رواية رحل همي حين عرفتك للكاتبة زهراء أمجد الفصل الحادي والعشرون
شهاب: - طلعت من بيتنا رايح لبغداد
أريد اشوف ليش طلبتني إذا على الشوف اني مو غريب عنها شافتني
شوراج يا بنت أحمد...
وصلت لبيتهم طلعلعلي عمي احمد...
احمد: - هلا وليدي شلونك اتفضل...
شهاب: - الحمد لله بخير عمي وانتو شلونكم زاد فضلك، دخلت كعدت بلاستقبال، انتضر السنيوريتااا شوراها الله اليستر ههههه.
احمد: - ازل بابا حضري نفسج شوية وتعالي سلملي...
ازل: - حاضر بابا
عافني ابوي واجتي القوات المغولية هبة وايناس يتراكضن
ومخبوصات وحدة تكول للثانية شراح نلبسها...
هبة: - ولج شلون نلحك نحط مكياج آلهة ونرتبها...
ايناس: - خرب ولج ازل كومي ترى الولد
عين الحار باردة عليه عبالك اليوم عرسة مو جاي يشوفج
على الاناقة والجمال وانتي بعدج بهل الأتراك...
ازل: -لا تنخبصني ولا تنوحن فوك راسي انطيني اتراكي الرصاصي يمج.
وشال اطلعن مني...
هاي اني و هاي طبيعتي مو باجر عكبة ايكول غشيتوني
خلي يعرف عيوبي قبل حسناتي
حتى لا بأ اول موقف يعوفني
دفعتهن وايناس تسوي...
ايناس: - راح الزين ماضن بعد تلكونة
ازل: - دولن مني ولن...
بدلت اتراك بسيط لون رصاصي وبيه فيكة بسيطة
لبست الشال وطلعت من غرفتي...
امي كالت أدخل وياج
دخلت كلت السلام عليكم
شهاب: وعليكم السلام ورحمة الله...
امل: - شلونك يمه أمك شلونها...
شهاب: - هلا بيج حجية والله الوالدة بخير تسلم عليكم...
احمد: - عمي هاي ازل كدامك بعد شتردون احجوا واتفاهموا
اني أخذ امريتي وابقيكم تتناقشون، من تخلصون صيحوني...
شهاب: - بكلبي ايييي دطلع يا عمي مو كاعد على نار
حتى احجي وياها...
طلع عمي وهي مدنكة رأسها ادري شهل الهدوء النزل عليها فجأة...
شهاب: - شلونج ازل
ازل: - انت زين
هاا أقصد العفو اني زينة
شلونكم انتم...
شهاب: - باوعت يمنة يسرى اني وحدي منو احنة.
ازل ترى اني واحد تقصدين منو احنا...
ازل: - برتباك انت والملائكة إلى وياك قابل يعني أسلم بس عليك هم ما ترهم عيب منهم...
شهاب: - اسم الله بنتي بيج شي يا ملائكة جايبتني مناك لهنا حتى تسلمين على الملائكة...
ازل: - لا بس شسمه هذا أريد اكولك شغلة إذا تقبل بيها
اني أوافق عليك...
شهاب: - شنو شروطج كولي...
ازل: - العياذ بالله من الشرط هو موضوع زغنوني مو شرط...
شهاب: - اي شنو هو الزغنوني كولي...
ازل: - دراستي اني أريد أكمل دراسة إذا وافقت تخليني اكمل دراسة
اعتبرني موافقة...
شهاب: - ترى تكدرين تحجين بهل الشئ بدون ما تطكين اصابيعج شكو متوترة
ما عندي اي مشكلة بدراستج.
اصلا ماعندي شي بالبيت والمدرسة مو بعيدة عنا اسويلج نقل وادرسي وي جوري...
ازل: - بعد شمسه يعني اني تعرف حالتي بابا أعتقد حجالك وانت شفت بعينك
اني من تصير ضلمه أفقد من الخوف وضعي شوية حساسة ما اتحمل...
شهاب: - عمي حجالي كلشي يخصج وسهله يابة شنو السالفة اني اريدج على سنة الله ورسوله
كل الإنسان بداخلة خوف من شي معين
ان شاء الله مرحلة وتنتهي لا تفكرين بالموضوع
بس ازل كولي خاف عمي جبرج عليه.
خاف عاجبج أحد ثاني...
أقسم عليج بضلع الزهراء إذا تحبين أحد كولي من هسة ترى إني اتحمل كلشي بس مو الخيانة...
ازل: - لو عندي شخص بالي مادخل بعلاقة وي غيرة ولااقبل بيك من الاصل فأطمئن...
وهسة خلص الكلام بينا الباقي تتفاهم بي وي ابوي واخواني من رخصتك...
شهاب: - ازل راح أكون سند الج بكل وقت وما راح اخليج تندمين على اختيارج...
ازل: - ان شاء الله ما اندم...
عفت وطلعت واني أدعي ربي يكون وياي وينور طريقي...
بعدها التهوا بالغدة كلهم يحظرون...
اجاني عيسى
كلي تعالي...
