قصص و روايات - قصص رائعة :

رواية شهوات رجل ظالم للكاتبة زهراء أمجد الفصل الأول

رواية شهوات رجل ظالم للكاتبة زهراء أمجد الفصل الأول

رواية شهوات رجل ظالم للكاتبة زهراء أمجد الفصل الأول

مرحبا اسمي رفيف مهدي مواليد 1984 / 7 ابريل والدي اسمه مهدي، ووالدتي اسمها رحاب من محافظه بابل اني وحيده اهلي.

ماعندي لااخ ولااخت عندي 3 خوال و7 خالات ماما اكبر اخوانها وخواتها وهي إلى مسيطره عالكل سواء هي الصح او الغلط وعندي 4 عمام وعمه وحده فقيره وحبابه حيل وطبعا بابا هم اكبر اخوانه وخواته جدو ابو بابا كان شاعر حسيني ومعلم يعني مثقف بس جدو ابو ماما كان رجال كاسب ميعرف يقره ويكتب ماما وبابا كانو ولد خاله فعاشو قصه حب منذ الطفوله وكملت قصتهم بزواجهم ووجودي إلى كان ثمره حبهم
نرجع بالزمن لسنه 1985.

ام رحاب: - وج رحاب رجلج وينه شو لسه مااجه من بغداد...
رحاب: - يمه ماادري قابل اني هناك هسه اخابر للقسم الداخلي واشوفه وينه
مرت ايام ومهدي ماكو لاحس ولانفس ماخلينه مكان مادورنه عليه وياهو إلى نساله يكول ماادري وينه.
رحاب: - يمه اني حروح لبغداد ادور عليه وانتي ديري بالج على هاي وجهه الفكر رفيف من اجتي للدنيه لسه ماشفت خير راح حبيب كلبي وابو بيتي
ام رحاب: - وج هاي المكروده شعليهه دشوفهه ملاك ونايم.

وبعد مرور فتره اجه مرسال بانو مهدي محبوس بسجن ابو غريب بتهمه سياسيه وبعد ادخلت واسطه ورووس جبيره بحزب البعث طلع مهدي من السجن وهو جان بعده طالب مرحله رابعه هندسه معماري جامعه بغداد وجان شاطر حيل بدراسه بعكس رحاب إلى جانت بالكوه مخلصه متوسطه وتحب بس تطبخ وتحب سوالف البيت...

مهدي: - اسمعي رحاب اني على ساعه يرجعون يحبسوني من جديد لان عدي ابن صدام ويايه ومخلي عينه عليه لان شيعي وجنت بايران وتعرفين الوضع والحرب...
رحاب: - وانت تعوف الدنيه كلهه تندك بابن صدام يامهدي مافكرت بينه
مهدي: - عوفج من هذا الكلام كله خاف اغيب ومااجي اكو كتب دينيه واوراق اول مااغيب اريدج كلهن تخليهن بطشت مي وتذويبيهن وتذبيهن بالشط
رحاب: - صار مثل متحب بعد تامر بشي ثاني.

مهدي: - رفيف ديري بالج عليه هاي رويحتي وكل حياتي مااريد الهوا يمسها هاي امانتي عندج
رحاب: - لدكول هيج حبيبي شعندي غيرك وغيره هاي فوفه بنتي وحيدتي
مهدي: - ادري بيج تحبيه وهي بنتج بس من عرفتي بنيه ادري بيج ضجتي منه وتمنيته ولد
رحاب: - كلشي يجي من الله رزق وان شاء الله يجي الولد...
ورجع مهدي لبغداد للكليه ورجع اختفى من جديد.

رحاب: - خاله هذني الكتب لازم نذبهن مهدي كال بس اختفي سوي بيهن وحجت لخالتها ام مهدي كلشي
ام مهدي: - يمه رحاب اني حروح للشط اذبهن واجي قبل ليجون الامن ونتعزى ونتصخم...
مهدي: - اووووف اشكد مشتاق لفوفه ولامه ربي فرجك وسهله عليه واطلع بالسلامه وارجعلهم
ورجع مهدي للسجن وانحكم خمس سنوات
رحاب: - خاله هاي سويت لمهدي موافقه حتى يكدر يمتحن ويتخرج حرامات مابقى ويتخرج حوصلهه للسجن حتى يمتحن...

