رواية ذنوب على طاولة الغفران ج1 للكاتبة نورهان العشري الفصل الأربعون
نورهان العشري.
اقصر الشر يا عماد و امشي من هنا. الغلط من عند مراتك، ولو فتحنا فيه أنتوا أول اللي هتضروا!
هكذا تحدثت هيام بنبرة ثابتة يشوبها الوعيد الذي جعله يهتف بحدة
أنتِ بتهدديني بقى!
أنا مبهددش انا بنفذ، و قبل ما تتحمق اوي كدا. اعرف من الست هانم مراتك الحقيقة كاملة. أحسن وحياة ابني لهخلي أبوك نفسه هو اللي يعرف منها كل حاجة.
كانت تتحدث بنبرة جريحة و ملامح يأكلهمَ الغضب الذي يجعلها استطرد قائلة.
كل حاجة حصلت قدامها، و طلبي منها كان واضح. أما اللي هي عملته دا كان من دماغها.
عماد باندفاع
مها كانت عيلة صغيرة و مش فاهمة هي بتعمل ايه؟
قاطعته هيام بحدة
أومال فاهمة بس تحمل في الحرام من راجل غريب! الحرف اللي هتنتطقه هيدينك و يدينها قبل مني، و دا اخويا و مهما حصل هيسامحني في الآخر بس أنت و هي هتعملوا ايه؟
وضعته وجهًا لوجه مع خطيأته التي لا يُمكنه التملُص منها بعد أن ظن بأنها انتهت بزواجه من مها ليهتف بنبرة مُتحسرة
بس أنا كدا ابقى خسرت صاحبي.
هيام بتقريع
أنت خسرته من زمان لما عملت عملتك معاها و هو مآمنك عليها، و أنا اللي داريت عليك و عليها.
عماد بغضب
يعني ايه؟
هيام بجفاء
يعني ترجع مطرح ما كنت انت و السنيورة، و إياك اسمع الكلام دا تاني منك أو منها.
عماد بانفعال
بقولك حالف لا يقول لأبويا!
هيام بصرامة.
أنا هحل الموضوع دا. ملكش صالح بيه.
كان يطحن ضروسه من فرط الغضبو العجز أمام جبروت هذه المرأة التي لطالما رأها مثالية مما جعله يقول بوعيد
هييجي يوم و ياسر هيعرف كل حاجة، ووقتها هرجع و هعرفه انك ابتذتيني عشان مقولوش حاجة.
اقتربت منه هيام بأعيُن يتساقط منها الغضب كالحمم لتهتف بشراسة.
ياسر دا ابني و مهما عملت عمره ما هيخرج عن طوعي، ولا أنت ولا بلدك يقدروا يغيروه عليا، و قبل ما تفتح صدرك أوي ابقى خلي الهانم تحكيلك أنا عملت كدا ليه!
قالت جملتها الأخيرة بنبرة صارخة دون أن تسمح له بالرد بل عاجلته قائلة
امشي من وشي و مش عايزة أشوفك تاني قدامي.
غادر عماد ليتشقق قناع القوة الذي كانت ترتديه بفعل هذه العبرات التي عرفت الطريق إلى عينيها لترفع رأسها إلى السماء وهي تقول بتوسل.
يارب. حلها من عندك يارب.
كانت غافلة عن أعيُن تبرقان من شدة الصدمة.
اللهم لا سهل إلا ما جعلته سهلاً، وأنت تجعل الحزن إذا شئت سهلاً.
بهتت ملامحها وهي تناظره بصدمة من هذا الحديث الذي تفوه به لتخرُج الكلمات مُبعثرة من بين شفاهها حين قالت
أيه اللي عتجوله ده! أني مفهماش حاجة! مين اللي هيدور عليَ!
رق قلبه لحالها، و لأول مرة تقف الكلمات على أعتاب شفتيه لا تجروء على الخروج ليطول الصمت بينهم. لكن للعيون رأيًا آخر، فقد كانت تتوسله بالإفصاح عن ما يخبئه بينما هو يتوسلها بالتغافل عن ذلته ليُقرر تغيير دفة الأمور حين قال بجمود.
لو افترضنا أن أبوكي عايش و بيدور عليكِ هتجولي ايه؟
نجاة بضياع
أنت اللي عتجول ايه يا عمدة! أني مفهماش حاچة! يعني أبوي عايش و اني معرفش، ولا أنت بتجول أكده و خلاص!
لم تحيد عينيه عنها و كأنه يحفظ جميع انفعالاتها و انعكاس حديثه على ملامحها ليُقرر قطع هذا الصمت قائلًا
مالك جفلتي وشك أكده ليه؟ دي مچرد تخمينات، و لسه متوكدتش منها، و في الغالب هتطلع غلط.
