رواية حكم القلب للكاتبة روز الفياض الفصل العاشر
عبدالله: حبيبتي كافي بجي والله هيج تأذين نفسج وتأذيني.
مروه: عبدالله احنه بعد مينفع نكمل سوه.
عبدالله: شنو؟ شنو مينفع نكمل سوه؟
مروه: محد بقى بجانبنه احمد وراح. بقينه بس احنه ولو اموت ماراح يقبلون، فرات جان حاسب حساب لاحمد وساكت بس هسه احمد راح وهسه كل حياتي راح تتغير، حياتي اللي اعرفها راحت وياه.
عبدالله: انتي ليش هيج متشائمه؟ لتخافين ولتفكرين ماكو شي اسمه منكمل سوه انتي إلى ومحد يكدر ياخذج مني زين لو لا؟ هالحجي لتنسيه راح يقبلون لو اظل 100سنه اخطبج ماعندي مانع بس اريدج متستسلمين، لج اني ناذر اذا اخذتج الا بالعرس اجي اخذج من اهلج وافر البصره كلها وياج منروح ويه الزفه نروح بحدنه نفر البصره كولها واخلي الاغاني بأعلى صوت واخلي الناس كولها تعرف حبيتج واخذتج غصبن على اهلج وبكل تقاطع انزل اركص على عنادهم هههه.
ابتسمت كتله: خوش نذر.
عبدالله: والله شبيج، عبالج اتشاقه تره احجي صدوك، انتي هم لازم تنذرين مو بس اني هههه.
ضحكت..
بقى شويه وبعدين كام يريد يروح: حياتي لتشغلين بالي عليج ردي عفيه حتى اتطمن عليج اوكي؟
هزيت راسي اي.
عبدالله: معناها اني اروح، ولو اتمنى ابقى اكثر بس اخاف عليج من اخوج، شوكت بس شوكت تصيرين إلى ومحد اله حق يحاسبنه؟
مروه: الله كريم.
سلم وراح واني اباوعله ويائسه من وضعنه بس اكول عسى ولعل ربي يلتفت علينه ويرحمنه مااريد اتزوج واحد غيره ومااريد ينسد علي باب غرفه ويه واحد ثاني ومااريد احد يلمس شعره مني غيره. خلصت السنه اليوم حفلة تخرجنه ماجنت اريد اجي بس فرات وزينب كلولي روحي هي مره بالعمر واحنه نجي وياج ونجيب امي هم خطيه خل تغير جو.
جنت لابسه بنطرون اسود وقميص اسود قصير وفوكه ستره قصيره ودكم القميص والستره لونهم وردي وكعب اسود وبي ورده وردي وخليت مكياج كوووولش خفيف وردي.
كل شويه احد يجي يسلم علينه، اني منتظره منال تجي وعبدالله هم كال اجي.
اجت منال وكعدنه نسولف ونضحك اني وياها ومنتظرين عبدالله ماكو، وشويه واجه حيدر..
خربت الاجواء كولها وراح الحماس..
منال: شبيج غندبتي؟
مروه: شوفي منو اجه وانتي تعرفين??.
منال: منو هذا؟
مروه: حيدر ابن عمي.
منال: هذا الحلو ابن عمج؟
مروه: اي لج حيدر ابن عمي شبيج؟
منال: صاك والله، اني منج ياعبدالله ياحب اجلب بيه لحد ميتزوجني.
مروه: ياريت بهالبساطه، ياريت لو بكيفي احب واكره بس كلبي.
منال: الله شنو هالرومانسيه، بس والله ابن عمج حلو وكشخه مبين عليه شخصيه.
مروه: محامي غير، لازم شخصيه.
منال: امداج عندج هيج واحد وتدورين حب.
مروه: اكول، اكرمينه بسكوتج لان جاي باتجاهنه.
حيدر: السلام عليكم.
منال: وعليكم السلام اهلا وسهلا.
مروه: منال هذا حيدر ابن عمي.
منال: اي عرفته?? وهل يخفى القمر، اتفضل اكعد ويانه ليش واكف.
باوعتلها شبيها هاي اتخبلت..
هو هم جنه ماصدك سحب كرسي وكعد.
حيدر: مبروك التخرج بنات.
منال: اشكرك، يوم زواجك ان شاءالله.
التفتت عليها خزرتها.
حيدر: الله يسلمج اشكرج، بس اذا هي العروس ساكته وكلمه ماحجت شلون بعد نتزوج هههه.
منال: اهلا وسهلا، اني منال صديقة العروس.
مروه: اها، شبيج اتخبلتي؟
حيدر: ههههه اهلا وسهلا، اني حيدر العريس هههههه.
امي وفرات وزينب يباوعون علينه ويوزعون ابتسامات ويسولفون.
منال: اي حيدر شلونك؟ شخبارك؟
التفتت باوعت عليها هاي شبيها اليوم لاكفه.
حيدر: ماكو والله سلامتج، اخباري سوده مصخمه من وره صديقتج.
منال: صديقتي، اخ ياصديقتي، شالعه كلب الكل مو بس انت ابرودها.
حيدر: هههه هاي انتي الظاهر هم شالعه كلبج؟ بس تره صحيح بارده مو؟
خزرتها اني اريده يكوم قبل لايجي عبدالله وهي مسترسله وتسولف وتضحك وياه.
منال: بارده حاره ميخالف ماكو مثلها اموت عليها احلى واطيب صديقه شلون متكون احبها هو وين اكو مثلها.
حيدر: اي عفيه قابلين بكل شي، بس غير ترضى علينه وتخلصنه.