ام مهدي: - اي يمه الله يرضى عليج
مهدي: - امتحنت وكملت والحمد لله تخرجت بدرجات عاليه رغم الوضع مال السجن والضيم والضرب والتعذيب بس كدرت احقق حلمي رغم دخولي للقاعه واني مقيد بايديه وبرجليه بسلاسل بس اتجاوزت هاي المحنه
الضابط: - مهدي انتو اجاكم عفو حطلعون من السجن بس لازم تطوعون كلكم للعسكريه وترحون تقاتلون بالحرب...
مهدي: -الحمد لله والشكر على كل حال حاضر سيدي.

رحاب: الحمد لله والشكر من رجعت حبيبي إلى ولبنتك وعدت سلامات
مهدي: وعدت اهلي ورحاب وحبيبتي فوفه إلى جنت اشوف الكون بيها وكلبي حاس مراح اشوفهم بعد...
رفيف: بابا لتلوح ( لتروح) اني احبت ( احبك) وابجي واخذت ساعته وتعبت ونمت...
مهدي: بعد مانامت رفيف التحقت بالعسكريه. بالبصره
رفيف: - بعد مرور ست شهور وصارت الفاجعه
ام مهدي: - يبووو يبووو ولج رحاب ولج خيه ام رحاب مهدي مات كتلو.

رحاب: - اتهسترت واسودت الدنيا بوجهي راح حبيبي ونورعيوني راح ابو بيتي راح إلى جنت احلم اني وياه ببيت واطفال من احنه وصغار واحنه نحب بعض...
ام رحاب: يبو راح الغالي راح ابو ضحكه الحلوه راح الحنين ليش هيج خاله المن عفتنه وعفت مرتك وبنتك...
وانصبت الفاتحه ومرت سنين حزن ورفيف بدت تكبر وتحلى وهي تشبهه ابوها بكلشي.

رفيف: طبعا نسيت اكلكم مواصفاتي اني حنطاويه على بياض عيوني كبار عسلي شعري سرح اشكر حلكي صغير وخشمي صغار يكلولي شكلج ايراني وطولي 168 جسمي ممتلئ بس رشيقه يعني جسمي مرتب
رفيف: ماما ليش متحجين ويه اهل بابا وبابا وين اريده كل صديقاتي بالمدرسه عدهم ابو ليش اني ماعندي.
رحاب: حبيبتي بابا مسافر هسه من تكبرين يرجع واهل بابا ميحبونه معلينه بيهم
ليش مسافر وعايفنه اني اريده مثل صديقاتي واريديصير عندي بيت جد.

رحاب: انجبي واسكتي كتلج مسافر
عفتها وكمت واني دموعي بخدي طفله بصف اول ابتدائي وتريد ابوها متدري الوكت شضاملها من قهر
رحاب: وجه الفكر وينج ليش بالسطح شعندج فوك
ماما دااقره اشبيج متشوفين البيت كله خواتج والجهال وهوسه وين اولي اني
عفتها ورجعت اقره وابجي ليش هيج بابا عفتني وحدي ليش كسرت ظهري ليش مااخذتني وياك.

كملت ابتدائيه ومتوسطه واني ذليله وعايشه ببيت جدي اهل امي صح بيبي جانت تحبني وادكولي انتي من ريحه الغالي وخالاتي جانن كلش يحبني بس اكو غصه بالكلب تحن لاسره ولاب
وكبرت وكبرت همومي ويايه ودخلت سادس علمي وقريب الامتحان جان يصير إلى مامتوقعته...
الدكتور: اسمعي خاله رحاب حالتها كلش تعبانه والعمر بايد الله اخذوها اقرولها قران بلكت يرحم رب العباد بحالها.

ام رحاب: دكتور هسه غير نعرف ليش هيج البنيه مورمه ولاايد ولا رجل وحتى متعرف احد
الدكتور: دمها متلوث واليوريا صاعده للكليه وايامها قليله جدا
رفيف: اباوع اني بين الحياه والموت ربي كومها بالسلامه مالي احد غيرها ربي رحمتك وابجي وادعي ربي يسهل عليها
ابو احمد: عمه ام رحاب خلي ناخذها لبغداد هنا ماكو طب بالحله ميفتهمون
ام رحاب: بكيفك يمه ولو الدكتور يكول حالتها منتبهه.

ابو احمد: عمه نشمر حجاره بظلمه باجر اني الظهر امر عليكم حتى نتوكل
ودعت امي ثاني يوم وتوسلت اروح وياهم بس ماقبلو لفًوها بالبطانيه وراحت بقيت ادعي وابجي
مرت فتره
زهره اخت رحاب: الحكي اجتي امج وج جابوها هاي تمشي
جنت ابجي وحدي بغرفتنه اني واني ومطلعه ملابسها وابجي ربي يكومها بالسلامه رغم قساوتها عليا ورغم رزالتها وظلمها بس تبقى هاي امي وحبيبت بابا عزيز كلبي
رحاب: طبو مابيا شي الحمد لله صرت زينه.

