قصص و روايات - روايات صعيدية :

رواية ذات الكتاب الأحمر للكاتبة شاهندة الفصل السادس والعشرون

رواية ذات الكتاب الأحمر للكاتبة شاهندة الفصل السادس والعشرون

رواية ذات الكتاب الأحمر للكاتبة شاهندة الفصل السادس والعشرون

أسرعت سعاد في خطواتها، لقد تأخرت اليوم وعليها اعداد الطعام قبل أن تأتي خالتها لزيارتها، صعدت درجات السلم وتوقفت أمام باب شقتها تخرج مفتاحها من حقيبتها بصعوبة بسبب الأكياس التي تحملها ثم فتحت الباب وماان فتحت الباب حتى اتسعت عيناها بصدمة، فالشقة صارت فوضى. لا شيء بمكانه أبداً، لابد وأن لص اقتحم المكان في غيابها، شعرت بالهلع وتراجعت خطوتين تنوي مغادرة الشقة وإبلاغ الشرطة حين سمعت صوت زوجها يقول ببرود:.

رايحة فين ياسعاد؟
عقدت حاجبيها وهي تتقدم مجدداً إلى الداخل تقول بحيرة:
أشرف!
ظهر من المطبخ قائلا بسخرية:
أيوة أشرف أمال كنتِ فاكرة مين؟
وضعت الأكياس من يدها على الطاولة وهي تقول:
حرامي طبعاً، ايه اللي عملته في البيت ده؟ وليه؟
مش تقولي لجوزك حمد الله على السلامة الأول.
طالعته قائلة بعتاب:
خرجت من المصحة ليه ياأشرف؟
اقترب منها يحدجها بنظرة حادة وهو يقول:.

كنت عايزانى أقعد فيها مش كدة؟ عشان يخلالك الجو وتعملي اللي أنتِ عايزاه.
اتسعت عيناها تقول باستنكار:
عشان يخلالي الجو؟ ايه الكلام الفارغ ده؟أنا كنت عايزاك تخف وترجع لبيتك ومامتك وبنتك بخير. كنت عايزاك تفوق م اللي انت فيه.
وانتِ؟
أنا؟!
مجيبتيش سيرتك يعني، ايه مش عايزانى أرجعلك؟
أكيد عايزة. أشرف أنا عايزة أقولك علي حاجة، أنا..
قاطعها قائلاً بغضب:
انتِ خاينة ومتستاهليش قلبي اللي حبك ياسعاد.

اتسعت عيناها بصدمة قائلة:
انت بتقول إيه؟ اتجننت ولا شارب حاجة؟
أظهر هذه الورقة التي أخفاها خلف ظهره قائلا:
أنا شارب صحيح بس فايق وصاحيلك يابنت توفيق، فسريلي انتِ رسمتك لابن خالتك وهو بيلعب مع تقي على شط البحر. قوليلي محمد كان بيعمل ايه معاكِ لوحدكم في بلد غريب يابنت الأصول يامتربية؟
نظرت إلى الرسمة قائلة باضطراب:
كان مسافر يطمن عليا لما عرف اني في بلد غريبة لوحدي زي ماانت بتقول.

لتهاجم وقد رأت في عيونه نظرة غاضبة ساخرة مردفة:
كان المفروض انت اللي تعمل كدة. مش هو.
كمان بتلوميني يافاجرة، أنا اللي غلطان اني آمنت لواحدة زيك.
اتسعت عيناها بهلع وهي تراه يخرج سكيناً من بنطاله لتقول بنبرات مرتجفة:
انت هتعمل إيه يامجنون؟
ظهر الشر بعينيه وهو يقول:
هنتقم لشرفي وأقتلك. هشرب من دمك ياخاينة.
تراجعت قائلة بخوف:.

اهدي ياأشرف واسمعني، متعملش حاجة تندم عليها بعدين. والله العظيم أنا بريئة والهباب اللي بتشربه هو اللي مهيألك اني خنتك ومحافظتش على شرفك. متسمعش لوساوس الشيطان وتدمر حياتنا.
تأمل ملامحها قائلاً بمرارة:
بالعكس انا شايفك دلوقتي على حقيقتك. والمصيبة اني حبيتك بجد لكن انتِ عمرك ماحبتيني، كنت بتحبيه مش كدة؟ كنتوا متفقين على الجواز وانا فرقتكم بس مقدرتوش تبعدوا عن بعض ودبحتوني.
اغروقت عيناها بالدموع تقول:.

