رواية رحل همي حين عرفتك للكاتبة زهراء أمجد الفصل السادس
حيدر: - رده فعل الوالده صدمني
ضجت انقهرت...
رفضت الانسانة إلى اعشكها
ازل صح صاحبة صوت عالي وشقاوة وضحك بس وحدة جبانة...
وخويفة امي ماخذة عليها نضرة غلط
ولزكت جيهان الي...
بس اني رحت...
لجدي وحجيتلة كلشي
وكال عوفها عليه
وفعلا...
جدي حاجة والدي وكيف بالموضوع
مسامع لأمي نهائيا
قررنا...
الخميس نروح لبيت عمتي ونطلبها
اريد كلشي رسمي يصير
كنت خايف...
لا عمي أبو عيسى يرفض بحجة الدراسة
لأن ازل شاطرة وهي تدرس علمي.
اصلا دائما...
اسمعة يكول ازل ماريد شي يأثر على دراستها
وهي تحب المدرسة على محبة أبوها واني اصلا
مقرر اعوفها تدرس...
بس أريد اضمنها الي
جدو
كالي هو راح يتعهد لعمي
أبو عيسى على موضوع...
فرحان كلش بلكي كلشي راح يتم على خير وازل تصير الي
عاد جدي إذا كال أقنعة هاي هية
بس امي كاسرة فرحتي كلش.
خلي اخابر ازولتي
مشتاقلها...
دزيتلها رسالة الأول
موجودة...
ماكو لحظات واجاني جوابها
ازل: - اي موجودة،
اتصلت عليها.
حيدر: - شلونج يروحي
ازل: - هلا حبيبي الحمد لله وانت
حيدر: - ما أدري مشتاقلج كلش اليوم
ازل: - امممم شنو سر هالاشتياق بلة
حيدر: - ليش هو اني شوكت ما مشتاقلج سنفورة
ازل. حيدر شبيك صوتك مو على بعضة وماكتلي شصار بموضوع خطوبتنا
حيدر: - لا حبيبي مابية شي انشالله خلال هالاسبوع راح نجي
حاجيت الكل بموضوعنا وجدو
كال هاي هية الخميس نروحلهم لعد
سنفورتي أريد منج شي
تسوي بخاطري...
ازل: - كول حيدر شنو.
حيدر: - اريدج من نجي تكونين هادئة صوتج ما ينسمع وحتى شقة وضحك بطلي كدلم امي.
ازل: - ليش عود ترى هذا طبعي يعني ما مسوية غلط اتشاق وي اهلي
حيدر: - ازل هالمرة اسمعي كلامي وبس هسة شطالب منج
ازل: - اترجاك حيدر لا تنتر بية اني هذا طبعي اتقبلني مثل ما اني مجابرتك عليه تريدني هاي ازل هيج متريدني كول.
حيدر: - انجبي اريدج غصبا عليح مشتاقلج موت اليوم اريدج
اوووف يلكعبة إذا الزمج اخلي اعياطج يوصل لهلج...
ازل: - حيييييييييييدرررر لسانك رجاء
شنو هالحجي
حيدر: - ازل ترى ما كتلج تصلخي ونامي بحضني هو شنو لسانك مفشر عليج قابل
غير حبيبتي واريدج مشتاقلج...
ازل: - هياتك انت نطقتها حبيبتك من أكون زوجتك كدام الله والبشر ساعتها الك كل الحق بية
الحب اله حدود ترى...
حيدر: - انتي وحدة علة وكعت برأسي لج بابا انتي زوجتي اول وتالي بعد شكو
حارمتني منج...
صار شكد علاقتنا وانتي اضفرج متخليني اطخة
ازل: - حيدر كلبي حبك اي الله يشهد أحبك فوك ما تتصور...
بس هالشي مينطيني الحق اخون اهلي اني احجي وياك لأن أحبك وأموت عليك
فبطل هالاسلوب
وياي
الله عليك...
حيدر: - روحي ازولة نامي ملج دخل بحجي...
راحت واني بقيت بناري تثير كلشي بية يريدها
بس ابد ما تنطي مجال...
ابد ما تقبل بغير كلمه احبج لو انتي عمري
شكد اطلب ألزم ايدها لو ردت اشوفها بدون حجاب كله رفض عدها...