ماما الحمد لله على سلامتج وبوستها وابجي من الفرح وفرحانه رجعتلي ماما
زهره: فهمونه شكال الدكتور واشلون هيج رجعت
ابو احمد: والله كال العلاج غلط وضربها ابره وره ساعه صارت زينه وانطانه علاج جديد والحمد لله
رحاب: رفيف اشوكت امتحانج كومي اقري وراج بكلوريا
نزلت دموعي كتلها خلصت الامتحانات واني مارحت لان انتي جنتي متدرين بالدنيا وتركت كلشي وبقيت بس يمج
رحاب يعني راحت عليج السنه
اي اعوضها عالسنه الجايه.

رحاب: والتعب والخصوصي والفلوس كلهن راحن انتي تبقين لااوبالي تبقين هيج غبيه ولج ذبيت عليج دم كلبي تاليها ادكوليلي راحت السنه
ام رحاب: يمه اشبيج كولي يالله بتج شاطره والسنه الجايه اطلع معدل ومو مشكله اذا راحت السنه
رحاب: يمه لخاطر الله انتي اسكتي محد طلع عينها وخربها غيرج.

ام رحاب: هاي انجبيت وسكتت شكلت اني البنيه جانت ليل ونهار تبجي عليج وحتى الاكل عافته وانتي تلكتيها هيج هستوج طلعتي من حلك الموت وبعدج وكحه...
كمت ودمعتي بعيني فشلتني كدام الكل خالاتي وازوجهن والجهال عفتها ورجعت للغرفه ورجعت لصوره بابا إلى احس روحي من احجيله يسمعني ويمي واشكيلي همي.

ليش بابا عفتني ورحت عفتني بوسط غابه وحدي بطريق مجهول ماادري وين حيوديني الوكت ومرت الايام وبدت السنه الجديده وداومت واني مكسوره اشوف صديقاتي إلى جنت اني اساعدهن بالدراسه طالبات جامعه واني اروح للمدرسه كانت اصعب سنه بحياتي وشديت حيلي وجنت متفوقه ودرجاتي عاليه بس مع الاسف دائما يصير عكس إلى احلم بي واريده
10/3/2003.

رحاب: يمه كومي خلي نروح نتسوك كميه جبيره لان الحرب حتصير والامريكان حيضربونه ومن باجر يبدي القصف
ام رحاب: ربي دخليك مو كافي ملت كلوبنه الله لا ينطيك صدام اكلت شبابنه كلهم
رحاب: يمه مو وكت هالحجي كومي بسرعه
رفيف: - شنو حرب ودوامي اشلون ودراستي وحلمي كلشي راح بليله ويوم ربي دخيلك.

وبده القصف والانزال والوضع كلش تعب وقنابل صوتيه الليل كله وعشنه رعب وخوف وكالو حتسقط الدوله والامريكان حيدخلون ويغتصبون البنات اني هنا اتهسترت ربي هو هذا الشي الوحيد إلى بقالي من حياتي ومااريد اخسره ربي رحمتك
وبيوم 7/4/2003 وكان يوم عيد ميلادي وبقينه للصبح كاعدين من اصوات القصف والضرب توقعت اكعد الصبح الكه بس بيتنه موجود والحله كلها دمار كانت الاصوات عاليه جدا.

ماما صار الصبح واحنه عايشين الحمد لله والشكر حروح افتح التلفزيون بلكت نسمع خبر شي
دك التلفون الارضي
علا اخت رحاب: الو
زهره: هلو علا اشلونكم ويه القصف مال البارحه
علا: زهره الحله سقطت والامريكان دخلو وهسه متوجهين لبغداد
زهره: شنوووو مستحيل ماكو هيج شي
علا: شنو ماكو اني هاي الاخبار كدامي مو تدرين عدنه ستلايت وج حتى بغداد حتسقط
زهره: تصخمنه وتلطمنه روحي علا خلي اكول لاهلي.

الحكو سقطت الحله ولكم الامريكان دخلو عزه العزانه عزه العزاك صدام هاي تاليها حنروح بالرجلين
رفيف: كمت ابجي طلعت للطرمه واشوف الطيارات الهليكوبتر فوك روسنه والجنود الامريكان بيها جمدت بمكاني سيطر عليا الخوف والقلق حسيت بلحظه انتهت حياتي
رحاب: وج طبي معزايه هسه يجون يجروج من البيت شكول وشحجي
رفيف: - اي ماما طابه اشبيج هسه انتي ليش تتفاوليلي هيج ربي رحمتك وسترك دخليك ماعندي غيرك.