كانت تناظره بأعيُن مغمومة و ملامح يُخيم عليها الحيرة مما جعل الذنب يزحف على قلبه، فإذا به يهتف بنبرة جادة
أضحكي وشك اومال. عايز أكل و نفسي مفتوحة.
ابتسامة جميلة لونت معالمها لتتهلل أساريره و هو يقول مُغازلًا
حد يوبجى ضحكته حلوة أكده و يزعل!
أخفضت رأسها بخجل ليشرعان في تناول الطعام بصمت وسط اختلاس مُتبادل للنظرات بينهم ليحمل هو صينية الطعام و يتوجه للأسفل، و هو يُفكر في هذه الفتاة التي يؤلمه قلبه إن لامس الحزن عينيها لتجعله يقف في مواجهة مؤلمه بينه و بين قلبه الذي أقسم ألا يفتح أبوابه لإمرأة مرة أخرى ولكنها غافلته و انسلت لتتربع بأعماقه دون أن يدري متى و كيف صار هذا؟
عشنا و شفنا العمدة بيخدم على مرته! دا جانون چديد يا عمدة ولا اي؟
التفت رحيم يناظرها بكره شع من بين كلماته حين قال
احمدي ربنا انك لسه بتشوفي لحد دلوك يا نچيبة.
نجيبة بحدة
هتجتلني اني كمان زي ما جتلت بتي!
رحيم بشراسة أطلت من عينيه أولًا قبل نبرته
أنتِ عارفة زين مين اللي جتل بتك، و لو أني لو رچع بيا الزمن كنت هجطع من لحمها نساير. جبل ما اجتلها.
اقترب رحيم منها وهو يقول باحتقار
بتك الخاطية. الرخيصة. بس للإسف هي مچابتوش من بره.
زاغت أنظارها و تقطعت أنفاسها وهي تقول بخفوت.
تجصد أيه؟
رحيم بوعيد
جصدي أنتِ عرفاه زين! بتك طلعالك.
تراجعت للخلف بذُعر و جسد يرتجف من فرط خوفها الجلي من هذا الوحش الذي حاولت ردعه من أذيتها حين قالت
ايه الحديت اللي عتجوله ده؟ انت عتتهمني في شرفي عيني عينك يا رحيم!
رحيم بسخرية
يعني بتعترفي أن بتك خاطيه!
تلعثمت الحروف بين شفاهها حين قالت
اني مجصديش.
رحيم بحدة.
بس أنا اجصد، و لو من اهنه و رايح معيزش أشوفك جدامي. تجعدي في مطرحك متتحركيش منه طول ماني في الدوار، و إلا أني عارف ايه اللي هيكسرك المرة دي، و مش هيجوملك جومة تاني!
تراجعت للخلف كالمذعورة، فقد نفذت كلماته إلى أعماق عقلها الذي استعرض الماضي بذكرياته المريرة و أسراره التي من شأنها أن تقلب الواقع رأسًا على عقب لتقوم بجذب الهاتف من خزانتها و تقوم بإجراء اتصال هاتفي، و ما أن أتاها الرد حتى هتفت بلهفة.
لازمن نتجابل في أجرب وجت. باين المستور اتكشف و رحيم عرف كل حاچة. لو مكنتش هتتدخل عشاني يوبجى تدخل علشان ولدك.
اللهم يا مسهل الشديد، ويا ملين الحديد، ويا منجز الوعيد، ويا من هو كل يومٍ في أمرٍ جديد، أخرجني من حلق الضيق إلى أوسع الطريق، بك أدفع ما لا أطيق، ولا حول ولا قوة إلا بالله العليّ العظيم.
قربنا ولا ايه؟ أكيد مش همشي مغمض كدا كتير!
هكذا تحدث رؤوف بحنق من هذه العُصبة التي وضعتها ميرهان فوق عينيه، و هي لا تنفك تُخبره أنها حضرت له مفاجأة ستعجبه لتُجيبه الأخيرة بحماس
خلاص فاضل حاجات بسيطة. اطلع بس معايا كدا.
أطاعها على مضض لتتوقف به أخيرًا وهي تقول بحماس
وصلنا.
هكذا تحدثت وهي تُزيح العُصبه من فوق عينيه ليجد نفسه يقف بمنتصف شقة واسعة مما جعله يلتفت ناظرًا إليها وهو يقول باستفهام.
احنا فين هنا؟ انا مش فاهم حاجة!
ميرهان بحبور
مش أنت قولتلي أن كل مشكلتك عشان تفتح المكتب بتاعك كانت الشقة! و اهي مشكلة الشقة اتحلت.
