رواية حكم القلب للكاتبة روز الفياض الفصل الحادي والعشرون
اتعجبت شلون متريد ابنها حتى لو ابوه مو زين شلون يطاوعها كلبها. وانقهرت عليها حسيتها انظلمت مثلي انحسب عليها زواج..
زينب هم جانت حامل والبيت كل متشوق وفرحان بيها.
ومنال انخطبت وفرحتلها من كل كلبي وبفترة خطوبتها جان خطيبها يجيبها عندي مرات يوصلها يمي وبعدين يرجع ياخذها.
بهالفتره حسيت اني بديت اتعود على عدم وجود عبدالله بحياتي بس مانسيته لان كان شي نقي ونظيف بكلبي وحياتي وامنية شبابي إلى مستحيل تتحقق..
اكيد شاف حياته هو هم ويمكن نساني يمكن اتزوج الله اعلم..
بس بعدين عرفت من منال انه عبدالله مسافر خارج العراق ومتعرف على بنيه واكو مشروع زواج بينهم. معناها نساني..
طلع تعييني بالنفط وداومت وجنت مرتاحه بدوامي وجان حيدر يجي مرات يخلص شغل لان يشتغل العصر بشركه اهليه نفطيه فيجي يخلص شغلهم بالدائره ويمر يسلم علي اني هم بديت ارجع اتصرف طبيعي وياه لان كاسر خاطري هم اني اذيته مو بس هو أذاني..
جان مرات يدزلي مسج صباح الخير مساء الخير هيج اشياء..
وبيوم بيت خالتي جانوا يردون يرحون سفره سياحيه لاربيل وجانت الرحلات عباره عن كروبات باصات وتروح بيها الناس همه جانوا رايحين من قبل بس اني لا فاقترحت خالتي وبنات خالتي اروح وياهم اغير جو واتونس عجبتني الفكره بس خفت من ابوي وفرات او حسين ميوافقون.
حجت خالتي ويه ابوي وامي قبلوا.
فرحت حيل جنت محتاجه اغير جو واطلع وارتاح اخذت اجازه ورحت اشتريت ملابس وجهزت الجنطه قبل يومين.
ورحت بالليل لبيت خالتي بتت عدهم والصبح طلعنه جنت فرحااانه عبالك اول مره بحياتي اسافر.
حلوه جانت الفكره وطول الطريق سوالف وضحك وناس تتعرف على ناس بالسياره وجان اكو عوائل وشباب بنات هوايه.
اني جنت لابسه جينز ازرك ووياه قميص وردي فاتح ولابسه حجاب ابيض وبي ورد وردي.
مشينه مسافه بعدين السايق خله اغنية حرام لمحمد المازم اتذكرت من سمعتها اول مره. جنت بالكليه كاعده بالكافتيريا وجانت اكو بنيه تبجي واني ومنال نضحك عليها نكول شوف الحب شيسوي جنه بمرحله اولى بوكتها.
هسه اني صرت مثلها خليت راسي عالشباك اباوع ودموعي تصب ماادري ابجي على حيدر لو على عبدالله لو على روحي..
بعدين خلصت الاغنيه بس طلعت اغنية اوكف يازمن اني هالمره ظليت ابجي حيل رادت حنين تروح تكله غير هالاغاني الحزينه بس اني كتلها خليها اني اريد اسمعها.
اجت خالتي كعدت يمي وحضنتني كلتلي: لاتبجين ياامي كل شي قسمه ونصيب محد يختار نصيبه.
مروه: اتمنى انسى.
خالتي: تنسين حبيبتي تنسين. هم جنه زغار وحبينه وبعدين اتزوجنه ونسينه.
مروه: ليش هيجي صار ويايه شنو ذنبي؟
خالتي: مو من ذنب حبيبتي انتي بس هي الحياة هيج تنطي شي وتاخذ شي ودوام الحال من المحال باجر تنسين وتحبين وتعيشين حياتج وتكونين عائله.
مروه: مااريد احب اي واحد بعد.
خالتي: هاذي سنة الحياة بنيتي. لاتتصورين بس انتي عشتي هيج تجربه اكو هوايه بنات مثلج عاشوها هذا مجتمعنه هيج.
مروه: لهسه من اتذكر إلى صار كلبي ينعصر.
خالتي: ميخالف حبيبتي باجر من تحبين واحد ثاني راح ينسيج كل هذا وراح تعيشين وياه سعيده ومرتاحه ان شاءالله.
مروه: لاخاله مااريد احب بعد. على كولت منال اني مو مال هيجي سوالف غلطت مره وحاولت اغير واقعي واختار بأرادتي نسيت البنيه مالها رأي ومالها كلمه بوجود اخوانها حتى لو همه على غلط.
ظلت خالتي تحجي وتنصح واني مخليه راسي على صدرها واسمع وابجي.
بعدين اتصلت منال وظلينه نحجي شويه.
منال: ليش تبجين انتي رايحه تتونسين لو تكضيها بجي.
مروه: ابجي عالاغاني، فنج يااغنيه؟ حرام. تتذكرين من سمعناها اول مره؟ وبعدين خله اغنية اوكف يازمن واتذكرت احمد وعبدالله وحيدر كلهم حتى فرات كلهم خسرتهم.
