهي صغيره الا تكمل كليه
ام جاسم: اي بس تنخطب ومن تكمل تتزوج مو مشكله بس خلي نجي فدوه اروحلج خيه.
رحاب: تعالو هلا بيكم
ام جاسم: باجر يمكم بحيل الله مع السلامه
رحاب: الله وياج
سديت الموبايل منها واني صافنه اشلون اطرد هالناس واني ادري بيهم مو من مستوانه ومو حلمي وحلم بنتي هو صح خريج وموظف بس راتبه كلش قليل وناس بيئه يعني بنتي هالوحده وانطيها لهيج ناس حتى من اجتي امه دتخطب جايه بدشداشه وشحاطه يعني ناس مخربطين لعد هذا حظج يرفيف بس حتى لو يجون هم ماانطيها.
ام جاسم: خابرت لصديقتي ام حمزه وشرحتلها الوضع كالت دزي جاسم بسرعه انطيج محبس تلبسي وتروحين وهسه تشوفين مفعوله شنو
وراح جاسم وجاب المحبس ورحنه لبيت ام رفيف واستقبلتنه امها وجانت رافضه الموضوع بس من كعدنه وحجينه بسرعه تغيرت وكالت انطونه معلومات عنكم واحنه نسال ونرجعلكم خبر وطلعنه واني متاكده حيوافقون بس اني اعلمها واعلم بتها اذا مالعبت بيهم فلك مااسما اني سعديه اني الج ام رفيف.
رحاب: طلعن النسوان واني ماادري اشلون انطيتهم موافقه مبدئيه بس اني داخلي رافض ولساني موافق
رفيف: جنت دااكل بالمطبخ وطبو نسوان باوعتهم من شباك المطبخ يبووووو هاي ام صخمان وجيرانهم شعدهم جايين ياستار بس اكيد ماما متقبل بيهم اوووف يمحمد ليش هيج عفتني اشلون هانت عليك تفاحتك ليش عفتني هاي فوك خيانتك تعوفني بس يلا تهون لازم اكو سبب وسوه هيج.
محمد: صح صارلي شهور ماشفت رفيف بعد ولاسمعت صوتها وكلبي ديتكطع عليها بس شنو نهايتي وياها وامها هيج رافضتني مااريد اعلقها بيا وامها متريدني واني اشوفها مثل جناح الفراشه من اقل شي يتمزق واني مااريد اكسر قلبها وروحها الحلوه فقررت ابقى بعيد حتى لو على حساب تعاستي
رفيف: طلعن النسوان رحت لماما كتلها هذوله شوً هم اجو عفيه ناس ماعدهم كرامه واكيد هم طردتهم.
ام رفيف: لا ماما ماطردتهم اخذت عنوانهم ومعلومات عنهم يجوز خوش ناس واني دااشوف الولد متمسك بيج وجان مريض ونايم مستشفى من وراج خطيه بنتي وافقي بي
: باوعت ماما بصدمه مستحيل هاي تالي احلامي بجاسم وينك محمد تعال شوف حالي كتلها بس ماما اني مااحبه ومااطيقه وثاني شي حالتهم تعبانه حيل اشلون اعيش عدهم والاهم من هذا كله اني طالبه ومااكدر اتزوج واني بعدني طالبه شنو تنطين موافقه.
: بتي هسه نسال عليهم واذا خوش ولد وافقي والفلوس تروح وتجي محد اتزوجت صاحب ملايين واذا فقير انتي صيري بنيه حوك ولمي وكونيله بيت
: اووووف ?? الله كريم ماما عفتها ورحت للغرفه بس مخنوكه حيل وقررت اتصل بمحمد واكلها كافي ساكته الى متى اضم بكلبي لازم يعرف شنو ديصير.
اتصلت بمحمد بس مارد انقهرت حيل وحسيت بذله ليش محمد تشوف اتصالي ومترد ليش ذبيت الفون وكلت انسي رفيف محمد ميريدج بعد اول ماذبيت الفون كلبي رجع رجف وقررت اتصل من جديد وانطيت لمحمد الف عذر يجوز نايم يجوز مريض يجوز الفون بالسياره هو نازل ويجوز ويجوز، رجعت اتصلت من جديد.
