رواية رحل همي حين عرفتك للكاتبة زهراء أمجد الفصل الثامن
ازل: - انشالله الأحد النتائج يعني عكب باجر
وهو بابا كال ادخلج دورات تقوية السادس من هسة أفضل
يعني أجيب النتيجة الأحد وأرجع الأحد الورة اداوم دورات حتى عطلة ماكو لح ابجي والله.
حيدر: - أزلية ترى تتعبين هسة وتلعبين بعدين خوش...
ادرسي حبيبي لخاطر نجتمع سوة
وخلصي من أول سنة.
ازل: - اي ادرس شكو قابل هوه سادس بالمناسبة مشتاقة...
حيدر: - بضحكة المن مشتاقة لج
ازل: - مشتاقة للكتب والبنات المدرسة
حيدر: - خبيثة كولي الك وانجبي
ازل: - لعد المن مشتاقة غير الك
حيدر: - كلاوجية بالموبايل حسج يلعلع
والحقيقة لسانج ينكط سم
ازل: - هههههههه اتعود مشكلتك محد جابرك تحبني ههههههه.
حيدر: - عسل على كلبي سنفورة
ازل: - اكلك بلة ما تروح أبو العسل والنحل أروح اشوف البنات صار وقت الحش الجماعي.
حيدر: - طركاعة عليج ما تبطلن هالسالفة
عمي والعباس اني من ابوج ادفنجن مثل أبو لهب ادري عمتي خذاها الواهس وخلفت سبعه بنات
والكارثة خواتج كلهن مثلها
هاي سهيوة وتهاني ويمامة هم سطرن سرب بنات
ولجن استجنن شكد تخلفن
ازل: - يووومة خمس و خميسة بعينك
بعين الحاسود إبرة وعود وخفت...
حاسدنا هو احنا سبيوعة شويونة اصلا اني أخلف
15 واحد مو بس 11مثل امي
احلى شي هم الخلفة
حيدر: - مو هي بكيفج خاتون.
والله أربع واذبحج إذا أكثر
ازل: - ليش انت شعليك هم غير جهالي
حيدر: - مو انتي راح تجيبنهم من الشط واني معليه
ترى الشغل بيدي ههههههاي
ازل: - خلي أفلت احسلي مادام الشغله بيدك لاتبدي بحجيك الماصخ وتنزل علترابي...
حيدر: - يلا حبيبتي انكلعي
ازل: - بأي لا تكول انكلعي فاهم
حيدر: - ازليتي
ازل: - هاا
حيدر: - يا بعد الها واهلها احبج لا تنسين
ازل: - شكرا الك
حيدر: - متصيرلج جارة ولي
ازل: - بقيت أنتظر الأحد علمود النتيجة
حتى ابلش دروس السادس
والله من هسة راح يعلسني بابا حتى كتب جابلي حتى ابلش
حياتي عادي ماكو شي جديد خلال هالايام شوية مرتاحة...
انام يم بيبي ماعدت أنام وحدي.
بس إذا طفت الكهرباء او صارت ظلمه وهدوء هنا من صدك يبدي الخوف يتوغل بكلبي...
مثل مرة المغرب رحت للترك...
عدنا بي غراض قديمه والعدة مال الكهرباء بي أريد أجيب درنفيس لبابا جانت الكهرباء فاصلة بس عدنا.
دخلت للترك
حسيت أيدي انلزمت من زندي
بهت حيلي...
بس ما كدر اتحرك ولا احجي ولا اعيط
مجرد...
ايد تمشي من زندي لحد طرف أذني
جلدي...
كل قشعر كلبي دكاتة تقرأ الف
أريد أية قرآنية تحضرني نسيت اني إلى ما انسى شي نسيت القرآن...
غمضت عيوني
وخطر
اسم واحد برأسي.
وشخص واحد ذكرى قلبي مانطقت الاسم بلساني
مجرد قلبي هو إلى حجة الاسم ( يا أبا الفضل )
فجأة كلشي راح واللمسات اختفت ما رجعت للبيت رغم كل خوفي
أحاول أثبت لنفسي.
هاي مجرد أوهام...
ماكو شي يستحق الخوف
رغم بداخلي اعرف هذا مو وهم مستحيل يكون
وهم واني أحس باللمسة على جسمي وعلى النفس إلى بركبتي...
كملت طريقي للترك
أخذت الدرنفيس من الحافظة وريد ارجع اعترض طريق
بزون اسود...
