قصص و روايات - قصص رائعة :

رواية رحل همي حين عرفتك للكاتبة زهراء أمجد الفصل العشرون

رواية رحل همي حين عرفتك للكاتبة زهراء أمجد الفصل العشرون

رواية رحل همي حين عرفتك للكاتبة زهراء أمجد الفصل العشرون

شهاب: - يلا حجية اتوكل اني لعد بعد الشغلة صارت بيدج جيسيلي نبضهم حتى أحاجي عمامي واخطبها...

ربيعة: - خلي تمر يومين واني اخابر ام عيسى
هل ايام انشغلت بخطبة حسن وتحضيراتة...
شهاب: - هاي هية حجية بس مو تشتليني...
ربيعة: - لا يمه هو اني هم اكيف تتزوج انت بس لازم نقدر وضعهم هسة
يرتاحون هل يومين واخطبها الك...
ازل: - اليوم اية تجينا طبعا اية صار عدها ولد
وسمتة أمير
اليوم خابرتني تدك وتلطم أموري بعد زغير وهي شاكة بروحها حامل...
اية: - ولج ازيلة شلون بية هم حامل والله اموري بعد زغير...

ازل: - بلة ما تنجبين شكو ما اخذتي مانع
اية: - ليش هو يقبل ما مصدك من كتلة يمكن حامل
ايكلي اي والله والنعم مني حبلتج بنفس السنة بأثنين
ولج ازل ستوة طلع الأربعين أمير شسوي...
ازل: - قل أعوذ برب الفلق لج بابا أخلاقي شلون تحجين هيج وياي
ههههههههه دعي الرجل يكثر نسله...
انتن بنات أحمد ياخذجن الواهس على الخلفة...
اية: - انجبي راح يجيبني يمكم اريد حلويات من إلى تسويهن حبابة...
ازل: - أبكي توسلي ذلي نفسك.

نوحي بين يدي كما ينوح الجريدي...
اية: - شوف شوف اني شلون عجبني غراض وجبتهن عود الج
بس يلا خلي اوزعهن انتي ماتردينهن
ملكة وعندج كلشي...
ازل: - حبيبي ايوتة تردين كيك بالكاكاو لو بالفراولة
ادري بيج تحبين الكاكاو اصلا اني
موصية امي تجيبلي باودر كاكاو
وراح اسويلج
بسكوت كاستر مثل متحبي...
ادللي انتي وصخلج الجديد
اية: - صيري حبابة من البداية لعد وبعدين شمدريج ولد كبر...
ازل: - إذا ما طلع ولد اتفلي بوجهي.

إحساسي ايكلي ولد...
اية: - بجاهك سيدي ومولاي يطلع بنية
أريد اتفل عليها...
ازل: - ادري ضآلة بكلبج ليش
توصلين واتفلي عليه...
اية: - يمه حبيبة روحي ولي سويلي أكل اتفل على وجهج الحلو شلون...
ازل: - اطفري خية طفري انتظرج تجين...
دخلت المطبخ احظر لأية كيك وبسكوت كاستر
مر الوقت عليه واني بالمطبخ
ورة ساعتين
اجتي اية
وانشغلت وياها...
اية: - ازل تدرين بشغلة
ازل: - شنو شكو
اية: - حيدر مرتة حامل...

ازل: - هه طبعا تحبل شنو قابل ماخذها مراية الله يهنيهم...
اية: - زين شوكت انتي تبدين ترممين حياتج
هو عاش واتهنى...
ازل: -شبيها حياتي اتخبل عايشة بين اهلي وناسي والي أحبهم
مدللهه بين اخواني و امي و ابوي...
اية: - شدي حيلج حتى ترجعين السادس...
ازل: - دكومي نأكل
وانلصمي...
امل: - احممممد احمدددد
كومي ازل صيحيلي ابوج من الإستقبال ما يسمع من صوت المعلق و اللعبة...
ازل: - انتي تصيحين على رجلج اني شكو تكوميني.