ومرت الايام وسقط العراق وبده البوك والسلب والقتل والخطف صار بالشوارع وكالو هاي سنه عدم رسوب وبنهايه شهر السادس صرحو انو الامتحانات لازم اتم وانو تبدي من يوم 7/7/2003 امتحان البكلوريا
رنا صديقه رفيف: الو
هلو حبي اشلونج رناوي الحمد لله ع سلامتكم
رنا: عمري الحمد لله الله يسلمج اكلج فوفه
كولي حب.

رنا: البارحه رحت للمدرسه لان علنو الجدول مال الامتحانات والاسبوع الجاي نمتحن وزاري ورحت جبت بطاقتي واجيت فروحي جيبي البطاقه مال الدخول مالتج واخذي الجدول
يااا ولج ياامتحانات وين مراجعه مو كالو ماكو امتحانات ربي منين اتلكاها يلا هي خربت بعد شكرا عمري لان كتيلي
رنا: ولو حبي احنه خوات يلا باي
الله وياج.

ماما باجر اريد اروح للدوام اخذيني اخاف اروح وحدي اجيب بطاقتي والجدول الامتحان الاسبوع الجاي رنا هسه خابرتني وكالتلي
رحاب: باجر عود اكول لرجل خالتج صابرين ياخذج
ومرت ايام الامتحان بين خوف وقلق لان مدرستنه جانت قاعده امريكيه وناس ادكول امتحانكم مينحسب وناس ادكول الدفاتر يحركوهن كل جماعه تحجي شكل وصار خطف بنات بس اني جان زوج صابرين عمو هشام هو يوصلني ويرجعني وخلصت الامتحانات واطلعت النتائج
رنا: الو.

رحاب: الو اتفضلي
رنا: اشلونج خاله اني صديقه رفيف رنا
رحاب: هلا خاله تردين رفيف
رنا: اي خاله اريد ابشرها اني نجحت وطلعت معدل 90 جابولي النتيجه قبل ساعه هي شطلعت
رحاب: راح زوج خالتها هشام يجيبها هي متدري اكو نتائج اليوم
رنا: ماشي خاله من تستلم خلي اطمني باي
رحاب: الله وياج.

هشام: رحت اجيب نتيجه رفيف خطيه تعبت وادمرت بالامتحانات وهي سنه ثانيه استلمتها والحمد لله ناجحه بمعدل 89 طلعت بالسياره عالسريع اريد ابشرها
رحاب: اني بالباب قلقه اريد اشوف شطلعت هاي المعزايه وهي جانت خايفه من الكيمياء وكالت كلش موزينه بس لا مصخمه بدرس ثاني
هشام: لكيت رحاب بالباب بشرتها بتها ناجحه
رحاب: كمت اصيح من الباب رفيف تعالي بسرعه نجحتي خلصتي وطلعتي معدل 89 ماضاع تعبج الحمد لله والشكر ربي.

جنت كاعده بالهول وتعبانه حيل وخايفه من الوضع وخايفه اطلع اكمال او ارسب اسمع ماما تصيحني كمت بتثاقل لان ادري بيها بس تحب تهين وترزل تعلمت عليها اشوفها تضحك وادكولي نجحتي ماتحملت الصدمه والفرحه ماحسيت غير اني واكعه بالممر وكلها دايرمدايري وتباركلي شعور يخبل وفرحه رغم اكو غصه بالقلب بعدم وجود بابا بس الحمد لله والشكر كدرت احقق جزء صغير من حلمي وهو حدخل كليه.

رحاب: قدمي بس لجامعه بابل بغداد طريقها خطر والوضع موزين وانتي بنيه مو مال اخليج قسم داخلي اخاف عليج والناس بعدين تحجي ادكول بت رحاب بالاقسام الداخليه.

اوك هايهيه اقدم بس بابل مثل متردين وقدمت واني مااعرف اشلون اقدم وطلعلي تربيه بابل صح ماجنت اريد تربيه وضجت حيل بس كلت الحمد لله على كل حال هو اني شنو حلمت بي وتحقق حتى يحقق هذا الحلم عادي وانقبلت تربيه رياضيات جامعه بابل وياريت ماانقبلت كليه ولا دخلت للجامعه لان سبب دمار حياتي لحد هاي اللحظه هو دخولي لجامعه بابل
محمد: هلو رفيف اشلونج يلا واخيرا خلصنه من السادس.

