رواية حكم القلب للكاتبة روز الفياض الفصل العشرون
ركصت ركص شرقي.
مرت عمي تكسر وتجبر.
تضحك ويه ساره زوجة حيدر. وتدور تمدحني وتكلي والله لو يشوفج حيدر.
بعدين من خلص العرس هم اجت سلمت عليه ساره وبوستني كلتلي: جنت متشوقه اجي حتى اشوفج واتعرف عليج من كداما اسمع عنج من حيدر وزينب بس مامتوقعتج هيج حلوه ومحبوبه.
مروه: حبيبتي شكرا هذا من ذوقج.
مرت عمي اجت بوستني واتعذرت وحاولت تبرر بعدين دك عليهم حيدر وراحوا.
ثاني يوم كعدت من الصبح انظف اني وحسين وامي تطبخ..
للظهر ونزلوا فرات وزينب رحت لغرفتي وسديت الباب. اجت هي وراي للغرفه.
زينب: شدعوه يابه لامبروك لاسلام لاكلام تره اني بت عمج.
ماجاوبتها.
زينب: مراوي تره انتي بت عمي واختي واحبج من كل كلبي والله العظيم، لو شنو يصير بينج وبين حيدر لتتصورين اتغير عليج لو اخذ موقف منج.
مروه: اني ميهمني بعد منو ياخذ موقف، انتي اخذتي موقف من زماان من يوم إلى اتصلتي بفرات وصلتيله حجي حيدر على الرغم انه حيدر هو إلى ظلمني مو اني..
هو إلى منع نفسه عني من اول يوم مو اني صحيح اني من الاول مرايدته ولاموافقه عليه بس ممنعته الا بعد ماهو منع نفسه لمدة شهر حتى كلمه محجه وياي حتى حرف منطق وياي واني بشر عندي كرامه مو معقوله بعدين من يحس يجيني بهالصوره وبدون حتى اعتذار وتبرير واكوله اهلا وسهلا جنت منتظرتك على نار واقدمله نفسي يتسلى بيها.
شبكتني كالت: والله متوقعت هيج راح يصير. ومتوقعت ردفعل فرات ولاحيدر..
والله العظيم من دخلج حيدر وسد الباب عبالك اني بمكانج حتى البارحه مصار شي بينه اني وفرات، مكدرت كتله اتخيل منظر مروه من غصبتوها انت وحيدر.
مروه: لا متكدرون تتخيلون المنظر، وحتى لو اتخيلتوا المنظر متكدرون تحسون بنفس شعوري ووجعي ولا تحسون بذلي بساعتها ولا بالوصاخه الحسيتها بيه ولابكسرة كلبي ولابحركت كلبي كولهن متكدرون تحسون بيهن هو مو بس منظر المنظر نكدر نغمض ومنشوف شي بس المصيبه باللي نحسه إلى نحسه هو إلى يخلينه نشوف كل شي..
زينب: والله مااعرف شنو اسوي حتى تنسين وترتاحين ماادري شنو اسوي حتى تسامحيني ونرجع مثل قبل صديقات؟
مروه: الله كريم لتفكرين، هم يجي يوم وانسى ان شاءالله..
واذا تردين اسامحج صدوك راح اطلب منج طلب؟
زينب: كولي شنو تردين طلبي؟
مروه: احجي ويه حيدر. خلي يطلكني حاولي تقنعيه؟
سكتت هي حسيتها ممتوقعه هيج شي.
زينب: ميهون عليه تطلكون رغم ادري بي اذاج بس بنفس الوقت ادري بي يحبج ولهسه بعده يحبج بس هو ميعرف يتصرف ويبين مشاعره صح، بس لخاطرج راح احجي وياه بلكي الله يهديه.
مروه: شكرا.
زينب: زين اني هسه اريد اطلب منج طلب.
مروه: شنو؟
زينب: كومي اتغدي ويانه.
مروه: لا مااروح اني اتعودت اكل بغرفتي احسن.
زينب: احسن لو متردين تكعدين يم فرات؟
مروه: هو احسن لان مااريد اكعد وياه ولااريد احجي وياه ولااريد اشوفه.