محمد: كاعد ادخن بغرفتي ومشتاق لرفيف حبيبتي مشتاق لعطرها إلى جانت تستعمله ( اسمه رومانتك ) حتى اسمه ببالي وماانسى مشتاق لضحكتها لعيونها ونظراتها إلى بيهن لمسه حب وحزن وحنيه اوووف يرفبف لو تدرين شنو بكلبي جان ماغبتي عني كل هالاشهر فزيت من اشتياقي ولهفتي على صوت الفون مالتي واني مالي خلك ارد ولااكوم اشوف منو عفته يدك لحد ماخلصت الدكه.
رجع جهازي دك من جديد وبقى يدك كلت خلي اكوم اشوف منو تقربت من الجهاز اشوف اسم تفاحتي تتصل مااعرف شصار بيا بوقتها حب على شوق على لهفه مااردي شصار بيا ردت ماارد بس كلبي رد قبلي
رفيف: بقى يدك فتره واني كلبي يدك ويه كل دكه واكول لا محمد مانساني ومااريد اسده لحد متخلص الدكه وبالاخير فتح خط سمعت صوت هزني هز بس صوت متعب مرهق
محمد: الوو اشلونج رفيف
: هلو محمد اشلونك وين هالغيبه مشتاقيين.
محمد: بهالدنيا عايش بين دخاني وكتاباتي انتي اشلونج ????
: اني على الله سويت العمليه وكمت منها وتوقعتك تجي انت او اهلك بس مااجيتو المهم هذا مو قاطعني
محمد: من سمعتها كالت سويت عمليه اختنكت حيل ماتحملت تكمل حجي كتلها شنو عمليه شنو سويتي اشوكت هذا الحجي شو ماادري محد كلي ولج احجي اشبيج
: هاي اشبيك وحده وحده عليا مال زائده دوديه وعدت على خير وهسه اني صرت زينه ومخابرتك على شغله
محمد: اامرني فوفه كلي كدامج.
رفيف: محمد اني جايين عليا خطابه وماما موافقه كشئ مبدئي واني الولد مااريده محمد قاطعني.
محمد: اي بالخير اذا خوش ولد شكو بيها واذا تردين اني اسالج عليه بنفسي ادري كلامي يجرحها بس مااريد اعلقها بامل او انطيها وعد او كلمه واخلفها مااريدها تاخذ عليا نظره اني مو رجال اووف ياكلبك يمحمد اشلون حتتحمل وتشوف تفاحتك بايد غيرك ومزفوفه اله نزلت دموعي من عيوني رغم ماحاولت اكابر بس ماكدرت مااتحمل بعد وسكتنه اثنينه وكلوبنه تحجي اثنينه واحد يحب الثاني بس الظروف حكمت علينه بالاعدام.
: سكتت وماحسيت غير دموعي تنزل مثل الشلال انتبهت على تنهيده من محمد كتله لا هايهيه مشكور خويه سلمنه عالاهل وسديت الخط حتى بدون مااسمع منه كلمه وداع وقررت احاجي ماما واكلها موافقه صح المفروض اتريث بالموضوع بس حكمت على روحي بالاعدام واني بالحياة بعناد محمد لان بعد ماله داعي حبه إلى بكلبي لازم انسى وابدي حياة جديده رحت لماما وكتلها ماما انتو اذا وافقتو عالولد اني ماعندي مشكله شنو تشوفي صح سوي.
رحاب: اجتني رفيف صح ضايجه ومبينه جانت تبجي وكالت موافقه بس اني حاسه اكو بداخلها شي كتلها بتي انتي متاكده من موافقتج تره هاي عشره عمرمو يوم ويومين.