يمعود احلامي كلها خربت محمد هاي تاليها تعب سنيني وعدت وتاليها تربيه اكضي عمري بين السبوره والطباشير ليش محمد ليش هيج حظي فكر وكمت ابجي
محمد: فوفه صيري قويه وابدعي بمجال اختصاصج وكملي وصيري دكتوره علميه
اكله تربيه يكولي كملي اني كملت سادس شلت صدام اذا اكمل كليه المن اشيل فهمني اعتقد تقوم القيامه اشكد حظي فكر ومعثر
محمد: زين عندي الج حل والله يفيدج.

سمعني ياافلاطون زمانك احجي ولو ادري بحلك مراح اقتنع بي بس احجي بلكت هالمره يكعد حظي المطين
محمد: تعالي قدمي ويايه اكاديميه فنون جميله والله نمشيها بالكلاوات والفلوس ونخلص ماستر ودكتوراه ونصير دكاتره بالجامعه شكلتي واني كل الدكاتره اعرفهم تعالي سيراميك حتى سوه اني وياج.

انت صدك تحجي اني تربيه ماقابلها بيها انوب العب بالطين وشصير بالله فنانه ووين تمشي عدنه هاي واشوكت اخلص من اموت لا محمد مااريد خليني عالرياضيات اقلها اشويه شوفه مدرسه رياضيات
محمد: وج هو كلنه تابعين لوزاره وحده فكري بعقلج اني قدمت واذا تردين ماطول بعده التقديم مفتوح حتى باجر اخذج واقدملج شكلتي
لامحمد مااريد خليني بمكاني احسن
محمد: براحتج باي
الله وياك باي.

طبعا اني محمد حعرفكم عن نفسي اسمي محمد، مواليد1981 اني احب البنات بس عندي رفيف شي خاص وجنت اقره وياها وهي إلى شجعتني اكمل سادس رفيف هي البصمه الحلوه بحياتي رفيف هي حلم عمري اموت عليها بس مااكدر اعترفلها بحبي لان اشوفها مثل جنح فراشه من اقل شي تنجرح واني مااريد اجرحها ساعات اشوف عيوني بيهن حجي وحب وحزن بس مااكدر اواجهه بحبي مكتفي بنظراتها باتصالاتها لمن تخابر على اختي زهراء او لمن امي تحجي وياها او لمن نلتقي بمحاضرات الخصوصي وهذا الشي إلى قوه علاقتي بيها وصرت اذا ماشفتها بيوم احس يومي حزين يومي مابي اي متعه جانت جنتي ودينيتي جانت الشخص الوحيد إلى اعجز عن مقاومته واعجز عن تركه رفيف النفس الدم رفيف كل حياتي كل ليله تمر عليا يزيد حبي وشوقي الها كان قلمي واوراقي وخواطري كله لرفيف مواصفاتي حنطاوي طولي 174 شكلي يشبهه وائل جسار بس شعري من المقدمه خفيف وجانت دوم رفيف ادكولي هسه تصير كروعي ومحد تاخذك اوووف يارفيف يااحلى حلم بعمري.

رفيف: اليوم اول يوم إلى بجامعه وجنت خايفه ومرتبكه حيل ومااعرف احد بدلت ملابس زي موحد ومشطت شعري إلى جان طوله نص ظهري ولبست قميص ابيض وتنوره رصاصي وحذاء وجنطه ابيض ورحت للكليه وصلت واني بعالم غريب مااعرف بي احد سالت دلوني على قسمي تعرفت على بنيه حبابه مخطوبه لابن خالها اسمها نور بهاي الفتره بعد علاقتي بمحمد فترت لان ارجع من الكليه تعبانه اكل وانام اكعد عالمغرب اسبح واصلي واحضر ملابسي واكعد اقره صح جنت اشتاقله لمحمد وجنت اعشقه ومن يرد عالتلفون من اخابر اخته شعوري مينوصل واحس خدودي يصيرن نار.

هيفاء ونور: يلا رفيف عدنه مختبرات امشي حتبدي المحاضره اتاخرنه بسرعه
اي اجيت وطلعنه عالسريع صار محمد كدامي واكف ويه بنيه كاي اثنين يحبون بعض اني شفته اتخبلت احس بلحظه انكسر كلشي بداخلي حسيت واحد يهزني حيل ويكولي اصحي محمد ميحبج محمد عنده بنات وعلاقات عوفي رفيف محمد معتبرج اخته احس الدنيا كامت تفتر بيا تقربت من يمهم وكتله اشلونك حمودي وعيوني بعيونه وكلهن عتب وحزن وقهر.