زينب: ولشوكت؟ حبيبتي هذا اخوج.
مروه: لا مو اخوي.
زينب: زين ميخالف لتحجين وياه بس طلعي كعدي يمنه واكلي ويانه.
مروه: خليني براحتي زينب لتحرجيني، من اشوفه أتأذه.
لحت زينب بس اني بقيت مصره على رأيي مطلعت يمهم.
بالرغم من إلى صار وبالرغم من انه زينب جانت سبب رئيسي بالي صار بيني وبين فرات وحيدر بس مااكدر اكرهها يمكن فعلا مجانت قاصده تأذيني ويمكن مثل مكالت مجانت متوقعه رد فعلهم هيج راح يكون لهدرجه قاسي ويمكن حجت بحسن نيه.
مرت الايام وجان وجودها بالبيت وياي من تنزل مرات احسه راد عني الوحشه اكو حس ويايه بالبيت..
وره زواج فرات وزينب اجه حيدر وراد يحجي وياي.
حيدر: مامليتي؟ متعبتي؟ مشبعتي من الكعده هنا؟
مروه: لا.
حيدر: هاي اخر مره اجي وتدرين بيه اذا اكول كلمه اسويها اذا مترجعين اطلبج لبيت الطاعه، شتكولين؟
مروه: اكول ماارجع طلكني وريحني وانت هم ارتاح.
حيدر: هذا اخر حجي عندج؟
مروه: اي والله.
حسين: طلكها خويه طلكها البنيه بعد متقبل ترجع وحتى اذا رجعت متريدك فليش هالاذيه والدوخه هي بالنهايه بت عمك شتستفاد من تأذيها؟
حيدر: مااريد أذيها يابه مرتي واحبها واريدها ترجع.
حسين: تحبها عوفها، اذا تحبها صدوك عوفها، لان هي تأذت وخلص.
نزلت زينب شافتنه كاعدين دخلت سلمت على حيدر وكعدت.
امي: وينه زوجج؟
زينب: طالع.
حيدر: والله تعبتيني وشلعتي كلبي.
مروه: شلعت كلبك؟ ها تعبت لان رحت ورجعت مره مرتين كل كم شهر بس ماانشلع كلبك من شلعت كلبي ودست على كرامتي وذليتني بذاك اليوم؟
حيدر: اهووو هم رجعنه لنفس الاسطوانه.
مروه: وماكو غيرها، طلكني اكسب بيه ثواب واجر وطلكني.
ارحمني اذا تحبني صدوك ومتريد تأذيني ارحمني وطلكني. خليني ارتاح خلي بكلبي شي زين يشفعلك يمكن بيوم اكدر انسى اللي سويته.
زينب: عوفها ياخويه لتعاند كافي عناد شتستفاد؟ كل إلى صار بيك وبيها وبينه كولنه بسبب العناد..
حتى الله مايقبل بهالشي، انت اتزوجت وحده ثانيه بعد عيش حياتك ويه زوجتك وعوفها..
اتركها تره حرام والله حرام.
حيدر: ولكم اني قابل وحش؟ مااحبها يعني؟
امي: تحبها طلكها عوفها ليش تأذيها؟
حيدر: هسه كلكم نفس الحجي؟ عمي شنو رأيه فرات شنو رأيه؟
حسين: هسه اتصل على ابوي وأسأله.
اتصل حسين كله ابوي جاي بالطريق شويه ودخل ابوي وحجه هو وحيدر.
ابوي: عمي انت ابني مو بس ابن اخوي وهي بنتي بس متريد ترجعلك شنسويلها. تريد الطلاك واني ظلمتها قبل من جبرتها هسه بحريتها واختيارها هي تقرر وتتحمل نتيجة اختيارها مااجبرها بعد وانت ومروتك تريد تطلكها بهدوء وبدون مشاكل وفضايح هي بت عمك ودمك ولحمك تريد تعاند وتشلع كلبنه كيفك.
سكت هو بقى مدنك فتره طويله بعدين كام وكف على راسي كلي بصوت مخنوك: مراوي..
الله يعلم شكد احبج ومو قاصد أذيتج واذا اذيتج فغصبن عني.
دنك باس راسي وكلي: انتي طالك.
