رواية حكم القلب للكاتبة روز الفياض الفصل السادس
ظليت محتاره شحجي حتى امي متحس اعرف بجيتهم بس فعلا ماادري منال جايه وياهم.
بدلت ملابسي لبست بنطرون وستره وخليت مكياج خفيف ورتبت شعري ودخلت سلمت عليهم وكعدت.
مروه: نونه كلبي احسه حيوكف من الرعب.
منال: اسكتي لتخافين ماكو شي يخوف اصلا هو مفهم امه كل شي، مراح تحجي شي يبين انه انتو تحبون بعض فلتخافين واهدي.
مروه: الله يعديها على خير.
بدوا يحجون ويسولفون.
ام عبدالله: ام احمد احنه جايين علمود المحروسه مروه نخطبها لابني عبدالله اني قبل فتره شفتها يم بيت ام منال جيرانه وعجبتني وحجيت لابني راح شافها من بعيد بالكليه وعجبته وسألت منوله عنها كالت ممخطوبه وخوش بنيه.
امي: اي اهلا وسهلا بيكم نورتونه.
ام عبدالله: ابني يدرس طب هالسنه يتخرج ان شاءالله وابوه دكتور(، ) وعندي اربع اولاد كلهم يدرسون والحمدلله وماعندي بنات وعبدالله اكبرهم.
امي: هلا بيكم اتشرفنه احنه هم 3 اولاد وبس مروه عدنه بنيه وهوايه يجوها والله بس نكول بعدها زغيره ومدلله خل تكمل دراستها وبعدين لاحكه.
ام عبدالله: واحنه ماعدنه مانع تكمل دراستها مثل مكتلج عبدالله يدرس طب يعني دكتور ان شاءالله يعني اكيد يريد زوجته مكمله دراستها وعدها شهاده.
امي: الله كريم اني العليه انقل الحجي لابوها واخوانها لان هم بيدهم الحل والربط تعرفين.
ام عبدالله: اي اكيد اكيد ان شاءالله بس الفرح ياربي اني والله من شفتها دخلت كلبي وحبيتها الله يجعلها من نصيبنه يارب.
امي: البي خير يقدمه رب العالمين ان شاءالله.
ام عبدالله: ان شاءالله يالله احنه نترخص ونبقى على تواصل ان شاءالله عن طريق منال.
امي: ان شاءالله واهلا وسهلا بيكم وحياكم الله.
سلموا وطلعوا واني محجيت ولا كلمه امه لحدما طلعت تباوعلي تتفحصني ووياها خالته وبنت خالته.
راحوا اني غلست سويت نفسي عادي اجت امي كالت: مبينين خوش ناس بس انتي وقسمتج.
مروه: الله كريم هو بالنهايه زواج يعني لازم تفكير وسؤال وموافقه.
دخل احمد كال: ها منو خطاركم؟
امي: خطابه على مراوي ناس جيران بيت منال صاحبتها.
احمد: منين من بيتمن؟
امي: كالت ابوهم اسمه دكتور(، ).
احمد: دكتور معروف.
امي: شمدريني هو ابوهم دكتور والولد هم دكتور وهالسنه يتخرج.
احمد: اممم. وشكتولهم؟
امي: مكنالهم شي كتلها يجي ابوها واخوانها ونبلغهم وننطيكم خبر.
احمد: اي بس بعدها زغيره وينها ووين الزواج وانتي تدرين بيت عمي من دخلت كليه حاجوا ابوي عليها.
امي: قابل وافقنه هسه احنه؟ بس خوما اكول للمره ماعدنه بنات للزواج روحي.
وعمك حجه وبعدين سكت هاي 3 سنوات شمنتظر يعني بعد؟
فرحت من حجي امي بلكي تكون من جانبي وتحاول تقنعهم.
بالليل اجوا فرات وحسين وابوي وكعدنه نتعشى وعالعشا حجتلهم امي..
فرات: وليش مكتيلها مخطوبه؟
امي: شلون اكللهم مخطوبه وهي ممخطوبه شنو هالخطوبه المتدري بيها العالم؟
ابوي: هي لابن عمها هاي منتهين منها بعد ميحتاج خطوبه وماخطوبه.
امي: لاعيني ميجوز احجي هيج للناس يجوز بيت اخوك غيروا رايهم يجوز الولد ميريدها يجوز امه متقبل..
غصيت من سمعت حجي ابوي وكفت اللكمه على كلبي.
محد سألني شي ولا حتى اخذوا رأيي.
فرات: حتى لو ميريدها وحتى لو مخطبوها عمي تعرفون عقليته مراح ينطيها لواحد سني.
احمد: شهالحجي هذا؟ حرام شنو سني شنو شيعي.
فرات: اي مو بكيفك هذا واقع همه مينطونه ليش احنه ننطيهم؟
امي: هسه بعد وكت على هالحجي خل نسأل عالولد ونشوف شنو وضعه وبعدين الله كريم.
فرات: شنسأل بابا كليلها من هسه وفضيها زين لو مو زين مو مهم شنو احسن من ابن عمها هو حتى نرفض ابن عمنه علموده؟
ابوي: باجر احاجي عمها حتى اذا بيهم نيه يجون من هسه يخطبون ويخلصونه حتى لايوميه واحد جاي داك بابنه.
احمد: مروه انتي شتكولين؟
حسين: شتكول ابن عمها احسنلها من الغريب يدير باله عليها ويحافظ عليها وميأذيها الغريب شنعرف عنه.
احمد: ادري غير هي تقرر خوما بكيفنه.
ابوي: وهي وين تلكي احسن من حيدر صح مو دكتور بس هم عنده شهاده محامي ومرتب ومؤدب.