محمد: اجاني صوت تفاحتي وحلم عمري نونه شميت عطرها قبل ليوصل صوتها التفت اباوع عيون حزينه تعاتبني وادكولي ليش محمد هيج تجرحني وخصلات شعرها الاشقر على عيونها ووجهه والخدود حمر والعيون تلمع بداخلهن نهر من الدموع كتلها هلو فوفه اشلونج.

رديت السلام واني داامشي بسرعه وكلبي احسه يريد يطلع من داخلي ويكله كافي ارحمني حس بيا اني احبك من جنت بالمتوسطه افتهمني كافي اشوفك ويا غيري واسمع اختك تحجي بعلاقاتك كدامي ارحمني اني مو اختك حس بحبي الك من كل هذا الحجي إلى بداخلي جاوبته بكلمه برحمه الله ومشيت
هيفاء: اكلج رفيف هذا مو محمد ابو الاكاديميه
اي هو شمعرفج بي
هيفاء: هاا مو هو ويه اختي بنفس القسم ومن وحت شفته وسلمت عليه وكالت عليه اختي خوش ولد.

ماشي وسلميلي على اختج اكلجن اني مراح ادخل للمحاضره راسي حينفجر انتن روحن اني حروح للنادي
نور: صدك جذب اشبيج وجهج صار طماطه هسه
جنتي تضحكين شو غيمتي وراح تمطر يمج
انجبي عابت تمطر شنو كلت روحن مااريد اولي للمحاضره هسه اني شجابني للمختبرات الفكر عفتهن وداامشي للنادي صار بوجهي محمد
محمد: رفيف ممكن احاجيج؟
اي اتفضل
محمد: اشبيج مو على بعضج مخنوكه من شي احد غاثج احجي.

ماكو شي بس لود الدوام ومحاضرات وتدري اني مامتعلمه عالمحاضرات وبعدني جديده اي محمد اليوم منورنه بالجامعه لو حاجي جان فرشت الجامعه ورد
محمد: ميحتاج تفرشين الورد لان انتي ورد
شكرا عالمجامله من رخصتك اريد اروح اتاخرت عفته ومشيت.

محمد: اني ادري بيها ضاجت وهذا الموقف اكدلي حبها إلى بس ماعندي جراه احاجيها واعترفلها بحبي اكتفيت بالصمت والقلم والورقه إلى اعبر كلشي بداخلي الهن عافتني ومشت وادري داخلها مجروح ومكسور اتمنيت احضنها كدام العالم كله واكلها تفاحتي لتذبلين تره قوتي وحياتي استمدها منج صح اني غلطت وتواعدت بس ادري برفيف متجي لهاي الجهه دوامها بغير جهه وماعندي شي ويه البنيه إلى شافتني غير مجرد تسليه وسوالف مراهقين بس تبقى رفيف نجمتي وتفاحتي ردت اكلها اوكفي انتظري بس حتى ماانطتني مجال راحت وهي شايله كسرتها وخيبت املها ومن هاي اللحظه قررت احاجي امها واخطبها كافي بعد اني موصغير وحالتي كلش زينه وشغلي ماشي اتصلت بامها.

محمد: مرحبا خاله اشلونج اني محمد
رحاب: هلا خاله اشلونك شخبارك امك وخواتك اشلونهن
محمد: كلنه بخير خاله اريدج بموضوع مهم جدا ولازم التقي بيج
رحاب: ياستار احجي شكو شصاير رفيف مسويه مصيبه بالجامعه؟ لو اهلك لو شنو الموضوع
محمد: لاخاله هو صح الموضوع يخص رفيف بس هي مامسويه اي شي والبنيه تروح وترجع هي وصديقتها ومعليهن باحد واني مراقبها صارلي هواي والبنيه كلشي ماعدها
رحاب: ها مراقب رفيف لعد شنو الموضوع المهم.

محمد: كتلج مو مال مخابره اليوم العصر امر عليج ونفتر بالسياره واحاجيج ماشي
رحاب: ماشي نشوف شنو تاليتك
محمد: مع السلامه خاله
رحاب: - الله وياك يمه...
محمد: - بقيت اعد الدقايق والثواني بس اريد يجي العصر حتى اروح وواجهه العالم بحبي وتصير ام بيتي وزوجتي واجه العصر وبدلت وتحضرت وتعطرت وطلعت عريس
ام محمد: هلا حمودي يمه شنو هالكشخه عيني بارده عليك صلوات على محمد شنو راح تخطب لو متواعد وهيج كاشخ.