ماما انتي شنو يعجبج سوي هو او غيره نفس الشي عفتها ورجعت للغرفه وبكلبي الف غصه وغصه غصه حياتي ورسوبي وتحميل ماده وهذا الشي خلاني احس بفشلي بالدراسه ومنا غصه محمد واوف يامحمد غصتك والمك يسوه الف درس وجامعه ليش عيشتني بحلم وبلحظه كلشي راح صح هو مااعترفلي بحبه بس جام مهتم بيا جنت نمبر ون بحياته جنت المفضله بكلشي ليش صعدتني بسابع سما وبلحظه نزلتني تحت الارض ليش بس من هاي اللحظه ماانزل بعد هاي الدموع الغاليه لهيج شخص يحب نفسه وعلاقاته ونزواته وقررت انهض من جديده ولازم اثبت وجودي واكون اسره جديده واتعايش واتقلم ويه جاسم رغم كرهي اله بس دعيت ربي اتقبله واسعده واعيش وياه.
جاسم: كاعدين بالليل اني وامي وابويه واتصلت ام رفيف وبلغتنه بموافقتها وقررت امي باجر تروحلهم هي وام جبار حتى نحدد موعد الخطوبه والنيشان وراحو ثاني يوم وتحدد كلشي بس اني ماشفت لحد الان رفيف اريد اعرف شنو شعورها فرحانه حزينه.
رفيف: اجو ثاني يوم اهل جاسم واستقبلناهم ماما جانت فرحانه وكانهه خطوبه ابنها مو بتها واني جنت عباره عن جسد بلا روح شيكلولي اكلهم اي وعفت كلشي وره ماما وخالاتي وتحدد موعد مشيه الزلم واجونه زلم مو كلش هواي وماما بلغت خوالها وخوالي واعمامي والكرايب والبيت صار يغط ويبلع بالزلم وازواج خالاتي وثاني يوم طلعنه الصبح حتى نروح نشتري نيشان لان رادو نشتري من الحله بس نلبسه بكربله يم الامام العباس عليه السلام وكعدت الصبح كوه اشيل نفسي من الفراش احس همومي هدت حيلي احس مثل واحد دياخذو للمقبره يدفنو تريكت عالسريع وغسلت وفرشت ورحت لبست تنوره سوده وبلوز وردي وخليت شال وردي على راسي وحذاء وجنطه اسود وخليت كحله داخليه وحمره وردي فاتح وطلعنه.
اشترينه نيشان اني وماما وخالتي الجبيره راحت ويانه وهو وامه اني امشي ويه خالتي وهو يمشي كدامنه وفرحان وماما وامه يمشن سوه.
جاسم: طلعت من بيتهم واشوفها جنها ورده مفتحه ولابسه وردي والعطر والنزاكه تمنيت اخذها هسه سلمت وصعدت بس ماحجت اي شي ساكته كانهه مجبوره ماشفت اي فرحه بعيونها بالعكس جانت عيونها تلمع بس تريد تبجي اشبيها ماادري وصلنه للسوك وهي تمشي ويه خالتها تستحي تمشي ويايه اني هم عفتها على راحتها وصلنه للصايغ طبعا احنه متفقين الذهب بمليون ونص واني اخذت بس 750 امي كالت شدعوه مليون ونص وجنت خايف يم الصايغ تصير مشكله وبدو يختارون وهي بس تباوع وادكول اي اخذت حلقه والمحبس امها اختارته واختارت وياها قلاده صغيره صارن كلهن ب750 كالت امي يلا سويلنه وصل بس امها اخذت وياهن سيت سوار ومحبس هم صارن 750 هي دفعت فلوسهن وخلتهن ويه الذهب هي ضاجت بس ماحجت.
رفيف: جنت متفقين على شي ويم الصايغ امه غيرت تمنيت ماما تخرب الخطوبه بس صدمتني انوب هي اشترت زياده وخلتهن كلهن باسمه باوعتها بس ماحجيت طلعنه افترينه بالسوك مااخذت بعد. شي ماعجبني شي واني متعمده اريد اشلع كلب امه واكسر رجليها خباثه وبكيفي
ام جاسم: يمه رفيف كسرتي رجلينه مالكيتي بلوز كوستم عجبج هذا السوك كله ماعجبج ??بعد ورانه روحه كربله يلا فضيها
جاسم: يمه خليها براحتها عادي بعد وكت.