والله العظيم انت فاهم غلط. والله العظيم انا بريئة وانت ظالمني.
واللي شافك قاعدة معاه لوحدك في الكافيتريا برضه ظالمك؟
لم تدري في هذه اللحظة كيف تبرر له لقائها بابن خالتها دون أن تزيد الأمر سوءا فظهر الاضطراب على ملامحها وصمتت ليفسر أشرف اضطرابها وصمتها بطريقة خاطئة، اكفهرت ملامحه وهو يرفع السكين تجاهها قائلاً بغضب:
قلتلك خاينة وجزاكِ الموت.

استدارت تحاول الهروب من طعنته وقد أدركت أن مساً من الجنون أصابه فأصابتها السكين في ظهرها لتصرخ من الألم قبل أن تسقط أرضاً على ركبتيها، اقترب منها أشرف يجذبها من شعرها فتأوهت قائلة بصوت يإن من الألم:
ارحمني أبوس ايديك.
قال بحدة:
وانتِ مرحمتنيش ليه؟
ياأيها المؤمنون ان جاءكم فاسق...
اخرسي.
مش عايز تسمع كلام ربنا. خايف منه؟
انا باخد حقي.

انت عارف من جواك اني مستحيل اغضب ربنا. انت عاشرتني وعارف بخاف منه قد إيه. الله يلعن المخدرات اللي لحست دماغك. خلاص مبقتش خايفة من الموت كمل عليا واقتلني، الموت أرحم من اني أعيش مع واحد زيك.
دفعها بقوة هادراً:
قلتلك اخرسي.
ارتمت على الأرض تمسك بطنها وهي تتأوه بقوة، تقول من بين أنفاسها المتقطعة:
انا خلاص بموت وابنك كمان بيموت. أنا حاسة بيه. ياريت تكون كدة ارتحت.
عقد حاجبيه بقوة قائلا:.

انتِ بتخرفي بتقولي ايه؟
وجد دماءاً غزيرة تخرج من تحتها، شعر بدلو من المياه الباردة يُصب فوق رأسه، ليعود بعينيه إلى عينيها تظهر في مقلتيه آثار الصدمة لتقول بألم:.

أيوة كنت حامل منك. حامل في شهرين والدكتورة قالتلي انه علي الأغلب ولد، افتكرته خبر هيخليك تكمل في المصحة عشان خاطره. عشان خاطر ترجع لولادنا. كنت ناوية أجيلك وأفرحك اول مايسمحوا بالزيارة. غبية مش كدة؟بقيت عليك وانت من غير بينة ولا دليل حكمت عليا ونفذت حكمك. والله العظيم اللي رايحة لرحمته دلوقت أنا بريئة وعمري ماخنتك، لقانا يوم الدين ياأشرف. عند اللي خلقني وخلقك. وقتها هو اللي هياخدلي حقي منك.

أغلقت عيناها ببطىء لينظر إليها أشرف بصدمة يترك السكين لتقع من يده بعد أن ذهب عنه شيطانه وقد أدى مهمته على أكمل وجه. تأملها يقول بهذيان:
سعاد ردي عليا ياسعاد.
لم تجبه فهزها بيده مردفاً:
ياسعاد فتحي عنيكِ وقومي. اضربيني موتيني اعملي فيا اللي انتِ عايزاه بس قومي.
لم تجبه مجدداً، ليدرك ماعجز عقله الآن عن استيعابه، لقد قتلها في لحظة تملكه فيها شيطانه ولا شيء سيعيدها إلى الحياة.