عيسى: - ازل أخيتي انتي وافقتي على شهاب براضاتج امان عليج خوما لأن ابوي كلج موافق
انتي وافقتي...
ازل: - لا يا بعد دكات گلب أختك انت شنو بابا شوكت جبر وحدة حتى يجبرني...
اني وافقت بعد ما درست الموضوع برأسي
بعدين كافي ما مليتوا مني خلي الزريكة ترتاح من شدي وياها...
عيسى: - ههههههه ولج انتي مدللتنا لو تبقين فوك عمرج عمرين ويانة ما نملج...
ولو تعوفين الزريكة احسن ما تجي ترطن على رأسي...
ايناس: - صارلي ساعة واكفة اتسمع عليكم
أنتظر تجيبون اسمي وادخل حتى اتكولون بنت الحلال جبنا سيرتها واجت...
ازل: - كبور الماتلف الزرك ربي تأخذ بهل الشباب للمكابر
ربي فد كبر على كد الزريكة...
ايناس: - هو اني الزريكة لو انتي وجه السطل شو وخري من رجلي وكلولي شكو تتبسبسون.
ازل: - شكو يعني عيسى أريد غرفتي لمرتة الثانية
وأخيرا قرر يعلن عنها...
ايناس: - عزززززززة بعينج ولج مرته الثانية بعينج تف من حلكج اذانك طرش يا عيسى من كلام أختك الحية...
ربي كضيت عمري مسكينة وامشي بصف الحايط
كلشي ما حويت من الدنيا بس رجلي واختة الحوبة أتريد اتزوجة...
عيسى: - اطلعن برة اثنينجن الله ياخذجن ولجن ما تملن نهارجن كلة مناكر
ولن منا...
ازل: - تعاي خية تعاي باتي يمي اليوم عيسى طردج ولو تستاهلين انتي جلبة وبزع منج اخوي ويستاهل مرة ثانية
بس ميخالف تبقين انثى...
ايناس: - ولج ادبسسز اشحطج هسة من راسج اكو أحد يكولي ليش...
ازل: - فدوة حبيبي انتي بطلي غزل ما اتحمل غزلج أخجل
عفتها وشردت لغرفتي...
خابرت جوري
جوري: - هلا وكل الهلا بمرت اخوي ولج ما صدك راح تصيرين يمي...
ازل: - لج من هسة خلي نحضر القصص والكتب حتى نكعد نقرأ اني وياج...
جوري: - لج اي اني هم راح أبدي اضم فلوسي حتى نشتري بيهن حلويات ونترس الثلاجة ونكعد...
ازل: - عزززة مثل تفكيري الله عليج انريد افلام أجنبية والصبح نبقى...
جوري: - بس عفية اغانيج قديمه ما احب اسمعهن تعلمي تسمعين مثلي حتى نركص وحدنا...
ازل: - انجبي ترحين فدوة لباسل عزيز ودشداشتة
ما حب مطربينج الوصخين...
شهاب: بعد بعد اني مزوج حتى اجيب وحدة تكعد بصفج جوري أفندي
لا وفوكاها تبقين للصبح وياها واني مثلا
شسوي احدثلجن الافلام بلة
تردن بجامات مال باربي بعد اجيبلجن
مصاصات ملاهي
مرجوحة اسويلجن...
ازل: - سمعت الحجة شهاب واني من الفشلة سديت الجهاز وغطيت راسي بالمخدة يبووو يا فشلتي كل موقف تافه هو يكون بي، ادري هذا واكفلي عل كلمه ومراقبني خب حضي البنزرقي...
وجوري: - ههههههه شهاب سدت الخط بعدين شدعوك غير صاحبتي وفرحان راح تصير مرة اخوي...
شهاب: - جوري ادري مرت اخوج وصاحبتج بس اني ماخذها مرة إلى مو تشوفين افلام للصبح وياها شلون خطط من هسة...
جوري: - ههههههههه ترى ازل بعدها بيت اهلها لا تنوح بعد أختك
تجي وتشبع منها وتكوم انت تطردها يمي...
شهاب: - بكلبي دخلي توكع بحظني مو ابن امه وأبوه إلى يعوفها
هيي كافي لا ياخذج الواهس انتي افلتي مني
مددت على التخم بالهول...
واني أتذكر تفاصيلها وهي كاعدة كبالي شكد بسيطة ياربي
تراكها يخبل عليها كصيرونة جسمها ممتلى بااماكن محددة...
خصرها وماادرك ما خصرها اخذت عقلي فرت خصرها
وحتى جفصتها وتوترها.
الشامه إلى باايدها اليمنى...
العلك الأخضر ملفوف بيدها
لفة الحجاب بسيطة
كلشي بيها ما يخليها تروح من بالي سبحانك ياربي...
جمعتنا غريب وغريبة تممها علينا على خير
حاجيت عمي وكتلة على الخطوبة وخابرت خوالي عندي...
سبع خوال كلهم ما بين الدكتور والمحامي والمهندس والضابط...
خوالي الله ناعم عليهم بنعمة وحالتهم متمكنة بلغتهم وماصدكوا...
وكلهم راح يجون من أربيل لديالى لخاطر خطوبتي.