عاد رؤوف بذاكرته إلى ما قبل أسبوعين من الآن
عودة إلى وقت سابق
ممكن اعرف أنت مكشر ليه طول الخروجة؟
هكذا استفهمت ميرهان مُحدثة رؤوف الذي كان التجهُم يُسيطر على ملامحه ليُجيبها بجفاء
أنا مكنتش عايز أخرج من الأول أنتِ اللي أصريتي.
ميرهان بحزن
كدا يا رؤوف. تقصد إني بفرض نفسي عليك!
رؤوف بحرج
مش كدا أنا بس متضايق شويه.
ميرهان بلهفة
احكيلي ايه اللي مضايقك مش يمكن يكون عندي حل!
نظر إليها بريبة لتستطرد قائلة
قول بقى متبقاش رخم. احنا اتفقنا أننا أصحاب و الأصحاب مبيخبوش عن بعض حاجة.
زفر بقوة قبل أن يقول بجفاء.
الفترة اللي فاتت أخدت كورسات اوتوكات و شغل جرافيك، و الحمدلله بدأ يجيلي شغل على كبير، فكنت بدور على شقة اعملها استوديو أو مقر يعني اقابل فيه العملا، و للأسف الميزانية اللي كنت عاملها مش هتغطي نص التكلفة على أرض الواقع.
صمتت لثوان قبل أن تقول بتفكير
طيب قولي البنود اللي في دماغك و نشوف يمكن نقدر نظبطها.
رؤوف بنفاذ صبر
فكك يا ميرهان أنا مقفول من الموضوع و مش عايز اتكلم.
ميرهان بإلحاح.
طيب اديني فرصة افكر معاك. ليه تحبطني كدا! ادينا لنفكر بصوت عالي سوى.
رؤوف بملل
كنت عامل حسابي إني اخد شقة في مكان كويس، و الأماكن اللي سألت فيها الإيجارات غالية أوي، و لازم تدفع تأمين تلت شهور على الأقل. الشقة لوحدها هتاخد اكتر من نص الفلوس اللي معايا. دا غير اني لازم هظبطها دا غير الدعايا، و التراخيص و غيره. الموضوع للأسف مش ظابط في الوقت الحالي.
ميرهان باستفهام
طيب انت في دماغك مكان معين؟
مش فكرة مكان معين. عايز مكان كويس. في منطقة راقية. دا هيفرق جدًا في نوع الكلاينت اللي هييجي. فهماني!
ميرهان بتفكير
خلاص سيبني افكر في الموضوع دا و هلاقيله حل.
رؤوف بملل
انسي. انا أساساً بفكر في حاجة تانية.
عودة للوقت الحالي
أخذ يتجول في الشقة التي كانت في منطقة من أكثر الأماكن رُقي في البلد ليلتفت ناظرًا إليها وهو يقول بجفاء
ممكن ترسيني على الحوار معلش!
اقتربت منه ميرهان قائلة بحماس.
بص يا سيدي. رونا صاحبتي دي شقة خالها وهو مُقيم في أمريكا، و بينزل كل عشر سنين مرة، و ممكن ييجي هنا و ممكن ميجيش، فالشقة هنا مقفولة. كل فترة بيجيبوا حد ينضفها و يقفلوها تاني، فجتلي الفكرة من هنا ليه منأجرهاش منه؟
رؤوف بحدة
نعم! مين اللي هيأجرها منه؟ أنتِ مجنونة ولا حاجة! أنا هجيب إيجار الشقة دي منين؟ هتلاقي ايجارها أضعاف الشقق اللي سألت عنها.
اقتربت منه وهي تقول بلهفة.
أهدى بس و اديني فرصة أفهمك. هي البنت لما كلمت خالها، و حكتله أننا شباب و لسه في الأول و مشتغلناش، فالراجل حب يدعمنا و قال إنه مش هيبتدي ياخد مننا إيجار غير بعد ست شهور لحد ما تشتغل ونعمل اسم و بعدين مش هنختلف في موضوع الإيجار دا.
رؤوف باندهاش
لا معلش هو أنتِ بتتكلمي عن مين؟ يعني نشتغل و نعمل اسم؟ مين اللي هيعمل دا!
التمعت نجوم الحب بسماء عينيها وهي تقول.
احنا يا رؤوف. أنا و أنت. أنا حابة اشتغل معاك. يمكن انا مكنتش ناجحة اوي في الدراسة. بس انا عندي طموح ووو
قاطعها رؤوف بحدة
لحظة واحدة بس. أنتِ فكرتي و قررتي و نفذتي وأنا فين من كل دا!
ميرهان بخفوت
أنا منفذتش حاجة لسه. أنا بس اتكلمت مع صاحبتي و هي كلمت خالها عشان الشقة. لكن حتى العقد متمضاش لسه.
رؤوف بجفاء
كويس. عشان أنا مش موافق على كل اللي بتقوليه دا.