محمد: هههههههه لاهاي ولا هاي رايح بشغله واندعيلي تصير
ام محمد: مكضيه يمه والله يسهلك
محمد: اني رايح حجيه متحتاجه شي
ام محمد: الله وياك عمري اريدك طيب وازوجك واشوف جهال جهالك
محمد: اي يمه فدوه هاي الدعوه المعدله. طلعت واني كلي امل بام رحاب توافق والتقينه وكعدنه وحجيتلها إلى بداخلي كله.

رحاب: ماعندي بنيه الك انت فد واحد ابو بنات وكل يوم بحضن وحده واني ماعندي غير هالوحده ماانطيها لواحد صاحب علاقات بتي طفله وكلشي مدبر بروحها محمد سد الموضوع وابتعد عن بتي نهائيا.

محمد: بحيره وحزن خاله مروتج مستعد انزل ابوس رجلج بس وافقي البنيه اني اموت عليها وهي هم تحبني صح محد معترف للثاني بس واحد يحس بالثاني لتفريق بين حبيبين وانتي حبيتي واتزوجتي وشوفتي قهر فراق الحبيب شنو واني مستعد اقطع كل علاقاتي ومعليا باي بنيه واني حالتي زينه وبيتي وحدي وسيارتي وشغلي وشهادتي داادرس وان شاء الله اتخرج واخلي بتج اسعد انسانه بالكون اعوضها عن كل حنان فقدته.

رحاب: محمد سد الموضوع وخليني محترمتك لخاطرامك خوش مره واهلك خوش اهل واذا ادكول عالشهاده تره شهادتك خلك اكاديميه روح ابني بحالك وعوف رفيف ولو تموت انت ورفيف مااخليكم لبغض قطنه وشيلها من اذنك
محمد: خاله والله احبها وانتي إلى تامرين بي اني مستعد اسوي وشنو اطلبين ضمان لبتج اني موافق عليه والبنيه اعرفها من المتوسطه وصديقه خواتي فدوه لتحرمينه من بعض.

رحاب: عوفها وروح شوف حياتك يوم يومين وواحد ينسى الثاني هذا حب مراهقه بعدكم العمر كدامكم وكل واحد يكون اسره ويعيش حياته
محمد: افهم من كلامج هذا جواب نهائي ماادز اهلي يعني...
رحاب: لدزهم لان يتفشلون وهذا جواب اخير.

محمد: صار خاله وصلتها لبيتهم وكلي حزن وقهر تفاحتي راحت من ايدي ليش خاله تخربين حرب سنين ماانكر اني عندي علاقات بس كلهن نزوات بس رفيف جانت حلم عمري إلى درست واشتغلت ورتبت وضعي كله حتى من اتقدملها ماعندي سبب انرفض بي.

رحاب: رجعت للبيت لكيت رفيف بالغرفه دتقره ردت افاتحها بالموضوع اشوفها صدك تحبه لو لا بس لا مااحاجيها وهي وينها ووين الحب اني سديت الموضوع من يمي اني اختار الزوج المناسب الها هي شمفمها عفتها وفتت
اجتي ماما من بره تباوعلي كانهه تريد تحجي شي بس متكدر ردت اكلها اشبيج بس اخاف تكب بوجهي اوي اني شنو بيها هي اشوكت فتحتلي كلبها وحسستني بتها حتى هسه تحجي اني إلى بيني كافيني.

وداومت ومرت الايام عادي بين بيت ودراسه ودوام ومحمد بعد ماخابر ولا سمعت صوته وحتى من اخابر علو اخته ميرد هو ابد ومن اسال اخته عليه ادكولي بس زين ملتهي بدوامه وشغله بس رغم كل هذا بقى عندي امل بداخلي انو اكو سبب بعد محمد عني
جاسم: دخلت للكليه دااجيب صحه صدور محتاجها بالدائره مالتي لكيت ولد صديقي اسمه علي بس هو اصغر مني وراسب هلو علاوي اشلونك شخبارك ولك اشوكت تتخرج ماكافي حلتلك الكليه والبنات.

علي: ههههههه وليش اطلع دشوف الطيور كلها كدامي الحك اتخرج واكابل الموظفات وكل وحده بكد جدي وحايره بالطبخ والتنظيف خليني مكابل هالورود والشكول إلى تفتح النفس انت شخبارك وين ماوين يكلون تعيينت
جاسم: الحمد لله زين وتعينت ياخويه واسطه ودفعه ودادوام محاسب تابع لوزاره العدل
علي: اييي الله ربك بخت عاد انت جاسم افندي ماكو مثل حظك شتريد يصير
جاسم: ههههههههه يمعود جوز عن حالي.

