رواية رحل همي حين عرفتك للكاتبة زهراء أمجد الفصل الثامن والعشرون
ازل: - انت ابقى حباب وياي ولا تزكح
صير طيب وحنين عليه مثل اخواني وبابا...
واني اضل مطيعه واسمع كل التريده...
شهاب: - لا بنيتي إذا كلنا ندللج ونعاملج بطيب ما يضل طعم للحياة...
وهسة كومي نامي شكد تلغين يلا افلتي...
ازل: - ههههه تصبح على خير...
شهاب: - وانتي من أهل الخير حبيبي.
ازل: - كملت مراسلته نمت وثاني يووم رجعت لبيتنه واسيل صارت زينه ومرت أيامي عبالك تسابق وي الزمن...
ساعاتي تركض ركض...
باجر حنتي اني وشهاب أحس نفسي ما شابعة من بيت اهلي...
ماريد اتركهم بطلت...
خواتي اجني...
والهوسة صايرة للضالين...
اسيل هم اجتي هذا طلبي من خالة وإبراهيم اسيل تبقى وياي...
هي صديقتي قبل ما تكون خطيبة اخوي أريدها وياي...
رياض ودينة
والجهال هنا
بالكعبة بيتنا صار بي فوك ال50 نفر
اتخيلوا حتى بالهول انترس
وهاي عودك بس اني وخواتي واخواني وجهالهم
اسمع حسن يصيح...
-جيبولي صوندة واترسوها حصو حتى الضربة توجع.
اليوم أريد انعل ابهاتكم
ولجن عزة بعينجن شكد مخلفات راح اهج والعباس
وللللللج اسيل شجاج انتي الثانية وياهم
ولج لا تركضين لا توكعين...
اسيل: - حسن انوني الحقير باك نعالي ويركض...
حسن: - ولكم أنطوني الجداحة أريد احرك روحي راسي راح يطك من اسيل وعراكها...
احمد: - شبيك تجوعر حسن افندي.
شتريد من الجهال خلي يلعبون قابل يومية يمك هم، وعدنا عرس شتريد البيت فارغ معاجبك اطلع بره تخلص من الدوخله هلا بلرايح والجاي اذا مابيتي فاتحه البنات المن افتحه...
حسن: -يابة والعباس هذولي مغول مو جهال
ولدك وبناتك أخذهم الواهس على الخلفة ترى أربع جهال كافي...
مو كل وحدة سبعة وثمانية
وجناينك انعدن من بناتك راح اهج...
امل: - عمه بعينك شتريد منهن خلي يخلفن معيشهم انت
خلي اشوفك بلة عود خلف بس أربع انت...
حسن: - يمه حتى اسيل رجعوها لاهلها ماريد...
اسيل: - يااااا مو هي لعبة رجعوها ولك حسن
اني أريد فد عشرة مثل شندولي فدوة لعينة...
حسن: - لااااااااااااا دخيل ربج اسيل انجبي اني رايح اشرد والقرآن رايح يم صديقي ما ارجع إلا الجلاوزة تروح...
سهى: - امشوا يمه امشو خالكم مايريدكم خلينا نروح...
حسن: - لا بعد اخوج انتي وجلاوزة ابقوا اني طالع ههههههههه
ايناس: - اكلجن هذولي حتى ما راح يخلونة نتغدة مثل البشر خلي نصبلهم هسة غدة بلكت ينامون وراها نصبلنه وناكل...
اية: - اي والله كومن غدنهم ونومنهم هسة اخوتي على جية...
خطية خلي يرتاحون...
هبة: - ولجن عوفنهم والله تونسنا بالهوسة تعالن نشغللهم الدي جي خلي يركصون...
ازل: - نيييييييياااااها جيبلي وصلة وصيحولي جلاوزتي الإستقبال
اليوم اركص اني وياهم لحد ما نتعب...
سهى: - كومي خية كومي ضلت علينا خلي نركص وياج...
اسيل: - طبعا اني ما عرف اركص راح أصور حتى تبقى ذكرى وصخة مثل راعيتها...
ازل: - دنجبي وكومي يلا.
كويظم تروح تصيح لاخوانك وجهال خالاتك وخوالك كلهم خالة ازل تكول
كل هزة بربع...
بعدني احجي وماحس كويظم بس التراب ورة من شحطه نعاله ركضلهم...
شغلت الدي جي والتمو الزعاطيط والبنات يصفكن
اسيل تصور
طبعا شالاتي كلها نسحلت بالكاع
كلهم يردون يشدون وصلة ويهزون مثلي
إلا متت من الضحك عليهم
صرنا نركص كلنا وخواتي يصفكن ويضحكن...
-لج اسيل انتي المن تصورين تعالي ركصي وياي...
اسيل: - لجوري حلفتني اصورلها الأجواء وهي هم حتشوفنا شدا يسوون
ازل: - كلووووووووووووووووش
ركصوا بعد خالتكم...