ليه بس؟
رؤوف بنبرة حاسمة.
من غير ليه؟ مشروعي هبدأه على قد ايدي، و ياريت اللي حصل دا ميتكررش تاني.
رغمًا عنها تساقطت العبرات من مقلتيها ليشعر بالذنب حيال حزنها، فرقت نبرته قليلًا حين قال
أنا مقصدش اجرحك. بس لازم تفهمي اني مقبلش حد يكونله جميلة عليا.
قاطعته وهي تتحدث من بين عبراتها.
مفيش جميلة ولا حاجة. هو راجل كبير واحنا في سن أولاده و حب يساعدنا، وانت ممكن لما يبقى معاك فلوس تديله فلوس الست شهور دول. أنا على فكرة مش زعلانه على أسلوبك ولا طريقتك الجافة معايا قد ما زعلانه انك تجازف بخسارة فرصة زي دي، ولو متخيل اني بكذب و هدفعلك جنية من معايا انا ممكن اديلك رقم عمو جمال تكلمه و تتفق أنت معاه.
لمس الصدق في حديثها ليمد يده يحك مؤخرة رأسه بحيرة قبل أن يقول.
افرض الدنيا زنقت معايا و المكتب خد وقت طويل على ما اشتغل هجيب فلوس الراجل منين و هو عامل معايا موقف نبيل زي دا!
ميرهان بعتب
ما أنت مادتنيش فرصة أكمل. هو مش انا قولتلك اني هشتغل معاك؟
رؤوف باختصار
قولتي.
عندك اعتراض؟
صمت لثوان قبل أن يقول بحرج
هو أنا أكيد هحتاج حد معايا بس...
ميرهان بلهفة.
مبسش. انا موجوده و مستعدة نتشارك شوف أنت معاك كام و نحط قدهم، و كدا مشكلة الشقة خلاص اتحلت. احنا بس محتاجين نعمل فيها شوية تظبيطات بسيطة، و هنجيب الفرش، و معتقدش دا هيصرف كتير، و نوفر الفلوس للدعايا و للبنود التانية.
صمتت لثوان قبل أن تقول بعتب
كل حاجة محلولة إلا إذا أنت مش حابب اني اكون معاك.
كان الحزن يلون ملامحها و عينيها تتوسلان إليه بألا يردها خائبة، و لكنه لا يستطيع أن يأخد هذا القرار الآن يلزم عليه التفكير قبل كل شيء لذا تحدث بنبرة لينة حين قال
أنا اكيد مش معترض على شخصك، ولا على شغلك معايا. لكن أنا محتاج افكر قبل ما اخد قرار.
شعرت ببصيص الأمل لتهتف بسعادة
وانا موافقة، و واثقة انك اكيد هتوافق.
رؤوف باندهاش
جبتي الثقة دي منين!
ميرهان بخفوت
لما توافق هقولك.
اللهم إني أعوذ بك من الهم والحزن، وأعوذ بك من العجز والكسل، وأعوذ بك من الجبن والبخل، وأعوذ بك من غلبة الدين وقهر الرجال.
كمال.
كان يقف في شرفة الغرفة يُعطيها ظهره أو بالأحرى يحميها من غضبه، فهي قد تمادت بالحديث معه، و لم تتفهم احترامه لشقيقه و لم تُعطيه الفرصة للتصرُف في الأمر بروية، و لذلك تجاهلها إلى أن يهدأ قليلًا لكنها لم تعطه الفرصة بل اقتربت منه و هي تمد ذراعيها لتعانقه من الخلف مستنده برأسها على ظهره العريض وهي تقول بخفوت
لسه زعلان مني!
كان تأثيرها ضاريًا عليه، فقد اهتاجت دقات قلبه و كأن همسها كان بارودًا تفجر بين جنبات صدره، و ملامستها كانت كالصاعقة التي جعلت أنفاسه تتلاحق وهو يقول بنبرة جافة
محصلش حاجة.
تغنجت أكثر وهي تقول
كمال بقى. بليز متزعلش.
رغمًا عنه و عن كل شيء سامحها قلبه ليلتفت إلى الجهة الأخرى يُحاصرها بذراعيه القويتين و عينيه تحتويانها بنظرة عاشقة و نبرة رخيمة عين قال
من سوء حظي ان قلبي ميقدرش يزعل منك.
تدللت أكثر و اتسعت ابتسامتها وهي تقول
قصدك من حسن حظي.
كمال بنبرة عاشقة
هنمشيها كدا. المهم اشوف ضحكتك الحلوة دي على طول.
تغنجت وهي تدعي الحزن حين قالت
أنا مقصدتش ازعلك أبدًا بس اللي حصل النهاردة دا وجعني اوي، و زعلني فوق ما تتخيل.