رفيف: طلعت من المحاضره والجو ظهريه وحاره بنهايه شهر الرابع وبس اريد ارجع للبيت تعبانه وجوعانه وخايفه مابقى شي ع نهايه السنه امشي ادور على علي التحفه هذا وين ولي يلا نريد نطلع عفيه خط كلها نايمه بهالجامعه الغبره شعاجبهم منها ماادري اي هذاك علي واخيرا لكيته
علي: اني واكف ومندمج ويه جاسم واسمع وحده ادكولي وينك يمعود صارلي ساعه ادور عليك وجهازك مغلق التفت.

جاسم: اجاني صوت هزني هز اباوع بنيه جنها ورده مفتحه هي وشعرها والخدود سمان وحمر وكاتلها الحر مبينه وتمشي وتجر النفس كوه ودتحجي ويه علي
علي: اشبيج على كيفج حتموتين دسلمي هسه بالبدايه دومج مستعجله بس تردين اطلعين
رفيف: - بضوجه عود هلو يلا حباب اريد اطلع حاره وتعبانه وجوعانه خلصنه محاضرات شكو بعد باقيين
جاسم: تره السلام لله شو بس لعلي سلمتي.

رفيف: واني شمعرفني بيك حتى اسلم عليك وانت منو حتى اسلم عليك علي اني بالخط بسرعه اجمع الباقين حتى نولي وعفتهم ومشيت بس صدك ضوجني هذا صديق علي وانت منو حتى اسلم عليك كبر لذاك الطول جنه عمود اعتقد طوله مترين وربع هههههه اوي واني شنو بطوله
جاسم: علاوي اخيك منو هالكيك إلى اجه ولك احجي هاي شنو بلا ربطه و تحجي معصبه وانوب ترد بثقه لك اريدها.

علي: اشبيك وكعت حتموت هاي رفيف طالبه صف اول متفيدك هاي مدور علاقات وعدها العالم كلهم اخوتها وموبحال احد تجي محاضرات واطلع ركض للبيت وثاني شي البنيه جيرانه واعرف امها واهلها وصوني عليها جاسم عوف البنيه بحالها مهما يكن محسوبه عليا
جاسم: ولك لا ليروح بالك بعيد حبيتها واريد اتقدم عليها اذا خوش بنيه.

علي: ها اذا هيج توكل بالله البنيه اني اضمنها الك لا علاقات ولاحب وبت خير وهالوحده لاهلها ووالدها متوفي وهي صغيره بحيث حتى متذكره
جاسم: هااا الله يرحمه اني اريدها مو قصدي لعب بس اريد اعرف جوابها بالبدايه حتى ادز اهلي
علي: تعال باجر وحاجيها وشوف جوابها شنو اذا انت صدك تريدها بس جاسم اذا طلعت نيتك لعب تخرب خوتنه لان كتلك البنيه تخصني وامانه عندي
جاسم: لايخويه شنو القصه كتلها رايدها حلال الله.

علي: الله يقدم إلى بي الخير.

رفيف: رجعت ومر اليوم عادي ماكو اي شي جديد ونمت وكعدت ثاني يوم بدلت لبست تنوره سوده وقميص ابو السحاب ابيض وشعري كصيته كاريه بس بده ينزل على اكتافي اجه الخط وطلعنه وصلنه للكليه دوام ومخاضرات عادي وباخر محاضره اشوف الولد إلى شفته البارحه نفسه واكف بباب القاعه ويباوعلي اني غلست عفته واخذت محاضراتي وطلعت من القاعه وصلت لباب البنايه اسمع واحد ورايه يكولي اوكفي يبنيه درت وجهي شفت الولدنفسه الطويل صديق علاوي.

جاسم: بس اوكفي دقيقه يبنيه اريد احجي وياج
رفيف: - اني من كثر مااستحيت رجليا وحده كامت اطخ بالثانيه اريد ارد مااعرف كتله احجي شتريد...
جاسم: اني جاسم صديق علاوي وشفتج البارحه وعجبتيني وسالت عليج ومدحوج واني جايج من الباب تقبلين بيا لو لا
رفيف: باوعته هذا شحجي وياه والقلب مسدود ومقفول ومفتاحه يم محمد كتله اعذرني خويه اني مااتزوج ولاارتبط اني بعدني صغيره وعندي دراستي بالدرجه الاولى من رخصتك باي.

الفصل التالي
جميع الفصول
روايات الكاتب
روايات مشابهة