عمي كال أخذ شيوخ وياي أبو عيسى خوش رجال
وشهاب يستاهل ينحجي بخطوبتة...
عمي كال خلي الجمعة الخطوبة تصير هم أخبر
عمامها...
كتلة هاي هية عمي اليوم أربعاء يعني بس باجر
خوالي الخميس يجون هم وخالتي
ياربي والله فرحان بيها...
ازل: - كلشي صار بساع بساع
الجمعة خطوبتنا اليوم بليل كاعدة واجتني رسالة...
( ها هيج مستعجلة على الزواج ما صدكتي عفتج ورحتي لغيري ههه مهناية فضالتي انتي عود ابقي كلما يغازلج بكلمة تذكريني).
ردت علي ( أتزوج واعيش اني عمري ما جنت فضالة لحد اني ازل أحمد راح أخذ تاج رأس كل واحد زبالة مثلك
اني أعلى من أن أكون زوجة لواحد جبان مثلك هل مرة رديتك مرة الثانية اخلي الزلم تردك...
شكد عكرلي مزاجي هل زباله هذا هوه منو حته هبج يدزلي رسالة لو بيه خير جان ضل وياي مو بأول عثرة بحياتي يتخله عني بس حوبتي راح تطلع بيه حتطلع اتمنه من ابا الفضل العباس يأذي كلمن اذاني...
ازل: - مرت هل يومين وامي وايناس وهبة مخبوصات بين تعزيل البيت وبين حجز الصالون
عيني شدعواهم هي خطوبة شكو بدلة يردون
طبعا ما اهتميت لحد ولا لكلام أحد خابرت خالة ربيعة وكتلها...
خالة اني ماريد بدلة ألبس من هسة يعني إذا هسة ألبس بدلة
شخليت للحنة والعرس...
ربيعة: - هم صدك يمه براحتج إلى تردي سوي بس خلي بالج اني أريد جنتي تضوي
اريد اتباهى بضحكتج بين اخواتي ونسوان اخوي...
ازل: - ادللي خالة بس اني حبيت أخذ رأيج بهل الشئ لأن صدك مو مال بدلة...
ربيعة: - هاي هية يمه بكيفج بعد...
ازل: - مرت الايام بسرعه واحنه مخبوصين واجه يوم الجمعة رحنا
الصالون اني وايناس طبعا اشتريت فستان ذهبي
الكاع...
من الصدر صاير سبعة يعني نص الأكتاف تبين من كد ما محفور...
بي حزام كرستال
ومن جوة كلة تول الفستان طويل كلش
لبست كعب وياة...
هم يلا أحفظ هيبتي بصف الغول
ام الصالون اشتغلتلي مكياج كلة بين الذهبي والوردي الفاتح...
واصلا جهرتي حيل تغيرت خصوصا بعد ما حفيت...
خرب بعد بيمن أحلف راحن شواربي وطلعت وحدة ثانية...
اجة عيسى أخذنا من الصالون للبيت
خواتي كلهن موجودات وعماتي
بس خوالي ولا اي شخص منهم...
كعدت اني والبنات اسيل هم جاي وحسن كل ساع صايح عليها...
اني حاليا ضايعة
مادري هل قرار صح لو غلط اكو جزء مني مطمئن
وجزء خايفة اخاف من الخذلان
رغم هل شي سلمت أمري لله...
مرت ساعة وسمعت الجهال تتراكض اجوي اجوي
امي كامت بالباب فتحوا باب الحوش ودخلوا زلم
قسم منهم لابسين قوط وشياكة واضحة عليهم وقسم...
بزي العربي...
عمامي وابوي طلعوا استقبلوهم
شفتة من شباك الهول
بدي زيتوني والبنطرون اسود
مغير تسريحتة شعرة...
معقولة انت قدري
شراح تضملي الحياة وياك يا شهاب...
شلون راح تعاملني هم راح تخذلني لو راح تكون سند...
مثل ما وعدت
راح تكون كد وعدك...
دخلوا كلهم للاستقبال واني بعدني واكفة
جرتني جوري وحضنتني وسلمت عليها
صاروا يجتمعن يمي البنات وياخذن صور...
والاغاني والكل فرحان اباوع الفرحه بوجه امي بس عيونها مدمعه...
شوية وكالو حضروا ازل راح يعقدلهم السيد...
لا يا الله بطلت ماريد صارت صدك
سحبتني سهى ولبستني عباية صلاة بيضة.
خالة ربيعة
حطت هيل بحلكي...
واكف ورة الباب واسمع السيد يحجي بصوت واضح
طلب مني أردد وراه
لحد ما سألني عن موافقتي...
غمضت عيوني
ولزمت ايد سهى
رددت بكلبي يارب أن كان خير فأ ابقيه
طلعت من حلكي كلمة موافقه...
واني ارجف كوة طلعت الكلمة مني
صار
الهلاهل والجكليت يجيني من كل مكان
امي باستني وسهى
خالتي ربيعة وجوري حضنتني ومكيفة والكل باركلي...
شوية وكالوا
بنات
شهاب
راح
يدخل.