امتدت أنامله تمسك بذقنها وهو يقربها منه قائلًا بنبرة رغم رقتها إلا أنها كانت صارمة
مش هيعدي بالساهل، و لا هيتكرر تاني. كرامتك أنتِ و اهلك من كرامتي. لازم تفهمي دا كويس أوي.
اومأت برأسها قبل أن تقول بخفوت
ربنا يخليك ليا.
كمال بنبرة عابثة
مرضي يا بطل!
آسيا بخجل
مرضي.
نتصالح بقى؟
هكذا تحدث بتخابُث قابلته بالسخرية حين قالت
احنا اتصالحنا على فكرة.
باغتها حين حملها بين يديه وهو يقول بوقاحة
اتصالحنا شفهي دا تمام. كدا يبقى فاضل ايه؟
قهقهت بصخب وهي تشاكسه قائلة
تمام التمام.
شاركها ضحكها هو الآخر قبل أن يقول بعبث
اهو تمام التمام دا العملي بقى.
أنهى جملته و اخذها معه إلى عالم العشق الذي يقتصر عليهمَ فقط. حيث يحيا كليهما السعادة التي خلقت لأجلهم فقط.
اللهم إني أسألك من خير ما سألك منه عبدك ونبيك محمد صلى الله عليه وسلم، وأعوذ بك من شر ما استعاذ منه عبدك ونبيك محمد صلى الله عليه وسلم. اللهم إني أسألك الجنة وما قرب إليها من قول أو عمل، وأعوذ بك من النار وما قرب إليها من قول أو عمل، وأسألك أن تجعل كل قضاء قضيته لي خيراً.
مرت الأيام رتيبة على البعض سريعة على الآخر ما عداها لم تمُر أبدًا كانت الدقائق تشبه بعضها و اللحظات تجردت من الشغف، فلم يعُد شيء يُثير انتباهها، و كان هذا الأمر شاقًا على قلبها الذي حاولت دفن ألمه بين طيات الكُتب علها تضيع بين سطورها و تنسى معاناتها بين حكايات أبطالها، فالغياب أمرًا مؤلم على العاشق، فماذا لو كان هو من أختار ذلك بإرادته، فقد تجنبته بشتى الطرق و فعل هو مثلها، ولكن في النهاية أتى به الشوق جرًا ليتوجه رأسًا إلى غرفتهم التي شهدت على أروع اللحظات التي عاشوها معًا ليفتح الباب دون أن يطرقه، ومن حسن حظه وجدها تجلس على الأريكة و تُمسِك بيدها أحد الكُتُب، و يبدو أنها وجدت مؤنسًا لوحدتها طوال الأسبوعين المنصرمين على عكسه، فلم يجد ما يحل محلها في حياته.
عاملة أيه؟
لم تتنازل و ترفع رأسها عن الكتاب أمامها بل استجمعت جميع جأشها و ثباتها لتضمنه في لهجتها حين قالت
الحمد لله.
لم يروق له برودها و لا تجاهلها له، و لكن الغلبة كانت لشوقه لذا اقترب يجلس بجانبها و هو يُحاول سلك أي طريق قد يقوده لقلبها مرة أخرى
ميثاق الحب و الياقوت (روايتي الورقية ). حلو الاسم. أول مرة اعرف انك بتحبي تقري رومانسي!
لم تُزيح انظارها عن الكتاب في يدها وهي تُجيبه ساخرة.
علي أساس انك تعرف اني بحب القراية من الأساس!
إجابتها جعلت ابتسامة ساخرة ترتسم على شفتيه قبل أن يمد يداه لتحتوي كفوفها التي تحتضن الكتاب و يقربها منه وهو يقول بنبرة خافتة
طب خلينا نقرا سوى يمكن الرواية تعجبني. انا كمان بحب الروايات الرومانسية على فكرة.
سحبت يدها من بين يديه دون أن تمّن عليه بنظرة واحدة من عينيها بل تحدثت بنبرة جافة صارمة حين قالت.
القراءة دي زي التوب مينفعش اتنين يلبسوه في نفس الوقت، و بعدين بما أنك بتحب الرومانسي زي ما بتقول يبقى الرواية دي مش هتعجبك.
لم يكُن خصمًا سهل، فهو مثلها لا يستسلم بسهولة لذا استفهم قائلًا
ليه مش هتعجبني؟
رفعت رأسها لأول مرة تُطالعه بعينين لا تُخفيان الألم، ولا اللوم الذي شاب لهجتها حين قالت.
