رواية رهان ربحه الأسد للكاتبة منال سالم الفصل السادس والأربعون
كان الجميع متلهفاً لمعرفة أي أرقام سوف يحصلون عليها، فقد قام المدرب بطي جميع الأرقام وبدأ الجميع في انتقاء ورقته و انتظار معرفة منافسه...
المدرب: أنا فرنطت الورق كله، يالا كل واحد يمد ايده ويسحب رقم، وأنا أخر واحد هسحب رقم، وطبعاً المحظوظ هو اللي هيلاعبني...!
معتز في نفسه: تقصد المرحوم هو اللي هيلاعبك
زياد: اوك، استعنى ع الشقى بالله
المدرب لمعتز: اتفضل.
معتز: يا منجي من المهالك يااااا رب، قل أعوذو برب الفلق
المدرب لنور: اتفضلي اسحبي رقم
نور: حاضر
المدرب لحسام: اتفضل
حسام: تمام
وليد: أنا هسحب ورقتي
عمر: يالا يا كابتن خلينا نشوف هنلاعب مين ونفرمه
زياد: يا سلام لو تكون من نصيبي
عمر: يااااه، ده يوم المنى لما تكون واقع تحت ايدي
مازن: أنا سحبت ورقة
رامي: وانا تمام.
المدرب: كل واحد يفتح الورقة بتاعته ويقول رقمه، وزي ما فهمتكم أن رقم 9 هيلاعب رقم 2 ورقم 6، رقم 1 هيلاعب رقم 5، رقم 3 هيلاعب رقم 8، ورقم 4 هيلاعب رقم 7، هنبدأ من ع اليمين، اتفضل يا حضرت الرائد..
بدأ الجميع في فتح أوراقهم، وكانت النتائج كالأتي...
معتز وهو يفتح ورقته: اشمعنا أنا الأول، يا رب استر، أنا رقم رقم، لأ مش ممكن رقم 1...
المدرب: كويس
وليد: ممم، طلعلي رقم 7، يعني هلاعب كده مين؟
المدرب: هتلاعب صاحب الرقم 4، وده لسه هنعرفه لما نشوف باقي الأرقام
حسام: أنا رقم 8
معتز: ايه ده يعني أنا مش هلاعبك، الحمد لله
حسام: ياخي ده أنا ربنا بيحبني إني مش هلاعبك، كان زماني اتفقعت من عمايلك
معتز: الحمدلله، ربنا اللي عالم بيا
عمر: أنا رقم 6
المدرب: مممم، يبقى انت هتلاعب اللي هيطلعله رقم 9
عمر وهو ينظر لزياد: وأنا جاهز أطلع أيمانه
المدرب: الباقي يكمل فتح أوراقه لو سمحتم
مازن: أنا رقم 3.
المدرب: يبقى حضرتك هتلاعب الرائد حسام
مازن: اوك
معتز: الحمدلله لسه الأمل موجود ان ألعب مع بنت حماتي المستقبلية
زياد بضيق بعد أن فتح ورقته: أنا رقم 2
عمر: يا خسااااااارة، كان نفسي ألعب قصادك
المدرب: معنى كده ان الرائد زياد والرائد عمر هيلعبوا مع صاحب الرقم 9
رامي: أنا رقم 4
معتز: ايه ده يعني انت هتلاعب وليد يا رامي؟
رامي: اه
وليد: كويس مش بطال
معتز: كده معدتش فاضل إلا رقمين، ياااااا رب، قربت خلاص من حلمي...
المدرب وهو يفتح ورقته: وأنا رقمي 5!
معتز: يعني هتلاعب مين؟
المدرب: ان شاء الله سيادتك!
معتز: هااااااااار اسود عليا وع اللي جابوني، وقع في قرعتي البيج شو! ماكنش يومك يا معتز، يا فرحة نجلاء فيا، كان بدري عليا، حسرة قلبي ع شبابي اللي راح هدررررر
حسام معلقاً: معنى كده ان صاحب الرقم 9 هو...
نور بفزع: أنا معايا الرقم 9
الجميع: نور!
معتز بحزن شديد: ليه يا ربي مخلتش البونية الغلبانة دي تلاعبني.
زياد: يعني ايه الكلام ده؟
المدرب: يعني الاستاذة هتلاعب سيادتك مرة، والرائد عمر مرة
عمر بفرحة: متقلقيش يا نور، أنا هبقى حنين معاكي
نور لنفسها: يا ربي يعني أنا مش قادرة ع واحد، هلاعب اتنين سوا، ده ايه النحس ده، لأ ومش أي اتنين، ده زياد وعمر والاتنين أنأح من بعض!