صح حرصها يعجبني بس اني ماجاي اللعب عليها
أريد زوجة إلى وحبيبة...
ماريد العب عليها بس اني اعتبر هذا حبي دا ترفضة
رغم هالشي احبها...
بعد مرور بعض الوقت.
ازل: - اكول ماماتي اليوم ايناس ماكو مالها حس...
أمل: - روحي شوفيها اكيد محتارة وي ابنها.
ازل: - انوووووسة انووووسة
ايناس: - تعالي اني فوك بغرفتي
ازل: - رحت عليها واني الضحكة شاكه حلكي
حتى نوم ما نمت كلش فرحانة واخيرا راح نرتبط اني وحيدر...
أنيسة تدري بينا نحب بعض كلشي سوالفها
ايناس: - شكو وراج سوالفي
ازل: - حيدر لح يخطبني الخميس
إيناس: - يوووو مبروك ولج الله يتممها على خير
بس هي انتبهي لتصرفاتج شوية لا تنتبه عمتي والله تلعب بيج لعب، وتعرفيها بعد ما يحتاج اكلج...
ازل: - والله أحاول بس فرحانة...
ايناس: - يمعودة افرحي غير هذا الحب شو مال وجمال ويحبج وفوكاها ابن خالج
اكيد يسعدج...
ازل: - خمس بعينج ولج حاطة عيونج علي ادري بي حلو ههههه بس حطكينة بعين، اعوذ بالله منج...
ايناس: - انجبي عندي اخوج بالدنيا كلها ماابدله واحلى رجال بعيني
ازل: - أروح أكل مركة فاصوليا احسلي ايناس راح تكعد
تحجي قصة حبها العظيم، خل افللللت لا ينفتح حلكج وبعد مينسد شيخلصني ههههههه
ايناس: - كبرررر ولي لا اموتج عابتلج وعابت لسانح رشاشه...
مرت أيامي هيج لحد ما اجة يوم الخميس
الصبح جتني رسالة من حيدر...
حيدر: صباح النور حبيبتي اليوم راح نجيكم.
أريد اشوف عيونج أول ما ادخل ادزلج رسالة وانتي فتحيلنا الباب
اتفائل بوجهج الحلو
ازل: - صباح النور عمري ادلل قبل لا توصل انطيني علم واني أطلع أفتح الباب
اززززززززززل ازززززززل
كومي يا بيبي كومي اكو وحدة هيج تنام
راح اصيح أمل عليج
اني جنت اسمع بيبي ومغلسة ماكوم من الفراش لحد ما جابت طاري امولة...
يا روح ما بعدج روح طفرت هي الطفرة...
نزلت واني أصبح عليهم
بابا طالع للشغل...
وايناس حاطة ابنها وكاعدة، بيبي جاي تأكل تفاح،
امولة مالها وجود شنو الهدوء هذا،
ازل: - اكووول بيبي هاي شنو الهدوء هذا وين الكل
بيبي: - والله يامسعدة وبيتج على الشط وباب بيتج يسبح البط
كلمن بشغلة وامج بالسوك
وانتي محمومه منين نجيب أحد بعد
يلا كومي اكلي
ازل: - فدوة لرزالتج بيبي احسها غزل ههههههه
عفتها ومشيت
للمطبخ أريد أكل...
بعدني هسة بديت اتريك...
دخلت امي من السوك وهي تصيح على مي
بارد.
جانت الوالدة محمله السوك كله.
ازل: - بستغراب ماما ليش ماجبتي سعدون أبو المخضر وياج صدك جذب هاي شنووو
امل: - دنجبي ام لسان غير خابرني خالج من ليل كال باجر غداية يمكم...
شتردني اسوي يعني
طبعا اتسوك...
ازل: - هاااا هنا الحجي حضرتج لخاطر اخوج الكركور وآلله عمي خوش لو كايلتلج أريد اعزم صديقاتي جان كلتي ماعدنا أكل بس هذا اخوووج شلون متحضريله.
امل: - الله يطيح حظج كومي عاب شكلج هذا اخوي الجابتة امي لا هو ولد واحبل واجيبنة ولا هو رجل وأخذ واعوضنة
كله يرخص لعيونة...