اسيل: - لج ازل فرحانة بزواجج...
ازل: - بلة انجبي ليش ما افرح اهلي وناسي كلها موافقة
وشهاب حباب الأيام هاي
لج الغووووول صاير لطيف و رومانسي...
جنت احجي واركص ومندمجة اني مشهودلي بالركص
كاولية بالفطرة هههههههه...
طبعا بعد هالركص حصلنا رزالة مرتبة من امل لأن ومهوسين البيت وباجر يجون الخطار...
امل: - ولجن هيدن باااجر الحنه وانتي مبقيتن ركصه ولااغنيه هيدن كاافي نومن جهالجن بااجر الحنه والخطار كلهم يجون.
ازل: - طشينا بالبيت وكلمن نومت جهالها ورحت لغرفتي
اتصل شهاب...
الوووو هلو شهاب...
شهاب: - طركاعة الوكعت على رأس شهاب ولج
بنت أحمد شكاعد
تسوين...
ازل: - شسوي كاعدة بالبيت
شهاب: - لعد امي إلى جاي تهز هيج وهيج
خرب لج انتي من يا ملهى مطلعينج...
ازل: - ههههههه ملهى إلى جنت بي انت ههههه
لا عيني هاي معرفة فطرية...
شهاب: - بربج ولا عبالك عرسج كاعدة تركصين وي الجهال اخجلي شوية
يمكن انتي حتى ما تعبيني مستعجلة...
ازل: - جلاوزة اهلي وادك واركص وياهم
شكو استحي بسسسسس ااااااااخ من جوري
ما تضم عليك سالفة يامنحرف...
شهاب: - غير جوري على كلب أخوها ترى...
ازل: - خلي الزمها إذا ما ادفنها بمكانها وحدة خاينة شون تشوفك
شهاب: يحلوة بس باجر وتصيرين بحضني
ازل: - أن الرقم الذي طلبتة مشغول
شهاب: - هههههههههه اموت عليج يخبلة روحي شبعي من اهلج
ازل: - ههه بيباي
تهاني: - دكافي شكد تحجون ترى بس اليوم انتي هنا.
ولج ازيلة وصدك كبرتي وصرتي مرة...
ازل: - عجيب اكو أحد كايلج جنت صخلة
تهاني: - وووولج ايناس شو تعاي وياج عصا بيبي
ازل مو مال احترام
ايناس: - ها خوتي ها...
وجبت والعصى واجتي اليوم انكسر ازول...
سهى: - مرة بيجن إلى توصل حدها...
ازل: - والله يالزررريكه طلعلج صوت عبالج راح أولي وتستقوين ترى ازوج عيسى
واخلي يجعصج...
ايناس: - ولج ولي وخلي اشمر سبع بلوكات
ااااخ ربي يوم عيد...
ازل: - ضلت علينا بس الزرك حبيبتي ناوية.
اجيب بنت ديالى لعيسى يستاهل...
ايناس: - حتى ادفنج انتي وبنت ديالى
ازل: - ولي الزريكة اشو بابا ماكو...
سهى: - كال ما اجي عندة شغل وي صديق...
ازل بحزن: - اوووف يعني هن بس الأيام هاي وياكم بعد إذا اجي
اجي خطار ما أصبح وامسي بوجه
تالي يعوفني...
امل: - بعد بعد تردين لطمية تلطمين عندة شغل ترى ما مهاجر...
ازل: - عفتهن ورحت بغرفتي
ما صار شي بهل اليوم...
انتهي على خير
ثاني يوم
كعدتني اية ب 7 ونص الصبح.
كلها كاعدة اليوم الحنة...
اية وسهى واسيل وياي يرحن للصالون
حسن يأخذنا
كمت تريكت وسبحت وكملت
والبنات مخبوصات
مرة الوقت بساع...
وطلعنا للصالون
جنت حاجزة قبل يومين البدلة
استقبلتنا ام الصالون...
بدلتي ماروني بدون تعاليك تلزم على الصدر
منفوشة من جوة بس مو هواي...
مكياج اشتغلتني أم الصالون وكل شي ما شوف بس مغمضة...
شعري طولتة إلى بخصل...
خلصتني والبنات كذلك خلصوا
ابد ما عرفت...
نفسي كد التغير الواضح علي شكد بالخطوبة تغير وجهي بس مو مثل هسة...
اتصل شهاب قبل لا نطلع من الصالون...
شهاب: - الووو
ازل: - هلو بيك...
شهاب: بشري يحلوة حطولج لبخ مرتب لو لا
ازل: - هههههه اي اطمن لبخوني لبخ...
شهاب: - حبيبي اتستري عدل وخلي حسن يقرب السيارة على الصالون كلش...
ازل: - تامر أمر اصلا البركع غطاني.
شهاب: - اتونسي حبيبي يلا اني هم اكمل وراي شغل...
ازل: - في امان الله...