تردين رجلج روحيلة...
امل: - أنطوني الجفجير أريد اشوف هو رجلي مو ابوج يعني كوووومي...
ازل: - بعد كلبي يمه رايحة اصيحة
خليت وطفرت اصيحة...
بابا بابا امي اتريدك
احمد: - خلي تجيب جاي وتجي هنا ماكو أحد...
ازل: - عيني امولة صرت مبعوث الأمم المتحدة من وراج انتي ورجلج واحد يدزني على الثاني يريد جاي وايكول خلي تجي للاستقبال
ماكو أحد...
امل: - دولي سوي جاي و لاتلغين زايد...

ازل: - تهي بهي رجلي لو رجلج أمري لله رايحة اسوي جاي
عفتهم ورحت للمطبخ...
امل: - أحمد خابرتني ام شهاب اليوم وطلبت ازل لاشهاب...
احمد: - صدك تحجين امل ام شهاب تريد ازل ليش ما اجة شهاب حجالي...
امل: - والله يا أحمد شكلك خابرتني وكالت حاجولي البنية حتى إذا موافقة
وأخواتها موافقين نسوي كل شي رسمي...
احمد: - والله شهاب ما يتخير عن عيسى بس ازل شنو رأيها...

امل: - ما محاجيتها بعدني ما محاجيتها هي خابرتني ام شهاب واجيتك...
احمد: - دخلي تجي ازل ونحاجيها ونشوف شهاب ما يتعوض حتى إذا قانعة
بعد الله يكتبلها الخير...
ازل: - خير خير بس لا كاعد تتغازلون والله اهد
يعني اني اسوي جاي وانتم تتغازلون...
امل: - صمي حلكج اني شكايتلج على هاي السوالف عيب امي
شنو تتغازلون...
ازل: - يا كلمة ردي لاهلج بطلت يمه حتى الكلمة زعلت منج شنو السالفة...

احمد: - تعالي يا بعد شيبي امج تخجل وانتي تحرجينها...
امل: - طلع عينها بعد هو شخربها غيرك، وغير دلالك هذا...
احمد: - وليش ما دللها هاي زغيرتي خاتمة احزاني وافراحي
انتي آخر شدة وكعت بيها امج...
وانتي دلال يحلالج يوم إلى ازفج بيدي لليقدرج...
ازل: - يا بابا الله يخليك نور بكل ظلمة بحياتي
والله يرزقني فد واحد حنين مثلك وايغازلني مثل ما تغازل امل...

امل: - انجبي امل بعينج ولج انتي ما تستحين كاعدة بحظن ابوج وتدعين تردين رجال...

احمد: - هسة يا حبيبي انت ليش تغارين ادري لأن كاعدة بحظني ازل بس هاي بنتج عيب تغارين منها
اعوضج بغير وقت...
امل: - يا يا يا دشوف شيحجي كبالها
أبو عيسى بنيتك بدون كلشي طالعة عينها
احمد: - ازولة إذا كتلج اكو واحد رايدج للزوج
واني عن نفسي موافق عليه...
ازل: - منو هذا عريس اللقطة وسعيد الحظ
منو هذا إلى يتجرأ يحط عينا عليه
امل: - هسة مو محترمينج ونحجي وياج مثل الاوادم...
ازل: - يعني ما تشاقون أكون خبطة.

العفو أقصد خطبة
احمد: - شهاب رايدج...
ازل: - شنوووووووو الغول
أخو جوري
جبس بابا عضلنجي
رايد يتزوج (شبهته بجيس الجبس ابو ثنين بربع بيه رسم واحد عضلات )
يتزوجني اني...
امل: - وكرص حتى كرص شكو نفزعتي...
ازل: - اعذري صوتي يا امي يبدوا اني بحاجة لكرط خيارتين
لأن مكاعد اسمع عدل...
أحمد: - ههههههه لا بنتي إلى سمعتي صحيح
شهاب طالبج للزواج واني موافق بعد انتي شتكولين...
خلي اكلج شهاب مأخذ كل صفات أبو رجال من ظهر رجال.