ازل: - بالعافية بطنج وبطن اهلج امولة
شكد ضحكت على امي ونرفزتها من احجي على خوالي
امي كلشي ولا أخواتها
حيل متعلقة بيهم
ايناس: - لجججج ازل تعالي لغرفتي اريدج
ازل: - اووي شتردين أريد ازقنب مو ريوك صار
بيبي: - طبج مررض كعدنا وتريكنا شكو بقيتي سهرانة...
ازل: - تفطيم خاتون هسة انتي منو الجاي يمج
فهميني
نايمه على كلبج ترى بيت ابوي نايمه مو بيت ابوج هههههههه
تفطيم: - ولج هذا لسانج يرادله كص مو لسان رشاشه وتهديهااا بس يجي يوووم ويجي صكااارج إلى كلمه ماتفكين كدامه منطينج هواي عين...
ازل: - هههههه اوك اوك ان شاء الله تفطيم خانم هههههههه شكد احب اداهر امي وبيبيتي اموت عليهم وعله سوالفهم وراها رحت ل ايناس.
خير إيناس شكو
ايناس: - ازل بربج خوالج راح يجون وحيدر موصيج على تصرفاتج...
الساعة ب10ونص
انتي ريوك ما متريكه
شعفتج كابه
وهاي بجامه توم وجيري إلى لابستها
تطلعين هيج عليهم...
يخترعون حتى حيدر يبطل...
ازل: - اوووو ايناس ستايل شسوي هن ذني ملابسي عادي يعني ألبس حجاب وبس
ايناس: - انجبي خلي حيدر يتفاجأ بيج اليوم خلي يشوفج مرأة وشابة تستحق تكون زوجة
مو ازل الدلوعة.
ازل: - بتفكير اي والله انوسة واني عبالي انتي غمه...
طلعتي تفكرين، الزريكه واني اكول شلون فأرة عقل اخوي.
إيناس: - من طيح الله حضج منيه الغمه ياغمه شعبالج لعد زركة وأخذت اخوج وعيونة متشوف غير عيوني...
وهسة
ولي افتحي الكنتور
تلكين فستان
تاخذينة وتروحين لعمتي
تكليها شوفي إيناس شنطتني وجربي كبالها
ازل: - باستفهام ليش عود خوب من أسبح أروح ألبسة وهي تشوفة
إيناس: - بضحكة ثولة انتي هيج عمتي راح تشك بيج
لأن مو من طبعج الستر وتلبسين فستان اوادم بالبيت
و شغلة ثانية هيج عمتي تضل تحبني لأن احب بنتها
عصفورين بحجر، هههههه ها شلوني
ازل: - بصدمة عزززة بعينج يالمفلوكة على هالتفكير هذا انتي الشيطان كرايبج شي.
إيناس: - ههههه غير ان مااحجي يلا انقلعي من هنا...
أروح اني هم اكمل الغدة وي ام الغالي وانتي سوي مثل ما كتلج...
ازل: - هاي ايناس الطيبة زوجة اخوي وأختي
دائما تساعدني بهيج مواقف خططها الغريبة وأفكارها
وي كل خواتي
شكد
احب عائلتي رغم كل الاختلاف احنا نجتمع تحت مسمى واحد العائلة
ماكو بيت يخلى من المشاكل لكن عمرها المشاكل
ما فرقتنا
زوجات اخواني التلاثة
شكد يتناكرن بيناتهن على الجهال لو على شغل معين.
بس وقت العصرية اشوفهن مجتمعات وياكلن كلهن سوة
إذا وحدة منهن اتعاركت وي واحد من اخواني
كلنا نجتمع بغرفتها
إذا بجت نواسيها وإذا عصبت نهديها
امي رغم كل تسلطها وحبها النا ما يوم وكفت وي اخواني ضد جنة
مقولة الشهيرة انا انثى وأنا مع الاناث
شكد حنينة عليهن كلهن
امي هي إلى مسوالة عن البيت بكل شي بشغل بالمسواك واجبات والناس
هي عامود بيتنا.
توصل بيها الحال من تطلع للسوك وتشتري شي لكل لوحدة من نسوان اخوي خصوصا بدلات النوم.