نعم بأي دليل أدانها؟ لم ير عليها قط مايدفعه للظن بها. انها نفسه الضعيفة من سولت له سوء عملها كي تستحق مااقترفته يداه بحقها طوال سنوات زواجهما والآن فقط بعد غيابها يدرك أنه خسر أجمل شيء امتلكه ولا شيء سيعوض خسارته. نهض ببطئ يتراجع للخلف قبل أن يهرع خارجاً من المكان ينزل السلالم هرولة ليصطدم بأحدهم، اندفع لا يبالي، بينما عقدت الخالة جليلة حاجبيها لمرأي أشرف بهذه الحالة، أسرعت بالصعود إلي شقة سعاد وما إن دلفت إليها حتى تعالي صراخها بالمكان ليعود الرجلين اللذان كلفهما رءوف بحراسة شقة أشرف بعد أن كانا يتبعان الأخير ليصعدان بسرعة تجاه مصدر الصوت.

في شركة بدران للإستيراد والتصدير.
انتِ بتقولي ايه ياعليّة؟

اللي انت مش راضي تقوله ياماهر؟ اللي مخبيه جوة قلبك عشان متجرحنيش، خايف عليا من الصدمة مش كدة؟ متخافش أنا مبقتش عليّة بتاعة زمان ولا بيني وبينك اللي كان بيني وبين صلاح الله يرحمه يبقى ليه نكمل وانت بتحب واحدة تانية؟ ليه أعيش معاك وانت قلبك وعقلك مع غيري؟ انت شايف اني أستاهل كدة؟أستاهل اللي باقيلي من قلبك، ده لو باقيلي حاجة منه أساساً بعد مروة ماملكته كله.

منحها ماهر ظهره يخفى وجع قلبه حين ذكرت اسمها قائلاً:
هنساها صدقيني وهيرجعلك قلبي فاضي من تاني.
بدا صوته ثابتاً رغم الألم ورغم ثقته بعدم استطاعته فعل ذلك ولكنه أغمض عيونه يتوسل ان تصدق احرفه الكاذبة، قد يستطيع كسر قلبه وقلب حبيبته ولكن قلبها هي. لن يستطيع أبدا. انها الأخت الضعيفة التي لطالما كان هو عضدها وحاميها، حتى أنه قاطع أخاه لكسره قلبها فكيف يفعلها هو؟

فتح عيونه حين وجد يدها تلمس كتفه وصوتها الحاني يصله وهي تقول:
قلتلك متخافش عليا، وبعدين انت بتكدب عليا ولا على نفسك؟ حب مروة ساكن في قلبك، لا يمكن تنساها أبداً مهما حصل.
استدارت يطالعها بحيرة فأردفت قائلة:.

مختلفة عن نفين. لقيت فيها روحك أمنياتك أحلامك مش كدة؟ معاها مبتفكرش بتلاقي نفسك على طبيعتها. بتخرج احلى مافيك وأسوأ مافيك. علي قد مابتبقي عايز تخنقها بتبقى عايز تضمها. عارف ومتأكد ان سعادتك وياها وبس ولما بتغمض عنيك بتشوف صورتها هي وبس. بتوحشك وهي وياك والوحيدة اللي فاهماك وقرياك من جوة. مش كدة؟
إنتِ عايزة مني ايه بالظبط ياعليّة؟

عايزاك تفوق قبل ماتضيع منك حبيبتك. مروة هي نصك التاني، حبك الحقيقي، ليه تضيعها من ايدك لما في ايدك تكون وياك طول العمر؟
وانتِ؟
أنا من حقي أرتبط بواحد أكون له انا كمان نصه التاني والحد ده لقيته خلاص ومش مستعدة أخسره.
قطب جبينه بحيرة قائلاً:
قصدك ايه؟
ابتسمت قائلة:
قصدي إن آن الأوان للأخ يطمن على أخته ويبطل يشيل همها لان فيه حد تاني هيشيله.

فُتح الباب في هذه اللحظة وظهر مراد على الباب مبتسماً، ليعود ماهر بعينيه إلى عليّة التي هزت رأسها قائلة بابتسامة:
هو نصي التاني ياماهر. مراد.
اقترب مراد منهما فمالبث ماهر ان ابتسم قائلاً:
أنا حقيقي مش عارف أقولكم ايه؟
قالت عليّة بمرح:
انت لسة هتقول؟ روح فرح المسكينة اللي واقعة لشوشتها في حبك واطلب منها الجواز خلي الفرح يبقوا اتنين.
رن هاتفه فطالع شاشته ليجدها والدته، أجابها بابتسامة قائلاً:
ماما...