باوعتلها كتلها: شدعي عليج؟ ??
ضحكت منال حيل وهو هم ضحك.
باوعت عالساعه كمت سويت نفسي رايحه لامي بس ردت اشوف عبدالله اذا موجود ماكو.
بعدين رحت سلمت على اهل صديقتي واني واكفه وشفت عبدالله واكف ويه ولد بالاخير ويسولفون.
فرحت بس بنفس الوقت خفت رجعت لمكاني لكيت حيدر رايح كاعد يم فرات رحت كعدت يم منال وقربنه طاولة اهلي واهلها حتى نكعد سوه.
مروه: نونه. نونه. نونه؟
منال: ها شبيج شكو؟
مروه: كلبي، كلبي يدك، شفت عبدالله جاي.
منال: وين؟
مروه: بالاخير ورانه واكف.
منال: شافج؟
مروه: ماادري بس اتصور شافني ممعقوله كمت وافتريت ورجعت وماشافني.
منال: خطيه والله يكسر خاطري، كل احنه كاعدين سوه بس هو لا.
مروه: اسكتي انتي اخر وحده تحجي، توه مسوي نفسج متعاطفه ويه حيدر وتحجين على هواه وخليتيه لزك يمنه كعد.
منال: والله هسه بعد ماشفته هم كسر خاطري، يحبج ومتحمل برودج ومنتظرج هاي رابع سنه وماكال اخ راسي وجماله حلو وشخصيه شتردين بعد؟
مروه: انتي وياي لو وياه؟
منال: اني ويه الحق.
مروه: الحق برأيج اعوف عبدالله اللي متحمل مثلي ويمكن اكثر مني ضغط وحجي واروح اقبل بحيدر؟ الحق ادوس على كلبي واتجاهل مشاعري واعيش ويه انسان مااحبه بس لان كاسر خاطري؟
منال: والله ماادري اثنينهم كاسرين خاطري وماادري شنو الحل.
مروه: واني ماكاسره خاطرج هذا احبه ويحبني واهلي ميقبلون بي وهذا يحبني واني مااحبه واهله قابلين بي زيردونه، ظاله لابالجنه ولابالنار وعلى ياساعه يكلولي باجر خطوبتج.
منال: الله يساعدج حبي والله وضع صعب.
كامت منال شويه درت اني على امي اسولف وياها.
امي: شكد حلوين وانتو كاعدين سوه مساع انتي وحيدر.
مروه: هاا يوم هااا، على بختج هيج تكولين وانتي تعرفين كل شي تدرين بيه مااحبه فدوه اروحلج لاتحجين هيج ولاتشجعين زينب وفرات على تصرفاتهم لان تشلعين كلبي تقبلين كلبي ينشلع؟ قبل جان احمد واكفلي هسه من راح عفتيني؟
طاحت دموعي هي سكتت وضاجت خطيه.
التفت شفت عبدالله بعده واكف يباوعلي يأشرلي بعيونه شبيج؟
هزيت راسي ماكو شي.
درت شفت حيدر يباوعلي كلبي وكع برجليه كلت اكيد شافني اباوع لعبدالله وعبدالله يباوعلي.
اجه كعد بمكان منال كال: شبيج تبجين؟
مروه: مابيه شي، بس اتذكرت احمد.
حيدر: الله يرحمه..
سكتنه شويه بعدين كال: مروه، نحجي شويه بجديه؟
مروه: احجي.
حيدر: خل نكوم نطلع بره شويه هنا هوسه.
مروه: زحمه امي كاعده وفرات شلون اكوم وياك؟
اني جنت اتحجج بس هو مينطي مجال لعذر راسأ صاح على امي: عمه ميخالف اخذ مروه نروح نحجي بره؟
امي باوعتلي تدري بيه مااريد فاتحججت بفرات.
امي: اسأل اخوها حبيبي بكيف اخوها وبكيفها.
كلت امي على اساس طلعتلها عذر خلتها بيد فرات.
رأسا صاح على فرات: فرات؟ احنه رايحين بره نتمشى من رخصتكم.
فرات ضحك هو وزينب.
فرات: هههه على اساس انت تخاف تاخذ رخصه وموافقه دروح روح.
حيدر: لا مو الجماعه يتحججون.
التفت علي: يالله كومي هاي اهلج وعشيرتج كلها قابله.
كمت على اعصابي هو اتحرك كدامي يمشي لاكيت منال باوعتلي كالت: ها وين؟
مروه: اسكتي ورطه يريد يحجي وياي بره.
منال: لابربج، وهذا الواكف هناك وصار ساعه يسألني شبيها تبجي.
مروه: ابجي على حظي كليله.
خليت ومشيت هو واكف ينتظرني وصلت يمه وعبرت على عبدالله واني مدنكه وهو مدنك بس حسيت دموعي بس ارفع راسي تطيح.
من وصلت اجه واحد سلم على حيدر مااعرفه وعرفني عليه اخو صديقه هم محامي ومن عرفه عليه كله: مروه خطيبتي وبت عمي.
الولد: اهلا وسهلا.
اني ساكته مااكدر انطق بحرف عبدالله واكف ورانه واكيد اذنه يمنه وسمع حيدر واني المصيبه طالعه وياه شيكول عني هسه تلعب علينه اثنينه.
دموعي وصلت حدها اريد امسحها قبل لاتوكع وتفشلني درت وجهي امسحها صرت بوجهه، دنكت ومسحت عيوني.
هو يباوعلي وعاكد حواجبه ظليت اباوعله هو دنك واني درت وجهي حيدر سلم عالولد وطلعنه..