اني بجيت وامي هم بجت وزينب..
مو سهل الطلاق ولاسهل اخسره بعد فد مره لاصديقي ولااخويه ولا ابن عمي ولاحتى زوجي.
وماادري ليش انقهرت يمكن جنت متخيله راح يبقى متمسك بيه ومراح يطلكني. ماادري..
من رجع فرات اتفاجأ من سمع بس محجه شي ولاعلق عالموضوع.
الايام الوراها بقيت منتظره ورقة الطلاق حتى يكون كل شي رسمي واخلص.
استلمتها وقررت بس تخلص العده اشتغل بدل مااني محبوسه بالبيت وحجيت ويه ابويه ووافق.
منال: الو وينج ظل بالي.
مروه: انتي صدوك ماعندج احساس داكه عليه من الساعه7 شعندج؟
كولي نايمه. كولي غافيه. اكو احد يتصل بهيج وقت؟
منال: ايا كسوله، كومي بابا اكعدي شنو نايمه لهسه شلون تردين تشتغلين لعد وانتي تمبل؟
مروه: من اشتغل الله كريم.
منال: خابرتج علمود الشغل عشتوا.
مروه: اي احجي اطربيني.
منال: انتي مو ماتردين شغل بشركات معناها اكو تقديم هسه عالنفط وعالتربيه انتي اختاري.
مروه: اي مااريد شركات انتي تشوفين الوضع يخوف واللي يشتغل بشركه اجنبيه ينقتل فمااريده حتى لو راتب قوي مالازم الحكومي احسن واضمن.
وفعلا رحت قدمت عالنفط وعالتربيه كلت منو يطلع بيهم نعمه.
بعدين ابوي حصلي وظيفه بمصرف شي مؤقت لحدما احصل تعيين حكومي.
داومت بقيت اشتغل بالبنك لمدة (6) شهور خلال هالفتره اتقدمولي هوايه من عملاء وموظفين وناس مااعرفهم عن طريق ناس ثانيه بس اني ارفض.
كرهت الزواج وكرهت حتى إلى يتقدمولي واعرف اهلي راح يكولون مننطي للغريب.
وره فتره منال اتصلت بيه كالت صديقتها نعمة إلى جانت ويه عبدالله بالطبيه متصله بيها وكايلتلها انه عبدالله متصل بيها وطالب منها تتواصل وياي وتحصله رقمي ورقم منال لان الارقام انمسحت من عنده وهو عرف بموضوع طلاقي ويريد يرجع يحاول بلكي هالمره اكو امل..
بس اني رفضت وكلت لمنال مااكدر ارجع اعيد نفس المأساه ونفس العذاب لان اموت فعلا..
كافي الموت إلى احس بي شال مشاعري لهسه. مااريد يصير عندي امل بشي مستحيل مااتحمل محاولات بعد
مادام ماكو شي اكيد..
وكتلها خل يتعود بعد اني مو اله خل ينساني ويعيش هذا الشي لصالحه لان اهله مستحيل يوافقون يتقدملي بعد لان صرت مطلقه فماله داعي يسوي مشاكل ويه اهله والنتيجه وحده.
بهالفتره حيدر طلك ساره ومنعرف السبب لااني ولاامي سألنه زينب ليش حتى لايكولون متشمتين بي الى ان شفتها مره بالسوك هي عرفتني واجت سلمت علي كلتلي: انتي فزتي، من اتزوجته جنت افكر اذا ترجعين شلون اخليج تشردين متبقين وياه، بس اكتشفت ماكو فايده مادام هو يكوم ويكعد وياج مو وياي.
مروه: الله يهديه وترجعون ان شاءالله.
ساره: لا ماارجع، اصلا بس اجيب انطيه ابنه هم اني اريد اشوف حياتي.
مروه: انتي حامل؟
ساره: اي. بس مااريده خل ياخذه.
مروه: لتستعجلين بهيج قرار اصبري بس يصير الطفل يتغير اكيد.
ساره: لا ميفيد هو اتزوجني الظاهر حتى يحرك كلبج يمكن تقبلين ترجعين، ميحبني وجودي وعدمه بحياته واحد..