: يلا خلي نرجع بطلت مااخذ هسه شي مالكيت شي عجبني يلا امشو نرجع
رجعنه اخذت بس عباتي وخالتي نزلت واحنه طلعنه بنفس التكسي لكربله هو كاعد بالصدر واني وماما وامه وره واني الطريق كله ساكته اختنكت رغم احنه بالشتا بس هوا الكون كله ميكفيني.
جاسم: وصلنه للحرمين ورفيق ساكته ولا حجت كلمه اشبيها ماادري وصلنه بالبدايه زرنه وكملنه وكعدنه بالصحن حتى نلبس الحلقات واجه السيد تباركنه بي بس من دالبسها الحلقه جرت ايديها وماقبلت كالت اني البسها لان ميصير تلزم ايدي دخلت الحلقه بايديها بدون مالمسها وهي هم لبستني بس مالمستني ابد باركولنه بس هي ضايجع وكوه تبتسم سالتها اشبيج كالت مابيا شي وتحجي وهي ناصه حتى ماشالت راسها عرفتها مجبوره بس اني الج رفيف إلى اندمج.
رفيف: راد يلزم ايدي ويلبسني الحلقه بس رفضت وعافني براحتي لبسنه الحلقات وباركولنه وطلعنه حتى نتغده رحنه لمطعم القسيم إلى بين الحرمين كوه اكلت اشويه امه كعدت كدامي وماما بصفها وهو بصفي كملت اكل وكمت دااغسل وهو عيونه ابد مافارقتني احس بي نظراته تريد تاكلني هذا اشبي اشكد وكح اوووع لعبت روحي منه بس مااكدر احجي
ام جاسم: وين عمه مااكلتي شي
لا شبعت الحمد لله.
مااكلتي بس لكمتين كانهه مجبوره عالخطوبه عادي خليها تنجبر اهم شي امها بجيبي بقينه نسولف وخلصنه غده ورجعنه وصلناها هي وامها واحنه رجعنه لبيته
رفيف: رجعت من كربله واحس الحلقه طوق بركبتي اشكد ماهي خفيفه احسها بثكل جبال الكون كله اتمنى انزعها واخلص منها ادري بروحي ورطت روحي بورطه إلى مااطلع منها بس مااعرف ليش استسلمت وضعفت رغم اني مااحبه وادري بي حيعيشني مو مثل عيش اهلي لان هومه ناس دون البسيط.
جاسم: رجعنه واني الدنيا ماسايعتني من الفرح احس روحي ملكت الكون كله واخير كدرت احصل المغروره بس اني يارفيف اذا ماكلبت حياتج جحيم واطلع كل الذله إلى انذليتها من خشمج مااتسمى اني جاسم بس كلشي بالهداوه قررت ثاني يوم اروحلهم حتى اعقد محكمه واضمن رفيف بعد متكدر تبطل ورحت واتفقت ويه امهت بحجه اريد اخذ سلفه تفيدني للزواج ويردون عقد محكمه هي شفت عيونها ترفض العقد. بس امها وافقت وهذا اهم شي عندي.
رحاب: اي ابني روحو عقدو هي اول وتالي صارت مرتك باجر اخذها واتوكلو بالله حتى بعد هم براحتكم اطبون اطلعون
جاسم: ماشي خاله باجر بالتسعه اني يمكم حتى نكمل الاجراءات
طلعت من بيتهم واني الكاع ماشايلتني واخيرا كدرت اخذها وحتى جماعتي جانو يضحكون عليا من اكلهم الا اخذها يكلولي رفيف تقبل بيك انت يمعود هي اذا شافتك تريد تحركك بعيونها مستحيل تقبل بيك واخيرا جبت كلامي راس وثبتت للكل رفيف إلى وبس.
رفيف: بعد مطلع جاسم من بيتنه واني رحت بسرعه بغرفتي ابجي واشكي لبابا إلى عافني وحدي بغابه عافني يم ناس ماعدهم رحمه يم ام متسلطه همها الوحيد العالم والبرستيج مالتها كدام صديقتها مو مشكله بتها اذا انسعدت او انتعست بس بعد شيفيد البجي والحجي باجر انسجن واودع الحريه وانسى روحي وحريتي وحياتي واعيش تحت رحمه جاسم ربي صبرني على بلاك ربي ماعندي غيرك.