جذبني لون عيون هالبزون كلش
لون عيون خليط بين الزرك والخضار عمري ما شفت هيج لون...
استحوذت عيون هالبزون على كلبي لدرجة ما حسيت إلا ابتسامه مرسومة بوجهي
وعبالك اعرف هالبزون اني
لا اتحركت ولا سوت شي.
صافنة عليه...
هي تباوع عليه
اتقربت عليها أريد الزمها
نفخت بوجهي وعاطت
اي عاطت
على عيطتها اني اتخبلت من الخوف والقران عاطت...
هاي البزون عاطت مثل الإنسان
على صياحي اجة بابا يركض علي
وامي
وبيبي ايناس هبة
عيسى ونعمان وحسن ورياض
ما حسيت على روحي
إلا واني
بغرفة بيبي
وبابا كاعد يمي
فتحت عيوني
وحجيت...
بابا وين راح البزون والله بابا عاطت البزون مثل النسوان
جنت ارجف واحجي ودموعي تصب...
اتقرب بابا حضني وهو ايكول...
احمد: - باباتي ازولة شو اقري وياي سورة الرحمن...
هاي السورة انتي تحبيها
واحنا من نخاف لو ننفزع مو نلجأ للي نحبهم
يلا بنوتي اقري وياي سورة الرحمن
عوفي البزون
لا تفكرين بيها
منو أقوى خوفج لو ايمانج...
جاوبت بشهكات إيماني بابا
احمد: - منو أقوى للشيطان لو الرحمن
ازل: - رب العالمين القوي المتفرد بالقوة العظمى
احمد: - إلى يسيطر عليه الوهم منو
ازل: - الوهم من الضعف والضعف من الشيطان
والله جل جلاله هو الحقيقة
والقوة.
احمد: - منو أفضل الإنسان لو الحيوان
ازل: - رب العالمين فضل الإنسان على حيوان بنعمة العقل
لذلك الإنسان أفضل
احمد: - يعني تستحق البزون ترعبج هالرعبة وانتي أقوى منها...
ازل: - بابا والله ما خفت منها بالبداية
بس هي عاطت مثلنا وخوفتني...
أحمد: - باباتي عوفي هاي الاوهام هاي وهسة كومي لطولج يلا.
بنتي ما تخاف.
ازل: - شكد بابا طمني بس والله الخوف بعدة بكلبي والرعبة
كمت حجيت وي حيدر شوية
ما كتلة اي شي.
ادري مراح يصدكنوني لذلك سكتت وراها نمت...
نعمان: - لج صخام ازل كومي اليوم النتائج وانتي نايمه لهسة
شكد تنبل كومي
ازل: - شلت المخدة من فوك راسي واني احجي
نعمان عافني نايمه النتيجة ناجحة واطمن ترى خبلتوني بيها...
شهكت اني أحس ببرودت المي ترستني ترس
نعمان: - هسة صحصحتي مو كومي خاتون يلا اذبج بالمدرسة وأولي لشغلي...
ازل: - كمت واني ادردم عليه
بدلت ملابسي ورحنا الطريق من المدرسة للبيت اني نايمه.
رغم الطريق بس نص ساعة...
نعمان: - الله يساعد حيدر عليج ولج كافي نوم كومي خرب بيج، تمبل خوما تمبل...
( طبعا ازل بلنوم كارثه شوكت ماراسلها ترسلي الاحداث دكلي مابيه حيل باجر اليوم بليل وشالعه كلبي اذا منزلت يووم فمن وره نومها هههه).
ازل: - دخلت للمدرسة واني اضحك على تململ نعمان من نومي
طبيت ولكتني أسيل واكفة بالباب
جيتت علي مثل الخبلة وهي تكمز وشابكتني
سلمت عليها
اسولة هي أعز صديقة عندي وتقريبا الوحيدة
حيل احبها...
مجنونة بتصرفاتها وعفوية جدا
بعدها
دخلنا للمديرة وانطتنا النتائج ادري بنفسي ناجحة وبالدرجات إلى أريدها
أسيل واكعة بالاحياء وكامت تدك وتلطم
اسيل: - ولج ازل اليوم إبراهيم اخوي يقتلني شنقا بكيبل السحب والله...
عودك هو قرآني بالاحياء وكتلة إلا اطلع المية تالي واكعة...
ازل: - معودة شكو موتي نفسج انتي قريتي وتعبتي بس ما نجحتي الدور الثاني المن خاليه...