عشان البطل و البطلة مكنوش عايشين حياة طبيعية، و البطل يمكن مقالش بحبك للبطلة غير في الفصل الأخير. بس عارف؟ هو طول الوقت بيثبتلها أنه بيحبها. بالرغم من كل العقبات اللي كانت بينهم، و بالرغم من أنها كانت عدوته. بس ولا حاجة من دي قدرت تمنعه عن حبها.
اهتاج قلبه و أعلن راية العصيان أمامه جراء كل هذا الحزن و اللوم الذي يندفع كالأعيرة النارية من بين كلماتها ليُقرر أن يُسايرها عله يصل إلى نقطة إلتقاء معها.
طيب و البطلة عملت أيه؟
شروق بنبرة تئن من فرط الوجع
طلعت ذكية أوي. قاومته لأقصى درجة ممكنة. قاومته و قاومت قلبها و قاومت الواقع اللي جمع بينهم. كل حاجة كانت ضدها بس هي فضلت على موقفها.
لا إراديًا ربط بين الواقع و الخيال لتخرج الإجابة مندفعة من بين شفاهه حين قال
طبعًا بما أنها قصة خيالية، فأكيد هيفضل على موقفه. لكن لو جينا للواقع سيكولوچية الراجل بيمل من الرفض، و دا الشيء الست مبتقدرش تفهمه.
كانت تتوقع إجابته، فهي نهجه في الحياة و شريعته للدفاع عن ما يُريد لذا تحدث بسخرية حين قالت
تقصد سيكولوچية الراجل الأناني. أو بلاش أناني. نقدر نقول سيكولوچية الراجل قبل ما يعرف يعني أيه عطاء، وهو استخدم أكتر سلاح ممكن يهدم بي كل الحواجز اللي بنتها بينهم.
عمر باستفهام
اللي هو أيه؟
طمنها.
صمتت لثوان تحارب عبراتها، وهي عازمة كُليًا على هدم كل ذرة ثقة بقلبها داخله.
و مش بس كدا. دا مسبهاش تقف ولو لحظة قدام نفسها و لا سابها فريسة لللوم و الندم.
ارتفعت إحدى زوايا فمها بابتسامة ساخرة قبل أن تقول بنبرة تهكمية
عشان كدا قولتلك الرومانسية اللي فيها مش هتعجبك. مش التايب بتاعك، و لا تشبه دماغك و لا تفكيرك.
صدمته كلماتها كثيرًا خاصةً أنها برعت في حجب ألمها الداخلي عنه. كل ما بدر منها كان سخرية و حط من قدره. ألهذه الدرجة تراه حقيرًا؟
بكل ما تملك من الثبات نصبت عودها و قامت بوضع الكتاب من يدها وهي تتوجه إلى الخارج ثائلة
هروح أدي تيتا الدوا.
لم يلتفت و لم يُجيبها، فقد كان هناك غضب عظيم يجيش بصدره في هذه اللحظة لو أطلق له العِنان لحرق الأخضر و اليابس، و لكن فجأة لفت انتباهه شيء ما داخل الكتاب فقام بجذبه ليجد وردا ذابله كان قد وضعها ذلك الصباح بعد أن أتم زواجه منها، فهي لازالت تحتفظ بها و أيضًا وجدها ظللت أحد الخاطرات المدونة في هذه الرواية باللون الفوسفوري و قد كان نصها
ببالغ الهوى أُعلِنها أن هواك قدر، و قدر الله و ما شاء فعل.
رغمًا عنه تألم قلبه كثيرًا و هو يرى حقيقة صورته داخلها. ألهذه الدرجة لامت نفسها لأجل ما حدث بينهم؟ يعلم أنه جرحها، ولكن لم يكُن الأمر كما ظنت، فهو لم ينوي التخلي عنها، ولكن الأمر كان مُفاجأة لم يحسب حساب لها.
امتزج الغضب و الألم بصدره ليُقرر الحديث معها، و لكنه توقف لثوان وهو يعبث بأحد صفحات الكتاب لبجذب القلم الذي استخدمته و يقول بتظليل خاطرة أخرى تروي شعوره نحوها، و قد عزم على حل هذا الأمر الليلة.
إنّي أسألك خير المسألة، وخير الدعاء، وخير النجاح، وخير العمل، وخير الثواب، وخير الحياة، وخير الممات، اللهم ثبِّتني، وثقِّل موازيني، وحقق إيماني، وارفع درجاتي، وتقبَّل صلاتي، واغفر خطيئتي، وأسألك الدرجات العُلى من الجنة.
أيوا يا مدام سوزي. انا عماله ألف في المول اهو لحد ما الاقي المحل اللي قولتي عليه.
هكذا تحدثت أشجان في الهاتف ليأتيها صوت سوزان الحانق
والله أنتِ اللي أصريتي تنزلي تشتري الحاجات و أنتِ أساسًا بتتوهي قدام بيتكوا.