كعدتني ماما ثاني يوم من ال 8 لان حيجي جاسم ومتريده ينتظر عيب اجه اخذ المستمسكات وكال اكمل بدايع المعامله وحدي وبعدين اخابرج وامر عليكم كتله اوك
طلع واني جسد بلا روح كملت شغلي للظهر خابر كال باجر امر بالتسعه حتى نروح نحلل ونكمل باقي الاجراءات كتله ماشي
يوم 24/11/2005
خابرني الصبح
كملتو
اي
اوك لعد دقايق واني يمج
سده للفون واني دمعتي كوه كاتمتها وداخلي متحطم ومكسور
رحاب: رفيف كملتي يلا الولد بالباب.
رفيف: اي ماما بس البس الحذاء طلعت من الغرفه واني لابسه بلوز ابو السحاب اوف وايت وبي نقشه جوزي وتنوره مقفله جوزي وبيها خطوط بيجي
وشال جوزي وجنطه وحذاء جوزي وكوه امشي اسحل بروحي سحل مثل واحد ماخذي للاعدام
جاسم: طلعت احسها كوه تمشي بس فدوه لله اشكد نازكه هالبنيه اوووف اشوكت اخذها وتصير حلالي واني اباوعها ومبتسم قطع ابتسامتي صوت.
رحاب: يلا عيني مو وكت صفنات عود من ترجعون اصفن براحتك اتاخرنه ورانه كومه فره
جاسم: هاااا اي اي يلا اصعدو
رفيف: صعدت بالسياره ليوره اني وماما وهو كعد بالصعد بس ياريتني ماصعدت احس هوا ماكو اختنكت شعور مثل طير ديذبحوً وواكف منتظر اشوكت يوصله السره ويباوع عالذباح مالته ومنتظره روحي تلوب بس مااكدر احجي بسرعه وصلنه للمستشفى حللنه وكعدنه ننتظر النتيجه صاحو اسامينه رحنه كال المحلل انتو جاسم ورفيف.
جاسم: اي نعم بشر الدم مطابق لو لا
المحلل: اي مطابق انت ABوهي O
اخذنه النتيجه وطلعنه للمحكمه وطبعا لكينه عرف واني واكفه منتظره اعدامي الوقت يمر بسرعه بحيث احسهن من دقايق لو ثواني او اجزاء من الثانيه صاحو اسامينه اني هنا كلت انتهى مشوار حياتي وكلبي وداخلي يكول الجاي اسود واسوء من الراح دخلت واني بس جسد مثل محكوم اعدام وصعدو لحبل المشنقه
القاضي: بابا انت جاسم
جاسم: نعم
القاضي: بنتي انتي رفيف.
رفيف: نعم بصوت ناصي وكله هم وحزن
القاضي بنتي ترضين بجاسم يكون زوج الج بمهر مقدمه 10 مليون دينار وماخره10 مليون دينار على ان يسقط المؤخر بعد 12 سنه زواج
رفيف: نعم موافقه
القاضي: مبروك
جاسم الله يبارك بيك
وقعو الشهود ووقعت اني وجاسم ووقع القاضي اخذنه العقد وطلعنه اني هنا اسودت الدنيا بوجهي كلشي انتهى وصار حلم.
رحاب: طلعو من القاضي واني مااعرف اهلهل باركتلهم وبوست رفيف ووزعت جكليت وحلويات بالمحكمه وصدقنه العقد ورجعنه للبيت.
جاسم: وصلنه لبيت رفيف تلكتنه خالتها وبيبيتها باركولنه واني هنا طاير من الفرح واخيرا سيطرت على كلشي وكعتي بايدي يارفيف بسيطه بقى لازم اقنع امها على عقد السيد حتى تصير زوجتي شرعا وقانونا خلي ارجع للبيت واشوفها حل اني وامي رجعت وره ماتغدينه لان اهلها كالو ميصير وكت غده عيب تطلع وهاي اول طبتك اله فبقيت للغده صبولنه وحدنه بالصاله اني ورفيف حتى ناخذ راحتنه.