قطع كلماته وهو يقطب جبينه يستمع لوالدته بينما تطلع كل من عليّة ومراد لبعضها البعض في حيرة، حتى سمعاه يقول:
تمام انا هتصرف سلام.
أغلق هاتفه يطالع هذه العيون المترقبة قبل أن يقول:
مروة سابت البيت وراجعة القاهرة.
قالت عليّة:
أخدت صلاح معاها؟
هز ماهر رأسه نافياً وهو يقول:
لأ ودعت ماما ووصتها عليه.
قالت عليّة:
مشيت عشانك وضحت حتى بصلاح عشانك. بتحبك أكتر من نفسها. مش قلتلك هي اللي تستاهلك.

مشيت عشاني. انتِ قصدك ايه؟
انت لسة هتسأل؟ يلا بينا على محطة القطر تلحقها قبل ما تسافر وفي السكة هنحكيلك.
هز رأسه ليغادروا الشركة بخطوات سريعة.
ازاي بس مقلتليش ياطاهر على حاجة زي دي؟
اللي حصل ياجدي. المشكلة دلوقتي هتصرف ازاي؟

ودي فيها كلام؟ تروحلها طبعا وتتكلم معاها، تحكيلها كل حاجة بصراحة زي ماحكيتهالي تمام وأنا واثق ان آيات لو سمعت الحقيقة منك هتسامحك لما تعرف بتحبها قد ايه وليه خبيت عليها موضوع الكتاب الأحمر.
تفتكر ببساطة كدة هتصدقني؟
أيوة ببساطة لأنك صادق في مشاعرك وهي كمان بتحبك.
طيب ألاقيها فين دلوقت؟

مش هنا اكيد. آيات آخدة أجازة ولسة مرجعتش. اتصل بمامتها لأنها مش هترد عليك، قولها مثلا ان تليفون بنتها مقفول وانت حابب تتطمن عليها، الكلام هيجيب بعضه وتعرف اذا كانت في البيت ولا برة.
قبل طاهر جبين جده قائلاً:
ياحبيبي ياجدي، مش عارف من غيرك كنت هعمل إيه بس؟
هتعمل محشي. انت لسة واقف بتعمل إيه؟ روحلها واعتذرلها وحددوا ميعاد الفرح. أنا عايز حفيد بأقصى سرعة.
حفيد واحد. عشرة. ادعيلي انت بس.

قال كلماته بينما يسرع بالمغادرة تتبعه نظرات جده الحانية وابتسامة مالبثت أن زالت ورنين هاتفه يزعجه. ليجيبه قائلاً:
أيوة ياماجد. بتقول ايه. الكلام ده حصل من امتى؟ولسة بتقولي دلوقت. طب أنا جاي حالاً.

أغلق الهاتف ووضعه في جيبه، يعقد حاجبيه بحنق. ماالذي فعله هذا الأحمق؟ لقد أضاع حياته ومستقبله. ترى كيف سيخبر صفية بفعلة ولدها الشنعاء وكيف ستتحمل الخبر؟ لابد وأنها ستنهار بين يديه. يعلم هذا ولكنه مرغماً على البوح لها بكل مالديه وليدعو الله أن يخفف عليها وقع الخبر.

كانت تجلس في مقعدها على الطاولة في هذا الكافيه الذي جمعها به لآخر مرة، لا تدري ماأتي بها إلى هنا وهي من المفترض أن تهرب من ذكرياتها معه فإذا بها تحييها هنا في هذا المكان تتذكر كل كلمة قالها. كل حركة قام بها. شعرت بأنها لن تحتمل أكثر، كادت أن تنهض مغادرة ولكن النادل أحضر قهوتها فمكثت مكانها، تحمل الفنجال وتقربه من شفتيها ترتشف منه رشفة فتغمض عيناها رُغماً عنها تستشعر مذاق القهوة الخلاب كما اعتادت أن تفعل، وجدت صوته يهمس في أذنها قائلاً:.