أشجان بتبرير
الحق عليا اني مردتش الشغل يتعطل!
سوزان بتهكم.
عليا انا بردو الكلام دا! ولا هو عشان بقاله كام يوم مبيجبش فالمطعم مبقالوش طعم من غيره. طب على فكرة بقى هو أصلًا بلغني أنه مسافر بره و مش هييجي غير بعد شهر
توقفت بمكانها وهي تحدث نفسها بحزن لون معالمها و انعكس على بريق نظراتها
شهر. هيغيب شهر بحاله!
رفرفت برموشها وهي تحاول ألا تبكي لتحاول إنهاء المكالمة وهي تقول
لما الاقي المحل هكلمك.
أغلقت الهاتف مع سوزان وهي تسير بغير هُدى في المول الكبير تتذكر كلماته الحانية و أفعاله التي كانت تُخيفها من فرط روعتها، و تتذكر الحياة التي كانت عينيه تعدها بها، و الآن تبدد كل شيء، فهو غادر دون أن يُخبرها. بالتأكيد مل منها و من كل هذا التعقيد و الحزن الذي يُحيط بها لترفع رأسها عاليًا وتحاول ردع هذه العبرات في رفض تام منها لتصديق هذه التُرهات، فهو لن ينكث وعوده معها أبدًا، فقد انقضت عدتها منذ ثلاث أيام، و أصبحت حرة، وستتنعم بهذا الشعور ولن تدع أي شيء يُفسد عليها صفوها.
كنتِ مفكرة انك هتعرفي تهربي مني؟
انتفضت أشجان حين سمعت صوته الأجش من خلفها لتلتفت إلى الوراء فوجدته يقف بطلته المهيبة، طوله الفارع و لكنه بدا وسيمًا أكثر خاصةً حين تخلى عن رابطة عنقه و ترك أول أزرار قميصه مفتوحة و أيضًا خصلات شعره الفوضوي التي أضفت نوعًا من الجاذبية على ملامحه التي لونها العبث إضافة إلى نظراته التي تِشعرها و كأنها المرأة الوحيدة على هذه الأرض كل هذه الأشياء كان لها وقعًا ساحرًا عليها لتهتف بنبرة خافتة
خالد بيه!
تقدم منها بخطوات وئيدة و عينيه التي طافت عليها بنظرة شملتها من كُليًا و كأنها تغازلها على طريقته ليقول بنبرة عابثة
والله انت اللي بيه.
غمرها الخجل حتى لونت الورود وجنتيها لتقول محاولة لأن تنأى عن منطقة الخطر
حضرتك جيت هنا امتى وعرفت انا فين ازاي؟
توقف أمام عينيها مُباشرةً ليقول بنبرة خشنة
قلب العاشق دليله.
كلماته أذابت أوصالها حتى شعرت بأنها على وشك الإغماء ليُتابع بصوته الأجش.
لو روحتي لآخر الدنيا قلبي هيقولي أنتِ فين؟
حاولت الفكاك من أسره فأخذت تتلفت حولها وهي تقول بارتباك
انت بتعذب نفسك على الفاضي.
خالد بفظاظة مُرددًا جملتها السابقة التي كانت تُثير جنونه
نفسي وانا حر فيها.
اغتاظت من هيمنته الواضحة لتقول بانزعاج
طيب اذا كان كدا عن اذنك.
لم يتزحزح ذلك الجبل الشامخ من أمامها انما لون العبث نظراته و هوويقول بثقة
مهما بعدتي مش هتقدري تخرجي برا حدودي.
أشجان بخفوت
و دا اسمه ايه؟
خالد بنبرة تحمل من الحزم ما يوازيها من العشق
أسمه اني محاوطك في كل مكان.
أشجان بتصحيح
قصدك محاصرني.
خالد بخشونة
صح. أنتِ صح. بس اقولك على حاجه أنتِ لسه مشوفتيش حصار خالد الوتيدي عامل ازاي؟
أشجان باستهجان
لا والله كل دا و مشوفتش!
كانت عينيه العاشقة تناظرها بشوق و كأنه يحاول أن يتشرب ملامحها لتنطبع بين جفنيه، و قد عبرت كلماته عن جزء مما يجيش بصدره حين قال
استني لما تبقي في حضني، و أنتِ هتشوفي الحصار على حق.
كلماته أصابت وترًا حساسًا داخل قلبها، ولكنها لازالت تحافظ على المتبقي من ثباتها حين قاله تنهره
علي فكرة حضرتك عيب اللي بتقوله دا، و مينفعش كدا.
اقترب خطوة منها تراجعت هي اثنين إلى الخلف حين شاهدت الوعيد الذي أطل من عينيه و نبرته حين قال
و دا اعتراف من حضرتي اني قليل الأدب، و إن كان عاجب حضرتك.