يا بنتي ماريد اجرح امج وأذكر ابن أخوها شلون عافج بااول عثرة بحياتج
وإذا تكولين على الحب
فالحب يجي بعد الزواج
شهاب عندة إلى راح يسعدج
اني يا بابا من انطيت خواتج صح ما أخذت رايهن
بس ما جبرت وحدة بيهن
ولا وحدة منهن اشتكت من زوجها الأب من يختار لبنتة يختارلها إلى يشوف بي صفات الزلم
واني حيدر ماشفتة مناسب الج...
وجنت متأمل رفضج
بس انتي يا بابا وافقتي علي تالي تركج
شهاب يعرف كل حالتج سولفتلة.

ورغم هالشي قبل بيج واجة يخطب معناها صادق بنية وياج...
فكري بالموضوع وتعالي كوليلي...
ازل: - تركت بابا وأمي ورحت لغرفتي
كعدت أجمع أشياء بعقلي
أريد أخذ قرار صح
قررت استخار بي بالقرآن
طلعت اتوضيت
ورجعت
عدت الخيرة مرتين
وبالمرتين
طلعتلي اية الطيبون الطيبات اتفائلت بس بعد
ما قررت...
مددت على سريري وعيوني للسكف
يا ازل وافقي
شمنتضرة حيدر مثلا
هذا مرتة حامل وراح يصير عندة طفلة
شمتانية...
هو استمر بحياتة.

خالة ام شهاب حبابة ما عاملتني مثل خالتي أم حيدر...
وجوري صديقتي وحبابة بس دراستي شلون اخاف هم ما يخليني ادرس...
إذا قبل ايخليني ادرس راح أوافق
بابا هو ضمان إلى بكلامه ماطول كال زين معناها
زين...
مرت يومين واني ما رديتلهم خبرر
يوم الثالث صاحني ابوي وسألني
احمد: - ها ازل شنو رايج هسة شقررتي...
ازل: - بابا اني أوافق بعد ما تسمح لي اكعد وياة
واحجي عندي موضوع لازم أخذ رأي بي إذا يوافق هو اني موافقة...

أحمد: - هاي هية اني اخابر شهاب واخلي يجي وكعدوا احجوا من حقكم...
ازل: - هاهيه بابا براحتك خابره...
احمد: - خابرت شهاب وكلي باجر يجي بس هو
حتى تكعدون وتحجون اصلا هي هاي نظرة شرعية ومن حقكم...
ازل: - بعد كلام ابوي صرت أنتظر باجر واني احظر الحجي كلة إلى أريد اكولة...
شهاب: - دخيل الله شكد متحمس
وخصوصا أبوها طلب نكعد سوة
معناها عدها موافقة مبدئية...
ما صدكت صبح الصبح
كشخت وامي تمشي وراي.

ربيعه: - يمه خلي بالك كلشي
وانتبه لطريقك
لا تسوق بسرعة
لا تعاملها بالأسلوب جاف خليك ناعم وياها بالحجي
شهاب: - حجية صدك تكذبين توصيني على ازل
ادعيلي الله يجعلها نصيبي الله يخليج...
ربيعة: - روح يمه كلبي مطمن عليك
وحاسني هالبنية الك
روح شوف شتريد منك...
شهاب: - يلا يمه رايح
ربيعة: - الله وياك يوم بالسلامة
شهاب: - طلعت من بيتنا رايح لبغداد
أريد اشوف ليش طلبتني إذا على الشوف اني مو غريب عنها شافتني.

شوراج يا بنت أحمد...
وصلت لبيتهم.

الفصل التالي
جميع الفصول
روايات الكاتب
روايات مشابهة