منال: انسي حبيبتي انسي عبدالله وانسي الكل فكري بنفسج وبحياتج والله يعوضج ان شاءالله.
مروه: ان شاءالله.
وصلنه لمطعم الدوز فوم بديالى.
نزلنه غسلنه ودخلنه لقاعة العوائل كعدنه اني كاعده وجهي للباب ويمي خالتي وكبالي حنين وبسمه كاعدين.
باوعت عالباب شفت واحد اعرفه ظليت اباوع هو لو مو هو.
خالتي: شبيج شكو؟
مروه: لاخاله ماكو شبهت على واحد توه عبر عبالي اعرفه وان شاءالله مو هو.
حنين: اسمه يبدي بحرف الحاء وينتهي بحرف الراء؟
مروه: والله ياخوفي هو هههه.
ضحكنه وبدينه ناكل بس ظلت عيني عالباب خصلنه وكمنه رحنه اني والبنات نشتري حلويات من بره.
اشترينه ودفعنه الفلوس حسيت واحد واكف يباوعلي ماباوعتله غلست ضجت وطلعت بره قبل البنات.
طلعوا البنات بس مشينه عثرت واجيت اوكع انجبح على وجهي لوما لزمت بسمه ولزمتني.
وكلها صاحت الله. الله. اسم الله. ويافشلتي احس وجهي صار طماطيه.
التفتت سمعت صوته باوعت ماشفته، كلت شنو ظليت اتخيل اتخبلت سوه بعقلي شي احنه وضعنه منتهي بس هو ميقبل يستسلم..
مشيت اني والبنات سمعت احد يمشي وراي ويصيح بصوت ناصي باسمي: مروه، مروه..
خفت والتفتت شفت حيدر ماصدكت عيوني البنات وكفوا.
يباوعلي ومبتسم نص ابتسامه.
اتنهد شويه وبعدين كلي: شلونج؟
مروه: زينه.
بقيت ساكته مصدومه من وجوده هنا ماحجيت شي وهو هم ساكت.
حيدر: اني هم زين.
ضحكت غصبن عني بعدين كتله: شجابك هنا؟
حيدر: منو وياج جاي؟
مروه: ويه بيت خالتي.
حيدر: ابن خالتج وياكم؟
مروه: لا.
حيدر: مغيره رقمج؟
مروه: اي غيرته قبل يومين.
حيدر: مااريد اعطلج وبنات خالتج ينتظروج بس اريد احجي وياج شلون، انطيني رقمج؟
مروه: مااريد احجي حيدر عفيه.
حيدر: رمشي عليه حتى اخزن الرقم عندي.
مروه: اهووو حيدر لاتنكد عليه فدووه اني جايه وياهم لان محتاجه اغير جو.
حيدر: ترمشين لو ابتلي بيج هنا.
رمشت اتنهدت كتله: شجابك وراي؟ شطلعك هنا؟
حيدر: راح احفظه واكتب عليه روحي.
اني من كلي هيج عبالي يكلي روحي مشيت صاح وراي: وين اوكفي. بعدهم محد صعد شبيج مستعجله؟
مروه: انت كتلي روحي.
حيدر: لج اسمج بالتليفون روحي مو ترحين.
اني جنت مثل الخبله ماادري شسوي ولا عندي حجي احجيه وياه ولا اريد احجي اصلا..
ظليت واكفه وساكته وايدي على كلبي اخاف يتنحس ويكلي امشي رجعي.
بدت الناس تصعد بالباص وخالتي اجت وتباوعلنه من بعيد.
مروه: شتسوي هنا؟
حيدر: عندي شغل بأربيل، انتي وين رايحه؟
مروه: اربيل.
حيدر: كم يوم تبقون؟
مروه: يمكن اسبوع.
اجت خالتي بعدها موصلت يمنه من بعيد كالت: شكو ماما؟
مروه: خاله هذا حيدر هنا.
حيدر: ولج شكد احبج.
مااتجرأت ارفع راسي واباوعله، دمعت عيوني واستحيت مسحت دموعي ودنكت.
اجت خالتي سلمت عليه وهو سلم عليها.
بقوا شويه يسولفون عن القسمه والنصيب بعدين اترخصنه ورحنه صعدنه بالباص، هو بقى واكف واني كعدت بمكاني يم الشباك باوعلته ودنكت صاحوله ولد واكفين اشرلهم بأيده شويه وبقى واكف يباوعلنه لحدما اتحركت السياره..
البنات اكلوا راسي يردون يعرفون شنو حجه وشيريد بس اني مااكدر احجي حسيت المشاعر إلى بكلبي كلها تريد تطلع مره وحده اريد اضحك حيل واريد ابجي حيل حظيش هذا العندي.
حنين: احجي كطعتي كلبي شكلج؟
مروه: احبج، شكلي بعد ولا كأنه مسوي شي واخذ رقمي يريد يحجي وياي شايفه هيج بحياتج؟
ضحكت هي كالت: لا الله عليج شكال؟
مروه: والله احجي صدوك كلي شكد احبج، هذا حيدر وهاي سوالفه ميستسلم.
حنين: جذابه؟ كولي والله كلج احبج؟
مروه: والله شبيج..