لم تعرف ماذا تقول؟ ولا تدري كيف يمكنها ردع قلبها العاصي الذي يُحب كل شيء منه بل و يشتهيه لذا لم تجد بد من الهرب حتى لا تُلقي بنفسها بين ذراعيه فقالت بتلعثُم
أنا مش هرد عليك، و اصلًا همشي.
ارتفع أحد حاجبيه بطريقة اربكتها، و خاصةً حين احتدت ملامحه فظنت أن حديثها أغضبه ولكنها تفاجئت حين قال بجفاء
تعاليلي هنا يا هانم. أنتِ ازاي تخرجي من غيري وانتِ حلوة كدا؟
أشجان بنبرة على وشك البكاء
علي فكرة خضتني.
خالد بوقاحة
لا اجمدي كدا. انا لسه معملتش حاجه.
خرجت الحروف مندفعة من بين شفاهها
اقسم بالله انا خايفة منك موت.
كان يحاول قمع ضحكته بصعوبة على مظهرها الخائف، ولكنه بدلًا عن ذلك صيق عينيه و هو يقول بوعيد
وحياة امي. كل اللي عملتيه فيا هطلعه عليكِ بس الصبر.
خرجت الكلمات منها مندفعة مُعاتبة حين قالت
هتعمل أيه اكتر من كدا ما أنت بقالك تلت أيام مبتجيش المطعم، ولا بشوفك ومسافر لمدة شهر كمان.
توسعت حدقتيه لا يُصدق أنها اشتاقته، فقد قرر البقاء بعيدًا لفترة من الزمن يعلم الله كم جاهد نفسه حتى يظل على ثباته ليرى هل ستشتاق إليه أم لا و لكن الأمر تخطى حدود الشوق، فهي على وشك البُكاء الآن لأنه غاب عنها لثلاث أيام علمًا بأنه لم يكُن يُحادثها فقط نظرات متبادلة ليبتهج قلبه و ينشرح صدره الآن، فهاهو وصل إلى مبتغاها ليُقرر مشاكستها قليلًا حين قال بنبرة خشنة.
أخس عليا بقى انا عملت كل دا! طب هرجع من السفر امتى متعرفيش؟
أشجان باندفاع
بعد شهر.
اتسعت ابتسامته لتقطب هي جبينها قبل أن تقول بتبرُم
بتتريق عليا!
خالد بنبرة خشنة
لا مش بتريق. انا فعلًا هسافر، و هغيب تلت شهور. بس مش لوحدي. هاخد مراتي حبيبتي معايا.
برقت عينيها حين استمعت إلى كلماته لتهتف باستفهام
تقصد مين؟
خالد بتهكم
واحدة لسه قيلالي خالد بيه من شوية.
تحمحمت بخفوت قبل أن تقول.
ماهو أنا قولت انك رجعت في كلامك يعني، و كدا يعنى.
خالد بوعيد
وكدا يعني! حصلت لكدا يعني! ماشي اتكي عالصبر بس.
لا إراديًا ابتسمت ثغرها على حديثه ليقول بخشونة
استنيني النهاردة بالليل. انا جايلك زي ما وعدتك.
لأول مرة منذ زمن تتوهج عينيها بسعادة هكذا ليقترب منها قبل أن يقول بصوتًا أجش
مبقاش في حاجة في الدنيا تمنعني عنك، و مبقاش في دنيا خلاص من غيرك.
ترقرقت العبرات في مقلتيها من فرط السعادة لتهمس بخفوت
هستناك.
خالد بنبرة خشنة
بحبك.
لا إله إلا الله، وحده لا شريك له، له الملك، وله الحمد، وهو على كل شيء قدير.
كان اليوم الثاني لها في الحضانة بعد أن استطاعت إقناعه بالعمل، وبعد وابل من التعليمات أخيرًا وافق على شرط أن تذهب معه صباحًا ولا تُغادر إلا برفقته. ابتسامة رائعة لونت ثغرها وهي تتذكر حين استيقظت لتجده كالعادة ينام على الأرض واضعًا رأسه بجانب رأسها على الأريكة لتكُن ملامحه الوسيمة هي أروع إطلالة تقع عينيها عليها في الصباح و خاصةً هذا الصباح حين امتدت يديه تداعب خصلاتها وهو يقول بنبرة مُتحشرجة من أثر النوم.
عليا النعمة أسيادنا راضيين عني. بتصبح كل يوم بالغُريبة الحلوة دي.
اتسعت ابتسامتها الحالمة والتي سُرعان ما تبددت حين سمعت هذا الصوت التي تعرفه جيدًا
الله. الله. ما احنا بنعرف نضحك أهو يا ست البنات.