زياد بضيق: لأ انا مش موافق ع الكلام ده، ازاي هي تلاعب اتنين
المدرب: دي القواعد يا حضرت الرائد
زياد بنرفزة: لأ لازم تتغير.
المدرب: أسف، مقدرش، حضرتك عارف ان طالما وضعنا شروط وقواعد للعبة استحالة تتغير، ومن فضلكم يالا عشان نبدأ
اتخذ الجميع وضعية الاستعداد لبدء التدريب و...
معتز: ولا تحسبن الذين قتلوا في سبيل الله أمواتاً بل احياء عن ربهم يرزقون
المدرب: اطمن يا حضرت الرائد معتز، انا هاكون خفيف معاك
معتز: لأ ماهو واضح، هتوحشوني يا عيال، خدوا التي شيرت ده، يمكن يبقى ذكرى
المدرب: يالا..
معتز: اشهد أن لا إله إلا الله، هيلا هوووب.
وليد: جاهز يا رامي
رامي: تمام يا عريس
وليد: طب كويس انك عارف اني عريس عشان تاخد بالك، فاهمني طبعاً
رامي: عيب عليك، اطمن، مستقبلك مضمون
حسام: يالا يا مازن
مازن: انا مستعد
حسام: يبقى ناخد وضع الاستعداد
مازن: اوك
نور: بصوا بقى انتو الاتنين، أنا ماليش في جو الأكشن والضرب ده، انا بصراحة معرفش اعمل أي حاجة خالص
عمر مقاطعاً: اهدي ومتقلقيش، أنا هبقى حنين ع الأخر معاكي
زياد بضيق: لا والله، وده من امتى ده؟
نور لعمر: أنا واثقة فيك يا حضرت الرائد بس برضوه خلي بالك عليا وانت بتلعب
عمر: اطمني، مع عمر هتنسي نفسك خالص
زياد: اللهم اخذيك يا شيطان، وأنا سيادتك؟
نور لزياد: بصراحة أنا، أنا مش ضمناك
زياد: يا شيخة، وضامنة البيه
نور: بصراحة أه
زياد: صبرني يا رب
عمر: هتبدأي مع مين فينا الأول
نور: آآآ، معاك
عمر بفرحة: ايوووه بقى، خليها تحلو..
زياد: سمج!
عمر: قوليلي بقى يا قمر تحبي نسخن الأول ونبدأ ع الهادي وواحدة واحدة، ولا لأ، قوليلي ليكي في ايه بالظبط، و فهميني دماغك وأنا هريحك ع الأخرررر
نور: ممممم، سيبني أفكر
زياد: هي قضية! اتنيلي اديلوه شلوت خلينا نخلص
نور: الله! ماتسيبني أركز وأشوف هنلعب ايه؟
عمر بخبث: ايه رأيك نلعب عريس وعروسة؟
زياد: ما تحتررم نفسك؟ هو انت مفكرها دخلة! ده تدريب مهبب وابن ستين في سبعين...
نور: بصراحة انا مش عارفة حاجة، شوف انت المناسب ليا وعلمني
عمر: سيبلي نفسك وأنا هنسيكي الدنيا كلها
زياد بضيق: يااااااااااااا رب!
بدأت نور تدريبها مع عمر، والذي كان بمثابة حمم بركانية ملتهبة تُصب فوق رأس زياد، فقد كان ينفجرغيظاً مما يقوم به عمر مع نور...
زياد بضيق: الله يقطع المعسكر ع التدريب ع المدرب ع عمر في ساعة واحدة، أل أنا كنت ناقص حرقة الدم دي!
قام عمر بامساك ذراع نور ثم أدارها في خفة لتصبح مكبلة في أحضانه
عمر: دي بقى بنسميها حركة التثبيت
زياد بضيق: ثبت ياخويا ثبت، ماهي جيالك ع الطبطاب
نور: أها، لأ حلوة وسهلة فعلاً
زياد: يا مثبت العقل في الدين يا رب
عمر: حلوة عشان انتي اللي معايا، عاوز أوريكي حركة الشقلبة
زياد: اتشقلبوا عليك بدري يا زفت الطين
نور: لأ بس أنا كده ممكن أقع وأتخبط.
عمر: تقعي وأنا موجود؟ عيب عليكي، ده أنا هشيلك وأحطك جوا رموش عنيا قبل ما تتخبطي
زياد: اتشالت مربعن يا شيخ
نور: هههههههههه ميرسي
عمر: قمر يا ناس، انتي عارفة كان المفروض مكاني مايبقاش هنا، كان مكاني آآآ...