يابخت القهوة.
همست قائلة:
اتجننتي ياآيات وبقيتي بتسمعي صوته في كل وقت.
ودي حاجة حلوة ولا وحشة؟
لقد جاء الصوت من أمامها، لايمكن أن يحدث. فتحت عيونها فرأته حقاً يجلس أمامها يطالعها بحب، قطبت جبينها وهي تترك فنجال قهوتها علي الطاولة ثم تنهض وتسحب حقيبتها لتغادر، أمسك يدها يمنعها قائلاً:
آيات من فضلك اقعدي واسمعيني.
طالعته ببرود قائلة:
مش مستعدة أقعد وأسمع واحد كداب.

أظن انك كبيرة كفاية عشان تقدري تفرقي بين الصدق والكدب في الكلام، وأكيد من جواكِ حاسة اني كنت صادق في مشاعري. عموماً اسمعيني الأول ولو حسيتي للحظة اني بكدب يبقى من حقك تمشي وصدقيني مش هتشوفي وشي تاني.

كم تبعث فكرة اختفاؤه من حياتها مرارة بحلقها ووحشة في قلبها جعلتها ترغب في سماعه ليمنحها أي سبب يجعلها تبقيه في حياتها. فمنذ البارحة وهي تفتقده حد الموت، تشعر بخواء جعل حتى عمها رأفت يسألها عن حالها فأخبرته فقط بوجود بعض الخلاف بينها وبين طاهر تمهيداً لإخبارهم بانفصالها عنه لاحقا.

وجدت نفسها تجلس وتتطلع إليه ببرود بينما قلبها تتسارع خفقاته وهي تلاحظ شحوب وجهه وتورم جفنيه. ترى هل جافاه النوم مثلها البارحة، هل بكى وذرف الدموع كما فعلت؟ أم تراها تتوهم كي تجد في هذا عزائها؟
تطلع إليها بدوره قائلاً:
أنا مااستغلتش كتابك الأحمر عشان اتعرف بيكِ واوصلك زي مافهمتي، لأ الكتاب الأحمر كان اللي فاضلي منك. حاجة كانت بتثبتلي انك مكنتيش وهم خلقه خيالي بعد مادورت عليكِ طول حياتي.

انت بتقول ايه؟ انا مش فاهمة حاجة خالص.

عشان تفهمي لازم نرجع للبداية، لأول لحظة شفتك فيها، مكنتش يوم ماجدي قدمنا لبعض زي ماانتِ فاكرة؟ لأ قبلها تقريباً بأكتر من سنة. كنت قاعد هنا بشرب قهوتي وقتها وقفتي عند الباب وكأن أحلامي كلها اتجسدت في واحدة، ورغم اني قابلت كتير بنات حلوة قبلك بس احساسي بيكِ كان حاجة تانية، معرفش ليه لقيت عينية متعلقة بروحك بشوف فيكِ تفاصيلي وكل حاجة بحبها، وقتها وقعت في حبك وحسيت اني أعرفك وأعرف كل حاجة عنك زي عشقك للون الأزرق وعنيكِ اللي بتقفليها كل ماحاجة تمس روحك، شهرين وانا براقبك مستني فرصة أتعرف فيها عليكِ، ولما خلاص كنت هجازف وأكلمك جالك تليفون غير كل ملامحك وخلاكي قمتي وسبتي المكان بسرعة.

تتذكر هذا اليوم جيداً، انه اليوم الذي تلقت فيه خبر دلوف أباها إلى المشفى. ثم وفاته لاحقاً بذات اليوم.