يلا حبيبي كومي نتوكل هم يلا نرجع البيت الدنيا ما تسوة دموعج حبيبة روحي
اسيل: - ازل إذا ذبحني إبراهيم خزنت مصاصاتي بالكنتور تلكين المفتاح بنص الدفتر المقفول فوك الكنتور...
وأمانة عليج لا تنطين سويدة وحنوشة منهن (اختها حنان واخوها الزغير مرتضى )
ازل: - بربج دافنة مصاصات هيج خرب بيج والله فشلتينا عودك احنا كبار هسة العتب على العلمي إلى ندرس بي...
لا انوب
ورانا سادس وانتي تنوحين على مصاصة...
اسيل: - دكافي وجع خربتي حزني كومي نولي وانتي طلعي كبل لاهلج
لا أريدك أن ترى صديقتك تقتل
بين يدي الظالم برهومي...
ازل: - اسيل بطلي دراما وحجي فصحى هي مادة مكملة بيها بعد شكو ترى تمتحنين وفضيها.
اسيل: - إلى ايده بالدبس مو مثل إلى ايده بالعسل انتي ناجحة وتشمرين علي
ازل: خايبة انجبي كلبتي مصارين المثل
اطمني بنتي ولا تخافين. (الي ايده بلمي مو مثل الايده بلنار ياعوبه )
وخلص الطريق للبيت واسيل تنوح ساعة اواسيها وساعة اضحك عليها...
دخلت لبيتهم واني رحت للبيت...
تلكتني بيبي جاية من جارتنا نورية صويحبتها
دائما تكعد يمها...
بيبي: - ها ولج ازيلة بشري شطلعتي...
ازل: - وداعة هالعيون الحلوة ناجحة.
بيبي: - عفية عليج بنت ابوج وآلله
ازل: - اقتربت عليها وصرت امشي خطوة خطوة وياها...
لزمت ايدها
واني احجي
بيبي تعرفين اني احبج وأموت عليج والله
بيبي: - كولي ازيلة شوراج شتردين هل صبغ ميفيد احجي كبل.
ازل: - وداعة عيونج ماريد مجرد حسيت اني احبج ولازم اكلج هيج...
بيبي: - خايبة هو اني شعندي غيركم يا بنيتي ايكولون ما أعز من الولد إلا ولد الولد
وانتي على كلبي اجيتي...
ازل: - ابتسمت لكلام بيبي ودخلنة للبيت.
بشرت امي وابوي وإخواني بنجاحي
شكد احب فرحتهم بنجاحي
يا لله رغم انجازي بسيط بس فرحتهم تأخذ كلبي
احمد: - هسة صار وقت تحضرين نفسج للدورة التقوية
الأحد إلى يجي يبدي الدوام ارتاحي بابا هالاسبوع
ازل: - حاضر بابا تامر أمر
تركتهم كاعدين...
ورحت لايناس لكيتها كاعدة هي وهبة
خير ياطير بيمن كاعدات تكصن...
ايناس: - انكص بيج غير كتلها مليت من ازيلة أريد أشد وياها
واصير الجنة الحقيرة...
ازل: - تقربت عليها واني اكلها هم أريد أشد وياج شنو هاي حياتنا ما بيها عرك...
هبة: - انت شدن وحدة وي الثانية اني أولي لرجلي...
هيج خلصت أيامنا
بين حيدر وبين اهلي الشئ الوحيدة إلى تغير اني
صرت ما حب ألتقي بالناس
أغلب وقتي وحدي بغرفتي
وإذا اطلع
اطلع فقط إذا بابا يضل يصيح علي يريدني يمة
أحس اكو شي بداخلي اتغير اتجاه الكل
كمت أحس أي تصرف منهم مقصود
اي كلمه تجرحني
ما اتحمل شي...
حيدر كثرت مشاكلنا اني وياة.
على أسباب وهية
هو ايريد يمحي وجودي بكل شي هو أشياء ايقررها بكيفة...
متحكم بكل شي
لا طبين لا طلعين
لا تلبسين هيج
لا تحجين وي فلان صيري مثل خواتج
بطلي زعططة...
كل هالكلام جان يجرحني
خاصة من يكعد يحجي علي اني لا مغرورة ولا متكبرة...
اني مجرد عايشة بعفويتي وي الكل
عندي كل الناس اهلي
ما اتعاملات وي شخص على اساس كره
وحقد
فعلا بديت أتحسس...