وملابس الجهال أغلب الوقت معتمدات عليها
وبيبي تفطيم هي بركة بيتنا احنا انسميها بيبي ام العطر والجهال كلهم يعرفوها بهل الاسم عطرها تشتمي على بعد عشر أمتار
مميز وغريب
عائلة بسيطة ماعدنا كنوز الدنيا ولا عدنا ملك فرعون
مجرد بيت يجمعنا بيت واحد الغرف على عدد اخواني
وغرفتين عدنا وحدة لبيبي وجهال اخواني كلهم يم بيبي ينامون
وغرفة إلى اني وآية بعد زواج اية بقيت إلى وحدي.
كلشي برأسي يدور واني اسأل نفسي راح أكون قادرة أترك هالجوء واعيش وي حيدر
راح اكدر اتحمل بعدهم عني
بعدني ما متحركة من غرفة ايناس خطوات وكل هلا أفكار غزت عقلي واني اتخيل روحي بعيدة عنهم.
خصوصا بيت خالي يختلفون عنا
عائلة زغيرة وململمة كلش
متحفظين.
أغلب الكلام يصير لزوجة خالي كون خالي يحب يبتعد عن المشاكل
جنت مقررة اتحمل كلشي لخاطر حيدر
اي حيدر يحبني.
وفة وياي صح مرات يحجي حجي يضوجني
بس هو ما يصبر يصالحني بنفس اللحظة
عيب حيدر الوحيد هو يتخيلني زوجة بالوقت إلى ما جان بينا غير الحب
واني عندي قناعة الحب يختلف عن الزواج
إذا ما تكلل بالزواج فهو محرم.
بس حيدر يغار علي من الهواء وي غيرة حيدر هواي يهتم بيه ومدللني أحس بي مثل بابا مايرفضلي طلب حتى لو غلط تصرفي.
صحيت من أفكاري على ايناس وهي تكول
ايناس: - يلا ولج بعدج واكفة روحي سوي إلى كتلج علي
ازل: - ضحكت ورحت لماما
اكوول: - امولة حبيبتي شوفي إيناس شنطتني
كتلها واني أضحك واشوفها الفستان
جان كلش حلو...
لون اسود شيفون
بي وردات لونهم وردي ناعمات كلش حلوات وردانه طوال حلوات
ابتسمت امي وهي تكول
امل: - والله أنيسة خوش تختار ملابس
ذوقها حلو...
ازل: - ماما لح ألبسة واجي
رحت لبستة واجيتها وافتر
بيبي كالت.
تفطيم: - يمه اسم الرحمن ازيلة صايرة مرة ولابسة ثوب...
ازل: - شنو بيبي قابل جنت صخلة وهسة مرة
بيبي: - ههههههه بالعافية بنيتي يخبل عليج
امل: - ابقي بي لعد لا تنزعي خوالج على جية
عفتهم يشتغلون ورحت لغرفتي لكيت رسالة من حيدر
افتحي الباب يحلوة راح نوصل
ابتسمت ولفيت الشال عدل وطلعت صدك
وي ما فتحت الباب صار بوجهي ضحكت واني اشوفة
هو وخوالي اثنين وجدو وياهم.
سلمت على خوالي وخالي يكرص بخدودي اجتي عيني بعين حيدر وهو يخزرني عود وخري مجنون يغار.
دخلوا وامي استقبلتهم من المطبخ طلعت تنشف بديها توجهت لجدو وهي تبوس آدي وراسة شكد احب هذا تصرفها لو يغيب جدو عنها يوم ويجي
ثاني يوم هيج تستقبلة...
دخلوا كلهم للاستقبال
نعمان جان كاعد كام وكف وسلم عليهم
كعدوا كلهم
ورحت اجيب مي
حسيت شي صار على صدري بضيق كلش
والسواد ضرب على عيوني مثل ما صار وياي بعرس اية...
كعدت بالكاع أحاول أقوي نفسي
كمت لطولي واني انازع وجع صدري
أخذت المي ورحت قدمت لخاوالي والجدو.
وصلت لحيدر...
عقد حواجبة وهو يشوف الكلاص يرجف بيدي
حجة بصوت ناصي
حيدر: - شبيج ازل ترجفين ترى بعد ماخاطبين شسالفتج
ترجفين
ازل: - حاولت ابتسم بوجه واروح
مابقيت كاعدة
اجتني ايناس...