جريت وراكِ ملحقتكيش ولقيت الكتاب هو كل حاجة فضلت منك لأن من ساعتها واختفيتي من حياتي، عارفة يوم لقانا في دار المسنين. حسيت ان اللي بينا قدر، كان جدي حاكيلي عنك كتير، كان نفسه ارتبط بيكِ، طلب مني كتير آجي يوم وأشوفك فيها بس كنت دايماً برفض لان قلبي اتعلق بواحدة معرفش عنها غير اني شفت فيها نفسي ولما طلب مني أمثل ان خطيب الدكتورة بتاعته واضطريت أوافق عشان مزعلوش ولقيتك هي. عقلي استرجع علطول كلامه عنك وعن كرهك الرجالة، ده غير كلامك في الكتاب، مكنتش مستعد أجازف بإنك تبني بينا حواجز لو قلتلك، قلت هي فرصة أقرب فيها منك وتعرفيني، مش جايز تحبيني قد مابحبك. غلطة عملها واحد بيحب ندم عليها بعدين. في كل لحظة كان نفسي أقولك فيها أنتِ حبيبتي اللي بتكلم عنها دايماً، في لحظات كنت بتمنى بس آخدك في حضني واعترفلك ان مش طالب من الدنيا دي غيرك أنتِ. اوقات كتير كنت خلاص هعترف وخوفي لأفقدك يخرسني، لغاية مارجعنا مصر وقررت أصارحك، جبتك شقتي ودورت علي الكتاب عشان أشرحلك موقفي بس للأسف لقيتيه قبلي وفهمتيني غلط. واديني أهو قدامك. حطيت قلبي بين ايديكي واعترفتلك بكل حاجة خبيتها عنك، يعلم ربي كان ايه قصدي؟ وان الكتاب مكنش وسيلة أخدعك بيها قد ماكان وسيلة عشان تفتحي بيها قلبك المقفول ليا وتديني فرصة، مش عايز حاجة من الدنيا غير انك تسامحيني. تديني فرصة جديدة لاني حقيقي بحبك وعمري ماخدعتك. كل كلمة كانت بينا كانت من قلبي وكل تصرف اتصرفته معاكِ وقربك مني كان من قلبي، أنا حقيقتي شفتيها وعرفتيها. مكنتش تمثيلية والله. وجودك في حياتي قدر. أجمل قدر. وبتمنى من كل قلبي تشوفي اني قدرك وتسامحيني. قادرة ياآيات؟

كانت كلما استطرد في الكلام تشعر بقلبها يلين تجاهه حتى انهي كلماته فوجدت دموعها تجري على وجنتيها، لم يحبها أحد كما أحبها هذا الرجل تستشعر صدق حبه في كل حرف ولم تحب أحد مثلما أحبته، لتكون إجابة سؤاله هزة من رأسها وكلمة همست بها فأرسلته إلى السماء السابعة وتركته هناك. في جنة النعيم.
بحبك.
أسرع يمسك يديها بين يديه قائلاً:
بجد ياآيات؟
هزت رأسها بحب فأردف بسعادة:
انا كمان بحبك. بحبك قوي.
مستني ايه؟

قطب جبينه بحيرة فاردفت بابتسامة:
قوم بينا نروح لماما ونحدد ميعاد الجواز.
ابتسم بدوره ينهض وينهضها معه قائلا:
يلا بينا.
ترك بعض المال على الطاولة وأسرع يغادر تسرع بدورها معه، فتح لها باب سيارته فكادت أن تدلف إليها، فجأة ضربه أحد على رأسه من الخلف. شعر بألم شديد ودواراً لفه فسقط أرضاً ليكون آخر مايسمعه صرختها بإسمه قبل أن يسحبه الظلام. كلية.

دلف ماهر إلى السيارة يظهر على ملامحه احباطاً فأسرعت عليّة تسأله:
مالك؟ مرضيتش ترجع معاك؟أنزل أتكلم معاها؟
هز رأسه نافياً وهو يقول:
القطر مشي من نص ساعة. للأسف ملحقتهاش.
عقدت عليّة حاجبيها قائلة:
طب والعمل؟
أدار السيارة يغادر المحطة بعيون تلمع لتردف عليّة قائلة بحيرة:
رايح فين بس؟
قال مراد بابتسامة:
ودي عايزة سؤال هيسافرلها ومش هيرجع غير بيها.

لتنقل عليّة عيناها بين الرجلين المبتسمين قبل أن يظلل ثغرها ابتسامة شاركتهما إياها.

الفصل التالي
جميع الفصول
روايات الكاتب
روايات مشابهة