النهار اكضي بالدورات والدروس
والليل احجي وي حيدر شوية وانام بحجة مدرسة.
لأن بس نطول نتعارك...
الدوام بدء
نكضيها اني واسيل دراسة
ما جنت عدنا شي صعب
بس هي تكره الأحياء
أحاول اساعدها
هي دور ثاني العام يلا طلعت الخمسين بعد ما أكلت نصيبها من اخواها إبراهيم بالعقاب أتذكر خابرتني وكالت...
أسيل: - لج ازل عفية إبراهيم لعب لعب بية
علمود الأحياء...
وأخذ الملازم كال متستاهلين ملزمة وخصوصي واني درستج تالي رسبتي بي...
بس كليلي وين اكو وحدة حاطيلها خصوصي الأحياء غيرج...
عفية ازل هو اني هيج مامدبرتها انوب أقرأ بس على الكتاب شفتهم منه...
ازل: - حبيبي ترى حقة اخوج دا يتعب عليج تعبي روحج وجازي ميخالف...
إذا على الملزمة اني ادزلج ملزمتي واقري عليها يكلبي لا تبجين سهلة ترى الأحياء اقري رسوم.
وتعاريف وتعاليل وانتي راح تضمنين درجة...
فعلا خلصت أسيل ونجحت من الأحياء وابيومها خابرتني مكيفة لأن إبراهيم مصالحها
أسيل روحها من الدنيا إبراهيم هو اخ هم الجبير مسؤول عنها...
والدها متوفي
فتشوف كل صفات الأب ببراهيم...
هاي الأيام هيج كضت وبدت المدارس ما صار
حدث مهم بحياتي غير الدراسة
لحد امتحانات نصف السنة
امتحنت وكملت آخر...
يوم رجعنا مشي اني
واسيل وانسولف عن قرارتنا إلى راح تسويها بالعطلة...
اني جنت مقررة أخذ بيبي ونروح لزيارة مشتاقة لكربلاء...
وصلت للبيت أحس نفسي طالعة من حرب مو امتحانات
ميتة تعب...
امل: - ها يمه بشري شلونج ب الامتحان
ازل: - زينة يالغالية بس تعبانة فدوة ماما راح انام لحد يكعدني لحد ما اني اكعد...
امل: - غسلي وبدلي ونامي بس قبلها بيبيتج كالت خلي تجي أريدها...
وباجر خواتج كلهن يجن حتى اية
لأن جهالهن هم خلصوا امتحانات...
ازل: - لا نمت كلش
راح تجي وفود قريش أروح اشوف بيبي احسلي...
طبيت عليها لكيتها مددة استقبلتني ببتسامتها الاحبها...
شلت الجرجف من عليها ودخلت وياها نمت على ايدها واني احط راسي بشيلتها
أوف يابيبي شهل العطر هذا يرد الروح...
كالو رايدتني بيبي.
بيبي: - خايبة مو كلتي نروح نزور شو اني هم مشتاقه لزيارة...
ازل: - والله يا بيبي باجر نطلع من الفجر بس اني وياج مناخذ اي أحد...
بيبي: - ازيلة كومي انطيني هذاك الصندوك.
ازل: - كمت من حضنها جبتلها الصندوك هي كعدت
فتحتة
وطلعت محبس فضة شذرة حمرة دم إلى يركز بحمارها تاخذ مي عينة...
خلت بيدي وكالت...
هذا محبس جدج الوحيد إلى ما نطيتة لحد
أحس روح حسين بهذا المحبس
وهسة اني انطي الج واريدج تحافظين عليه...
ازل: - الله بيبي ايخبل والله راح اضمه وما انطي لحد
وهسة خلي انام بيبي حبابة نعسانة...
بيبي: - تعالي نامي بحضني اني هم نعسانة اشو عودك نكعد وي الصلاة الضهر...
ازل: - نمت بحضن بيبي وهي تلعب بشعري وتسولفلي
حسيت على نفسي شبعانة نوم فتحت عيوني الساعة كبالي ب4 ونص
يبووو فاتتنا الصلاة والوقت متاخر
شلون بيبي ما حست على الوقت...
اوووي تفطيم خاتون هسة اني كتلهم لحد يكعدني ونمت انتي شجاج دكومي...
جنت احجي واني الم بشعري الصاير كفشة
بس شو بيبي ماردت علي صرت احرك بيها...
: : : : : : يتبع في اليارت القادم...
تصبحون على ما تتمنون...