زياد مقاطعاً: كوكب زحل يا وش البومة، مش هنخلص بقى، عاوز أشتغل أنا
نور: الله! مش بندرب
زياد: بتدربوا ولا بتتمرأعوا
المدرب: Stop!
معتز: اخيرااااااااااااا، أنا مش مصدق نفسي اني لسه عايش، ده انا اتبهدلت بهدلة، الحمدلله يا رب
المدرب مكملاً: الرقم 9، أقصد يعني الاستاذة تبدل وتدرب مع صاحب الرقم 2 وهو الرائد زياد
عمر بضيق: هو أنا لحقت!
زياد: أحسن
المدرب: في timer موحد للجميع، ووقتك خلص
عمر: يوووه، مكونتش اعرف
زياد بخبث: يالا يا نور
نور بقلق: آآآآ، استر يا رب.
بدأ زياد تدريبه مع نور والذي كان بمثابة مصارعة حرة غير متكافئة بالمرة، حيث قام بإدارة ذراع نور للخلف وثنيه والضغط عليه بقوة..
زياد: دي بقى حركة التثبيت اللي على حق
نور: آآآآآآآه
زياد مكملاً: عاوزة تعرفي حركة الشقلبة أهي
قام زياد بعدها برفع نور عن الأرض وإدارتها في الهواء ثم القائها على ظهرها وتثبيت يديها على الأرض
نور: كفااااااااااااااية
زياد: ده لسه في حركات كتير، اصبري انتي بس ع رزقك.
نور: مش عاوزة حاجة
زياد: وانا وقتي لسه مخلصش...!
في منزل طاهر السويفي
رباب: لازم نوصل لحل يا طاهر وإلا هتحصل كارثة
طاهر: ماهو مافيش قدامنا غير ان زياد يوافق انه يتجوز نور
رباب: ده لازم اللي يحصل
طاهر: طيب احنا عاوزين نفكر ازاي نفتحه في ده، ونقنعه بالموافقة في أقل من اسبوع
رباب: اسبوع كتير، ده احنا محتاجين يومين تلاتة، المفروض هدى هتكلم قرايبها النهاردة وتحدد معاهم معاد كتب الكتاب
طاهر: مممم..
رباب مكملة: احنا معدناش وقت نضيعه، لازم أنا وانت نحدد المعاد وما على زياد إلا التنفيذ
طاهر بعد لحظات من التفكير: الظاهر اننا مضطرين نعمل كده
رباب: حتى لو مكنش في الموضوع ده، بصراحة أنا كنت هزعل ان زياد ماينسبش بنت من بنات هدى الحديدي
طاهر: الحق يتقال ولاد اللواء عبد الرحمن الله يرحمه متربين وأخلاق، زي أبوهم بالظبط
رباب: ايوه، وانا كان صعبان عليا اننا نضيع نور من ايدينا
طاهر: اها..
رباب: احنا نتوكل على الله ونبلغ هدى بمعاد كتب الكتاب، ومايبقاش قدامنا غير اقناع زياد بالجوازة
طاهر: ممم، احنا مضطرين لده.
في منزل عبد الرحمن فوزي
اتصلت رباب بالسيدة هدى لتبلغها بالقرار النهائي الذي توصلت له مع زوجها طاهر..
رباب هاتفياً: ألووو، السلام عليكم، ازيك يا هدى
هدى ويعلو صوتها نبرة حزن: وعليكم السلام، ازيك يا رب يا أختي
رباب: صلي ع النبي كده واسمعي اللي هاقولهولك
هدى: اللهم صلي وسلم عليه
رباب: أنا اتفقت مع طاهر جوزي ان معاد كتب الكتاب هيكون الاسبوع الجاي
هدى: طب وزياد؟
رباب: متقلقيش، دي مهمتي أنا وأبوه نقنعه بده.
هدى: بس، بس
رباب: مش قدامنا إلا اننا نحط العيال قدام الأمر الواقع، وإلا هتحصل كوارث
هدى: ماهو أنا خايفة من كده
رباب: وبعدين بعيد أن أي مشكلة، احنا من الأول قايلين اننا عاوزين نناسب بعض، مش فارقة بقى الطريقة هتكون ازاي، بس المهم اننا في الأخر نبقى نسايب وعيلة واحدة
هدى: ربنا يعديها ع خير
رباب: ان شاء الله خير...!