احمد: الله كريم يابه خل نسأل عالولد وبعدين نقرر.
فرات: روح انت اسأل اذا تريد اني بالنسبه إلى من هسه مموافق.
ظليت ساكته وكلبي يدك من الخوف والقهر هاي اولها فرات وحسين واكفين ويه حيدر وابوي يخاف من عمي صاروا 3 ضدي احمد وامي وياي بس شخصيتهم ضعيفه مراح يقاومون هوايه.
مرت كم يوم احمد سأل هو وحسين عن عبدالله واهله.
احمد: والله يكولون خوش ولد مؤدب وخوش ناس.
حسين: وبيتهم حلو من بره جبير حيل وسياره بالباب ومشفنه احد طب لو طلع منهم بس اني رحت سألت ابو المحل يمهم كال والله ناس بحالهم والولد مؤدب وخوش ولد.
بقينه كم يوم واخاف اسأل امي شنو قرروا وشنو كالوا وام عبدالله مااتصلت تسأل عن الجواب.
اتصلت منال: ها بشري شنو كالوا؟
مروه: ماادري سكته بس شكلهم مموافقين وفرات اول واحد هو وابوي بس سمعوا كالوا ابن عمها احسن.
منال: الله كريم ان شاءالله يوافقون.
مروه: اخاف اسأل امي شنو جوابهم.
منال: لا لتسأليها اني هسه اخابر ام عبدالله واكللها تتصل بيكم وتشوف شنو جوابهم.
مروه: والله كلبي من الخوف يركع.
منال: يالله اتحملي وصيري قويه ولتبينين شي كدامهم ابد.
مروه: الله كريم.
ثاني يوم اتصلت ام عبدالله وامي كلتلها: والله اخوانها موافقوا يكولون بعدها زغيره خل تكمل دراستها وبعدين الله كريم.
ام عبدالله: ما عدنه مانع تكمل ام احمد عيني خل تكمل براحتها.
امي: والله شكولج ماكو نصيب اختي ام عبدالله الله يوفقه ان شاءالله ويلكه بنت الحلال اللي تناسبه.
اني من سمعت امي كالت هيج رحت لغرفتي سديت الباب وكعدت مااريد ابجي كدامها وتعرف.
بنفس اليوم منال اتصلت.
منال: هاي ولج شلونج؟ شلون معنوياتج؟
مروه: يامعنويات؟
بجيت بدون صوت ومسحت دموعي.
منال: مروه، مراوي حبي لتبجين توه اتصل بيه وكلي كليلها تصبر بعد كم يوم وادز امي من جديد ان شاءالله.
مروه: ولج ميقبلون اعرفهم مراح يقبلون فرات صديقه لحيدر يعني مراح ينطي بي وراح يحرض ابوي عالرفض وحسين زغير عربانه بكيفهم يمشي بس احمد واحمد فقير ميكدر يوكف بوجه ابوي وعمي.
منال: الله يهديهم ويوافقون لتبجين كطعتي كلبي شبيدي عليج هو احسن منج متفائل انتي كولش قافله.
مروه: لان اعرف اهلي واعرف تفكيرهم وهسه بس يعرف عمي يكول هذا سني شلون نقبل بي.
منال: عمج هذا ينرادله سحل.
مروه: اخ يامنال هاي اول مره وكلبي خلص شلون من يجون ثاني مره؟
منال: شوداج واتصلتي بذاك اليوم الاغبر؟
مروه: اي والله??.
بقينه كم يوم ورجعت ام عبدالله اجتنه هي واختها قبل لتجي بيوم منال اتصلت بيه كالت: عبدالله يكول باجر يدز امه تجيكم وهو راح يوصلها ويريد يشوفج.
مروه: لا مستحيل لا فدووه اخاف مااكدر.
منال: شبيج بت الاوادم خل اكمل حجي.
مروه: كملي شنو؟
منال: لو تطلعين انتي تفتحيلهم الباب لو تصعدين من السطح باوعيله.
مروه: لا ماافتح الباب مااريد ابين اعرف بجيتهم مااكدر اخاف بس احاول اباوعله من السطح.
من اجوا ودخلوا شفت امي يمهم صعدت عالسريع باوعتله من السطح شفته بس مشافني منتجي عالسياره ومدنك ظليت محتاره شلون اخليه يحس اني فوك حتى يرفع راسه ويشوفني اخر شي رفع راسه رفعت راسي شوويه سويتله بأيدي هلو هو ضحك اشرتله باي ونزلت ركض.
اسمع حجيهم جوه امي وامه وخالته يتناقشون شويه وطلعوا راحوا.
امي: لج مروه؟
مروه: نعم؟
امي: هاي المره نفسهم بيت الدكتور اجت مره ثانيه تخطبج لابنها.
سكتت ومن اجو بالليل حجتلهم امي.
فرات: شلزكت مو كتيلها مموافقين؟
امي: قابل اطردها يايمه ميصير.
فرات: كليلها مخطوبه. كليلها ابن عمها ناهي عليها.
احمد: امشي لك شنو ابن عمها ناهي عليها بالله مارادها بعدين شنكول للناس ندمر مستقبلها يعني؟
فرات: لا رايدها اني اليوم حجيت وياه كلي منتظرها تكمل الكليه يالله.
يمه كلبي انعصر من حجيه ياريت مااكمل الكليه ياريت ارسب حتى يبقى ينتظر.
امي: ماكو ناهي عليها شنو هالحجي تريد تعم عالبنيه يريدها يخطبها رسمي مو بس حجي ميريدها خل يكول من هسه حتى نعرف شنحجي من يجون عليها ناس خومنبقى ياهو يجي نرفضه وهي باقيه وقف لبيت ابو حيدر..