رحاب: رفيف بتي هذا غداكم انتي وجاسم ومن تكملون تعالي اخذي الجاي يلا اخذي وروحي للصاله
رفيف: باوعت لماما بقهر تمنيت اكدر اكلها مااريده بس شحجي بعد ميفيد الحجي اووف ياكلبي الى متى تبقى تتحمل هالقهر اخذت الاكل ودخلت للصاله لكيت جاسم كاعد عالتخم ومبتسم خليت الاكل عالميز وكتله يلا كوم تفضل
جاسم: ها حناكل وحدنه بس اني وياج لو اهلج حيجون.
رفيف: لا ميجون هذا بس النه وناصه ودااصفط بالمواعين عالميز واخلي الخبز والخاشوكه والشوكه كدام كرسي جاسم وكدامي
جاسم: كمت واني اضحك واكول بداخلي والله وفرجت عليك يجاسم وتحقق إلى ببالك وكعد.
رفيف: كعدنه ناكل واني بس العب بالاكل اجيبه منا وارجعه لهنا ياعالم مخنوكه ودي اصيح بصوت اهز الكون كله وهم ماارتاح رحمتك ياربي وصبرك على بلاك وجاسم كاعد كدامي وياكل وفرحان ويحجي واني اصلا مو يمه ماادري بي شديلغه اريد بس اخلص حتى يروح واخلص منه.
جاسم: احجي واتغزل برفيف واكل وفرحان هي صافنه اباوعها اصلا مو يمي صحت بصوت ناصي رفيف رفيف وهي ولا يمي رجعت من جديد عليا صوتي رفيف حبيبتي رفيف وهي ابد رجعت حركة جتفها بايدي وهزيتها رفيف فزت مني اخترعت كتلها اسم الله اشبيج
رفيف: هاا وياك مابيه شي اكل بالعافيه عجبك الاكل
جاسم: ههههه يا مابيج شي صارلي ساعه احجي وانتي مو يمي اصلا
رفيف: لاوياك اصبلك عصير احاجي وبالي مو يمه اصلا بس جسد. ونفس وبس.
جاسم: لاحبي مشكوره تدرين اليوم احلى يوم بحياتي
رفيف: اي جاوبته بس بقهر والكلمه من تطلع تفطر كلبي فطر وكمت الم المواعين وارتب الميز وهو مبتسم ويباوع عليا ابد مانزلت عينه مني اشكد اكرهه ياربي شسويت اني بروحي شلعت بحياتي ماكو غير جاسم اوافق بي عناد بمحمد صبرني ياربي
طلعت من الصاله وديت الاكل للمطبخ وصبيت جاي ووديته اله شرب جاي وكمل كال اريد خالتي كتله هسه حكوم اصيحها
رحاب: ها رفيف اشبيج تصيحيني.
رفيف: ماما جاسم يريدج.
رحاب: شسويتي للولد احجي شيريد مني ??هسه جايه وراج البس شالي وعباتي الاسلاميه واجي روحي كدامي واني جايه اريد اشوف شمصخمه ويه الولد.
رفيف: والله ماما ماسويت شي شو هو من وديتله الجاي اخذه وكلي صيحي خالتي اريدها عفتها ومشيت بس مقهوره حيل ليش هيج ماما دوم اطلع حركتها بيا اني شمسويه صح هي تصرف عليا وارقى ملابس تلبسني والبس ذهبها عادي وطبعا مخيلتي مثل المعرض كدام الناس حتى يكلون رفيف مدلله بس مالي حق اتصرف باي شي حتى الفلوس من تنطياهن تحاسبني عليهن وكله محسوب ومسجل مشيت كدامها للصاله لكيت جاسم مخلص الاستكان مال الجاي كتله اصبلك بعد.
جاسم: لاحبي مشكوره بس وين خالتي شو مااجتي...
رفيف: هسه حتجي ورايه تلبس حجابها وعبايتها وتجي
جاسم: خوش حتى احاجيها واروح
رفيف: خوماكو شي؟
جاسم: لا ماكو شي بس هيج شغله اريد اتناقش بيها وياها.